شاعیر: محەمەدسەدیق
کتێب: وەنەوشە
سەرناو: شەوێکی ڕەش

لەشی بێ گیانی زەردەی تاوی سەرکەل
نرا گۆڕی کپی سام و سڕیی شەو


خزا خامۆشیی هێلانەی کونی چاو
بە ئەسپایی، بە بێ چرپە مەلی خەو

***

هەموو دنیا کڕ و بێ دەنگ و ماتە
نیە دەنگێک لە هیچ عەرزێک و بەرزێ


بە تەنیا بایە با، ئەگری و ئەناڵێ
لەشی ڕووتی لەبەر سەرما ئەلەرزێ

***

بە ناڵە و شینی با دەریا خورۆشا
لە تاوی دێتە خوار فرمێسکی چاوی


لەسەر ڕووی گنجی داناوە: ئەنووسێ
بنووسی قینی ئەو شیعری خەماوی

***

منیش و بیر لە ڕابردوو لەگەڵ یەک
لە خانوچکەی دڵم دا یەکتر ئەگرین


لەپاش چەن پرسیار و چەن وەڵامێک
ئەمن بۆ ئەو، ئەویش هەر بۆ من ئەگرین

***

هەنیسکم وەک کوڵ و پڕ مەی گرینم
لە تەنگایی گەرووی دڵما شکاوە


بڕێکی هەر لەوێدا ما و بڕێکیش
لەگەڵ ئەسرین لە داوێنم تکاوە

***

لەبەر پێی جەرگ و دڵ ڕاچوو پەلی خەم
تلی گەردوون لە تیژیی ئەم پەلەی دام


خەیاڵ ئاواڵی تەنیایی ژیانم
لە گۆمی مەندی بێخۆیی مەلەی دام

***

مەرگ دەرگای ژیانێکی هەتا سەر
بەرەو ڕووی پەیکەرەی گیانم کراوە


ئەڵێی بانگم ئەکا: ئاخۆ ئەزانی
لە لەوحی خوا خەتی ژینت کڕاوە؟ 

***

بەڵام نا نا، ئەوا پڕشنگی ڕۆژی-
لە گوێن شیرێ سمی سینگی شەوی ڕەش


قەلی شەو دای لە شەققەی باڵی تیژی
فڕی لاچوو تەمی قورسی لە سەر لەش

***

ژیان هەروا بووە و هەرواشە تاوێ
بەجارێ لێخنە وکاتێ زوڵاڵە


خەباتی ڕێی ژیان وا ئاگرێکە
کە هەر بندەستە چیلەی، ژینی تاڵە

++++++++++++++++++++++