شاعیر: شاھۆ
کتێب: دیوانی شاهۆ
سەرناو: بپرسن لە گشت عالەم سەرانسەر

بپرسن لە گشت عالەم سەرانسەر
کێ دیویە ئاغا ببێ بە نۆکەر؟ 


چەندە بەد نمەک چەند ناماقووڵن
چەندە دوژمنی، خودا و ڕەسووڵن


برا وا دیارە دوژمن ناناسن
کە چەند بەدپێس، سوپڵە و ناڕاسن


ساڵەھای ساڵە نان خۆری کوردن
ئێستاکەش وەھا پیس و نامەردن


بە پارەی ئێمە شتان دەسێنن
لەبۆ نەمانمان بە کاری دێنن


بەبێ بەزەیی خوێنمان ئەڕێژن
کە چی مردوویشمان بمرێ ناینێژن


بە زێڕ و زیوی ئێمە خەفەتبار
چاویان سوور بووە، بوون بە گورگی ھار


بەڕاستی بمرین گشت بە یەکجاری
گەلێ چاکترە لە خزمەتکاری

++++++++++++++++++++++