شاعیر: تورکەمیر کتێب: شیعرەکانی تورکەمیر سەرناو: لامەکان یا نە ئیلا یا ماڵک لامەکان یانە یا یانە نایاب یەکتای یەگانە گیانبەخش و گیانسەن ژەو غەیبخانە یا بینای بێ چەم، بوڵەند بێ عەیب یا يا هو یاران، پاک تینەت تەیب یا لوتف لەتیف، لولاك لاريب یا عالم الغيب، ئەلف و ئەحەد ئیسم یا ئیسم جەلیل، گیانستان جسم سەمیع و بەسیر، سەمیعەی بێ گووش ڕووزیدەھەندەی، مووران کەم تووژ ڕەزاق و مەرزووق، غەیبزان عەیبپووش سانع ورد ھم، سوورەی ئیخلاسین ژە سوورەی سی جوز، جیا کەر یاسین یەعنی بێ ڕەحلەت، کونەندەی عاسین کەعبەی حاجیان، قیبڵەی حاجاتین خاڵق ئەرازی، ھم سەمەواتین لاشريك له، لم يزل ذاتين مەنزڵ قورئان، قازیی حاجات سوورە و بورھان، فەخر و موباھات گشت ھانە ئەوراد، سوورەی ئیزاجات یا سونع مەسنووع، سانع مەسنووعات سازەندەی شێوە، شناسەندەی زات ھەم وەحی سازن، پەی ساجدین لات ئاو و باد و نار، غەبرا سرشت دەر ھەفتاد و دو دین، ژەی پەروەرشت دەر ھەریەک وە نەحوێ، ئاو و خورشت دەر ڕوبع مورەبەع، مەسکوون سوکوون دەر ھەم لەنگەر وە کوێ، جەھد جەیحوون دەر ھەم نە عومقیم، ڕووژی وە نوون دەر وە کەتم عەدەم، وەجھەی ڕەوای ڕوو ئەحمەد بێ واقف، پەی معراج توو یەد تەناول، ژە توو بی یا ئوو سڕ مەکتووبات، ھیچکەس نەزانا جوز جسمێ کە، سەرەنجام زانا ئەو سڕە تا سەور ئیسرافیل وانا ژە توراب پاک، باب ئادەم سازان ناز ناز نعمەت لە غەیم نەوازان تا باز عیزراییل گرد لێش ورێزان نجات دای وە نەسر، نووح نە کشتیی یەمم کەم کەم تەڵاتوم تووفان کەردی کەم شای زەورەقنشین فارغ بی ژە خەم مووسای عومرانت بێ پەردە وانا یەمم تژنە تەورت وە تەور نمانا تا توور سینا ساف ژەھەم شانا ئیعجاز نەفس تو دای وە عیسا مردەی سەد ساڵە ژە لەحم پووسا ئیحیا کەرد عومرش ژە نوو نویسا حوکم حەدادی تو دای وە داوود بێ دەم و دەسگا بێ ناز و بێ دوود بێ گاز و مەقاش سازا کڵاوخوود یاڕەب سلێمان تو ئیجادت کەرد فارس سەریر بان بادت کەرد چەنێ ژە حەکمەت نگین شادت کەرد شەوێ ئازەرت ژە سەنەم تاشی فەرمان دای ئەخی تەوەرەی تێدا پاشی ژەو تەوەر ئیبراھیم کەردی نەقاشی ژە کار قوربان زەبیت ئازاد کەرد شاد شاد کەلیمەی شەھادەت یاد کەرد یا ھاجەر ژە ھجر، ئەجرەت دڵشاد کەرد بازەندەی بازار، بازیان شێوەن بەزاز بازار، بەندەی فریوەن شەوق و زەوق و زەھک، ئەو لەوحە دیوەن کوفران کوفە، كن فيكون کەر منارەی غروور، لەعین نگوون کەر دیو ژە ئایەی دەنگ، قورئان زەبوون کەر یا حەمید وە زکر، سەیید سەروەر وە زات زوورمشت، شای فەقیر پەروەر تاج لەعەمروک، لەمحەی نوور وە سەر یا فەتاح و فەیز، فاتمەی زەھرا فەیز ئەنعامات، وە ھەرکەس وارا بی وە فەیزبەخش، دیتاچی دارا وە ئەعزاز ئیسم، ئیمام سانی وە حصن حصين، ڕشتەی ڕەبانی وە عەھد ئیقرار، دووسان گیانی وە زکر زوان، شای زینوعباد مەسمووم زکی زاھد زەھاد تەن دا وە قەزا بێ جەنگ و جەھاد وە گفتار توو ئیمام پەنجم نویرش وە