شاعیر: ئاغا عینایەت کتێب: دیوانی ئاغا عینایەت سەرناو: فېکری جوانی سەبارەت: هێنانە سەر ڕێنووسی هۆرامی: ئاکۆ مارانی فېکری جوانی ... کەوتەن وە یادم فېکری جوانی بەدبەختیی بەختم با خاس بزانی ڕەنج و مەشەققەت نەی دنیای فانی هېمای نەفامام جە زیندەگانی نەوېیارام یەک ڕۊ وە کامەرانی هېمای نەچەشتم هەوای گەرم و سەرد داخڵ وەفېرقەی بەدبەختانم کەرد فرسەتش نەڎام بزانۇن دەردان جە ئەڎا و بابۊ مەحرۇمش کەردان جە ماڵ و ئەمواڵ خەیلێ فراوان پەی من وە جا مەن میراسی ئەوان ڕۊزگار ناستش بنیشۇن وە شاد هەر ڕۊ وە دەردێ یەکسەر شی وە باد شەرحش خاس نېیەن پەرێ ئەوگاران مەبۊ وە سەربار پەی دەردەداران وەلحاسڵ وەی تەور وېیارام چەن ساڵ ڕۊ نە ڕۊ بەڎتەر نە فېکر و خەیاڵ چەن ڕۊ نە مەکتەب موعەلېم وەندم کۊرە سەوادێ وە دەست ئاوەردم تا ئاخر هەوای سواری کەردم چەن ڕۊ بویارۊن هەم چەنی مەردم ئەسپ و زین چەنی تفەنگ و قەتار کارم هەر ئین بۍ نە سوب تا ئێوار چەنی ڕەفېقان مەکەردم بازی گاهێ سواری گا تیرئەندازی ئەو ڕۊ نەو زەمان گەڎا تا دەروېش تایفولملۇک هەر کەس پەرێ وېش هەر کەس لەشکرێ پەی وېش ڕازنا دەستە و بەستەیێ پەی وېش سازنا هەر کەس پەی کەسێ لەشکرێ کېشان جە قەتڵ و غارەت دەست نمەکېشان تەمامی ئێران ئینە کارش بۍ جە شا تا گەڎا یە بازاڕش بۍ شا چەنی میللەت، میللەت چەنی شا ئەو پەی ئېستېقلال، ئېڎ مەشرۇتە خا چەن ساڵێ وەی تەور نە مابەین وېیەرد ئاخر مەشرۇتە، قاجار جەبەین بەرد ئەحکامی ئەوان پېچیا وە هەم مەجلیسی میللی نە جاش بی مەحکەم تا بیست و پەنج ساڵ دەورەی هەرج و مەرج هەر کەس هەر چېش بی تەمام کەردش خەرج جە موددەی مەساف ئی چەندین ساڵە هەر شارێ پەی وېش نەی فېکر و حاڵە تا شاران یۊتەر جە بەین مەوەردەن عەشایر تەمام تەرەقی کەردەن جە سەنەی هېجری ئەلف و شین و میم پەهلەوی نە تەخت قاجار بی موقیم سەنەی قەمەری من حیساب کەردم ئیشتیبا نەبۊ مەعلۇم جە مەردم هەزار و سێسەد، چواری شەمسی تاجگوزاریش کەرد نیشت نە ڕۇی کورسی مەتڵەب با نەی جا بمانۊ پەی وېش بشین وەسەر وەخت تایفانی پېش هەر کەس نە جای وېش ئېستېقلالش بی هەر کەس خاک و ئاو یە مەحاڵش بی هەر یەک تەرتیبێ پەی وېش دا قەرار سوارە و نۊکەر ئەساسەی شکار هەر یۊ مەحاڵێ پەرێ شکارش هەر یاگێ وەش بی پەرێ هەوارش سېیاچادران نە سەوزی و شەتاو فېکری ئەو تەمام دڵ کەردەن کەواو بۊی نەسیمی سوبح جە ئەترافانش زوانم لاڵەن جە تەعریفانش عەتری گوڵاڵان سەحرا و دەشت و دەر هەر یۊ نە ڕەنگێ مەکەردش زیوەر سەدای ژەرەژان نە سەرکڵاوان هەر یەک وە تەرزێ جەرگم شکاوان چریکەی شاهینان وەبانی ماوە هاژەی عوقابان وە ڕۇی هەواوە هەر وەخت مەکەردیم ئارەزۇی شکار نە شادی و وەشی ئەو ڕۊ تا ئێوار هەر کەس ئەساسەی وېش مەکەرد تەیار هەرچی لازم بۍ مەگیریا وە بار بنە و ئابداری ڕاهی مەکەردین شەو مەنزڵگامان وە کۊ مەوەردین مەپۊشان نە بەر بەرگی کۊگەردی لاقەید بین نە وەشت، نە گەرمی و سەردی چەند نەوجەوانان شۊخی تیرئەنداز پەی ئەوان جەرگم مەگېران وە گاز بەگزادە و نۊکەر ئەسڵەحە مەوەرد جەو دما وەکېڵ حەرەکەت مەکەرد ڕۇ مەکەرد نە کۊ هەر یەک جە لایێ هەر یەک وە ڕەنگێ هەر یەک سەدایێ ئاهېستە و کەم کەم پارېز مەوەردین ئاخر کەڵڕەمان نەزەر ماوەردین ئەوان بۍ خەوف بین نە مەرگی وېشان بېخەبەر جە حاڵ ئېشی گېیانکېشان تفەنگی پەنجتیر لۇل چۇن سېیامار فیشەک چەشنی ڕەش مەکریان نە کار سەدای مەردومان نە هەر کڵاوێ شلېک مەکەردن مەمدران تاوێ یۊ مەوات ئاما، یۊ وات من کوشتم یۊ وات ئافەرین بۆ دەست و مشتم تەفرەقە مەوین جەرگەی کەڵڕەمان هەر یۊ نە لایێ مەکریا بېگېیان ئەو نە خۊفی گېیان وە ڕۇی کەمەردا پەی ڕاگەی نەجات نە هەر گوزەردا تەقالا مەدا بەربشۊ وە بەر تفەنگچی نەو جا گېرتەبۍ گوزەر سەدای تفەنگان جە لارە کاوان دەنگ مەدا وە هەم، کاوان مەلاوان دیم ئاما کەڵێ سەرسام بیم لېوە کەم کەسێ دېیەن ئەو شکڵ و شېوە شاخ و هەیکەڵش تەمام درشتەن خاڵ سېیا و سفید خالېق وېش ڕەشتەن شیم ئەو پارېزش بۍ خۊف و خەتەر تا یاوا بەو جا گېرتەبېم نەزەر عەجەب نە شادی ئەڕۊ نە مەردم ماردەم ئیشارەی ڕۇی سینەش کەردم جە سەدای تفەنگ ڕۊ بی چەواشە کەفت نە ڕۇی زەمین ئەو شېوە و لاشە ترېقەی پەنجتیر وە سافی ماوە لۇلە مەپېکا وە ڕۇی هەواوە کەڵافە مەوەست وە ڕۇی قەڵوەزدا تۇلی قەڵوەزەش نە هەزار گەزدا شیم ئەو سەرینش زامدار و خەستە من کە دیم ئەو حاڵ، ئەو شېوە و جەستە دیم کە مەناڵۊ بەو حاڵ و بەو دەرد بەو زامی کاری هەناسانی سەرد هۇناو جارییەن سەر تا وە دامان ئەوگارەن جە دەرد نە ئېشی زامان هۊرکېشام خەنجەر سەرش جېیا کەم ئاما وە جواو چەنی من کەم کەم واتش بېئینساف هەرزەی هەرزەکار بېخەبەر جە دەرد چەرخی ڕۊزگار چەن ساڵەن وەی تەور ئینە کارتەن نەی گشت ئازارە چۇن قەرارتەن کوشتاری ئېمە وە خاس مەزانی هەر وەخت کە یاوای وە پەشیمانی باوەر وە نەزەر حاڵ و جەستەی من ئی هۇن جاری جەستەی خەستەی من بۍ ئەجر نېیەن جە لای خوڎاوەند شا و گەڎا چۇن هەم مەکېشۊ وە بەند تۊ کە نە بادەی جوانی مەستی حەرفی من جە لات نەدارۊ هەستی گۊش نەڎام وە حەرف نەپەرسام جە ئەو سەر جېیا کەردم وە دەوانی دەو هەرچی وە من وات بەو دڵەی پەڕ دەرد واتەی ئەو وە من ئەسەر نمەکەرد نەزانام گەردۇن ئینە کارشەن هەر کەس وە دەردێ گرفتارشەن ساڵ نە دوازدە شاخ وېنەی کۊماج شا وە موڵکش بۍ وە کەس نەڎۍ باج چەندین سەیادان دېیەبۍ وە چەم چەند میر شکاران پېچابۍ وە خەم تا ئەو ڕۊ ئەجەل نامەش پەی وانا پەنجەی تەقدیرش نە ڕۇی ئەو شانا قابېز ڕۊحش وە من دا قەرار هەر ئینەن کارش چەرخی ڕۊزگار هەر کەس وە کەسێ گرفتار کەرۊ ئینسان و وەحشی مارۊ و مەوەرۊ لاشەش کەفتەبۍ بە وېنەی گامېش ئەمن جە وەشی ئەو جە ئېشی وېش کەس نېیەن ئەو حاڵ جەو وەخت بزانۊ ئەگەر بزانۊ چەنی دەس شانۊ ڕەفېقان نەو وەخت هەر یەک جە لایێ جەم بین نە لای من جە سایەی مایێ چەن بار هېزم جەماوەر کەردین ئایرێ نەوجا عەمەڵ ئاوەردین هەر کەس پەرێ وېش پوخت و پەز مەکەرد کەباب و چایی چەنی ئاوی سەرد هەر ڕۊ نە جایێ هەر شەو نە کاوێ هەر لەحزە بەزمێ نە سەر سەراوێ گاه تیرئەندازی نە وەر مەغاران گاه شۊنی کەڵڕەم نە سەر دېیاران گاهێ وە تاپڕ وە ڕۇی هەواوە گاه گاه وە پلچە وە سەری ماوە نە هەر شکارێ هەر ڕۊ وە بەزمێ هەر ڕۊ وە عەیشێ هەر ساتێ ڕەزمێ چەند ساڵ و چەند ماه وەی کارە وېیەرد لاقەید جە غوسسە و هەناسانی سەرد هیچ کەس نەپەرسۍ نە شا تا دەروېش هەر کەس شایێ بۍ نە مەحاڵ وېش من پەرێ ئەو ڕۊ جەرگم کەواوەن قۇت قنیاتم زۊخ و هۇناوەن ئەو ناز و نېعمەت ئەو شایی و وەشی یەکسەر وە یەک ڕۊ جە دەسمان بەرشی چۇن کەسێ نەبۍ قەدرش بزانۊ عاقیبەت پاسەن مەبۊ نەمانۊ هەر کەس کەوتەبۍ وەتەمای کەسێ فەرزەند جە بابۊ خەبەر نەپەرسۍ کۆمەک وەنەگبەت یۊتەر مەکەردەن هەر کەس وە نەوعێ نە بەین مەوەردەن جە کوشت و قەزا و مەردوم ئازاری یەکسەر گرفتار وەی دەردی کاری ئەوەند زەحمەتان پەی وېشان تاشان تا ئاخر دەوڵەت کەفت وە تەماشان توخمی ئېنقلاب وست نە دلېشان بەعزێ وە حقۇق بەعزێ وە نیشان یەکێ وە خەلعەت، یۊتەر وە وەعدە یۊتەر وە خەیاڵ خدمەتش کەردە تەمام ئەسڵەحەی وېشان جەم کەردەن وە مەیلی وېشان وە مەرکەز بەردەن یەک جە قینی یەک هەر کەس پەرێ وېش جە زوڵمی یۊتەر بېزابېنۍ لېش بە ئەو خەیاڵە حەربە نەمانۊ دەوڵەت تەمامی حەقی ئەو سانۊ موختەسەر نەگبەت وەی تەور نە ڕا بەرد هەر کەس وە دەردێ کەڕ و کۊرش کەرد نە ئەو سەفحەی غەرب غەیر جە هەورامان باقی عەشایر سەر تا وە دامان پەرێ ئېتاعەت دەوڵەت حازر بین هەر ئەمرێ مەکەرد وە سېدق و یەقین نە ڕای ئەنجامش گېیان بازی کەردەن وەی تەور یەکایەک جە مەیدان بەردەن تەنها هەورامان وەحاڵی وېش مەند دەوڵەت کە هەر چەند دانە پەرێش شەند حقۇقی دەوڵەت جە دۇر مەوەردەن نزیکی ئەسڵەن کەس نمەکەردەن تا ئاخر دەوڵەت ئەمر دا قشۇن بکېشان پەیشان وە بۍ چەند و چۇن ئوردۇی دەوڵەتی چەند شەوان و ڕۊ کېشیا پەرێ قەلعەی جوانڕۊ ئەو ڕۊ نە قەلعە حەرەکەتش کەرد بەگزادە تەمام چەنی وېشان بەرد قەسەم و قورئان پەیشان مەوەردەن پەرێ ڕاهنما تەماس مەکەردەن پېش قەرەوڵیان وە کەورگ یاوا هەورامی نەو جا کەردش وە داوا سێ شەو و سێ ڕۊ نەو جا جەنگ کەردەن نە هەر دۇ تەرەف تەلەفات وەردەن قشۇنی دەوڵەت هەر ڕۊ وە تەرزێ تەقالا مەڎان پەی یاگەی بەرزێ موددەی یەک ماهێ نە دەوری قشڵاخ نە تۊی بەرف و یەخ وە دڵەی پەڕ داخ خەیلێ ئېفتېزاح نەو جاگە وەردەن چەنی موددەعی نەبەرد مەکەردەن ڕاگەی پەس و پیش پەرێشان نەمەند نە دەوری وېشان مەکەردەن کەمەند تا ئەو ڕۊ دنیا چەرخش نە کارەن پەی ئەو خزمەتە جەرگم خارخارەن ئەهلییە و ڕەعیەت مەنسۇبی ئەوان سابېقەی زوڵمێ چەنیشان کریان مەئیۊس بین نە حاڵ گوزەشتەی وېشان پەی ئېنقلابێ هەر ئاخ مەکېشان تا ئەو ڕۊ وەی تەور پېش ئامەدش کەرد هەر کەسێ پەی وېش ئەسڵەحە ماوەرد مەڎان نە تەحوېڵ ساحېب مەنسەبان ئیتاعەکېش بین وە دیدە و وە گېیان قەول و ئېتمینان پەی وېشان سەندەن هەر کەس ئوردۇیێ پەرێش مەوەندەن نە یەک جا حیلە نە جا جا فشار ئەسڵەحە وەی تەور تەمام کەردەن بار ناگا جە تەقدیر چەرخی چەپ کردار دایېم چەپگەردی پەی وېش دان قەرار هەر نە فرسەتەن پەرێ بەدبەختان کەچبازەن چەنی گرۊی زام سەختان ئی عومری کۊتا پەرێش دان قەرار جە ساڵ تا وە ما نە سوب تا ئێوار وە دیدەی تەحقېق وە نەزەر باوەر عەیش و نیشاتش، شەربەت و شەکەر هەر یەک دەردېوەن یۊ جە یۊ بەڎتەر بېوەفا و پۇچەن فایدە و زەرەر ناڕەزایەتی دنیای دۇن پەروەر نەی جا بمانۊ تا (یەومولمەحشەر) بشین وە سەروەخت کاری هەورامان ئەو شایی و وەشی سەرتا وەدامان یەکسەر بېیۍ وە شین کەفت نە دلېشان پاشیان وە هەم قەومان و خوېشان هەر یەک نە لایێ بۍ وە چارەسەر کۊ و بېیابان سەحرا و دەشت و دەر پەنا وە خاکی خارج بەردشان وە کاری ئەوان کۊمەک کەردشان نەی دەمدا ئاغای سپەهبود یاوا وارد وە نەوسۇد بۍ جەنگ، بۍ داوا دیش کە ئەوزاعات دڵ بە واش نېیەن ئەو کەس مەرامەن جە دەس بەرشېیەن خەیاڵێ هەنێ وە نەزەر ئاوەرد ساحېب مەنسەبان تەمام ئېحزار کەرد نە قەسری شیرین تا وە مەریوان دەستۇر دا پېشان وە خەفیە و پەنهان واتەبۍ هەر یۊ نە مەحەلی وېش کۆمسیۆن کەران جە شېخ تا دەروېش خان و خەوانین مالکین تەمام موتەنەفېزین نە خاس و نە عام جەم کەران نەو جا سوئال کەن لېشان ئېلتېزام بڎان پی قەومی وېشان ئەسڵەحە جە لای هەرکەس پەیدا بۊ بە عەزابی سەخت گرفتار مەبۊ زاهېر وەی تەورە دەستۇر دا پېشان باتن نەوعێ تەر واستەبۍ لېشان سەرهەنگ سەقەفی مەمدەلی بەدخۊ مامۇر کریابۍ پەرێ جوانڕۊ وە دام و دانە وە حیلە و تەزویر قورئانی ناهەن مەردم بڎان گیر ماشتەی عەیاری نەو جا وا کەردەن جادۇ و ئەفسانە گشت وە کار بەردەن ئېمەیچ بېخەیاڵ بېخۊف، بېتەقسیر یەکایەک جەم بین سەغیر و کەبیر ئېعلان کەردشان هەر ڕۊ دۇ ساعت حازر بان نەی جا پەرێ مەشوەرەت تفەنگ و خەنجەر هەرچی مەندەبۍ نەعەهدی قەدیم هەر کەس سەندەبۍ لۇلەیڕەشۊکی و دەهەن پەڕ تەمام جەم کەردەن یەکسەر وامەندەی ئەیام دریا نە تەحوېڵ ئېتمینان سەندەن دامی بەدبەختی پەی ئېمە تەندەن بیست و هەشت نە بورج یازدەی دە وېیەرد ستارەی ئېقباڵ ئېمە غرۇب کەرد ئەترافی مەنزڵ ئېحاتە کەردەن ئەسامی ئېمە یەکا یەک وەندەن واتن (حەسبولئەمر) ئاغەی سپەبود دەست نە پا خەتا نەکەردۍ بېخود تەوفیقەن نەی جا چەند شەوانە و ڕۊ تا تەفتیش کەرمۍ قەڵای جوانڕۊ وەلحاسڵ ئەو ڕۊ ئەو گېرتە و بەستە ئەو فشاری سەخت ئەو حاڵ و جەستە ئەو زەلیلی دەست گرۊی بەدکارە تا دنیا دنیان جەرگم خار خارە چۇن وەبۍ تەقسیر وەی تەورە کەردەن جە ویر نمەشۊ تا وە ڕۊی مەردەن شەرەفی چەند ساڵ ئابڕۇ و حورمەت یەکسەر دان وە باد بېدۇن بېجېهەت قەڵەم نە شەرحش تەمام عاجېزەن جەو بۊنە وەهار عومرم پاییزەن پەی کەسێ غیرەت بەشەری دارۊ هەر ساتێ مەرگێ وەنەش مەوېیارۊ نەک بە وېنەی من بېعار و بەدبەخت وامەندەی دەوران جەفا و زوڵمی سەخت پیشیای بۊتەی جەوری زەمانە ناڕەزا جە دەس خوېش و بېگانە شەرحی حاڵی وېم نەی جا بمانۊ دڵەی پەڕ زوخاو هەر قوڵ بشانۊ چواردە ڕۊ وەی تەور نەو یاگە وېیەرد شەو و ڕۊ کەردیم چەنی ئاهی سەرد ناگا نەی دەمدا سەردار ئەکرەم ڕەئیس و نەجیب خاس و موحتەرەم چەندێ نە دەوران دنیای وېیەردە نە ڕای ئېحتېرام زیندەگی کەردە ستەمدیدەی دەست چەرخی چەپوەردە پەنای شەرافەت سپەبود بەردە وارد بی نەو دەم وە دەستی بەستە ژاکېیا و مەفلۇک مانېیا و خەستە سەفا و سەلامێ نە مابەین وېیەرد سەر گوزشتەی وېش تەمام بەیان کەرد واتش ڕەفېقان یارانی دېرین هەر جە مەریوان تا قەسری شیرین یەکسەر وەی دەردە گرفتار بېیەن ئابڕۇ و حورمەت جە دەس بەرشېیەن کەس نمەزانۊ پەی چېش وەی تەورەن یا کاری بەشەر هەر زوڵم و جەورەن وە هەرحاڵ ئەو شەو وە ڕۊ ئاوەردین پەرێ مەینەتان هەر ماین نەمەردین سەحەر کە خورشید بەر ئاما وە بەر ئەو ڕۊ ڕۊیێ بۍ بە وېنەی مەحشەر چەند شەوانە و ڕۊ مەوارا وەتاو ئاسمان و زەمین بی وە دەریای ئاو ئەمری حەرەکەت نەو دەمدا دریا ئەساسەی قشۇن یەکسەر بار کریا واتن ئاغەیان ئېوەیچ حازر بان کەت بەستە و دەسفەنگ پەرێ کرماشان نیزامی تەمام سەف ئارا کەردەن نە بەینی ئەوان ئېمەیچ ئاوەردەن ئەهلی یەی قەڵا تەمامی یەکسەر نمازان یەکێ سەر کېشۊ وە بەر تا یاواین وە دەر خانەقا کەم کەم دین کە مەحشەرەن قوڵ مەڎۊ وە هەم هەر جە مەریوان تاوە جوانڕۊ کەت بەستە و بەدبەخت کریان ڕەنجەڕۊ هەر چوار نەفەر وە هەم مەوەستەن دۇ نەفەر نیزام نە مابەین وستەن نە هەر دۇ تەرەف دۇ سەف دان قەرار پا وە پای ئېمە هەر سوب تا ئێوار ئەو تۊفانی سەخت ئەو وەشت و وارە ئەو زوڵمی سەنگین ئەو جەرگی پارە ئەو بەحری قیرین ئەو هەڕگ و لیتە ئەو باری سەنگین ئەو فەزېحەتە ئەو زەلیلی دەست گرۊی بېڕەحمە ئەو ڕۊی بەرگەشتە ئەو مژ و تەمە ئەو جە یەک بڕیای بابە و فەرزەندە مەبغۇزی نەزەر لای خوڎا و بەندە نە هەزار یەکێ تەعریفی ئەو ڕۊ دەفتەر سېیا کەم تەمام نمەبۊ ناگا نەی دەمدا بی بە واوەیلا وېنەی واقېعەی دەشتی کەربەلا بڵند بی نە ئەوج سەدای زاریی و شین فەڵەک پەی ئېمە مەڕېزا ئەسرین سەدای خانمان وەناز پەروەردە نە پەردەی عېسمەت زیندەگی کەردە وە بانگی بېشەرم وە سۊزی دەرۇن ناڵەی زاریشان یاوا وە گەردۇن یە چە ڕۆژێ بۍ ئېمە دین وە چەم نەدېیەنش وەی تەور ئەولادی ئادەم مەواتن سەردار سام سەنگینم ڕۆ بابۊی فەرزەندان نازەنینم ڕۆ هەر یەکێ ڕەئیس یەک مەحاڵم ڕۆ مەعقۇڵ و مەقبۇڵ پەڕ کەماڵم ڕۆ یەکێ مەواتش برای خاسم ڕۆ شارەزای دیوان شاشناسم ڕۆ بۍ خۊف و خەتەر وە دام کەفتەم ڕۆ زامانی کاریی ئېش نەسرەفتەم ڕۆ شېرانی سەنگی ڕۊی نەبەردم ڕۆ لاقەید نە هەوای گەرم و سەردم ڕۆ بېباک نە دوژمن ڕۆژی جەنگم ڕۆ سوپای سەلم و تۇر هەم فەرەنگم ڕۆ کوشندەی گرۊی کەڵڕەمانم ڕۆ هۊسای تیرئەنداز ماردەمانم ڕۆ سەیادی کۊگەرد شۊخ کەمانم ڕۆ ساحېب بەزم و ڕەزم میر هامدەمانم ڕۆ پەرێ ڕۊی شکار بېقەرارم ڕۆ دارای شەوق و زەوق میر شکارم ڕۆ دەنگ بڕیای نە سەرکڵاوانم ڕۆ شۊن بڕیای نە پای شەتاوانم ڕۆ نەچیرگای قەدیم بېساحېوم ڕۆ زەلیل و زگار حاڵ پەشېوم ڕۆ ئەساسەی شکار میراس کەفتەم ڕۆ ئاخ زامانی سەخت ناسۊر کەفتەم ڕۆ زەمزەمەی نۊکەر دیواخانم ڕۆ بەرزە هەوارگەی ئېڵاخانم ڕۆ شۊڕە سواران ڕۊی مەسافم ڕۆ بۍ خەوف و خەتەر بۍ گەزافم ڕۆ ئەسڵەحەی تەیار گشت خاسانم ڕۆ تەفرەقەی دەستی ناکەسانم ڕۆ ئەسپ و ماین و زین وە جا مەندەم ڕۆ نۊکەر و ڕایەت پەراگەندەم ڕۆ خانمان وە ناز بېناز کەفتەم ڕۆ ئای دیدەی لېڵاو ئېش نەسرەفتەم ڕۆ بابۊی مناڵان نازەنینم ڕۆ وە ناز پەروەردەی شۊخ جەمینم ڕۆ قەڕەچۊڵ بڕیای ڕیشەکەنم ڕۆ بۍ قەدر و حورمەت هەزار پەنم ڕۆ ئەسیر کېشکریای کول شارانم ڕۆ تەفرەقە و تەقسیم زیندانانم ڕۆ زەلیل و ژێردەس بېویجدانم ڕۆ دۇچاری دەردان بېدەرمانم ڕۆ نە گۊشەی زیندان کەساسکەفتەم ڕۆ بېچارە و فەقیر زبانبەستەم ڕۆ بۍ خەرجی و موحتاج هەم عوریانم ڕۆ سۊچیای زوڵمی سەخت دڵبریانم ڕۆ ناخۆش و زەعیف گشت مەفلۇکم ڕۆ هەر یەکێ ڕەئیس یەک بلۇکم ڕۆ ڕۊپەی بەرگەشتەی ڕۊزگارم ڕۆ بۍ دەوا و عیلاج ناهەنجارم ڕۆ وە فدای ئەسیران بېکەس مەندەت بام بۍ یار، بۍ یاوەر پەراگەندەت بام فیدای سەیرانگای کۊسارانت بام کۊچ و مەنزڵگای وەهارانت بام دمای زاری و شین، واوەیلا و مەحشەر حەرەکەت کریا پەرێ ڕوانسەر ئاسمان