شاعیر: مینە جاف
کتێب: دیوانی مینە جاف
سەرناو: خاڵۆی خاترخا و پیری دەروێشان
سەبارەت: جواوی نامەیەکی شێخ عوسمان نەوەی شێخ علاالدین نەقشبەندی

خاڵۆی خاترخا و پیری دەروێشان
جاگەی ستەم داد ڕیازەت کێشان


سەرحەڵقەی مەجلیس عەوداڵانی غەیب
ئوستادی دەسگیر یارانی بێ عەیب


بەخشەندەی سەفوەت وە دڵ سیاوان
جانوشین نە جای شێرانی کاوان


دەروون پڕسەفا جە سیدق و سەفا
منەووەر وە شەوق نووری مستەفا


نامەی عەنبەر بۆی پڕ لوتف و سروور
یاوا جاڕووب دا دڵەی پڕ کدوور


بۆسام نیام وە بان نووری بینایی
دەوا کەرد زامان دڵ جە ڕیسوایی


لایێ مەعنا و شەوق لایێ سزابی
لایێ شادی و زەوق لایێ جەزابی


ئە فەرمای پەی چێش گۆشدەر دیدەکەم
تەفسیر کەم پەرێت بەرگوزیدەکەم


شادی و شەوق لەبەر لوتف و وەفای تۆ
ئێش و خەم پەی دڵ مەحجووب جە لای تۆ


پەی تۆ کەرد ئیسبات ڕەویەی سەرداری
پەی من عارەقی جە شەرمەساری


ئارۆ یەن ڕەویە و ڕەسم جاداران
عەفو کەردەی بەد جە خەتاباران


هەر چەن مەئیووسم جە فەیزی حزوور
یا اللە ئیخلاسم باقیەن جە دوور


قوروان دەخوازم ئیمداد و یارین
یاوان وە خزمەت ئەر سەد بێ عارین

++++++++++++++++++++++