شاعیر: حەقیقی کتێب: دیوانی حەقیقی سەرناو: قسەی خەڵکی سەبارەت: نووسین: کەماڵ ڕەحمانی - مامۆستا حەقیقی، دیوانی حەقیقی، لاپەڕە ٨، چاپی دووەم ١٣٦٧. باب و کوڕێک چوون بۆ سەفەر بیلامانێ بە سواری کەر پیادە و سواریان بە نۆبە بوو هەرجارێ یەکیان سوار دەبوو لە نۆبەی سواربوونی کوڕدا تووشی پیاوێک بوون لەپڕدا لێی توڕە بوو: مەگەر ئاوسی؟ باوکت دەڕوا بە پێخاوسی کوڕ دابەزی بابی سوار بوو بە یەکی دیکە دووچار بوو پێی گوت: بۆچی ئەو نازدارە بە پێیان بڕوا و تۆ سوارە؟ دووپشتەکی سواربوون ئەوجار تووشی کابرایەک بوون ڕێبوار کوتی: چا ئەو بەستەزمانە پێوە بووە بە دەس ئەم دوانە ئەوجار هەر دووکیان دابەزین یەکی دی لێوی لێ گەزین کوتی: تەماشای چەن هینن! کەرێکیان پێیە و نایبینن ++++++++++++++++++++++ سەرناو: تێهەڵکێشی غەزەلی نالی سەبارەت: نووسین: کەماڵ ڕەحمانی - قوڵقوڵە ساڵی ١٣١١ی ھەتاوی. - مامۆستا عەبباس حەقیقی، دیوانی حەقیقی، چاپی دووەم (١٣٦٧ کـ. هـ)، لاپەڕە ٦٧. لە شوعلەی ڕووی کەمەرچین زێڕ و زێوان چ زەھرەی زوھرە وو کەیوان کە بێ وان شوعاعی میھر و مەهـ لاچوو لە نێوان لە دوگمەی سینە دوێنێ نوێژی شێوان بەیانی دا سپێدەی باغی سێوان لە بەر ئەبرۆی کەوان و تیری سەر ژێت ھیلال ئەمشۆ بە خۆی گوت تەنگ ئەبێ جێت خزی ڕووبەند و کاتێ کەوتە بەر پێت لە خەوفی تەڵعەتت ڕۆژ ھەر وەکوو شێت بە ڕوو زەردی ھەڵات و کەوتە کێوان شەمیمی عەتری زولفت عەینی شەوبۆ شکاندی پشتی گوڵ خونچەی دەمی تۆ نیگارم وەک گوڵە ھەم ڕەنگە ھەم بۆ مەکە مەنعی پەشێوی دڵ کە ئەمشۆ پەشێواوە لەبەر پەرچەم پەشێوان دوو زولفی عەنبەرینی نافە میشکن دوو چاوی مەستی بیمار و پزیشکن لە چاو من جۆیبار و جۆگە ویشکن دوو چاوی من کە وا کەیلی سریشکن دەپێون ئاوی بەحری خوێ بە پێوان بە ئوممێدی قەدی نەورەس نیھالی قەسەم خۆرە "حەقیقی" بۆ ویسالی کە بەو دوو نەرگیسی چاوی خەزالی شەڕابی لەعلی ڕوممانی لە "نالی" حەرامە بێ مەزەی ماچێکی لێوان ++++++++++++++++++++++ سەرناو: چاوەکەم سەبارەت: نووسین: کەماڵ ڕەحمانی - مامۆستا عەبباس حەقیقی، دیوانی حەقیقی، چاپی دووەم (١٣٦٧ کـ. هـ)، لاپەڕە ٧٧. دڵم ماتى خەمى هيجرانی تۆيە نەخۆشى دەردى بێ دەرمانى تۆيه ئەوا عومرێكه چاوم، چاوەکانم خەریکی شیوەن و گریانی تۆيه برينم كارییه جەرگم بڕاوە ئەويش كارى برۆ و موژگانی تۆیه دڵى بردم نيگای چاوی خومارت يەکه و گیراوی دوو مەستانی تۆيه به قانوون حورمەتى ميوانى فەرزە مەڕەنجێنە