و زەمین سەردابۍ وە هەم ماچی پەی ئېمە گېرتەبین ماتەم ئەو ڕۊ ڕۊیێ بۍ تاریک و زوڵمات نەی پېش ئامەدە عەقڵ مەبی مات هەر تا وە زانۇ نە تۊی هەرگ و ئاو هەم واران و وەفر مەوارا وە تاو ئەو ڕۊ تا ئێوار وە چەند دەردیسەر شەو مەنزڵگامان بی وە ڕوانسەر ماڵ تەنگ و تاریک بۍ ئاگر پەڕ دۇد ژێر خاک لیباس تەڕ هەوا نەبرۇد هەر نەوع وە هەر حاڵ ڕاهی بین جە نۊ دامان نە ئاوی سەردی وشکەرۊ وەی حاڵی پەشېو هەڕگ و هەوای سەرد بۍ نان، بۍ خۆراک دەرد وە بانی دەرد گرۊی بېویجدان هەم نە چوار ئەتراف مەشین وە ڕاوە مەڎاشان گەزاف ئەو ڕۊ هەم وەی تەور جە سوب تا ئێوار نە قەڵعەی ڕەزا مەنزڵ دا قەرار ئەو شەویچ نەو جا زیندەگی کەردیم نان و خۆراکێ وە گیر ئاوەردیم سەحەر دۇبارە حەرەکەت کەردەن قەڵعەی یاوەری نەزەر ئاوەردەن گوزەرگا نە پای قولـلەی وەیس مەوېیەرد هەر چەند ئېلتېماس ئېلتېفات نەکەرد ئەڵبەتە ئېمەش مستەوجېب زانا وەر نە پەی تەقاس نەردێ مەشانا هانا هەر وەتۊن وەیسی یەمەن ماڵ بازهەم هېممەتێ نە دمای هەشت ساڵ ئەو ڕۊ تا ئێوار وە دەوانی دەو مەنزڵ وە مەنزڵ تا مەنزڵگای شەو پاپەتی و برسی ئەلعەتەش پەی ئاو سەدەمەی وەی تەور کەس نەڎېیەن نە خاو غورۇب وارد بین وە قەڵعەی یاوەر جای کەسافەتێ گېرتەن ئەو نەزەر پەی ئېمە نەوجا تەویلە و ئەنبار تاریک و نۇتەک مەنزڵ دان قەرار بە وېنەی حەیوان پەڕ بۍ نە مەردم سەرتا پا مەملۊئـ نە سپێی گەندم نە خەو نە خۆراک پا زەخم و ناخۆش مانېیا و مردگ نائومېد دڵڕەش تەعریفی ئەو شەو بۍ زېیاد و کەم حەشر و جەهەننەم هەر دۇ دین وە چەم وە هەر گېیانکەنشت شەو کەردین وە ڕۊ خوڎا سا مەرگێ مەنزڵ ئەو کۊ بۊ سەحەر هەم جە نۊ بە وېنەی جاران سەف ئارا کەردەن نیزام سواران مەحبۇسین نە تۊی تەویلە و ئەنبار یەک یەک شمەردەن کەردشان قەتار ڕۊ نە کرماشان حەرەکەت کریا بنە و بارخانە یەکسەر باردریا یاوان نە گۊشەی قفەی گڕاوەنگ چەند ساعەت نەو جا ئېمە کەردەن لەنگ نە تۊی قفەدا ئېمە و نیزامی تا چەهار ساعەت ئەو سا تەمام بی ڕاهی بین وە ڕا نەو دەشتی بۍ پەی داخم شەو مەنزڵ کۊ بۊ خوڎا کەی وەلحاسڵ ئەو ڕۊ جە گشت ڕۊبەڎتەر مانېیا و خەستە مەنزڵ هەم دۇرتەر قەڵعەی هۊمەرمل وە مەنزڵ کەردین ئەو شەویچ نەو جا زوخاوان وەردین سەحەر پەرێ شار حەرەکەت کریا وېنەی هەردەجار تەرتیبات دریا ئېعلان کەردەبین وە تەمامی شار ئوناس و زکۇر، سەغیر و کېبار پەرێ تەماشا نە کەناری شار بەیان بوینان ئەسیرانی زار وەی تەور نمایش مەڎان بە وېشان ئەسڵەن خەجاڵەت هیچ نمەکېشان میللەتێ وە مەیل ئیتاعەکېش بۊ گېرتە و بەستەی ئەو هونەرش چېش بۊ وە یەک نمایش واردمان کەردەن چمان ئەسیری خارج ئاوەردەن گاراژێ نەو جا تەهییە کەردەن مەنزڵگای ئېمە بەو یاگە بەردەن بە وېنەی حەیوان گەلە و گوسفەند کەردەن نە ئەو جا وە سەد هەزار پەند ئەو کەسە خەتای خانەدان کەرۊ قاتڵی چەند کەس وە دەس باوەرۊ ڕەفتارش بەو تەور نمەبۊ چەنیش بە غەیر جە ئەشخاس نامەرد و بەدکیش دە شەوانە و ڕۊ نەو یاگە وېیەرد بۍ فەرش و پۊشاک نە ڕۇی خاک و گەرد ڕاگەی زیندەگی بەستەبین لېمان یەکی نانێ وشک مەڎریا پېمان دمای سەدەمە و زوخاو نە ئەو جا دەسە وە دەسە حەرەکەت دریا جە موددەی دە ڕۊ چەند نەفەر مەردەن هەر نە کرماشان نەعشش سوپەردەن یەکێ نادرسان هەورامانی تەخت دۇهەم فەتحوڵڵا ئێناخی بەدبەخت سا وە هەر نەوعێ کەسافەت کاری حازر کەردشان ماشینی باری پەنجا شەست نەفەر نە تۊی یەک ماشین مەئمۇر و حەبسی چین نەبانی چین وە چەند ئېفتېزاح حەرەکەت کەردەن ئېختېیار نەبۍ هەر جا مەوەردەن ڕاهی بین وە ڕاه تا وە نیمەشەو مەنزڵ وە مەنزڵ وە دەوانی دەو تا ئەسەدئاباد خەستە و نیمەگېیان تەویلە و کادان مەنزڵ دان پېمان ئەو شەو وە هەرحاڵ وە ڕۊ ئاوەردین پەرێ بەدبەختی هەر ماین نەمردین سەحەر هەم جە نۊ حەرەکەت کەردەن نە ڕای هەمەدان گوزەر مەکەردەن وەختێ نیمەڕۊ نە کەناری شار ئیستگای ماشین نەو جا دان قەرار نیم ساعەت کەمتەر مدران نە ئەو جا ئەمری حەرەکەت دۇبارە دریا مەنزڵگای ئەو شەو قەزوین دان قەرار مەدارا نەبۍ ئەو ڕۊ تا ئێوار ڕاگەی دۇرێ بۍ ئەو ڕۊ تەی کریا ئای چەند زوخاوان وە مەردم دریا نیمەشەو وارد بەو یاگەی خەراو مانېیا و مردگ ئەلعەتەش پەی ئاو چېش واچۇن چەنی وەنەمان شېیەن سەحرای کەربەلا وەی تەورە نەبېیەن دۇ شەوانەو ڕۊ نە قەزوین وېیەرد جا تەنگ و تاریک هەوا تۊف و سەرد بەعزێ ئېفتېزاح نەو جا دین وە چەم نەدېیەنش هیچ کەس ئەولادی ئادەم ساحېب مەنسەبان یەک ئۆردێ وەندەن یەکێ سێ قەران جە گردین سەندەن واتشان ئاشێ لازمەن پەیتان ڕەفعی خەستەگی ڕاکەرۊ لېتان یەک ئاشێ ماشێ پېمان بارکریا وە هەر تەرتیبێ زەهری مار کریا داخم هەر ئینەن نەی دنیای ستەم هەر کەس هەر کارێ نەوینۊ وە چەم واتەی کەسێ تەر ئەسەر نەدارۊ نەی گۊش مەشنەوۊ نەو گۊش مەوېیارۊ بازە با هەر وېم بسۊزۇ وە دەرد تا ڕۊی قېیامەت چەنی ئاهی سەرد چۇن وەبۍ جېهەت دۇچار بېیەنان نە تۊی پۊسی وېم بریان بېیەنان دۇبارە ماشین هەم حازر کریا ئەمری حەرەکەت پەی مەرکەز دریا دمای نیمەڕۊ واردبین وە شار باخی شا مەنزڵ ئېمە دان قەرار تا یاوان بەوجا هۇراشان کېشا یەعنی حازر بان پەرێ تەماشا چەند دەسە سەرباز بە خەتە و زەنجیر ساحېب مەنسەب و مۇزیک و شەستیر پلەی سەختی بۍ ئەو ڕۊ نە ڕێمان ئومېدی حەیات نەمەن پەرێمان نە بەدبەختی بۍ ئەو هەم نەکریا نەک جە خۆشبەختی تەسویب نەڎریا تەمام حەبسی کول تەحویل دریا سەد نەفەر نە تۊی یەک ساڵۆن کریا ئەفسەری شاهی نەو جا ئەمری دا کەتی بەستەمان ئەو سا وا کریا وەلحاسڵ دە ڕۊ هەم نە باخی شاه زیندەگی کەردین وە سەد ناڵە و ئاهـ جەو دما یەک ڕۊ سەف ئارا کەردەن مەحبۇسین تەمام بەو یاگە بەردەن دەسە وە دەسە ئەسامی وەندەن پەرێ زیندانان تەقسیم مەکەردەن گاهێ وە دڵتەنگ گاهی هەم دڵشاد ئېمەشان هەم بەردەن وە عیشرەت‌ئاباد یەک شەوانە و ڕۊ نەو جا هەم وېیەرد وە چەند خەیاڵات هەزار ئاهی سەرد پەرێ چل نەفەر ماشین ئاوەردەن یەک نە شۊن یەک کول سوارکەردەن وە هەر تەرتیبێ حەرەکەت کریا شاری قوم مەنزڵ شەو قەرار دریا ڕاهی بین وە ڕاه تا وە نیمەشەو واردبین بەو جا بۍ خۆراک، بۍ خەو دۇ حەپسی تاریک یاگە دان پېمان بە وېنەی حەیوان ئەو شەو بی جێمان سەحەر دە نەفەر بەردەن وە زیندان باقی ڕاهی بین پەی شاری کاشان ئەو ڕۊ تا وە عەسر مەدارا نەبی گېیان نە جای سەختەن چەنی بەرنەشی ئەو شەو وە کاشان وە ڕۊ ئاوەردین سا وە هەر نەوعێ زیندەگی کەردین دە نەفەر نەو جا باز هەم جېیا بی حەواڵەی زیندان کاشان کریا بی بیست نەفەر ئېمە پەرێ ئەسفەهان حەرەکەت دریا خەستە و نیمەگېیان ساعەت دوازدەی نیمەشەو تەمام ئېمە دان تەحوېڵ مەدرەسەی نیزام دۇ حەبسی تاریک بۍ نان، بۍ خۆراک جا تەنگ و نمناک غەڵتان نە ڕۇی خاک بۍ خورد و بۍ خاو شەو وە ڕۊ کەردین جە حەد وېیەردە زوخاوان وەردین ئەو ڕۊ کە سێزدەی عەیدش مەوانان ئېمە دان تەحوېڵ حەبسی ئەسفەهان دمای تەشریفات قانۇن و تەفتیش هەر کەس هەر چېش بۍ تەمام سەندن لېش تا ئاخر جەم بین نە تۊی زەخیرە ئەو ڕۊ دان پېمان قاتوخ و جیرە نمرەی یەک مەعلۇم کەردەن پەرێمان نە تۊی پەنج ئوتاق قەرار دان جێمان ئەو شەو ساکن بین تا وە سوب سەحەر واتشان ئاما بیست نەفەرێ تەر ئەوان هەم جەلای ئېمە جاگە دان هەورامانی تەخت چەنی مەریوان ئیسە بۍخەبەر، بۍ جورم، بۍ دەلیل جە دیوانی حەرب مەحکەمە تەشکیل دۇ ڕۊ پەی دەر پەی یەکسەر کول بەردەن هەر یەکێ دۇجار مەحاکمەش کەردەن تا وە یەک حەفتە باسێ نەبۍ یاوەر جەواد خان ناگا حازر بۍ دەسە وە دەسە سەدا کەردشان پەرێمان نامەی ئەعماڵ وەندشان دە ساڵ تا پەنج ساڵ ئېبلاغ کەرد پېمان حەبسی ئەسفەهان کەردەن وە جێمان هەشت ساڵە چەند کەس ئامان و شېیەن هېمای ڕای نەجات پەی ئېمە نېیەن مەزڵۇمی ئېمە جە حەد وېیەردەن کەریم وە زاتت بۍ پەنا و پەردەن جە لای مەخلۇقات ئومېدمان بڕیان فەریادڕەسی کەر ڕیشەمان کنیان وە ڕەحمەکەی وېت ئېحیاکەر ئەم جار خەلاسمان کەرە نەی زیندانی تار ++++++++++++++++++++++ سەرناو: ناردنی شەماڵ و پەنا پێ بردنی یەک ڕۆ نیشتە بیم نە گۆشەی زیندان ڕەنگ زەرد و زایف تەن لوخت و عوریان دڵ پڕ نە زووخاو دەردی پنهانی