شاعیر: بابە
کتێب: دیوانی ئەوڕەحمان بەگی بابان
سەرناو: با پێت بڵێم لە مێژووی ئەم میللەتە کەمێ
سەبارەت: بۆ ئیمدادی کەیخوسرەوی دووەم لە شاھانی ھەخامەنشین ھاتنی لەشکرێکی یۆنان بۆ بابل و لەپاش جەنگەکە و گەڕانەوەیان بۆ یۆنانستان.

با پێت بڵێم: لە مێژووی ئەم میللەتە، کەمێ
ھەر وەک لە بەحر بێتە دەرێ قەترە و نمێ


کەیخوسرەوی دووەم لە ھەخامەنشینانی فورس
ئیمدادی ویست لە قەیسەری ڕۆم پڕ چەک و نەترس


تا تەخت و تاجی شاھی بسێنی لە ئەردەشێر
بەم لەشکرە، برایەکی گەورەی بخاتە ژێر


چوار عەسری پێش مەسیح بوو کە ئیمدادی ڕۆمیان
ھات و گەیشتە وادیی بابل بە شادمان


خوسرەو بە ھێزی خۆی و بە ئیمدادی زۆرەوە
ویستی کە شاھی کاکی بنێژێتە گۆڕەوە


لەولاوە ئەردەشێر بۆ خەلاسی لە دەست عەدوو
بەخشی بە جەیش و لەشکری یا نەقدی ھەرچی بوو


ئەم مەعرەکە لە خانی سکەندەر کرایەوە
لاکین بە قەتڵی خوسرەوی دووەم بڕایەوە


ئەم لەشکری شکستەیی یۆنانە دەسبەجێ
بۆ نیشتمان و یانەی خۆی کەوتە ڕێ


زینفۆنی سەر سوپاھی بە عەقڵ و بە ھۆش و کێش
ڕێی شاخەکانی کوردی بە باش زانی، کەوتە پێش


کاتێ گەیشتە «مزری کیا» کەوتە کۆڕەوە
دەسڕێژی لێ کرا لە نزیک و لە دوورەوە


زینفۆنی ژیر و گەورە بەڕاستی خەباتی بوو
گاھی بە جەنگ و گاھی بە ئاشتی نەجاتی بوو


لەو یادداشتەدا کە بەجێی ھێشتووە ئەڵێ: 
«کەردۆخ» پڵنگی شاخییە، بێگانە نایەڵێ


ئەم قەومە سەربەخۆیە ئیتاعەی بە کەس نییە
بۆ شاھی فورس و قەیسەری ڕۆم دەسڕی کەس نییە


ھەرچەند سوپاھ و لەشکری ئێمە گەڕایەوە
زۆری بە تیر و نێزەی کەردۆخ بڕایەوە


زینفۆن ستایشی کەردۆخی کردووە
مێژووی بەڕاستی زیندووە، گەرچی خۆشی مردووە

++++++++++++++++++++++