شاعیر: وەلی کتێب: دیوانی وەلی دێوانە سەرناو: ئەرۍ هەی تووڵ نەی سەبارەت: هێنانە سەر ڕێنووسی هۆرامی: ئاکۆ مارانی ئەرۍ هەی تووڵ نەی، ئەرۍ هەی تووڵ نەی ئەرۍ هەی نەونەمام قامەت تووڵ نەی ئەر هەی دیدەمەست چەم پیاڵەی مەی سزای تۊ تا چەند سەبر من تاکەی ‌ ٭٭٭٭٭ ‌ ئەرۍ هەی شیرین قامەت ئەر ستوون رەژیدەی قودرەت کارساز بۍ چوون منت کەردەن (قەیس) سەرگەشتەی مەفتوون ڕەنگ زەرد و زایف بەتەر جە (مەجنون) مەگېڵوون هەردان وە جەستەی پڕ وەی سزای تۊ تا چەند سەبر من تاکەی ‌ ٭٭٭٭٭ ‌ ئەر هەی نەونەمام تازە ڕەسیدە سەروەناز سونع (سانع) کەشیدە جە دووری باڵات ئەی بەرگوزیدە هەر دەم مەواڕۊ هووناو جە دیدە شەوان تا وەڕۊ مەناڵوون چون نەی سزای تۊ تا چەند سەبر من تاکەی ‌ ٭٭٭٭٭ ‌ قەسەم بە توغرای زوڵفی چین چینت بەو وردە خاڵان سیای موشکینت ئەر باوڕ داری (زڵېخا)ی شانی بە ئایەی کەلام حەق ڕەببانی بەهەشت ڕۊحم بی وە تۊفانی جە داخ باڵات حوور ڕزوانی بە وېنەی مەجنوون هەردان کەردم تەی سزای تۊ تا چەند سەبر من تا کەی ++++++++++++++++++++++ سەرناو: ئەی دڵ وە سەنگ بای سەبارەت: هێنانە سەر ڕێنووسی هۆرامی: ئاکۆ مارانی ئەی دڵ وە سەنگ بای، ئەی دڵ وە سەنگ بای ئەی دیدە کۊر بای، ئەی دڵ وە سەنگ بای ئەی (زوان) لاڵ بای ئەی خاتر تەنگ بای ئەی (تەن) تاویای ژار فەرەنگ بای ئەی (گۊش) نەژنەوا هەر یەکجار کەڕ بای ئەی کەڕ وە غەزەب باد سەڕسەڕ بای ئەرۍ تاڵەی من غەزەب وارۊ لېت ئەرۍ بەخت من تەوەن وارۊ پېت ئەی فریشتەی من وە فەرمان حەق فریشتان عەرش شەقت کەران شەق ئەی ئیقباڵ من هەر سەرنگوون بای سەرنگوون نە قەعر ئاب (هاموون) بای وېم بە وېم واچوون بە کۊی زوخاڵ بای تەن نە غەرق بەرق فەنا پاماڵ بای چەند ساڵەن کە ڕەنج ڕیازەت بەردم هوون زووخ زام ڕیشەی دڵ وەردم ئاخ و داخم بۍ شەوان تا وەڕۊ بوینۊ باڵای لەیل عەنبەر بۊ خاو مەرگم بی، خاوم کەردە بۍ دیدەم نە خاو بۍ (شەم) ویەردە بۍ ++++++++++++++++++++++ سەرناو: بایەقوش ناڵان سەبارەت: هێنانە سەر ڕێنووسی هۆرامی: ئاکۆ مارانی بایەقوش ناڵان، بایەقوش ناڵان تۊ هۆ کېشەنی من هەر شەو ناڵان من خېڵ شادیم شەخسێ کەرد تاڵان تۊ چېش پېت ئامان هام دەرد ساڵان ناڵەی من جە سۊک سەودای ئەو یارەن دڵم جە دوری ئەو بۍ قەرارەن من (پەروانە)ی شەوق (شەم) جەماڵێکم کوشتەی نیگای ناز سۊسەن خاڵێکم تۊ شەوان تا ڕۊ بانگ هۆهۆتەن دەردەکەی دووری زامەت جە کۊتەن من سفتەی سۊزان شۊڵەی ئەو نوورم بە ڕۊ هەراسان بە شەو (دەیجوور)م تۊ داخ هجران کېت نە دەروونەن چوون من سەرگەردان جەستەت زەبوونەن من موبتەلای دەرد مەست مەفتوونم جانشین جای (قەیس) مەجنوونم تۊ جە عەشقی کۍ وێڵی و دېوانە؟ شەوان بېداری نە جای وېرانە خۆزگە پېت سەد جار دەردین دڵڕېش وە جەستەی من نیت جەور و جەفا کېش تۊ هەر نە خەیاڵ جای وېرانانی بۍ باک و لاقەید تیر و تانانی درېغا منیش وەی گشت داخەوە وە داخ ئەو شەم شەو چراخەوە شەو خەریک کونج جای ماتەم بېیا شەوانیچ نە بەزم شادی شەم بېیا ++++++++++++++++++++++ سەرناو: بېزیای هۊزان سەبارەت: هێنانە سەر ڕێنووسی هۆرامی: ئاکۆ مارانی بېزیای هۊزان، بېزیای هۊزان ها بیم وە مەجنوون بېزیای هۊزان ئەگەر وە ئەو زام بېیان دڵسۊزان مەگەر نە هەردەی (نەجد)م بدۊزان ئەر یاران یەکێ ئەو یادم ئاران یا هەم جە هەردان یا جە کۊساران هەر جایێ مەقام ماوای مەجنوون بۊ مەنزڵگەی مەجنوون مات مەحزوون بۊ ئەو مەنزڵ مەقام ئەو مەسکەن جامەن ئەو ماوا و مەکان یۊرت ماوامەن جە هەر جایێ خاک زەمین پڕ نەم بۊ جە هەر کۊ کۊمەی وەحشیان جەم بۊ ئەو جا جای سەیلان گریان منەن ئەو کۊمە کۊمەی دیوان منەن هەر سەنگێ جێگەو دەس یارم بۊ یاران هەر کەس یار غەمگوسارم بۊ ئامانت هەواڵ من بپەرسان جێش مەر ئەو بواچۊ حاڵ وېڵیم پێش ئەر بەی نشانان نشانم نەبۊ ئاڤاری جە یوورت وېرانم نەبۊ تاقی بزانان بۍ شەرت و شوونم بۍ سەودا جە فکر سەودای مەجنوونم ++++++++++++++++++++++ سەرناو: جەو ڕاگوزەردا سەبارەت: هێنانە سەر ڕێنووسی هۆرامی: ئاکۆ مارانی جەو ڕاگوزەردا، جەو ڕاگوزەردا یەک ڕۊ جە (لېلاخ) جەو ڕاگوزەردا دیم (شەم) خەفتە بۍ جە سوب سەحەردا ئەگریجە و زوڵفان پەخش بۍ وە بەردا ئەگریجە و زوڵفان بووک تاووس باڵ پەخش بۍ نە دەور گۊنای گوڵ میساڵ منیش پەی ئیحسان ئەوسا جەو دەم دا ئەگریجە و زوڵفش شانام وە هەم دا ئاوەردم پەی وېم وە دەوان دەو زانام سووڎش هەن پەی بۍ خاوی خەو فدای نەسیم بام عەتر شەم پېش بۍ ئەم شەو زامانم یەک یەک ساڕېژ بۍ نەسیم ناوەردای دەوا پەی دەردم بۍ شەک جە دوری ئەو من مەمەردم ++++++++++++++++++++++ سەرناو: جەی شۊلەی (شەم)ـە سەبارەت: هێنانە سەر ڕێنووسی هۆرامی: ئاکۆ مارانی جەی شۊلەی (شەم)ـە، جەی شۆلەی (شەم)ـە ئەی بارەکەڵڵا جەی شۊڵەی (شەم)ـە جەی نوور مونیر چەرخ چوارەمە جەی شەوق جەماڵ مای دوو هەفتەمە جەی تاق میحراب ئەبرۊ کەمانە جەی مەودای موژگان مەست قەترانە جەی سیم (ئەنف) ئەلف نگارە جەی گۊنای گوڵبېز گوڵ و گوڵزارە جەی زوڵف کەمەند دڵان پېگیرە جەی حەڵقەی تەناف گېسوو و زەنجیرە جەی لەعل لەبان پڕ جە گەوهەرە جە ڕاز ڕازان ڕېزەی شەکەرە جەی چای زەنەخدان شېوە شیرینە جەی (زنج) زیبای تۊپ زێڕینە جەی مینای بلوور مەملوئـ جە بادە جەی ساقی گەردەن سوراحی سادە جەی نیم نیگای ناز ئەو نازفرۊشە جەی گۊشواران ئاوېزای گۊشە جەی جفت قەندیل چەمان جە نوورە جەی سەدر سینەی سفید بلوورە جەی سام سەنگین ئی سام سەنگینە جەی (ساعد) سیم پەنجە ڕەنگینە جەی ڕام خاو ڕەفت غەزاڵە جەی (کەتف) و (کەمەر) ئاهووی بەرماڵە جەی (چەم) غەزەب شیرین نگارە جەی (ناف) مشکین ئاهوو تەتارە ڕوو تەرح تەسویر سەنعان کەرد جە دین وەڵڵا مەر شېوەی گوڵ ئەندام چین چەن ئەییام سەردار سەوڵان تەڕ بۊ ئەسپەردەی ئیمام زامن خەبەر بۊ ++++++++++++++++++++++ سەرناو: چراغم ئاوان سەبارەت: هێنانە سەر ڕێنووسی هۆرامی: ئاکۆ مارانی چراغم ئاوان، چراغم ئاوان سەرزەمین وە زەوق دین تۊ ئاوان باڵات سەنگەرچەی نەوتووڵ ساوان ساوای گوڵستان (جەننەتو ئەلماوان گېسووت بەڕەزای پەخش پای کاوان زوڵفت ئەگریجەی باڵ (بەت) ئاوان یا چوون چنووران نە سەر کڵاوان چابووکی وازان نە دەور چاوان دیدەت چوون دیدەی ئاهووی بەر تاوان گۊنات گوڵ غونچە جە نۊ شکاوان لیمۊت گوڵ وەدەم هېمای نەیاوان نمناکەن وە عەتر شەوبۊی شەتاوان خاڵ نوختە سۊسەن پای خورەتاوان من جەو خاڵە دەرد مەجنوون پېم یاوان نەمام نەوخېز نازدار باوان تۊنی شای سۊسەن