دڵم، ميوانى تۆيه تەوافى خاڵى تۆ بۆ من حەڵاڵە دڵم فيديه و سەرم قوربانى تۆيه قيامى قامەتت قامى قیامەت تەرازووی چاوەکەم میزانی تۆيه هەواڵى ڕۆژی مەحشەر گەر دەپرسی خەبەر دەستی من و دامانی تۆیه ئەگەر پەیمانەکەی دەستت شکاندم دڵم مەشکێنه هاوپەیمانی تۆيه ئەتۆ سووچت نەبوو چاوت منی کوشت مەفەرموو چاوەکەم تاوانی تۆيه بە ئيمانم هەتا مردن "حەقیقی" بەه‍يواى دينى چاوی جوانی تۆیه ++++++++++++++++++++++ سەرناو: دەردی دووری سەبارەت: مامۆستا عەبباس حەقیقی، دیوانی حەقیقی، چاپی دووەم (١٣٦٧ کـ. هـ)، لاپەڕە ٧٨. - نووسین: کەماڵ ڕەحمانی - پێداچوونەوە: فه‌رهاد په‌رمووز دەردی دووری زۆر گرانە دڵبەرا هیجران بەسە دڵ وەکوو پەروانە سووتا چاوەکەم سووتان بەسە عاقڵان شەیدا دەبن ڕووبەندی سەر ڕوو لامەدە عاشقان کوشتەی جەفاتن قەتڵی مەزڵوومان بەسە مورغی دڵ پابەندی دانە و داوی خاڵه ‌و زوڵفی خاو گیری بەندیخانە تاکەی، بەندی بێ ئامان بەسە هەرچی بووم بردی به ‌تاڵان تورکی مەستی چاوەکەت تاقەت و سەبر و قەرارم پێ نەما تاڵان بەسە شاهیدم فرمێسکی خوێنینە کە تۆ جەرگت بڕیم عاشقی ڕووتم ئەگەر تەقسیرە گەر تاوان بەسە ئێستەکەش مەجنوون و لەیلێ هەن لە عەسری تازەدا شێت و سەرگەردانی تۆم، حەیرانی تۆم، حیرمان بەسە گەنجی عیشقت پڕ به ‌وێرانەی دڵه و من پێم کەمە تا زیادبێ چاوەڕێی دیشم مەڵێ ئیحسان بەسە گەر قسەی عیشقی گۆڵ و بولبول لە لات ئەفسانەیە تۆ گوڵی خەندان و ئەمنیش بولبولی گریان بەسە ئاورت بەردا دڵ و گیانی حەقیقی چاوەکەم دەردی بێ دەرمانە عیشقت، دەردی بێ دەرمان بەسە‌ ++++++++++++++++++++++ سەرناو: ئافەتی دین سەبارەت: نووسین: کەماڵ ڕەحمانی - مەهاباد ١٣١٤. - مامۆستا عەبباس حەقیقی، دیوانی حەقیقی، چاپی دووەم (١٣٦٧ کـ. هـ)، لاپەڕە ٨١. خەت و خاڵت بە خودا فیتنەیی هیند و حەبەشە ئافەتی دین و دڵه ڕەونەقی ئەو کوڵمە گەشە خەلەلی چین و چەگول، شۆڕشی ڕۆم و عەجەمی لەسەر ئاشووبیی زولفت لە هەمووی کەشمەکەشە چاوت ئەر نێرگسی شەهلا نیە بۆ هێندە خومار پەرچەمت گەر شەوی یەلدا نیە بۆ هێندە ڕەشە زینەتی کوڵمەتە لەرزینی گوڵینگی شەدەکەت گەرچی ئەگریجە کە تەزیینی ئەویش و ئەوەشە شەشدەری خاڵی سەری کوڵمەتە دڵ نایەتەدەر سەری سەودازەدە بێخود بەتەمای پێنج و شەشە بەو دوو سێ شیعرە حەقیقی کە لە مەیدان دەرچوو تەنگە جەولانی قسە و تەوسەنی تەبعی هەڵەشە ++++++++++++++++++++++ سەرناو: دایک سەبارەت: نووسین: کەماڵ ڕەحمانی - مامۆستا عەبباس حەقیقی، دیوانی حەقیقی، چاپی دووەم (انتشارات صلاح ‌الدین ایوبی ١٣٦٧ کـ. هـ)، لاپەڕە ٨٩و٩٠. دایە ئەی ڕووحی ڕەوانم به فیدات ئەی سەر و ماڵ و گیانم به فیدات تۆ فرشتەی؟ مەلەکی؟ ئینسانی؟ یا پەریزادەی و خۆت نازانی؟ دایە ئەی ڕووحی ڕەوانم به فیدات ئەی سەر و ماڵ و گیانم به فیدات تۆ فرشتەی؟ مەلەکی؟ ئینسانی؟ یا پەریزادەی و خۆت نازانی؟ شەرته کردووته به ڕۆژ و بە شەوم باسی سەر بێ نەخەوی تا نەخەوم؟ تا دەجووڵێمەوه ھێند پڕ ھەستی له خەوێ ڕادەپەڕی ھەڵدەستی مەم به دەستێک و دەسی تر بێشک نیتە بۆو بێشکەيە نۆبه و کێشک ڕامدەژێنی به ھەوای بەندی دڵت بۆ نەخەوتنمه دڵی پڕ له کوڵت به فرۆشتن بێ ئەگەر ئاوی ژيان بۆمی دەکڕی به دووسەد ڕووح و گيان دايه ئەو دەنگ و ھەوای لای لايە ھەوەڵين دەنگه له دنيا دايە جا لەبەر خاتری تۆيه مانم به فیدات بێ سەر و ماڵ و گيانم * * * مەزمەزەی ئاوی حەياته مەمەکەی دەمی عیسای مەسیحه دەمەکەی مەمکی پڕ شير و دڵی پڕ شەفەقەت خوای مەزن خەڵقی نەکرد ئی‌ وا قەت تا دەچم بۆ دەر و تا دێمەوه ژوور ڕووحی بە دوامەوه دێ دوورادوور چاوی دەيگوت گلەيی کردووه لێم بۆ لە من خافڵه کاتێ دەگلێم نرخی دنيايه چڵێ مووی دايه دڵی من بەستەيه بەو ھەودايە با قەزای ویم وە دڵ و جەرگی کەوێ گش کەسم مەرگی وەپێش مەرگی کەوێ شەرته کردووته به ڕۆژ و بە شەوم باسی سەر بێ نەخەوی تا نەخەوم؟ تا دەجووڵێمەوه ھێند پڕ ھەستی له خەوێ ڕادەپەڕی ھەڵدەستی مەم به دەستێک و دەسی تر بێشک نیتە بۆو بێشکەيە نۆبه و کێشک ڕامدەژێنی به ھەوای بەندی دڵت بۆ نەخەوتنمه دڵی پڕ له کوڵت به فرۆشتن بێ ئەگەر ئاوی ژيان بۆمی دەکڕی به دووسەد ڕووح و گيان دايه ئەو دەنگ و ھەوای لای لايە ھەوەڵين دەنگه له دنيا دايە جا لەبەر خاتری تۆيه مانم به فیدات بێ سەر و ماڵ و گيانم * * * مەزمەزەی ئاوی حەياته مەمەکەی دەمی عیسای مەسیحه دەمەکەی مەمکی پڕ شير و دڵی پڕ شەفەقەت خوای مەزن خەڵقی نەکرد ئی‌ وا قەت تا دەچم بۆ دەر و تا دێمەوه ژوور ڕووحی بە دوامەوه دێ دوورادوور چاوی دەيگوت گلەيی کردووه لێم بۆ لە من خافڵه کاتێ دەگلێم نرخی دنيايه چڵێ مووی دايه دڵی من بەستەيه بەو ھەودايە با قەزای ویم وە دڵ و جەرگی کەوێ گش کەسم مەرگی وەپێش مەرگی کەوێ ++++++++++++++++++++++ سەرناو: موعەللیم سەبارەت: نووسین: کەماڵ ڕەحمانی - مامۆستا عەبباسی حەقیقی، دیوانی حەقیقی، چاپی دووەم (١٣٦٧ کـ. هـ)، لاپەڕە ٩١و٩٢. ئەی موعەللیم، ئەی فریشتەی ڕووی زەوی ئەی سروشت