شاعیر: کەمالی
کتێب: دیوانی کەمالی
سەرناو: ئەی مانگ لە لای خۆت تاکی جوانی

ئەی مانگ لە لای خۆت تاکی جوانی
وا دەماغ بەرزی و لەسەر ئاسمانی


گەشت و گێل ئەکەی بە دڵی بێ خەم
شەوق ئەدەیتە سەر ڕووی هەموو عالەم


بە شۆخی و جوانیت بۆچ مەغرووری تۆ؟ 
خۆ نیتە باڵا و برژانگ و برۆ


زەردە خەنە و ناز عیشوە و پێکەنین
قسەی ڕەنگین و گفتوگۆی شیرین


دیدەی وەک نێرگز زوڵفی وەک شەوبۆ
ئەی مانگ ئەمانەت لە کوێ هەیە تۆ؟ 


خۆزگە تۆ مانگی منت بدیایە
تاکوو خۆت لە بەر چاو بکەوەتایە

++++++++++++++++++++++