شاعیر: ویساڵی
کتێب: دیوانی ویساڵی
سەرناو: ئەوا ڕەنگ زەردی جانان و حەزینم

ئەوا ڕەنگ زەردی جانان و حەزینم
بە دائیم چاو بە گریان و حەزینم


قەدیم من بولبولی باغی وەتەن بووم
ئەوێستا حەپسی ئالان و قەرینم


وەکوو پەروانە بۆ شەمعی جەماڵت
خەریقی چەرخی دەوران و حەزینم


لە دووریی یوسفی ڕۆخساری تۆیە
وەکوو یەعقووبی کەنعان و حەزینم


لە شەوقی قامەتی لەیلە کە دائیم
- - - - - - - - - - -


لە دووریی وەسڵی تۆیە ئەی حەبیبە
کە مەهجوورم لە خێشان و حەزینم


سەبەب مارووتی چاوی تۆ بوو قوربان
منی هارووت لە زیندان و حەزینم


بەبێ دەرمانی لوقمانی وەسڵت
زەلیلی زەخمی هیجران و حەزینم


لە هیجری نووری تۆ ئەی شەمسی عالەم
بە میسلی ماهی، نوقسان و حەزینم


ئاوابێ تاجی لوتفی دەوڵەتی تۆ
گەدایی گشت گەدایان و حەزینم


لە شەوقی مەسڵی دانەی خاڵی ڕووتە
ئەسیری داوی هیجران و حەزینم


لەگەڵ ئیکمالی عەشقی تۆیە قوربان
خەمیدە و پشت نوقسان و حەزینم


وەکوو بەهرامم بۆ ڕوویی گوڵەندام
زەلیلی دەرک و ئەیوان و خەزینم


لە بۆ مەجمووعی زوڵف و پەرچەمی تۆ
ئەوا من دڵ پەرێشان و حەزینم


بە بێ ئەنفاسی عیسایی دەمی تۆ
ئەمن مردوویی بێ جان و حەزینم


لەبەر گریانی هیجری نووحی وەسڵت
غەریقی ئاوی تۆفان و حەزینم


بە چۆگانی بەڵای دووریی وەکوو گۆ
زەلیلی سەحنەی مەیدان و حەزینم


لەبت چەشمەی حەیاتە وەک سکەندەر
منم تەشنە بە لێوان و حەزینم


بە ڕەسمی دۆستی ڕەحمێ بفەرموو
بە من دائیم، بە ئەفعان و حەزینم


بە فاقەی قەتعی مەیل و حوببی تۆ
منی بێچارە عوریان و حەزینم


لە قافی هیجرەتا کەی بوو ویساڵی
منی عەنقا بە حیرمان و حەزینم


بە فیردەوسی جەماڵت ئەی حەبیبا
منم سووتاوی هیجران و حەزینم


لە دووی نووری شوعلەبەخشت
ئەوا کوێری دوو چاوان و حەزینم


لە بۆ عەکسی ڕوخ و سەروی باڵات
میسالی شێخی سەنعان و حەزینم


لە بۆ نەفعی شەبابی عومری تۆیە
کە پیر و عومر نەقسان و حەزینم


بە ڕەمزی غونچەی باغی سینەت
وەکوو بولبول غەزەلخوان و حەزینم


بە ئوممێدی وەفا تەرکی دڵ و دین
مەکە، وەک من پەشیمان و حە زینم


سەبەب زوڵماتی کوفری زوڵفە قوربان
کە فانی نووری ئیمان و حەزینم


لە بۆ پەروانەی وەسڵی جەماڵت
بە مسیلی شەمع بە سۆزان و حەزینم


دەزووی سەبرم بە میقرازی غەمی تۆ
بڕاوە گەر بە گریان و حەزینم


دڵم گەرمە بە ناری ئاوی عەشقت
بە دائیم ئەشکباران و حەزینم


مەکەن مەنعم لە گریان و لە ئەفغان
کە شێتی دەستی پەریان و حەزینم


لەپێشدا جامیعی عیلم و عەمەل بووم
ئەوێستا مەست و نادان و حەزینم


بە ناری مەجمەری عەشقی حەبیبە
کە دل بیمار و بوریان و حەزینم


خودا ڕەحمێ بە حاڵم کە منی ڕوو
سیا، غەرقی گوناهان و حەزینم


بە زستانی فیراقی قەددی تۆیە
لە کوێستان ڕوو بە گەرمیان و حەزینم


بە وەسڵی ڕەحمەت و لوتفی زەروورەت
وجووبی من بە گریان و حەزینم


بە لوتفی خۆت بکە مەحووی گوناهم
کە من داعی بە غوفران و حەزینم


خوداوەندا بە عەفووم شاد بفەرموو
ئەگەر بێ عەقل و نادان و حەزینم


بە ڕەحمی خۆت نەجاتم دە خودایە
کە تەفرەخاری شەیتان و حەزینم


خودایا نووحی عەفووم بو بنێرە
کە غەرقی بەحری عۆسیان و حەزینم


ویساڵی بۆ ویساڵی ڕەحمەتی تۆ
بە دائیم دەم بە قورئان و حەزینم


منم عاشق بە ڕەعنایی قەدی تۆ
منم دائیم بە گۆچان و حەزینم


بە تیغی غەمزەت و هەم سەهمی موژگان
شەهیدی تیرەباران و حەزینم

++++++++++++++++++++++