شاعیر: شێرکۆ بێکەس
کتێب: مێرگی زام مێرگی ھەتاو
سەرناو: چواردە چرا

1. چیرۆکی پیاوێ
فەرش چنێ
هەتاکوو مرد
فەرشی چنی و گوڵی چنی. 
بەڵام ئاکام: 
نە فەرشێکی هەبوو بۆ خۆی
نە کەسێکیش
گوڵێکی خستە سەر قەبری! 
2. 
سواڵ
لەبەر قاپیی کتێبدا من
هەموو ڕۆژێ
سواڵکەرێکم
بۆ وشەیەک و دووان و سێ
سواڵکەرێکم بەردەرگانەی
ئەم پرشنگانە بەرنادەم
هەژارێکم
خێری ڕووناکی و بیری نوی
هەتا مردن
بە من ئەشێ! 
3. 
ئارامی
لەوێ زەمین زۆر ئارامە. 
لەوێ هەوا زۆر ئارامە. 
لەوێ هەتاو زۆر ئارامە
لەوێ هەور زۆر ئارامە
بۆیە نە گڵ ژان ئەیگرێ و
نە گەواڵە هەور ئەزێ و
نە بەستەڵەک ئەتوێتەوە و
نە شیعریش ئەتەقێتەوە! 
4. 
ئەفسەرێکی ئاسایی! 
کە یەکەم ئەستێرەی وەرگرت
ئەستێرەیەکی کوشتبوو. 
کە بوون بە دووان، 
هەردوو دەستی بوون بە پەتی سێدارەکان
کە بوون بە سیان و بە تاج و بەرەو ژوورتر
بەیانییەک
وەختێ مێژوو لە خەو هەستا
وڵات بووبوو بە وڵاتی بێوەژنان! 
5. 
بەهرە 
ئەی خواوەندی بەهرەی گەورە! 
تۆ «بیتهۆڤن»ێکی کەڕ و
یەک «دستۆیفسکی» فێدار و
«ئەبولعەلا»یەکی کوێرم
پێببەخشە و
ئیتر هەموو بەهرە ساغە نیوە ناچڵ و گچکەکان
بۆ دیوانی خۆت ببەوە! . 
6. 
ڕوانین
لەو کەلەوە
جوانوویەکی سپی دەرکەوت
لە شاخ زا یان
لە بەفر و یان لە کازیوە؟ 
من نەمزانی. 
لەوکەلەوە
هەڵۆیەکی سوور هەڵفڕی
لە ئاگر زا یان لە خوێنی خۆرنشین یان
لە نیشتمانی هەڵاڵە؟ 
من نەمزانی
لەو کەلەوە
باڵای نیوەسپی و نیوە ئەرخەوانیی
دوکتۆر «قاسملوو» بەدەرکەوت
ئەوەی زانیم: 
ئەو لە بەفر و
ئەو لە خوێن و
ئەو لە شاخ زا
ئەوەی زانیم! . 
7. 
ئەوینت
لە جیاتی چاوت دوو گوڵی
بە جریوەی ڕەشم بینی. 
لە جیاتی باڵات – پرشنگێ. 
لە جیاتی دەمت –زنەیەک. 
لە جیاتی قژت – گزنگێ
لە جیاتی دەنگت – چرپەی ئاو. 
لە جیاتی بۆنت – بۆنی خاک
لە جیاتی ڕەنگت – خەونێکی
سەوزم بینی
بەڵام لە جیاتی ئەوینت
من هیچ شتێکم نەبینی! . 
8. 
مەرج
لە هەڵبژاردنی یاردا
شیعر گوێ ناداتە تەمەن
عومری «ڕامبۆ»ی هەبێ یاخود
عومری «دانتی»
شووی پێئەکا! 
بەڵام بۆ خۆی
شیعر ئەو جوانە ژنەیە
یەک مەرجی ئەزەلیی هەیە و
زەمان - زەمان
هەر دووبارەی ئەکاتەوە: 
کامە قەڵەم
پیری ناکا و
لە بیر جوانیی ناباتەوە؟ ! 
9. 
یادداشت
کاتی یادداشت نووسینەوەم
خەریکە نزیک بێتەوە
وەختی گێڕانەوەی خەون و پەندەکانم
کاتی خۆ بەدەستەوەدانی نەهێنی و
گشت گوناهە جوانەکانم. 
کاتی یادداشت نووسینەوەم خەریکە نزیک بێتەوە
ئای خودایە! چەند ستەمە
بۆ قەڵەمێ
بەرەو دوا بگەڕێتەوە و
لە بەرایی بەردەمیشدا
ئەوەی مابێ
ڕێگایەکی تەماوی بێ
بەرە و مردن! 
10. 
فڕۆکە 
فڕۆکەکە لە ئاسماندا خولی ئەخوارد
لە خەیاڵی منداڵێکدا
وەکوو یاریی لەگەڵ «با»دا بکا وابوو
وەکوو گاڵتە لەگەڵ هەورا بکا وابوو
بەڵام-
فڕۆکەکە یاریی نەکرد
کە دانەویی و هەستایەوە: 
هەبوو - نەبوو
شارێک بوو مرد! 
11. 
کراس 
ئەو تەمە سوورە کراسی ئاو دامانە و
بۆ فرۆشتن
بە جامخانەی ئەو شاخەوە هەڵواسراوە
تۆزێکی تر
بالیسانێ، سێوسێنانێ، وەسانانێ
یەکێکیان هەر پەیدا ئەبێ
دەستی لەرزۆک بە گیرفانی برینی قوڵدا بگێڕێ و
بە دوو هەزار گەڵا ئاخ و -
یان تۆ بڵێ: 
بە سێ هەزار کسپەی تەڕ تەڕ
کراس بکڕێ و
هەر لێرەدا و بەدەم ڕێوە بیکاتە بەر! . 
12. 
ئەلیزابیت وای وت 
پەردەیەک هەیە لە نێوان
من و تۆدا
نە لە بەرد دروست کراوە و
نە لە خشت دروست کراوە و
نە لە قوماش
نە لە ئاسن. 
پەردەیەکە ئێجگار تەنک
بەڵام نە بە دەست ئەبڕدرێ و
نە بە پاچ و
نە بە گوللە
پەردەی نێوان دوو ئاوەزە
کە سەدان ساڵ دوورن لەیەک! 
13. 
پێکەنین
گزنگ ئەیدا لە ڕووبارێ
بەستێن وتی: لەم پێکەنینە جوانترم
قەت نەدیوە. 
زەردە ئەیدا لە باخچەیەک
مەلیش وتی: لەم پێکەنینە جوانترم
قەت نەدیوە. 
تریفە دای لە بەفری سەر هەڵەمووتێ
شاخیش وتی: لەم پێکەنینە جوانترم
قەت نەدیوە
کە شیعریشم دای لە شەوی
ئەوچاوانە
ژیان وتی: 
لە گشت پێکەنینێ جوانتر
پێکەنینی دڵدارانە! . 
14. 
نوور 
ئەوەندە تەماشای نوورم کرد
چاوانم نوور بردی
نووری تۆ چارشێو بوو، پەردەبوو
لەمپەر بوو
نەی ئەهێشت ڕۆچم و
قوڵایی نەهێنیت ببینم
من ئێستا بە ڕووکەش کوێرێکم
وا دەستم ئەگیرێ و
وەکی تر
بە چاوی «باگینم»
لە جاران جوانتر و چڕتر و
قوڵترت ئەبینم!

++++++++++++++++++++++