شاعیر: شێرکۆ بێکەس
کتێب: مێرگی زام مێرگی ھەتاو
سەرناو: ڕەو- بەغدا

ئەمە باهۆزی مردنە؟ یاخود کۆستێکی باڵدارە
بەم بەیانییە خەواڵووە
لە دەربەندی بەهارێکی ترساوەوە
بە نێو تان و پۆی هاوار و زریکەمدا
ئەئاژوێت و
تیژتر لە چاوی شەیتان و
ڕەقتر لە تۆڵەی تەتەر و
مۆنتر لە قاقای هۆلاکۆ
بەرەو کاولاشی ڕووناکیم دائەگەڕێ! 

ئەمە باهۆزی مردنە؟ 
یان تەپاوتلی مێژوومە؟ 
یان خل بوونەوەی دۆزەخەو
لە تەوقەسەری بەهەشتی
وڵاتێکی بێخواوەند و کەساسەوە
بەرەو ڕۆحم دائەگەڕێ! 

لەم مەرگە ساردەدا
بە لووزە و
بە لووزە و
شارانم ئەڕژێنە ناو چیا و دۆڵەوە و
وەک خوێنی باخانم کوت و پڕ ئەمەیێن! . 
لەم وەرزە وێڵەدا
هەر بە پۆل
هەر بە پۆل
لە شەوی زەردە «با» و
باوەشی بەفرێکی ڕەشپۆشدا
وەک کۆتر
منداڵ و
کارژۆلە و
پەلکە گیام
هەڵاڵە و گۆرانیی و شیعریشم
ڕەق هەڵدێن! . 
لەم مێژووە تاریک و قووڵەدا
بە هێشوو
بە هێشوو
گۆی مەمک و گێلاس و
تەماشا و هاوارم
ئەوەرێن! 

ئەبینن؟ ! وا دیسان ڕابوردوو
بە خۆی و گۆچانی تاریکیی دەستیەوە
دێتەوە ناومان و فوو ئەکا
لە چرای دیوارکۆی ڕۆحمان و
سەعاتی هەتاوی دواڕۆژمان ئەدزێ! 
ئەبینن؟ ! 
بەغدا داوە و.. کەچی قاچم ئەچێ بۆ لای، 
بەغدا پەتی سێدارەیە و کەچی ملم ئەچێ بۆ لای. 
بەغدا پەرداخێ ژەهراوەو
کەچی دەستم وا خەریکە هەڵیبگرێ. 
بەغدا درۆیەکی لووسە و
کەچی دەمم وا خەریکە قووتی بدا
بەغدا تاتەشۆری گوڵ و هەقە و کەچی
منیش ئەیکەم
بە ئاوێنە و بە ئینجانە! . 
بەغدا قفڵێکی ژەنگ گرتووی
لە زاری عێراق دراوە و
من ئەمەوێ بە ددانم بیکەمەوە. 
بەغدا تۆڕی ماف گرتنە و
قولاپە بۆ زەردەخەنەی
کانی و زنەم
کەچی ماسییە سوورەی دڵم
وا خەریکە پێوەی ببێ! . 
دە بڕوانن: 
سووڕانەوەی هەمان بازنەی چەقۆیە
بە چواردەوری سەرو ملما. 
گەڕانەوەی تارمایی هەمان داڵاشی خەلیفەیە. 
هاتنەوەی هەمان دۆڵپایە
گرتنەوەی هەمان پەتایە. 
دەبارە بوونەوەی هەمان
عیشقی کوێر و فاقەی ڕێیە. 
بیست بارە بوونەوەی هەمان
بەڵێنی: شیر و شمشێر و
گەشتی «سمکۆ» و
دوا شێوی سەرای «شنۆ»یە. 
چل بارە بوونەوەی هەمان
لە بێژنگدا ئاوهێنانە
شەست بارە بوونەوەی هەمان
ماچی نێوان ژەهر و نانە
سەد بارە بوونەوەی هەمان
دیمەنی ئەو کورسییەیە
کە پێکەنینی «قاسملو»ی
لەسەر دانیشت! 
سەد بارە بوونەوەی هەمان دەمامکی جاری جارانە
هەمان.. هەمان
هەمان تەقینەوەی ئێوارەکەی «حاجی هۆمەران»ە!!

++++++++++++++++++++++