نەزر مەوزوون مونسەجم ژە نویر ئەوان ڕووشنای ئەنجوم وە جا و جەلال جەعفەر سادق وە سادقوقەوڵ سادقەی سابق دین ئەو ئایین سابق کەرد بارق وە میر مەعسووم، وە مووسای کازم شەفاعەت ژە شای خوەراسان خوازم بی وە زامندار ئاھوی سەر لازم وە ناز نماز محەممەد تەقی وە علم ئەوراد عەلیی نەقی تەعویزەن بی شەڕ شەیتان شەقی وە شادیی عەسگەر یا حەق وە شادی وەختێ جبرەییل مەدێ مونادی شادم من ژە شەوق مەھدیی ھادی وە ئال عەبا پەنج موفەخر دین وە چواردە مەعسووم مێخ مەھد زەڕین وە چل ناواڵق جا نە کوێی گەڕین وە سەمیع بەسر کەمەر بەستەگان وە ناز خزمەت ئەژ گل دەستەگان وە جەرگ چاکچاک دەروین خەستەگان وە عشق عوشاق شوھەدای شەھیدان وە نیک ئەختەران شەھید نە مەیدان دەرارم ژە بەحر ئاڵوودەی عوسیان یاڕەب وە حورمەت پەیخەمبەرانت وە تاھری تەبع تەبیب گرانت وە دەستەی دەستار تاج وە سەرانت ++++++++++++++++++++++ سەرناو: عەشرەی بێ نوقتە سەرو ساوەوە... دو گوڵ ھا وە سەدر سەرو ساوەوە سەروئاسا سەودای ھا وە ھەواوە سەودام وەو دو گوڵ عەرعەر مەواوە سەرم سەرسام کەرد کڵاس سەر ڕەم مادەی مدەوەرەی گەرد گوڵ وە دەم سەحەرگا ماما وەو ئەساسەوە وەو دو مەردومەک مدەوەر ماسەوە لوام ئیلحاحم کەرد وەو کول دەردەوە لاڵام وە لاڵکەی ئاح سەردەوە سەمع دا وە سدام، ڕەحم ئاوەردەوە سواڵم وە لەعل لولو کەردەوە ئەوسا وەو کەلام گەوھەروارەوە مەرھەم دا وەو دەرد دەردەدارەوە میھر مانگ سومای میھر ئاڵاوە سومای میھر و مانگ ھەردو ئاڵاوە دڵ وە وەسواسە دڵارامەوە گاگا مەمردم گا مامامەوە ئەرواح ڕوو ئەلا ڕووحم ڕەماوە گوڕاگوڕ دوودەی دەردم دەماوە ++++++++++++++++++++++ سەرناو: سەرین چی وەسەر سەرین چی وەسەر... سەیر ھامسەران، سەرین چی وەسەر جووش جوانی وەرین چی وەسەر میھر و شادی، زەوق وەرین چی وەسەر سەر بیەن وە بار گەردەن ژە پیری گەردەنگیر تەوق دام دڵگیری پێشانی پەڕچین نویر بەسەر کەم عەین کەفت ئەو عەینەک عەسا ویەردەم بەدەن بی وە شار خراوەی بێ فەڕ تەبڵ سەمع سکووت مەبھووت وە گووش کەڕ مەحاسن وێنەی قوتن حەلیجەن چوی زەدەی عەقرەب ئەعزام ئیفلیجەن تیر ھەم وە دوودکان کوانگ زەرد چوی فەرد توودار تەنگەرم و دڵسەرد پێشانی پەڕچین نویر ژەی ڕەم کەردە کان گووش چوی گون ھووڕشگە ھوەردە ژە بینای مەحرووم تاربەردەی تەم ئاو ژە لێش جاری چوی بەحرەین یەم قامەت بی قوماش قەد بی وە قوەت پەڕەی پشت چوی بەرد بن زمگەی ڕوودەت بینی چوی کونای کوەنە بخاری وە خوارە مەکێ ئاو ژە لێش جاری لولو لەفز گفت موھووم وە جەفەنگ دەم بێ دنان وێنەی پیر نەھەنگ سینە موشەببەک چوی لانەی زەموور زەموور وە زاری تەید مەدێ وە زوور نەی وەرتەر نە ساڵ نە بیست تا سی بیم چوی وەحش و ھار ھەردەم برسی بیم ژە بیست تا وە سی، داخڵ وە چل بیم واعیزان ژە واعیز، وەو عیزەم وڵ بیم سەیر سەیادێ سەر کاوانم بی میھر ئەو سەر سووزان لەیوەر دانم بی لەلای حاکمان حاجەت ڕەوا بیم ژە