شاعیر: شەریف
کتێب: ملوانکەی شین
سەرناو: خاک و خۆر

١

ئێوارەیە و دنیا جوان
لە سووچی تاقی ئاسمان


کیژی زێڕینی هەتاو
خۆی شاردەوە لە بەرچاو


لە سەر سینگی شاخ و هەرد
کۆی کردەوە زولفی زەرد


تاکوو بەیان بە سەرخۆ
لە تەختی سووری ئاسۆ


دیسان بخاتە سەر شان
زولفی زەرد و پەرێشان


دارستان مات و خەمبار
لە شوێنی کیژی دڵدار


پەژارەی تاریک و رەش
شەوگاری گرتە باوەش


بە هیوای ژوانێکی تر
خۆپیشاندانێکی تر


سەری نا داوێنی شەو
خەمی شاردەوە بە خەو


تاکوو بەیانی نم نم
فرمێسکی ساردی شەونم


بۆئەوینی خاوێنی
ئەڕژێنێتە داوێنی

٢

مانگە شەو چاو هەڵدێنێ
روخساری خۆی بنوێنێ


بە جوانی دەشنێتەوە
جێگای خۆر بگرێتەوە


خونچە سەری دەربێنێ
باڵندە بجریوێنێ


بەڵام هەرگیز ناتوانێ
تەنیا ئەمە بزانێ


نێوان ئەو دڵدارانە
خاک و ئەو خۆرە جوانە


بە راسی هەر رۆژێ دێ
کە دڵداری تەواو بێ


هەر وەها دەشنێتەوە
جێگای خۆر بگرێتەوە


خۆرەتاو چاو هەڵدێنێ
دێت و دڵی ئەشکێنێ

++++++++++++++++++++++