شاعیر: شێرکۆ بێکەس
کتێب: مێرگی زام مێرگی ھەتاو
سەرناو: زەماوەندی دوا ڕۆژ
سەبارەت: بۆ قادر دیلان

ماڵێک. مۆسیقارێک. 
بوخچەیەک نۆتە! . 
ڕۆژێک دێت.. پیرێتی
دەستی مەرگ ئەگرێت و
ئەیهێنی بۆژووری خەوتنی ماڵەکە. 
ئەوساکە مۆسیقار ئەبێتە
پەپوولە پایزەی سەر ئاوو
وەک خەونی ناو تەمی چنارێ
لە چاوان ون ئەبێ! . 
هەروەها ڕۆژێک دێت لێرە نا
لە دوور دوور، وڵاتی مۆسیقار
بە پەنجەی بەفر و با
کە بوخچەی کردەوە
نۆتەکان وەک پۆلە ئەستێرەی باڵ گرتوو
لەسەری کێوان و
لەگەرووی مێژوودا
وەک شایی وشەو گوڵ
دەست ئەکەن بە سەما!

++++++++++++++++++++++