سەر نیام وە بان کاسەی زرانی دەس کەمەند کەردم نە دەوری زانوو نە دەریای بێپەی هەر باڵ مەشانوو قامەت خەمیدە لوول وەردەن وە هەم تاویای بۆتەی هەتیتەی ستەم زەلیل و زگار دڵ پڕ نە حەسرەت کەوتەی سۆچیای نار و زوڵمی سەخت بێ قەدر و قیمەت بێ یار بێ یاوەر کەسیف و موحتاج مەبغووزی نەبەز ڕەنگم چون خەزان پایزان زەردەن سەرتاپای تەنم ئالوودەی دەردەن هەر دەردەن مەدۆم وە ڕووی زەمیندا هەر ڕۆ دەردێ تەر ها نە کەمیندا یەک دەم ئاسایش پەیمان نەمەندەن هەر ساتێ سەد جۆر گیان لێمان سەندەن هەشت ساڵەن وەی تەور نەی زیندانی تار گرفتاری دەس زاڵم و ئەغیار غەریب و بێکەس پاشیای شاران تەفرەقە و تەقسیم دوور کەفتەی یاران ڕەفێقان تەمام یەک جە یەک بەتەر غەرقەن نە گێجاو دەریای پڕ خەتەر قەومان و خوێشان هەر یەک نە شارێ هەر یەک گرفتار دەستی ئەغیارێ ئەوەند زووخاوان زیندانان وەردەن لووان حەسرەتان وە گڵکۆ بەردەن چێش واچوون جەو وەخت نەزعی گیان کێشان نە یار نە یاوەر نە قەوم نە خوێشان هەرچی چەم مەدان پەرێ خەمخوارێ کەس دیار نەبێ جە هیچ دیارێ ئەڵهای فرزەندان مەکەردەن تاو تاو دڵ ئەر سەنگ مەبی سەنگ مەبی وە ئاو وەلحاسڵ وەی تەور نە گۆشەی زیندان وە بێ ناز کەفتە تا بەر مەشی گیان دەردەم یەک نەفەر حازر مەکەردەن نەعشی ئەو وە حەبس تاریک مەوەردەن نەو جا کەفتە بێ یەک شەوانەڕۆ تا دوکتور بەیۆ تەسدیق بکەرۆ ئەو سا مەوەردن وە کەناری شار بێ قەدر و حورمەت بە وێنەی ئەغیار یاران عەزیزان گرانەن دەردم ئینە دیم وە چەم هەر مام نەمەردم هەر جە ئارۆوە تا عەهدی ئادەم سەدەمەی وەی سەخت کەس نەدیەن وە چەم ئارەزووم ئێدەن وەی دنیای فانی قاسیدێ مەحرەم ڕازی نیهانی باخەبەر نە حاڵ جەمعی زیندانی بکیانوون وە لای یارانی گیانی سەرگوزەشتەمان تەمامیی یەکسەر مەنزڵ وە مەنزڵ پێشان دۆ خەبەر تەفەککور کەردم غەیر جە بای شەماڵ مەحرەمی ڕازەن حاڵزانی ئەحواڵ زەحمەت کێش بییەن پەرێ بەدبەختان سەفا بەخش بییەن پەرێ زام سەختان هەر ئەو مەتاوۆ ئەنجام بدۆ کار کارش هەر ئێدەن هەر سوب تا ئێوار طرفة العینێ دنیا تەی کەرۆ هەر خەبەرێ بۆ مارۆ و مەوەرۆ شەماڵ فیدات بام گرانەن دەردم فەریادڕەسی کەر وەرنە ها مەردم شەماڵ ئامانەن مەدارا مەکەر ڕاگەی وڵایەت بگێرە نە وەر یاخوا وێران بۆ ئەسفەهان تەمام بییەن وە دۆزەخ ئێمەی خاس و عام حەرەکەت بکەر جەی وەر مەکانە یاخوا بۆ وە جێی باوەقوشخانە ڕاگەی دلیجان بگێرە نە وەر مەنزڵگان نەو جا لادێ نیگا کەر ئەر مەیلی سەیران نەتەنز و کاشان نە سەری ڕاتەن بویەر نە لاشان نەو جا وییەردی منارانی بەرز بەرق مەدۆ وە هەم وە سەد هەزار تەرز مەعسوومەی قومەن گرتەنش قەرار وە زاهیر مەدفوون وە باتن بێدار شەماڵ دەخیلەن ئامان سەد ئامان زەلیل و بەدبەخت دەستم وە دامان هەر تا مەتاوی نەو جا ساکن بەر پەی نەجاتمان ئیلتیماس بکەر مەلجەء و پەنای شاه و دەروێشەن ئاگا نە ئەحواڵ بێگانە و خوێشەن پەرێ تەقسیرات زوانم لەنگەن دەستگیری کەرۆ عەرسەمان تەنگەن غەریب و بێکەس بێنەوا و فەقیر بێ دوون بێ جیهەت هەشت ساڵ نە زنجیر غیرەت هەر لایق وە ئەوان بییەن ئومێدی حەیات نە دەس بەرشییەن دمای عەرزە و حاڵ مەدارا مەکەر دوو ڕا نەو جا هەن خاس تەشخیس بدەر دەستی ڕاست جادەی شەهری تەهرانەن ئیشتیبا نەبۆ دەخیل ئامانەن نە ئەو جا مەویەر ئامان هۆشت بۆ نەوا ئاسیبێ وە تۆیچ بیاوۆ دارالمظلمەن قەتڵگای عامەن مەنبەعی سدوور حوکم و ئەحکامەن هەشت ساڵەن تەمام ئێمە بێ تەقسیر عەرز و حاڵ مەدەین وە شاه و وەزیر ئەسڵەن جوابێ پەی ئێمە نییەن زوڵمێ وەی سەختی کەی بی کێ دییەن شەماڵ دەسی چەپ جادەی عێراقەن بگێرە نە وەر تاقەتم تاقەن مەنزڵ وە مەنزڵ تا سوڵتان ئاباد سەیری وێت کەرە تۆ وە خاتر شاد نە ڕای هەمەدان حەرەکەت خاسەن زووتەر مەیاوی مەسڵەحەت پاسەن هەر وەخت کە یاوای وە کۆهی ئەلوەند لادە نیگا کەر بەو سەحرا و دەروەند هەمەدان یاگەی پڕ سەفا و سەیرەن پایتەختی قەدیم شاه و وەزیرەن نەو جا نیگا کەر پەی کۆهانی بەرز خەتخەت و ڕەنگ ڕەنگ هەر یەک وە یەک تەرز کۆی بیستوونەن نە عالەم بەرزەن نەقش و نیگارش وە هەزار تەرزەن مەشهووری عامەن ئوستادیی فەرهاد ڕەنجش پەی شیرین یەکسەر شی وە باد سەیری نەقاشی بیستوون کەردێ ڕەفعی خەستەگیی ڕاگەی دوور کەردێ ڕشتەی شاهۆکۆ وەر نەدەی نەدەس شەماڵ دەخیلەن تا ئاخر نەفەس ئەو ڕانموونە پەرێ کوردستان مەیاونۆت بەو جا وە سووک و ئاسان نەو جا وییەردی پەڕاو دیارەن نە فەرقش دایم تەم و بوخارەن (دایم الاوقات) وەفراو جارییەن بەرز و بڵندەن خاس دیارییەن یاگەی کەڵڕەمان میر شکارانەن مەنزڵگای وەهار شەدەلارانەن سەختیی کۆی پەڕاو مەشهووری عامەن ئەو هەم نە جای وێش ساحێب مەقامەن تاقەوسان نەپای ئەو نەقشش کنیان کۆسی کەیخەسرەو نەو یاگە ژنیان شیرین و خەسرەو وە شەودێزەوە تەمام سەرداران شەڕ ئەنگێزەوە نە وەحش و تیوور هەرچی هەن نە عام کول نەقشش کنیان خولاسەی کەلام چەشمە و سەراوێ نەو جا جارییەن شەماڵ نیگا کەر خاس دیارییەن سەیرانگای سەییاح تەمامی دنیان ماچان تەعمیرش هەم تازە کریان شەماڵ مەویەرە گیانم فیداتەن کرماشان نزیک نە سەری ڕاتەن شارێ قەشەنگەن پڕ سەفا و سەیرەن بازاڕ خیابان مەغازە و دەیرەن ئەترافاتی ئەو چەشمە و سەراوەن ئەویچ وە مەسکەن ئێمە حەساوەن خاس بگێڵ نەو جا سەیرانی وێت کەر قەوم و ئاشنا باوەر وە نەزەر ئەر دیت ئەشخاسێ پەی ئێمە کەیلەن یا خەفەتبارەن باوەفا و مەیلەن سەفا و سەلامێ ڕەد و بەدەل کەر سەرگوزەشتەمان پەی ئەو بەیان کەر بواچە پەنەش حاڵ و باڵمان سووچیای زوڵمەت کۆی زوخاڵمان جەو دما ئەمری حەرەکەت بدەر وێت ئاسا بناڵ گێجەلوولە وەر ئامانەت فەرزەن دەخیلەن شەماڵ دیارەن قەندیل وەیسی یەمەن ماڵ یاگەی ئومێدەن زیارەتگاهەن دەستگیری مەزڵووم پەشت و پەناهەن سەحرای هۆمەر مل بگێرە نە وەر داخڵ بەر نەو جا بێ خەوف و خەتەر عالی مەقامەن بڵندەن پایەش ڕاحەت کەر یەک دەم تۆ هەم نە سایەش ئیخلاس وەرزی کەر وە دیدە و وە گیان سێ یەکێ ئۆمەت وە ئەو بەخشیان شەماڵ تۆ وەکێل عەرزە و حاڵەنی هەر چەند وێت شەخسێ پڕ کەماڵەنی غەریب و بێکەس دڵ پڕ نە هیجران هەشت ساڵ گرفتار حەبسی ئەسفەهان پیر و زەعیف و هەزار لا بەدبەخت ژاکیای دەوران زوڵم و زۆری سەخت نەحیف و خەفیف مەحرووم جە دنیا ڕیشەی زیندەگی سەد ساڵەم کنیا یەکجار پەشێوەن حاڵ و باڵمان عالەمش گرتەن بۆی زوخاڵمان مەحروومی دیدار ئەولاد و دۆسم وەختەن ئسخوانم بەرشۆ نە پۆسم شەماڵ دەخیلەن هەر تۆ هەنی کەس ئامان دامانش وەر نەدەی نە دەس عەرز کەر نە خزمەت وەیسی یەمەن ماڵ سەر تا وە دامان بووین وە کۆی زوخاڵ دوودی هەناسەم بەرمەشۆ کۆ کۆ مەر قرچەی جەرگم نەیاوان وە تۆ؟ مشکڵ گوشادەن پەی کول کەس هەردەم رجال الغیبەن ئەوتادی عالەم شەماڵ قوربانت ئیستیغاسە کەر تا قەوڵ نەسانی نەو یاگە مەویەر دمای ئیتمینان بوڵند بەر نە ئەوج سەف ئارایی کەر تیپ تیپ و فەوج فەوج خیتەی ناو دەروون بگێرە نە وەر چاڵاوە و بێ هەور باوەر وە نەزەر نەو جا نیگا کەر دەشتی مایدەشتەن سەحرا موسەتتەح ماچی بەهەشتەن تۆتۆ و بن وە بن چاڵاو بگێڵە نەچیرگای سەیاد هەوارگەی خێڵە قاعیدە و قانوون کول جە بەین شییەن قەدیم یاگەی عەیش خەوانین بییەن نەو جا وییەردی دەشتی ماراوەن ئەو جە من بەتەر جەرگش کەواوەن ئەهالی ماراو عاجز و دڵ ڕێش ئازیەتبارەن پەی زیندانی وێش شەماڵ دەستی چەپ فەرامۆش مەکەر شالیاوان مەحدوود خاکی ڕوانسەر ئیسمش مەشهوورەن بیهتەر ئەملاکەن پەی مەردانی ئەوجەرگم چاک چاکەن ئیسە نە زیندان کەوتەن وە بێکار زەلیل و موحتاج چون گەدای بازار ئارام و کەم کەم حەرەکەت بکەر قوللە وە قوللە تا وە ڕوانسەر شەماڵ چەن ڕۆژێ نەو جا مەکان کەر بگێڵە پێشدا ئی سەر تا ئەو سەر ئێڵاخانی بەرز چەشمە و سەراوەن هەر کەسێ دییەن جەرگش کەواوەن یاگەی کەڵڕەمان شکارگای خانەن ئەلحەق شا موڵکەن بیهتەر مەکانەن چەند ساڵ نە دەوران دنیای دوون شییەن یاگەی دەبدەبەی ئەردەڵان بییەن چەند وەلی نیعمەت چەندێ سەرداران وە عەیش و عیشرەت دنیا ویاران چەند والی زادە نەو جا پەروەردەن فەڵەک وە ناکام دووبارە بەردەن چەندێ نۆکەران چەند فەڕاش باشی غوڵام و کەنیز چەنی داواشی