شاعیر: سابیری
کتێب: دیوانی سابیری
سەرناو: ئەی شێخی تەکیەزل و خانومانی دین بچووک

ئەی شێخی تەکیەزل و خانومانی دین بچووک
وەی پیری دەعیەزل و گرانجان و عەقڵ سووک


بۆ مەنفەعەت ئەچیتە پێشەوە برا گەورەکەم
ڕۆژی سەخا ئەکەویتە دووا وەک برابچووک


ئەمڕۆ بە باڵ و پەڕی دەوڵەمەندی ئەفڕی و سبەی
باڵ و پەڕت لە دۆزەخا ئەبێ ھەڵەپڕووک


چونکە خودا گرانی و حوڕمەتێکی دا بە تۆ
لائیق نییە بڕوانییە ئێمە بە چاوی سووک


سەد کە ساحیبی دینار و دەرھەم و شەوکەتی
وێرانە باغ و زەراعەتی دینت بە دووک و شووک


ھەرچەندە گفتوگۆم خۆش نییە لە کن عەوام
بۆ عیللەتی دەروون خاسترە لە حب الملوك


باوەڕبکە قسەکانم ھەموو کۆک و بێ غەشە
گەر عەیبی لێ ئەگری وەرە بکۆکە چرووک


ھەرچی بڵێم بە قەوم و بێگانە فوجئەتەن
ئامادە لەسەر چۆک و ئەمدەنە بەر چەپووک


ھەر پووکەپوکتە گوێزی پووک ناشکێ بە پووک
ئەی پیری سەرسپی سووکەسووک مەکە لە دەوری بووک


خامۆش سابیری کە نەسیحەتشنەو نەما
نووسراوی خۆت بشارەوە مەزرووف و سەر بلووک!

++++++++++++++++++++++