شاعیر: بابە
کتێب: دیوانی ئەوڕەحمان بەگی بابان
سەرناو: وەکوو لاوی سلێمانی حوڕ و ئازادەیە ژینم

وەکوو لاوی سلێمانی حوڕ و ئازادەیە ژینم
لە پێناوی وەتەندا، دائەنێم سەد ڕۆحی شیرینم


بەلای ڕاست و چەپا ناڕۆم، بە ھێزی پشتم ئەستوورە
وەکوو شاخی وەتەن سەربەرز و دڵ ڕەق، پڕ لە تەمکینم


لە نەزعا، نامەوێ یاسین، لە قەبرا نامەوێ تەڵقین
وەتەن یاسین و تەڵقینم، وەتەن ئیمانمە و دینم


لە خەودا نەقشی ئازادیم لە ئیقباڵی وەتەندا دی
موبەددەل بوو بە خۆشی و پێکەنین، گریانم و شینم


لە دەوری بەردەوە میراتی کوردە خاکی کوردستان
بۆ ئەم باخی بەھەشتە بابە! من دیوار و پەرژینم

++++++++++++++++++++++