شاعیر: کەمالی
کتێب: دیوانی کەمالی
سەرناو: ساقی لە داخی خەمی زەمانە

ساقی لە داخی خەمی زەمانە
دەردم گرانە


دەخیلم هەڵسە زووکە ئازانە
تو خوا مەردانە

***

بگەرە فریام یەکجار پەشێوم
زۆر بار بەلێوم


عەوداڵی دەشت و ڕەهەندەی کێوم
وا قوڕ ئەپێوم

***

سوپای خەم و دەرد هێرشی هێنا
ئەمڕۆ تا فەردا


وڵاتی دڵم ئەکا ئیستیلا
کەس چاری ناکا

***

ساقی گیان مەگەر تۆ بە پێکی مەی
جەیش و سوپای خەم


بشکێنی ئازا ڕزگارم بکەی
لە دەرد و ماتەم

***

بە یادی دیدەی مەستی سێوەنگت
تێکە پێکی مەی


لە شەوقی لێوی ئاڵی گوڵ ڕەنگت
بمدەرێ پەی پەی

***

دڵەی بە تاڵان براوم قوربان
لە دەست سوپای خەم


بسێنەرەوە توخوا ساقی گیان
تکات لێ ئەکەم

***

هەرچەندە دڵم بێ کەڵکە لای تۆ
ئازیز بزانە


بمێنێ چاکە نەونەمامی تۆ
بۆتۆ قەڵغانە

***

دوور ئەخاتەوە لێت دەرد و بەڵا
بە ڕۆژ و بە شەو


بەڵا گەردانی باڵاتە بە خوا
بێ خۆراکە و خەو

***

ئەسووڕێتەوە وەکوو پاسەوان
هەرگیز ناسرەوێ


ئەپاڕێتەوە لە قاپی یەزدان
قەزات لێی کەوێ

***

کە وا بوو ئازیز شەرت و وەفات بێ
ترسی خودات بێ


ڕزگاری بکە با هەر لە لات بێ
عەبدی دەرگات بێ

***

حەیفە پێت بڵێن کە بێ وەفا بوو
چاری نەکرد زوو


بە تاڵان برا دڵەی کۆست کەوتوو
وا لەکیسی چوو

++++++++++++++++++++++