شاعیر: شەریف
کتێب: ملوانکەی شین
سەرناو: نامەیەک بۆ فەلەستین

ئەی سەرگەردانی مانوو
لێقەوماوی بێخانوو


ئەی ماڵ و منداڵ لە کۆڵ
ئاوارەی نیشتمان چۆڵ


ئەی برای فەلەستینی
کەی مافی خۆت ئەستێنی؟ 


ئەی باڵندەی بێ هێلان
ئەی وەیلانی بەستەزمان


لەو دەشت و دۆڵ و کێوە
دوو کۆڵ ئەبەیت بە رێوە


کۆڵێ ماڵ و منداڵت
تەزاندوویەتی باڵت


کۆڵێ خەمی وەیلانی
دڵت گرتوویە شانی


بارت قورس و پێ پەتی
رێبواری رێی مەینەتی


ئاخۆ خەمی نیشتمان
پێت قورسە یا کۆڵی شان؟ ! 


ئەی فەلەستینی هەژار
وێڵی دەستی ئیستیعمار


رۆژێ دەبێ خەباتت
بێنێتە دەس وڵاتت


ئاخۆ ئەو رۆژە کەی بێ؟ 
ئاخۆ ئەو رۆژە کە بێ؟ ! 


***
ئی باڵندەی بێ هێلان
ئەی وەیلانی بەستەزمان
***

++++++++++++++++++++++