شاعیر: سابیری
کتێب: دیوانی سابیری
سەرناو: موسوڵمانان لە ڕێگەی شەرع و دین دووری و بەری تاکەی

موسوڵمانان لە ڕێگەی شەرع و دین دووری و بەری تاکەی؟ 
حەیا و شەرمێ بکەن دووریی خودا و پێغەمبەری تاکەی؟ 


لە شاری عوشرەتا مەستی لە بازاڕی تەمەع چوستی
لە خانەی تاعەتا سستی میسالی سەرسەری تاکەی؟ 


بەزاھیر ڕەنگی ئەییوبی بە باتین جەنگ و ئاشووبی
بە سوورەت حەزرەتی مووسا بە سەنعەت سامیڕی تاکەی؟ 


دەمت تەسبیح و تەھلیلە دڵت بازاڕ و ئۆتیلە
تەریقی لای محەممەد بی بە عیسا موشتەری تاکەی؟ 


بە ڕۆژ تەسبیح و سەججادە بە شەو تەدبیری سەر جادە
خەجاڵەت بی نەجیبزادە، لە ئیرسی ئەب بەری تاکەی؟ 


لە بێھۆشی و سەرگەرمی، لە مەغرووری و بێشەرمی
لە دونیا و قیامەت بێ خەبەر ئاخر شەڕی تاکەی؟ 


بە دەم سۆفی بە دڵ عاسی تەریقی عامی و خاسی
لە چۆڵی غەفڵەتا کاسی، کەر و گا پەروەری تاکەی؟ 


لە تەعلیمی سواریدا جەوان و چاپکی ئەمما
لغاوی ئەسپی نەفست کە بڵێ تەنپەروەری تاکەی؟ 


بە ڕۆژ مەردی خوداناسی بە شەو جەردەی دز و عاسی
وەرە تا باوەڕ و کاسی، ڕەوشتی کافری تاکەی؟ 


کوڕی نەفست لە شیری دایکی دونیا ببڕەوە سابیر
لە میوە و مەوھیباتی ڕەحمەتی ڕەحمان بەری تاکەی؟

++++++++++++++++++++++