تەخت توومار توشماڵ سەوا بیم ھامدیوان ژە من سەرفان نمەوەرد یە گشت کە ویەرد پەرێ داخ و دەرد وە تورکە واتن، ئەی گورگە پیرە واتەی تورکەمیر جەھانان گیرە ++++++++++++++++++++++ سەرناو: شیرین شەماران شەو شەمعی نیا شەورای شەماران ناگا نامەحرەم وا دا وە یاران تەفەڕوج پەی تیپ توغرای حیتاران سەف سەف چی سەر سان سپای سەرداران زیوەش کەرد وەبان نارنجی ناران بدەری ژە ڕوی ئەو برچ مەدێ جاران خاسە خانمێ ژە خزمەتکاران حووراسا ژە تیپ حووری حەساران تاس و ماس و مشک ماسی مەتاران ئاوەرد پەی سەرشووڕ شای سەر قەتاران گرد گوڵچینی، عەتر عەتاران ڕێزنا ئەرپای ڕەعنا نازاران گوڵاوپاشیی چەتر پارچەی ئەڵواران مەر شیرین نە حەوز ھەرسین ھەر جاران شستشووی شعرییەن شەوق چی ستاران مەر لەولا پل پێچ تویلک چناران ڕووشنی شوعای شوڵەی سمساران مەر نە شەوسان دارای بن داران بەسر چوی جەیران لە مەرغزاران نەعووزەن پەی نەزم نمازگوزاران شەفینش شەفای دەرد بێماران ئیعجازش ئەنوار مەسیحا داران کیانا ژە قەور مردەی مەزاران ئەی مەسیحادەم ژە دیرە داران ئایا ئیحیا کێ چەن ژەو ھەزاران کڵاو ژە گیسووی کڵاوپووس داران سڕ ئەوا وەبان بیچی ئەمتاران گەرد گوڵچینی عەتر عەتاران ++++++++++++++++++++++ سەرناو: فەڵەک ڕەوا بوو فەڵەک وە دەرگات یە چوین ڕەوا بوو ھەر لەیلێ لایق خەزانەی شا بوو مودام ئاوارەی دویر ژە ماوا بوو دایم دەر ساقی یا نە گدا بوو قەڵەمزەن خوەشی نەوینێ وە چەم چارەنویس فامت ژە سەر بکێ ڕەم نموومێ وەی تەور شکووفە نەودەم غوربەت کردیە وە غەمخانەی غەم باڵا وەی بەرزی، فەیز وەی فەزایی شەو وەی پەشێوی، ھەم ناڕەزایی ++++++++++++++++++++++ سەرناو: لەیل زبەرجەد بێز لەیل زبەرجەد بێز... زنخ زەڕ فنجان، لەیل زبەرجەد بێز لەو مەملوو مەشرەب، موژگان مەژان بێز چەن لەو پەی ئەو لەو شەو مەکەن تەمێز بیم بەیاز بی زەرد، خاڵ سۆز و زوڵف دێز شەفین شیرین شەھد شووڕەنگێز چیچی خەرخوفاش لێم مەکەن ستێز خوەر وەشتەن چوی خوەر لە خاوەر گورێز «ح» عارز نەبان «ب» ئەرقەماوێز «زرس» زاھیر نە جای زەدەی زرس دێز ئەبروو ئاشووی عام عەینان سورمەڕێز شەو شیرین خەوان سوو شیرین ئاخێز مەر شیرین نە پشت پەنجەرەی پەروێز نیم نگای شیرین تون خوو خەزەوخێز مەر بڵقەیس بانوو بنت شا پەروێز یا ژە فەرەنگیس فەڕەن فەڕەنگێز بەرزە باڵاوەن پەڕ لارە و ستێز ھەر نە کدوورەت، لەنج و لارەخێز مەجنوون ژە لێز کەن، من ژەو بەدتەر نێز نێش وەجای غەمزەش ژە دڵ کەنەن لێز مەسزم چوی شەمع تا سەحەرانخێز بەرد بنچینەم وە وێز دانە خێز شوان شەو لێز گوم وەرداشتەن وە وێز تورکە چوی مرخان شەو نەدارۆ لێز ++++++++++++++++++++++ سەرناو: بەنای کوەن میرزام پەژاران... ڕووژێ ژە ھجووم سەودای پەژاران خەیاڵ وەرداشتەم چوی ئەسر واران ڕام کەفت ئەو قولەی کاوکوێساران دڵ مەشغوول سەیر، من جنوون وە سەر ڕەخش خەیاڵ توند، ڕاکب بێخەوەر بەن وە بەن گێڵیام وە خاترەی خەمناک چەنی پای مەجرووح، سینە و دامان چاک تا ڕام کەفت ئەو پای عەجایب کوویێ قاف قیامەتێ، کەیوان شکوویێ کوەنە قەسرێ دیم نە قولەی فەرقش فەرق سەماوات نە تەمدا غەرقش نە قولەی فەرقش جێگەی کیان بی جای کیان ئەو برج باروش عەیان بی پەرسام ئەی بەنای خراوەی خاپویر ئەوسا سەفابەخش ئیساکە بێنویر پەرێم بواچە ھەرچێ مەزانی باعست کی بی؟ کیت بی وە بانی؟ کی بنیات کەردەن ئەیوان تاقت؟ تاق بڵنگ بەخت گەردوون ڕەواقت ژە دەور جەمشێر جەم بەن جامنووش تا عەھد خەسرەو خەرقەی شاڵ نە دووش شاھان یەکایەک باوەڕ وە خاتر بواچە پایەی کی بی؟ ژە کی زیاتر؟ کیشان خاس خەیاڵ، کیشان لاڵ بەخش بی؟ وە پای بەخشایش کی دڵ مەلەخش بی؟ فەردێ ژە دەفتەر وردت بەیان کەر کردارێ ژە کار دێرین عەیان کەر تا ئەی شویم چارەی محنەت کشیدە ژە لات بنووڕم چوین نابدیدە دیم دەس کەرد وە شین زاری ڕەستاخێز بەدتەر ژە شیرین لە مەرگ پەروێز ئاھێ تەوف سەرد یەخبەنان بێزیا یەی دوودێ ژە فەرق کەلەش ورێزیا واتش: ئەی مەجنوون پەرێشان پەشێو وە کوانەوە دەیریتەر ژە دێو من وێم مەزانم جوویای دەردانی ژە سەودای دەردان، وێڵ ھەردانی چوین من کووڵەبار خەم چەنگت کەردەن چوین من چەن سەودات ژە سەر ویەردەن ئەی ئەحواڵاتە مەزگم ھا پێوە پەڵنگە نەیرم نەمەنەن ژێوە ساتێ ساکت بوو، گووش دەر وە ڕازم ڕاز دەروین کاو جگەر گودازم بەڵێ، من ژە ئەسڵ بەنای ئاگادم چەن داستانەل مەنن وە یادم ژە دەور جەمشێر، کەیقوباد چەنی تا ئاما وە دەور ھومای بەھمەنی زەحاک وەو وەقار، وەو تەمکینەوە وەو سپای جەڕار سەھەمگینەوە ھەر ساڵ ئێوارە، ئێرەش مەسکەن بی تا ئیسە دوڕساق کووی دەماوەن بی فرەیدوون وەو فەڕ خەسرەوانییەوە وەو شەقەی دەرەفش کاویانییەوە وەو گورز گاسەر سەرشکەنەوە وەو تەوق زەڕتار دانە و بەنەوە مەنووچێھر نە پام کووسش نەواختەن چەنی نو قولەم تەکییەگا ساختەن چەن ساڵ سەڵم و تووڕ تەمەنام کەردەن جەیشش چوین جەیحوون ژە لام ویەردەن گەرشاسپ و نەیرەم، سام و زاڵ زەڕ کەیکاووس وەو تاج جوقەی تاووس پەڕ ڕووسەم وەو شەوکەت تەھەمتەنەوە وەو گورز کووپاڵ نوسەد مەنەوە کەیخەسرەو وەو جام گیتی نماوە وەو مورەسەع تاج ڕەخشان کڵاوە وەو پاڵەوانان گورز وە دووشەوە دڵ پەڕ کین ژە ھوون سیاوشەوە تووس نەوزەر دیم، گیو گوودەرز دیم ھەم جەھانگیر دیم ھەم فەرامەرز دیم وەسف کەردنیشان نمەیوو حساو جاش نییەن نە پشت دیباچەی کتاو موختەسەر یەک یەک فەڵەک بەرد وە فەن تا یاوا وە دەور چێھر بن بەھمەن منیش ھومای چێھر جەرگە نازم بی کوان گشت چوین فەرش پائەنازم بی من ئەوسا چراخ بەزمم ڕووشن بی دەور وە کام چێھر ھومای بەھمەن بی چوینکە وارس میرات جەم بی فرمانش ڕەوا حوکمش موحکەم ماھر ئوستادان سەنایەع زانا نامە پەی ئیحزار یەک یەک کیانا وە ھەندەک وەختێ گشتشان جەم بین وە شکڵ و تەسویر ساختەن موحکەم بین پەنجرھی جامڕێز نە جەنب ئەیوان قەسرم ئەفراشتەن ھامپایەی کەیوان تا وەختێ کارم ئاما وە