شاعیر: مینە جاف
کتێب: دیوانی مینە جاف
سەرناو: چاوەکەم فەرموو هەموو ئامادەیە بەزم و تەرەب

چاوەکەم فەرموو هەموو ئامادەیە بەزم و تەرەب
بوربوت و نای و موغەننی و نوقڵ و بادەی مونتەخەب


با بە وەسڵ و کەیف و شادی تێپەڕێنین ئەم شەوە
شەق بەرێ بمرێ لە داخانا ڕەقیبی سەگ نەسەب


تو خوا جانا بە ڕەغمی موددەعی و بەدگۆ و حەسوود
بێ پەیاپەی مەی بنۆشین پیاڵە پڕ کەین لەب بە لەب


چاو لەسەر چاو لێو لە سەر لێو دەم لە ناو دەم دابنێین
شاد و بێ غەم ڕابوێرین دڵ بە بێ ئێش و تەعەب


بەزمی جەنتەت کەی دەگاتە ئەو سروور و شادییە
مینە بێ خۆف لەیلی تۆدا مەی بنۆشێ ڕۆژ و شەب


دولبەرا عەهدە لە دووریت دڵ دەناڵێت وەک ڕەباب
سەیری کە جەرگم دەسووتێ هەڵ دەقرچێ وەک کەباب


وێڵ و عەوداڵ، شێت و لێوە، سەرسەری تێم و ئەچم
وڕ، دەبەنگ سەرخۆش دەسوڕێمۆ بە بێ پیاڵە و شەراب


یەک نیگای نازت کە ئاویشت دای لە بەندی جەرگەکەم
زامەکەی خوێناو ئەرێژێت هەر وەکوو سیروان و زاب


گەر سوئالی زامی جێگەی تیری عیشوەی خۆت بکەی
لازمە کاتب بنێریت بێ قەڵەم ناکرێت حیساب


چینی ئەگریجەت نەسیم بەخشی دەکا کاتێ لە ڕووت
هەر دەڵێی هەوری سیایە و دائەپۆشێ ئافتاب


گوڵ بە دەم باوە کە ئەڕوا و تێت و ڕەنگی تێک ئەچێ
عەینی وەک ڕووی تۆیە وەختێ پێکەنی و لادەی نیقاب


لەززەتی ماچی دەمی تۆ کەی ئەدەن لای مینە جاف
شەربەتی ئەسکەنجەبین و پرتقاڵ یا ئاو عیناب

++++++++++++++++++++++