نە سەر سەراوان هیچ کەس نزاکەت نازت نەتاوان هەر یەک من نەبۊ شای چەم سیاوان من وېڵم پەی تۊ سوب تا خۆرئاوان کاوان، کڵاوان، گشت وە من ئاوان جەوساوە وە نېش نیگای تۊ کاوان شەوان حەرامەن جە دیدەم خاوان شەو تا ڕۊ چەنی بەخت وېم داوان جام هانە سەر فەرق قوللـەی کڵاوان فدای دیدەت بام شای چەم سیاوان ڕەحمێ کەر وەحاڵ بەندەی بۍ تاوان ++++++++++++++++++++++ سەرناو: چراغم بی ڕام سەبارەت: هێنانە سەر ڕێنووسی هۆرامی: ئاکۆ مارانی چراغم بی ڕام، چراغم بی ڕام فەڵەک بۍ مەیلەن، باوانت بی ڕام تۊ (لەیل) قەدیم من (قەیس) ئەییام چوون مەبۊ حاسڵ عومرم وا بە کام ئەر وە سەر رازین سەر نە پاشانم گیان وە سەر توفەیل خاک ڕاشانم ئەر ماڵ مەسۊزان من بۍ ماڵەنان مەجنوون موفلس خەم خەیاڵەنان غەیر جەسەودای عەشق دین تۊ دیدەم ڕابەر نیم وە هیچ ئەی بەرگوزیدەم ئەر وەلای حاکم داد وېم بەروون داد و بېداد جە دەست باوانت کەروون تەرسوون حەکایەت (نەوفەل) بڎۊ سەر تۆ شاد وە باوان من هەر دەربەدەر ئەر نا گاڕۆێی نە کۆچ خېڵ دا وېڵ بای وە ماوای مەجنوون وېڵ دا هۊردارووت بە ڕووت بەو جامازەوە بەو جاماز خاس پڕ جیازەوە مەترسوون کە نام نیکیت نەنگ بۊ جەو بابەت زووان با بۊت لەنگ بۊ قەوم و قەبیلەت گشت بەدنام مەبۊ من جەوان بەتەر ڕیسوای عام مەبۊ ئەر سەد بۍماڵم بۍپارە و بۍپووڵ من یانە هیچ کام نەدارۊ قەبووڵ هەر تا زندەنان جە ڕووی سەر بیسات دایم وە مەیلت مەکەرۊ قنیات خۊفم هەن جە جەور چەرخ بۍ ڕامی پەیدا بۊ پەرېت (ابن سلام)ی ئەو سا دووبارە زامم خەتەر بۊ ئی داخېچ وە بان داخان تەر بۊ ++++++++++++++++++++++ سەرناو: چراغم نە سەر سەبارەت: هێنانە سەر ڕێنووسی هۆرامی: ئاکۆ مارانی چراغم نە سەر، چراغم نە سەر هەر من نیم سەودای عەشق تۊ نە سەر قیبلەم گشت عاڵەم جە من زیادتەر نە سەودای عەشقت وېڵەن دەربەدەر وە هەر جا مەشۊن هەر باس تۊ بۍ هەر کەس دیم نە فکر هەراس تۊ بۍ نامت نە دەفتەر دڵبەران تاجەن شاهان حەسرەت مەند، گەدا موحتاجەن چەن موسڵمانت وەناحەق کوشتەن نیگات نە جەرگ چەند بۍ دڵ نیشتەن چەند موڕشید شەیدا، چەند سۊفیان مات ماتن نە سەودای عەشقت گشت خېڵات (فەقی)ت رسوا کەرد، (مەڵا) سەرگەردان (دەروېش) دڵڕېش وېڵەن نە هەردان پەروانە دەستوور بوڵبوڵ شەیداتەن دڵەی دەردەدار هەر نە سەوداتەن قیبلەم چوون تەسویر تەرسای جام جەمین شېخ (سەنعان)ت وەرگەڕا جە دین خوداوەند ئەو ڕۊ حوسنێ وە تۊ دا سۊفیان ساف گشت دا وە کۊدا جە چەمەن هەی داد، نە سەحرا هەی ڕۊ داد و بۍ دادەن گرد نە دەس تۊ نە خېڵان غەوغا، نە شاران شۊرەن هەر کەس دیم هەر دیم تۊشەش زەروورەن ئەر فەرهاد ئەر قەیس بزانان خەبەر دووبارە جە خاک (ئەڵحەد) مەدان سەر مەیۊن وەی غەوغای قیامەتەوە وە سەیر باغچەی ئیقامەتەوە تاکە زندەنان شای شەم جەمینم دېوانە و غەمبار دڵ ماتەمینم ++++++++++++++++++++++ سەرناو: چۊڵ نشینە خۆم سەبارەت: هێنانە سەر ڕێنووسی هۆرامی: ئاکۆ مارانی چۊڵ نشینە خۆم، چۊڵ نشینە خۆم چوون (قەیس) مەجنوون چۊڵ نشینە خۆم بەخت سیاوشووم دڵ خەمینە خۆم مەحرووم دیدار دنیا و دینە خۆم ئەرامەندەی دوور بۍ دیانە خۆم ڕەفیق وەحشی وېران یانە خۆم سەرسام سادا زەدەی دېوە خۆم پا بەست زەنجیر مەکر و ڕېوە خۆم دوورکەفتەی وەتەن هەراسانە خۆم مەحرووم مەجلس گشت خاسانە خۆم سەر تا پا سفتەی کورەی نارە خۆم دڵ پارەی قوللاب نېش و خارە خۆم قامەت خەم زەدەی ڕیسوای عامە خۆم شەیدای بۍ هۊش عەقڵ و فامە خۆم وە تیر تانەی ناکەسانە خۆم دوستاخ هەردەی کوردستانە خۆم مەحبووس زەنجیر خەیاڵانە خۆم مایەی فکر و هۊش وە تاڵانە خۆم ڕوو زەردی دیوان هام سەرانە خۆم گیرۊدەی مەینەت دڵگرانە خۆم بۍ قەدر و قیمەت جە لای (ناس)ە خۆم (تەن) لوخت و عوریان بۍ کراسە خۆم گیرۊدەی فەرەنگ تازە دیلە خۆم کەشتی شکستەی بەحر (نیل)ە خۆم مایەی لاو بەردی بۍ هاوماڵە خۆم دڵ سیاو قەقنەس کۊی زوخاڵە خۆم شەرمەندەی عەشرەت سەرئەفکەندە خۆم ڕوو سیای دەرماڵ خودا بەندە خۆم ++++++++++++++++++++++ سەرناو: خەسرەو خەیاڵێ سەبارەت: هێنانە سەر ڕێنووسی هۆرامی: ئاکۆ مارانی خەسرەو خەیاڵێ، خەسرەو خەیاڵێ ئاخ پەی خان خاس خەسرەو خەیاڵێ ساحېب سپاوسان دارا ئێقباڵێ موهەییا نە گەنج خەزېنە و ماڵێ بەخشەندەی بۍ باک کۊی کەرەم بەیا ساحېب شەوق و زەوق دڵ بۍ غەم بەیا با ماوە شکار سەر دیاران دا وە ماوای مەجنوون ڕۊزگاران دا بدیا وە جەستەی خەم پۍ وارام دا وە کۊمەی دیوان وەحشی سارام دا وە سەیل ئەسرین دیدەی تارم دا وە دەرد دەروون ئەندۊبارم دا وە عوریانی (تەن) تەنیای تاکم دا وە سەنگ باڵین خەفتەی خاکم دا وە سەرگەردانی سەحرای چۊڵم دا وە عاسا و کەشکۊڵ پۊس کۊڵم دا وە ئاه و ناڵەی شەوان تا ڕۊم دا وە زایەڵەی سەخت شین بۍ شۆم دا وە پەشېوی بەخت شوومی چارەم دا وە زوخا و زام جەرگ پارەم دا وە بڵېسەی بەرز گڕ تۍ بەستەم دا وە خەستەی خاتر خار جەستەم دا بەزەییش باما وە جەستەی حاڵم بزاناش کوشتەی کامین نەوهاڵم جە کېوەن خاتر خەستەم گرتەن خەم سفتەی سۊزانم چوون پەروانەی شەم سەرمایەی عەقڵم کۍ کەردەن غارەت کام دڵبەر بەردەن وە یەک ئیشارەت بەڵۍ ئەو خەیاڵ (نەوفەل) نە دڵ بەرد گیان وېش هیلاک ژار قاتڵ کەرد نەکەردا ئەو فکر ناوەردا نە دڵ نەشیا نە سەودای خەیاڵ باتڵ یا وە گەنج و ماڵ یا وە زۆر وېش شاد کەردا خاتر دېوانەی دڵڕېش بکەردا هیممەت چوون خان (حاتەم) (شەم) واسڵ وە من، من واسڵ وە (شەم) هەر چەند مەوینوون نەی ڕۊزگاران کەس نېیەن دڵسۊز سېیا ستاران مەر هەر خوداوەند گوشایەندەی بەخت ڕەها بدۊ بەخت من نەی بەند سەخت وەرنە ئی بەندە زەنجیر پامەن تا مەردەن چوون قەیس وا حەسرەتامەن ++++++++++++++++++++++ سەرناو: داخ وەبان داخ سەبارەت: هێنانە سەر ڕێنووسی هۆرامی: ئاکۆ مارانی داخ وە بان داخ، داخ وە بان داخ دەرد وە بان دەرد، داخ وە بان داخ جە داخ دووری شای بوڵەند دەماخ من جە گەرمەسېر ئەو شی وە لېڵاخ جەو پەی داخینم تا مەرگ سامان یانە باوانش ئاماوە دامان ئیم ساڵ نەو وەهار وەنەم (دەیجوور) بۍ پەی چی؟ کە دیدەم جە دیدەش دوور بۍ ئەو شی وە لېڵاخ چوون بۍ بەینەتان من مەندەن پەی دەرد سزای مەینەتان تەرسوون جە بازی بازاڕ گەردوون جە کەج نەردی چەرخ دەور دنیای دوون مەجنوون هاشت وە داخ سزای دەردەوە قاپی خەم نە بەخت فەرهاد کەردەوە یەک یەک هامسەران جە گیان بېزار کەرد ڕۊی ڕۊشن جە عەین دەردینان تار کەرد ئەو ئەردە وە بەخت قەیس و مەجنوون شەند بەرد بنچینەش جە بنیاد هۊرکەند مەتەرسوون جە بەخت منیچ بشانۊ سزای ئەو یاران پەنەم بنمانۊ ئېدیچ وە قسمەت (ابن سلام)م بۊ من وەی دەردەوە دەور دنیام بۊ یا شائی نەردە نشانیم وە بەخت ئەر بۊ مەرگم بۊ وەرجە وادە و وەخت مەرگم خاستەرەن من جەو ژیانە جەی زندەگی پووچ شاد پەشیمانە ++++++++++++++++++++++ سەرناو: دڵ وەداخەوە سەبارەت: هێنانە سەر ڕێنووسی هۆرامی: ئاکۆ مارانی دڵ وە داخەوە، دڵ وە داخەوە ئیم شەو خەریک بۍ دڵ وە داخەوە جە داخ ئەو (شەم) شەوچراخەوە تا ئاما باوێ جە ئېڵاخەوە بادێ چوون نەسیم رەوزەی ڕزوانی قووەت بەخش ڕۊح سەد ساڵ فانی نەسیمی نەفەس (مەسیح)ئاسا بۍ تەسکین بەخش زام دڵ شناسا بۍ هەم شارەزای ڕای شای شەم جەمین بۍ دۊس پەروانان خاتر خەمین بۍ شەمیمێ جە عەتر زوڵف شەم ئەو شەو دانە ڕووی دەماخ پەروانەی بۍ خەو پەرسام ئەی نەسیم سوب خېز سارا دەماخ جە بۊی عەتر زوڵف (شەم) دارا دەوەندەی تېژباڵ سارا سەیرانی ڕاهنمای ڕەهبەر ڕاگەی حەیرانی یە چۆنت زانا من ئیم شەو مات بیم (پەروانە)ی پەشېو حەبس زوڵمات بیم کۍ شەمیم عەتر (شەم) نمانا پېت؟ ئەی بۊ ئاوەردی نەسیم کۍ دا پېت؟ وات: ئەی پەروانەی پەڕ سوختەی مەلال تەن خەستەی ئەییام خوڕڕەمی ویساڵ منیچ وېنەی تۊ مەعتووف (شەم) بیم جە بۊی عەتر شەم دەروون پڕ غەم بیم ++++++++++++++++++++++ سەرناو: دڵە ماتەم بۊ سەبارەت: هێنانە سەر ڕێنووسی هۆرامی: ئاکۆ مارانی دڵە ماتەم بۊ، دڵە ماتەم بۊ دەروونت وە دەرد کەسێ ماتەم بۊ تۊ مەینەتکېش بی، ئەویچ وە خەم بۊ تۊ چوون پەروانە ئەو وېنەی شەم بۊ پەی کەسێ جەرگت جە داخان کەیل بۊ تۊ (مەجنوون) خەیاڵ ئەو وېنەی (لەیل) بۊ داخ پەی کەسێ کېش داخمان دیار بۊ غەمخوار و دڵسۊز تا وە سەر یار بۊ نەک چوون شەم بۍ خۊف بۍ خودا و بۍ پیر ئەرها لە لېڵاخ ئەر جە گەرمسیر هیچ نېیەن وە قەید جەفا و جەور تۊ جەفا بەردەی سەخت سزای دەور تۊ دڵە ئامانت دەستم وە دامان بەیۆ مەکېشە جەفای بۍ سامان ++++++++++++++++++++++ سەرناو: دەلیل (شەم) نەدیت سەبارەت: هێنانە سەر ڕێنووسی هۆرامی: ئاکۆ مارانی دەلیل شەم نەدیت، دەلیل شەم نەدیت جە لېڵاخ ئامای سپی شەم نەدیت ئاهووی سەر قەتار نەوای ڕەم نەدیت نوور بینایی هەر دوو چەم نەدیت نازار باوان نازئەندام نەدیت شۆخ شیرین ڕەنگ شەکەرڕاز نەدیت شەم شادی پۊل پەروانان نەدیت خان سیاماڵ گشت خانان نەدیت خاوېر خاڵدار خوتەن خۊ نەدیت مایەی موشک ئەرزان عەنبەربۊ نەدیت سەر مەنزڵ نە سای سەهەندان نەدیت گوڵ غونچەی گوڵ بۊی گوڵ خەندان نەدیت (وەنەوشە)ی بۍ خەوش (سۊسەن) گوڵ نەدیت دەوای بیماران، دەوای دڵ نەدیت زامن نە بەرزی ئېڵاخان نەدیت وەتەن نە سۊرگەی سای زاخان نەدیت سەرسەوز و بۊرچین گوڵاوان نەدیت نازداران نە پای وەفراوان نەدیت (نیلووفەڕ) نە مەوج گوڵاوان نەدیت نەسرین نە پایەی شەتاوان نەدیت (بەڕەزا)ی تاشان سەرشاخان نەدیت جەبین شۊڵەی شەوق چراخان نەدیت سەرقەتار ڕەم ئاهووی چین نەدیت غەزاڵەی خوتەن نە ماچین نەدیت شاباز شاهین (شیروانی) نەدیت سوراحی بېگەرد دیوانی نەدیت گوڵەندام شېوەی لەیلاتەرز نەدیت سەردار ڕەندان باڵابەرز نەدیت شای کەمەند وە پېڵ عوزرا تەور نەدیت (هلال) کامڵ گۊشەی هەور نەدیت دەلیل ئامانەن قبلەی من نەدیت هەم ڕۊح هەم ئیمان دنیا و دین نەدیت دەلیل ئامانەن ئامای جە لېڵاخ قیبلەکەم نەدیت بەیۊ بۍ دەماخ دەلیل ئامانەن موژدە بدەر پېم حاڵات قیبلەم ئیزهار ببۊ لېم بزانووم قیبلەم وە شادی نیشتەن سەر تا پاش وە نوور نەو (سوەیل) ڕشتەن مەیل من پۑشەن ئەو شیرین شېوە وەی تەور من پەی ئەو شېت بووگم لېوە یام خۊ نامەکەی بېشەرتی وەندەن وە تەحقیق دەندان دۊستیش کەندەن مەزانۊ هەم شەرت وەرین شکەستەن ئەساسەی ئەسباب بەین نۊش بەستەن سەردی ئېڵاخان مەیلش کەردەن سەرد سەردش جەو ئیقرار چەنی ئېمەش کەرد بەین نۊش بەستەن دنیاش بە کامەن مەیل و مۊبەتش (ابن سلام)ەن بەشق ڕای ڕاسان دەلیل یە ڕاسەن ئەر ڕاسەن جە من بېزاریش واسەن ڕاس بواچە پېم تا دڵنیا بام قەیس ئاسا عەوداڵ دەور دنیا بام ئەگەر بزانووم جە من ویەردەن ئیقرار کەردەی وېش بە جا ناوەردەن منیش وە تەحقیق مەویەرووم جە ئەو دەمێ شیم نە خاو ئەوم دی نە خەو چونکە شەرتی وېش نەبەرد تا وە سەر چەنی ڕەقیبان وېش کەرد وە یاوەر پەی من شەرت نېیەن یەک شېوەی خاسی ساحېب شەرت و شوون یەک مودبرماسی شەرت و وەفاش بۊ چەنیم تا وە سەر بەینش درۊست بۊ تا وە ڕۊی مەحشەر جە من زیادتەر مەیل نەدۊ وە کەس کلید گەنجش نەدۊ بە هیچ کەس دڵ چەنی هیچ کەس نەکەرۊ پابەند هەر ڕۆژێ کەسێ نەکەرۊ پەسەند تا نامەی خاسیش گشت کەس بوانۊ ڕەقیبان بۍ فەهم هەرزەش نەزانۊ ئەبۊ بە ڕیشخەند هامسەران وېش تیر تانەی تاڵ دایم نەدەن لېش وەفاش تا سەر بۊ چوون وەفاداران وېش نەکا وە قەڵب ناڕەوای شاران جە یەک بەدەن بۊ ڕۊحش چەنی من ڕیشەی نەخڵ عەهد نەکنیۊ جە بن بەڵکم جە ئەلتاف جەمین جامش جە بېخ شەوبەند خەیاتەی خامش (ڕەزا)ی بېچارەی دېوانەی دڵڕېش خەڵاس بۊ جە دەست جەفای ئېش و نېش ++++++++++++++++++++++ سەرناو: ڕیسوای زەمانەم سەبارەت: هێنانە سەر ڕێنووسی هۆرامی: ئاکۆ مارانی ڕیسوای زەمانەم، ڕیسوای زەمانەم (قەیس) قەدیمی ڕیسوای زەمانەم (پەروانە)ی پەشېو سەحرای وېرانەم عەبداڵ بەڕگېڵ بېزار جە یانەم (جوغد) خانە چۊڵ شەوان بۍ خاوم تەن تەنیای مەلوول دیدە لېڵاوم هەراسان نە دیەی دیدەی یارانم دیدەوان دەیر سەر دیارانم بېزار جە زامەن بېزیای دۊسم شەو تا ڕۊ نە فکر کەدو کەڵپۊسم عەسای خەم وە دەس (خەمر) خەم نۊشم لېوەی لەنگ لاڵ لۊنگ خەم پۊشم سزای ستەمکېش سیا ستارەم (فەرهاد) کۊکەن مەنزڵ مەغارەم ڕای شەش دەر وە بەخت سیا دەربەستم پەشیمان جە گشت پەشېو حاڵ جەستەم جفت چەمیدە چەرخ چەپ گەردم دەردەدار سەخت دوور جە هامدەردم (تەن) سیا چڵۊسک سەردیارانم سفتەی شەماڵ گڕ کۊی ئایرانم دڵ ئازوردەی زوڵم زەمانەی زشتم چەرخ کەمان پشت شکەستەن پشتم شەو دیدە بۍ خاو ڕۊ بۍ قەرارم گرفتار جەور ڕۊی ڕۊزگارم بېزیا جە ژین ڕازی وە مەرگم سەد جار نېش خار هجران بە جەرگم چەمەڕای خېڵان ڕیسوای هۊزانم بە ئاهر عەشق شەخسی سۊزانم گرۊی وەحشیان بیابان گېڵم (قەیس) تانەکېش بینایی لېڵم دڵ پەروانەی عەشق شەم ڕوخسارێکم پېکیای پەیکان دیدەی یارێکم (حاتەم) خەیاڵێ قاتەن نە بارەم بزانۊ وە حاڵ دەرد بېچارەم چوون نەوفەل بەیۊ نە ماوای هەردان باوەڕۊمەوە وە لای هام دەردان بەڵۍ جە وەسواس شەیتانی دوور بۊ چوون حاتەم خاتر خوداش مەنزوور بۊ گوشاد کەرۊ دڵ خەمناک خەستەم شاد کەرۊم بە وەسڵ ئەو ئاوات وەستەم مەر مەولای غەمخوار بسازۊ کارم وەرنە بەردابەرد ڕۊی ڕۊزگارم ++++++++++++++++++++++ سەرناو: زوهرەی سوب سەڵات سەبارەت: هێنانە سەر ڕێنووسی هۆرامی: ئاکۆ مارانی زوهرەی سوب سەڵات، زوهرەی سوب سەڵات زوهرەی وەقت ڕۊ وادەی سوب سەڵات پېش ڕەو خاوەر کۊگای خەم خەڵات هەرگیز نەوینی قیبلەی دوور وڵات تۊ خۊ نە زومرەی سەعد ئەختەرانی تەماشاچی حوسن پاک نەزەرانی فېشتەر نەزارەت وە ڕووی پاکانەن تەماشات وە شەوق شەرەفناکانەن هەر ڕۊ سوبح چارەی سافان مەوینی میوەی نۊ جە ڕەنگ پاکان مەچینی سیرەت و سوورەت تەتارانەوە وە نوور جەماڵ نازارانەوە تا خۆر نە ڕووی بورج بەرمەشۊ چوون تەیر نە گوڵباغچەی حوسن پاکان مەکەی سەیر هەرگیز مەوینی نوور دیدەی من شەم شادی و زەوق بەرگوزیدەی من نە ئەو جە زومرەی جەمین سافانەن شەم سۊی چراغ عېڵ جافانەن فیدات بام سەد جار زوهرەی وەقت ڕۊ تۊ بەو مەمانی ئەو بە شېوەی تۊ چوون نەکەردت سەیر ئەو مەلەک چارە تەماشای ئەو حوسن مەر وە تۊ عارە ++++++++++++++++++++++ سەرناو: سەنگ هەواران سەبارەت: هێنانە سەر ڕێنووسی هۆرامی: ئاکۆ مارانی سەنگ هەواران، سەنگ هەواران سەنگ سیاڕەنگ سفتەی هەواران مەلوول ماتەم پەس مەندەی یاران چوون من هام شەریک دەرد و پەژاران تۊ سەنگ کۆنی یە کام هەوارەن یە پەی کۍ ڕەنگت ئازیەت بارەن سفتەی سەودای عەشق کامین نەوهاڵی بۍ دەنگ بەد ڕەنگ مات مەلالی تۊ جە داخ کۍ سفتە سۊزانی پەس مەندەی هەوار کامین هۊزانی ڕاس واچە هجران کێت نە دڵ داخەن جە هجران کۍ بەرگت قەڵاخەن سەنگ وات سیابەخت ستەمکېش خەم (پەروانە)ی پەشېو دوور کەفتەی پای (شەم) مەر نمەزانی لېڵاویت لېڵەن نە ئی جا مەسکەن گوزەرگای خېڵەن یوورت چەراگای خېڵ جافانەن جای عەیش و نشات عەنبەر نافانەن هەوارگەی رەوېڵ خېڵ مورادیەن ماوای شەوق و زەوق زومرە شادیەن من هەوار شەم شای پەروانانم خان خاڵ خاسان سیا یانانم پاییز کۊچ خېڵ بیان وە دامان تەشریف باوەران وەی زێدو زامان من سفتەی ئەو شەوق شۊڵەی شەم چارەم داخێن ئەو نوور سەحەر ستارەم ئېڎ کە واتش پیېم سەنگ هەواران من جە ئەو بەتەر لاڵ بیم جە زبان زانام سفتەی شەوق ئەو شەم ڕوخسارەن داخدار داخ مای دەست ئەو یارەن منیچ جە هجران شای شەم ڕوخساران با بیم وە هامڕەنگ سەنگ هەواران تەن چوون سیاسەنگ هەوارانمەن پادشای خەم کېش خەم دارانمەن ++++++++++++++++++++++ سەرناو: شای سیایانان سەبارەت: هێنانە سەر ڕێنووسی هۆرامی: ئاکۆ مارانی شای سیایانان، شای سیایانان دەلیل شۆ وە لای شای سیایانان شەمع شەوانە بەزم پەروانان دەلیلەی قەتار دیدە قەترانان ئاهووی بێدی گېڵ سایە پەروەردە هەزارێ چوون من جە داخش مەردە واچە گۊشنەڎۊ بە حەرف ئەغیار من بەو شەرتەن کەردەنم ئیقرار سەر هەر نە سوودێ عەشقش بازیشەن دڵ هەر نیشانەی تیرئەندازیشەن پام بەو دامەوە هەر مەبۊ لەنگ بۊ خاتر وە نېش هجرانش تەنگ بۊ تا ڕېزۊم وە خاک ئەڵحەد سەرای گڵ شەرتەن دڵ وە ئېش زامش بدۊ چڵ ++++++++++++++++++++++ سەرناو: شەو بېدارانم سەبارەت: هێنانە سەر ڕێنووسی هۆرامی: ئاکۆ مارانی شەو بېدارانم، شەو بېدارانم ڕەفیق ناڵەی شەو بېدارانم جوغد جا نە سەنگ سەر مەغارانم یا هووکېش جەور ڕۊزگارانم پەروانە پەشېو سفتەی نارانم چوون قەقنەس زوغاڵ کۊی دەن دارانم سەییاد بۍ سوود سەر دیارانم سمکۊی لەنج عەشق ناز تەتارانم گیرۊدەی سەرچەنگ جەفای خارانم خار خەم نە جەرگ خار خومارانم پادشای گشت پۊل هجران بارانم وېڵ وادی گرد هەردەی هارانم هەراسان نە دین دیدەی یارانم مەجنوون بەڕگېڵ پای کۊسارانم هیچ کەس نەمەندەن جە غەمخوارانم بپەرسۊ هەواڵ وېنەی جارانم دیار دیارەنی مەینەت بارانم بزانۊ وە شین ئاهر وارانم دەردێ من گرتەن غەم گوسارانم مەرهەم جەی وەر قەیس ڕۊزگارانم جەی دەرد ساکن سەر دیارانم مونتەزر وە لوتف بینای کارانم ++++++++++++++++++++++ سەرناو: شیرین بەستەوە سەبارەت: هێنانە سەر ڕێنووسی هۆرامی: ئاکۆ مارانی شیرین بەستەوە، شیرین بەستەوە شیرین ئەساسەی سەروېن بەستەوە دەست ئاوەرد وە زوڵف سیادەستەوە پەخشان کەرد وە ڕووی دیدەی مەستەوە گوڵاو کەرد وە جام جەم ئیزهارەوە چوون توڕڕەی (تەیموور) وە تۊمارەوە پەرچەم وە پەرچین قەیچی کارەوە پەخش وە پێشانی خور ئێوارەوە ئەبرۊوان وە سەیف قەزاڕېزەوە وە دەور دیدەی ئاهوو بېزەوە موژگانش وە نېش سەودای نېزەوە ها وە هوون شای ئەو (پەروېز)ەوە ++++++++++++++++++++++ سەرناو: سەییاد نامت بام سەبارەت: هێنانە سەر ڕێنووسی هۆرامی: ئاکۆ مارانی سەییاد نامت بام، سەییاد نامت بام تۆ نامت چېشەن؟ فیدای نامت بام سەد جار وەسەرگەرد دەست و دامت بام ڕەحمەت بەیۊ پېم تا غوڵامت بام من پەروانەی وېڵ وادی وېرانەم مەجنوونی چۊڵگەرد ڕیسوای زەمانەم شەوان تا وە ڕۊ جە غەم دارانان ڕەفیق هامڕاز وەحشی سارانان عەبداڵ بەڕگېڵ بېدی مەکانم جەفا و مەینەتکېش زەردەی هیجرانم سزا و ستەمکېش غەم نە دەروونم هەردەی (تەبەس) گېڵ ئاوارەی توونم چەندېوەن جە دین شای شەم دوور کەفتەم سفتەی ئاهرناک ساتێ نەسرەفتم هەر وەحشی نە شکڵ شېوەی دۊسمەن ڕەفېقی هامڕاز عاسا و پۊسمەن من زەوقم وە دەنگ ناڵەی ئەوانەن قنیاتم وە دین دیدەی ئەوانەن دوور جە دیدەی دۊس من بەوان شادم تا ئەو ڕۊ گەردوون بدۊ مرادم ئەی وەڵەدەی شۊخ تۊ گرتەن نە دام جە شکڵ و شېوەی قیبلەی من تەمام نیم نگاش نە دڵ ناوک شانۊ دیدەش وە دیدەی قبلەم مەمانۊ فیدات بام سەد جار سەییاد سارا بەخشش وە بەندەی خەم پېدا وارا ئازادش بکەر ئامان جە دامت یە خەیلێ نەنگین مەبۊ پەی نامت ئەو وەڵەدەی وەحش ئازاد کەی جە دام ئینشاڵڵا جە دوو دنیا وېنی کام ++++++++++++++++++++++ سەرناو: تەیران تیژباڵ سەبارەت: هێنانە سەر ڕێنووسی هۆرامی: ئاکۆ مارانی تەیران تێژباڵ، تەیران تیژباڵ قازان قوڵەنگان تەیران تیژباڵ خۆزگە پێتان بۊ جەی ماواو مەحاڵ مەشدێ وە لېڵاخ بەند سەر ساراڵ مەگېڵان کاوکاو بەند لېڵاخان یوورت چەراگای بوڵەند دەماخان مەوینان وە چەم سیاماڵ خېڵ مشکین کڵافان کۊی کەتوون وە پېڵ پۊل پەری ڕەم تایفەی جافان نازک نازداران عەنبەربۊ نافان تەمام نازاران واشتەد کەژ وەدۊش دیدە مودبران بەرگ داراپۊش یەک یەک خاڵ خاسان خېڵ مرادی جە ئېڵاخ چەنی قیبلەم وە شادی مەگېڵان وە فەرق سیاماڵان دا مەدیان وە خېڵ سۊسەن خاڵان دا درېغ منیچ تەیر هەوایی بیام چەنیشان بەو زێد تا ڕاهی بیام چېگە تا ئەو زێد بنیشتام وە باڵ شاد بیام بەو زێد بەو ماوا و مەحاڵ تا قیبلەم چەنی پۊل ڕەوېڵان بدیام وە سەردەم