شاعیر: حافز
کتێب: دیاری مەهاباد
سەرناو: هەتا خاوەن ماڵ دزی گرتە دەست
سەبارەت: نووسین و ئامادەکردن: کەماڵ ڕەحمانی - دیاری مەهاباد، چاپی سێیەم، ساڵی١٣٨٦، لاپەڕە ٥٠.

هەتا خاوەن ماڵ دزی گرتە دەست
دز خاوەن ماڵی گرت و دەستی بەست

ئەوەی لە پووشێک نەکۆڵێتەوە
لۆدە کای بەرن ناپرسێتەوە

بەو کەسە ئێژن جوامیر و ئازا
بەخشین لە دوژمن نەکا تەقازا

بەس لەمە زیاتر خۆت گێل و کەڕ کە
ئەو ماسته بێ‌موو نییه، باوەڕ کە

خۆش‌باور نەبی بەو حەددە چاکە
ئەو هەویرە ئاو زۆر دەبا کاکە! 

ناپاک هەمیشە زیت و وشیارە
هەر دار هەڵێنی سەگی دز دیارە

مامر قەڵە و بێ یان لەڕ و لاواز
ئەپچڕێ هەتا دەکا هێلکەی قاز

قەل ئەڵێن لاسای کەوی کردەوە
ڕۆینەکەی خۆشی لە بیر بردەوە

بەڕەم هەیە چۆن قاڵیی تو ڕاخەم؟ 
بەن‌کاڵەم لە بەن‌چەکمەی تۆ ناخەم

++++++++++++++++++++++