شاعیر: ویساڵی
کتێب: دیوانی ویساڵی
سەرناو: لەم قەریە تەماشا کە لە قەسر و لە وەتاغی

لەم قەریە تەماشا کە، لە قەسر و لە وەتاغی
نییە شارێ لە جیهاندا بە میسلی قەریەیی باغی


شەیدایە هەموو کەس وەکوو بولبول لە جیهاندا
بۆ نێرگسی بوستانی و بۆ غونچەیی باغی


میزماری چەمەنزارە وەکوو خولدی بەرینە
بەم نەوعە کە پشکووتووە یەکسەر گوڵەباغی


سوبحانە تەماشا کە لە مەسنووعی ئیلاهی
لەم میوەیی شاماتە و لەم سێبی موراغی


دەورانییە پەروانەسیفەت عالەمی دونیا
بۆ مەجلیسی مەیخانە و بۆ شەمع و چراغی


ئەم باغە چو مەیخانە کە پڕ بەزم و نەوایە
گوێ بگرە تۆ یەکبار لە ئاواز و کوڵاغی


بڕوانە ویساڵی کە نەما نووری جەماڵی
سەد حەیف کە لەم باغە نەما شەوق و دەماغی


هەر کەس کە لە ئەشعاری تۆ بێت و ببینێ
مەعلوومە دەزانێ کە ئەتۆ هەر قەرەداغی

++++++++++++++++++++++