چەند سوپا و لەشکەر کۆس و بەشارەت فەڵەک وە یەک جا کول دا وە غارەت ئەوەن نازاران کەفتەن وە بێ ناز پەی ئەوان جەرگم مەگێران وە گاز شەماڵ وە گیانت فەڵەک خدێشەن تا نۆشێ بدۆ سەد نێش نە جێشەن بویەرە نەو جا دڵ بی وە کەواو بشۆ بنۆشە ئاو کانی سورخاو بنۆش ئەو شەربەت چەند جام پەیاپەی شەرتمان ئێدەن یادی ئێمە کەی پشتەو دەرەویان بان زەڕنە تەمام بگێڵە پێشدا وە مەیل و مەرام زەڕنە مەشهوورەن بێتەر ئێڵاخەن چەند خان خەوانین پەی ئەو وە داخەن تەعریف و تەحسین ئەو وەر مەکانە هەرچی بواچوون زیاد مەزانە خەراجیانەن نەو جا دیارەن پەرێ نەعلەی نی ئازیەتبارەن دمای سیاحەت بان زەڕنە کەردی نەو چەشمە و سەراو ئاوێ سەرد وەردی چەپ و ڕاست سەیران ئەمڵاکات نەو جا وەشتەرەن نە سەیر باغی ڕۆح ئەفزا ملەی لۆن نەو جا باوەر وەنەزەر چاڵاوەی گەشن بگێرە نەوەر نە ملەی گەشن سەر باوەر وە بەر سەیری ئەمڵاکات ڕوانسەر بکەر چە خاس دڵگیرەن ئەو زێد و ماوا شەماڵ وە گیانت جەرگم شکاوا بویەرە کەم کەم کڵاو وە کڵاو تا مەشی وە بان چاڵاوەی سورخاو چەند خان و ئەمیر نەو یاگە نیشتەن عەجایب ئاوەن خوا سروشتەن ساتێ ڕاحەت کەر باسەفا و سەیرەن سەوز و خوڕەمەن یاگەی نەچیرەن جۆق جۆق کەڵڕەمان مدران وە پاوە مەیان مەویاران وە لارە مارە نەو جا ویەردی گڵکێ دیارەن ئامانەن شەماڵ جەرگم خار خارەن پەی توولی کەلام ئەر تاقەت بارۆ هەر قولە سەنگێ یەک ئیسمێ دارۆ ئەو تونکە تونکە یەکسەر هەوارەن مەنزڵگای عێڵەن یاگەی دەوارەن پەی ڕۆی نەدامەت نە جەمعی مەردم چەن وەختێ مەنزڵ نەو جاگە کەردم ئیسە هەر ئەو فیکر ئەو خیاڵ ئەو خاو سۆچنان جەرگم کەردەن وە کەواو نە ویر نمەشۆ تا وە ڕۆی مەردەن دین و ئیمانم جە دەسم بەردەن بەدبەختی بەختەن شەماڵ گیانی تۆ وەر نە من جە کۆ ئەسفەهان جە کۆ دەس مەدەر نە زام گشت گیانم خەستەن عەقڵ ڕای تەقدیر هیچ وەخت نەبەستەن شەماڵ مای میرەن جە حەد بەرشییەن شکارگای قەدیم حکوومەت بییەن ڕاحەت کەر نەوجا یەک شەوانە و ڕۆ تەمام سەیران کەر خاکی جوانڕۆ شەماڵ هۆشت بۆ گیانم فیداتەن سەراوگەڕ نەو جا نەچێری پاتەن ئامانەن دەخیل چێش مەکەری پێم ها وەختەن ئایر یەکجار بشۆ لێم حوبولوەتەنەن نیسفولئیمانەن فەرموودە و تەسدیق پێغەمبەرانەن تا سەیری شاهۆ تەمام نەکەری تەشریف وە دێهات پاین نەوەری مای میرەن بەرزەن سەفا ماوەرۆ نیگا کەر نەو جا تا چەم کار کەرۆ هەر جا مەیلت هەن یەکسەر دیارەن ئەر سەحرا و دەشتەن ئەگەر کۆسارەن ئای شەماڵ یەکجار گرانەن دەردم چەند شەوان نەو جا وە ڕۆ ئاوەردم چەنی چەند سەیاد ڕەفێقی خۆشخۆ کارم هەر ئید بی هەر شەو تا وە ڕۆ سەحەر هۆرێزە نە ئەو سەر کڵاو تەشریف بەر وە بان کانییەکەی مەڕیاو ئاوی حەیاتەن جامێ بنۆشە وە گیانت شەماڵ قەلبم بێهۆشە ئاخێزکەر نەو جا کەل بەورەوارەن گوزەرگای عێڵەن ڕاگەی هەوارەن چەند ماجەمینان نەو جا وییەردەن چەنێ نازاران حەسرەتان بەردەن چەند خان خەوانین ئامان و شییەن کۆچ و تەڵمیت بار ڕەنگینش دییەن بویەرە نەوجا سێ خڕان تەی کەر شانشینەکە باوەر ئەو نەزەر شانشینەکەی ساناو مەشهوورەن پەی تۆ نزیکەن پەی ئێمە دوورەن شەماڵ نیگا کەر هەوارێ وەشەن نیشتەن نەو یاگە تەمام دڵکەشەن بنیشە نەو جا باسەفا و بەرزەن سەیران نە ئەو جا وە هەزار تەرزەن بەردی کەشکانەن نە ئەو یاگەی بەرز مەنزڵگای شەوەن وەختی کەڵەهەرز چگاکی ساناو مەعرووفەن نەو جا بەرز و قەشەنگەن پەرێ تەماشا کانی هەمرۆئی نە سەری ڕاتەن سەرکێشی کەرە گیانم فیداتەن چاشتەوەر نەو جا چە خاس دیارەن هەمیشە و دایم پڕ نە شکارەن کەلی کۆلیجێ یاگەی هەواران باسەفا و سەیرەن جاگەی شکارەن مەنزڵگای شەو بێ نە وەختی شکار مەگێڵاین پێشدا دیار وە دیار چەند وەختێ نەو جا وە عەیش و عیشرەت چەنی ڕەفێقان مەکەردم سوحبەت کەلی تفەنگچی و تەڵاش نیگا کەر شەو مەنزڵگامان باوەر وەنەزەر بدیە ئاساری ئێمە نەمەنەن یەکجار هەر ئێدەن گیان جە من سەنەن شەماڵ یانە گشت بدەر دماوە بشۆوە خدمەت پیر خدری شاوە یاگەو مەقامش عالیەن نەو جا مەشهوورەن قەدیم وە ساحێو پەنا مەواچان پیری هەزار ماڵ جافەن فەریاد ڕەس بییەن هەم سینە سافەن باپیرەی جاف و جوانڕۆ بییەن ئیسە ئەولادش گشت زەبوون بییەن ئەسیر کێش کریان وە شارانەدا تەفرەقە کریان وە زیندانەدا سەر گوزەشتەمان تەمام بەیان کەر شەماڵ دەخیلەن بگێرەش کەمەر واچە هەشت ساڵە غەریب و بێکەس زەلیل و بەدبەخت نییەن فریاد ڕەس باپیرەمانەن پەی کەی پەرێ چێش هەرتا مەتاوی تەعنە بدەر لێش ئامانەن شەماڵ نە ویرت نەشۆ کافییەن وەسەن ڕەحمش بجۆشۆ دمای عەرز و حاڵ نەو جا نیگا کەر چەپ و ڕاس یەکسەر باوەر وە نەزەر تەمام دیارەن کۆساران جە دوور داڵەهۆ، بەمۆ دەشتی شارەزوور هەورامان، پاوە وە ئاتەشگاوە شمشێر و سەریاس قشڵاخ تا شاوە گەرمەزناوەن چەنی ماکوان جە نەزەرگاتەن یەکسەر سەراوان ساراوەن چەنی بەنیگەز وەشەن چەشمە و سەراوش تەمام دڵکەشەن جوانڕۆ تەمام نە سەری ڕاتەن بگێڵە پێشدا گیانم فیداتەن دمای سیاحەت قەدەم ڕەنجە کەر ڕاگەی نیگاگار بگێرە نە وەر شانی وزیمە تا کەوە شیروان ڕاخێز وە ڕاخێز دەسم وە دامان بدیە کەڵڕەمان نەو جا چێش کەران جۆق جۆق و فەوج فەوج مەیان مەویەران مەویەرە ئامان بنی بەرد وە بەرد مەخسووسەن وەشەن سەیری هەوشە زەرد کەورگی تفەنگچی ئەسڵی مەکانەن یاگەی زەمرەمەی ڕەئیس و خانەن مەنزڵگای قەدیم سەیادان بییەن هەر وێش مەزانۆ چەند کەسش دییەن ئێمەیچ چەند ڕۆژێ نە عەهدی وێمان ڕەئیس و مەڕئووس ئید بێ خدێمان وەلحاسڵ چەند وەخت وە کامەرانی چەنی ڕەفێقان یارانی گیانی شەوان تا وە ڕۆ وە سەر مەوەردین زەمزەمە و مەزاق شکار مەکەردین بێ خەف و خەیاڵ بێ ئەندێش نە کەس لاقەید جە تەقدیر فەردی فەریاد ڕەس چەرخی چەپ ناگاه چەرخش وست ئەو کار ناغافڵ پێچاش بەوێنەی تۆمار شەماڵ بویەرە دەردی دڵ بێشەن ئەر شا ئەر وەزیر ئەگەر دەروێشەن جوانڕۆ وەشەن بیهتەر وڵاتەن شەماڵ دەخیلەن گیانم فیداتەن مەکان وە مەکان بگێڵە پێشدا یاگەی کێ بییەن کێ گێڵۆ تێشدا چەشمە و سەراوان یەک یک بگێڵە گشت یاگەی خانان مەنزڵگای خێڵە ئاخێز کەر پەرێ دەشتی هەسێران پەی سەیری کاوات یاگەی ئەمیران نیگاکەر کاوات ئاوش چەند سەردەن گرەوش نە ئاو کول دنیا بەردەن قوڕەقەڵا بدیە ئاوش زەڵاڵەن شەماڵ بنۆشە نە تۆ حەڵاڵەن چەمە میرانەن یاگەی سەرداران هەوارگە و مەنزڵ وەختی وەهاران بێڵەگی خەیلێ نە ئەو وەشتەرەن پەی هەردوو، قەلبم پڕ جە نەشتەرەن چەمە میرانەن سۆچنان جەرگم بیەن وە باعیس نەزدیکیی مەرگم چەمە میران بێ مەرکەزی شکار یاگەی عەیش و نۆش مەخسووسەن وەهار هەوارێ وەشەن یەکجار باسەفان عەیبش هەر ئێدەن دنیا بێوەفان ئایشە دۆڵ تەی کەر تا وە دارۆمەرد بانی تووان و شیریدەر بگەرد ملە و دەشتی گەڕ بگێرە نە وەر بیاشۆش سەڕۆ تاوە سەراوگەڕ هەوارگەی پشتگەڕ سەنگلاخ و سەختەن گاگا مەنزڵگای بەندەی بەدبەختەن هەر چەن نە ئەنزار نازیبا و زشتەن شەماڵ وە گیانت پەی من بەهەشتەن ئیسراحەت بکەر نەو چەشمە و سەراو ئامانەن دەخیل جەرگم بی کەواو دمای ڕاحەتی قەدەم ڕەنجە کەر وێرانەکەی من بگێر ئەو نەزەر داخڵ بەر نەو جا خەستەگی دەرکەر خاس دیققەت بدەر مەلاحیزەش کەر وێرانەکەی من نە پای ئەودارەن مەنزڵگای قەدیم لەیل و نەهارەن دار وەنێ نەو جا گرتەنش قەرار عومرش زیادەن نەدارۆ شومار سەر بکێش نەوجا بزان کێ مەنەن یاگەی کێ بییەن ئیسە کێش چەنەن ++++++++++++++++++++++ سەرناو: هەواڵ هێنانی شەماڵ بەو نام بەو نیشان سەر کێشام نەو جا دیم کە دوو کۆتەی سۆچیای سیا کەوتەن نە بەر ماڵ مەناڵان وە دەرد دەم دەم مەکێشان ھەناسانی سەرد چەند نەفەر ئەولاد سەغیر و کەبیر نە لاشان کەوتەن بەوێنەی ئەسیر واتم ئێوە کێن پەی چێش وەی تەورەن مەر کاری دنیا ھەر جەفا و جەورەن واتشان تۆ کێی پەی چێش مەپەرسی دەردەدارەنی یاخۆ چە کەسی واتم من قاسید دەردەدارانم مەحرەم و ھامڕاز شەو بێدارانم ڕەفێق و شەریک دڵ ئەوگارانم ئاگا نە ئەحواڵ پەشێو حاڵانم یارانی عەزیز نووری دیدەتان ساحێب جا و مەقام بەرگوزیدەتان ئەشخاسێ ئەو سا نەی وەر مەکانە جای پەنا و مەلجەء خوێش و بێگانە سەردار و ڕەئیس خان و بەگزادە لاقەید نە بەشەر شاھ و شاھزادە ئیسە نە زیندان