ئیتمام نیان بەنای عەیش ساقیی بادە و جام چەنی کەنیزان گوڵبەرگ و گوڵڕەنگ تەرەننوم سازان شەیداو شووخ و شەنگ مشتەری ڕوخسار، فتنە و شەوقئەفرووز نەفیسە، ھەڵاڵە، سعدە، جەھانسوز گشت حوورێ حووربەچ، حووری سفەتان گشت مەھتاب جەبین، زوھرە تەلعەتان سەنمبەر، گوڵچین، حووری، پەریزاد گوڵزار، گوڵەنام، گوڵفام و گوڵشاد گشت سەرمەست جام، بادەی ئەقیق ڕەنگ ڕەقاس پەی ئاواز چەغانەی چلچەنگ گشت پاکوو وە دەنگ، دومەکچی وە دەف گرگرەی گەردەن سراحی وە کەف مەنووشان بادەی عینەب پەیاپەی وە یاد قوباد کەیکاووس کەی موترب وەو ئاواز خوەش سدایییەوە وەو لەحن و تەحریر نەکیسایییەوە ئەوان مەقامات لە سینەشان بی باربود بەندەی کەمینەشان بی نەوی خەوف مەرگ زەڕەیێ وە لاشان بێئەنازە بی پووشا بەخشاشان ئەوان تا دەوران وە کامشان بی ھەر وە کەف، بادەی گوڵفامشان بی فکر نمەکەردەن دونیا فانییە مایەش نەیامەد پەشێمانییە وێنەی شوڵەی شەم کافوری نە جەم شەوان مەسووزوو، خامووش سوبحدەم وەو شوڵەی نەسیم شەفەق زەدەوە جەم بیدار مەویا، شەم مەمەردەوە مەنیشت ئەو دلێ بەزم مەیخواران وێش بەدر کامڵ، جەم سەیاران من کە ھومای چێھر جێئەنازم بی کاوان گشت چوین فەرش پائەنازم بی پاتاق، سەھەند، قەد، ھوڵاکوو مانشت و گواوران، بەن داڵاھوو قولەی قەندھار، ئەرگ سپید یاڵ ژە کانولبەحرەین تا دەم خەڵخاڵ سمنان، دامغان، ساووجبولاغ و قیس ئیروان، شیروان، شادبولاغ، تفلیس ئەڵبەرز واحد، پێچ پیرەباخ ئەمروولە، ئەڵوەن، بەن، ساووجبولاغ پینە، وشترانکوو، سەرەندیب تەمام باوەیاڵ، دینار چەنی لەنگەرجام بێستوین بەرز، یافتە، ئەلەنجە قەرەداغ پێوە تا بەن گنجە کووی ئەبووقەیس، مەکە و مەدینە ئەقسسە، کوان گردین ژەی وێنە یە گشت چوین مورید سەرسپەردەم بین بەڵکەم کەمتەر سەنگ پایە خوردەم بین وە تەورێ پایەی تاقم بڵنگ بی سەنگێ ژە پایەم، چەنە دەماوەن بی ھەر ئێوار خرووشت کەڕەنای شێر دەنگ جاشان ھەر وە فەرق فەوق ئەبلەق ڕەنگ گڕەی تاو گەرم کویرەی بخاری جەم مەجمەران عوود و عەماری مەیخواران سەرمەست، من وە خاترجەم کوان چوین کاھێ مەنمانا وە چەم مەنیشتن ئەو برج سەڵتەنەت عەزیم مەنووشان ئەساس نادرە و نەدیم قەھقەھەی قویاقوی لاڵ کەمەران بی نووشانووش بەزم بادەخواران بی جەم جەمشێرئاسا مینای بلووری سادە ساقیان فنجان فەغفووری سدای سنج و ساز چەنگ و بووق عوود سوورئاسا مەنیشت ئەو چەرخ کەبوود باز ھەر نە سدای ناڵەی سنج و ساز چوین خنگ فەڵەک مەنیشت ئەو ئاواز ئەوەڵ تا دەوران وە کامشان بی ھەر فکر بادەی گوڵفامشان بی ئەوان وەو دەماخ تەیرمتراقەوە من وەی زمزمەی خوەش دەماخەوە تا ئاخر دەوران چەرخ کەج ڕەفتار نەرد بازی تەرفەند لێشان کەرد ئیزھار سەنگ تەفرەقە دا لە میناشان سانا ئەساسەی بەزم چنیاشان وە تەورێ ژەی دار و دونیا بەردشان چمان ھیچ نەوین ھیچ نەکەردشان ئەوان ویەردن چوین ڕێواران من مەنم چوین سەنگ سمکووی سەواران ++++++++++++++++++++++ سەرناو: شیرین نە دووشەن چەن توغرای کەڵافدویزش نە دووشەن خام چوی خەیاتەی سیای سەر جووشەن سەھمناک چوی باڵ بەیداق قووشەن سەف سەف چوی سپای چاووش چاووشەن ئاوێزەی گووشەی عەین ئاھووشەن مەرزەنجان مایل زەوج گیسووشەن پەی دەستەی زوڵفش نوفل زێخ نووشەن قیراسا قەتران، مشک ئاسا بووشەن حەی ئاسا حارس حەوش ئاغووشەن زەوجێ گووشوارەی تڵاش نە گووشەن گووشم ژە زلەی زەھەب ئوترووشەن جناح مونسەرف تاق ئەبرووشەن نەقشێ نە مابەین ئەبرووش مەنقووشەن نەسب نەپای حەبەی بەرق ھوەر سووشەن چوی ھوەر نە خاوەر خەڵق ئارزووشەن سای زوڵفش سەیوان قبەی لیمووشەن بڵاتش مەرێ شای تڵاپووشەن ھندسان خەراج خاڵ ھندووشەن چین وەو بوزورگی بەھای یەک مووشەن نە شیرین ھاملەنج، نە لەیلی لووشەن نە سەوڵ ھامباڵای نمای نووشەن فەرھادزەدەی زام بێستوین کووشەن قەیس و نجد مەبھووت ڕووشنای ڕویشەن ھەر گل نگای ناز نزاکەت خووشەن بەختم تا خاڵ خاس دویر ژە ئاغووشەن پەی قەساس قەتڵ من زڕەپووشەن ++++++++++++++++++++++ سەرناو: کەلەباد ھانای کەلەباد! باد بەھاران وەلیعەھد وەشت ئەوکێڵ واران شکووفەی سەرچڵ شەکەرچەی داران گوڵپاش، گوڵڕێز، گوڵ بەزرکاران یەخپاش، یەخبەن، بەڵاغ باخان شەنیار خەرمان سەلج سەر داخان قەدیم قەراوڵ ئێڵچی «نووڕێ» دەشت بەردولعەجووز کەر واردی بەھەشت قبلەی موشتاقان، مایەی بەرەکەت ژە کەی قبلە وە باز کەر حەرەکەت لە دەشت و دامان، کوان و گێڵگەشت بدەمن شەمیم خاک نەجەف ڕەشت ڕخ ماڵ وە مەعجەر ڕووی ڕەوزەی حەرەم وەو زەریح بوو مشک شای ساحێبکەرەم ژەو دیار وەرگەرد وەی وڵاتەوە وەی کا و کوان خۆم خڵاتەوە دەم بدەم وەبان بەرزیی بایران جەوڵانگە و جێگەی وەحشی وایران سەرتاسەر زەمین، دەشتان وەشتان تار عەنکەبووت باف تافتەی ڕووی کەتان کوورەی گوڵاڵان کوولیدەی حووردان ساف بییەن ژە دەست موغەیلان زەردان تڵیفەی تێژاو تاف دەروینان مەیل بەستەن ژە مل میناگەردەنان مانوو وە سەرای سرنی و تووزەری مەر جەڵای جەڕار جەنگجووی جەوھەری تەخت پا چەمەن، پاک تەڵاکاری چەمەن چوی لەرزان ماک مرواری مالان وە مەقام موسیقا ماتن مووران ھەمتەزار، گشت چەمەڕاتن یە چ فکرێوەن نە نەزەر داری؟ زار زەمینەن بێ توو نە خواری مەر سابق ساڵان ژە یادت چییەن؟ کەلەباد ئیمساڵ فریادت نییەن بوورێ وە حاجەتێ قبلەگای حاجات وەختێ وارد بییەن وەرژە موناجات پەیاپەی پاچەی پاھەردان تەی کەر زھوور زقوم زمسان پەی کەر ھەم بوورێوە چوی ھەردەجاران وە ئیمداد مەوج مەتەر وەھاران کاوان کول حەسرەت تووشان ھا نە دڵ شایەت وەردارەن سەر ژە خاک و گل نەورووز گوڵ ھێمان غەلتان وە خاکەن ژەی جەھەت جامەی جەرگش چاکچاکەن جای سووسەن ھیچ جا دیاری نییەن وە تەختەی یەخبەن حساریی بییەن ئەسرین نەسرین، نەسرین نەوەردە ڕایەحەی ڕەیحان شەونم پەروەردە سووز سەر چیمان خەزاڵ تێ چەردە سەحن کافووری پووشان چوی پەردە باڵ بەڕەزا چەتر چویران سمسا، مەفرا، مەرتەع سویران شەوق شەقایق، زەردیی