شاعیر: لوتفی
کتێب: دیوانی لوتفی
سەرناو: چاوەکانم وا دیارە فیکری گریانی ھەیە

چاوەکانم وا دیارە فیکری گریانی ھەیە
دڵ و جەرگم وا ئەسووتێ بۆنی بوریانی ھەیە


ھەوری میحنەت گرمەگرمی موڵکی دڵمی دائەگرت
وا ڕژاندۆتی بە سەرما مەیلی تۆفانی ھەیە


ڕۆژ و شەو دەنگی غەزەب دێ وا لەبەر ئەوجی سەما
میللەتی کوردم کە ئیمڕۆ شین و گریانی ھەیە


من لەژێر باری سیاسەت دڵ حەزین و پڕ لەغەم
کاکیشم زۆر بێ دەماخە کەیفی سەیرانی ھەیە


شیوەنی سەختم لە پێشە ڕێگەکەم دوور و خەتەر
دڵ ئەناڵێی زۆر بە سۆز ئازاری ھیجرانی ھەیە


خۆم لە خۆم حەیران ئەمێنم یەک وجوود و سەد میزاج
چاو لە گریان دڵ حەزین و مەیلی ناڵانی ھەیە


لوتفی بەس ورد بە لە تەقدیری حەق و زاتی خودا
کوللی حوکمێکی بزانە سڕی نیھانی ھەیە

++++++++++++++++++++++