و ڕێ و ڕەوشتت مەعنەوی تۆ چرای ڕێ لێ‌گومانی بێ‌گومان تۆ قەڕەوڵی ڕۆژ و کێشکچی شەوی دابی زانین فێری منداڵان دەکەی خاوەنی هەستی نەوەستی، ناکەوی تۆ نەبی منداڵ خولن، دەخولێنەوە ئەو لەوی دەکوتێ بە مستان، ئەم لەوی تۆڕی وا دەگری بە تۆڕی ماریفەت بازی وەحشی ئەهلییە و کێوی کەوی بۆ بەیانی باشی دەرسی بێچوان تا بەیانی بێ‌وچان داناکەوی داری خۆشی کەی بەبێ تۆ دێتەبەر سەروی نازی، نەخلی بەرزی، نانەوی چاڵی نازانی لەسەر ڕێی کۆرپەمە دڵنیام، چون تۆ تروسکە و پەڕتەوی بۆ خەلە و خەرمانی زانین و هونەر هێڵەگی جێ ورد و بێژنگ و کەوی دەنگی تۆ نەغمەی سرووشی غەیبییە زەنگی تۆ خۆشتر لەسەد قاسپەی کەوی هەر ئەتۆ کردووتە هەستی ژانی گەل هەر ئەتۆ چێشتووتە چێژی بێ‌خەوی تۆ کە بەرپرسی پلەی فێرکردنی تەربیەت کەمتر نییە پایەی لەوی چاولەدەستی تۆیە دایکی نیشتمان ڕۆڵەکانی تەربییەت کەی، نەسرەوی چون لەسایەی تەربیەتدا زیندووە داری ئازادی و تەن و ڕووحی قەوی خوێندنە هۆی ڕاپەڕینی هۆزەکان هەر بەوی خەڵکی زەوی چوون بۆ جەوی با هەر ئی تۆ بێ کەلیمەی کۆڵنەدەر ڕاپەڕە، تێکۆشە، با هەر سەرکەوی گیانەکەم پەندی (حەقیقی) بگرە گوێ تا بە فریات بێ خودای بەرز و نەوی ++++++++++++++++++++++ سەرناو: خانە سەبارەت: نووسین: کەماڵ ڕەحمانی - مامۆستا عەبباس حەقیقی، دیوانی حەقیقی، چاپی دووەم (١٣٦٧ کـ. هـ)، لاپەڕە ١٦٨. گەر مەردی و ڕەندی تاوانە وەستۆی دەگرن خەڵکی خانە کوردی گورد و مەردی مەرزن لە حاندی دوژمن نالەرزن دەشت و کێو و هەرد و بەردی شادەن بۆ جوامێری و مەردی لە چاکە و ڕاستیدا تاکن یەکڕەنگ و دڵساف و پاکن لەوێ میوان خانەخوێیە خانەخوێ نازانی کێیە پیر و جوانی پیرانشاری وەک پیرانی وەیسن کاری ++++++++++++++++++++++ سەرناو: شینی هێمن سەبارەت: نووسین: کەماڵ ڕەحمانی - مەهاباد، ١٣٦٥/١/٣٠ کـ. هـ. - مامۆستا عەبباس حەقیقی، دیوانی حەقیقی، چاپی دووەم (١٣٦٧ کـ. هـ)، لاپەڕە ١٨٨و١٨٩. برای بەرزم لە پاش تۆ من ئیتر سەیر و سەفا ناکەم بە مەرگی تۆ بە دڵ مەیلی کەژ و کێو و چیا ناکەم بە داخی تۆ وەها جەرگم بڕاوه حەستەمە ژینم بە زام و ئێشەوە مەرگم دەوێ، دەردم دەوا ناکەم ئەوا دەشت و چیا شینە و لە خاکی نیشتمان شینە وڵاتی کوردی غەمگینە دەڵێ: تەرکی عەزا ناکەم لە باغان پەڕپەڕن گوڵ، بولبول و قومری دەناڵێنن منی دڵ‌خەستە جا چۆن مەحشەری کوبڕا بەپا ناکەم؟ ! هەوارچی تازیەدارن، چادر و چیغ ڕەشپۆش و خەمناکن هەڵاڵە و سوێسنە دژ ماون، بە لالەی گەش بەقا ناکەم هەوایە دەشت و سەحرا، مەیلی کوێستانم لەلا بایە هەوای تۆم تا لە سەردایە، هەوای ئاو و هەوا ناکەم کەلاوی کردووە ئەستێرەی خەم بۆ نێو کەلاوەی دڵ هەموو شینگا زەلن، خاکی پەتی تێدا پەیا ناکەم فیراقی تۆم وەکوو (حج‌الوداع)ێ دێتە بەرچاوی ئەگەر فیدیەت دەوێ فەرموو بە غەیری سەر فیدا ناکەم لە نێو گەل قاوی مەرگت شوێنەوارێکی وەهای دانا لە خوێناوی خەما غەرقم ئەگەر چاکی ئەدا ناکەم بەهارە و بولبولی باغی ئەدەب هێمن دەڵێ ئەوجار لە باغان بۆ گوڵی نەوڕەس ئیتر نە‌غمە و نەوا ناکەم بە سروەم دێتە گوێ دەنگی سەلاحەددینی ئەییووبی دەڵێ: کوردێکی دڵسۆزی لە هۆزی خۆت جودا ناکەم پەژارە و مەینەتت زۆر دی لە دنیا خاترت جەم بێ خودا فەرموویەتی ڕەنجی عیبادم بێ جەزا ناکەم وەکوو دیوانی تۆ 'تاریک و ڕوون'ه ژینی من، ئەمما لەبەر 'ناڵەی جودایی' تۆ خەیانی خەم بە با ناکەم لە سەر کەیکی تەمەن شەم نایسێ جارێکی دی قوربان١ ئەجەل مەودای نەدا دەیگوت: بە عەهدی کەس وەفا ناکەم 'حەقیقی' چاوەڕێی دیداری تۆ بوو داخی داخانم نەنیشت ئەو بازە بەختی من، لە بەختی بەد ئیبا ناکەم ١. مامۆستا هێمن: ئەوەندە دەردەدار و بێ پەرستارم کە پێم وایە: لەسەر کێکی تەمەن ھەڵناکرێ تازە شەمێکی تر ++++++++++++++++++++++ سەرناو: لە ئیمامی بۆ حەقیقی (١) سەبارەت: نووسین و ئامادەکردن: کەماڵ ڕەحمانی له ئەحواڵی 'ئیمامی' گەر دەپرسن چۆنه بێ ئێوە! سەری سووڕماوه، لەم کوێستانەدا بێ‌هەمدەم و خێوە بکەن ڕەحمێ به حاڵی، هەر بەحاڵ هێزی لەبەردایە عەجایب گیری کرد لەم سەرزەمێنەی پڕ کەژ و کێوە مەڵێن: کوێستانه جێگای، لێی‌گەڕێن قشڵاغ و بژوێنە به ئینسان چی، که حەیوان تێر دەخوات و خەڵقی بێ‌شێوە! ئەگەرچی گیاوگژی ئەم سەرزەمینه سەوز و تێرئاوە بەڵام بۆ من له دووری ئێوه وشک و پڕ چڵ‌وچێوە فیداتان بم، وەرن لوتفوو هەبێ، ڕۆژی هیلاکەتمە نەیەن بێ‌نێونیشانم، بێنه لام هەر 'کامیل'م نێوە مامۆستا عەبباس حەقیقی، دیوانی حەقیقی، چاپی دووەم (١٣٦٧ کـ. هـ)، لاپەڕە ١٦٩. (لاپەڕە ٣٩٧ی چاپی جەعفەر؛ لە چاپی ئەنیسیدا نەهاتووە) وەڵامی حەقیقی بۆ ئاوات 'ئیمامی'! نامەکەی نامی گەیشت و نامه سەرچاوم له دووری تۆ دەبارێ داییما فرمێسکی خوێناوم بەبێ مانگی موبارەک لێم حەرامه چاوەکەم بێ تۆ پڵاو و گۆشت و دۆڵمه و مەشکەفی و فڕنی و هەلیماوم لەبەر ڕۆژوو نییه، دووری له دینی تۆیه گەر مردووم ئەجەل دەورم دەدات، هیوای ویسالی تۆیه گەر ماوم ڕەفیقانت له هیجرانت