بێکەس و مەھتووک بێ قەدر و قیمەت مەریز و مەفلووک ھەر یەک نە شارێ تەفرەقە کەوتەن جۆشیای زوڵم و تاویای بۆتەن غەریب و بێکەس، موحتاج و بەدبەخت زەلیل و ئەوگار فشارانی سەخت وەزع و حاڵشان وەی تەور پەشێوەن دووی ھەناسەشان بێشتەر پەی ئێوەن ئید واتم ناگا کەوت و شی نە ھۆش وە دەم دەردەوە بەرئاما خرۆش واتش ئەی شەماڵ ھەی بەرگوزیدەم قەدەمت وە بان بینایی دیدەم یە تۆ بیت ئامای جە لای دەردەدار نە خاوی غەفڵەت ئێمەت کەرد بێدار سەرگوزەشتەمان جە حەد وییەردەن بەدبەختیی ئێمە بێ پەنا و پەردەن چەند ساڵ نە دەوران فامیل وییەردەن نە ڕای ئیحترام زیندەگی کەردەن ناگا چەرخی چەپ خول ئاوردەوە زەمزەمە و بیسات یەکسەر شەردەوە مەحرووم نە دیدار برا و کەس و کار یەک جە یەک بەتەر بیەن گرفتار ئابڕوو و حورمەت نە دەسمان شییەن ئیختیاری موڵک وێچمان نییەن ئەوەن بەدبەختی و سەختی و دەربەدەر ئینتیزاری دەس ڕایەت و نۆکەر نەی کڵاوەدا کەفتەنم کەساس کەس نمەپەرسۆ خراو تا وە خاس ئایرێ شییەن نە پەڕ و باڵم عالەم بێزارەن نە بۆی زوخاڵم ئایرێ گرتەن سەرتاپای تەنم بییەن وە کۆتەی سۆتەی جەھەنم شەماڵ فیراقەن سۆچنان جەرگم زیندەگی بێزار ڕازی وە مەرگم شەماڵ فیراقەن فەرقم شکاوان وە گیانت قەسەم مەگێرەم تاوان فێراقەن تێشە نە فەرقم شەنەن فیراقەن ڕیشەی عومری من کەنەن فیراقەن ئایر وەردان نە جەستەم کەم کەم سۆچنان پێشەی شکستەم فیراقەن غەرقم کەردەن نە دەریا ڕەنجی سەد ساڵەم وە عەبەس بریا ھیجرانەن بییەن سەرباری دەردم ھیجرانەن باعیس ئی ڕەنگی زەردم ھیجرانەن وە گاز جەرگم مەکێشۆ ھیجرانەن قەلبم دایم مەجۆشۆ ھیجرانەن شعوور نە دەستم سەنەن ھیجرانەن یاسین پەی مەرگم وەنەن ھیجرانەن ھەرگیز نە ویر نمەشۆ ھیجرانەن لیباس ئازیەتی پۆشۆ ھیجرانەن دڵ کەرد وە کۆتەی قەساو ھیجرانەن زامش نەدارۆ حەساو حەسرەت نمازۆ کۆنە بۆ زامان حەسرەت دەردێوەن نەدارۆ دەرمان حەسرەتەن دایم زامش ھەر وە سۆن ھەشت ساڵەن مەکان حەسرەت جوانڕۆن حەسرەتەن قامەت کەردەن وە کەمان حەسرەتەن سانان بینایی چەمان چێش واچوون شەماڵ گیانم فیداتەن نە ھەزار یەکێ دەردم نەواتەن پەی جەستەی خەستەم کافر کەرۆ شین نە موڵکی وێمان وێنەی غەریبین بێ قەدر و حورمەت کەساس کەوتەکار کزکز مەنیشین نە پەنای دیوار یانەی زیندانی یەکسەر وەی تەورەن شەماڵ وە گیانت پەڕ جەفا و جەورەن ئینە سەرگوزەشت کول خاس و عامەن ھەر چەند عەرزی من گشت ناتەمامەن ڕاگە وەی دووری زەحمەتت کێشان فیدای ئامات بام سەر بدەر لێشان نەی جا وییەردی کەڵێ و توورکەپان ئاڵیاوا چەنی قەریەی ناو خۆشکان ھەر چوار پەرێ زیندانی وێشان تا ڕۆی قیامەت ھەر ئاھ مەکێشان نە ڕای سەفیاوا حەرەکەت بکەر قەڵای جوانڕۆ باوەر وەنەزەر داخڵ بەر نەو جا ئەسڵی مەکانەن پاتەخت و مەرکەز حاکم و خانەن چەند خان و حاکم سەردارش دییەن چەند بەگ و بەگلەر نامدارش دییەن چەند کوشت و قەزا و ئازارش دییەن چەند شەدە لاران نازارش دییەن چەندێ ڕەئیس و وەکیلش دییەن چەند گەدا و دارا و زەلیلش دییەن چەند شادی و وەشی و شیوەنش دییەن چەند سوپا و لەشکەر کولینش دییەن زەمزەمە و نۆکەر دیواخان دییەن سەفا و سەیرانگای ناو باخان دییەن چەندێ تەپڵ و کۆس بەیداخش دییەن چەندێ داخدار و بێداخش دییەن چەند قازی و خەتیب مستەوفیش دییەن چەند شێخ چەند دەروێش چەند سۆفیش دییەن چەند خانم خاتوون مەحبووبش دییەن چەندێ غاڵب و مەغڵووبش دییەن چەند مونشی باشی و دەبیرش دییەن چەندێ سەرعێڵ و ئەمیرش دییەن شەماڵ وە گیانت ئینە کول واتم ئامان و لووان فیدای ئاماتم دەورانی گەردوون چەپگەردی کەچ نەرد سەنگی بنچینەی گردین بەر ئاوەرد مەرکەز و ماوای ئابا و ئەجدادەن قەلب و ڕۆحمان بەو یاگە شادەن یاگی بەزمگای شادی و وەشیمان چمان خاوێ بێ دیمان نەدیمان ناگا و ناغافڵ بێخەبەر جە دەرد فەڵەک پەی ئێمە دیسان شانا نەرد سەرگوزەشتەمان ھەر تا وە ئارۆ شەرحش نە فەوقەن لازم نەدارۆ نەو جا نیگا کەر دەخیلەن شەماڵ خاس دیققەت بدەر بە حاڵ و ئەحواڵ ئەر دیت ئەشخاسێ تاقەتش تاقەن ئانە گرفتار دەردی فیراقەن ئەر دیت کەسانێ دەردش گرانەن ئانە سۆچیای ناری ھیجرانەن بدیە ھەر کەسێ جە کەسان تاکەن ڕەنگ زەرد و زایف دیدە خەمناکەن کەوتەن نە گۆشەی کووچە و کەلاران وێنەی پووڵی قەڵب ناڕەوای شاران زەلیل و زگار کەفتەن وە بێکەس بزان و نەزان مەکێشۆ نەفەس بۆی کزەی جەرگش نیشتەن نە ڕووی عەرش تەن لوخت و عوریان نە پۆشاک نە فەرش وێنەی یەتیمان نە پەنای دیوار نە موڵکی وێشان خارجی و ئەغیار ئانە تۆ وەی تەور مەوینیش وە چەم خانمێ بییەن ئەعلا و موحتەرەم نامەحرەم نەدیەن کەس وە دیدەی وێش ئیسە ناعیلاج بییەن وە دەروێش شەماڵ وە گیانت جەرگم بریانەن شەو و ڕۆ دایم کارم گریانەن یەکێ مەوێنی کەوتەن نە سەحرا خاتوونێ بییەن موقتەدیر دارا یەکێ پەی فەرزەند دەردش کارییەن یەکێ سەردارش نادیارییەن یەکێ براڵەش وە ئەسیر بریان یەکێ داراییش کول غارەت کریان ئانە فەرزەندش نە دەسش شییەن کەمکەم بیناییش نابینا بییەن ئانە مەوێنی کەوتەن، مەناڵۆ فەرزەندەن پەرێ بابۆش مەلاڵۆ ھەر کەس مەوینی دەردش کارییەن دەرمانی دەردش نادیارییەن شەماڵ وە گیانت دنیا خەسیسەن نۆکەر و یەتیم وێشان ڕەئیسەن ئەو مەکان وەزعش ڕێققەت ئاورەن جۆشی دەروونم چون سەماوەرەن بویەرە نەو جا نەگبەت ماوەرۆ دەردشان سەختەن پایان نەدارۆ شەو و ڕۆ دایم شین و زارییەن نە باتی ئەسرین ھووناو جارییەن بازە ھەر بەو حاڵ جەستەی پەشێوە تا ڕۆی قیامەت گێج وەران پێوە شەماڵ قوربانەت نەو یاگە مەویەر زیارەتی مەرقەد شێخ فەتاح بکەر بشۆ وە خدمەت ئەو پیری کامڵ سەرگوزەشتەمان چەنی دەردی دڵ بەد بەختیمانەن چەنی نەدامەت دیدار بینیمان کەوتە قیامەن زەلیل و غەریب موحتاج و بێکەس ھا وەختەن بەرشۆ ئاخەرین نەفەس دنیا وەی تەورەن عیلاج نەدارۆ نە عەھدی قەدیم ھەرتا وە ئارۆ نە مەیدانی ھەقق عالەم کول خەستەن ڕای قەزا و قەدەر ھیچ کەس نەبەستەن حەرەکەت بکەر نە ئەترافاتش بگێڵە پێشدا قەریە و دێھاتش کەش و کۆسارش یاگەی شکارەن ئاساری ئێمەیچ نەو جا دیارەن فرێمان کردەن نەو یاگە شادی پەیمان بوازە گەردەن ئازادی فیدات بام شەماڵ زەحمەتت کێشان یانەی زیندانی سەر بدەر لێشان دمای سەیرانگای جوانڕۆ کەردی کەش و کۆسارش گێجەلوول وەردی ڕاگەی گەرمەسێر بگێرە نە وەر چەشمە و سەراوان باوەر وە نەزەر باڵەخانییەن نە سەری ڕاتەن ئاوش بەوێنەی چەشمەی حەیاتەن موڵک و دێھاتش باسەفا و سەیرەن جە گشت نیعمەتێ پەڕ دەخڵ و خەیرەن یانەی ئیقباڵەن دایم زاریشەن پەرێ سەردارش بێقەراریشەن ئەوان ھەم چەند ڕۆ وە کامەرانی عەیشی وێشان کەرد نە باڵەخانی فەڵەک ھەم پەی ئەو دیسان شانا نەرد ئیقباڵ ئیقباڵش نەو جا غورووب کەرد ماچی ڕۆی ئەزەڵ پەی زیندان تاشان گەدا نە لای ئەو وێنەی پادشان شەماڵ بویەرە نەو جا پەی زلان چەشمە و سەراوەن بیھتەرین مەکان خسووس سەراوبەس نەو جا مەشھوورەن مەجۆشۆ مەیۆ تەمام پەڕ نوورەن پەشتی سەراوبەس کۆی سارا وەنەن ئێڵاخی وەشەن ڕیشەی دڵکەنەن ئەم دەس و ئەو دەس تەمام بگێڵە کول ماجەمینەن ھەوارگەی خێڵە یاگەی نازاران ماجەمینانەن مەنزڵگای قەدیم میر و خانانەن دەشتی گوڵاڵە تا بەردی زەنجیر چەند حاکم دییەن سەرعێڵ و ئەمیر بەردی زەنجیرەن نەو جا مەشھوورەن ئاو ساف و زەڵاڵ ماچی کافوورەن چەندێ جە مەردان ڕۆزگار دییەن چەن نەوجەوانان کارزار دییەن چەندێ نە دەوران دنیای دوون شییەن یاگەی بەگزادەی باوەجانییەن ئەوان ھەم چەن وەخت نە دەوری وێشان ڕۆزگارێ وەش ھەمڕا بێ پەیشان نارا و بەنیگەز مێراوا گێڵە شەماڵ وەگیانت کول یاگەی خێڵە نە ھەر جا بدیە جارییەن سەراو مەخسووسەن ئاوی چەشمەی بێڵەتاو خاک و ئاو وەی تەور ناپەیدا کەمەن جای کیشت و زەرعەن مەنزەرگای چەمەن عێڵ و تایفەی پەڕ حەشەم دارۆ عەیبش ھەر ئیدەن ڕەئیس نەدارۆ کەدخودا و ڕەئیس گرفتار بییەن نەتۆی زیندانان کول نە بەین شییەن یانەی زیندانی ھەر ئاغە ڕۆشەن ھەر کەس پەی کەسێ دایم بێھۆشەن تاوەگۆز و کڵاش تا باوەجانی شەماڵ بگێڵە تۆ وە نیھانی وە ھەر جا مەشی شین و زارییەن ئەلوەداعی گەرم بێقەرارییەن ئەو سەرزەمینە بگێڵە پێشدا ھەر کەسێ کەسەن نەمەندەن تێشدا خێڵی باوای خدر نە ملەی