شاعیر: شێرکۆ بێکەس
کتێب: تریفەی ھەڵبەست
سەرناو: بەینێکە

بەینێکە خولیای حەز و ئارەزووم
سەرگەرمی کۆڕی بەزم و ئاهەنگە


نەشئەی ئارامی دەروونی تینووم
وەکوو تریفەی سەر گۆمی مەنگە. 

***

بەینێکە تیشکی ئاسۆیە گیانم
ئەگرێتە باوەش زۆر لەسەرخۆیە


وەکوو منداڵیی خەوی جارانم
هەمو ساتێکی پڕ لەئۆخەیە. 

***

دڵەی خامۆش و تاریکی دوێنێم
ڕووناکە ئەمڕۆ وەکو بەهارە


هەنگاو بۆ بەرزی سەر لوتکە ئەنێم
ناژی لەدڵما ناوی پەژارە.

++++++++++++++++++++++