بەجارێکی هەموو سووتان به ناری عیشقی پاکی تۆ، به تەنیا من نەسووتاوم که فەرمووته: فیداتان بم، وەرن ڕۆژی هیلاکەتمە چ حاجەت هات‌وچۆ بەینی من و تۆ، بۆیه داماوم له قوللەی قەلبی یاران خەیمەیی نازت وەها هەڵدا له خانەخوێ و له میوان، غەیری تۆ نایێته بەرچاوم له ڕێگای عەشقی تۆدا ڕەهڕەوانت هیچی ناوەستن هەموویان 'کامیل'ن وەک تۆن و هەر من سەر لەپێناوم ئەگەر وابێ ئەوەی دۆستی 'حەقیقی' بێ لەبیر ناچێ به قەولی 'کاعەزیز': بێت و نەیێ، پێڵاوی سەرچاوم مامۆستا عەبباس حەقیقی، دیوانی حەقیقی، چاپی دووەم (١٣٦٧ کـ. هـ)، لاپەڕە ١٧٠. (لاپەڕە ٤٠٠ ی چاپی جەعفەر؛ لە چاپی ئەنیسیدا نەهاتووە) ++++++++++++++++++++++ سەرناو: لە ئیمامی بۆ حەقیقی (٢) سەبارەت: نووسین و ئامادەکردن: کەماڵ ڕەحمانی چ خۆش ‌بوو قاسیدی یار شێعری ئاودار و تەڕی هێنا ژیاوه باغی هیواکەم، ئەوا بەرگ و بەری هێنا هەزار ئەحسەن 'حەقیقی' عەنبەرئەفشانی دەکا شێعرت! فیدات بم، قاسیدت موژده و نەویدی خۆشتری هێنا خەریک بووم من نساری ڕێت بکەم هەرچی مەڕ و ماڵە کەچی ڕۆح هاته پێش، ماڵ و مەڕی لابرد، سەری هێنا له جوابی شێعری ئاودار و تەڕی تۆ عاجزن شاعیر بچووکی خۆت بە سەد زەحمەت دووسێ شێعری شڕی هێنا به عەزمی کوشتنی دوژمن عەجەب غەوغا وو ئاشووبە برۆی تۆ خەنجەری کێشا، موژەی من نەشتەری هێنا له دووریت مردبووم، ئەمما نەسیمی لوتفی تۆ دیسان مەسیح‌ئاسا دەگەڵ خۆی نەشئەیی ڕۆح‌پەروەری هێنا کەوا پارچەی غەزەل دەبڕین له دیوانی مەحەببەت‌دا ئەتۆ پشتی غەزەل دەبڕی، 'ئیمامی' ئەستەڕی هێنا دیوانی حەقیقی، چاپی دووەم ١٣٦٧هەتاوی، لاپەڕە ١٧١. کانی‌بەن، ١٣٣٢ی هەتاوی (لاپەڕە ٣٩٥ی چاپی جەعفەر؛ لە چاپی ئەنیسیدا نەهاتووە) وەڵامی حەقیقی ئەوا سۆزەی بەیان دیسان پەیامی دڵبەری هێنا نەسیمی ڕۆح‌پەروەر عەتری عوود و عەنبەری هێنا شنەی بای مەرحەمەت دیسان لەلای کوێستانی 'کانی‌بەن' چ خۆش بۆنی هەڵاڵه و سوێسنه و سووسەنبەری هێنا نه زیندوو بووم نه مردوو نامەکەت ئاوی حەیاتی دام نه قاسید بوو نه کاغەز ساقی ئاوی کەوسەری هێنا له وێنەی سونبول و لاله و گوڵ و گوڵ‌ئەتڵەسی و شەوبۆ حەریر و ئەتڵەس و جەرسه و قەنەوز و مەخمەری هێنا له ڕووی نەخش و نیگاری پیره‌کوێستانی تەبیعەت بوو موهەندیس چوو نموونەی ڕامسەر و بابولسەری هێنا سزد گر زنده گردد مرده از نامت مسیح‌آسا کەوا بۆ مەسکەنی 'سەردار' نامەی سەروەری هێنا عەزیزم شەرحی دووری تۆم شەوێکی تاکوو ڕۆژ نووسی سبەینێ زوو قەڵەم ئیعلانی خەتمی دەفتەری هێنا قیامی قامەتت بۆ ئەهلی دڵ قامی قیامەت بوو قەتاری کۆچ و بارت بۆ موکریان مەحشەری هێنا گڕی دڵ زۆر بەتینه وا زوو ناکووژێتەوه 'کامیل'! 