شاعیر: شێرکۆ بێکەس
کتێب: مێرگی زام مێرگی ھەتاو
سەرناو: چاڵ

ماوەیەکە«گۆڕهەڵکەنە»
هاوڕێمە! . 
شەو درەنگان
کە زەویی نووست، ئەگاتە لام
دەست بە کلکیەوە ئەگرم و
ئیتر ئەمبا
بەرەو قاقڕ: 
وڵاتی خۆڵ..
کیشوەری لم، 
گۆڕهەڵکەنەی تیژتر لە «با»
ئەمبا و ئەمبا
هەتا نزیک باسکی «سعود»
ئەژنۆی «سعود»
لەوێ یەک یەک ئەمباتە سەر: 
گۆڕی بە کۆمەڵی: باخ و
گۆڕی خەون و
گۆڕی چاوم و
هەزار
هەزار
هەزار
چاڵی جەرگی «ئەڵڵاوەیسی» و
چاڵی مەمکی «کراس زەردێ» و
چاڵی شیعری سەر بڕدراوم
نیشان ئەدا! .

++++++++++++++++++++++