تەتار خېڵان ++++++++++++++++++++++ سەرناو: قیبلەم خاوم بۊ سەبارەت: هێنانە سەر ڕێنووسی هۆرامی: ئاکۆ مارانی قیبلەم خاوم بۊ، قیبلەم خاوم بۊ ئەگەر وە بۍ تۊ یەک دەم خاوم بۊ ڕۊ جەفا و مەینەت شەو ئاراومم بۊ وە چنگ گیانکېش گلاراوم بۊ غەیر جە دین تۊ ئەر پەژارەم بۊ پەژارەی پڕ خەوف ڕای قەنارەم بۊ ئەر لادێ فکرت بەر کەرۊ نە دڵ جەرگم لەت لەت بۊ بە مەودای قاتڵ ئەگەر سیوای تۊ کەسێوەم فەرد بۊ سەر تا پام پەشتان ئالوودەی دەرد بۊ ئەر لەحزەی نامت فەرامۊشم بۊ یا سۊز سەودای تۊ خامۊشم بۊ زووانم پارەی تېغ ئەڵماس بۊ دەروونم لەت لەت گشت وە پڵاس بۊ دیدەم وە دیدەی مەست سێوەنگت ئەگەر یەک نەفەس نەشنەوون دەنگت مورغ ئەڕواحم جە تەن بېزارەن دنیا نە دیدەم زوڵمات و تارەن ++++++++++++++++++++++ سەرناو: قیبلەم ڕېش نەبۊ سەبارەت: هێنانە سەر ڕێنووسی هۆرامی: ئاکۆ مارانی قیبلەم ڕېش نەبۊ، قیبلەم ڕېش نەبۊ ئەر دڵ وە مەودای عەشقت ڕېش نەبۊ ئەر تەن بەڵابار مەینەتکېش نەبۊ ئەر دیدەم خار دووریت تېش نەبۊ ئەو دڵ سیاسەنگ ئەو دیدە تار بۊ ئەوتەن کۊنە کونج ماوای مەزار بۊ سەرێ سەراسەر نە سەودات نەبۊ گشت دەمێ نە گەرد خاک ڕات نەبۊ ئەو سەر بۍ سامان نە تەن جیا بۊ خامۊش غەڵتان خاک سیا بۊ پایێ نەکەرۊ ئامۊشۊ وە لات دەسێ نەکېشۊ شەو و ڕۊ جەفات ئەو پا گەستەی مار ئەفعی حەفت سەر بۊ ئەو دەستە مەجروح زامی خەتەر بۊ زوانێ نە زکر سەنای تۊ نەبۊ شەو و ڕۊ نە فکر دۊعای تۊ نەبۊ ئەو زوان بۍ نوتق هەر وە پڵاس بۊ ئامین بڕیدەی تېخ ئەڵماس بۊ من جە دووری تۊ شای شەم جەمینان هەر کاتێ زانای لاشەم مەوینان ++++++++++++++++++++++ سەرناو: قیبلەم شەم مەبۊ سەبارەت: هێنانە سەر ڕێنووسی هۆرامی: ئاکۆ مارانی قیبلەم شەم مەبۊ، قیبلەم شەم مەبۊ مەر هەر کەس چوون تۊ نامش (شەم) بۊ جەمینش چوون بەدر دووهەفتەم مەبۊ پەروانەش خەریک خار خەم مەبۊ * * * * *‌ مەر هەر کەس باڵاش سەوڵ ساف مەبۊ گېسووش پڕ جە عەتر موشک ناف مەبۊ سەردار ڕەندان ئېڵ جاف مەبۊ چوون تۊ بۍ مروەت بۍ ئینساف مەبۊ چوون تۊ شەکەر لەب غونچەدەم مەبۊ پەروانش خەریک خار خەم مەبۊ * * * * *‌ مەر هەر کەس ئەبرۊش چوون کەمان مەبۊ زوڵف و خاڵ سېوەنگ چەم قەتران مەبۊ وېنەی تۊ فیتنەی ڕووی زەمان مەبۊ وېنەی تۊ بۍ ڕەحم بۍ ئەمان مەبۊ بۍ شەرت و بۍ بەین مۊبەت کەم مەبۊ پەروانەش خەریک خار خەم مەبۊ * * * * *‌ هەر کەس پېشانیش پڕ جە نوور مەبۊ ساق و گەردنش چوون بلوور مەبۊ مەلایک تەلعەت نەسڵ حوور مەبۊ بۍ پەروا جە ڕای (خودا) دوور مەبۊ چوون تۊ دەلیلەی لوای ڕەم مەبۊ پەروانەش خەریک خار خەم مەبۊ * * * * *‌ مەر هەر کەس چوون تۊ لیمۊش کاڵ مەبۊ سینەی سەدەف تا بووم لاڵ مەبۊ ناف ناف غەزاڵ خوتەن ماڵ مەبۊ نازار باوان چاردە ساڵ مەبۊ چوون تۊ مۊبەتش مەردوم کەم مەبۊ پەروانەش خەریک خار خەم مەبۊ * * * * *‌ مەر هەر کەس وەش بۊش سا چوون لەیل مەبۊ موژانش نەگەرد سورمە کەیل مەبۊ هەزار کەس نە ڕاش سەر توفەیل مەبۊ ناشی و نەزانحاڵ هەر بۍ مەیل مەبۊ شەوقش بە وېنەی سپی شەم مەبۊ پەروانەش خەریک خار خەم مەبۊ ++++++++++++++++++++++ سەرناو: قیبلەم مەردەنم سەبارەت: هێنانە سەر ڕێنووسی هۆرامی: ئاکۆ مارانی قیبلەم مەردەنم، قیبلەم مەردەنم ئامانت فەرزەن وادەی مەردەنم نە حاڵات وەخت وەسیەت کەردەنم نە ئاکام سەخت گېیان سپەردەنم وەسیەتم ئینەن شای شەم ڕوخساران بی وە باڵینم چوون بەینەتداران بۍ خۊف و ئەندېش جە کەس نەکەری شەرم هۊردارە پەردەی حجابت بە نەرم نەپۊشی جەمین شەمس خاوەری بۊوە زانۊدا چوون ئەسمای پەری بنیشە وە بان باڵینم وە ناز بوانە سوورەی (یاسین) وە ئاواز زوان بە ڕېزەی شەکەر ڕازەوە دەنگ وە سەدای خاس وەش ئاوازەوە جەمین وە عەرەق بۊ گوڵاوەوە گۊنا و ئەگریجە و زوڵف خاوەوە جەو عەرەق نە دەور گۊنای مەهـ پارە جە سەر بتکۊ و بگنۊ وە چارە تا دیدەم جە سەیر دیدەی سیات بۊ نەزارە و نەزەر نازت زیاد بۊ گۊش هەم وە سەدای ڕېزەی ڕازت بۊ بەو سوورەی شەریف وەش ئاوازت بۊ ئەر سەد جار (قابز) سزا بدۊ پېم هەنی نیم وە تەنگ گیتنکېشان وېم ئەگەر بەو تەور بۊ ڕۊح ڕەوانم بیللا وە ئاسان بەرمەشۊ گیانم های چە وەش مەبۊ عومر و زیندەگیم نە خاک پای تۊ بکەردام تەسلیم ئەگەر وە تەحقیق سەد کۊ گونامەن ئینشەڵڵا بەهەشت هەشتەمین جامەن ++++++++++++++++++++++ سەرناو: قیبلەم مەلال بۊ سەبارەت: هێنانە سەر ڕێنووسی هۆرامی: ئاکۆ مارانی قیبلەم مەلال بۊ، قیبلەم مەلال بۊ دڵێ غەیر جە خەم خاڵت مەلال بۊ ئەو دڵ ئەر دانەی شەوچرای لاڵ بۆ تۊ خودا بازەش با وە زوخاڵ بۆ دیدەم دیدەیێ نەوېنۊ باڵات هەردەم نەڕژیۊ وە گەرد پاڵات ئەو دیدە دیدەی جەیر توندخېز بۊ تۊ خودا بازەش با سۊما بېز بۊ سەرێ وە سەر کەمان هەر ڕۊ شەوان سەر نەدۊ وە ئاستانەی تۊ ئەو سەر ئەر سەردار دەوران دوون بۊ تۊ خودا بازەش با سەرنگوون بۊ دەسێ دەس نەدۊ نە کەمەر پەیوەس نەشۊت نە گەردەن پەیاپەی دەس دەس ئەو دەسە ئەر دەس جەللاد مۊڕ بۊ تۊ خودا بازەش با بەستەی گۊڕ بۊ پایێ پەی پەیڕەو تۊ نەبۊ وە پا وە ڕای یانەی تۊ نەشۊ وە ڕاڕا ئەو پا ئەر پای پاک بەدر مونیر بۊ تۊ خودا بازش با نە زەنجیر بۊ قیبلەم با دەسم وە دامانت بۊ مەجزووب جە زومرەی غوڵامانت بۊ ++++++++++++++++++++++ سەرناو: کەلب کۊی یارم سەبارەت: هێنانە سەر ڕێنووسی هۆرامی: ئاکۆ مارانی کەلب کۊی یارم، کەلب کۊی یارم کەلب پاسەبان ئاسانەی یارم ڕەفێق هامڕاز دۊس دڵدارم خاک پات وە بان دوو دیدەی تارم تۊ خۊ نە وېنەی وەفاکېشانی غەمخوار دڵسۊز گشت دڵڕېشانی کەلب خانەزای باوان دۊسی دڵگوشای یاران مەجنوونی پۊسی مەزانۊ قیبلەم هەر وە دەست وېش پەروەردەت کەردەن تا نەبی دڵڕېش ئەگەر ئیشەڵڵا قەسد سەرت بۊ ڕۊ جە ڕۊ سزای بەد بەتەرت بۊ خەیاڵم نەبی جە وەفاداری تۊ جە ئاسانەی دۊس دەس هۊرداری سەبەب چېش بەی تەور هامدەرد دەردم جە باتی یاران گشت قەوم فەردم تۊ جە ئاسانەی دۊس دوور کەوتەنی چۆنەن قەرارت چۆن سرەوتەنی چۆنەن ئاراگېڵ وېڵ شارانی هەر موسافری سەر دیارانی سەگ وات ستەمکېش زەمانەی ناهاڵ (پەروانە)ی جەمین شۊخ (شەم) جەماڵ مەر لېڵاوەنی بیناییت کۊرەن مەر ڕەزای من بۍ یا دەست زۊرەن با بۊی (شەم) هەوای بەغدا شارش بۍ پەی پەس گەلەش من دەرکارش بۍ وە زۊر ئاوەردش هەر وە بۍ رەزا تا گورگان گەلەش نەکەران غەزا بە گوسفەندان با بۊی دۊستەن ڕەفێق هامڕاز عەسا و پۊستەن وەرنە جە کۊ بۍ وە بۍ بەهانە بگېرۊن جە بەر ئی بیابانە ئازیز بە فدای کەلب وەفادارت بام فرستادەی