شاعیر: ئاپۆ کتێب: باھۆز سەرناو: باهۆز وا ها! ڤایە هات با! جهان تەڤ بوو سەرما. هو... ڤ... هو... ڤ... گەه بایێ رەش، گەه بایێ کوڕ، چیا. نەوال، زماگ ب هەڤ رە یەکدەنگ دکن گوڕەگوڕ. دو بایێن تووژ دو بایێن سار رادهێژینن گیا و دار، هو... ڤ... هن... ڤ... یەک ئەوران دجڤین، ئێ دن ژ هەڤ دڕەڤن، دکن شەڕ، ب ئاوڕ. یەک هوویە هورمز رووگەش و ل کەن. ئێ دن بێمرێس وەکی ئەهرەمەن. ل روویێ ئەردێ، د ناڤا ئەزمێن ئەورێن رەش، ئەورێن گەور، راست و چەپ دچن تێن. هەردو بایێن ها، ب خورتی و شین هەڤدی کۆل دکن وەک دو دێوێن دن. هەردو با، ب ڤی حالێ ها، دکن شەڕ، دکن جەنگ. دنیا سەر و بن، هاویر بوویە دەنگ. گوڤڤین... ! گوژژین...  ! گورمین...  ! دهەژە جهان، دهەژە زەمین. *** بایێ کوڕ، ژ باکوڕ، ب لەشکەرەکی خورت، لەشکەرەکی گوڕ، ب پێللان، ب کللان، داژۆ سەر نەیار، وەکی گورێ هار دا کو ب دەرخە د ناڤ جه و وار. دکن شەڕ، دکن جەنگ. گوژژن... ! گوڤڤین...  ! گورمین... ! ژ هەر ئالی دەنگ. ژ هەر ئالی شین؛ هۆلێ ب خورتی، ب زرت و هالان ئەو روویێ ئەردێ هەر دکن تالان. شۆپا وان خۆپان، شۆپا وان ب خوین. شوونا تاژانگان تەڤ دبە برین. *** تەرتلی هورمزژ بەر ئەهرەمەن؛ دەرکەت ژ قادێ هێ ژی روو ل کەن. سست بوو بایێ رەش دەرکەت ژ مەیدان. بایێ کوڕ ب زۆر همبێز کر جهان، باکوڕ وەرگەڕی هۆلێ بوو باهۆز. جهان سەراسەر بوو دوومان و تۆز. دنیا ما ل بەر دێوێ هار و رەش. کامباخکەرە ئەو مێرکوژ و کەلەش؛ ژ بۆ دەمەکێ جهان ما ب وی. دبوونە خوەدێ. د ناڤا وی جی. خوداکی بێڤاج. خوداکی جەببار، کارێ وی کامباخ، گەلەک زیناتکار. هەیهات! هەیهات! ڤی بایێ بێ باڤ، جەرگ و هناڤ پات، باهۆز، بێ دۆز، وەکی روهستین ب سەر مە دە هات. باهۆز! باهۆز! روویێ ئەردێ تەڤ، بوو دوومان و تۆز. ستوون ب ستوون گهان بەر ئەزمان رجفین و لەرزین. گهاشتە جهان بۆبلات، بۆبلات... ئەڤ چ بەلا بوو ب سەر مە دە هات؟ چیا و زماگ، رێل و گۆڤ و شاگ، ئاڤاهی، خربە، باژاڕ، قەسەبە، دار و بەر، گیا، زنار و قەفا، تەڤ ب حکمێ با دلەرزن، دهەزن، درجفن، ژ ترسا، ژ بەر با. *** چ ئەرد و چیا، چ ئاڤ و دەریا، ژ بەر هنگێن بێ دکەڤن تایێ. داران هل دکە، قەفان گێڕ دکە؛ خانی تێنە خار، دبن تار و مار. ل روویێ ئەردێ مەرڤ تناور گەشتی د دەریا، ل ژۆر بالافڕ. رێ ل بەر تەڤان وندا بوویە هەر هن دبن تننە، هنەک ژێ سێسەر. هەوار! ئەمان! ژ هەر ئالی تێ. دەنگ ژ خوەیی جان ب شین و گرین فەریاد و فغان نزان بچن کوو دەهبە و ئینسان؟ *** باهۆز! باهۆز! جهان رەش، تاری تەڤ دوومان و تۆز رێزانا دنێ ل هەڤ خست یەکجار دەریا ل هەڤ کەت. چیا هاتن خار. ئەڤ دەما هندک گەلەکی درێژ هەمی شەوشین بوونە مەست و گێژ. دەڤەڕوو کەتن، نەما کەس رابوو، ئەزمان وەرگەڕی ب سەر مە ڤا بوو، جهان سەر و بن ل ژێر و ل ژۆر، تەڤ دە بوون خۆپان وەلات و سنۆڕ. هەمی سەرنەخوون. چ خورت و چ ژار، ل راستەکێ مان دەولەمەند، زیڤار. ژ من کو نە ما کەسەک د جهان، سەر روویێ زەمین تەڤ بوو گۆرستان، *** هینگا، هێ تێ با؛ باکی بێ ئەمان هەر دکە وێران. ژ نش ب دەرکەت پەیاکی رەشکال، ل سەری کۆلۆز، ب شاپک و شال. هلمشتی، سڤک و چالاک و شەنگ، هم ب زەند و بەند خوەشمێر و چەلەنگ رووگەش و خوینگەرم گەلەک سەرگران، سەرگەڤاز و خورت، فێرس و هۆزان، ب سەمت و سوهون، خورتی و تەوات، بەرێ خوە ددا ناڤچایا وەلات. وەک رستەم، وەک گودهەرز، بێ تەلاش و بەز، ب ڤین، ب شین. د ناڤ کوونتاڕێن زاغرۆس دمەشین. بەرێ وی ل ژۆر. باوەرمەند و خورت، ئالەک کەسک و سۆر ب دەستێ خوە گرت. نە تۆز و دوومان، نە با و باندەف نکارن بادن بەری ژ هەدەف. بێ ترس و پەروا، ب دلەکی گەش بەرێ خوە دابوو باهۆزێ کەلەش. وەلێ چوو گازێ، بێ کەتن و وەست ئالا کەسک و سۆر ل دارەکی بەست بەرێ، ب ئاوڕ بەری دا جهان. دەما کو وی دیت هەمی پەریشان... دلێ خوە ئێشاند وی ل سەر بەشەر دگۆت: ژ بۆ چ بوون هەڤالێ شەڕ؟ دەما کو شەڕ تێ تەڤ دە دڕەڤن هۆلێ دەڤەڕوو نەخوون دکەڤن. مخابن! چ کرێت! سەری داتینن بێ شەرم و فهێت... *** ئەو بایێ مێرکوژ، باهۆزێ خوینخوار کو جهان هەمی دکر تار و مار، ل پێش سوهنا وی رەشکالێ رووگەش پاشپێ دڕەڤین ئەو دێوێ کەلەش. ماندی خویا بوو گەلەک، ئەهرەمەن. هورمز ئاژۆت سەر هێ ژی روو ل کەن پشتی کو رەڤاند وی سنگا باهۆز جهان ڤالا بوو ژ دوومان و تۆز دارێ خوە هلدا ب ئالا رەنگین سنۆڕێ وەلێت ژ نوو ڤە دانین. *** پشت کو رەڤیئەو دێوێ کەلەش زڤڕی مەیدان دیسا بایێ رەش. لێ ڤێجار ب تەن خەباتا خوە کر. هلما د دەریا و ئەردێ راکر ل روویێ ئەزمێن وی ئەور جڤاندن چ رەش ل چ گەور ل هەڤ گەڕاندن، بەرێ پڕ سڤک دباری خوناڤ پاشێ گران کر داخست تاڤ ب تاڤ. چەنداکی وەلێ روویێ ئەردێ شوشت قڕێژ و گەمار نەهشت تەڤ دە مشت. ئەورێن د ئەزمێن ئاڤا خوە رژاند روویێ جهانێ یەکەڕوو دڤەژاند. کولیلک و گیا، رێل و دار و بەر تەڤ سەری هلدان شین بوون سەراسەر. *** هینگاد جهان نەمان پیس. تەڤ دەلال و رند. وێران، خۆپان ئاڤا بوون چ باژاڕ و گوند، قەلیا تۆڤێ شەرخوازێن تەرەس نەمان ئەو دووپشک، مرن ئەو ناکەس. پشتی مرار بوو ئەهرەمەنێ مار. شەوتی د ناڤ پۆتێن کۆلیدار. رابوون، دلگەش، یەکدەست کارکەر و جۆتکار، کۆلان گۆڕەک پڕ کوور ژ بۆ کۆلیدار. ژێ رە دانین کێلەک مەزن و گران ل سەر نڤسین: «ل ڤر رادزێ شەیتان؛» *** دنیا ب خوەشیژ نوو ئاڤا بوو. زڤەر، جەوێلەک دلگەش و شا بوو. رێزان، شێورەوی تەڤ ئاشیتیخواز د ناڤ وان نە مان برچی بەلەنگاز. جهان، ژ نوو ڤە هۆلێ بوو بوهشت. دەلال و شێرین ڤێ جار دکارن رەش و گەور، سۆر و زەر ب هەڤ رە بژین. بژین ب خوەشی، ب روومەت ب شادی و کەن! هورمز بوو سەردەست هەر و هەر ل سەر ئەهرەمەن ++++++++++++++++++++++ سەرناو: هۆ خۆرت هۆ خۆرت! خۆرتێ کورد. پێشەنگێ خەبات. هێڤیا وەلات. کوڕێ باڤ و دێ. ژ بۆ ئازادی. ژ بۆ سەربەستی. ب شەڤ و ب رۆژ، مە دڤێ خەبات. هەڤال و هەڤرێ ! ئازادی ب دووکەتنە. بەری هەر تشتی، ژ هەر رامانەک، کو مە ب دوور خە، ژ ئارمانجا مە. هەیا ئەم ناڤێن، رامانێن جانکوژ، د ناڤ سەرێن خوە. چاوان سار دبە، ئەڤ تڤانجا مە. هن ژ مە باوەرن کو، ئازادیا وەلێت ژ نەیاران، ژ زۆرکەران، ئەوە سەرخوەبوون. ئا راست. چ رامانەک کەڤن. چ رامانەک نوو، کو مە گرێدە. مە دکە کۆلی. ئەوە وەندابوون. دڤێ ئەم، بەری هەر تشتی، ب نێهرینا خوە، ب رامانا خوە، ئازا بن سەربەست. چقاس ئەم بێنە گرێدان، ب رامانێن خەلکێ، ل سەر ریا وان، دێ ببن بندەست. بۆ چ تو، خوە قەلس دبینی، کێمتری خەلکێ؟ دووڤک و تەڕی، شەرمەندە، رەبەن و بێکێر. چ رۆژا، کو بوویە شەڕ، کو بوویە جەنگ، تو دبوو سەردار. تو بوو نژدەڤان. هەر تو بوو پشتمێر. ژ بۆ چ تو بکی، خەلک بخوە؟ هەر ژ کەدا خوە بمینی بێ پار؟ ! ژ دلپاکی، ب دلقەنجی، بێیی خاپاندن؟ ! بمینی ل پاش، غولامێ نەیار؟ ! بەسە هۆ! چاڤێ خوە ڤەکە! دا کو جارەک دن، وەکی هەر جار، نەیی خاپاندن. باش بناسە ریا خوە، ئارمانجا مللەت. دا گیانێ کورد بێتە ڤەژاندن.. ئازادی، ژ بۆ تە، کو ب توکەسی، ب تو رامانان، نەیێ گرێدان. یەک ئارمانج. یەک رێزان. خەباتێ بکی ژ بۆ کوردستان. ژ بۆ ئیرۆ، ئەڤ گۆتن بەسن، هەکە زانبی، ژ من ببهیسە، شیرەتا بران. ئان نا، دێ بێ خاپاندن. ژ دلپاقژی، ببی پارت ژ بۆ رۆڤی و گوران. ++++++++++++++++++++++ سەرناو: فەلەکا بێ بەخت فەلەکا بێ بەخت شکاند دارێ من نەما کەس روونشت ل بەر ئارێ من ژ دو هەزار سال هەیا ب ئیرۆ ئازادی نەما د ناڤ وارێ من زۆرکەرێن بێ باڤ ب فەند و خاپان د بەرهەڤ خستن دۆست و یارێ من قەنج و چاکێن من تەڤ دانە کوشتن قەلاندن رچا کارگوزارێ من سەرەک و رێبەر د وەلێت نەمان ل ئەردێ هشتن کۆچ و بارێ من ژ هەڤ پەرچە بوو کوردستانا گەور کەت ناڤا دەستێ چار نەیارێ من کرنە گونەه ب کوردی پەیڤین وان دڤێ راکن زمان، زارێ من دەولەمەندێ من هاتە شێلاندن ژ وەلێت دەرکەت تەڤ زیڤارێ من ئەو کەسێن کو خوە مەزن دناسین رۆژا تەنگ نەبوون بەندەوارێ من چەند هەب