شاعیر: کەمالی
کتێب: دیوانی کەمالی
سەرناو: گیانەکەم بۆچ وا لەگەڵما هەر بە قار و قینی تۆ

گیانەکەم بۆچ وا لەگەڵما هەر بە قار و قینی تۆ
بۆچ وەها تینوو بە خوێنی عاشقی میسکینی تۆ


من کە دیلی زوڵفی تۆم بۆ چی بە شمشێری برۆت
ئەمکوژی بە خوا گەلێ بێ مروەت و بێ دینی تۆ


بێ سەبەب دائیم لەگەڵما ترش و تاڵە ڕووت کەچی
هێندە تالعداری لای من وەک شەکر شیرینی تۆ


پێم بڵێ ئەی زوڵفی دلبەر بۆ بەقەسدی کوشتنم
دائیمە مایل بە پێچ و تا و حەڵقە و چینی تۆ


چوویتە ناو باخ ئەمڕۆ بێچارە وەنەوشە بوو خەجڵ
گەردنی کەچ کرد بەرامبەر وردە خاڵی شینی تۆ


مونفەعیل بوون و خەجڵ پەروین و مانگی یەک شەوە
هەر کە دەرکەوت تاقی ئەبرۆ و پڵپڵەی زیوینی تۆ


ئەی فەلەک ئەی دوژمنی ئینسانی خاوەن عەقڵ و فام
بۆ چی هەر حامیی کەر و گا و پیاوی بێ تەمکینی تۆ!

++++++++++++++++++++++