ڕای بەغدا شارت بام ++++++++++++++++++++++ سەرناو: گوڵەن، چەمەنەن سەبارەت: هێنانە سەر ڕێنووسی هۆرامی: ئاکۆ مارانی گوڵەن، چەمەنەن، گوڵەن، چەمەنەن وە مەیلت دیدەم گوڵەن، چەمەنەن وەهارەن، سەوزەن، ئاوەن، پای کاوەن هاژەی وەرواوان شاخەی شەتاوەن تەمەن، دووکەڵەن، گەردەن، غوبارەن فرمێسکەن، چەمەن، سەیلەن، فووارەن سەنگەن، کۊسارەن، سەرکوەن، هەردەن وەنەوشەن، شەوبۊن، گوڵەن، باوەرەن سەرعیەن، شەیدان، نەجدەن، مەجنوونەن فیراقەن، وەسڵەن، پیاڵەن، هوونەن ++++++++++++++++++++++ سەرناو: مەحبووب جافان سەبارەت: هێنانە سەر ڕێنووسی هۆرامی: ئاکۆ مارانی مەحبووب جافان، مەحبووب جافان مەحبووب بۍ عەیب تایفەی جافان سەرقەتار ڕەم عەنبەربۊ نافان سەرکېش ڕەوېڵ مشکین کڵافان ئاهووی مودبرماس مەکان نەهەردە چووزەی سونبوڵچر نەسا سڵکەردە خاوېر خاڵدار خەتاو خۆتەن ماڵ تەتار تایف شۊخ شیرین خاڵ وەتەن نە زامن سەربەرز لېڵاخ سەیر سەرکۊیان سەییادان و داخ چەرخ چەم سیاچەم چوست و چالاک پڕ شەیدای شکاردۊز چنگ و هووناو بڕ لاچین شەشدانگ سەحەر جە لان خېز شمقار تېژباڵ تەیر توند گورېز شەمع شا پەسەند گشت سیاماڵان نام تۊ نە بەزم خەسرەوان خوانان بەو شەوق جەمین شەم ڕوخسارەوە کېت نەدا وە دەم کزەی نارەوە؟ بەو قاش قەتران دڵ پۍ ئېشاوە ستوون یانەی کېت نەکېشاوە؟ بەو دیدەی سای سورمەسای سێوەنگ موژانت وە هوون کۍ نەکەردەن ڕەنگ؟ بەو نیم نیگای ناز بەو لەنجە و لارە ئاخر جەرگ کېت نەکەردەن پارە بەو باڵای نەوتووڵ وە نەورەستەوە بەو کۊکۊی کڵاف دەستە دەستەوە واچە دڵ کېت نەستانان وە زوور ئاخر یانەی کېت نەکەردەن خاپوور ++++++++++++++++++++++ سەرناو: وەڵامو نامەو ڕەنجوری سەبارەت: هێنانە سەر ڕێنووسی هۆرامی: ئاکۆ مارانی مەولای لاڵشناس، مەولای لاڵشناس مەولەوی ئەولەوی دانای لاڵشناس هەیاس دوڕناس ئەسڵ و نەسەب خاس نەژاد پاکان، «نظامی» قیاس «فیردەوسی طووسی»، «جامی» مڵک جام «خاقانی» خەیاڵ، «ئەنوەر»ی ئەییام «سەعدی» سوخەندان بەحر مەعانی «حافظ» (شیراز) «صائب» سانی بەتای بېهەمتای قەییووم بېچوون هەمتای تۊ کەمەن نە ڕووی دەور دوون شەوکەت خووشەچین پەیدای مەعناتەن عیسمەت نە ئەوساف سیفاتت ماتەن مەولانا «زەهیر»، «فارابی»ی دەور فوزەلای فازڵ نادرەی وەش تەور هەنی چەند شەعرای ئاسف نیشانان دەرس نە مەدرەسەی علم تۊ وانان غەواص موحیت دەریای عولوومی شیعر مەسنەویت، مەر «مەولای ڕوومی» تۊ شاڵڵا هەنی پایەت بۊ زیاد من چېشم کە نام من ئاری وەیاد غەرەز هەر ئېدەن بوزۊرگیت کەردەن نام بەندەی وېت وەیاد ئاوەردەن ئەڵبەت وېت وەحاڵ پەشېویم زانان جە ڕووی ئیلتیفات نامەت کیانان کەردەنت ئیزهار، مەولای کەرەم سەیل تۊ ساحېب لوتفی یەعنی من بۍ مەیل؟ من قەسەم وە زات ئەو کەس یەگانەن دایم نام تۊم ویرد زوانەن هەر چەند وە خدمەت تۊ ئاشنا نیم بەڵۍ جە فکرت ساتێ غافڵ نیم دڵ پەروانەوار جە شەو تا وە ڕۊ هەر هانە خەیاڵ وەسڵ و دین تۊ من کە هامتەرکیب عومرم نام تۊن نیشات زەینم کۊی کەلام تۊن نادیدە حوببت جا گرتەن نە دڵ هەرگیز جە سەودات دڵ نیەن غافڵ کەلامت سەرمەشق ئینشای زەینمەن نامت بینایی هەر دوو عەینمەن (لاتەشبیه) چوون «وەیس» رموودەی «ڕەسووڵ» هەر هام نە تەحسیل وەسڵت کەم وسووڵ نەوا بواچی جەو زامن دووریم دېوانەی بەندەی مەولای «ڕەنجووری»م ++++++++++++++++++++++ سەرناو: نازک بەدەن شەم سەبارەت: هێنانە سەر ڕێنووسی هۆرامی: ئاکۆ مارانی نازک بەدەن «شەم»، نازک بەدەن «شەم» نازک لارە و لەنج، غەمزە و ناز «شەم» نازک لەب شەهد، شەکەرڕېز «شەم» نازک تەبەسسوم قەند ئامېز «شەم» نازک گەردەن بەرز، باڵای بەرز «شەم» نازک سینە ساف سەدەف تەرز «شەم» نازک زوڵف دېز عەنبەرین «شەم» نازک ڕیزەی ڕاز شەکەرین «شەم» نازک قەوس قاش قودرەتساز «شەم» نازک باڵا سەوڵ سەرفەراز «شەم» نازک دندانان گەوهەردانە «شەم» نازک نەقش خاڵ لووتەوانە «شەم» نازک دوو بازوو و پەنجە و دەست «شەم» نازک ئەنگوشتان حەنابەست «شەم» نازک پېشانی پڕ جە بەند «شەم» نازک شېوە شۊخ شاپەسەند «شەم» نازک زنج زەڕ زەنەخدان «شەم» نازک شاماران وەبان شان «شەم» نازک دوو قەندیل قۊرەتمەند «شەم» نازک نازکی کەمەربەند «شەم» یاشا هەر شەم بۊ تەور شېوەش بۊ هەزار پەروانە چوون من لېوەش بۊ ئەسیر وە قەندیل شای نەجەفماڵ بۊ بسۊزۊ باڵاش جە زوبان لاڵ بۊ ++++++++++++++++++++++ سەرناو: نەداروون تانە سەبارەت: هێنانە سەر ڕێنووسی هۆرامی: ئاکۆ مارانی نەداروون تانە، نەداروون تانە نەداروون تاقەت توانای تانە وېنەی مەجنوون وېڵ دەیری دېوانە مەشم وە چۊڵ و تەرک مەکەم یانە بەرگ تەن جە وەڵگ درەختان چۊڵ پەی وېم مەوازوون مەگېروون نە کۊڵ تەنیا یەک سەنگێ مەنیوون وە باڵین تەک مەدۊم پېوە پەرێ شەو ناڵین خاوم وە ڕاحەت گەشتم وە دڵواز نە نەزان ڕەفېق، نە ڕەقیب هامڕاز پەی وېم مە گېڵوون سەروەش نە کاوان مەر مەلان مەردەن بېدیشان ماوان ++++++++++++++++++++++ سەرناو: نە شەم جیام‌ من سەبارەت: هێنانە سەر ڕێنووسی هۆرامی: ئاکۆ مارانی نە «شەم» جیام‌ من، نە «شەم» جیام‌ من «پەروانە»ی پەشېو نە «شەم» جیام‌ من مەجنوون بەدبەخت چارە سیامەن شەم داخ حەسرەت وە دڵ نیامەن قەیس‌ ئاسانە خېڵ شای شەم مەندەن وېڵ دەربەدەر فام پەرکەندەن تەن تەنیای بېکەس یانە بېدیمەن گوم نە گېج بەحر نائومېدیمەن سیاتەر نە سەنگ هەوارانەمەن عەبداڵ بەڕگېڵ دیارانەمەن مەنزڵ نە ماوای توون تەوەسمەن جەفا و بېسوود و ڕەنج وە عەبەسمەن عازاو مەینەت سەد کۊ بارمەن پەری دین دۊس ئینتیزارمەن چەنی وەحشیان ڕۊ هامڕازەمەن شەو نە شکەنجە گیر و گازەمەن چەمەڕای ڕای دۊس لېڵاخ نشینمەن بە ئەسر حەسرەت دیدە نمینەن هەراسان نە قەوم بېزار جە زێدمەن دەست نە «شەم» بڕیا دڵ نائومېدمەن تا وە ڕۊی مەحشەر مات و مەحزوونمەن سۊز سەودای عەشق «شەم» نە دەروونمەن ++++++++++++++++++++++ سەرناو: وە خاڵ تۊوەن سەبارەت: هێنانە سەر ڕێنووسی هۆرامی: ئاکۆ مارانی وە خاڵ تۊوەن، وە خاڵ تۊوەن نوور لقای حەق وە خاڵ تۊوەن شۊڵەی شەم وە شەوق جەماڵ تۊوەن دەردینان وە داخ کەماڵ تۊوەن لەیلۍ کەنیزەک شیرین بەندەتەن سەد «زڵېخا»ی (میسر) وە زەڕ سەندەتەن «هومەیلا»ی زەریف بەڵقیسای باڵدار گوڵشای گوڵ‌ئەندام «عوزرا»ی گوڵ‌عوزار یەکایەک حەیران بەژن باڵاتەن باڵای نەونەمام سەوڵ ئاڵاتەن دڵ ئارام دڵ سەمەن بۊی پەری «مەنیژە»ی بیژەن، زوهرە و موشتەری خەرامان حەیران حوسن زېباتەن بانوان تەمام گشت جان فیداتەن حووران جەننەت فریشتان