ژ وانا مابوون د مەیدان ئیرۆ تەڤ رەڤین ژ بەر بارێ من هنەک ژ وانا بێ شەرم و فهێت ب دەستێ نەیار بوون سیمسارێ من! دخوازن ئیرۆ ب هیزەبوونی ب دەرخن کوردان ژ بەر کارێ من قڕاک، تۆت و توند کەتن وارێ من کۆلەیێن کۆلی کۆلیدارێ من! ژ خەینی فەلەک من هەنە نەیار ل دۆرا وەلێت بوونە چارنکار چاڤ دانە دیلی، بندەستییا من ب زۆرێ هیشتم بێ زمان و زار بەرێ رابوون مە ترکێن توورانی عەجەمێن گوهپێل... بێوار هەرچی ل ئیراق و ئیران بوویی دهێلم ژ بۆ گۆران و هەژار دێ تەنێ بێژم کورت و سەرپلکی کو چاوان ترکان خوینا مە خەوار ژ ترکان سێ کەس خودان گونەه بوون «کەمال ئاتاتورک»، «عیسمەت» و «بایار» د ناڤ سی سالی ژ گەرناسێن کورد سێ هەزار مێرخاس شاندنە بەر دار ژ دێرسم، ساسوون، گەلیێ زیلان پران و لجەئە، رەشکۆت، پەنجینار مادەن و هێنێ، کۆتۆل و هیزان مردێس و بۆتان، ڤارتۆ و خزخار ژ مووش و بدلیس، خارپێت، هەزاررۆم ژ سێرت و وانێ، ئامەد و حەکار دو سەد هەزار کەس ژ مە دان کوشتن هنەک سەرژێ بوون وەک پەز و دەوار ژ ڤێ ژمارێ مەزن، بچووک، ژن ب ئاگر سۆتن بیست و دو هەزار شێست و چار هەزار هنارتن سورگوون هنەک ژێ مێرخاس، هنەک ژێ مالدار ئەڤ هەمی ژ بۆ چاڤترساندنێ هەیا حەقێ خوە نەخوازن یەکچار لێ ڤان کرانا ئەم نەترساندن کەسین ب روومەت ناترسن توجار قڕاک تۆت و کوند کەتن وارێ من تورکێن وەحش و هۆڤ کۆلیدارێ من پڕ کوورە رچا شوورەشا کوردان هۆلێ سەرپلکی نایێ سالخدان تەنێ دخوازم رووپەلێن پێشین کورتەبڕ بێژم د ناڤ ڤان خێزان: بەری هەر کەسی ئالا خوە هل دا تەڤ لەشکەرێ خوە «جەنەرال ئیحسان» لێ دەما فەلەک بەری ژێ گوهارت داکەتە ئیراق ڤالا هیشت مەیدان. پشتی وی رابوو «شێخ سەعید»ێ کال تەڤ عەشیرێن کورد داکەت ژ پیران بەگێن مالکامباخ، ئاغایێن بێ بەخت بوون دەستێ نەیار ل سەر پشتا وان پشتی چار مەهان ب شەڕێن خوونریز کەت ناڤا لەپێ لەشکەرێ ترکان کو شەرێ لەهەنگ ب دلەکی خورت دارڤە بوو دگەل چل و هەشت مێران لێ ئاگرێ کو شێخ سەعید دادا جه جه ڤێدکەت ل دەشت و چیان جهەک ژ ساسوون، جهەک ژ ئاگری هێلەک ژ سەرحەد هەیا ئەرزنجان. داویا گشکا رابوو ژ دێرسم «شێخ سەید رەزا» سالا سی و هەشتان ژ بەر کو نەبوون ژێ رە ئالیکار پێ نەبوو هلدە گرانبارێ هان پشتی گەلەک شەڕ، کوشتن و مرن ئالا شەڕ داخست خوە سپارت ترکان تەڤی خەلکێ خوە بوو دیل و بندەست خورتەمێر کوشتن، قەلسێ وان بەردان چیڕۆکا شوورەش گەلەکی درێژ تێر ناکن ژێ رە ئەڤ رووپەلێن هان ژ مە تێ خوەستن دڤێ ببیرن هەردەم ڤێ یەکێ بدن بەر چاڤان قڕاک تۆت و کوند کەتن وارێ من چێژکێن جەنگیز کۆلیدارێ من ++++++++++++++++++++++