شاعیر: سابیری
کتێب: دیوانی سابیری
سەرناو: دڵ نەخۆش و زامداری دەردی یارم ڕۆژ و شەو

دڵ نەخۆش و زامداری دەردی یارم ڕۆژ و شەو
گریە و شینە لەباتی کەسب و کارم ڕۆژ و شەو


ڕۆژ و شەو دێنن خەیاڵی حوسن و زولفی بۆیە وا
بێ قەرار و غوسسەبار و بێ ویقارم ڕۆژ و شەو


یا بە ئوممێدی ویسالم یا لەبەر دەردی فیراق
وا دەمێ شاد و زەمانێ بێقەرارم ڕۆژ و شەو


ڕۆژ و شەو تەفسیری ئایەی حوسن و زولفی یار ئەکەن
وا گەھێ فەرھاد و گەھ مەجنوونەوارم ڕۆژ و شەو


شەو لەبەر عیدی ویسال و ڕۆژ لە ئازاری فیراق
خواب و خۆراکم نییە سەبر و قەرارم ڕۆژ و شەو


پێی وتم مەگری کە ئازاری دڵت ساکین ئەبێ
ھاتە سوێ کۆنەبرینی ساڵی پارم ڕۆژ و شەو


لەو دەمە لەفزی کە جاری بوو، لە چاوم سەدھەزار
جۆگەلەی خوێن جارییە، بەحر کەنارم ڕۆژ و شەو


خۆی نواند و لێوی گەست و لێم بزربوو لوجئەتەن
فەتحی کرد و ڕۆحی برد و غوسسەبارم ڕۆژ و شەو


دەستی نایە سەر دڵم پرسی لە ئەسبابی مەرەز
تێگەیی وا لێدەدا نەبز و دەمارم ڕۆژ و شەو


خۆ لەناو ئاوێنە وا مەعلوومە دەرد و عیللەتم
ئینتیزاری ڕەحمەت و دەرمان و چارم ڕۆژ و شەو


چاوی ئاڵۆزە برۆی جووڵانەوە لێوی گەزی
پەنجە دەبزێوێ شوکر مەستە خەسارم ڕۆژ و شەو


چاوەڕێمە چونکە وەعدەی ڕۆژی وەسڵی دا شەوێ
وا بە دائیم کاتیبی لەیل و نەھارم ڕۆژ و شەو


شەو لەبەر جەژنی ویسال و ڕۆژ لە ئازاری فیراق
خواب و خۆراکم نییە وەڵلاھی یارم ڕۆژ و شەو


شەو کە دەنگی ھەلھەلەی دڵ ھات و سابیر ڕاچەنی
خۆ بە بێ حیکمەت نییە وا ئینتیزارم ڕۆژ و شەو


سابیری لەوساوە ئەو دڵدارە وەعدەی داوە پێم
ئینتیزار و کاتیبی لەیل و نەھارم ڕۆژ و شەو

++++++++++++++++++++++