فەرش سەناخوانتەن جە زەمین تا عەرش گوڵ جە گوڵستان وە داخ تۊوەن داخداران وە داخ دەماخ تۊوەن هەر چەند پەروانان هەن جە سەحرا و کۊ گشت ماتەن جە شەوق شەم دەستوور تۊ من چوون پەروانان هەر جان فیدای تۊم حەیران جەمین بەزم ئارای تۊم وە سەرگەردت بام شای سپی شەمان سەرگەردان تۊم دوور جە هامدەمان بەشق خاڵ وېت خاتر شادم کەر یا ڕوخسەت یا مەرگ یا ئازادم کەر ئیسە بۊ چەنیم لادێ سازابە جەی گشت عەزابە گەردن ئازابە ++++++++++++++++++++++ سەرناو: هامسەران تارەن سەبارەت: هێنانە سەر ڕێنووسی هۆرامی: ئاکۆ مارانی هامسەران تارەن، هامسەران تارەن ئیم ساڵ بیناییم تاریک و تارەن زەوق زیندگیم چوون ژار مارەن دنیا جە دیدە (وادی‌القهار)ەن گشت عاڵەم نە وەقت فەسڵ نەووەهار شادمەبۆوە زەوق گوڵان و گولزار من ئیم سال وەهار شادیم ناشاد بۍ پەرېشان جە گشت ڕەنجم وە باد بۍ بوڵبوڵ شاد وە گوڵ من ڕەنجەڕۊ بیم ڕەنجەڕۊ جە زەوق وەهار نۊ بیم ئیم ساڵ نەووەهار فېشتەر جە ساڵان ڕازانش ڕەونەق ڕەنگ گوڵاڵان هەردان، هەڵەتان، ساران، هەواران خەیمە گوڵ‌ پۊشان خاستر نە جاران من هەر گوڵزار نە دیدەم خار بۍ هەر سەوزە وەنەم وە ژار مار بۍ هەر چەمەن سەودای جوانیم جا کەرۊ هەر لالە سەودای دەروون داخ کەرۊ هەر شکۊفەی شەوق شېوەی «شەم» پېش بۊ دیام وە پېشدا خاترم ڕېش بۍ وەهارێ وەی تەور خۊ جە لام دوور بۍ چەمان نە دیدەم نېش زەنبوور بۍ ئای خۆزگە وە ساڵ نەووەهار پار هەر ڕۊ سوب سەحەر مەدیام باڵای یار وەهار ئیم ساڵ پەشېو جەستەنان دوور جە دنیا و دین ئانە خەستەنان ++++++++++++++++++++++ سەرناو: هامسەران نامم سەبارەت: هێنانە سەر ڕێنووسی هۆرامی: ئاکۆ مارانی هامسەران نامم، هامسەران نامم من نامم گنۊ دېۋانەن نامم جەو ساوە ڕیسوای دەور ئەییامم ڕۆیی، نەگېڵا دەوران وە کامم جەو ڕۊ من جە «بەتن» مادەر پەیدابیم مەجنوون کۊگەرد شېت و شەیدا بیم هەر خاتر خەمین دەروون پڕ داخ بیم هەر دڵگیر دەرد وېڵ و دوستاخ بیم هەر چەم پڕ ئەسرین مات و مەحزوون بیم هەر گېرودەی جەور جەفای گەردوون بیم هەر دایم ڕەقیب ڕەهەندەی ڕاچەفت وەردا وە جەستەم ئاهر چەنی نەفت ئەر سەد سزاکېش بار مەینەت بېم بەڵۍ سازا بیم چەنی بەخت وېم ئی ساتە ڕۆیی جە ڕاگوزەردا شەم شېوە جە نۊ ئاهر جېم وەردا ئەو وەی بڵېسەم جە گەردوون ویەرد بیم وە کۊی زوغاڵ سفتەم بی‌ وە گەرد پەروانە سیفەت پڕ سفتەی زوخاڵ سۊزان بیم وە شەو شۊڵەی شەم جەماڵ ئاهر بەختم هەر نەبی خامۊش تا قرچەی جەرگم شنەفتم وە گۊش ئەوەڵ چوون مەجنوون وېڵ سارا بیم دېوانەی دڵگیر جە خەم دارا بیم ئیسە پەروانەی پەڕ و باڵ سفتەم وېڵ بەرداوبەرد کۊس و کۊس کەفتەم هامسەران سفتەی شۊخ شەم لقام چۊن مەبۊ علاج وە چېشەن دەوام ++++++++++++++++++++++ سەرناو: هەر من خەمبارم سەبارەت: هێنانە سەر ڕێنووسی هۆرامی: ئاکۆ مارانی هەر من خەمبارم، هەر من خەمبارم هەر من خەمینم، هەر من خەمبارم هەر من «پەروانە»ی «شەم» نادیارم هەر من سەرگەردان زوڵمات تارم هەر من ستارەم جە نەحسی پەستەن هەر من ڕای شەش‌دەر نەردم دەربەستەن هەر من چوون مەریخ خارجەن یانەم هەر من بەدنامیم پەخشەن جە عاڵەم هەر من کوشتەی نېش عەقرەب ژارەنان هەر من ڕیسوای دەور ڕۊزگارەنان هەر من زیج نەحس کەفتەن وە بەختم هەر من سزاکېش ئازار سەختم هەر من «دەلو»ئاسا نە قەعر چاهم هەر من چوون مەجنوون چارە سیاهم هەر من ئیقباڵم نەردەن نەدارەن هەر من چوون فەرهاد کۊکەنیم کارەن هەر من فریشتەی دەوڵەت خامۊشم هەر من چوون بەهرام نمەد وە دۊشم هەر من جە ڕای دین بېزاریم وەستەن هەر من چوون سەنعان زوننارم بەستەن هەر من جە تانەی ڕەقیب ناهاڵ هەر من شادی و زەوق دنیام بی بەتاڵ هەر من پەروانەی پەشېو حاڵەنان هەر من شەو تا ڕۊ شەم خەیاڵەنان هەر من جەو سەبەب ستارەی چەفتم هەر من شەم ئائین جە شەم دوور کەفتم هەر من وە بۍ «شەم» گڕاگڕ گڕیام زەنگ بەد نامی نە عالەم زڕیام هەر من گشت پەی شەم خاترم ڕېشەن هەر یاران عیلاج دەرد من چېشەن ++++++++++++++++++++++ سەرناو: هەر من ناشادم سەبارەت: هێنانە سەر ڕێنووسی هۆرامی: ئاکۆ مارانی هەر من ناشادم، هەر من ناشادم گشت عاڵەم شادەن، هەر من ناشادم هەر من نەیاوان وە لای حەق دادم هەر من نائومید قاپی مرادم هەر من بازی باز نەردەن نە بارم هەر من ڕای شەش‌دەر بەندەن نە چارم هەر من ناسزان فەڵەک وە بەختم هەر من گېرۊدەی ئازار سەختم هەر من چەرخ چەپ وەنەم نە قینەن هەر من تاڵەم پەست خاک زەمینەن هەر من ستارەم سیا بۍ نە سەر هەر من فریشتەم کەفتەن دەر بە دەر هەر من ئیقباڵم خاوېر خەفتەن هەر من نە ڕووی «ئەرز» رای راسم چەفتەن هەر من خەمیدەی دەور گەردوونم هەر من جورعەنۊش جام مەجنوونم هەر من پەروانەی پەشېوحاڵ جەستەم هەر من پەڕ سفتەی خەمناک خەستەم هەر من چوون بوڵبوڵ یەک فەسڵم وەسڵەن هەر من سێ فەسڵ عومرم بۍ ئەسڵەن هەر من ڕۊی ڕۊشن وە دیدەم تارەن هەر من زیندەگیم چوون ژار مارەن هەر من گرفتار جەور و عازاوم هەر من پەرۍ دۊس دیدە لێڵاوم هەر من سزاکېش دەرد و داخانم هەر من چەمەڕای ڕای لېڵاخانم هەر من جە پەی دۊس لېڵاخ نشینم ها وەختەن بەرشۊ گیان شیرینم تا ئەو ڕۊ کە خېڵ شیان وە دامان من هام نە سزای جەور بۍ سامان مەر موشکڵ گوشا بدۊ مرادم وەرنە تا مەردەن خاتر ناشادم ++++++++++++++++++++++ سەرناو: هەور نەدۊ خەمین سەبارەت: هێنانە سەر ڕێنووسی هۆرامی: ئاکۆ مارانی هەور نەدۊ خەمین، هەور نەدۊ خەمین تۊ خەم پۊشەنی من خاتر خەمین بۊ تا هەر دوومان دەردین ماتەمین وېڵ وېڵ بگېڵین سەراسەر زەمین تۊ جە «سەما» سەیل، من جە «زەمین» ئاه هەر دوو بکەریم ڕووی گەردوون سېیاه تۊ سەیل سرشک دیدەت وە زاری ڕېژان کەر چوون تاو سەیل وەهاری من جە زەمین ئاه ناڵەی نەبەردم بخېزۊ جە دڵ هەناسەی سەردم تا بۊ وە تۊفان تۊف ڕەستاخېز سېیاماڵ نە برج لېڵاخ بۊ گورېز خېڵخانان جە دوود ئاه ئیەو تۊ بیان وە دامەن گەرمەسېر جە نۊ تا کە کۊچ خېڵ جاف مورادی پەیدا بان چەنی قبلەم وە شادی ئەو دەی گەرمەسېر هەم بەیۊ وە فەڕ فەڕ گېرۊ جە زەوق تەتاران «بەڕ» هەور نۊ بەی‌تەور بسازیم وە یەک من جە ڕووی زەمین، تۊ نە ڕووی فەڵەک هەر دوومان وە جەخت بگەڕیێم وە تاو تۊف «زەمهەریر» پەیداکەیم جە ناو بەی تەور تۊفانی باوەریم وە هەم تا خېڵان نە برج لېڵاخ کەران ڕەم کۊچکەردە ماڵان بیان وە لامان دامان بۊ وە زەوق نەوتووڵ نەمامان شاد بۊ وەی زامن شای شەم جەمینم گوشادی خاتر خار خەمینم تا منیش وە دین دیدەی ئەو شادبام نە جەور