شاعیر: حافز کتێب: دیاری مەهاباد سەرناو: ستایش بۆ یه‌زدانی مە‌زن سەبارەت: نووسین و ئامادەکردن: کەماڵ ڕەحمانی - دیاری مەهاباد، چاپی سێیەم، ساڵی ١٣٨٦ لاپەڕە ٢٢تا٢٧. حەمد بۆ خوای بەرز و بێ هاوتا خالیقی مەخلووق بێ باک و تەنیا ڕاگری زەوی و حەوت ئاسمانە بەری لە وەهم و شک و گومانە بە قودرەتی خۆی لە یەک قەترە ئاو جوانترین بەشەر دێنێتە بەرچاو ڕۆزی ئەو دەخۆن گەلی گیانلەبەر هەر بەدەس ئەوە قازانچ و زەرەر هەرچی ئەو بیدا نابڕێتەوە هەرچی ئەو بیبا ناگەرێتەوە بە یەکێ ئەدا ماڵی زۆر و گەنج بە یەکێ ئەدا موشەققەت و ڕەنج یەک بەخێو ئەکا بە ناز و نیعمەت یەکێ دەخاتە ژێر باری زەحمەت یەکێ تێر دەکا لە گۆشت و پڵاو یەکێ کوێر دەکا بۆ چۆڕێ شۆرباو یه‌کێ گەڕانی بە کادیلاکە یەکێ بە پێیان ماندوو و هیلاکە یەکێ ڕادەخا فەڕش لە بەر پێ یەک لە سەر حەسیر گیانی دەردەچێ یەک سووڕانەوەی بە تۆیۆتایە یەک ماندوو و مردوو هەتا هەتایە یەکێ ڕادەخا فەڕش لە بەر پێ یەک لە سەر حەسیر گیانی دەردەچێ یەک سووڕانەوەی بە تۆیۆتایە یەک ماندوو و مردوو هەتا هەتایە یەکێ بەدەنی وەک گرێ دارە یەکێ دوازدە مانگ لەشی بێمارە یەکێ منداڵی زۆر و بێ‌خێرە یەکێ تا دەمرێ هەر وەجاغ‌کوێرە یەکێ لە باخەڵ ناسک و نازدارە یەک هاورێ لەگەڵ ورچی نێو غارە یەکێ پەریڕوو دێتە باوەشی یەک دێڵەدێوێک بۆتە هاوبەشی یەکێ دەکاتە گەورەی خاس و عام یەکێ دەنوێنی لە توونی حەمام بە یەکێ ئەدا عەقڵی ئەفلاتوون یەکێ دەکاتە واریسی مەجنوون یەکێ دەکاتە قوتبی ڕەببانی یەکێ دەکوژێ بە بێ‌ئیمانی یەکێ زانایە ژیانی تاڵە یەک گەوج و نەزان بە ماڵ و حاڵە یەکێ دانیشتووی کۆشک و تەلارە یەک بە ئەرمەنی و جووش قەرزدارە یەکێ حیسابی ڕەد بوو لە میلیارد یەکێ شک نابا لە ماڵ پووتێ ئارد یەکێ شیکترین جل لە بەریایە یەک لە تەندوور خەی بۆسۆی لێ‌نایه یەک گرانترین پارچەی دادڕی یەک توورەکەی سواڵ ئەستۆی دابڕی یەک کۆشک و سەرای لێ بەجێماوە یەک شارەداری لە قەبری ناوە یەک بە دەست و دڵ، یەکێ چروکە یەک ئێسک‌گران، یەک ڕەزاسووکە یەکێ دەست لە مل یاری چاوبازە یەک چاوی خێل بوو لە بەر دەروازە یەک ماڵی پڕە لە نەفت و گازۆڵ یەک هەڵدەلەرزێ لە بەر سەرما و سۆڵ یەکێ خاوەنی سەروەت و ماڵە یەکێ تا دەژی ڕووت و ڕەجاڵە یەکێ خاوەنی پێژۆ و پەیکانە یەکێ لارەمل لە قوون دەرکانە یەک بە دەستی پڕ بۆ ماڵ دێتەوه یەکێ بە بێ‌شێو سەر دەنێتەوە یەکێ بێ‌حەدد و حیسابه ماڵی یەک بەخێو دەبێ بە نانی سواڵی یەکێ دەباتە نێو ئاپارتومان یەکێ دەڕزێنێ لە کونجی زیندان یەکێ ئارەقەی نایەتە نێوچاو یەکێ دەبرژێ لەبەر سوورەتاو یەکێ خاوەنی سەروەت و ماڵە یەکی تا دەمرێ ڕووت و ڕەجاڵە بە یەکێ ئەدا دینار بە خەڵوار یەکێ سەگ و نان دەکا قەرزدار یەکێ نان لە دەم سەگ دەڕفێنێ یەک هەزار هەزار پوڵ دەدۆڕێنێ یەکێ سوبحانەی هەنگوین و ڕۆنە یەکێ سێ ژەمەی شیرێژی کوونە یەک پارچەی نایاب دەکاتە بەرگی یەک لەبەر ڕووتی دەخوازێ مەرگی یەک پووڵ و پارەی بە سوود دەگەڕێ یەک سەری مانگێ ڕەنگی دەپەڕێ یەکێ ڕۆژ شەو مەست و سەرخۆشه یەک لە سوێی گۆشت و چەوری نەخۆشە یەکێ نەهاری قەل و مریشکە یەکێ دۆی ترش یا نانی ویشکە یەکێ مەکینە بەرگی دەشۆرێ یەک لە دەستەنگی ژنی دەتۆرێ یەک هەموو ساڵێ دەچێ بۆ حەجێ یەکێ بەربینگی دەگرێ پوورخەجێ یەک پوڵی زۆره ژنی دەدەنێ یەک ماوەی ژینی دەنوێ بە تەنێ بە یەکێ ئەدا چەند دەستە خانوو یەک دادەمێنی بۆ کرێ‌خانوو خۆی لە هەموو کەس باشتر دەزانێ مەرد دەباتە لای نامەرد بۆ نانێ خوا نەکا هەرگیز بێژن: خوایە! بۆ وات کردووە و لەبەرچی وایە؟ ++++++++++++++++++++++ سەرناو: پەندی پێشینیان سەبارەت: نووسین و ئامادەکردن: کەماڵ ڕەحمانی - دیاری مەهاباد، چاپی سێیەم، ساڵی ١٣٨٦ لاپەڕە ٢٨. پەندی پێشینیان خۆراکی گیانه مۆسیقای دڵه‌، باخچه‌ی ژیانه‌ پەندی پێشینیان یادگارییە میراتی کۆنی کوردەوارییە پەندی پێشینان بەڵگەی خەباتە دیاردەی مێژووی گەل و وڵاتە پەندی پێشینان گەلێ پیرۆزە مایەی شانازی بۆ گەل و هۆزە ئەگەر قسەی حەق لە من دەپرسی؟ تێر ئاگای نییە هەرگیز لە برسی بەقەول و قەرار قەت مەخۆ فریو بە هیوای جیران، ویشکە تێکوشیو گوێ بگرە زەریف! بۆ ئەم نەزیلە مەسپێره هەرگیز دووگ بە پشیلە هەرچی خۆت نەیکەی بێ‌سودە کاکە بە دستی خەڵکی مار بگری چاکە لە نێو خاس و عام ئەم قسه زۆرە ماڵی خۆنەخۆر بۆ چەکمەبۆره لای گەوج و نەفام نەسیحەت بایە یاسین بۆ گوێلک، بلوێر بۆ گایە ئەو کەسەی کوورەی نەوسی لە جۆشە وەک کەری ماندوو مەحتلی جۆشە ناتەواوی هۆی قڕه و جەنجاڵە بەلام سفرەی پڕ هێمنی ماڵە کە ناعیلاجی ڕووی کردە ماڵت حەریفی دایکت دەکەی بە خاڵت ++++++++++++++++++++++ سەرناو: پیاوی قەرزی کۆن و خزمی دوور وڵات سەبارەت: نووسین و ئامادەکردن: کەماڵ ڕەحمانی - دیاری مەهاباد، چاپی سێیەم، ساڵی ١٣٨٦ لاپەڕە ٢٩. پیاوی قەرزی کۆن و خزمی دوور وڵات دێنێتەوە بیر گەر زۆری بۆ هات خزم بە کاری قیامەت نایە مەعلوومە دنیا هەر بۆ دنیایە بەو کەسە دەڵێن عاقڵ و وشیار دوو جار لە جێیەک پێوەی نەدا مار بە کەسێک دەڵێن عەقڵی تەواوە خەمی نان بخوا شوتی هەر ئاوە جارێکت خواردم بە سندانت بێ دو جارت خورادم نۆشی گیانت بێ گاڕانەکەیان ڕادا بە زۆری تازە دەپرسێ له مانگا بۆری ئاوری بن کایە بۆسۆی لێ نایه دزی خۆماڵی لە گرتن نایە دز و خاون ماڵ گەر ببنە هاودەست گا لە رۆچناوە دەردێنن بێ‌هەست ئەگەر بکەویه بەر هەڵمەتی شێر قەت پەنا مەبە بۆ رێوی بێ‌خێر ++++++++++++++++++++++ سەرناو: جوابی قوزەڵقۆرت، سندان و دەردە سەبارەت: نووسین و ئامادەکردن: کەماڵ ڕەحمانی - دیاری مەهاباد، چاپی سێیەم، ساڵی ١٣٨٦ لاپەڕە ٣٠. جوابی قوزەڵقۆرت، سندان و دەردە پێشینە دەڵێن جێی کڵو بەردە وەختێک دەزانی مەعنای حەوسەلە بە کەوچکە ئاوێ نەکەویه مەلە زانیت کە حەریف له خۆت زیاترە شەڕی خۆتڕێن نەکەی چاتره دەستێک نەتوانی بیبڕی لە بێخ دەبێ‌ ماچی کەی وەک جەنابی‌ شێخ مردم لە داخی ئەو زل پانێره خۆی کردە وشتر لە ترسی گێره وا مەشهوورە ساڵ هەوەڵ بەهاری خۆشی و ناخۆشی دەکا دیاری نەهاتە بەربار ئەگەر کەری زل بۆخوت بۆی بەرە بە شان و بە مل وایان فەرمووە پیاوانی زانا کۆسە چوو بۆ ڕیش سمێڵی دانا بیستوومە لە زۆر پیاوانی ماقووڵ شەر بە شمشێر و مامەڵە بە پووڵ ++++++++++++++++++++++ سەرناو: میوان نایەوێ سفرە ڕەنگین بێ سەبارەت: نووسین و ئامادەکردن: کەماڵ ڕەحمانی - دیاری مەهاباد، چاپی سێیەم، ساڵی ١٣٨٦ لاپەڕە ٣١ میوان نایەوێ سفرە ڕەنگین بێ نانت جۆیین بێ، خوڵقت گەنمین بێ پیاوی میوانگر چوو بۆ هەر جێیه بێ‌منەت نان و خوانی خۆی پێیه هەڵاتن عەیبە بۆ پیاوی شەڕکەر بەلام هێندێ جار پێی دەڵێن هونەر خودای تەعالا کار بێ جێ ناکا تا کێو نەبینێ بەفری تێ ناکا بۆ ئەم نەزیلەش گوێ رابدێرە چێشتی پڕ کابان بێ خوێ یا سوێره کەسێ نەگبەتی بێتە سەر شانی پەڵووڵە بخوا دەشکێ ددانی ئەگەر گڵوڵەی تۆ کەوتە لێژی بە تەما مەبە کەس خاست بێژی حەز دەکەی دوور بی له گێره و کێشه به قەد بەڕەی خۆت پی ڕابکێشە پێم خۆشە گورگی وڵاتەکەی خۆم بمخوا نەوەکوو شێری عەرزەڕۆم ++++++++++++++++++++++ سەرناو: ئەی خوێن مژی گەل! تا زووە بمرە سەبارەت: نووسین و ئامادەکردن: کەماڵ ڕەحمانی - دیاری مەهاباد، چاپی سێیەم، ساڵی١٣٨٦، لاپەڕە ٣٢. ئەی خوێن مژی گەل! تا زووە بمرە دەڵێن سەگی هار چل شەوی عومرە زگ گورگی سەر مەڕ! بۆ وا فه‌قیری؟ خۆ تۆ هەوێنی نۆ مەنجەڵ شیری! هەرچی مێروولە کردی بە ساڵێ وشتر لێسی دا هەر بە قەپاڵێ ئیش بە بێ زەحمەت مەحاڵە بوونی پێاو ماسی بگرێ تەڕ دەبێ قوونی ئاوت خواردەوە جارێک لە کانی بەردی تێ مەخە، خۆ تۆ ئینسانی! لەگەڵ کێ خواردت چایه‌کی تاڵی خەیانەت مەکە بە سەر و ماڵی خۆت ناحەز مەکە لە کن تەڵەبکار حیساب بە دینار، بەخشین بە خەڵوار هیچ عەیب ناکەی! دەبوو داڕزی ڕەفیقی قافڵە و شەریکی دزی! شایی لەگەڵ گورک ئەکەی بە درۆ بۆ مەڕیش دەکەی شیوەن و ڕۆڕۆ ++++++++++++++++++++++ سەرناو: هیوام پێت نییە زل و بێ‌خێری سەبارەت: نووسین و ئامادەکردن: کەماڵ ڕەحمانی - دیاری مەهاباد، چاپی سێیەم، ساڵی١٣٨٦، لاپەڕە ٣٣. هیوام پێت نییە زل و بێ‌خێری بە کەر ناوێری، بە کورتان شێری. ئەوی دۆست دەیکا، پێی ناکرێ دوژمن هەر جارێک ناشتا دەکا درۆزن پیاو بە خزم و دۆست دەبێ کۆڵەوار ناقەڵشێ، هۆرە لە خۆی نەبێ، دار جێی مست و زلـلـە، پێلەقە و شەقه لە قەدیمەوە قسەی حەق ڕەقە لەگەڵ ئەم بیر و باوەڕە چۆنی؟ دەڵێن چێشتی خۆش دیارە بە بۆنی. زۆر بە نەفامم دێتە بەر نەزەر کەسێ لە ئەسپ دابەزێ بۆ کەر دار ویشک دەبێ بە ئاواتی باز جارێک لە سەری بخوێنێ ئاواز. بیستوومە پاروو لە زار بکەوێ بۆ کۆش چاترە، نەک ئێرە و ئەوێ ناحەقی کرا لە منی هەژار جا فەڕقی چییە، چ گورگ و چ سوار ++++++++++++++++++++++ سەرناو: پێی ناوێ ئیتر ئەم فاک و فیکە سەبارەت: نووسین و ئامادەکردن: کەماڵ ڕەحمانی - دیاری مەهاباد، چاپی سێیەم، ساڵی١٣٨٦، لاپەڕە ٣٤. پێی ناوێ ئیتر ئەم فاک و فیکە ئەگەر یەزد دوورە خۆ گەز نیزیکە بچۆرە جێیەک هیچ کەس نەتناسێ خۆت هەڵبکێشە پڕ بە کراسێ بە ڕۆژ دەگەرێ بە کراسی کەتان بە شەو دەچێتە نێو کوڵی کورتان ئەوەی لە لای تۆ سووک و بەدناوە لە کراسی خۆی دا وەکوو تۆ پیاوە شۆین کڵاوی خوار مەکەوە خاڵە فەرز لەوێ بێ سوننەت بەتاڵە خۆ به کوشت مەدە بۆ پاروی گەورە بێ‌بەڵا نییە ئەو دووگە چەورە هیچ سودی نییە ئیشی بەپەلە هەر بو کاری خێر باشه عەجەلە دۆست ئەو کەسەیە کە بتگرێنێ دوژمن ئەوەیە پێت بکەنێنێ دوژمنی زانا دەتکا سەربڵەند دوستی بێ شعوور هەر دەتکا بە پەند ++++++++++++++++++++++ سەرناو: ئەو کەسە پیاوە بە خۆی نەخوڕێ سەبارەت: نووسین و ئامادەکردن: کەماڵ ڕەحمانی - دیاری مەهاباد، چاپی سێیەم، ساڵی١٣٨٦، لاپەڕە٣٥. ئەو کەسە پیاوە بە خۆی نەخوڕێ هیچ کەس لە پڕێ نەبوە بە کوڕێ مەشهورە دەڵێن بەرخ هەتا سەر لە بن سەوەتە نابێ دێتەدەر ناحەقتە ئەگەر هیوات نەبێ پێم من بەرخی نێرم بە کارت دەشێم بەقایان نییە ئەسپ و ژن و چەک بێجگە لە مانەش زۆرن بێ‌ئەمەگ نانت بخه بەر سەگی بێ‌زمان مەیدە بە پیاوی سپڵە و پێ‌نەزان ئەم قسه گەلێ کۆن و لەمێژە مردوو ئەگەر مرد لینگی درێژە لە قەدیمەوە ئەم قسە قاوە کۆیر هەتا دەمرێ بەتەمای چاوە دۆستی کەسێک بە کاتی فەرعانە بەجێت نەهێڵێ ڕۆژی تەنگانە ڕێوی بە تەنیا لە کوون نەدەچوو هەژگەڵێکیشی دەکێشا لەدوو ++++++++++++++++++++++ سەرناو: ئەگەر کووپەڕۆن بەتاڵ بوو سەری سەبارەت: نووسین و ئامادەکردن: کەماڵ ڕەحمانی - دیاری مەهاباد، چاپی سێیەم، ساڵی١٣٨٦، لاپەڕە ٣٦. ئەگەر کووپەڕۆن بەتاڵ بوو سەری گورپە وەفای بێ ناچێتە سەری ئەگەر مەیلیان بێ سوار و پیادە دەبن بە هاوڕێی کوێرەڕێ و جادە بەرگەکەم شڕە لێمان ببوورە کەوای سوور پڵاو دەخوا مەشهوورە ئەمەش فەرموودەی قەدیمێکانە بەرد لە جێگای خۆی قورس و گرانە قسەی قەدیمی لە کەس مەپۆشە دۆم هەتا ڕووت بێ مەزاقی خۆشە ئەگەر نەم دیبا جەنابی باوکت بێشک دەمردم، لە عەزرەت دایکت لە شار و لادێ ئەم نەقڵە باوە گیای شین بە جێگای سەختەوە ماوە ئەم قسە ئەگەر تاڵیشە حەقە دۆ هەتا زۆر بێ کەشک هەر ڕەقە دووڕوو هەر وایە پیشە و ڕەفتاری هەم لە ناڵ ئەدا هەم لە بزماری ++++++++++++++++++++++ سەرناو: ئەگەر دۆڕاندی پیاوی قومارکەر سەبارەت: نووسین و ئامادەکردن: کەماڵ ڕەحمانی - دیاری مەهاباد، چاپی سێیەم، ساڵی١٣٨٦، لاپەڕە٣٧. ئەگەر دۆڕاندی پیاوی قومارکەر نەڵێ بە گوونم دەبێ سەوداسەر قەدیمی دەڵێن بۆ دەستەوه‌ستان هیچ فەرقی نییە گەرمێن و کوێستان زۆری شوو لێ‌هەڵمەکێشە کاکە ئاو لە ئاوەڕۆ دەر نەکەی چاکە سەگ پشت ئەستوورە پەلامار دێنێ بە قەوەی کلکی ئێسک دەشکێنێ سەفەر و سەودا دوو بەڵگەی چاکن تاقی کەره‌وەی پاک و ناپاکن ڕەنگە دەرنەچی لە ئیمتحانم ئەگەر عەیبی تۆ تەواو بزانم عەیبەکانی خۆت بێتە بەرچاوی ڕەوا نابینی بە کەس بەدناوی مەشهوورە دەڵێن خزم بە ددان گۆشتیشت بخوا ناشکێنێ ئێسقان کەس بە ڕواڵەت لێت مرچ و مۆنە خوێن نابێ بە ئاو نەزیلەی کۆنە ++++++++++++++++++++++ سەرناو: هەر خوویەک مرۆ گرتی بە شیری سەبارەت: نووسین و ئامادەکردن: کەماڵ ڕەحمانی - دیاری مەهاباد، چاپی سێیەم، ساڵی١٣٨٦، لاپەڕە ٣٨. هەر خوویەک مرۆ گرتی بە شیری بۆی تەرک نابێ زەمانی پیری تازە خۆت دەکەی تووش دەردەسەری بە پیری سەری کەڵاش می‌کەری بۆ ئێشی بچووک قەت تێ‌مەکۆشە گۆم هەتا قوڵ بێ بۆ مەلە خۆشە ئەوەی نەفام و بێ هۆش و گوێیە کوتەک دەزانێ قۆناغی کوێیە ئەمینی خەڵکە پیاوی داوێن پاک ئالک زیاد دەکا لە خۆی ئەسپی چاک دۆستی به‌‌ڕاستی کوا ئەم زەمانە زۆرتری ڕەفیق بۆ نان و خوانە بە دەس مسی قاڵ بکەی بە هەویر نەک دەستە و نەزەر لە خزمەت ئەمیر ئاشی فرەخێو ئەوەندە دێنێ کاکی ئاشەوان خۆی بی‌قرتێنێ گەورەیی خەرجی پێویستە مەگری کێ بانی زۆرە زیاترە بەفری ++++++++++++++++++++++ سەرناو: وەک خۆهەڵکێشان عەیبێکی زلە سەبارەت: نووسین و ئامادەکردن: کەماڵ ڕەحمانی - دیاری