لێواشە ھەر دەسە دۆعان چەرخ بۆ چەواشە کەرە و شاینگان تا دەوڵەت ئاوا شەماڵ زەحمەتەن خەیلێ ماڵئاوا ئەوانیچ عەشرەت ھەم گرفتارەن زەدەی زامی سەخت نێشی یەک خارەن سەر بدەر لێشان کەسێ نەمەندەن فەڵەک یانەشان نە ڕیشە کەندەن کەرە مەنزڵگای وەلەد بەگییەن چەند شۆڕە سوار ئامان و شییەن نە میر نە ڕەئیس نە سەردار مەنەن یاگەی یانەشان بەزرشان شەنەن سەردار نە زیندان نە قەسری قەجەر نەعشش چون گەدا کێشیان وە بەر نەمەندەن کەسێ نە ئۆجاخشان ڕەعیەتێ بییەن وە ئەربابشان دایم زارییەن نە تۆی یانەشان با ھەر بگێڵۆ چەمەڕانەشان ئای چەند نازاران کەوتەن وە بێ ناز فەڵەک خدێشەن نەشیب و فەراز شەماڵ فیدات بام باوەر وە نەزەر زیارەتی مەرقەد دەوڵەت ئاوا کەر گونبەدێ نەو جا بوڵندەن پایەش شێخی ئیرشادەن بشۆ نە سایەش نەتیجەی پاکەن جە پاک سرشتەن یاگەی ئومێدەن جای پەنا و پەشتەن سەییدەن جە نەسڵ پاکی پێغەمبەر شافعی ئۆمەت ڕۆی دەشتی مەحشەر سەر گوزەشتەمان عەرز کەر نە خدمەت ھەشت ساڵ گرفتار ڕەنج و مەشەققەت موعجیزاتشان مەشھووری عامەن ساحێب ھیمەتەن بوڵند مەقامەن فەقیر و غەریب موحتاج و زەلیل تەڵەب کەر ھیمەت شەماڵ سەد دەخیل ھەرچەن موقەددەر عیلاج نەدارۆ جە پێغەمبەران ھەرتا وە ئارۆ بەشەر حاڵشەن وە ئومێد زیندەن ھیچ کەس ددانی ئومێد نەکەندەن دەوڵەت ئاوا جای شەریعەت بییەن جومعەو جەماعەت تەریقەت بییەن تەکیە و مەنزڵگای دەروێشان بییەن مەلجەء و پەنای دڵڕێشان بییەن ئیسە نیشانێ جە ئەو نەمەندەن فەڵەک ئەساسش بەرچیدە کەردەن ھاشمی ھەشت ساڵ نە تۆی زیندانەن پەی بەدبەختی وێش جەرگش بریانەن بێ جورم و تەقسیر گرفتار بییەن شان و مەقامش کول نە دەس شییەن عایلە و کڵفەت سەرگەردان بەدبەخت جۆشیای کوورەی زوڵم و زۆری سەخت دایم الاوقات شین و زارییەن پەی بەدبەختی بەخت بێقەرارییەن شەماڵ وە گیانت فەڵەک کارشەن ھەر ڕۆ وە نەوعێ یە بازاڕشەن شەماڵ فیدات بام زەحمەتت کێشان قەدیم ئۆجاخان سەر بدەر لێشان کەی مەبۆ زەحمەت تۆ فەرامۆشم حەڵقەی غوڵامی کەردی نەگۆشم نە ھەر جا ڕەئیس کورد زوان بییەن سەردار و ئەمیر کول نە بەین شییەن بگێڵە پێشدا ھەر کەس نە جای وێش یەکسەر فامیلش بییەن وە دەروێش نە جا نە مەقام نە شان نە شێوە کول پەی دەردی وێش شێت بییەن لێوە پارچەی نەوڕۆڵە بگێرە نە وەر سەیرانی دەشتی ماھیدەشت بکەر قەڵای باوانەن ساحێبش نییەن مەرکەزی سەردار سەنجاوی بییەن سێ نەفەر سەردار نەو جا بەرقەرار ساحێو تەپڵ و کۆس بەیداخ و سوار ماڵ و دیواخان دەبدەبە و ئەساس لەشکەر و نۆکەر یۆ جە یۆتەر خاس کەدخودا و ڕایەت تایفەی زیاد گشت خۆش و خوڕەم یەکسەر خاتر شاد نەڕای ئیقتیدار وە کامەرانی چەند ساڵ ویاران نەی دنیای فانی چەرخی چەواشە چون ھەردە جاران تەفرەقەشان کەرد نە کووچەی شاران نە ماڵ نە فەرزەن نە نۆکەر نە کەس ڕەنجی سەد ساڵە بەرشی وە عەبەس وەی تەور پاشیان تەفرەقە و بێکەس یەکێشان ئەو توون یەکێ ئەو تەوەس حەیف پەی جوانان وێنەی شێری مەس لاشەش خاک کەران بێ برا و بێکەس ئیسە نیشانێ لێشان نەمەندەن فەڵەک ئەساسش نە ڕیشە کەندەن وەی تەور پەشێو بی حاڵ و باڵشان کەس نمەزانۆ ڕا مەزارشان شەماڵ بویەرە ماھیدەشت تەی کەر مەدارا مەکەر تا وە چوار زەوەر نیگا کەر نەو جا دەشت گەواوڕەن مەرکەز و ماوای عێڵی کەڵهوڕەن ئەرشەدەن پەرێ تایفان نەو جا مەردانی کاری ھەم ساحێو پەنا سەرحەد نشینەن پەی خاکی ئێران خاکی ئێرانەن ھەم یاگەی شێران میللەتی ئێران دوو خسڵەت دارۆ نە عەھدی قەدیم ھەرتا وە ئارۆ ئیتاعەی ئەمری پادشای وێشان وەتەن پەرەستی بییەن خدێشان خسووس عەشایر جەمعی دلێران پاسەبان بییەن پەی خاکی ئێران چەنی خارجە ھەرچی جەنگ کریان عەمەڵشان نە تۆی تاریخ سەبت کریان پەی ئێمە میللەت ئیفتیخار دارۆ میھەنپەرەستی شەرافەت مارۆ عێڵی کەڵھوڕ بی مقسوودم نەی جا خاک و ئاوشا لەشکر و سوپا ھەر نە چوار زەوەر تا قەسری شیرین مەنزڵگاشان بی تەمام عێڵ نشێن کەوکەبەی داوود ئەو نە عەھدی وێش مەشھوور بێ نە تۆی سەردارانی پێش سەدای تەپڵ و کۆس لفەی بەیداخان دەستگاھی ڕەنگین ماڵ و دیواخان زەمزەمە و بیسات عەمەڵە و نۆکەر کەم کەسێ دییەن تەرەقی بەو تەور چەند خان خەوانین ڕەئیس و سەردار نە فەرمانی ئەو گرتەبێ قەرار سوارانی خاس ئەسپ و زین تەیار بازی مەکەردەن ھەر سوب تا ئێوار تەپڵی حازر باش ھەر وەخت مەژەندەن شەش ھەزار سوار حازر مەکەردەن حەیفەن پەی ئەمیر سەرداری کەڵھوڕ شکست دا وە تیپ بەختیاری و لوڕ چون ڕۆی بەرگەشتە نەدارۆ ئامان نەو جەنگ و داوای ملەی ھەمەدان جە تەقدیری ھەق ئەمری خوداوەند دوو تیر نازڵ بی پەی بابۆ و فەزەند دوو سوپای عەزیم کەردەن چەکاچاک لاشەی ئەمیران غەڵتان بین وە خاک جەو دما فەرزەند چەنی نەبیران چەن ساڵ نە جای ئەو دنیا ویاران ڕۆزگار مەیلش سەرد بی نە لێشان کەم کەم ئیختیلاف کەوت نە دلێشان حوببی ڕیاسەت توغیانی بەشەر مەبۆ وە قاتڵ فرزەند و پدەر مامۆ برازا بین وە خەسمی یەک مامۆی وێشان کوشت پەی بەدبەختی ھەم ھەر کەس خوداوەند ھۆر گێڵاوە لێش ھەر وێش کۆمەکەن پەی نەگبەتی وێش ئیسە نەو فامیل یەکێ نەمەنەن یاگێ یانەشان بووڵشان شەنەن مەحرووم بین نە ڕەنج چەندین ساڵەی وێش گەدا و دەرودەر بەوێنەی دەروێش شەماڵ وە گیانت فەڵەک کارشەن دایم الاوقات یە بازاڕشەن شەماڵ دەستی ڕاست گێڵە دماوە تەختگە و شامار بدەر دماوە یاگەی سەلاتین گۆران بگێڵە وێشان گرفتار عایلەشان وێڵە حەفت سوڵتان نەوجا حوکمڕان بییەن ھیچکام نە جای وێش ئاسارش نییەن کول ساحێو سوار تفەنگچی و نۆکەر یاگەی سوپا خێز سەرباز و عەسکەر تایفە و عەشرەت ئەمڵاکاتی خاس شەجیع و مەربووت مەعقووڵ شا شناس گاوارە مەرکەز حاکم نشین بێ ھەر یەک نە جای وێش ساحێو نگین بێ داڵەھۆ یەکسەر کەش و کۆسارەن یاگەی سەلاتین نەو جا دیارەن زەردە و یارانەن زەھاو تا سەرپێڵ گشت یاگەی چادر کەدخودا و سەرخێڵ قەدیم ئۆجاخان تەفرەقە و فیرار ڕایەت و نۆکەر بییەن وەجادار شەماڵ وە گیانت دڵ پەڕ نە ھوونەن وی تەور مەوینی جەستەی تۆ چوونەن سەر قەڵا چەنی جێگیران تەی کەر بدیە کێ نەو جا کەردەنش گوزەر چەند میر و سەردار نەو جا وییەردەن کۆچ و تەڵمیت بار ڕەنگین پەروەردەن باوەیسێ نەو جا یاگەی سەردار بی جای عەیش و نیشات تەپڵ و سوار بی ھەواش پەی زمسان خەیلێ تەمامەن چەشمە و سەراوش وێنەی حەمامەن سەوز و خوڕەمەن زمسان وەک بەھار چوار ئەترافش وەشەن پەی شکار داخم ئیسە کێ بەو یاگە شییەن پاسە بزانوو ھەر ئەوش دییەن شەماڵ بگێڵە ئەو سەرزەمینە زمسانش وەشەن گشت عێڵ نشینە قەدیم سەرادان یەکێش نەمەنەن یاگێ یانەشان مێخشان کەنەن ڕای دەروەن دەھۆڵ بگێرە نە وەر داری زەنگەنە و ئەزگڵە تەی کەر باخی سەیدی خان ھەوارگەی بنگوێز بەرز و چەشم ئەنداز با سەفا و ڕاخێز سەیرانش وەشەن ئەو پارچەی بەمۆ کول ماڵ جەمینەن شەماڵ گیانی تۆ قەیتوولەن نەو جا یانەی شێخ حەسەن جەرگم بریانەن تەمام بێکەسەن وێش چەنی ئێمە گرفتار بییەن ھەش ساڵ نەی وەرتەر بە ڕەحمەت شییەن ئەو نە تۆی زیندان مەشھەد فەوتش کەرد بێ قەدر و حورمەت وە سەد ئاھی سەرد نە فامیلی وێش وەی تەور بڕیان شۆن کەس نمەزانۆ مەزارش جە کۆن تایفەی نەجیب ساحێو کەرامات فەریاد ڕەسی عام پەی کولی حاجات بێ جورم و تەقسیر ئەسیرش کەردەن ئابڕوو و حورمەت چەند ساڵەش بەردەن ڕۆی گرفتاری ھەرتا وە ئارۆ دۆعا و موعجیزات ئەسەر نەدارۆ قەزای موبڕەمەن عیلاجش نییەن نەزر و سەدەقە کول نە بەین شییەن شەماڵ وە گیانت کڵفەتش وێڵەن بەوێنەی دەروێش کەڵپۆس نە پێڵەن بزان یانەکەش کەس مەنەن تێشدا یاخۆ باوەقوش مەوانۆ پێشدا عایلەش جە کۆ تەفرەقە کریان ماڵ و ئەمواڵش وە میراس بریان دەک فەڵەک چەرخت با چەواشە بۆ نمەبۆ ڕەحمت پەی کەسێ بۆ تۆ بەڕوین بانەدار تا وە خانە شوور ئی سەر تا ئەو سەر نزیک تا وە دوور چەن ساڵ نە دەوران ڕۆزگار شییەن یاگەی قوبادی و باوەجانییەن یاگەی حکوومەت حەیبەڵا خانەن جاگەی دەبدەبەی مستەفا خانەن لازم نەدارۆ شەرحش وییەردەن یە گشت نیشانەی دنیای بێ پەردەن نەو جا وییەردی ئاوی سیروانەن مەشھوورەن مەحدوود خاکی ئێرانەن ئاوی زمکان و لێڵە جەو مەکان داخڵ بۆ نە تۆی ڕوودخانەی سیروان مەعرووفەن نەو جا پردی کناچان قەدیمەن