شاعیر: بەختیار زێوەر
کتێب: دیوانی بەختیار زێوەر
سەرناو: گفتوگۆ لەگەڵ شاخی سوورکێو

کەژی سوورکێو لەبەرچی لووتی خۆت بەرز کردووە لێمان
سەرت ڕووت کردووە وەختە بگەیتە مەرتەبەی کەیوان


دڕندەی سەرزەمینت بۆ چ حەشارداوە لەناو خۆتا
لە خۆت گرد کردووە هەرچی کە بووەتە دوژمنی ئینسان


بەهارانیش هەرەس دێنی بەسەر ڕێبواری کوردانا
بەزستانیش بەسەرماکەت ئەخەیتە کاروان گریان


لەبەرچی بوویتە کانگای جەردە و دز دائم الاوقات
حەیاتی قەومی کوردت خستووەتە تەهلوکە و گیاندان


ئەوەند مەغروور مەبە، دەعیە و تەکەببور هێندە مەنوێنە
لە شاخی ئەلپ و ڕۆشۆز فەزڵی تۆ زیاتر نییە قوربان


زەمانێ دێ لەشت کون کون ئەکەن بۆ ڕێی شەمەندۆفەر
ئەبیتە ڕێگەیی مۆتۆڕ و ڕێبازی هەموو کوردان


قەدت قەدبڕ ئەکەن بۆ ئەبنییەی زۆر خۆشی وەک ئۆتێل
سەرت چاک تەخت ئەکەن بۆ ڕێگەیی گوڵزار و باغستان


دڕندە و وەحشیانت پێستی ئەگروون بۆ لەبەرکردن
دز و جەردەت هەموویان ئەبنە چایچی و خانچییی کاروان


بەڵام ئەوسا ئەبیتە مەنبەعی کەیف و سرووری خەلق
ئەبیتە جەننەتێکی بێ میسالی ئەهلی کوردستان


لە چوار ئەترافەوە عالەم بەدەستە دێنە سەیرانت
ئەچیتە ڕیزی شاخی ئەوروپا و کێوەکەی لوبنان


ئەوا من پێم وتی تۆ قەت لە یادت دەرنەچێ سوورکێو
لە فەسلی ئاتییا ئەم موشکیلاتە حەل ئەبێ ئاسان

++++++++++++++++++++++