شاعیر: بەختیار زێوەر
کتێب: دیوانی بەختیار زێوەر
سەرناو: گریمان

گریمان پارەت هەزار کلوور بێ
شەو لە ژوور سەرت ساز و سەمتوور بێ


بە ڕۆژ دیوانت پڕ زەرد و سوور بێ
هاوڕێی ژیانت بەگ و مەئموور بێ


گیانەکەم ئەگەر خۆت بێ قیمەت بی
نرخێکی نییە خاوەن سەروەت بی


گریمان ئەمڕۆ مەردی مەیدان بی
خاوەنی نان و خوانی دیوان بی


پیاوێکی بۆشناخ زۆر قسەزان بی
شارەزای قانوون شیرین زوبان بی


ئەگەر دەروونت پاک نەبێ تەواو
ئەمانە هەستیت ناگۆڕن تەواو


گریمان هەموو ئەوروپا چووبی
گەلێک ڕەوشت و زانین فێربووبی


بە وردبوونەوە وەک ئەرەستوو بی
بە دەم بۆ وڵات پڕ ئارەزوو بی


کە قازانجی خۆت پێش خست لە هی گەل
ئەزانرێ دزی و ئەگەرێی بۆ هەل


گریمان کاسب یا دووکاندار بی
خەریکی سەودا و جوابی کڕیار بی


بە دیمەن چاک و پاک و هەژاربی
بۆ نوێژ و ڕۆژوو ئێجگار بەکار بی


ئەگەر کەوتیتە فێڵ و دەس بڕین
لە تۆ چاکترە ڕێگری بێ دین


گیانەکەم هەرکەس ڕاست و ڕەوان بێ
بە کردار دەرخا نیازی جوان بێ


دڵسۆزی من و تۆ و نیشتمان بێ
حەز ئەکا کوڕی سەپان و شوان بێ


ئەو کەسە ڕۆڵەی کوردی هەژارە
با تۆش نەیناسی وەکوو ڕۆژ دیارە

++++++++++++++++++++++