مەهاباد، چاپی سێیەم، ساڵی١٣٨٦، لاپەڕە ٣٩. وەک خۆهەڵکێشان عەیبێکی زلە بە کروزانەوەش دێتەخوار پلە بەکەر ناوێرێ زلی بێ‌هونەر ڕەپەڕەپ دەکا لە کورتانی کەر دەزانم لای تۆ ئەم قسە تاڵە قەباڵە ئەگەر زۆر هات بەتاڵە هەتا قەباڵەی خوێندەوە، ڕێوی کەوڵی لە حاجەت خرا لە کێوی ئەوەی پاشملە شا سەر دەبڕێ شەرتە ئاشکرا قسەی دەربڕێ کەو ئەو کەوەیە بەرانبەر بە کەو بخوێنێ ترس و باکی نەبێ لەو لە مردن ترسی نییە کوری شێر هەر بۆ سەربڕین چاکە بەرخی نێر بەو مەرگە دەڵێن جێژنە پیرۆزە کە لەگەڵ گەل و ئاواڵ و هۆزە براگیان هێستا ئەسپ نەکڕاوە ئاخور هەڵبەستن خەیاڵی خاوە ++++++++++++++++++++++ سەرناو: هەتاکوو ماوین هەوڵێ هیممەتێ سەبارەت: نووسین و ئامادەکردن: کەماڵ ڕەحمانی - دیاری مەهاباد، چاپی سێیەم، ساڵی١٣٨٦، لاپەڕە٤٠. هەتاکو ماوین هەوڵێ، هیممەتێ من تۆم بۆ چییە لە قیامەتێ ئەوانەی خاوەن باخ و بێستانن خەجاڵەتباری چلەی زستانن گۆشت خۆرن هەموو دەعبای ئەم ناوە کەچی هەر نێوی گورگ بەدناوە تو پێت ڕەوا دیم ئەم کارە جوانە نەقڵی کەڵاشی مام ئاشەوانە دیارە هەموو کەس خۆشی دەوێ نان بۆ لە سەردڵی دادەنێ گاوان قەت لەشوێن چووان نەچێوە چاکە بەس لێرە و لەوێ کای کۆن بە با کە پیاو لە دۆستی کۆن نابێ واز بێنێ ئاو دەڕوا هەر زیخ بەجێ دەمێنێ ئاو بتبا مەچۆ سەر پردی نامەرد چش با بخنکێی بە سەد ئێش و دەرد پەسەندتر بووە چ ئێستا چ زوو ڕێوی گەریدە لە شێری نووستوو ++++++++++++++++++++++ سەرناو: ژنی ماڵانگەڕ دەکەوێتە سواڵ سەبارەت: نووسین و ئامادەکردن: کەماڵ ڕەحمانی - دیاری مەهاباد، چاپی سێیەم، ساڵی١٣٨٦، لاپەڕە ٤١. ژنی ماڵانگەڕ دەکەوێتە سواڵ پیاوی زگەڕوو قەت نابێ بە ماڵ وتیان: بە گورگ تۆ دەبی بە شـوان دەستی کرد بە قوڕپێوان و گریان وتیان: بۆ دەگری خۆ کەسپی چاکە وتی دەترسم درۆ بـێ کاکە نەم دیوە ئیشی هێندە ناقۆڵا بـە سەردڕی خۆی ناقایلە جۆڵا شوان دەڵێن شوانی پێ ئیفتیخارە نان چنینەوەی لا عەیب و عارە هەر کچیک دایک تاریفی دەکا بۆ خاڵی دەبێ شو بەوی دەکا بیستومە دەڵێن ڕەسووڵی ئەکرەم سڵاوی خوای لێ بێ هەموو دەم فەرمویە هەتا ڕۆژی قیامەت چوار شت لە چوار شت تێر نابێ قەت‌قەت ژن لە مێردی باش، زەوی لە باران ئینسان لە عیلم و چاو لە ڕووی یاران ++++++++++++++++++++++ سەرناو: مانگا با کەڵیش بگرێ بەدزی سەبارەت: نووسین و ئامادەکردن: کەماڵ ڕەحمانی - دیاری مەهاباد، چاپی سێیەم، ساڵی١٣٨٦، لاپەڕە ٤٢. مانگا با کەڵیش بگرێ بەدزی ئاشکرا دەزێ بێ دزی و فزی سێ شت خەم لە دڵ دەردەکەن تەواو ڕووی شۆخ‌وشەنگ و شینایی و دەم‌ئاو وەک فەرموویانە پیاوانی حاڵی قەت بۆ گا نابێ گوێلکی خۆماڵی پەندێکی تریش هەیە لەم بارە دەڵێن گای‌جووتی بە گوێلکی دیارە قەدیمی دەڵێن درشت و وردی: زۆر سەیرە گڵمەت بگری بۆ بەردی مریشک بۆ خۆی وەسەر نەکا خۆڵ ناکرێ بە سەریا بە هیچ شان و قۆڵ لە قەدیمەوە خواوەندی زانا بو هەر زاڵمێک زەواڵی دانا لە ئاشی زۆرت پێ چووە لە ڕێ وەپەلە کەوتووی زوو بگەیتە جێ لە سوورت دۆڕاند بەخێر نەیەوە لە کا خەریکی تێی هەڵدێنیەوە ++++++++++++++++++++++ سەرناو: ناچێ بەڕێوە ئاوا کاروبار سەبارەت: نووسین و ئامادەکردن: کەماڵ ڕەحمانی - دیاری مەهاباد، چاپی سێیەم، ساڵی١٣٨٦، لاپەڕە ٤٣. ناچێ بەڕێوە ئاوا کاروبار بەزستان قومار بە هاوین شەوکار سەرباری خەڵکە تەنبەڵی بێ خێر دەستی ماندووە لە سەر زگی تێر ئەمەش پەندێکی جوان و دێرینە نوێژکەر نوورینە، کارکەر شیرینە ئەو ڕۆژە هەر دێ سەرکەوی لە کەل بەو مەرجە بەجێ نەمێنی لە گەل وا مەشهوورە شوان هەتا بخەوێ مەرەکەی زیاتر لێ دوور ئەکەوێ نانێ ڕۆژ پەیدا بکە و نانێ شەو هەڵمەگرە هەرگیز منەت لەم و لەو هەو هەوی سواران هیچیان پێ‌نەکرا بە شڵپەشڵپی پیرێژن چ کرا دەزانی ئەوەی ژیر و بەبیرە خەتی خوار لە بن سەری گای پیرە شوێن بۆ سەر پیشەی خۆی دەچێتەوە گیا لە سەر پنجی خۆی دەڕوێتەوە ++++++++++++++++++++++ سەرناو: ئەمەش بزانە پیاوی وریا و ژیر سەبارەت: نووسین و ئامادەکردن: کەماڵ ڕەحمانی - دیاری مەهاباد، چاپی سێیەم، ساڵی١٣٨٦، لاپەڕە ٤٤. ئەمەش بزانە پیاوی وریا و ژیر شانازی ناکا بە باب و باپیر بە من چی دوێنێ باوکی تۆ خان بوو خاوەن دیوەخان سفرە و میوان بوو شەرتە تۆ ئیمڕۆ غیرەت بنوێنی بۆ خۆت بەڕەی خۆت لە قوڕ دەربێنی دز دیواری کۆن ئازا دەبڕێ بەڕە هەر لە لای تەنکی دەدڕێ ئیمڕۆ بخەوی بە تەمای سۆزی لە قوژبنێکا گەنجێ وەدۆزی ڕووبەڕوو دەبی لەگەڵ ژینی تاڵ چونکی به خەیاڵ کەس نەبوە بە ماڵ بە ڕۆژ بگەڕێی بە تاڵ‌وحەتاڵ شەو بە دستی پڕ ناچێوە بۆ ماڵ کێ ڕۆژی ڕووناک چرای هەڵکرا شەو نەوتی نابێ بیکاتە چرا تا شێوت چەورە دێنە دەورت کەس باوک بێ برا، ئامۆزا فرەس ++++++++++++++++++++++ سەرناو: سا وەرنە سەیری ئەم نەقلە خۆشە سەبارەت: نووسین و ئامادەکردن: کەماڵ ڕەحمانی - دیاری مەهاباد، چاپی سێیەم، ساڵی١٣٨٦، لاپەڕە ٤٥ سا وەرنە سەیری ئەم نەقلە خۆشە من دەڵێم نێرە ئەڵێ بیدۆشە زۆر کوتن قورئان خۆشە دیارە قسە هەزارە، دوویان بەکارە پێی ناوێ ئیتر ئەم بیت و باوە مزگەوت ڕووخاوە میحرابی ماوە کۆنەبەرگی خۆت پینە و پەڕۆ کەی نەک تازەی خەڵکی لە بەرەخۆ کەی هەنگوینی خەڵکی کە دەس نەدا بۆت قەناعەت بکە بە دۆشاوی خۆت پشیلە دەمی بۆ دووگ نەدەچوو دەیکوت پێم ناخورێ چەن سوێرە پەکوو سەگ ئەگەر نەمرێ لە قەسابخانە لێی زایە دەبێ ئەو عومرە جوانە برا وا چاکە نەیکەیە لایی برامان برایی کیسەمان جیایی سەر و ماڵ لە تۆم دریخی نییە بزن لە سەت تمەن هیچ کەمی نییە ++++++++++++++++++++++ سەرناو: پیاو ئەگەر لە ژن لە بەهانە بێ سەبارەت: نووسین و ئامادەکردن: کەماڵ ڕەحمانی - دیاری مەهاباد، چاپی سێیەم، ساڵی١٣٨٦، لاپەڕە ٤٦. پیاو ئەگەر لە ژن لە بەهانە بێ کارەکانیشی عاقڵانە بێ پێی دەڵێ ئەگەر ئارد دادەبێژی خۆت بۆ بادەدەی تۆ مەگەر گێژی کاکە زۆر بۆ لای خۆتی مەتاشە نەشیش بسووتێ نە کەباب باشە ناتەواوی هۆی قڕە و جەنجاڵە بەڵام سفرەی پڕ ئاشتیی ماڵە لێم ڕوونە کە تۆش نەبی بە یارم بە یاری خودا دەسازێ کارم کە وتیان خاسە زوو هەڵمەماسە بە خاسە خاسە گوو مەکە کاسە کوڕ کوڕ بێ چاوی لە میرات نییە کوڕێ کوڕ نەبێ ماڵی بۆ چییە مار خۆشی نەهات لە سیری بێعار لە بەر کونەکەی شین دەبوو بە بار بێگانە وەکوو بوت بی پەرەستی ئاخری و عاقیبەت دێنی نشستی ++++++++++++++++++++++ سەرناو: بیستوومە لە زۆر پیاوانی ڕۆشن سەبارەت: نووسین و ئامادەکردن: کەماڵ ڕەحمانی - دیاری مەهاباد، چاپی سێیەم، ساڵی١٣٨٦، لاپەڕە ٤٧. بیستوومە لە زۆر پیاوانی ڕۆشن فەقیری خۆشە قورتی ناخۆشن کێ دێته ماڵت ڕانەخەی قاڵی ئەگەر بە ماڵی به مام و خاڵی مەنازە بە بوون، مەگری بە نەبوون هیچی تا سەر نین نە بوون، نە نەبوون ئەم قسە گەڵێ بە سوود و کەڵکە پیاوی خۆش حیساب شەریکی خەڵکە ئەو کەسەی ڕاستە و حیسابی پاکە لە حیساب‌کێشان بێ ترس و باکە لە چاکەی کەمی زاڵم مەتۆرە موویەک لە بەراز بێتەوە زۆرە ناشکوری مەکە بەم بەشە کاکە لە قوڕ ئەوەندە تۆز هەستێ چاکە لە هەوراز و لێژ قەت مەڵێ کوتن لە بەر با هەرگیز مەکێشە تووتن بە زاوابەندی هەتاکوو مردن نەکەی بچێ سەر ماڵە بابی ژن ++++++++++++++++++++++ سەرناو: جێگات نە لێژە نە خوار و خێچە سەبارەت: نووسین و ئامادەکردن: کەماڵ ڕەحمانی - دیاری مەهاباد، چاپی سێیەم، ساڵی١٣٨٦، لاپەڕە ٤٨. جێگات نە لێژە نە خوار و خێچە هەر خەوت نایه بیانووت کێچە خۆت لێ نەگوڕێ گەر بویتە گەورە مەشهوورە دنیا بە پێچ و دەورە پیاو کارێک بکا کە پێی بوەستێ دوو شووتی هەڵناگیرێ بە دەستێ تێر نابێ چاوی تەماع لە دنیا کۆڵێک هەڵگرە نەپسێی لە بنیا بیکە ئاڵقەی گوێ ئەم پەندە جوانە هی 'پیرەمێرد'ە قەدری بزانە 'تەماع سوێراوە وەک ئاو دەنوێنێ تا بیخۆیتەوە تونیەتی دێنێ' تەشوێ بی ناوت نابەن بە باشی چونکە هەر بۆ لای خۆتی ئەتاشی ڕەندە بی هەموو ڕەنجت به بایە لە هه‌شتی مشتی بۆ لای تۆ نایە ئاکارت وەکو مشار بێ باشە هەم بۆ لای خۆتە هەم بۆ ئەو لاشە ++++++++++++++++++++++ سەرناو: تاقە کراسێ بدڕی بە پیسی سەبارەت: نووسین و ئامادەکردن: کەماڵ ڕەحمانی - دیاری مەهاباد، چاپی سێیەم، ساڵی١٣٨٦، لاپەڕە ٤٩. تاقە کراسێ بدڕی بە پیسی هەزار بە پاکی بدڕە هەر پیسی گەر بە درۆزن نێوبانگت ڕۆیی بێ نرخی لە لای بێگانە و خۆیی بەو کەسە دەکرێ بڕوا و متمانە پابەندی وەفا و عەهد و پەیمانە کەسێ ڕاست نەبێ قەول و بریاری بیخاتە پشت گوێ شەرت و قەراری؛ گەورەش بێ لە ناو کۆمەڵ بچووکە وەک پووڵی قەڵب سووک و چرووکە سوور نەبی لە سەر وەعدە و بەڵێنی گەنجی دونیات بێ پووشێک ناهێنی بێ دابنیشین تاوێک دوو بە دوو بێژنگێک دانێین لە بەینی هەر دوو دەروانێتە یەک لە ڕووی تێبینی ئەوتۆت دەبینم کە تۆ دەمبینی من چەندە بۆ تۆ دەکەم دیاری تۆش هەر ئەوەندە لەمنەوە دیاری ++++++++++++++++++++++ سەرناو: هەتا خاوەن ماڵ دزی گرتە دەست سەبارەت: نووسین و ئامادەکردن: کەماڵ ڕەحمانی - دیاری مەهاباد، چاپی سێیەم، ساڵی١٣٨٦، لاپەڕە ٥٠. هەتا خاوەن ماڵ دزی گرتە دەست دز خاوەن ماڵی گرت و دەستی بەست ئەوەی لە پووشێک نەکۆڵێتەوە لۆدە کای بەرن ناپرسێتەوە بەو کەسە ئێژن جوامیر و ئازا بەخشین لە دوژمن نەکا تەقازا بەس لەمە زیاتر خۆت گێل و کەڕ کە ئەو ماسته بێ‌موو نییه، باوەڕ کە خۆش‌باور نەبی بەو حەددە چاکە ئەو هەویرە ئاو زۆر دەبا کاکە! ناپاک هەمیشە زیت و وشیارە هەر دار هەڵێنی سەگی دز دیارە مامر قەڵە و بێ یان لەڕ و لاواز ئەپچڕێ هەتا دەکا هێلکەی قاز قەل ئەڵێن لاسای کەوی کردەوە ڕۆینەکەی خۆشی لە بیر بردەوە بەڕەم هەیە چۆن قاڵیی تو ڕاخەم؟ بەن‌کاڵەم لە بەن‌چەکمەی تۆ ناخەم ++++++++++++++++++++++ سەرناو: خۆ بەزل زانین هی تازەکوڕە سەبارەت: نووسین و ئامادەکردن: کەماڵ ڕەحمانی - دیاری مەهاباد، چاپی سێیەم، ساڵی١٣٨٦، لاپەڕە ٥١. خۆ بەزل زانین هی تازەکوڕە گەوج و نەزانن لێیان ببووره ئەم پەندە کۆنم لێ بسەلمێنە لە ماوەی ژینت دوو کەس مەدوێنە یەکێ بە سواری دێ ڕادەبوورێ یەک پوڵ دەژمێرێ لە دەر یا ژوورێ زاڵم بێ بە پرد، مەڕۆ بە سەریا قەت بە دەمی سەگ پیس نابێ دەریا مەوعیزە لە لای پیاوی عەقڵ کەم بەیتی بلەیە و شانامەی ڕۆستەم ئاو بە ئاوردا کرا و کۆتا بوو ئەو شەڕە هەر بۆ لێفەی مەلا بوو قەت مەڵێ بوومان بێژە هەمانە نان ئەو نانەیە ئەمڕۆ لە خوانە قەی ناکا لە کەر بشکەوی جارێ شەرته لە کورتان نەکەویە خوارێ ئەو کەسە دۆستی گیانی گیانیتە هاوڕێی نەبوونی و لێ قەومانیتە ++++++++++++++++++++++ سەرناو: کەسێ چرووکە و مستی قووچاوە سەبارەت: نووسین و ئامادەکردن: کەماڵ ڕەحمانی - دیاری مەهاباد، چاپی سێیەم، ساڵی١٣٨٦، لاپەڕە ٥٢. کەسێ چرووکە و مستی قووچاوە شێر بە گوێ بگرێ سووک و بەدناوە پێستی ئادەمی بەسەر کشاوە بەرگی نامەردی لەبەر کراوە هاکا لە داخا بوومە دێوانە هەر کردەی منە و بردەی شەیتانە مانە مردنی خۆش‌بیرەوەری ژانە ژیانی سەدەقەسەری خۆشە تەنافم بچێتە ملی نەک بەخێوم کەن بە لارەملی ناچێ بە هەڵە پیاوی وریا و ژیر تووڕە نابێ زوو، هەڵناچێ وەک شیر ناڕاسێ، هەتا نەبینێ بەچاو ئەگەر کوتت حەق، ڕادەوەستێ ئاو کێ باسی خەڵکی کرد بە لاتەوە بۆ ئەوان قسەی تۆش ئەباتەوە ئەم پەندە ڕاستە و جێگەی باوەرە دووزمان ئاور خۆشکەری شەڕە ++++++++++++++++++++++ سەرناو: پرس و ڕات نەبێ ئیشت لە پاشە سەبارەت: نووسین و ئامادەکردن: کەماڵ ڕەحمانی - دیاری مەهاباد، چاپی سێیەم، ساڵی١٣٨٦، لاپەڕە ٥٣. پرس و ڕات نەبێ ئیشت لە پاشە سەری بێ دەلاک نەتاشی باشە کاری سەربەخۆ ناحەز دەنوێنێ بەردی لە خۆوە سەران دەشکێنێ دەڵێن هەر شتێک شێت بیخاتە بیر دەرنایەتەوە بە سەد پیاوی ژیر گێره چۆن دەکرێ بە بزنی هەژار! گاجووتی دەوەێ و پیاوی کۆنەکار هێندێ شت نابێ زۆر بیپشکنی تۆ کاڵەک‌خۆری یا بێستان‌ڕنی! چاکی بۆ هێنا بەخت و ئیقبالی تووتنی خۆش و ئاغای ناحاڵی دڵی ناسووتێ بە ماڵی خاڵی گولـلەی بایزاغا، شەق لە کەنداڵی تا عاقڵ بیری کردەوە لە کار شێت کاری خۆی دی، بژی هەزار جار! بێ ئیزنی خاوەن، بەخشین حەرامە پیاوەتی لە سەر ئاوی حەمامە ++++++++++++++++++++++ سەرناو: منه‌ت لەم و لەو مەکێشە دم‌چەوت سەبارەت: نووسین و ئامادەکردن: کەماڵ ڕەحمانی - دیاری مەهاباد، چاپی سێیەم، ساڵی١٣٨٦، لاپەڕە ٥٤. منه‌ت لەم و لەو مەکێشە دم‌چەوت پووڵ بدە و مەلا دەر کە لە مزگەوت هەڵە چاوپۆشی لێ دەکرێ، بەڵام جارێک و دوو جار، نەکوو بەردەوام شتی تەماعکار لە کڕین نایە ئەسپێی بە ئەسپە، کێچی بە گایە خۆی لە بۆ ڕاوچی‌ دەکوژێ تاژی تا کەرێ نەبێ عاقڵێ ناژی ئەمەش پەندێکە ڕوون و ئاشکرا برا مەکووژە بۆ دەستە برا کەروێشک هەڵدێ لە ترسی گیانی تاجی بۆ سەولە، دەک بە سندانی! بە توندوتیژی کار نابێ مەیسەر مار بە قسەی خۆش لە کون دێتە دەر وتیان پشیلە، گووت بە دەرمانە دایپۆشی بە خۆڵ، ئەو بێ‌ویژدانە! نەمدیوە لە ئاش گەرمتر کاسە ڕەنگە لە ژێریا هەبێ نیوکاسە ++++++++++++++++++++++ سەرناو: لە زەوی بۆت بێ، یا لە حەواوە سەبارەت: نووسین و ئامادەکردن: کەماڵ ڕەحمانی - دیاری مەهاباد، چاپی سێیەم، ساڵی١٣٨٦، لاپەڕە ٥٥. لە زەوی بۆت بێ، یا لە حەواوە قەت دەستی کەڕەم مەگێرە دواوە نەقڵە لە پیاوی شیرین گفت و لفت قازیی مەراغەش دەخوا ماڵی مفت وایان فەرمووە زانایانی زوو زۆر درەنگ هەیە باشترە لە زوو کێ گورج و خێرا تەماحی تێر بوو؟ شەیتان پەلەی کرد چاوێکی کوێر بوو ئەگەر شەڕ قوونی لە دەرکت ناوە بیکە، خوا بە تۆ یا بەوی داوە دەست مەپارێزە لە وشک و لە تەڕ دەڵێن هەر یەکە شەڕ و نیوەشەڕ ڕێژنە بارانە یا ڕەشەبایە هەر عومری بەفر بە بای فەنایە ئەگەر ڕەمەزان یا شەشەکانە تازە بەشی من ژەم و دوو نانە وتیان بە وشتر بۆچی داماوی؟ موژدە بێ خوا کوڕی پێ داوی ++++++++++++++++++++++ سەرناو: وتی: کوڕ دیارە هێزی ئەژنۆمە سەبارەت: نووسین و ئامادەکردن: کەماڵ ڕەحمانی - دیاری مەهاباد، چاپی سێیەم، ساڵی١٣٨٦، لاپەڕە ٥٦. وتی: کوڕ دیارە هێزی ئەژنۆمە بەڵام باری خۆم هەر لەسەر خۆمە گۆشتی ڕانی خۆت بکەی بە کەباب گەلێ باشترە لە منەتی قەساب بە قسەی چەور و شیرین زمانی تۆ هەڵخەڵەتێی، گەوج و نەزانی هەڵە و لەبیرچوون جاروبارێکە دەڵێن هەر عەقڵەی لە خەسارێکە دۆستت تا نەبێ وەک خۆت دڵ بەکوڵ بۆی هەڵمەرێژە خێرا کیسەی دڵ تا ئەو نەسووتێ بۆ تۆ هەناوی هەڵمەقرچێنه جەرگت لە تاوی هاوڕێ گەلێکیان وەک ماری سڕن ڕواڵەت دۆست و لەبنەوەبڕن ئیمرۆ لێ دەدەن لافی دڵسۆزی دەبنه دوژمنی باب‌کوشتە سۆزی بە کاکە کاکە هات بە لامەوە بوو بە سوججەمار دای وە پامەوە ++++++++++++++++++++++ سەرناو: گۆشتەزوون دێنی برینی خەنجەر سەبارەت: نووسین و ئامادەکردن: کەماڵ ڕەحمانی - دیاری مەهاباد، چاپی سێیەم، ساڵی١٣٨٦، لاپەڕە ٥٧. گۆشتەزوون دێنی برینی خەنجەر تەشەر زامی دڵ دەکا دیوەودەر زانیت کە دوژمن لێی هەڵگرتی قین ژەهری دەرخوارد دە، تێکەڵ بە هەنگوین زۆر کوتن بایی نادا بە قسە ئەو کەسەی کەسە، حەرفێکی بەسە وا بووە هەزار، بە تاقە مەردێ بەزیوه، دەڵێن سەد قەل و بەردێ بۆ بابت ئەگەر بەسوود و کەڵکی قەت جنێو مەدە بە بابی خەڵکی ئەم ماندوو بوونە و ئەو خۆ کوتانە بەربەرەکانی لەگەڵ ژیانە ژینی کەم لەگەڵ مافی سەربەستی خۆشە، نەوەک زۆر بژی بە پەستی چ بە ئاشکرا، چ بە نهێنی دەیدروویەوە، هەرچی دایچێنی چاکە و پیاوەتی قەت ناچێ لە ناو ون نابێ، ئەگەر بیخەیتە نێو ئاو ++++++++++++++++++++++ سەرناو: شوێنی مەکەوە بە هەوای پێشوو سەبارەت: نووسین و ئامادەکردن: کەماڵ ڕەحمانی - دیاری مەهاباد، چاپی سێیەم، ساڵی١٣٨٦، لاپەڕە ٥٨. شوێنی مەکەوە بە هەوای پێشوو قوڵی ئەو قوڵی نەماوە، هەیهوو! ئەو کەسەی نانی بێ تۆ نەدەخوارد ناتداتێ بچی بۆ کاسەیەک ئارد لەم دەورە کەمێ بیر کەوە، نامە! گێرەت لە هەولێر دەگەڕێ مامە! گەلێ بەنرخ و جوانە ئەم پەندە بۆ ئەو کەسانەی لووتیان بڵندە؛ کێ بەرزەفڕە و خۆبەزل‌زانە ڕۆژێک دەیهاڕێ ئاشی زەمانە هەتا نۆرەیان دەگا لەو ئاشە پاشەڕۆژ وەبیر بێننەوە باشە ئەمە شتێکە بۆ هەموو کەس ڕوون بە مەیلی ئەو بوو گەڕانی گەردوون خەڵکی ئێرانی کردبوو بەندە ئەو دێوەزمەی خوو ناپەسەندە ئاکامی چی بوو چۆنی بەسەرهات ڕەش و ڕەهەندە دەرچوو لە وڵات ++++++++++++++++++++++ سەرناو: جێی لە چوار قوڕنەی دونیا پێ تەنگە سەبارەت: نووسین و ئامادەکردن: کەماڵ ڕەحمانی - دیاری مەهاباد، چاپی سێیەم، ساڵی١٣٨٦، لاپەڕە ‌٥٩. جێی لە چوار قوڕنەی دونیا پێ تەنگە مام سامیش دەڵێ نامەوێ نەنگە بزانە باران چۆن دێ بەرەو خوار خۆی پێ هەژارە، بێ فیز و دەمار دەکەوێتە دەم گیانداری بەحران دەبێ بە دوڕی قیمەتی و گران شەونم لە سەر گوڵ دەنیشێ تاوێ بەرز ئەبێتەوە بە تینی تاوێ فڕی سوار دەبی کە چوو بۆ حەوا زوو لە ناو دەچێ و دەبێ بە هەوا با بێینەوە سەر پەندەکانی زوو وایان فەرمووە سەردەمی پێشوو: گورگێ بەسە بۆ قڕانی کۆزێ ئابڕووی هۆزێ دەبا ڕەش‌بۆزێ هەر قافڵەیەک پێشەنگی کەر بێ بێ گومان دەبێ تووشی زەرەر بێ لە دەرکی کەست هێنابێ تەقە دەرکت دەدرێتە بەر مست و لەقە ++++++++++++++++++++++ سەرناو: کەر لە کوێ کەوتوە، لە قوڕ گیڕاوە سەبارەت: نووسین و ئامادەکردن: کەماڵ ڕەحمانی - دیاری مەهاباد، چاپی سێیەم، ساڵی١٣٨٦، لاپەڕە ‌٦٠. کەر لە کوێ کەوتوە، لە قوڕ گیڕاوە سەیری کە، کوندە لەکوێ دڕاوە! گەورەیی خەرجی پێویستە گیانە ڕیشت بوو، ئەشێ هەڵگری شانە دروشمی پیاوان دیارە بە ڕیشە بەڵام پیاوەتی ڕیش نییە، ئیشە گەلێ کەس لە ژێر ڕیش و عەباوە خەریکی فێڵ و کەڵەک و داوە لای گەوهەرفرۆش گەوهەر گرانە قەدری زێڕ لە کن زێڕینگەرانە بۆ گفتی شیرین دڵم لە کوڵە دەڵێن قسەی خۆش کوێستانی دڵە ئەم قسەش گەڵی بەتام و بۆنە دڵ ئاوێنەی دڵ، فەرموودەی کۆنە پیاوتی خەڵکی بگرە بەرچاوت دەنا بە سپڵە ئەزڕێ ناوت کەڕەم کەمیش بێ، زۆری بزانە زیاد دەبێ نیعمەت، بەهۆی شوکرانە ++++++++++++++++++++++ سەرناو: ناسپاس نەبی لە ماوەی ژینت سەبارەت: نووسین و ئامادەکردن: کەماڵ ڕەحمانی - دیاری مەهاباد، چاپی سێیەم، ساڵی١٣٨٦، لاپەڕە ‌٦١. ناسپاس نەبی لە ماوەی ژینت کەڵک وەردەگری لە دنیا و دینت تۆ چۆنی بۆ من، منیش هەر وامە دونیا دەستەواو یا دەستەوامە بە ئیمڕو و سبەی، درۆ و تەفرەدان قەولی هاوینم لێ مەخە زستان بەدبەخت ئیشی نارێک و خوارە مزگەوت دانێ، قیبلەکەی لارە چون بەختی ڕەشە، ئێسکی گرانە خوێنی کەکرەیە، دوانی ژانە لە شانان قورسە، دێزە و دزێوە دوعاش بۆ خەڵکی بکا، جنێوە بەختەوەر چونکی بارەکەی بارە ناحەزیش بڵێ شیرین وتارە هەرچی ئەو بیکا پەسەندی عامە لە نیو کۆمەڵ‌دا بە ئیحتیڕامە گەرچی حەق لە دڵ گرانە و سەختە بدەن لە تەختە، حیزیش بە بەختە ++++++++++++++++++++++ سەرناو: نە ئاسن بە فوو بۆت نەرم دەبێ سەبارەت: نووسین و ئامادەکردن: کەماڵ ڕەحمانی - دیاری مەهاباد، چاپی سێیەم، ساڵی١٣٨٦، لاپەڕە ‌٦٢. نە ئاسن بە فوو بۆت نەرم دەبێ نە حەمام بە تڕ قەت گەرم دەبێ بە هێزی لاوان، بە تەجرەبەی پیر بە تێکوشان و خەباتی شێلگیر بە تەگبیر و ڕای پیاوی ڕووناکبیر گاجووتی هیوات دێتەوە بەر نیر داوێنی غیرەت بە کەمەردا کە نان هەتا نەیجووی، قووت ناچێ کاکە لەگەڵ دەستی گەل تەکانێ دەرێ بەڕەت لە قوڕاو دێنیتە دەرێ وەک دەڵێن بەری کورتە تەنگانە زوو بەدوویدا دێ خۆشی و فەرعانە زۆرم بیستووە شاگردی کۆڵی هیچ فێر نەدەبوو لەبەر کڵۆڵی چون ماندوو نەبوو لە ئیش نەوەستا ئێستا کە بۆتە باشترین وەستا هەر تۆزێ لەسەر خۆ بێ پشوومان لە قۆرە هەڵوا دەخۆین هەموومان ++++++++++++++++++++++ سەرناو: دوێ خەڵکت تۆقان ئه‌وڕۆ بتۆقە سەبارەت: نووسین و ئامادەکردن: کەماڵ ڕەحمانی - دیاری مەهاباد، چاپی سێیەم، ساڵی١٣٨٦، لاپەڕە ‌٦٣. دوێ خەڵکت تۆقان ئه‌وڕۆ بتۆقە مەشهوورە دونیا مەندۆق مەندۆقە دوێنێ تۆ ڕەحمت بە هیچ کەس نەکرد خوا شوکور ئەوڕۆ بۆمان بوویە پرد دوێنێ ملهوڕ و تۆسن بووی کەچی؟ ئیمڕۆ سەرشۆڕ و کز و ملکەچی؟ چەکت بە نەفتم کڕی بۆ گیانم هات نۆره گورزم دەردت دەزانم دوژمن هەر بۆیە کاری سەردەگرێ چون به عارەبە کەروێشک دەگرێ خوێنی شێرت کەم لە دەمار و ڕەگ هەر فسۆسی وەک تاجی قوبادبەگ لە وەختی ڕاودا نەبێ گووت نایە چار چییە خوێڕی پیشەی هەروایە شتی چاک دەبێ ڕەسەنی چاک بێ لە ماینی قۆتڕ ئەسپی شێ نابێ تاجی ڕەش‌کوژیش باوەڕم وایە لە دێڵی فسۆس قەت بەدی‌نایە ++++++++++++++++++++++ سەرناو: ساتێ ناگرێ ئارام و قەرار سەبارەت: نووسین و ئامادەکردن: کەماڵ ڕەحمانی - دیاری مەهاباد، چاپی سێیەم، ساڵی١٣٨٦، لاپەڕە ‌٦٤. ساتێ ناگرێ ئارام و قەرار لە نێو کالاندا تیغی جەوهەردار بە دوو کەس دەکرێ خراپە و چاکە چەپڵە بە دەستێک لێ نادرێ کاکە بێ‌دەرپێ دوو گەز جاوی دێتە خەو زگ‌برسی پڵاو دەبینێ وەک ئەو ئەو بۆنەی مەستی کردی وەک شەڕاب کەر داغ کردن بوو، نەک کزەی کەباب لەبەر مەینەت و دەرد و نەخۆشی ناچێته گەرووم قەت ئاوی خۆشی وایان فەرمووە قەدیمیی دڵ‌پاک سوار هەتا نەگلێ، نابێتە سوارچاک تا نەخۆش نەبی نەچیە حەکیمی نازانی قەدری ساغی و سەلیمی تا نەهاتە گوێت شەقەی قەڵماسە تێنەگەیشتی دنیا چ باسە وتم لامەدە لە ڕێبازی حەق تا نەتنا تەبەق، بۆ نەتکوت سەدەق؟ ! ++++++++++++++++++++++ سەرناو: کەی پاشی باران کەپەنک دابە؟ سەبارەت: نووسین و ئامادەکردن: کەماڵ ڕەحمانی - دیاری مەهاباد، چاپی سێیەم، ساڵی١٣٨٦، لاپەڕە ٦٥. کەی پاشی باران کەپەنک دابە؟ نوشداروو لە پاش مەرگی سۆهرابە پاش ڕووت‌کردنەوە بێ خۆف و خەتەر تەشتی زێڕ دانێ لە سەر تەوقی سەر لە بەردیان پرسی بۆچی وا ڕەقی؟ کوتی بەردم دی زۆر بە دڵ‌ڕەقی شایی نەکراوە، دەهۆڵ تەقەی دێ بەن نەڕێسراوە، جۆڵا شەقەی دێ وتیان بە قرژاڵ بۆچی بە دوو سەر دەڕۆی؟ وتی: شۆخ لێی عەیبە مەگەر؟ شەڕنەکەر پیشەی زوو دانیشتنە بەردی زل، بەڵگەی نەهاویشتنە هێندێ کەس ئازا و ڕژدن لە شەڕێ هەتاکوو لێیان وەڕاست دەگەڕێ کاتێ شەڕەکە گەرم بوو تەواو ڕێگای هەڵاتن دەگرنە بەرچاو دوژمن خەریکە کوێرایی دایە چاوی دوو سەری پێمان هەڵنایە ++++++++++++++++++++++ سەرناو: دیسان خیشی کرد وێنەی بەرازی سەبارەت: نووسین و ئامادەکردن: کەماڵ ڕەحمانی - دیاری مەهاباد، چاپی سێیەم، ساڵی١٣٨٦، لاپەڕە ‌٦٦. دیسان خیشی کرد وێنەی بەرازی کەر ماندوو و مردوو، خاوەن ناڕازی نایەوێ لەگەڵ ئێمە بسازێ نە دێته پردێ نە دێتە بازێ مەڕوانە خانوو و دەرک و دەروازە دایکان ببینە و کیژان بخوازە بە توندوتۆڵی و شۆخی مەنازە بۆ کچان، بەختی دایکان جیازە پێم ڕاناگیرێ ئەو ناز و بازە ددان کە ئێشا عیلاجی گازە نامەوێ بمرم لە بەر موحتاجی گۆشتی کەروێشک و بۆفسی تاجی! ناخۆم و هەرگیز نەیبینم یاڕەب شیری وشتر و دیداری عاڕەب بۆ سیرت بۆ بێ لە دەم لێوئالان نەک گوڵ وەرگری لە دەس خوێن‌تاڵان هەر لە عەڕشەوە هەتاکوو قورش کەس نییە بە دۆی خۆی بڵێ ترش؟ ++++++++++++++++++++++ سەرناو: دایک تاریفی کچی خۆی بکا سەبارەت: نووسین و ئامادەکردن: کەماڵ ڕەحمانی - دیاری مەهاباد، چاپی سێیەم، ساڵی١٣٨٦، لاپەڕە ‌٦٧. دایک تاریفی کچی خۆی بکا دۆم بێت و کەڵاش لە بۆ خۆی بکا عەتر ئەشێ خۆی بۆن بدا کاکە نەک عەتتار بڵێ زۆر عەتری چاکە یاران! مەمدەنە بەر تیری لۆمە من نێر بێ و مێ بێ، هە لەبۆ دۆمە سا بێ سکی خۆت مەدڕە لە داخا کێ مرد و کێی تر ما لە وەجاخا! دەک دڵە کوێر بی عەمرت نەمێنێ قاڵاو لە جێگەی بولبول دەخوێنێ! لە دنیا هەرچی گەندە و مەندەیە بۆچی هەر بەشی خدری زیندەیە؟ ! لە جێگەی خۆیدا ئەمەش هەر پەندە نامێنێتەوە گەندە لە مەندە زاڵ کوتی: رۆستەم! ڕۆڵەی زەمانە! قەت دوژمنی خۆت بە کەم مەزانە مەڵێ باشارم ناکا ئەو گولە چکۆڵە، فێڵ و تەڵەکەی زلە ++++++++++++++++++++++ سەرناو: سه‌ر له بەر نامەرد دامەنەوێنە سەبارەت: نووسین و ئامادەکردن: کەماڵ ڕەحمانی - دیاری مەهاباد، چاپی سێیەم، ساڵی١٣٨٦، لاپەڕە ‌٦٨. سه‌ر له بەر نامەرد دامەنەوێنە بۆ وڵات و گەل خوێنت بڕژێنە بە زۆری بازوو، بە هێزی شانان خانی خانان بە، یا تۆزی بانان شووڵی شلک و تەڕ دادێتەوە زوو دەیچەمێنیەوە چۆنی مەیلت بوو کاتێ وشک بوو، چۆنی دادێنی؟ زۆری خەریک بی، ڕەنگە بیشکێنی! نەمام کە تازه چەقابێ دیارە بە هێزی کەسێک دەردێ دووبارە بەڵام کە ریشەی داکوتا زەوی بوو بە دارێکی زل و مل‌قەوی دەرنایەتەوە، نەک بە شان و پیل بەکەڵ و کۆتان، تەنانەت بە فیل ئەگەر برای پشت بوو لە برازا تازە دەرچوو، کار لە کار ترازا دەسته چەورەکەت لە من هەڵمەسوو بووک لەگەڵ تۆمە، گوێت لێ بێ خەسوو ++++++++++++++++++++++ سەرناو: کەسێ وەجاغ‌کوێر سەربنێتەوە سەبارەت: نووسین و ئامادەکردن: کەماڵ ڕەحمانی - دیاری مەهاباد، چاپی سێیەم، ساڵی١٣٨٦، لاپەڕە ‌٦٩. کەسێ وەجاغ‌کوێر سەربنێتەوە یەکجاری چرای دەکووژێتەوە کوڕی چاکی بێ، خێری بەلاشە بێکەسی، دەڵێن بۆ خودا باشە ڕێز نادا بە کەر درێژیی مەودا نابێتە ئێستر بە چوونی بەغدا سەرمایەی ژیان ژن و ددانە به دەردت نەخۆن، دنیا زیندانە خەتای نەکروودم بە ملدا بێنی شانەکەت لە سەر مندا دەشکێنی مەشهورە دەڵێن خلە دکا گان بلەی چارەڕەش دەبەن بۆ زیندان یەکجاری لێژ بوو جێ بە هەتیوان ماڵ بۆ خۆی نەبوو، ڕووی تێ‌کرد میوان ماڵی مێروولە بە کەوچکە ئاوێ وێرانە، بێنه و بەرەی پێ ناوێ زۆری ناشکوری کرد و هەڵقڕا وا مانگا مرد و ‌ئیتر دۆ بڕا ++++++++++++++++++++++ سەرناو: چاکە بە چاودا دراوە، توورە سەبارەت: نووسین و ئامادەکردن: کەماڵ ڕەحمانی - دیاری مەهاباد، چاپی سێیەم، ساڵی١٣٨٦، لاپەڕە ‌٧٠. چاکە بە چاودا دراوە، توورە نەقڵی نیرگەکە و پیرە گاسوورە تەڵا لە مل کەر بکەی، ماقووڵە سەڵا لەو کەسەی بێ پارە و پووڵە ئەوی لە لێفەی بابی نەتڕیوە لووتی بەرز بوو بەو زێڕ و زیوە دیت سەگی سپی، تفی لێ ڕۆ کە زەرەری زۆرە بۆ بارە لۆکە چاکەی تۆم هەرگیز نابێ لە چاوا نانی کۆماسی و پاسی جرتاوا؟ ! کەسێ خۆی لە لا گەورە و گرانە نەچێتە پێستی خەڵکەوە جوانە کەسێ ئاکاری پەسەندە و چا بێ حورمەتی خەڵکی دەبێ لە لا بێ عەیب و عاری خۆی بێنێتە بەرچاو خەڵک بە سووک و چرووک نەبا ناو ئەگەر نەشخوێنێ کەڵەبابە سوور ڕۆژ دەبێتەوە، بڵاو دەکا نوور ++++++++++++++++++++++ سەرناو: ئاش هەر کار دەکا، گەنم دادێنێ سەبارەت: نووسین و ئامادەکردن: کەماڵ ڕەحمانی - دیاری مەهاباد، چاپی سێیەم، ساڵی١٣٨٦، لاپەڕە ‌٧١. ئاش هەر کار دەکا، گەنم دادێنێ چەقەنە سەری خۆی بۆ دەشکێنێ؟ ! ماڵی وا هەیە قاقڕ و کڕێن لێی دەس ناکەوێ بەردی سەرشکێن چ‌بکەم لەگەڵ تۆ بەختی خەواڵوو؟ دەتکەمە تەنگە و دەبیەوە پاڵوو! تا کرژت دەکەم تۆ هەر خاوتری هر بۆیە ڕیسم بۆتەوە خوری هیوام کوڕێک بوو ئەویش لەبارچوو تازە کوڕی چی، وەک بەفری پار چوو خۆت لێ ون نەبێ، هۆشت نەتاسێ پیاو دۆست و دژمن دەبێ بناسێ نە خۆش باوەر بە، نە بێ‌باوەڕ بە نە تێهەڵقوتێ، نە کوێر و کەڕ بە لای ژیر و زانا هیچیان پەسند نین گوێ بۆ بیستنە و چاویش بۆ بینین هاتەوە بیرم پەندێکی زەریف ئەم چاوە کوێر بێ، نابینێ حەریف ++++++++++++++++++++++ سەرناو: هەرچی تازە بێ، پەسندی خەڵکە سەبارەت: نووسین و ئامادەکردن: کەماڵ ڕەحمانی - دیاری مەهاباد، چاپی سێیەم، ساڵی١٣٨٦، لاپەڕە ‌٧٢. ‌هەرچی تازە بێ، پەسندی خەڵکە بەڵام هێندێ شت کۆن بێ بەکەڵکە دۆست و دۆ لەگەڵ شەڕاب و توتن بەعزێکیش ئەڵێن کۆن بێ باشە ژن ئەمەش فەرموودەی قەدیمیەکانە قەدری قەدیمیان زەریف بزانە شەممە باشە بۆ هەموو کاروبار بەڵام قەت بووکی تێدا مەکە سوار شەممە و دووشەممە و سێشەممە لیباس مەبڕە، زەرەرە بە تەجرەبەی خاس ماڵ گەسک مەدە بە نوێژی شێوان نەوەک ناکۆکی بخاتە نێوان یا نووکی گەسک بدە لە ئاگر تۆ لە پێشینیان نازانی چاتر مریشک خوێندی، سەری ببڕە زوو دەڵێن تێک دەدا بەینی ژن و شوو ئەگەر ناوەخت خوێندی کەڵەشێر گوشتەکەی دەخۆن یا دەیکەن بە خێر ++++++++++++++++++++++ سەرناو: کاتی خۆی نەبێ قاقا و پێکەنین سەبارەت: نووسین و ئامادەکردن: کەماڵ ڕەحمانی - دیاری مەهاباد، چاپی سێیەم، ساڵی١٣٨٦، لاپەڕە ‌٧٣. کاتی خۆی نەبێ قاقا و پێکەنین ئاکامی دەبێ بە گریان و شین هەر پێکەنینێک دوایەکەی شینە شیوەن باشترە لەو پێکەنینە دەرزی لە قاچ و قولی خۆت ڕاکە ئەو کاتە شووژن بە پێی من داکە زستان بە سەر چوو، بەفر تواوە ڕووڕەشی هەموو بۆ ڕەژی ماوە ئەم پەندە سوودی تا قیامەتە زمان لێگەرێ سەر سڵامەتە ئەم پەندە جوانەت لە بیر بمێنێ تۆفان دەدروێ، کێ با بچێنێ هەموو کەس دەکا بەم پەندە بڕوا هەرچی با هێنای، هەر بە با دەڕوا مەیهاوێ سەر من هەرچی خەتایە دەستێک بە تەنیا تەقەی لێ‌نایە کێ بێت و نەکا بەرگری لە خۆی؟ ! بەڵام کەس خەتا ناگرێتە ئەستۆی ++++++++++++++++++++++ سەرناو: هێندێ تێکهەڵچوون جێی هومێد نینە سەبارەت: نووسین و ئامادەکردن: کەماڵ ڕەحمانی - دیاری مەهاباد، چاپی سێیەم، ساڵی١٣٨٦، لاپەڕە ‌٧٤. هێندێ تێکهەڵچوون جێی هومێد نینە شەڕی کۆنە قین گەرم و بەتینە خەیاڵ خەزێنەی بە کەس نەداوە زێر دۆزینەوە خەیاڵی خاوە ئەم پەندە کەڵکی بۆ گوێدێرانە کێ لە سەر سەبرە، لەسەر خێرانە کەری دێز دەکا حەز لە تۆپینێ تاکوو خاوەنی زەرەر ببینێ بیری هەر لە لای هەل و هەڵمەتە چووزانێ گورگ، مەڕ بە قیمەتە قەسەم بەو کەسەی نەزا و نەمەرگە تۆبەی بەڕاستی گورگ هەر مەرگە تاکوو بز شیر دا و بەشی داپیر دا ئەو کلکە قوڵەی ڕێویی فەقیر دا قیل سپی دەبێ، بێ‌درۆی فەڕزی کلکی وشتریش دەگاتە عەرزی تا گورگ دەکا تۆبە وەک نەسووح سەبری ئەییوبی دەوێ و عومری نووح ++++++++++++++++++++++ سەرناو: ئەم نەقڵە دڵی پیاو دەکاتە بەرد سەبارەت: نووسین و ئامادەکردن: کەماڵ ڕەحمانی - دیاری مەهاباد، چاپی سێیەم، ساڵی١٣٨٦، لاپەڕە ٧٥. ئەم نەقڵە دڵی پیاو دەکاتە بەرد قەل بە قەل دەڵێ: ڕووت ڕەش بێ نامەرد! ئەو کەسەی دەبوو نەدۆڕێ، دۆڕا بۆ ئاسنی سارد دەکوتی لەخۆڕا؟ نەسیحەت ناچێ بە مێشکی کەردا کێ دیویە بزمار بڕوا بە بەردا؟ عاملانی کەسێ خوڵقابێ ناحەز هەروەکوو گوێزە بیدەی لە گومبەز. چون کۆشکی هیوات بناغەی بۆشە پێشت پۆڵا بێ، پاشت کڵۆشە. بەسمان بە سەردا لێدە گیز و فیز پێوەدان خۆشە، نەوەک ویزەویز. دەڵێن نابارێ لە هەموو هەوران دڵنیاش مەبە لە سووڕی دەوران. لاوی کورد لە خۆی بەستێ فیشەکدان هیچ شایەک قەبووڵ ناکا بە سەپان. ئەمەش نەققڵێکی لەمێژ و کۆنە پاداران بگرە، بێ پا هی خۆنە. ++++++++++++++++++++++ سەرناو: ئەوەی تۆ قینت لێ بوو، خرا گڵ سەبارەت: نووسین و ئامادەکردن: کەماڵ ڕەحمانی - دیاری مەهاباد، چاپی سێیەم، ساڵی١٣٨٦، لاپەڕە ٧٦. ئەوەی تۆ قینت لێ بوو، خرا گڵ دەجا چنگێ ڕۆن هەڵسوو لە سەر دڵ لە ترس و خۆفی ماری بەدکردار لە پەنای ئاگر خۆم داوە حاشار خۆشیم نەدیوە لەم ڕۆژگارە وەتی هەم ئیمسال خۆزگە بە پارە دەستی تەماحت هێندە پان مەکە خاوەنی کەڕەم پەشیمان مەکە ئەم نەقڵەیان زوو کرد بوە شیعار بە قوونی موفلیس ڕیشی تەماحکار کچ شوو کا دایک دەماخی سازە کوڕیش ژن بێنێ، توندە مەجازە خەڵک لە دەس تۆ دەمێکە یاسە قڵپ ئەبێتەوە کە پڕ بوو کاسە پێم سەیرە تۆ زۆر بە خۆت دەنازی نە سەری سیری، نە قونچکی پیازی نە هێندە تاڵ بە، تف بتخاتە دەر نەوا شیرن بە، قوتت دەن یەکسەر ++++++++++++++++++++++ سەرناو: زۆر کوتن چییه؟ ڕیس و گوریسە سەبارەت: نووسین و ئامادەکردن: کەماڵ ڕەحمانی - دیاری مەهاباد، چاپی سێیەم، ساڵی١٣٨٦، لاپەڕە ٧٧. زۆر کوتن چییه؟ ڕیس و گوریسە تا یەکێک دەڵێی دووان ببیسە پیاو ماڵی دەوێ و ژنان زێڕ و زیو بزن خەمی گیان، قەساب خەمی پیو ئەوەی لێی دەدا لافی قەیسەری کونی مشکی لێ بۆتە قەیسەری هەر لە کۆنەوە وا هات و وا چوو گوڵچن دڕوویان بە دستیدا چوو کێ کۆی کردەوە به زه‌حمەت و ڕەنج! کێ بەختەوەر بوو بە گەنجی بێ ڕەنج! شۆرشی کاوە بۆ فەرەیدوون بوو کاری خاتون و ناوی مەیموون بوو کوێخای لێکەوتوو ‌مێی دەرەبەگە گورگ کە پیر بوو، مەخسەرەی سەگە ژیشک بە فەرخەی خۆی دەڵێ ڕۆڵە بێچووی کێ بە قەد تو نەرم و نۆڵە؟ لە بەر دڵی من، نە قاقووم، نە قوو نەرم و شل نینە بە سەت یەکی توو ++++++++++++++++++++++ سەرناو: لای باوڕنەکەر خۆت ماندوو مەکە سەبارەت: نووسین و ئامادەکردن: کەماڵ ڕەحمانی - دیاری مەهاباد، چاپی سێیەم، ساڵی١٣٨٦، لاپەڕە ٧٨. لای باوڕنەکەر خۆت ماندوو مەکە تەقەی بۆ بێنە لە بنی کوولکە. ئەگەر ناتخورێ تۆ بنی ڕانی چیتە لە ماندوو نەبوونی شوانی. ژن ئەگەر ناوی سووکی دوا خستی خێرا سێ بەردەی بنێ لە مستی. پیاو ئەگەر هاوڕێ نەبوە هاوبیری دەڵێن سێ بەردە و ماڵی فەقیری. عەیبی یەک کوتن لە عەقڵ دوورە دیارە وەک تفی سەر بەرەو ژورە. لە چاوی خۆتا نابینی گاسن شووژن دەبینی لە نێو چاوی من. دەزانێ ئەوی بە بیر و ژیرە خەتی خوار لە بن سەری گای پیرە. خواوەندی مەزن کار بێ‌جێ ناکا تا کێو نەبینێ بەفری تێ ناکا. کەسێ لە مەیدان گۆ دەباتەوە کاتی ڕق هەستان قین بخواتەوە. ++++++++++++++++++++++ سەرناو: پیاوەتی و ئیشی مەردانە کردن سەبارەت: نووسین و ئامادەکردن: کەماڵ ڕەحمانی - دیاری مەهاباد، چاپی سێیەم، ساڵی١٣٨٦، لاپەڕە ٧٩. پیاوەتی و ئیشی مەردانە کردن لە بەخشین دایە، نەک تۆڵە سەندن. چون بە دەرد دەخوا، چارەی دەردی کە شێف و وەردی که، لە سەر بەردی کە. کەچەڵ دەرمانکەر بوایە بێ گومان لە پێشا سەری خۆی دەکرد دەرمان. ئەگەر لێ‌گەڕێ شۆفاری بەدفەڕ ئاو دەخواتەوە گورگ لەگەڵ مەڕ. درۆزن شتی لە بیر نامێنێ حافیزەی کەمە، زوو دادەمێنێ. کەنگێ درۆزن جێگەی بڕوایه؟ ! تەنانەت دەڵێن دوژمنی خوایە. وتیان بە ڕێوی شاهیدت کێیە؟ وتی: کلکی خۆم، باوەڕم پێیە. بەیتی ڕۆستەمیان سەر لەبەر شەوێ خوێندەوە، یەکێ هاتە جواب لەوێ: کاکە گیان مەڵێن قسەت بێ جێ بوو نەمزانی ڕۆستم، نێر بوو یا مێ بوو! ++++++++++++++++++++++ سەرناو: ئەڵێن حاڵی بوون لە نان و پڵاو سەبارەت: نووسین و ئامادەکردن: کەماڵ ڕەحمانی - دیاری مەهاباد، چاپی سێیەم، ساڵی١٣٨٦، لاپەڕە ٨٠. ئەڵێن حاڵی بوون لە نان و پڵاو تامی‌خۆش‌ترە، بەبێ چاو و ڕاو. دەعبای وا هەیە دەخۆی گۆشتەکەی دەعباشە دەبێ گۆشتی دەرخوارد دەی. پێم خۆشە لاشەم لە دووم بکێشم بەڵام منەتی ناکەس نەکێشم. هەر بە مناڵی شێرەکوڕ دیارە لاوێچ نموونەی خه‌روار و بارە. ئەوی قەرزی کرد بە تەمای داهات هیوای پێ نەبێ، تایەکی داهات. هەوەڵ جێگای ڕمب وەبەر چاو بێنە بە دڵنیایی ڕمب بچەقێنە. چکۆلەترین کردەوەی عیسان لە سەد قسەی زل باشترە دیسان. ئەستەمێک نییە کە هاسان نەبێ پیاو ئەو پیاوەیە هەراسان نەبێ. بیستوومە دەڵێن مار هەتاکوو مار نەخوا، نابێتە هەژدیهای زۆردار. ++++++++++++++++++++++ سەرناو: حەز دەکەی نەچیە ژێر زنجیر و کۆت سەبارەت: نووسین و ئامادەکردن: کەماڵ ڕەحمانی - دیاری مەهاباد، چاپی سێیەم، ساڵی١٣٨٦، لاپەڕە٨١. حەز دەکەی نەچیە ژێر زنجیر و کۆت دامەزرێ لە سەر پەت و سینگی خۆت. کێ ڕازی نەبێ بە بەخت و بەشی تەمەن سەر دەبا بە چارەڕشی. ژن دەڵێ نانی وشکیم دەست کەوێ خۆشە، نەک پڵاو لە پەنای هەوێ. پاشایەتییە ماڵی بەتەنێ کیتەڵەی تەنێ، بەهەشتی بەنێ. قازانی مێردان بە حەوت ساڵ جارێ دێته کوڵ، بەڵام دەڕژێ بە جارێ. مشتەی هەمانە و داسی ڕەمانە زۆر باوە لە ناو دۆستی زمانە. بۆیە وەڕەز بووم من لەم ژیانە ڕێوی لە حاستم شێری ژیانە. خراپت بۆ خۆت دانەنا کاکە خوداش و خورماش، تەگبیری چاکە. ئازا کوڵی دڵ دەڕێژێ بە قین بێ دەسەڵاتیش بە گریان و شین. ++++++++++++++++++++++ سەرناو: بەینێکە بڕوات بە کەس نەماوە سەبارەت: نووسین و ئامادەکردن: کەماڵ ڕەحمانی - دیاری مەهاباد، چاپی سێیەم، ساڵی١٣٨٦، لاپەڕە ٨٢. بەینێکە بڕوات بە کەس نەماوە 'نێرە بیدۆشە' لە تۆ ڕووی داوە. ناندێن کون مەکە، لێت خواردبێ نان چێژەت لە خوێ کرد، مەشکێنە خوێدان. هەرچی نەبووبێ نەیانفەرمووە بیری دواییت بێ، ئەوی چوو چووە. وریا بە نامه! تا نەختێ زووە تا زۆڵەچەرم ئاو نەیبردووە. من لە خەڵکم بیست، تۆش ببیسە لێم جام دەڵێ بشکێم بەڵام نەزڕێم. لە دووی وێڵ مەبە تازە بێ‌سوودە باز لە بەرەگە دەرچوو بێهوودە. قسە بێ کەڵکە دڕێژ و زۆر بێ کەم و دڵگر بێ، نە زۆر بێ و بۆر بێ. زەرەر لە نیوەی بگەڕێتەوە زووتر قەرەبووی بۆ دەکرێتەوە. دەرفەتە هەرچی دەسبەجێ کریا خۆزگە بەو خوێنە شەو دێ بە سەریا ++++++++++++++++++++++ سەرناو: برین تا گەرمە سووک و بێ‌ترسە سەبارەت: نووسین و ئامادەکردن: کەماڵ ڕەحمانی - دیاری مەهاباد، چاپی سێیەم، ساڵی١٣٨٦، لاپەڕە ٨٣. برین تا گەرمە سووک و بێ‌ترسە کە ساردەوە بوو بەژان و قورسە سووتاوە لە سوێی خاڵی گەردەنێ هێند تامەزرۆیە بە دۆش دەژەنێ ڕووبینی و ڕیا بۆ بەرحوزوورە چاو حەیا لە چاو دەکا، مەشهوورە سەولە زیاد نابێ بە کلکەسووتە وڵامی دەدرێ بە تووتە تووتە خاڵە گیان! بۆیە پێت دەڵێم خاڵە چۆلەکە بگری بۆ ئەو مناڵە نابووتی دەستی پەڵپ و بیانووم لە ساجی عەلی ناوم کەبانووم تاسەم لێت نەشکا ناردی بە دووتا بۆ نانی بەسەر سێڵەوە سووتا؟ هاوین چوو، دڕا لێفەی فەقیری چەن تاڵە ژینی فەقیری و پیری ژن تۆسنیش بن، له فەقیریانە تۆران و زیز بوون شیر و تیریانە ++++++++++++++++++++++ سەرناو: پیاو چەقۆیە، ژن بۆتە هەسانی سەبارەت: نووسین و ئامادەکردن: کەماڵ ڕەحمانی - دیاری مەهاباد، چاپی سێیەم، ساڵی١٣٨٦، لاپەڕە ٨٤. پیاو چەقۆیە، ژن بۆتە هەسانی تیژ و کولی ئەکا بە هۆی زمانی ڕق هەیە چەن ماڵ ئاوەدان دەکا ڕقی واش هەیە ماڵ وێران دەکا هێدی به، تا خوێن دەبزوێ لە ڕەگ قەدیمی دەڵێن شەڕ هاتوە بۆ سەگ. شەڕ ئیرادە بەو سەر و سمێڵەوە تووشیش بووی، ڕێگای ئاشتی بێڵەوە. زۆر دەرهەڵ مەبه، هۆش مەتارێنە چاوت سوور نەبێ، کەف مەچارێنە. کاکی خۆم دنیا زۆری پێ دەوێ ڕۆژیکی وا دێ چاو وە چاو کەوێ. وەک دەڵێن هەر کێو وە کێو ناکەوێ ئادەمێ حۆجەی بە یەکتر ئەوێ. مەشهووره بزن بۆ تاقە شەوێ جێگای خۆش دەکا لە کوێ وەرکەوێ. کەسێ به پیری فێر ببێ پڵاو لە باتی دەمی، دەس دەبا بۆ چاو. ++++++++++++++++++++++ سەرناو: ده‌ڵێن ئاده‌می ته‌یری بێ باڵە سەبارەت: نووسین و ئامادەکردن: کەماڵ ڕەحمانی - دیاری مەهاباد، چاپی سێهەم، ساڵی١٣٨٦، لاپەڕە ‌٨٥. ده‌ڵێن ئاده‌می ته‌یری بێ باڵە له‌ چۆڵ و چیا وێڵ و عه‌بداڵه؛ گا له پێده‌شته‌، گا له ده‌م یاڵە ڕۆژێ دووروڵات، ڕۆژێ له ماڵه‌ دوو شت هەن‌ باشن، هه‌م هۆی نه‌مانن ئاگر و ئاون وا بێ ئامانن. که‌سێ تاوس و تووتی خۆش ده‌وێ ڕێی هیندوستانی ده‌بێ به‌رکه‌وێ؛ کێ شۆری که‌عبه‌ی له‌سه‌ری دابێ ده‌ربه‌ستی چە‌قڵی موغیلان نابێ. باب ده‌سهه‌ڵاتی دا به‌ عه‌ولادی ده‌بێ بچێژێ ده‌ردی بێ‌مرادی کێ له زۆرزانی، بابای عه‌یارە نێوبانگی له گشت دێهات و شاره، کێ به قه‌ت هه‌مو که‌س قین‌ئه‌ستوورە کێ له خوێن‌ڕشتن ئازا و جه‌سووره، کێ ڕۆژی ده‌عوا مه‌ردی مه‌یدانە سوارچاک و ڕەشید، شێری ده‌ورانه ++++++++++++++++++++++ سەرناو: کێ ترس و باکی نییه له دوژمن سەبارەت: نووسین و ئامادەکردن: کەماڵ ڕەحمانی - دیاری مەهاباد، چاپی سێیەم، ساڵی١٣٨٦، لاپەڕە ‌٨٦. کێ ترس و باکی نییه له دوژمن پێی بانادرێ هه‌رگیز به‌نی ژن پێت درێژ مه‌که زیاد له ئه‌ندازە سه‌ره‌ڕۆ مه‌به، ‌ ئیزن بخوازە به که‌ڵه‌زه‌ڕی بۆت ناچێته سه‌ر دنیا به پووشی نه‌گیراوه سه‌ر. له چاونه‌زێری وازبێنی چاکە به‌و گه‌ز و ڕبه‌ت ناده‌نێ کاکە دوعات ئه‌وه بێ شیرین تاڵ نه‌بێ‌ قه‌ت ناته‌باییت له‌ نێو مال نه‌بێ. ژن به پیاوی کوت تۆ هیچ مه‌کڕە ئیتر ده‌بێته چه‌پەره ‌شڕه‌ بێ وه‌فا زۆرن له ژن و پیاوا چاکه و پیاوه‌تی ده‌ده‌ن به ئاوا، بێ به‌قا و سپڵه‌ن هه‌روه‌ک پشیلان سێبه‌ریان چه‌شنی توودڕک و شیلان. بی، هه‌نار و به‌ی که‌ی دێنێته به‌ر؟ شه‌خته‌ نابێته شنه‌بای سه‌حه‌ر ++++++++++++++++++++++ سەرناو: ماڕێک به خێو که‌ی به قه‌ند و شیری سەبارەت: نووسین و ئامادەکردن: کەماڵ ڕەحمانی - دیاری مەهاباد، چاپی سێیەم، ساڵی١٣٨٦، لاپەڕە ‌٨٧. ماڕێک به خێو که‌ی به قه‌ند و شیری خزمه‌تی بکه‌ی تا کاتی پیری، چاکه له‌گه‌ڵ ئه‌و بکه‌ی به‌رده‌وام به ده‌وریدا بێی وه‌ک به‌نده‌ و غوڵام، ڕۆژێ له قاچ و قولت ده‌ئاڵێ پرزه‌ت لێ ده‌بڕێ، ده‌تخاته چاڵێ؛ وایه ئاکامی دۆستایه‌تی مار به وته‌ی مه‌شهوور: شه‌رعی مار به دار! شێر هه‌رگیز ناخوا جێ ده‌می ڕێوی ئه‌گه‌ر له برسان بمرێ له کێوی، هه‌ڵۆ ناچێته هێلانه‌ی قاڵاو گه‌ر هه‌ڵپڕووکێ له‌به‌ر سووره‌تاو. ماڵ چونکی هه‌را و هوریای که‌م بووه هه‌ر ده‌ڵێی ئاشه ‌و ئاوی که‌وتووە ده‌ڵێن مامه گیان گونت به چه‌نده؟ ده‌ڵێ به سه‌نگ و ته‌رازوو به‌ندە! گه‌ر بۆ تۆ هه‌بێ له‌چک بەسه‌رێ بۆ منیش ده‌بێ کڵاو لەسه‌رێ ++++++++++++++++++++++ سەرناو: چون قوڵه‌فیتنه ئاوری بن کایە سەبارەت: نووسین و ئامادەکردن: کەماڵ ڕەحمانی - دیاری مەهاباد، چاپی سێیەم، ساڵی١٣٨٦، لاپەڕە ‌٨٨. چون قوڵه‌فیتنه ئاوری بن کایە ناکۆکی وا زوو کۆتایی نایە ده‌ڵێن سه‌گێک چوو ئاشی لسته‌وە سه‌گێکی تر چوو پاشی لسته‌وە قه‌ت پیاوی تووڕه نه‌دوێنی چاکە به‌ڕوو له ده‌میا ته‌قیوه کاکە ئه‌وه‌ی له هیچ کوێ بۆت زه‌وت نابێ ڕه‌نگه ئاڵه‌تی له قنگ کرابێ هێند به په‌له‌یه بووکی ڕازاوە هه‌ر دەڵێی ئه‌سپی بۆ زین کراوە چون تووشی خه‌م و مه‌ینه‌ت و داخ نی عیسا گرتووتی و مووسا تێی ئاخنی چاوچنۆک ئاوا قۆڵمان لێ هه‌ڵکا خۆزگه‌م به کفن‌دزی هه‌وه‌ڵ کا هه‌ر له خۆم نه‌ده‌ن، بده‌ن له هاوڕێ پێم له جه‌واڵی کا و گزره ده‌درێ هاوسێ ماڵێکمان هه‌بوو بێ‌مناڵ له‌ کووچه و کۆڵان که ده‌یدی مناڵ ++++++++++++++++++++++ سەرناو: وا له باوشی خۆی ده‌گرت هه‌تیو سەبارەت: نووسین و ئامادەکردن: کەماڵ ڕەحمانی - دیاری مەهاباد، چاپی سێیەم، ساڵی١٣٨٦، لاپەڕە ‌٨٩. وا له باوشی خۆی ده‌گرت هه‌تیو ده‌تکوت بوویه‌تی به دوو نق و نیو خه‌می براکه‌م پشتی کردم کۆم بێ سه‌روشوێن چوو وه‌ک به‌ردی بن گۆم گه‌میه‌ت غه‌رق بوو، وا دژ داماوی؟ یا پیرێژنی دۆ لێ ڕژاوی؟ ! ڕه‌ش کوژه ئه‌و‌ی تۆ پێت فسۆسە بو لێت کردوومه ڕاوی سێ کۆسە! ویستم له‌ گه‌ڵ تۆ نێوم نه‌زڕێ تازه پاش تڕێ با خه‌مشه‌ی بڕێ کابه که‌چ نابێ، ئیسلام نابێ کز جاروبار بکه‌ن قسه‌یه‌ک بۆ دز خانو یه‌کێکه که‌بانوو نوێه‌ بۆیه تۆز و خۆل هه‌تا ئه‌ژنوێه‌ هه‌ر که‌سێ زانا و ئه‌هلی نه‌زه‌ر بێ پێی سه‌یره بێستان بێ سه‌ره‌خه‌ر بێ ئه‌م په‌نده‌ جوانه‌ش به گوێ بسپێره: سه‌گ و مزگه‌وت؟ وشتر و گێره؟ ! ++++++++++++++++++++++ سەرناو: سه‌گ شاڵاو بێنی و ئازار بدا له‌ش سەبارەت: نووسین و ئامادەکردن: کەماڵ ڕەحمانی - دیاری مەهاباد، چاپی سێیەم، ساڵی١٣٨٦، لاپەڕە ‌٩٠. سه‌گ شاڵاو بێنی و ئازار بدا له‌ش هیچ فه‌رقی نییه سپی بێ یا ڕه‌ش ساواک و مه‌ییت بۆ حاڵی میلله‌ت ته‌رسه‌قولێکن کراونه دوو له‌ت هه‌ر یه‌که‌ی بۆ خێو باره‌به‌رێکن یانی دوو جاشن له‌ ماکه‌رێکن ئه‌وکه‌سه‌ی پیره و ژنی نه‌ختێ جوان له کار و کاسپی سسته بێ گومان هه‌ر تاونه‌تاوێ ده‌ڕوا و دێته‌وە ماڵ‌کاوڵ ده‌ڵێی جاو ده‌نێته‌وه‌ مناڵ هه‌یه زۆر به‌ ناز و بازە له‌گه‌ل ئه‌وه‌شدا کز و لاوازە چاوبه‌قووڵا چوو ڕوومه‌ت قوپیوە ده‌ڵێی جندۆکه پێیدا تسیوە هه‌یشه گۆشتن و خشپیلانەیە هه‌ر ده‌ڵێی گورپه‌ی گیپه‌خانه‌یە سه‌ر ته‌کان بده‌ی له باتی سڵاو دۆشاو به گونت له جێگه‌ی بێ‌ئاو ++++++++++++++++++++++ سەرناو: دار هه‌ر دوو سه‌ری پیسه، ‌ داماوی سەبارەت: نووسین و ئامادەکردن: کەماڵ ڕەحمانی - دیاری مەهاباد، چاپی سێیەم، ساڵی١٣٨٦، لاپەڕە ‌٩١. دار هه‌ر دوو سه‌ری پیسه، ‌ داماوی جا وه‌ی له‌ قوونێ، وه‌ی له‌ دۆشاوی! بۆ مه‌رگی ئازیز به‌رۆک دادڕه به‌ڵام چا ده‌بێ، گڵ مه‌یل‌بڕه‌ چا جووتن ئه‌و دوو ئێسک گرانه! ‌ ئه‌و دۆیه‌ باشه‌ بۆ ئه‌و دۆدانه‌! خوا کاره‌کانی سه‌ر سووڕهێنه‌ره‌ ته‌خته‌تاش نییه، ‌ ته‌خته‌ ڕێک‌خه‌ره‌ په‌کی که‌س ناخا له‌م دنیا پانە بۆ داعبای کوێریش ده‌کا هێلانه ‌تا لێت داده‌خا ده‌رکێ به‌ حیکمه‌ت بۆت ده‌کاته‌وه‌ چه‌ند ده‌رکی ڕه‌حمه‌ت سه‌گ قاچی گرتی تێی هه‌ڵسوو نه‌جیس قه‌دیمی ده‌ڵێن: پیس ده‌چێ به ‌پیس حه‌یفه‌ پیاو شتی چاک بدا له‌ کیس پیس‌کڕ ده‌گه‌ڕێ له‌ شوێن شتی پیس مه‌شهووره‌ زستان ڕۆژێکی مابێ کاری خۆی ده‌کا ماڵی خرا بێ! ++++++++++++++++++++++ سەرناو: ئه‌گه‌ر هه‌لی کرد سۆزه‌ی زریانی سەبارەت: نووسین و ئامادەکردن: کەماڵ ڕەحمانی - دیاری مەهاباد، چاپی سێیەم، ساڵی١٣٨٦، لاپەڕە ٩٢. ئه‌گه‌ر هه‌لی کرد سۆزه‌ی زریانی نه چۆڵ ده‌پرسێ نه ئاوه‌دانی واته کچ کاتێ مه‌یلی بوو له شوو ناپرسێ ته‌ڕه‌ف هه‌نگوینه یا گوو شووڵێک به ته‌نیا تۆ ده‌یشکێنی دوو سێش بن ڕه‌نگه زه‌ده‌ی پێ بێنی به‌ڵام که بوو به حه‌وت و هه‌شت و نۆ ناشکێ به حه‌وتی وه‌کوو من و تۆ وته‌ی پێشینیان به دڵ بسپێرە سه‌فه‌ری زستان خۆی لێ ببوێرە نه‌کرا ببووری تۆ له‌و سه‌فه‌رە هاوڕێی شاره‌زا له‌گه‌ل خۆت به‌رە سبه‌ی ڕێکه‌وه هه‌تا نیوه‌ڕۆ له‌ کوێ مایه‌وه‌ ده‌رت‌که‌ن مه‌ڕۆ زستان ڕووخۆش بوو پێی هه‌ڵمه‌خوێنە سه‌روه‌شێن نه‌بێ کلک وه‌شێنە ئه‌گه‌ر درۆ بێ به ئه‌ستۆم وه‌باڵ هه‌رچی که مشکه ده‌دڕێ جه‌واڵ ++++++++++++++++++++++ سەرناو: هه‌ر چی بوگه‌ن کا عیلاجی خوێیە سەبارەت: نووسین و ئامادەکردن: کەماڵ ڕەحمانی - دیاری مەهاباد، چاپی سێیەم، ساڵی١٣٨٦، لاپەڕە ‌٩٣. هه‌ر چی بوگه‌ن کا عیلاجی خوێیە خوێ بۆگه‌ن بکا په‌نا بۆ کوێیە؟ ناشکوری نه‌بێ گوریس به یه‌ک لا ناگا، نه خوازه‌ بیکه‌ی به دوو لا چون کۆشکی هیوات بناغه‌ی بۆشە پێشت پۆلا بی پێشت کڵۆشە سه‌رت بگاته ته‌ختی پاشایی ژێرت مه‌فره‌قه، بێ نرخ و بایی مه‌ڕوانه خاوه‌ن قۆشه و قڕانی له سه‌ر دڵان بی، له‌به‌ر دڵانی هه‌ر چه‌ن به‌ بیر و ژیر و چاناسی تا لێت نه‌قه‌ومێ خه‌ڵکی ناناسی ئه‌م په‌نده باوه له دێهات و شار دنیا یا زۆردار ده‌یخوا یا بێعار هاته‌وه‌بیرم په‌ندێکی ساکار قسه که‌وته زار ده‌که‌وێته شار خواوه‌ند له چاره‌ی کوردی وا نووسی سه‌ردانێ له‌سه‌ر کورده‌نامووسی ++++++++++++++++++++++ سەرناو: به که‌م قایل به تا زۆرت ده‌بێ سەبارەت: نووسین و ئامادەکردن: کەماڵ ڕەحمانی - دیاری مەهاباد، چاپی سێیەم، ساڵی١٣٨٦، لاپەڕە ‌٩٤. به که‌م قایل به تا زۆرت ده‌بێ هه‌شت بێ له مشت بێ، نه‌ک نۆ بێ نه‌بێ دیاره ئه‌وانه‌ی ته‌سه‌ل و تێرن گوێز له هه‌مبانه‌ی خۆیان ده‌ژمێرن کوا تازه پێکدێ وه‌سڵی ئه‌و یارە ئاخری عومره و هه‌وڵی کاره! هه‌ر سینفێ له‌گه‌ل سینفی خۆی کۆکە دیاره هاواڵی گولان خدرۆکە هه‌ر وه‌ک سیر و مار ڕێک‌ ناکه‌ون باش که‌نگر و قوماش نابن به وێڵداش وه‌ک شای بێ جوققه‌ی له‌ سه‌ر ته‌ختی خۆت ئه‌گه‌ر هه‌ڵنه‌ده‌ی شه‌ق له‌ به‌ختی خۆت ده‌ستت نه‌له‌رزێ، به‌ختی که پاره‌ت دۆشاو که زور بوو پێی ده‌گرن تاره‌ت خوری خۆی ده‌دا به نیوه‌رێسی هی خه‌لکی دێنی به ته‌شی‌ڕێسی چاو له‌ چاو شه‌رم ده‌کا و مست له‌ مست ده‌گه‌ڕێته‌وه‌ به‌بێ هه‌ست و خوست ++++++++++++++++++++++ سەرناو: کابرایه‌ک ڕێیان نه‌دا له‌و دێیه‌ سەبارەت: نووسین و ئامادەکردن: کەماڵ ڕەحمانی - دیاری مەهاباد، چاپی سێیەم، ساڵی١٣٨٦، لاپەڕە ‌٩٥. کابرایه‌ک ڕێیان نه‌دا له‌و دێیه‌ ده‌یپرسی ماڵی کوێخا له‌ کوێیه‌! ئه‌و شۆڕه‌لاوه‌ی شێر ده‌ته‌زێنێ له‌ داوی عیشقا موو ناپسێنێ زه‌رد هه‌ڵگه‌ڕاوه ‌له‌تاو که‌نیشکێ نه‌ ده‌زووه‌ بپسێ، نه‌ ده‌رزییه‌ بشکێ شاعیر که‌ زانی قافیه‌ ته‌نگه‌ دێته‌وه ‌بیری هه‌رچی جه‌فه‌نگه‌ کۆزی کاره‌گه‌ڵ ببینه‌ ئه‌مجار قه‌پووچک داگره‌ له‌ ماستی توێدار که‌م ده‌کا نرخی قاڵی که‌مێ ده‌ڵب هه‌ر بۆ خاوه‌نی خاسه‌ ماڵی قه‌ڵب هه‌وهه‌وی سواران هیچیان پێ نه‌کرا به‌ شڵپه‌شڵپی پیرێژن چ کرا؟ به‌ ده‌ردێکه‌وه‌ ئه‌مساڵ دوچارم ڕۆژێ له‌ دارم ڕۆژێ له‌ خوارم ژینی بێ‌خه‌ته‌ر پاشایه‌تییه سه‌روه‌ت له‌ش‌ساغی و هێمنایه‌تییە ++++++++++++++++++++++ سەرناو: ئه‌مه‌ش فه‌رمووده‌ی فه‌خری عاله‌مە سەبارەت: نووسین و ئامادەکردن: کەماڵ ڕەحمانی - دیاری مەهاباد، چاپی سێیەم، ساڵی١٣٨٦، لاپەڕە ٩٦. ئه‌مه‌ش فه‌رمووده‌ی فه‌خری عاله‌مە مه‌زنترینی نه‌سلی ئاده‌مە فه‌قیر که دیار بێ، که‌سی یار نییە که‌س لێی ناپرسێ کاتێ دیار نییە له حاست پیاوه‌تی به‌نده و غوڵامم چاکه‌ت بۆم نه‌بێ، به‌رزه ‌مه‌قامم دوژمنی دوژمن به دۆست بزانە دۆستی دوژمنت بۆ تێهه‌ڵدانە کێ بۆ خۆی بژی له عه‌قڵ زویره ئه‌و که‌سه‌ ژیره خه‌ڵکی له‌ بیرە کێ دلئاوایه و هیممه‌ت‌ بڵه‌ندە ماڵیشی که‌م بێ زۆر ده‌وڵه‌مه‌ندە که‌سێ له خێر و چاکه بێزارە گه‌نجی دنیای بێ ڕووت و نه‌دارە پشتت نینۆکی خۆت نه‌یخورێنێ سه‌ت نینوکی تر خورووی نامرێنێ حه‌سوود حه‌ز ده‌کا هه‌تا بمێنی نینۆکت نه‌بێ سه‌رت بخورێنی ++++++++++++++++++++++ سەرناو: که‌وتوونه گه‌مه و گز و فت لێمان سەبارەت: نووسین و ئامادەکردن: کەماڵ ڕەحمانی - دیاری مەهاباد، چاپی سێیەم، ساڵی١٣٨٦، لاپەڕە ‌٩٧. که‌وتوونه گه‌مه و گز و فت لێمان ئاسکی نه‌گیراو ده‌بەخشن پێمان ئاسکی نه‌گیراو چه‌نده، ئه‌وندە خورما له به‌غدا زۆر و زه‌وندە به پێلاو بده له ته‌وقی سه‌رمان حاشا له وه‌عده‌ی دووری سه‌رخه‌رمان قه‌رزکوێر ئه‌گه‌ر که‌وشت بۆ باوێ هه‌ڵیگره‌ و بڕۆ، کێشه‌ی پێ ناوێ قه‌رز کۆن ده‌بێ، نافه‌وتێ به‌ڵام یه‌خه‌ی قه‌رزدار مه‌گره به‌رده‌وام قه‌رز کۆن کردن هۆی نه‌دارییە ده‌سته‌نگی مایه‌ی شه‌رمه‌زارییە کێ قه‌رزی خه‌ڵکی نه‌دا به ئانقه‌ست ده‌ستی هومێدی به یه‌کجاری به‌ست سه‌ڵا له‌و که‌سه‌ی قه‌رزی دوا خرا ده‌رکی متمانه‌ی له‌ سه‌ر داخرا به‌سیانه جارێک بۆیان ڕێک‌که‌وێ بۆ زستان شه‌وێ، بۆ پیران ته‌وێ ++++++++++++++++++++++ سەرناو: گه‌لێ که‌س کوشته‌ی یاری دڵخوازن سەبارەت: نووسین و ئامادەکردن: کەماڵ ڕەحمانی - دیاری مەهاباد، چاپی سێیەم، ساڵی١٣٨٦، لاپەڕە ٩٨. گه‌لێ که‌س کوشته‌ی یاری دڵخوازن کچان به مه‌یلی خۆیان ده‌خوازن قه‌دیمی ده‌ڵێن به خۆ مه‌نازن ئه‌وی دڵخوازن، هه‌ر مارانگازن هه‌ن به ڕواڵه‌ت شۆخ و لەبارن به‌ڵام دوورکوژی نزیک خه‌سارن هێنده به فیز و تیزه ئه‌و لاوە هه‌ر ده‌ڵێی دۆمه و خه‌لات کراوە زیاد له ئه‌ندازه خۆ مه‌پارێزە نه‌خوشه هه‌ر که‌س به قێزوبێزە کێ لە که‌سپ و کار بە قیز و بۆیە بمرێ وەباڵی بە ئەستۆی خۆیە ئێژن تەوەزەل چەشنی دۆڵپایە قورسایی ژینی لە مڵ خەڵکایە وەک قیلی کەوای سپی بێ وایە یان خەرەنگەزی بن کلکی گایە کەسێک شعووری لە چاوی دابێ نەزانە، با لە سەت ئاوی دابێ ++++++++++++++++++++++ سەرناو: گوێ بگرە پەندی هەموو کەس بیستوو سەبارەت: نووسین و ئامادەکردن: کەماڵ ڕەحمانی - دیاری مەهاباد، چاپی سێیەم، ساڵی١٣٨٦، لاپەڕە ٩٩. گوێ بگرە پەندی هەموو کەس بیستوو ڕامەپەڕێنە قەت سەگی نوستوو کاکە زۆر بۆ لای خۆتی مەتاشە نە شیش بسووتێ نە کەباب باشە بێ‌تامە گەلێ شتی سپی و سۆڵ هەر لە دوور خۆشە ئاوازی دەهۆل دیاره‌ ئەو کەسە قسەی ناچەسپێ لە گیرفانیدا هەلپەڕێ ئەسپێ ئەم پەندەم لەلا گەلێ عەزیزە خۆزگە بەو باغە ورچی لێ زیزە پێت خۆشه عه‌یبت قه‌ت ده‌رنه‌که‌وێ عه‌یبی که‌س مه‌ڵێ تۆ لێر و له‌وێ که‌سێ عه‌یبی خۆی بێته‌ به‌رچاوی ڕه‌وا نابینێ به‌ که‌س به‌دناوی بۆیه‌ خاوه‌نکار هه‌ر ده‌ڵێ زوو کە پێمه‌ڕه‌ به‌ ده‌ست فه‌عڵاوه‌ سووکە زانا ئه‌شێ هه‌ر بۆی بدرکێنی نه‌زان نه‌قیزه‌ی تێ‌بوه‌ژێنی ++++++++++++++++++++++ سەرناو: له‌ ڕه‌سه‌نی چاک ده‌بێ شتی چاک سەبارەت: نووسین و ئامادەکردن: کەماڵ ڕەحمانی - دیاری مەهاباد، چاپی سێیەم، ساڵی١٣٨٦، لاپەڕە ١٠٠. له‌ ڕه‌سه‌نی چاک ده‌بێ شتی چاک له‌ ماینی حدوود یه‌کسمی چالاک قۆزی بێ زواد‌ قاوه‌ قاوێتی ترخێنه‌ی بێ‌تام شه‌و پڵاوێتی لە کن ئاسنگەر کەسێ دانیشێ بەرگی دەسوتێ یا سەری دێشێ له‌ سه‌ری مه‌ڕۆ حه‌یات با نه‌به‌م با لێفه‌ له‌ سه‌ر هه‌تیو لا نه‌به‌م کێ پەسند ناکا قسەی وا بەجێ دەست ئەگەر شکا خوار دێتەوەجێ که‌س په‌نا نابا بۆ سێبه‌ری کوند ئه‌گه‌ر جێی نه‌بێ له شار و له‌ گوند دووڕوو قسه‌یان بێ ئیعتیباره‌ وه‌ک نیسک نه‌ به‌ر نه‌ پشتی دیاره‌ لە کەڕەمی کەم مەگرە بەهانە کەمی هێندێ کەس، بە زۆر بزانە ++++++++++++++++++++++ سەرناو: ئه‌گه‌ر لالووت بێ له‌ که‌ڕه‌می که‌م سەبارەت: نووسین و ئامادەکردن: کەماڵ ڕەحمانی - دیاری مەهاباد، چاپی سێیەم، ساڵی١٣٨٦، لاپەڕە ١٠١. ئه‌گه‌ر لالووت بێ له‌ که‌ڕه‌می که‌م بێ‌شک ده‌که‌ویه‌ به‌ر لۆمه‌ و له‌قه‌م مەشهوورە هەرکەس بەکەم نەزانێ پیاوەتیی زۆریش بەکەم دەزانێ دوعای پیاوانی ژیر و بە هەستە ئەم دەستە موحتاج نەبێ بەو دەستە بێ هێزی خەتای ڕۆن‌نەباتییە کەم‌خوواردن لە کەم‌دەسەڵاتییە ئای خۆزگە شۆفار لاڵ و کەڕ بوایە ئاوخواردنەی گورگ لەگەڵ مەڕ بوایە له‌ زانایه‌کیان پرسیوه‌ پێشوو زیندوو له‌ دنیا زۆره‌ یا مردوو؟ جوابی داون ئه‌و شیرن‌وتارە مردوو له‌ زیندوو زۆرتره‌ دیاره‌ بێجگه‌ له‌وانه‌ی تا ئێسته‌ مردوون ئه‌وانه‌ی مردووی ژنن، هه‌ر مردوون ئەو کاتە ماڵت کرا بە پێخوست گەورە ئاوی ڕشت، چووکە پێی ڕێخست ++++++++++++++++++++++ سەرناو: بۆژۆ بوو ئەوی خۆی لە پێناو نا سەبارەت: نووسین و ئامادەکردن: کەماڵ ڕەحمانی - دیاری مەهاباد، چاپی سێیەم، ساڵی١٣٨٦، لاپەڕە ١٠٢. بۆژۆ بوو ئەوی خۆی لە پێناو نا هی شاخی هات و هی باخی ڕاونا کەس بوو بە ناکەس، ناکەس بوو بە کەس قەدیم‌وەجاخان دەرچوون بە عەبەس چرای مەزڵوومان کز و بێ نوورە ئاوی زاڵمان سەر بەرەو ژوورە دایک که‌ بوو به باوه‌ژن دیاره‌ باوکیش هه‌ر ئه‌بێ به‌ باوه‌ پیاره‌ چکۆلەترین کردەوەی عیسان لە سەد قسەی زل باشترە دیسان. که‌سێ به‌ زۆر و به‌ که‌شمه‌که‌شی عیلاقه‌ی بکه‌ن پیس نابێ له‌شی کێ عیشقی گه‌لی به‌ دڵدا ناچێ ئاوی ئاموون و توونی‌بابا چێ که‌سێ دایکی خۆی نه‌دا به‌ خه‌ته‌ر به‌ دایکی خه‌ڵکی چۆن نابا زه‌فه‌ر ده‌ڵێن پاییزی سه‌روه‌شێن چاکه‌ گوایه‌ زستانی خۆش ده‌بێ کاکه‌ ++++++++++++++++++++++ سەرناو: سه‌فه‌ر و سه‌و‌دا دوو به‌ڵگه‌ی چاکن سەبارەت: نووسین و ئامادەکردن: کەماڵ ڕەحمانی - دیاری مەهاباد، چاپی سێیەم، ساڵی١٣٨٦، لاپەڕە ١٠٣. سه‌فه‌ر و سه‌و‌دا دوو به‌ڵگه‌ی چاکن تاقیکه‌ره‌وه‌ی پاک و ناپاکن کێ گوێلکی خه‌ڵکی بۆ لای خۆی بێنێ هه‌ر گوێره‌وساری به‌ ده‌ست ده‌مێنێ له‌ هه‌وراز و لێژ قه‌ت مه‌ڵێ کوتن له‌ به‌ر با هه‌گیز مه‌کێشه‌ تووتن به‌ زاوابه‌ندی هه‌تاکوو مردن نه‌که‌ی بچیه‌ سه‌ر ماڵی بابی ژن زستان بیه‌وێ خه‌ڵکی بکا قڕ به‌ شه‌و سایه‌قه ‌و به‌ ڕۆژ هه‌وری پڕ پیاو مناڵی خۆی که‌م ڕووی بداتێ نه‌وه‌ک بێ‌ئه‌وان هه‌ڵنه‌کا ساتێ تۆڵه‌یان له‌ بیر ناچێ دوو دڵ‌پڕ نه‌ مار کلکی خۆی، نه‌ باغه‌وان کوڕ بنی هه‌مبانه‌ت‌ کونی تێدا بێ به‌ جه‌واڵ تێی که، ‌ هێشتا پڕ نابێ ده‌ڵێن هەر ژنێک مێرد بیکا سەنگین عاڵەم هەڵستێ، پێی نابێ نەنگین؛ ++++++++++++++++++++++ سەرناو: به‌ڵام هەر ژنێ مێرد بیکا تڕۆ سەبارەت: نووسین و ئامادەکردن: کەماڵ ڕەحمانی - دیاری مەهاباد، چاپی سێیەم، ساڵی١٣٨٦، لاپەڕە ١٠٤. به‌ڵام هەر ژنێ مێرد بیکا تڕۆ بە هەموو عاڵەم ناکرێ پەڕۆ پیاو ئەگەر شێرە یاخۆ پڵنگە ژن دەرکی نەکا، کەمتر لە پنگە ژنی وا هه‌یه‌ پیاو ده‌کا به‌ په‌ند هه‌ر ژنیشه پیاو ده‌کا سه‌ربڵه‌ند پەندی پێشینیان خۆراکی گیانە مۆسیقای دڵه‌، باخچه‌ی ژیانه‌ پەندی پێشینیان یادگارییە میراتی کۆنی کوردەوارییە پەندی پێشینان گەلێ پیرۆزە مایەی شانازی بۆ گەل و هۆزە پەندی پێشینان بەڵگەی خەباتە دیاردەی مێژووی گەل و وڵاتە به‌ به‌ردی دوژمن لێت بێته‌وه‌ پۆست نایه‌شێ به‌ قه‌ت گڵی ده‌ستی دۆست ئه‌گه‌ر باری که‌ر تفه‌نگ بێ پاکی گورگ تووشی بێ ده‌یخوا به چاکی ++++++++++++++++++++++ سەرناو: وه‌های فه‌رمووه ڕه‌سوولی ئه‌کڕه‌م سەبارەت: نووسین و ئامادەکردن: کەماڵ ڕەحمانی - دیاری مەهاباد، چاپی سێیەم، ساڵی١٣٨٦، لاپەڕە ١٠٥. وه‌های فه‌رمووه ڕه‌سوولی ئه‌کڕه‌م سڵاوی خوای لێ بێ هه‌موو ده‌م مرۆ پیر ده‌بێ هێزی نامێنێ دوو خسڵه‌تی ئه‌و جحێڵ ده‌مێنی یه‌کێ ته‌ماحی بێ حه‌د و سنوور یه‌کێ ئاره‌زوی زۆر درێژ و دوور چاوت نابه‌ستم خۆی به‌رحزوورە گۆشتی سه‌رچه‌په‌ر وته‌ی مه‌شهوورە وا نه‌خوشێکمان که‌وتووه‌ له ماڵێ به شه‌و ده‌ناڵێ به ڕۆژ ده‌ماڵێ هۆشی تاساوه له تاو مشته‌ری ئاگری به‌ری داویه له سه‌ری خۆ به زل زانین هی تازەکوڕە گه‌وج و نه‌زانن لێ‌یان ببوورە له ناو ئافره‌تان ئه‌م په‌نده باوە له گه‌لێ شوێن و جێگا وتراوە ژن ده‌ڵێن مه‌چۆ بن نیسێی به‌ردی جێی هومێد نییه وه‌ک به‌قای مێردی ++++++++++++++++++++++ سەرناو: ئاردی خۆم لێکرد که‌په‌کم دابێشت سەبارەت: نووسین و ئامادەکردن: کەماڵ ڕەحمانی - دیاری مەهاباد، چاپی سێیەم، ساڵی١٣٨٦، لاپەڕە ١٠٦. ئاردی خۆم لێکرد که‌په‌کم دابێشت گه‌لێکم تاڵی و سوێری دنیا چێشت نه‌خه‌وتووم له سه‌ر ڕێگای ئه‌م و ئه‌و تا خه‌ونی ئاڵۆز ببینم به شه‌و زۆرم جه‌فا دی له ڕێی دڵداری بوومه شوانه‌که‌ی حه‌ق نادیاری بۆیه که‌سی خۆت پێت هه‌ڵده‌کاڵێ ڕێوی ده‌ره‌وه‌ی، شێری له ماڵێ هه‌ر ژنێ به ده‌م پیاوا هه‌ڵشاخی ماڵی بۆ چۆل که‌ و ڕاکه بۆ شاخی به‌قسه‌ی ئه‌م و ئه‌و که‌س هه‌ڵنه‌تیزێ ئاش له میزتن بێ ڕۆژێک ده‌میزێ هه‌تاکوو که‌لـله‌م ‌ ده‌دروون له جاوی له بیرم ناچێ ده‌ردی بێ‌چاوی ده‌توانم ئازار نه‌ده‌م دڵی که‌س چ بکه‌م له حه‌سوود له خۆشی تووڕه‌س! به شان و قۆڵت بیبه‌ی بۆ کابە پێی زیاره‌ت که‌ی هه‌موو ئه‌سحابە ++++++++++++++++++++++ سەرناو: به کۆڵ بیگێڕی ئه‌و حه‌ق‌نه‌ناسە سەبارەت: نووسین و ئامادەکردن: کەماڵ ڕەحمانی - دیاری مەهاباد، چاپی سێیەم، ساڵی١٣٨٦، لاپەڕە ١٠٧. - لە ساڵی ١٣٤٤ تا ١٣٥٦ هەتاوی، ئەم پەندانە کۆکراونەوە و کراون بە شیعر. به کۆڵ بیگێڕی ئه‌و حه‌ق‌نه‌ناسە هه‌ر هه‌مان ئاشه‌ و هه‌ر هه‌مان کاسە جوابی پرسیاری دوژمن نازانم دیاره نازانم ڕه‌حه‌تی گیانم ++++++++++++++++++++++ سەرناو: جووتە مەم سەبارەت: نووسین و ئامادەکردن: کەماڵ ڕەحمانی - مەلا غەفوور دەباغی (حافزی مهابادی)، ساڵی ١٣٥٤ی کۆچی ـ هەتاوی. - ئاسۆی ڕوون، چاپی یەکەم ١٣٩٤ی هەتاوی، لاپەڕە ٧٩. - دیاری مەهاباد، چاپی سێیەم، ساڵی١٣٨٦، لاپەڕە ١٠٨. ئەی جووتە مەمت عەینی هەڵووی تازە فەریکە فێداری دەسی تۆیە دڵم، چارەسەری کە گیان بۆتە پەپوولێک و لە دەوری شەمی ڕووتە تا باڵ و پەڕی، پاکی نەسووتاوە دەری کە چاوت کە بە هاوکاری برۆت خەڵکی دەکووژێ ئەگریجە لەپای چی لەگەڵ ئەو جووتە شەریکە؟ ! دوژمن دەیەوێ تۆ بە تەڵا هەڵخەڵەتێنێ یا جوابی بە تێڵا بدە، یا جارێ کەری کە! ئەم هۆنەرە بێ‌چاوە کە سەوداسەری تۆیە تاوێ وەرە دەس باوێ ملی، بەختەوەری کە ++++++++++++++++++++++ سەرناو: کیژی سابڵاغی سەبارەت: نووسین و ئامادەکردن: کەماڵ ڕەحمانی - مەلا غەفووری دەباغی، ئاسۆی ڕوون، چاپی یەکەم ١٣٩٤ ک. هـ، لاپەڕە ١٠٥و١٠٦. - دیاری مەهاباد، چاپی سێهەم ١٣٨٦ هـ، لاپەڕە ١٠٩و١١٠. ئەگەر ئەو کیژی سابڵاغی وەدەس بێنم به یەکجاری دەکەم مڵکی دڵ و دینم نیساری خونچەکەی زاری له پێناوی دەنێم عومری دریژ و گیانی شیرینم مرادم بێتوو حاسڵ کا له دوو لێوی شەکەرباری مژۆڵی چاوه‌کانی، قاتڵی سه‌د لاوی به‌دبه‌ختە هه‌زاران بێ خه‌تا که‌وتوونه داوی پرچی ڕه‌شماری به باڵا سه‌روی بوستانه، به‌ ڕوو شه‌معی شه‌بوستانە له ڕوخساری نومایانه جه‌لال و سه‌نعه‌تی باری مُضِیءٌ وَجهُها کَالشَّمسِ فَوقَ الطودِ إذ تَطلُع مُنیرٌ أو کَبَدرِ اللیلِ یجلُو کلَّ أقطارِ هَواها مُنذُ حَلَّت بِالفُؤادِ کُلّما تَجري دُموعي بالدَّما سالَت کَیَنْبوعٍ وَ أنهارِ بگفتم ای شه خوبان دو چشمم چشمه‌ی خون شد بگفتا پیش من سودی نبخشد گریه و زاری چو بی‌مهری از آن نامهربان دیدم، یقینم شد که در آیین خوبان نیست جز جور و ستمکاری بو ماهی عالم ئیشقند اورائیم اوت کیمین یانر اوزم رنگی مگر گومر اولپ اولی کیمین ساری دِیَم الله خاتر نه، منی محنت ده الدرمه دیر هیچ فایدسی یوختی منم یانم بو سوزلاری که‌مه‌ندی پرچی وای گرتوم، دڵ و هۆشی وه‌ها بردووم قه‌تم نابێ هه‌تا مردن له به‌ندی عیشقی ڕزگاری ده‌بێ "حافز" له زیندانی جه‌فادا هه‌ر بناڵێنێ له‌گه‌ڵ ناز په‌روه‌ران بۆ خۆی ده‌کرد تووشی گرفتاری؟ دووکانی من له‌چه‌ن جۆره مه‌تاع و جنسی تێدایە به‌ڵام چبکه‌م به توورێکیش نییه له‌م شاره کڕیاری ++++++++++++++++++++++ سەرناو: پیرۆزبایی نه‌ورۆزی ١٣٥٤ سەبارەت: نووسین و ئامادەکردن: کەماڵ ڕەحمانی - مەلا غەفووری دەباغی، ئاسۆی ڕوون، چاپی یەکەم ١٣٩٤ ک. هـ، لاپەڕە ٤٢و٤٣. - دیاری مەهاباد، چاپی سێهەم، ١١١و١١٢. ئه‌م جێژنه‌ پێروز بێ له هه‌موو گوێگر و گوێدێر پیرۆز به دڵی خۆش و له‌شی ساغ و زگی تێر دوایین په‌ڕی هه‌ڵدایه‌وه زستانی سڕ و سارد پێچایه‌وه خوێن تاڵی دزێو، نه‌گبه‌تی بێ خێر مووسایی به‌هاری به هه‌موو موعجیزه‌کانی فیرعه‌ونی ده‌ی و به‌همه‌ن و ئه‌سفندی نیا ژێر نەورۆزە، سەری ساڵە، گوڕەی پیرە شەماڵە بۆ گیانی هەرەس دێ تلی پێدا وەکوو تاوێر نه‌ورۆزه به‌هاره هه‌ڕه‌تی کۆشش و کارە جا نۆره‌ته ئه‌ی کاکی فه‌لا، مامه‌یی وه‌رزێر خێرا که له خاو بێنەده‌رێ جووتی که‌ڵانت بۆ شێوی زه‌وی و زاره‌که هه‌ڵمه‌ت به‌ره وه‌ک شێر سه‌یری ده‌ر و ده‌شتێ که دەڵێی باخی به‌هه‌شتە مێرگی هه‌موو بژوێنه، هه‌وارگه‌ی هه‌مو زەنوێر گیان به‌خشه هه‌وای کێو و که‌ژ و دیمه‌نی کوێستان خه‌مڵاوه به گیاخاو و گوڵی سوێسن و شللێر هه‌ر ده‌نگی مەله تێکه‌ڵی هاڕه‌ی خڕ و دۆڵە هه‌ر لووزه‌وی به‌فراوه ده‌کا هاژه له هه‌ڵدێر هه‌ر تاوڵ و ڕه‌شماڵه به داوێنی چیاوە هه‌ر ڕه‌شبه‌ڵه‌ک و داوەتی بێریانه به بلوێر زاخاوی دڵان حیله وو کۆڕژنی کەحێلە تاوێنی خه‌مان ده‌نگی مه‌ڕ و به‌رغه‌ل و هاوێر خۆزگه‌م به‌وه ئه‌و فه‌سڵه به چاوانی ده‌بینێ ژین نرخی لەلای خاوه‌نی بیناییه، نه‌ک کوێر ++++++++++++++++++++++ سەرناو: بۆ دوکتورێکی دڵسۆزی سنەیی سەبارەت: نووسین و ئامادەکردن: کەماڵ ڕەحمانی - مەلا غەفووری دەباغی، ئاسۆی ڕوون، چاپی یەکەم ١٣٩٤ ک. هـ، لاپەڕە ٤٠و٤١. - دیاری مەهاباد، چاپی سێهەم، لاپەرە ١١٣و١١٤. بس سپاست کنم ای دکتر خوش قلب و غیور که مرا یاد تو بگشود درِ شادی و شور ١ از همان شب که مرا دستِ قضا یاری کرد جرعه‌ای چند روا داشت ز صهبای حضور آنچنان عمق دلم مسکن و مأوای تو شد که از این غمکده بیرون نروی تا لب گور دیده کز لذت دیدار تو محروم، چه باک؟ دیده‌ی معنی‌ام از دیدنتان شد پر نور کاش یک بار دیگر بخت نگون یار شدی با تو بنشینم و پیدا نشود کار ضرور گفته‌ها رد و بدل کرده، سخن‌ها به میان بحث در باره‌ی سرمای دی و مفلص و عور مطلبی نیز به کوردی بشنو جان دلم تو شفابخش مریضانی، چه نزدیک، چه دور دوکتور ئه‌م قاچ‌وقوله‌م دوور بێ له ڕووت ئێشی فره‌س ناشکێ ژانی مه‌گه‌ر بیخه‌مه‌ ناو ئاگری سوور خوا نه‌کا نه‌ختێ بڕۆم، تاوێ وه‌پاوه بوێسم دێته ئێش پا و پلم، بۆم ئه‌گرین خوار و ژوور سه‌رەڕای قاچ و قولم ژانێ له ناو شانما هه‌س لێم حه‌رام بووگه خه‌و و خواردن و ئه‌نواعی سروور فره درمان و ده‌وام کردگه بێ‌سووده برا ڕه‌نگه نووسرابێ که به‌م ده‌رده‌وه بمنێنه قوبوور سه‌یری خۆشتر له‌مه، ‌ من نیمەعه‌یالێکم هه‌س هه‌موو ئازای له‌شی بیماره، له دیوی ده‌ر و ژوور له ڕۆماتیزمه‌وه ده‌ردێکی خه‌ڵات کریاگە که ‌له هه‌ر چوار په‌لی، گوێچکەی نیه‌سی عه‌یب و قسوور سا له ڕێی هیممه‌ت و ویژدانه‌وه فکرێ بکه بۆم به‌شکه‌م ئه‌م ده‌رده له لای تۆوه شفای بێ به مروور با سه‌رت زۆر نه‌یه‌شێنم، لە وتن واز بێنم نه‌ک په‌شیمان بی له ناسین و ملاقاتی غه‌فوور ١. بۆ برادەرێکم بەناوی دوکتور ئەسعەدی وەرزێری کە بە ڕەحمەتی خوا چووە و نەماوە. لە زستانی ١٣٥١دا لە بانە لەگەڵ ئەو پیاوە باشە لە ماڵێک بانگێشتنیان کردبووین بووم بە ئاشنا. ++++++++++++++++++++++ سەرناو: سوپاس بۆ مەهاباد سەبارەت: نووسین و ئامادەکردن: کەماڵ ڕەحمانی - مەلا غەفووری دەباغی، ئاسۆی ڕوون، چاپی یەکەم ١٣٩٤ ک. هـ، لاپەڕە ١٩٣ـ١٩٦. - دیاری مەهاباد، چاپی سێهەم، لاپەڕە ١١٥ـ١١٧. کانگه‌ی شه‌ڕه‌ف و غیره‌‌ت و ویژدانه‌‌ مەهاباد چاوگه‌ی که‌ڕه‌م و هیممه‌تی مه‌‌ردانه‌ مه‌هاباد جێی حورمه‌ت و ڕێزگرتنی میوانه‌‌ مه‌‌هاباد بووژێنه‌ره‌وه‌ی ڕووت و هه‌‌ژارانه‌‌ مه‌هاباد ئاماده‌یی خزمه‌‌ت به‌ غه‌ریبانه‌‌ مه‌‌هاباد سابڵاغی لە ڕێی پیاوەتیا قەت نییە ترسی کامی لەچەرە، بێتوو لە ئاکاری بپرسی وەک حاتەمە، ئەو کاتە خەڵک کەوتە مەترسی بۆ یارمەتی داماو و تەسەل‌کردنی برسی ڕازێنەرەوەی خوانە، قەدرزانە مەهاباد کێ بەرهەم و ڕەنجی لەبەین بردووە لافاو کێ ماڵی هەموو ئاگری تێ‌بەربوو لە ناکاو هاواری بگاتە گەلی ئەم شارە بە پڕتاو بۆی دێ لە جل‌وبەرگەوە تا پارە بە لێشاو ڕزگاری دەکا فەوری لە تەنگانە، مەهاباد سابڵاغی سه‌‌تی ده‌‌ی له‌‌ خه‌‌می بوون و نه‌‌بوونه ‌باقی دی شه‌ریکی خەمی داماو و زه‌بوونه‌ خه‌ڵکێکی نیه‌ت پاکن و بیریان هه‌موو ڕوونه ‌ئه‌م شاره‌ له‌ بۆ کاری به‌جێ بۆته‌ نموونه‌ تاریفی له‌ ناو خه‌ڵکی وڵاتانه‌ مه‌هاباد لێ‌بووردن و ڕەحم و بەزەیی لێره‌ که‌ باوە میراته‌ له‌ پێشینه‌وه‌ بەم خەڵکه‌ بڕاوه‌ ئازایه‌تی و غیره‌ت و هیممەت له‌ خوداوه‌ هەستێکه‌ له‌ پاڵ میللـەتی ئەم شاره‌ نراوه ‌دڵپاکی و بێ‌باکی له‌ خۆی جوانه‌ مه‌هاباد دڵیان پڕە سابڵاغی لە ئیخلاس و ئیرادەت ڕووخۆش و گەشن، بێ غەرەزن، دوور لە حەسادەت لایەنگری مزگەوت و ئەوینداری عیبادەت دینداری و تاعەت چووەتە ئەوپەڕی عادەت سەرچاوەیی خواناسی و ئیمانە مەهاباد لەم شاره‌ بڕێ کاربه‌ده‌سن، خێوی