شاعیر: شەریف
کتێب: ملوانکەی شین
سەرناو: تەنیا

خانووی ساردم کش و مات
بۆنی بێدەنگی ئەدات


لە شوێنی پیری رێبوار
چاوم بڕیوە دیوار


جارێ هەتا ماوەی دێر
گوێ دەگرم بۆ کاتژمێر


هاتوچۆی عەقرەبەکان
وەک رێبوارانی زەمان


یەکێ گورج و یەک هێمن
رێگای عومرم دەپێون


بە ناوەدڵ ئەمەوێ
بەڵکوو دەردێ بسرەوێ


پەنا بەمە پێنووسم
بیرەکانم بنووسم


من کێم و لە کوێم و چیم؟ ! 
تا کەی و بۆچی دەژیم؟ ! 


جارێ قاقای پێکەنین
بە دنیا و ئاسمان و ژین


جارێکیش بوغزی گریان
بۆ ماوەی خۆ خەڵەتان


خەمبار و بێدەنگ و باس
خەیاڵاوی و کەساس


هیچ ئاهەنگێ نایێتە گوێ
بەحری بێدەنگی بشکێ

****

خانووی ساردم کش و مات
بۆنی بێدەنگی ئەدات

****

++++++++++++++++++++++