زەنبەق گوڵ گوڵڕێزان گوڵ، چەھچەھەی بوڵبوڵ گردیی گوڵاڵان بوو چوی قەرەنفڵ تەمامی تاسەی تووشان ھا نە دڵ تا کەی موجاور مڵک دامانی خەفتەی خاک پاک جای ئیمامانی ژەو وەختە کە باد خەزانخێز خێزا پەی عەزم خارەت خەزان ورێزا شەش مانگە مەردوم وە شەشدەر ماتن ژە جەور دەیجوور گشتیان کشماتن دەی سەد ڕەنگ جەوشەن جوویای جەنگ ڕەنەن سەبەق ژە سکین سەوھان سا سەنەن پریشەی پرشنگ شیر مێو میوە شەمس خاوەر شەوق ھوەر بییەن لێوە نەخڵ نمایان نوو خێزان نوو بەقاوشەجەر کشمیری ئاژوو نارنج ناربەن، ڕومان، ڕوتەب دوحەتوڕوتەب، زینەتوحەتەب گیز و گوڵ ئەرجەن، گوێژ و ئەوگەزوو توی وە توی دەڕە، ڕملە و ڕەزوو خەلیف و خەیمە، خەزاڵەی خوەشبوو عەلەف ئەروان، ئەرخەوان زوو باڵ وە شەفتاڵوو، شەن و دەن و داخ ژە جەور زھوور زمھەریر دوڕساق بەیوو میوەدار، سەمەر چوین خاسە چەنگ وەستەن ژە دەست ڕێزە ئەڵماسە ھەفت ڕووژ مەنەن ھوەر چوودە برج حووت بەردوعەجووز کییەن وە یانەی یاقووت ژە جەھد جەرەنگ جەھد سولج سەرد یەم کەردەن وە یاس، یەم بوان ویەرد مرخ زەڕین باڵ ھا نە برج قەوس قەوس بەردەن وە گیان گیانەوەران تەوس ھا برج ئاخر ئینتھای قەوسە ئەی ڕووژە زھوور زوقومەی پەوسە ھەفت ڕووژ مەنەن چوو وە برج ماھی ئاو لە کووساران ڕاھی بوو ڕاھی وەحش و تەیر و جن، مەل و مار و موور باڵدار و بێباڵ، زووردار و بێزوور چەمدار و بێچەم، چەمەڕای ڕاتەن عالەم مونتەزر نەفخەی نجاتەن کەلەباد ھەرچەن توو حەقێ داری نزیک ئەو کەعبەی پەروەردگاری دڵ ژە خاک پاک کەعبە نەمەنی بەڵێ ئەمانەت با وە جار ھەنی چوی باد شورتەی کشتی کیش یەم زەورەقنشینان دەراری ژە خەم شەماڵ بەخش ئەو شای شایان نجاتدەر ڕازقومەرزووق مەحبووبوبەشەر ئەسەدوڵڵا عەرش ئەر عالەم غاڵب زاھیر پێش ماچان بن ئەبیتالب حەق ئەو زاماد ئەحمەد موختار حارس سەریر ئەوج ئیفتخار کەلەباد ھانای باو بدەر ئەو کاو تویڵەدرەختان بێدار کەر ژە خاو ھەم وە زەوج زوڵف زارای بنت ئەو قەمەر ژە شەوقش مەدرەوشوو وە شەو وە دو گووشوارەی ھەفتەم عەرشە چوارگووشەی گەردوون ژێشان نویربەخشە وە حەق پەنج تەن ئال عەبایین ئەییمەی عیزام بوو عەشەر ئیسنەیین ژە مڵک دامان بازھەم ئاخێز کەر جەنگ یەخبەنان ئەڵماسەڕێز کەر بورقع کافووریی کوان پارە کەر تەختە یەخ نە ڕووی یەم ئاوارە کەر وەو ھەیھەیبزەن ھەڵاتە نەوەرد وەو غورشت ڕەعد ھەژبەران زەرد وەو تەیووم تەئم، تڵیفەی تووفت وەو شنەی شەونم شەجەر شکووفت شەو چەپاوڵ خان دەیجوور نە خاو کەر زەرف زورووفات مینا چەپاو کەر ئیسە خان دەی نە غافڵ خاوە کەلەباد ھانای وەخت چەپاوە وەخت سوڕنا، کووس و نەقارەوە ھەم وە ڕەعدبەرق ئاتشپارەوە دەی نە ڕووی دونیا سەدھەزار سەنگەر وەسەر کڵاوان ساختەن سەنگەر سەنگەر وە سەنگەر سامانش سا کەر جێگەی سەنگەرش وە سووسەن جا کەر شەوەخوێن وێنەی سەردار ڕەی کەر خەیمەی خەزەوش وەبان نەی کەر خەیمەی ئەبیەزش کول بێقیمەت کەر سەنگەر وە سەنگەر