شاعیر: کاکەی فەلاح
کتێب: دیوانی کاکەی فەلاح
سەرناو: بۆ شارەکەم
سەبارەت: ١٩٨٧

ئەی شارەکەم! نازانم تۆ
تینووی خوێن و تاسەی منی
یان من تامەزرۆی خاکتم؟ 
بۆیە هەرچەن شەوی ژینم
لێ تاریک و شەوەزەنگ بێ
شیلەی تەمەنی شیرینم
لە خەما، پڕ ژار و ژەنگ بێ
خۆشەویستی نێوانمان
هیچ نایەوێ، لە تۆ دوور بم
هیچ نایەڵێ، وەک باڵدارێ
تەریوی ئەو دیو سنوور بم

***
ئەی شارەکەم! کە لە شاعیرێکیان پرسی: 
چۆنە عیشق و خۆشەویستی
پاریست کردۆتە خولیا؟ ! 
چۆنە وا نایگۆڕیتەوە
بە هەموو شارانی دنیا؟ ! 
لەبەر ئەوەی کە زیندووە
بزێو و سەر بە گێچەڵ و نەمر بووە

***
سلێمانی! منیش لە ئاسۆی ناخەوە
بەگوێی تۆدا ئەچرپێنم تا بمێنم
خوێنم شاری وەک تۆی ئەوێ
دڵم یاری وەک تۆی ئەوێ
بلبلی سۆز و کەڵکەڵەم، 
هەر بەهاری وەک تۆی ئەوێ
هەر هەواری وەک تۆی ئەوێ

++++++++++++++++++++++