شاعیر: شێرکۆ بێکەس
کتێب: تریفەی ھەڵبەست
سەرناو: تەنیایی

شیرینەکەم! ژووری تەنیام
ئەمشەو بۆ غەریبیم ئەگری


چرپای خەم لێنیشتوی جێگام
خامۆشیی وا لەچوار دەوری. 

***

چاوەڕوانیی کورسی چۆڵم
تۆوی بێزاری ئەچێنێ


گڵۆپی کزی ناو هۆڵم
فرمێسک بەبێدەنگ ئەڕژێنێ! 

***

پەنجەرەکان، خۆڵی ڕۆژان: 
لەسەر شووشەی چاویان بارە


شیرینەکەم ئەمشەو ژیان
وەک ماڵەکەم چۆڵ و تارە. 

***

وێنەی پارم لێوی گاڵتە: 
لەئێستام هەڵئەقورتێنێ


گڕی خەیاڵ بۆ ئەو کاتە
جەرگی ئەمشەو ئەسووتێنێ. 

***

شیرینەکەم.. ژووری تەنیام
ئەمشەو بۆ غەریبیم ئەگری


چرپای خەم لێنیشتوی جێگام
تەنیایی وا لەچوار دەوری.

++++++++++++++++++++++