شاعیر: مارف ئاغایی
کتێب: زەوی سەخت و ئاسمان دوور
سەرناو: ... ؟
سەبارەت: چیرۆک

-تۆ بڵێی هیچ کەس بە قەد ئێمە دڵخۆش بێ؟ 
-نا، هیچ کەس، هیچ کەس بەڵام... 

-بەڵام چی؟ 

-بریا ئەمنیش لەو ڕۆژە ڕەشە دەرهاتبام. 

-نا، قەد باسی شتی وا مەکە. با هەر ئاوا بی، کە هەی. من قەد بیر لە چاکبوونەوەی تۆ ناکەمەوە

-بۆ؟ 

-دەترسێم. 

-لە چی؟ 

-لە زۆر شت. نازانی چەند ساڵ بوو لە کەسێک دەگەڕام کە منی خۆش بوێ. 

-پێم وا بوو هەر من وام! 

-تۆش وەک من بووی؟ ! 

-هەتا ماوەیەک پێش. 

-دۆزیتەوە؟ 

-بەڵێ. 

-کێیە؟ 

-تۆ. 

-ئاخ ئەگەر وشەی «تۆ»ت لە دەم دەرنەهاتبا، شێت دەبووم. 

-من لە تەواوی تەمەنمدا چاوەڕوان بووم. دەترسام یەک کەسیش نەبێ بمدۆزێتەوە. 

-سەیرە. منیش پێم وا بوو ناتوانم هیچ بدۆزمەوە. 

-تۆ هیچ کەست نەدۆزیبۆوە؟ 

-ئاخر... 

-ئاخری ناوێ. پێم خۆش نییە لێم بشاریەوە. 

-تەنیا یەک کەس. ئەویش دەیزانی کە من خۆشم دەوێ. وە سەر خۆی نەدەهێنا. تەنانەت نیگاشی لە من دەدزییەوە. 

-بە کوێ گەیشت؟ 

-ڕۆژێک لە کۆڵان تووشم بوو. بێ ئەوەی چاوم لێ بکا، بەستەیەکی بچووکی وە دەستی دام. خەنی بووم. کردمەوە. ئاوێنە بوو. ئاخ نازانی چەند ناخۆش بوو. 

-بۆ ناخۆش؟ 

- لە ئاوێنە زیزم. ئاوێنەکەی ئەویشم فڕێ دا. پڕ بوو لە بێزاری. 

-بۆ؟ 

-لە ئاوێنەدا جوان نیم. زۆر ناحەزم دەکا. وەک ژنێکی گڕوێم نیشان دەدا. تەمەنم دەباتە سەر. دەمکاتە کچێکی قەیرە. هەر ئاوێنە لە من ناوەشێتەوە نا. 

-پێم سەیرە. دەنا ئەمن هەمیشە بە ئاواتم ئاوێنەیەک ببینم. 

-نا... نا... قەد ئەو ئاواتە مەخوازە. 

-بۆ؟ 

-دەترسێم. 

-لە چێ؟ 

-لە زۆر شت. 

-باشە لە چی؟ 

-نەکا چاوت چاک بێتەوە و تۆش ئاوێنەیەکم پێ بدەی!

++++++++++++++++++++++