مه‌عاشن بیستی له‌ سەدا خاوه‌نی سامان و قوماشن داخم که‌ به‌شی زۆرتری ده‌س‌کورت و له‌پاشن بۆ دەست‌ودڵ و خزمەتی خه‌ڵکی هه‌موو باشن ئه‌رکێکی گەلێ قورسی له ‌سه‌ر شانه‌ مه‌هاباد دڵسۆزی به‌رەی لاره‌مل و بێده‌سەڵاتن یاریدەدەری خه‌ڵکی ڕەش‌وڕووتی وڵاتن ئه‌هلێکی به‌شه‌ردۆست و به‌ بەخشین و خه‌ڵاتن لای گشتی له‌ مەیدانی کەڕەم، شه‌رمه‌ هه‌ڵاتن چون مەرکه‌زی دەس‌گرتن و ئیحسانه‌ مه‌هاباد که‌میان له ‌خەمی سه‌روه‌ت و زۆرکردنی ماڵن زۆربەی تەشەنی مه‌عریفه‌ت و کەسبی که‌ماڵن لاگیری هەقن، دژ به‌ خەڕافات و بەتاڵن لێزان و به‌ بیرن، له‌ قه‌ڵەم‌دا هه‌موو قاڵن لانەی گه‌لی بیرڕوون و بزۆزانه‌ مه‌هاباد شارێکی چ خۆش‌دیمه‌ن و جوان و به ‌حه‌شیمەت لاوانی چ خوێن‌شیرین و پیتۆڵ و بلیمه‌ت گه‌نجی هه‌موو گه‌نجینەیی هێژا وو به‌قیمەت پیرانی پته‌وبیرن و بۆ ئێمه‌ غەنیمەت زانستگه‌یی پسپۆر و ئەدیبانه‌ مەهاباد من لێرە کەسێکم کە دەزانن هەموو ناوم سی ساڵە لەناو میللـەتی ئەم شارە ژیاوم پیرم بە ڕواڵەت؛ چل‌ونۆ ساڵی تەواوم پێم وایە لە سایەی سەری دۆستانەوە لاوم خۆشی بە گەلی هاوەڵ و دۆستانە مەهاباد ++++++++++++++++++++++ سەرناو: پەری گیان سەبارەت: نووسین و ئامادەکردن: کەماڵ ڕەحمانی - دیاری مەهاباد، چاپی سێهەم ١٣٨٦ هەتاوی، لاپەڕە ١١٨. - ئاسۆی ڕوون، چاپی یەکەم ١٣٩٤ هەتاوی، لاپەڕە ٥٩. ئەی تەختی هەنێت، تەختی سزا دانە پەری گیان وەی چاڵی چەنەت قوژبنی زیندانە پەری گیان شمشێری برۆت پارە دەکا جەرگی ئەویندار خنجێری موژەت قاتڵی لاوانە پەری گیان بسکت شەوەیە، ئاڵی دڵە ڕوومەتی ئاڵت ئەم خاڵ و خەتەت قابزی سەد گیانە پەری گیان چاوت چەتەیە، پیاوکوژە، سێدارەیە بەژنت رووت ڕێگرە، کەزیەت پەتی خنکانە پەری گیان بەرگێکە بڕاوە بە قەد و قامەتی شۆخت ئەم جەور و جەفا و خەڵکی بە کوشت‌دانە پەری گیان لێوت وەکوو یاقووتە، بزەت قووتە، ددانت مروارییە، یا خۆ دوڕە مەرجانە پەری گیان چاومەستی و تەڕدەستی و ئاشق‌کوژی و ناز تەننازی و عەییاری لە تۆ جوانە پەری گیان چاوم نییە، زۆر موستەحەقی خێر و زەکاتم ماچێ بدە بەم کوێرە بەسەزمانە پەری گیان ++++++++++++++++++++++ سەرناو: دەستەنگی سەبارەت: نووسین و ئامادەکردن: کەماڵ ڕەحمانی - مەلا غەفووری دەباغی، ئاسۆی ڕوون، چاپی یەکەم ١٣٩٤ ک. هـ، لاپەڕە ١٠٧و١٠٨. - دیاری مەهاباد، چاپی سێهەم، لاپەڕە ١١٩ـ١٢٠. لالووتە لە ئێمە چەرخی گەردوون پێی حەیفە بژین بە بەختیاری دەستم بە دوعایە خەڵکی بمرێ تا نانی بخۆین لە تازیەداری بەرگێکە بە بەژنی من بڕاوە قەرزاری و سەرکزی و هەژاری پێم ناکڕێ ڕۆژێ دوو کیلۆ نان بەو نرخی مەباحی شارەداری تف لەم بەشە، لەم ژیانە حافز ئەو نانە بکەی بە ژەهری ماری بێ‌چاوییە هۆی کزی و کەساسیت سەرباری خەڵک بی نالەباری هەروا بووە ژینی ئێمەمانان تایبەت لە وڵاتی کوردەواری شاعیر کە ژیانی پڕ لە ژانە فەرقی چییە پاییز و بەهاری زۆر شێتییە خۆزی گەر بخوازی ئەم ساڵەکە بۆ پێرار و پاری کێ ژیر و بەبیر و هەستیارە بەختی ڕەشە، تاڵە ڕۆژگاری کێ خەڵکی مەبەستە، گەل‌پەرستە زیندان و تەلانە جێی قەراری کێ زیددی هەژارە، پارەدارە جێی کۆشک و تەلارە، بارە باری ئەم خەڵکە تکایە لێم ببورن حەق نابێ لە هیچ کەسێ وەشاری بۆ من نییە هەر بە تاقی تەنیا ڕابوردوویی تاڵ و کۆڵەواری بێ‌چاوی هەموو وڵاتی دیش وان چاو بوایە دەچوونە کەسپ و کاری ئەم پارچە شیعرەی لە زەمانێک‌دا هۆندۆتەوە کە بۆ بژێوی ڕۆژانە مەحتەل بووە و نانی ویشکی ئەو ڕۆژەی بۆ نەکڕدراوە. ++++++++++++++++++++++ سەرناو: کچی بۆکان سەبارەت: نووسین و ئامادەکردن: کەماڵ ڕەحمانی - مەلا غەفووری دەباغی، ئاسۆی ڕوون، چاپی یەکەم ١٣٩٤ ک. هـ، لاپەڕە ١٢٠ـ١٢٢. - دیاری مەهاباد، چاپی سێهەم، لاپەڕە ١٢٦ـ١٢٨. شەهێنی، دڵڕفێنی، خەم‌ڕەوێنی، ڕووگەشی، جوانی حەسوود کوێر بێ لە حاندت ئەی کچی نازداری بۆکانی لەبەر بەژنی بڵیند و ناسکت هەقیانە سەرداخەن چنار و عەڕعەڕ و شمشاد و کاج و سەروی بوستانی لە شۆخ‌وشەنگییا وێنەم نەدیوی، شەرتە نازانم لە حۆری هەڵبڕاوی، یا لە تیرە و هۆزی پەریانی لە وردیی خاڵی سەرکوڵمت ئەرەستوو واقی وڕ ماوە لە تەسویری برۆی تۆ عاجز و بێ‌چارەیە مانی دەمت عیسا سفەت مایەی ژیانە، لەمپەری گیانە لەشی مردوو، هەناسەی تۆ وەبەر دێنێتەوە گیانی خدر بۆ هێندە عەبداڵ بوو لە دووی سەرچاوەکەی ژینا؟ تنۆکێکە لە نێو شیوی مەمانت، ئاوی حەیوانی لە چاخی پیرییا دیارە وەها بۆت بوومە پەتیارە لەوانەم مل بدەم بەو کارە کردی شێخی سەنعانی ئەگەرچی پیر و زورهانم، لەگەڵ تۆ ئافەتی گیانم دەبەستم عەهد و پەیمانم، هەتا هەم بۆت دەکەم شوانی لە سەیری باغی میراوا و تەماشای حەوزەگەورەم چی؟ زنەی بەرگەردن و نێو باخی سینەت خۆشە سەیرانی لە بیرتە زۆر نەخۆش بووم هاتی بۆ پرسینی ئەحواڵم کوتم پێت خۆشە نەمرم، با سەرت باوێمە سەر ڕانی بزووت هێزی هیوا و هەستم کە دەستت نایە نێو دەستم کوتم هەر تۆ لە جێت خستم، کەچی وا ئێستە لوقمانی گەشم یا وەک بەهێی زەردم، لە کۆشکم یا لە بن بەردم بە دەس تۆیە شفا و دەردم، کە بۆ من ژینی، هەم ژانی بە ڕووخۆشیم کە بدوێنی، حەیاتی نوێم لەبۆ دێنی بەڵام خۆت تووڕە بنوێنی مەرگ دێنی بە هاسانی مەڕێژە پێم ڕق و کینت، بە دڵ هاتوومە سەر دینت قەبووڵمە کیش و ئایینت، مەسیحی یا موسڵمانی؟ وەئەستۆ مەگرە ئۆباڵم، بە دووتا وێڵ و عەوداڵم لە بۆتەی عیشق‌دا قاڵم، دڵم بۆت بۆتە بریانی دڵی پێکام یەکەم تیرت، دەس و پێم کەوتە زنجیرت لە حاڵ‌وباڵی یەخسیرت، بپرسە، سەختە زیندانی ئەوینت بوو بە ناپاڵم، بڵێسە و تینی نا پاڵم بە تیری تۆ شکا باڵم، پەڕوپۆم چی بوو پروانی لە وەسفی ئەو خەت‌وخاڵە، قەڵەم کۆڵە، زمان لاڵە دەسم بەو دوو لیمۆ کاڵە نەگا، دەمرم لە سوێیانی بە دیمەن گەرچی منداڵی، لە ئاشق کوشتنا زاڵی نەوەی کاوەی دلێری یا بەرەی سامی نەریمانی؟ سەرم گۆیە لە مەیدانت، دڵم دیلە لە زیندانت لەش و گیانم بە قوربانت، فریشتەخوو! خوای جوانی! دەکێشم نازی پێڵاوت، هەموو ژینم لە پێناوت دەنێم، دینم فیدای چاوت دەکەم، تۆ مانگی ئاسمانی ئەگەرچی خاوەنی ناوم، لە نێو ئەم خەڵکە ناسراوم بەڵام من قەترەیەک ئاوم لە بەرپێی یاری بۆکانی ئەویندارێکی دڵ‌پاکم، لە سوێی ئەو یارە خەمناکم لە گەردوونیش نییە باکم بگا دەستم بە دامانی ++++++++++++++++++++++ سەرناو: سڵاوێکی پڕ مانا سەبارەت: نووسین و ئامادەکردن: کەماڵ ڕەحمانی - مەلا غەفووری دەباغی، ئاسۆی ڕوون، چاپی یەکەم ١٣٩٤ ک. هـ، لاپەڕە ١٠٩ـ١١٣. - دیاری مەهاباد، چاپی سێهەم، لاپەڕە ١٣٥ـ١٣٨. سڵاو بۆ خاکی کوردستان و خەڵکی زیت و وشیاری سڵاو بۆ کوردەواری، بۆ تەواوی ئەهلی دێ و شاری سڵاو بۆ نیشتمانی جوان و شاخی بەرز و بەفرینی سڵاو بۆ بەندەنی بژوێن و کانی ساف و سازگاری سڵاو بۆ قەڵبەزەی ئاوی تەلان و ڕژد و هەڵدێری لە بنیا زیخ و چەو، دەنوێنێ وەک یاقووت و مرواری سڵاو بۆ دیمەنی تەرزی چیای زەنوێر و سەرسەوزی سڵاو بۆ شیو و دۆڵ و ڕستەتاوڵ و چیغی مەڕداری سڵاو بۆ گشت دەرودەشتی، بەهەشتی گەشت و سەیرانە سڵاو بۆ خوڕخوڕی ڕووبار و مێرگ و چیمەن و داری سڵاو بۆ کۆمەڵانی خەڵکی زەحمەتکێش و ئارەق‌ڕێژ سڵاوی تایبەتی بۆ چینی جوتیار و کرێکاری سڵاو بۆ ئەو برا وەرزێڕە وا جەرگی زەوی دەدڕێ هەتا ژینی مە دابین کا لە داهاتی زەوی‌وزاری سڵاو بۆ ئەو برا دروێنەوانەی تاکوو شەو دادێ لەگەڵ کەرخ و مەڵۆ و داس و مەڵەغانە سەروکاری سڵاو بۆ ئەو کەسەی شەتڵانی ئارەق بوو لە مەزرایە دەم و لێو ویشک و تاوبردوو، پەڕیوە ڕەنگی ڕوخساری سڵاو بۆ ئەو کەسەی هێند ماندووە و کوێرەوەری زۆرە شەوێ نانوێ لەتاوی شان و پیل و ئێش و ئازاری سڵاو بۆ ئەو کەسەی کاری بژارە و دەسکەنە و بنکۆڵ گەلێ ماقووڵ‌ترە دەست‌وپلی قەڵشیو و زاماری، لە دەستی ناسک و نەرم و سپی و بێ‌کارە وو تەنبەڵ لەسەر خەڵکی بەڕێدەچن و دەخون نانی منەتباری سڵاو بۆ ئەو کەسەی دەژێیێنێ منداڵی بە فەعلایی بە هێزی لەش بژیو پەیدا دەکا، پێی شەرمە بێکاری سڵاو بۆ ئەو کەسانەش بێ دەبرژێن تا دەبرژێنن هەموو دەم نانی گۆڵ‌پەڕشه و بەهاروو و گەنمەسەرداری سڵاو بۆ ئەو کەسەی ئیدە و مەڕامی خزمەتی خەڵکه هەمیشە یارمەتی داماو و لێقەوماوە ئاکاری سڵاو بۆ ئەو کەسەی ژینی بەخت کا بۆ گەل و هۆزی هەتاکوو دوا هەناسەی بەر نەدا ڕێبازی ڕزگاری سڵاو بۆ لاوی ڕۆشنبیر و گەنجانی بەبیر و ژیر سڵاو بۆ میللەت و ڕۆڵەی ئەمەگناس و وەفاداری سڵاو بۆ ڕاپەڕین و شۆڕشی ئازادیخوازانە سڵاو بۆ قودڕەت و هێزێک نخوون کا کۆشکی زۆرداری سڵاو بۆ ئەو شەهیدانەی کە خۆیان کردە قوربانی لە ڕێی ئامانجی بەرزا بوونە سەرمەشقی فیداکاری سڵاو بۆ نووسەران و هۆنەری دڵسۆز و تێکۆشەر سڵاو بۆ ڕێبەرانی ڕاستەقینە و تیپی خوێندکاری سڵاو بۆ تاقمی پێشڕەو، بەرەی ڕزگاری خوازی کورد کەوا هێرش دەبەن بۆ سەر نیزامی زوڵم و ژێرباری سڵاو بۆ کۆشش و هەوڵ و خەباتی خەڵکی چەوساوە لە دژ یاساو ڕژیمی ناهەق و جەور و ستەمکاری سڵاو بۆ ئیتیحاد و یەکیەتی گشت کۆمەڵانی خەڵک لە مامۆستا و قوتابی تاکوو کاسبکار و بازاڕی سڵاو بۆ پێشەوای دینی کە ڕێ نیشاندەری خەڵکە بە مەرجێ کردەوەی یەک بێ لە گەڵ شیرینی گوفتاری سڵاو بۆ ئەو کەسەی جێی باوەڕ و متمانەیە بۆ گەل بە موو تێیدا نییە پێچ و پەنا، لێی ناوەشێ خواری سڵاو بۆ ئەو کەسەی ڕاست و نیەت‌پاکە لەگەڵ خەڵکی بە سوودی میللـەتی کورد و گەلانە تەرزی ئەفکاری سڵاوم هەرچی بوو پێشکەش بە ئێوەی خۆشەویستم کرد لەمەڕ خۆمانەوە چەن مەتڵەبێکم دێتە سەر زاری تکاکارم لە خەڵکی شار و لادێکانی کوردستان لە گوێ مەگرن قسەی کەس تا نەزانن چۆنە ئەتواری کەسێ ئیمڕۆ قسەی خۆشە، ئەگەر عەیبی بوو مەیپۆشە دەبێ ڕوون بێتەوە دوێنێ چلۆن بوو ژین و ڕەفتاری گەلێ هەن وەک برایەک دێن و دەتدوێنن بە دڵسۆزی بەڵام مەعلووم دەبێ سۆزی کە پێوەی داوی وەک ماری گەلێ هەن ئێمە دەدوێنن لە ئەسڵا گێرەشێوێنن جودایی و دوودڵی و ناکۆکیان هێناوە بە دیاری گەلێکیش هەن کوڕی ڕۆژن، زەمانە ملکەچی کردوون دەگۆڕن ڕەنگ و ڕوویان، دێنە ناو کۆمەڵ بە ناچاری لەگوێ مەگرن قسەی هەر کەس کە بۆنی تەفرەقەی لێدێ قسەی باب و براشت ناڕەوا بوو نابێ وەیشاری بەڵێ ڕێوی دەغەڵ شێر و پڵنگیشی فریوداوە بە گفت‌ولفتی شیرین و بە ڕاوێژی دەم و زاری لە سەرمان یەکیەتی فەڕزە، دەبێ تێکڕا بەجێی بێنین دەبێ پشت و پەنای یەک بین و بگرین دەستی هاوکاری برای هاوپشتی یەکتر بین هەتا بێگانە نەتوانێ بخاتە نێو سەفی ئێمە کەلێنی قین و لاساری برایەک تازەمان دیبێ، گەلێک پێویستە بیناسین لەخۆرا با نەبین تووشی قڕە و جەنجاڵ و ناباری ئەگەر سەرتان لە هۆنراوەی غەفوور هێشاوە بمبوورن بە قوربانی تەواوی خەڵکە خۆی و بەیت و ئەشعاری قسەم هێشتا گەلێ مابوو، مەبەستم زۆر لە دڵدا بوو بەڵام چ بکەم قەڵەم چیدی نەکردم کۆمەک و یاری ++++++++++++++++++++++ سەرناو: ناحەز و جوان سەبارەت: نووسین و ئامادەکردن: کەماڵ ڕەحمانی - مه‌لا غه‌فوری حافزی مه‌هابادی، دیاری مەهاباد، چاپی سێوەم، لاپەڕە ١٤٨ ـ ١٥٠. - مەلا غەفووری دەباغی، ئاسۆی ڕوون، چاپی یەکەم ١٣٩٤ ک. هـ، لاپەڕە ٢٢ـ٢٤. تا بژیم تێت ده‌بڕم، خاوه‌نی جوانی و ده‌سه‌ڵات چاوی ئاوات و هیوام، ئه‌ی گوڵی سه‌رتۆپی و‌ڵات داده‌مرکێ کوڵی دڵ تاوێکی ڕێت‌خه‌م چ ده‌بێ به‌ سه‌ری نوکی زمانم له‌ بنی په‌نجه‌یی پات ڕۆژی هه‌ڵکه‌وته‌ ده‌سا با گوڵه‌که‌م تێت ڕاکه‌م له‌ ترۆمبیلی فیداکاری به‌ره‌و کۆڕی خه‌بات لێت ده‌به‌م جارێ به‌ بێده‌نگی نه‌چی بیکه‌یه‌ قاو نێوی هاوکاری له‌گه‌ڵ شۆڕشه‌که‌ی دێموکڕات یاری شیرین ده ‌وه‌ره‌ تا زووه‌ تا لێت نه‌چووه‌ ته‌مه‌نی جوانی بژین پێکه‌وه‌ تاکه‌ی به‌ ته‌مات گیانه‌که‌م خۆ تۆ هه‌زار جار پترت داوە به‌ من قه‌ولی بێ کرده‌وه‌ هه‌ر وشکه‌ تریتم به‌ هیوات که‌نگێ بۆم داده‌که‌نی، خۆمی به ‌سه‌ر داکێشم که‌وشه‌که‌ت ماچ که‌م و سه‌ر دانێمه‌ به‌ر پێت کز و مات لیت نه‌چێ ڕه‌نگه‌ له‌ به‌ر ته‌نگی ئەشێ بۆت ته‌ڕ که‌م ده‌سته‌ نه‌رم و شله‌که‌ت بازنه‌ ئازاری نه‌دات توند و تیژی به‌سه‌ بۆم تیل که‌ ده‌با لێی ڕاده‌م به‌ سمێڵ گسکی ده‌م ئه‌و تۆزه‌ له‌ سه‌ر شانی که‌وات تۆ له‌ سه‌ر ئه‌و ڕقه‌ بی تێک ده‌چه‌قێنین له‌ پڕا من له‌ پێت دڕکی مژۆڵ تۆ له‌ دڵم تیری نیگات هه‌ر نه‌بێ تاقه‌ یه‌کێکم ده‌یه‌ با خۆم نه‌کوژم له‌م هه‌موو ده‌سره ‌که‌ پێی ده‌سڕی دەم و لێوی نه‌بات بێڵه‌ خاوی که‌مه‌وه‌ ڕه‌ق بووه‌ سندوقی سه‌رت باری لێوم به‌ تکەی‌ ئاره‌قه‌که‌ی سه‌ر گۆنات پاش و پیش هه‌ر یه‌که‌ بۆ من کە مه‌به‌ستم چوونه‌ زه‌رده‌لیمۆ چووە‌ ناو ده‌ستمه‌وه‌ یا پرچی سیات هه‌ر له‌ لای تۆیه‌ ئه‌وه‌ی من ده‌مه‌وێ تێی کێشم خۆڵی به‌ر پێته‌ له‌ چاوم کرێ ڕووناکی ده‌کات حه‌ز ده‌که‌ی جارێ بژیم بۆم وه‌ره‌ پێش با تێی نێم ده‌م له‌ نێوانی مه‌م و سینه، وه‌خۆم ئاوی حه‌یات نایه‌ڵم بێشێ، وه‌ره‌ پێشێ، ده‌با بۆت تێخه‌م ئه‌م دوو ئەنگوستیله‌ ئاڵتونه‌ له‌ قامکت به‌ خه‌ڵات ده‌وه‌ره‌ گیان و قه‌وه‌ت، تاوێ ئه‌وه‌م بگره‌ به‌ وه‌ت نه‌بزی ده‌ستم به‌ سه‌ری په‌نجه، ‌ نه‌خۆشم که ‌له ‌لات من که‌ خۆم ناوه‌ته‌ پێناوت ئه‌تۆش بۆم فش که‌ قۆڵی ڕاستت بخه‌مه‌ باسکم و ده‌رچین له‌ و‌ڵات با بکه‌م تۆبه‌ له‌ سه‌ر ده‌ست و ئیتر دایهێڵم ڕیشی بۆزم ببمه‌ سالکی سه‌ر کۆشک و سه‌رات تا کوتم کوانێ؟ بڵێ هانێ، دڵم مه‌شکێنه‌ حافزم موسته‌حه‌قم، چاو له‌ ده‌سی تۆم هه‌موو کات جوانی تۆی دا لە محەک ناحەزی من بۆم دەرکەوت ئەوی جوانان هەیانە، بە تەنیا هەیە لات گوڵەکەم بۆیە نەشەت سازە دەڵێن چاکت دا ئیمتحانی شەشی ناوەندی، بژی مامۆستات خۆت کەمێ شل کە سەرت داخە دەبا پێتەوە نێم دوو زەروو، کوڵمی گەش و چاڵی چەنەت زیبکە نەکات ++++++++++++++++++++++ سەرناو: گوڵەکەم سەبارەت: زستانی ١٣٥٨ - نووسین و ئامادەکردن: کەماڵ ڕەحمانی - مه‌لا غه‌فوری حافزی مه‌هابادی، دیاری مەهاباد، چاپی سێوەم، لاپەڕە ١٤٣ ـ ١٤٥. - مەلا غەفووری دەباغی، ئاسۆی ڕوون، چاپی یەکەم ١٣٩٤ ک. هـ، لاپەڕە ٤٤ـ٤٦. گوڵەکەم بۆ گوڵی ڕووت عاجز و ماتم بە غەوس تاکوو ژێر گڵ دەخرێم هەر بە تەماتم بە غەوس وەرە ئاواتی دڵم، شەوق و ڕووناکی مزڵم من کە تۆم لا نەبی، بێ‌سەبر و سەباتم بە غەوس تەڕ ببێ لێوی بەبارم لە زنەی شیوی مەمان وا دەزانم کە لە سەر ئاوی حەیاتم بە غەوس رووم بدەیتێ لە جیهان بەختەوەرەم، تاجی سەرم دەست‌درێژ و مەزن و میری وڵاتم بە غەوس بێتوو لێم تووڕە بی، گریانە بەشم، چارەڕەشم هەر هەمان چاولەدەس و بێ‌دەسەڵاتم بە غەوس زۆر نەخۆش و کەلەلام ئەو دەمە نادیاری لە لام باوی شادی و نەشەمە، کاتێ لە لاتم بە غەوس ڕەش‌ترین ڕۆژی ژیانی منە دوور کەوتنی تۆ خۆشبەخت‌تر بەشەرم تا لە پەناتم بە غەوس پێ لە ماڵم مەبڕە، شەرتە بە شانازییەوە حازری خزمەتی ئەو کەوشە لە پاتم بە غەوس گوڵەکەم، حۆری‌لەقا، خونچەگوڵی باغی سەفا! بولبولی شێت و ئەوینداری وەفاتم بە غەوس بەسە زیندانی جەفا، بمگرە ئامێزی وەفا بە سەر و ماڵەوە قوربانی وەفاتم بە غەوس رۆژی من ڕەش مەکە چەشنی وەلی‌دێوانە، دەخیل پڕ لە ناکامی دەبێ گشت دەم و کاتم بە غەوس بێ‌مرادانە مەگەر دەست دەمە کەشکۆڵ و عەسا وێڵ و شەیدا بم هەتا ماوە حەیاتم بە غەوس ئەمە ئاواتمە: هەرگیز لە پەنای تۆ نەبزووم تاکوو دوایی تەمەن و وەخت و سەعاتم بە غەوس ئاشەکۆنێک و حەسیر و خەوی سەر باوەشی یار وا دەزانم کە لە ناو کۆشک و قەڵاتم بە غەوس كەیلی بێ مەیلی و بیمار و خەفەتبار و كزی سڕی و ساردیت و كەمی شەرت و بەقاتم بە غەوس شۆخی شیرین، وەرە لام تاوێ، نەخۆشی دەسی تۆم دەست لە دەستم دە، بڵێ هەستە شیفاتم بە غەوس ئاه و ناڵین بەسە، لوقمانی ویسالت لە کنە دەردی دڵدارییە خستووتی، دەواتم بە غەوس ئێش و ئازاری لەشم دەرکە بە ماچێکی دەمت شەکەتی کوڵمی گەش و لێوی نەباتم بە غەوس بەزەییت بێ بە منی چارەڕەش و پیر و کەساس حافزم، موستەحەقی خێر و زەکاتم بە غەوس ++++++++++++++++++++++ سەرناو: مهین جون سەبارەت: نووسین و ئامادەکردن: کەماڵ ڕەحمانی - مەلا غەفوور دەباغی، ئاسۆی ڕوون، چاپی یەکەم ١٣٩٤ هەتاوی، لاپەڕە ٦١٧و ٦١٨. ای سرو قدت چوبەی اعدام مهین جون خال سیهت دانە و هم دام، مهین جون ماتیک لبت زانکە به خون سخت شبیە است می‌مانی بە جلاد خون آشام، مهین جون در محبس چاە زنخت هر کە در افتاد از وی اثری نیست بەجز نام، مهین جون مردانِ دلیرند اسیران ِکمندت شیران مهیبند تو را رام، مهین جون با آتش رگبار نگاهت چە توان کرد جز کشتە شدن، عاشق ناکام، مهین جون آن دسته ز عشاق کە در بند کشیدی محکوم بە مرگند سرانجام، مهین جون جایی کە در احکام تو تجدید نظر نیست ما را چە امید است بە فرجام؟ مهین جون با این همە تشدید ستم، باز نگیریم ما دلشدگان بی‌رخت آرام، مهین جون قهر تو صفا، خشم، وفا، نیش تو نوش است شهد است مرا زهر تو در کام، مهین جون چشمان می‌آلود تو را شیخ ببیند سجادە نهد در گرو جام، مهین جون ++++++++++++++++++++++ سەرناو: سپاس بۆ بۆکان سەبارەت: مه‌لا غه‌فوری حافزی مه‌هابادی، دیاری مەهاباد، چاپی سێوەم، لاپەڕە ١٢١و١٢٢. - مەلا غەفووری دەباغی، ئاسۆی ڕوون، چاپی یەکەم ١٣٩٤ ک. هـ، لاپەڕە ٥٧و٥٨. - نووسین: دیاکۆ ڕەحمانی زەنگیاوەیی تێپەڕ بوو لە میرریخ و زوحەل هیممەتی بۆکان هەوری لە سەما خستە سەما غیرەتی بۆکان ئەو هێرشە لافاوە کە هۆی چارەڕەشی بوو سەلماندی بە دنیا شەڕەف و عیززەتی بۆکان چی بوو دژی ئەو ئاوە بێ ئامانە وەخۆ کەوت؟ هێزی بەزەیی و ڕەحم و دڵ و یارمەتی بۆکان کێ باوەشی گەرم و گوڕی گرتبۆوە بۆ خەڵک؟ تەنیا گەلی خاوەن کەڕەم و نیعمەتی بۆکان پیاو چاکیی و دڵ پاکیی و خزمەت بە هەژاران بەرگێکە بڕاوە بە قەد و قامەتی بۆکان پێویستی بە تاریفی ئەم و ئەو نییە، وەک خۆر تیشکی لە هەموو جێیە ئەدا شۆرەتی بۆکان شانازییە بۆ کوردی هەموو شوێن و وڵاتێک چاوتێریی و جوامێریی و ئازایەتی بۆکان نێوبانگی لە گشت ناوچەیەکا ویردی زمانە دەنگی لە جیهان داوەتەوە پیاوەتی بۆکان وا تێمەگە بۆکانی لەچاو خەڵکی دی لۆردن پێت وا نەبێ، ئەندازی نییە سەروەتی بۆکان مەردایەتی چی داوە بە سەر زۆر و کەمیی ماڵ؟ هەر چاکە لەگەڵ خەڵکی بووە عادەتی بۆکان ١ ١. لە سەرەتای بەهاری ١٣٥٣ دا سێڵاوێک دەوروبەری بۆکانی گرت، بڕێ خەڵکی ماڵ‌وێران کرد. خەڵکی بۆکان پیاوتی و یارمەتییەکی زۆریان لە گەڵ ئەو لێقەوماوانە کرد ئەم پارچەم بەو بۆنەوە هۆنیوەتەوە. ++++++++++++++++++++++ سەرناو: بەهاری کوردستان سەبارەت: مه‌لا غه‌فوری حافزی مه‌هابادی، دیاری مەهاباد، چاپی سێوەم، لاپەڕە ١٢٣ـ١٢٥. - مەلا غەفووری دەباغی، ئاسۆی ڕوون، چاپی یەکەم ١٣٩٤ ک. هـ، لاپەڕە ١٢٤ـ١٢٦. - نووسین: دیاکۆ ڕەحمانی زەنگیاوەیی بەهەشتە خاکی کوردستان و سەیرانی بەهارانی نموونەی کەوسەر و ئاوی حەیاتە چەشمەسارانی چیا وو دەشتی ڕەنگینە، گوڵ و سوێسنە و ڕیاحینە سەراپا سەوزەڵان شینە شێوەرد و شیارانی حەیاتی جسمی بێ جانە، هەوایی باخ و باخاتی نیشاتی ڕوحی ئینسانە فەزایی مێرغوزارانی شەفایی خاتری بیمارە قووتی عاشقی زارە چریکەی بولبول و ئاوازی قومری سەر چنارانی لە سەر دڵ ژەنگی ماتەم لادەبا ڕوخساری گوڵزاری بەچاوپێکەوتنی، سەد دڵ دەبێتە مات و حەیرانی شەفابەخشی دڵی عوششاقە بایی سوبحدەم وەختێ عەبیری بۆی گوڵان دێنێ لە سەر لووتکەی نزارانی بەیانی دێ جریوەی مەل، خوڕەی بەفراوەکەی سەرکەل لەگەڵ قاسپەی کەو تێکەڵ، لە دەم ڕژد و پەسارانی کە تەشریفی شەریفی هات نەسیمی بایی نەورۆزی گوڵاڵان سەر وەدەر دێنن لە لێوی جۆیبارانی دەپۆشێ سەروی بوستانی کەوای ئەتڵەس لەبۆ جوانی شکۆفەی دەردەکا لەنۆی چڵووک و شاخسارانی تەواوی دەشت و دەر یەکسەر دەبێتە ئەتڵەسی ئەخزەر بە گرمەی هەور و سۆزەی بای شەماڵ و ڕێژنەبارانی غەزەل خوێنن هەموو، دەس پێدەکەن باڵداری سەر داری زەوی پاکی دەخەمڵێ دێتەوە سەر دۆخی جارانی کە مانگی بانەمەڕ داهات چ خۆشە دیمەنی کوێستان سەراسەر خێوەت و ڕەشماڵ و خێڵە جێ‌هەوارانی وەکوو سەروی خەرامانن کە پۆڵ پۆڵ دێنە مەڕدۆشین بە لەنجە و ناز و عیشوە شەنگەبێری چاوخومارانی نەشئەبزوێنە قاو و قیژی کەسک و سووری خێڵاتی قریوەی زاووماک و کاڕ و کووڕی بەرخ و کارانی لە لایەک داوەتی کیژانە بەزم و ڕەزمی لاوانە لەلایەک ئەسپ و ڕمبازی جلیتی شۆڕە سوارانی لەلایەک تیپی زەحمەت‌کێشی خاکی نیشتمانی جوان بە هێزی شان و هۆی بازوو دەکێڵن دێمەکارانی لەگەڵ جووتی کەڵ و گا دێنە مەزرایە بە دڵ‌خۆشی لەبۆ کێڵان و دەرهێنانی مووچە و جێ‌بەیارانی خەریکی کەسپ و کارن لاوەکانی نیشتمان‌پەروەر بە ڕۆژ و شەو سرەوتیان بۆ نییە تیپی هەژارانی بەکورتی هەوڵی پێشکەوتن دەدەن کۆمەڵ بە خاس و عام خەمم بۆ 'حافز'ی مسکین، بەجێ‌ماوە لە یارانی ++++++++++++++++++++++ سەرناو: دەرمانی برین سەبارەت: بەهاری ١٣٥٩ - مه‌لا غه‌فوری حافزی مه‌هابادی، دیاری مەهاباد، چاپی سێوەم، لاپەڕە ١٢٣ـ١٢٥. - مەلا غەفووری دەباغی، ئاسۆی ڕوون، چاپی یەکەم ١٣٩٤ ک. هـ، لاپەڕە ٧٦ـ٧٨. - نووسین: دیاکۆ ڕەحمانی زەنگیاوەیی بۆ دەوای کۆنە برینم، مەیی کۆنم گەرەکە کاسەیەک پڕ لە مەیی میسیۆ لیئۆنم گەرەکە گوڵی بێ بۆن و بەرام دیمەنی بێ نرخە لە لام من گوڵی ئاڵی عەتردار و بە بۆنم گەرەکە من بزەی لێو و قسەی خۆشە دەبزوێنی نەشەم کەی مڕومۆچ و خوڵق ناحەز و مۆنم گەرەکە نانی ویشکی قەوەتی مشکە، هەتا بۆم دەلوێ پشتەمەغزەی قەڵە وو چێشتی بە ڕۆنم گەرەکە قەت بە کیلۆ و سییە تێر نابێ زگی خۆم و مناڵ دەس بدا میوە بە خەروار و بە تۆنم گەرەکە یارەکەم زیز بووە، لێم دوورە، بڵێی ئاشتی وەبێ؟ گوێم لە دەنگی نییە، شێت بووم، تەلەفۆنم گەرەکە دڵ بە سەد هاوەڵی بێ مێشک و نەزان ناسرەوێ هاودەمێکی وەکوو تۆماس ئەدیسۆنم گەرەکە بۆ ئەوەی تێر و تەسەل کەم زگی [وەک تێڕم] برا١ سەروەتی ڕاکفیلێر و لۆرد کەریتۆنم گەرەکە دەمەوێ ڕازی دەروونم بە خەڵک ڕاگەیەنم دوو بڵیندگۆی مەزن و مایکڕۆفۆنم گەرەکە کۆت و شاڵواری ئوڕووپایی ئیتر ناکەمە بەر ڕانک و چۆغەی مەرەز و دەسکری خۆنم گەرەکە لە تەماشای شەق و تۆپ‌بازیی ئولەمپیک وڕەزم حۆقە حۆقی کەڵ و گامێش و شەقۆنم گەرەکە هەرکەسێ دۆستی گەلی کوردە، بە دڵ خۆشم ئەوێ ئەو کەسەی میللەتەکەم نایەوێ، چۆنم گەرەکە؟ ترس و باکم نییە، ویستی گەلەکەم دەردەبڕم خەڵکە لێم کۆوە بن، ئەمما تریبۆنم گەرەکە من لە ڕۆژنامەوە ئەخباری سەحیح نایەتە گوێم ڕادیۆش لوتفی نییە، تەلفیزیۆنم گەرەکە شارەکەم لایەکی ڕووخاوە بە چی چاکی وەکەم؟ ٢ ئەهەک و ئاسن و سیمان و بێتۆنم گەرەکە 'حافز'م، نیمە بە ماکینە وەشۆرم جل و بەڕگ ڕەقەسابوونی مەراغە و ئەسپۆنم گەرەکە خواردنم کەم بووە، چەن حەفتەیە گیراوە مەدەم پیپسی سارد و سوێن‌ئاپ و سیفۆنم گەرەکە ١. لە دیاری مەهاباددا ئاوا نووسراوە: (بۆ ئەوەی تێر و تەسەل کەم زگی داماو و هەژار) ٢. لە شوێنێکی دیکەدا ئاوا دەڵێ: (ماڵەکەم دووبەشی کاول بوو، بە چی چاکی وەکەم) ++++++++++++++++++++++ سەرناو: شۆخی ئاوایی سەبارەت: مه‌لا غه‌فوری حافزی مه‌هابادی، دیاری مەهاباد، چاپی سێوەم، لاپەڕە ١٢٩ـ١٣١. - مەلا غەفووری دەباغی، ئاسۆی ڕوون، چاپی یەکەم ١٣٩٤ ک. هـ، لاپەڕە ١٨٧ـ١٨٩. - نووسین: کەماڵ ڕەحمانی و دیاکۆ ڕەحمانی لە کوێی ئەی شۆخی ئاوایی؟ ! دڵم تۆقی بە تەنیایی ڕەوا تا کەی دەبینی پێم، مەراق و مەینەتی جیایی لەوانەم تەرکی دنیا کەم 'وەلی دێوانە' ئاسایی (بە کوە و دشت رو آرم، بە جای عقل، شیدایی گزینم؛ چون زند این عشق پیری سر بە رسوایی) لە کوێی ئەی یاری شیرینم! دەوای دەردی دڵی زامار! منیش وەک قەیسی پەتیارە خەریکە شێت بم و فێدار لە دووری لەیلی بێ مەیلم پەنا بەرمه کەژ و کۆسار (بیا ای شوخ شیرین کار! مرا دریاب مجنون وار غبار آلودە و ژولیدە مو، چون غول صحرایی) دە توخوا پرچی پڕچینم لە مل ئاڵێنە چەشنی مار لە داری بەژنی بەرزم دە، هەتا زووتر ببم ڕزگار لە ژینی پڕ لە ژان و عیشقی بێ ئاکام و جەوری یار (ترحم کن بە اشک جان گذار و آه آتشبار ز آهم بی گمان سوزد رواق چرخ مینایی) له دەست چوو عیززەتی نەفسم لە ڕێگەی وەسڵی دڵدارا بە بەدناوی ئەبەن ناوم لە کۆڕی یار و ئەغیارا لەسەر تۆ بوومە گەپجاڕی کەس و ناکەس لە دێ و شارا (زمان آخر نخواهد شد که یک شب کلبه‌ی ما را به یمن مقدم و مهتاب رخسارت بیارایی) لە پێناوی ئەوینم ناوە ژین و دین و دنیاکەم لەبەر لۆمە و توانجی دۆست و دوژمن خۆ لە کوێ ڕاکەم؟ دەراوم لات ئەگەر ڕوون‌ بێ لە هیچ کەس شوورەیی ناکەم (چنان مست می عشقم ز طعن دهر بی‌باکم شوم خاک رهت گر قلب ناشادم بیاسایی) بە دووتا وێڵ و عەبداڵم منی داماو و بێچارە لە تاوت وەک برامردوو شەپۆڕ و شیوەنم کارە بە جوانیت سوێند دەدەم ڕوحمێ بکە بەم پیری پەتیارە (مگیر از من کناره، سعی کن جانا که یکباره تشخص را کنار اندازی و با من کنار آیی) بە پێنووسی قەزا دەستی قەدەر بۆ ئێمە وای نووسی بەشی تۆ تووڕەیی و عاشق کوژی بێ، من زمان‌لووسی کە وا بوو حازرم بۆ خزمەتی پێڵاو و پابووسی (قدم بر دیدگانم نه پس از نیم قرن مٲیوسی به چشمانم که شاید باز گردد نور بینایی) لە تۆ زیاتر پەنای دیکەم نییە بۆ کێ بەرم هانا لە سەر خاڵ و خەتی تۆ ئیعتیبار و ئابڕووم دانا دڵم مێشی گوڵی ڕووتە، سەرم گۆیە لە مەیدانا (سرت گردم سراغ عاشق زارت بیا جانا که جان بر لب شد از سودایت ای الگوی زیبایی) بنازم بەو قەد و باڵایە ئەی شۆخی لەخۆڕازی لە ناز و نیعمەتی جوانی بەشت زۆرە، گەلێ سازی هەڵۆ لە برەو دەخا چاوت، غەنیمی تاوس و بازی (هلال ابرو، تو شمع جمع مه‌رویان ممتازی جمالت آفتاب است ار نقاب از چهره بگشایی) لە جوانی و پاکییا زیاتر لە خاتووزینی بۆتانی خەزاڵی لاسەشۆڕ کەم‌تر لە تۆ بوو شۆرەتی جوانی کەنیشکی کافرۆش ناگاتە چاوت مەستی چاوانی (زلیخا طلعت و لیلی‌‌وش، شیرین زنخدانی سزذ جانا زنم گر لاف وامق، چون تو عذرایی) کراسێکە لەبەر تۆدایە شۆخ و شەنگی، جوان‌چاکی ئەوی جوانان لە لایانە بە بەژنی تۆ بڕا پاکی لە تیرە و هۆزەکانی کوردەواری‌دا ئەتۆ تاکی (فرشته خلقتی، حوری سرشتی، گرچه از خاکی صنوبر قامت و سنبل عذار و سرو بالایی) ++++++++++++++++++++++