'حەقیقی' دەستەچیلەی دڵ، 'ئیمامی' ئاگری هێنا دیوانی حەقیقی، چاپی دووەم ١٣٦٧هەتاوی، لاپەڕە ١٧٢. بۆکان، ١٣٣٢ی هەتاوی (لاپەڕە ٣٩٦ ی چاپی جەعفەر؛ لە چاپی ئەنیسیدا نەهاتووە) ++++++++++++++++++++++ سەرناو: لە ئیمامی بۆ حەقیقی (٣) سەبارەت: نووسین و ئامادەکردن: کەماڵ ڕەحمانی گەر دەپرسی چۆنە 'کامیل' کاکە، دەردی کارییە برسییە، بێ هێزە، گێژ و وێژە، کاری زارییە ڕۆژ حەواسی پێ نییە، شەو خەستە وو تەنبەڵ، دەڵێی: کۆڵەکێشیی کردووە، تاکوو سەحەر هاوارییە وا بڵاو و دەرهەم و لەتلەت بوو وەک زولفی بوتان فکر و ئەحواڵ و حەواسی، عەینی تۆوی شارییە غەیری کوندی ماڵ خراپ و وشکەسۆفی ڕیش‌درێژ کێ دەڵێ ئەم وەختە خۆشە؟ گەرچی ئەمری بارییە مام مەلاش، ڕەببی کوت‌وپڕ بێ، هەدادانی نییە کاری هەر قوولە و هەرایە، ئەم سەرە و ئەو خوارییە خۆشییە لەو، چونکە مانگی خێرە، سەرفترەی هەیە دەک بە زووخاوی ڕەشی بێ، هەر بە فکری زارییە نان دەخۆم ئەمنیش بە قوززەڵقورتە، چا زووخاومە گەر دەپرسی چۆن دەژی 'کامیل'؟ ئەویش بێعارییە دیوانی حەقیقی، چاپی دووەم ١٣٦٧هەتاوی، لاپەڕە ١٧٣. لاپەڕە ٦٢ی دیوانی چاپی ئەنیسی، لاپەڕە ٣٩٣ی چاپی جەعفەر وەڵامی حەقیقی 'کامیل'! ئەو مانگی موبارەک فەڕز و ئەمری بارییە مانگی نوێژ و تاعەت و سەرفترە وو دیندارییە لەززەتی ڕۆژوو ئەتۆ تێ‌فکره عەینی ڕەحمەتە خواردنی ڕۆژێ ئەتۆ بڕوانه زەهری مارییە دەنگی قوڕئان خوێندن و ئەڵڵاهوئەکبەر دێ مودام کەی له مانگی دیکەدا تۆ گوێت له دەنگی قارییە بیست‌وحەوتەم حامیلی قوڕئانە جەبریلی ئەمین حامیلی وەحیی موبین بۆ ئەحمەدی موختارییە لەیلەتولقەدرێ کەوا سەف‌سەف مەلاییک دێنەخوار دەرکی ڕەحمەت بازه، عاسی! وەختی گریه و زارییە دەرکی دۆزەخ داخرا دەرکی بەهەشت ئاواڵه‌یە موژدە بێ ڕەحمەت دەبارێ باری عامی بارییە سەیقەلی ژەنگی مسی ساڵێکه سەرفتره و زەکات مشت‌وماڵی نەفس و ماڵه سوننەتێکی جارییە مام‌مەلای بێچاره چ‌بکا، کاروبارێکی نییە یازده مانگان خەوتووه و ئەو مانگه وەختی کارییە کاکەگیان ئێستا 'حەقیقی' زەوقی جارانی نییە! تەبعی تۆ سەرشاره، ئەمما شێعری من ئیجبارییە دیوانی حەقیقی، چاپی دووەم ١٣٦٧هەتاوی، لاپەڕە ١٧٤. بۆکان، ١٣٤٧ی هەتاوی (لاپەڕە ٣٩٤ی چاپی جەعفەر؛ لە چاپی ئەنیسیدا نەهاتووە) ++++++++++++++++++++++