سولج ھەزیمەت دەر سەحرا و سەرزەمین وەیەک جا ساف کەر کوان و کاوان گشت خەزراباف کەر سەو سدات بەیوو وەسەر کڵاوان ئاژیر کەر ئاشووی کەمەند کاوان تویز و تەئم یەکسەر ژە زەمین بار کەر بار خەم ژە قەڵب خەمداران تار کەر ھەم ڕووح ڕەبیع ژەنوو تازە کەر سەوزیی سەر چیمان بێ ئەنازە کەر بوڵبوڵان ژە شەوق گوڵان شەیدا کەر گوڵان ژە دڵەی گوڵ ھووەیدا کەر شەماڵ تورکەمیر دەخیلەن وە توو ڕووی موراجعەت باز بکەین ژەنوو ++++++++++++++++++++++ سەرناو: بێ عبادەتم ھەرچەن من بەندەی بێ عبادەتم عابد خام عەمەڵ عاسی عادەتم بێ داد و دەھش خەتاکردارم لەیسە لوقمەی لەحم لاشەی مردارم ناخاڵسوقەڵب غەلیزتینەتم نموونەی نفرەت، کیسەی کینەتم دەس وە کار نیک، نەکەردەن یاریم زوان و گفتار ناباوەن جاریم ئەو عەھد ئەحباب ناموافقم مودامەن وە عشق، مەجاز عاشقم یەوم حەشر عامڵ بێ شەرم و حەیام ئیجازەت وە ڕای پاکی نەدێ پام ھەم دز ھەم دەغەڵباز ھەم بەخیلم وە کفەی عوسیان ئەعماڵ سەقیلم غەرەز یە گشت عوزر، کردارەکەمیمن ئەجر ئیشتبا خاتر جەمیمن موتمەئنوقەڵب تووم قایم گرتەن مەزانم لوتف وە ئەمیر شەرتەن ئەوشەو محەممەد وە معراج بەردی وە یەدوڵڵا خەیب شەرتوەنش کەردی واتی وە نامت ئەسریان وە چەو ڕووی مەحشەر ڕووی بێجورمیت ئەوشەو چەن خەتاکاران کفرانی عاسی عاری ژە ئاداب ڕای خوداناسی فاجر فاعڵان، فرە گوناھان ھەمیشە جوویای قەتڵ و زناھان بوەخشم وە حەجر حوجرەی معراجت وە ڕای ڕەسوول ڕایەگەی ڕاجت ھەور ڕەحمەتت ئەوسەر بەراری شرووع کەین وە مەتەر بەخشایش باری بارش کەین وەبان گیان سرشتم بشوورین ئەوراق گوناھان گشتم مەر ژەی یەمانی مەرحەمەت مایە ژە ئەمتار ھەور بەحر بی پایە بشوورین جامەی زەیل زونووبم موتەھھەر بوو جیب جامەی جنووبم ++++++++++++++++++++++ سەرناو: یاران یەکڕەنگ یاڕەب باز وە حەق یاران یەکڕەنگ وەقتێ عزراییل گیان لێم مەکێ تەنگ نەفەس تەنگ مەیوو وە چاڵ تینیم ڕووی مەنتق نە چای تەنگنای بینیم وەقتێ سەکەرات مەرگم ھا نە کار ماچان گیان کەنن تەڵخە وە ئیجبار تەڵخی سەکەرات، ھەم وشار گووڕ تەنگی، تاریکی، خەمووشیی قوبوور ھووڵ قیامەت، نەفخەی بانگ سوور ڕووژ وا نەفسا، لە یەومەالنوشوور سواڵ و جواو نەکەرن چەنەم فەیزێ ژە فەزلەت ئیحسان کەر وەنە ئاسان کەر عەزاو یەک شەوەی قەورم مونکەر پەی سواڵ بکەری سەورم نەکیر نەکەری نوکتە گیری لێم وە حەرف ئەعراب تەشخیس نەدەی پێم ڕەدنویس ڕەد بوو ژە ئینتقامم ماڵک دووزەخ فەرمووش کێ نامم پاکا وە حورمەت خاک پای پاکان خاک پای پاکان ئەولیای خاکان شاللە شەرارەی دووزەخ نەوینم ڕەھڕەو بوو بەھەشت بەیوو وە بینم تورکەمیر نە تورک و نە عەرەولەفزم کورد کەم سەواد حافزەلحەفزم ژە جەور ئافات زەمانە مەحوم ھەم خەت ناقابڵ ھەم سوخەن سەھوم یە ئیستدعامەن ھەر کەس بخوانوو پەس سەھو و خەتام ژە وێش نەڕانوو ھەر کەس بخوانوو نەقسێ ژە فەردم سەھو و خەتا وەم نەکەرن مەردم ++++++++++++++++++++++