شاعیر: کاکەی فەلاح
کتێب: دیوانی کاکەی فەلاح
سەرناو: شوانی بێ فەڕ

هاوار ئەکەم بە ڕۆژ و شەو
ئاخ لە دەس شوانی چاو لە خەو


مەڕ بە گورگان خواردو ئەدا
لەو کەژ و چۆڵ و دەشتەدا


بۆ تۆزێ خەو، تۆزێ پشوو
ئاگر بەر ئەداتە پوشوو


گورگ بەر ئەداتە گیانی مەڕ
شوانی وا پاتاڵ و بێ فەڕ


ئەو مێگەلە بزن و مەڕە
قوربانی سایەی سێبەرە


قوربانی توزقاڵێ خەوە
هۆی بە قڕدانی ئەم، ئەوە


داد لەدەس شوانی خۆپەرست
تێر نەخۆر و سک خۆشەویست


تا ڕاوەستابێ ئەو ورگە
کەی ئاگا و هۆشی لای گورگە


هەر شیری تازە نۆش ئەکا
شتی تر فەرامۆش ئەکا


هەر شنەی شەماڵی ئەوێ
هەر سۆزی شمشاڵی شەوێ


هەر بەستە و گۆرانی ئەوێ
هەر گەشت و سەیرانی ئەوێ


هەر ئاوی سەرچاوەی ئەوێ
هەر دەشتی ڕازاوەی ئەوێ


هەر سایەی سێبەری ئەوێ
هەوای دەشت و دەری ئەوێ


شوانێ ڕەوشتی ئاوابێ
دەربەستی مێگەلی نابێ


بەڵام خاوەنی بزن و مەڕ
مل کەچی نابێ تاکوو سەر


خۆی بێ ترس و پەروا ئەکا
شوانی وا هەر ڕسوا ئەکا


مێگەل ئەداتە دەس شوانێ
کەقەدری شوانی بزانێ


ئەیداتە دەست پاسەوانی
خۆی لەسەر مێگەلی دانێ

++++++++++++++++++++++