گەردوون خاتر ئازاد بام ++++++++++++++++++++++ سەرناو: هەی نائومېدی سەبارەت: هێنانە سەر ڕێنووسی هۆرامی: ئاکۆ مارانی هەی نائومېدی، هەی نائومېدی هەی ڕەنجەڕۊیی، هەی نائومېدی هەی یاران چوون من بەدبەختێ کۍ دی پەی هاڵ نەزانی ڕوومکەرد نە بېدی چۊڵان تەیکەردم «جەبەڵان» یەکسەر جە تووس و توون بیم یاوام وە تەبەر هەردەی نەجد قەیس گشت دام وە پاوە پەروانە دەستوور سەر وە سەوداوە یاوام بەو زامن ماوای قیبلەم بۍ مەکان و مەسکەن گوزەرگای «شەم» بۍ هەواران چۊڵ دیم زامن وېرانە بایەقوش بەستەن جەو مەسکەن لانە نە دەنگ دەییار نە سەدای یارەن دەنگ وېرانە (وادی‌القهار)ەن پەرسام بایەقوش هامدەرد دەردم ڕەفېق هامڕاز ناڵەی نەبەردم من «پەروانە»ی وېڵ وڵگەی دامانم جانشین «قەیس» شای کەم فامانم کۊشی کۊچ لەیل شای شەم جەمینم گوشادی خاتر خار خەمینم بایەقوش واتش: «پەروانە»ی کەم فام ئیسە ئامانی وەی ماوا و مەقام کۊچ خێرش کەرد لوا وە لېڵاخ پەی من حەسرەتمەند پەی تۊ ئاخ و داخ وە ئیقباڵ نەحس وېم دامامەوە نائومېد جە شەم هەم ئامامەوە یاران هامسەران نائومېد وېم هەی عەبداڵ «بەڕ» دوور جە زێد وېم ++++++++++++++++++++++ سەرناو: هەی هەی ناسۊرەن... سەبارەت: هێنانە سەر ڕێنووسی هۆرامی: ئاکۆ مارانی هەی هەی ناسۊرەن زامانم ئیم شەو گوڵگۊنەن جە زووخ دامانم ئیم شەو کۊن تەبیب بدۊ دەرمانم ئیم شەو سوود سەودامەن چەنی هەرد ئیم شەو هەی یاران بڕیان حەیاتم ئیم شەو چوون خزر خەریک زوڵماتم ئیم شەو ++++++++++++++++++++++ سەرناو: یاران سافێکم سەبارەت: هێنانە سەر ڕێنووسی هۆرامی: ئاکۆ مارانی یاران سافێکم، یاران سافێکم لېویای لێوە لاڵ سافێکم شەیدای شەوق «شەم» پڕ شەفافێکم کوشتەی نیگای ناز شەخس جافێکم *** خار خەم نە جەرگ حاڵ خومارێکم گیر و گاز عەشق باز تەتارێکم پېکیای پەیکان مەروان ژارێکم سەرسام سادار پەری تارێکم لەرزیای لەرزان توول تافێکم کوشتەی نیگای ناز شەخس جافێکم *** عەبداڵ بێ ماڵ جام جەمیئێکم پەشېو حاڵ جەستەی دڵ خەمینێکم ئاشوفتەی دەستەی زوڵف پەڕچینێکم موبتەلای قیبلەی دنیا و دینێکم مایل وە مۊبەت بێ ئینسافێکم کوشتەی نیگای ناز شەخس جافێکم *** زامدار زەدەی دام شەستێکم زەلیل زامەت زەدەی دەستێکم ڕۊح جە دەست پەرواز موژە مەستێکم ئامانج تانەی خاس گەستێکم قەیس مەیل لەیل بێ خلافێکم کوشتەی نیگای ناز شەخس جافێکم *** «فەرهاد»«شیرین» شەکەر ڕازێکم نازار باوان نازئەندامێکم سەییاد دڵگیر نۊپەردازێکم دام دڵ پارە دەست بازێکم پەروانەی باڵبەست کۆی کڵافێکم کوشتەی نیگای ناز شەخس جافێکم *** سۊزان ئایر شەوق نوورێکم شېویای شېوەی شەم دەستوورێکم هەراسان نە زێد زامن دوورێکم قەیس ناوېنای دیدە کۊرێکم دېوانەی مەشهوور قاف تا قافێکم کوشتەی نیگای ناز شەخس جافێکم *** وېڵ مەینەت مەشق هەراسانێکم گرفتار دەست خورشید سانێکم لېوەی لەنگ پۊس خەم نە شانێکم دهیری لاڵ لەنگ بێ زوانێکم ئاوارەی ئاهووی مشکین تافێکم کوشتەی نیگای ناز شەخس جافێکم *** ++++++++++++++++++++++ سەرناو: یاران کەردەن ڕېش سەبارەت: هێنانە سەر ڕێنووسی هۆرامی: ئاکۆ مارانی یاران کەردەن ڕېش، یاران کەردەن ڕېش یە جەرگ منەن خاران کەردەن ڕېش یە دیدەی منەن نوور نەمەندەن تېش یە زام منەن زوخاو مەیۊ لېش یە دوود منەن دنیا گرت نەوەر یە سۊز منەن سۊزان دەشت و دەر یە ئاه منەن وە ئاسمان یاوا سەقف سەراچە گەردوون شکاوا یە سەدای منەن نەفخ سوور بېزان وەختەن قیامەت مەحشەر ئەنگېزان یە ناڵەی منەن چوون نەی مەدۊ دەنگ مەیۊ وە قانوون مەتاونۊ سەنگ یە زاری منەن پۊسە زگارەن عاڵەم جە زاری من بۍ قەرارەن یە شین منەن شەوان تا بە ڕۊ چوون «قەیس» مەجنوون هام نە بېد و کۊ یە وېڵی منەن جە سوب تا ئێوار دەور مەدۊ نە دەور سارا و سەردیار یە داخ منەن داخان جە داخان داخ کەردەن لالەی هەرد ئېڵاخان هامسەران وەختەن وادەی مەرگم بۊ من جە دووری دۊس گوڵگۆن بەرگم بۊ ++++++++++++++++++++++ سەرناو: یاران نەووەهار سەبارەت: هێنانە سەر ڕێنووسی هۆرامی: ئاکۆ مارانی یاران نەووەهار، یاران نەووەهار ئیم ساڵ وە بەختم بېفەڕ نەووەهار ئاما وە دامان کۊچ تەڵمیت بار هەرچەند نیگامکەرد نەدیم کۊچ یار خېڵان گشت ئامان وە ژێر دامان پەخش بین وە دامان بارگەی ئیمامان نە کۊچ یار بۍ، نە دەنگ یاران وەهار وەنەم‌ بی وە ژار ماران هەر گوڵ جە ڕەنگێ بەرئاما جە خاک ئەوان گوڵخەندان من دیدە نمناک هەر غونچە وەنەم‌ بی وە پەیکانێ هەر گوڵێ وە نېش خار هجرانێ هەر لالە داخێن وە سەد هەزار داخ داخ مەنیا وە دڵ حەسرەتکېشم ئاخ سونبوڵ چوون فېشتەر نېش مەدۊم نە دڵ تېژتەرەن جە خار نە پام بەرگی گوڵ نەرگس مەوینۊ ئەندۊم بەرز مەبۊ ئاهر وە جەستەم قەقنەس تەرز مەبۊ سۊسەنان زوان تانەکېشان لېم جە داخ دووری دوور وڵاتان وېم سەیر چەمەن لېم چوون ژار مارەن هەر ئېد مەژنەوون ماچان وەهارەن پەی چی جە دووری شای شەم جەمینم ها وەختەن بەرشۊ گیانی شیرینم یاران هامسەران سا چوون مەبۊ چوون من «تەبەس» جامەن «شەم» کەوت ئەو سەر توون ++++++++++++++++++++++ سەرناو: یاران مەجنوونم سەبارەت: دیوانی وەلی دێوانە، لێکدانەوەو توێژینەوەی: محمدامین هەورامانی. لاپەڕە (١١٨-١١٩). - دیوانی پیره‌مێرد، کۆکردنه‌وه‌ی: ئۆمێد ئاشنا، به‌رگی دووه‌م، لاپه‌ڕه‌ ١٤٣و١٤٤. - نووسین: کەماڵ ڕەحمانی - هێنانە سەر ڕێنووسی هۆرامی: ئاکۆ مارانی یاران مەجنوونم، یاران مەجنوونم دېوانە و واریس قەوم مەجنوونم ئاخ کېشی زۆخ نۆش، زام نە دەروونم وېنەی مەجنوون وېڵ، ئاوارەی توونم ئەوڕۆکە مەجنوون زوخ زام قنیات جورعەی ئەجەل چەشت، شی نه‌ ڕۊی مەمات من کەرد بە وارس، خاس و کەست وېش گشت وە من سپەرد، هەرچی ئاما پېش خەم چەنی هیجران، پەژارە و خەیاڵ ئاخ و داخ و دەرد، دڵگیری، مەلاڵ وېڵی و چۊڵگەردی و سەرگەردان سەر سەودا و سیاسەت یەک جە یەک بەتەر بۍ خوردی ڕۊوان، بۍ خاوی شەوان ڕەفیق زومرەیی ده‌ری سەر کوان شین و واوەیلا و زام پەڕ نە سۊ فەریاد نەبەردا، ئېشی کۊنە و نۊ یەک یەک جەم کەردم تەمام سەراسەر ئه‌و وه‌ هۊن دڵ، نویشت وە دەفتەر وات من مه‌جنوونم، تۊ دېوانە بە هامڕای وەحشییان بیدیانە بە ئاڵه‌م گشت ته‌مام یه‌کسه‌ر مزانۊ که‌س نه‌ بیش تاقه‌ن جای ئه‌و بسانۊ من که‌ردم حه‌رام جه‌ وېم خورد و خه‌و هابیم وه‌ وارس، نیشتام نه‌جای ئه‌و به‌ڵۍ خه‌مم هه‌ن ئه‌ی دنیای فانی هه‌م فانی که‌رۊ مه‌جنوونی سانی فرۊزان ده‌ور دنیا پاماڵ بۊ وه‌ بۍ من یاگه‌ی مه‌جنوون به‌تاڵ بۊ ++++++++++++++++++++++