ئیسمش پاسە مەواچان ئیسە وێرانەن ھەر پایەش مەنەن دەورانی گەردوون نە ڕیشەش کەنەن لاوران چەنی بێزەل نە ئەو جان شکارگای وەشەن پەرێ زمستان ئیمامێ نەو جا گرتەنش قەرار جە گشت حەیوانێ پەڕەن نە شکار مەکانێ وەشەن پەرێ زمستان شەماڵ ئامانەن نەوی ھەراسان تایفەی ئیمامی نەو جا دیارەن پەی زیندانیشان دایم خەمبارەن یانەی ھۆسمان بەگ دڵشان نە جۆشەن ھەشت ساڵەن تەمام کول سیاپۆشەن ئەو چەمی سیروان جە دەس وەر مەدەر کوێڵە و ماکوان وەشەن پەی گوزەر یاگەو مەکانی ئیناخی نەو جان پەی بەدبەختیشان جەرگشان بڕیان ملەی لەشکەرگا ھەنجیرک گێڵە زێ وھیر تا ھەوار نشینگەی خێڵە ھەر یەک نە لایێ شین و زاریشەن ھەر یەک وە دەردێ گرفتاریشەن زیندانی ئەوان ھەر یەک نە شارێ تەفرەقە کریان وە سەر دیارێ فەتحڵڵا ھۆسمان ھەرجە کرماشان وەلوولەی تفەنگ سەرباز کوشتشان بدیە ھەر کەسێ ئالوودەی دەردەن ئانە کەسێوەش نە زیندان مەردەن باز ھەر وەو دەرد سەختی گیان کێشان تا ڕۆی قیامەت ھەر ئاخ بکێشان ناحیەی زەردۆیی بگێرە نە وەر مەکانێ وەشەن مەلاحێزەش کەر دەودان و ڕووان تا وە باینگان ساتیاری وێراش تا بەلەبزان گڵاڵ ودشە خانەگا و پاوە دووریسان شمشێر قشڵاخ تا شاوە نووریاو نجاڕ بە وردە دێوە شەماڵ فیدات بام خاس بگێڵ پێوە تەشریف بەر وە بان قوللەی ئاتەشگا یەکسەر دیارەن بکەر تەماشا باسەفا و بەرزەن چەشم ئەنداز دارۆ ھەر جا مەیلت ھەن وە نەزەر مارۆ دێھاتێ نە فەوق شەرحم دان پەی تۆ ھەشت ساڵەن شیوەن واوەیلا و ھەی ڕۆ نەبڕیان سەدای شین و زاریشان نەدریان قەرار بێقەراریشان نە تۆی زیندانان کول نە بەین شییەن ھەر کەس مەنەبۆ نیمە گیان بییەن ڕۆی گرفتاری ھەرتا وە ئارۆ نەو قیتعە زەمین ئایر مەوارۆ کوشتارێ زیاد نەو یاگە کریان ھەرجا کەسێوەن وە ئەسیر بریان وە ھەر جا مەشی شەماڵ زارییەن ھەر یەک چەند کەسش نادیارییەن خوسووسەن میرزا و مستەوفی پاوە ڕیشە کەن کریان جە ھەر دوو لاوە میرزا مەحموود بێ، مونشی خۆش تەحریر عاقڵ و فەھیم ھەم ساحێو تەقریر چەند ساڵ فیرار بێ نەو زێد و ماوا بەدبەختی کێشا ھەرتا کە تاوا ئارەزووش ئید بێ بیاوۆ وە کام دەوڵەت بسانۆ پەرێش ئینتیقام وەختێ کە قشوون حەرەکەتش کەرد ھەورامی نەوجا گشت فرارش کەرد ئەو میرزای مەرحووم بە خیاڵی وێش ئارەزووش بڕیان تەمام یاوا پێش بێخەبەر نە چەرخ قەزای ڕەببانی بەرعەکسەن دایم شاد پەشیمانی عەبباس براڵەی گیانی گیانیش بێ کول کەسێ عاشق وەش زبانیش بێ ناگا کومەیسوون نەو جا تەشکیل دان ھەرچی مەنەبێ ئەسڵەحە جەم دان ئەو گرفتاری نە فەوق شەرحم دان جە قەسری شیرین ھەرتا مەریوان مەقسوودم میرزای ساحێو شەوق و زەوق شادیش بی وە شین زەوقش بی وە تەوق وێش چەنی مامۆ، برا و مامۆزا گرفتار کردەن ڕەنجش شی وە با وە چەند ئیفتیزاح فشاراتی سەخت نە جەمعی مەردم بە وەخت و بێ وەخت تا داخڵ وە شار تاران بین یەکسەر یاگەی ئەوان دان نە قەسری قەجەر ھەر چەند کە ئیزھار مەزڵوومی وێشان مەکەردەن ئەسڵەن نەشنەفتەن لێشان ھەر یەکێ پەنج ساڵ حەپسشان بڕین شەش ساڵ زیاتەر کێشان وە یەقین دمای سەدەمات جە حەد وییەردە زوڵم و زۆری سەخت دنیای بێ پەردە ھەزار حەسرەتان مەنەبێ نە دڵ یەک نە شۆنی یەک داخڵ بین وە گڵ عومووم بێ ڕەمەق مدراین وە پاوە ڕیشەمان بەنەن وە بای فەناوە شەماڵ ڕاھی بەر پەرێ ھەورامان خاکی ئێرانەن سەرتا وەدامان بگێڵە پێشدا بێ سەفا نییەن وەزعی سابقش گشت نە بەین شییەن تەرزێ جە دیدەن ئیسە جە وڵات جادەی ماشینەن عەقڵ مەبۆ مات ھەورامی ئەوسا نە یاگەی وێشان ئیقتیدارێ خاس بێ نە دلێشان ھەر یەک نە جای وێش دەستگا و عومارەت ماڵ و دیواخان نۆکەر و ڕایەت چەنی عەشایر خارج و داخڵ خەیلێ جەنگ کەردەن شەجیع و پەڕ دڵ کەم کەم تەرەقی دەستدا پەرێشان قەریبی چل ساڵ ڕاحەت پەی وێشان نە ڕای ئیقتیدار زیندەگی کەردەن ڕۆزگارێ وەش وە سەر مەوەردەن غوروورشا یاوا سەرحەدی کەماڵ نەوبەت کەفت وە دەس ئەساسەی زەواڵ نە ئەمری دەوڵەت تەمەڕود کەردەن فەریبی توغیان چەن ساڵە وەردەن دەوڵەت قشوونش کێشا پەرێشان سەنگی تەفرەقە کەوت نە دلێشان ھەر یەک نە لایێ بێ وە چارەسەر پەرێ خارجە دەشت گرتەن نە وەر ھەر کەس تەسلیم بی گرفتار کریا نە قەسری قەجەر یاگە پێش دریا وەی تەور پاشیا و بڕیا شۆنشان کەس نییەن نە جای ھەوار کۆنشان شەماڵ بگێڵە ھەر سەیران خاسە چەم پۆشی کەرە جەی دەنگ و باسە داریان و ھەجیج نۆتشە و شەڕەکان چەشمە و سەراوەن باغات فراوان نەوسوودەن مەرکەز حکوومەت نشین بەرز و چەشم ئەنداز باغاتش ڕەنگین وردە دێھاتش یەکسەر باغاتەن ھانە گەڕمەڵە نە سەری ڕاتەن ناحیەی لھۆن تەمام سەیران کەر نە کەلی کاوێ سەر باوەر وە بەر ئەو یاگە بەرزەن پەرێ سەیرانگا ھەرجا مەیلت ھەن بکەر تەماشا قولەی پیر ڕۆستەم دیار وە دیار دەشتی مەریوان گۆلی زرێوار ئەو قەریە و دێھات مەوینی وە چەم بەدبەختیشانەن پێچیاون وە خەم قەدیم ئۆجاخان بڕیا شۆنشان نەمەنەن بە غەیر ھەوار کۆنشان مەخسووسەن شاری ھەورامانی تەخت قەڕەچۆڵ بڕیان بەرچیدە و بەدبەخت گشت سوڵتان زادە ساحێو نان و خوان نەجیب و مەعقوول وەی تەور پێش ئامان بەعزێشان ئەوەن زووخاوان وەردەن زەلیل و موحتاج کول گیان سوپەردەن بەعزێ بێ ڕەمەق مدران وە پاوە ئینتیزاری مەرگ بەیۆ جە لاوە عایلە و کڵفەت بێ قەدر و حورمەت تاویای بۆتەی زوڵم و مەشەققەت ھەر یەک پەرێ وێش ھەر ئاغە ڕۆشەن ھەشت ساڵەن تەمام کول سیاپۆشەن شەماڵ فیدات بام ھەورامان تەواو قەریە و دێھاتش ھەرتا کە ڕەزاو یەکسەر وەی تەورەن حاڵ و باڵشان عاڵەمش گرتەن بۆی کەواوشان بێ جورم و تەقسیر وەی تەور پێش ئامان دەردش کارییەن سەر تا وە دامان ھەوش و بەدرانی و دزڵی مەویەرە جای مەحموود خانەن شەخسێ دلێرە جەند ساڵ جەو مەکان نە ڕای ئیقتیدار ساحێو سوفرە و خوان نۆکەر و سوار شەجیع و زرنگ بەخشەندە و خەڕڕاج خارج و داخڵ وە کەس نەدێ باج حەقیقەت حەیفەن پەی مەردی ئێران وەی تەور بان پەنا وە خارج بەران دەرەکێ یاگەی ئەسەد بەگ بییەن ئەو ھەم مەشھوورەن کول کەسێ دییەن یاگەی مەشوەرەت خاس و عام بییەن ساحێو دیواخان وەش کەلام بییەن شەماڵ وە گیانت جەی گشت ئەساسە یەکێش نەمەندەن تەمام ئیفلاسە قەدەم ڕەنجە کەر پەرێ مەریوان ئەو سا مەزانی چێش پەنەش ئامان قەڵای مەریوان پاتەختشانەن یاگەی حکوومەت ڕەئیس و خانەن کانی سانان بێ یاگەی مەحموود خان دەستگا مورەتتەب سوفرە و دیواخان بەگزادە و نۆکەر تەپڵ و سوارە داخڵ بیەبێ نە تۆی ئیدارە حقووقی دەوڵەت ئابڕوو و حورمەت مەنبەعی ئومێد کەدخودا و میللەت باقی بەگزادە ھەریەک نە جای وێش تایفە و شەجیع یەکسەر قەوم و خوێش ولەژێر یاگەی کەیخەسرەو خان بێ قەدیم ڕیاسەت کول مەریوان بێ دەستە و بەستەی وێش بەگزادە و نۆکەر تەپڵ و سوارە نە جەنگ بێخەتەر فەرزەندانی خاس یاگەدارش بێ کەدخودا و ڕایەت بەرقەرارش بێ باقی بەگزادە و خوردە مالکین ھەر یەک نە جای وێش کول ساحێو تەمکین نە ڕای ئیحتیرام زیندەگی کەردە بێخەبەر نە چەرخ دنیای بێپەردە شادیشان یەک ڕۆ یەکسەر بی وە شین بەو تەور گرفتار دامی بەڵا بین چێش واچوون شەماڵ چێش ئاما وە سەر ئەسڵەن یەکێشان بەر نەشی وە بەر ئەو ئیفتیزاحە کول دیمان وە چەم کەم کەسێ دییەن ئەولادی ئادەم ئەوان ھەم تەقسیم زیندانان کریان ھەر یەک نە لایێ وە ئەسیر بریان ئەوەن زووخاوان بەدبەختی وەردەن قەلیلێ مەنەن یەکسەر کول مەردەن ئیسە یانەشان تەمام خاپوورەن ڕۆی ڕۆشن لێشان شەوی دەیجوورەن عایلەشان وەی تەور کول نە بەین شییەن ھەرکەس مەنەبۆ کز و کۆر بییەن نەمەنەن ھیچ کەس نە ئۆجاخشان ڕەعیەتەن ساحێو ئەملاکاتشان فیدات بام شەماڵ قاسیدێ خاسی سەرکەشی کەرە ھەم جە کۆماسی ئەوان ھەم بەدبەخت ھەم گرفتارەن یانە وێرانەن خەیلێ ئەوگارەن بەگزادە و ڕەئیس بییەن دەروەدەر ھانە تۆی زیندان نە قەسری قەجەر دەروێش مەحموودەن بێچارە و بەدبەخت موحتاج و زەلیل وەی زیندانی سەخت ھەشت ساڵەن زووخاو بێ سامان وەردەن خەزان پەی بەختش خەزانش کەردەن یانەشان دایم شیوەن نە تۆشەن ھەر کەس پەی کەسێ مەست و مەدھۆشەن شەماڵ عەرزم ھەن بدیە چێش ماچوون لازمەن سەیران کۆی تەورێز خاتوون زەحمەتت کێشا خەیلێ ماڵ ئاوا ئێڵاخی وەشەن ئەو کۆی زێڕ ئاوا بدیە دیارەن کۆی ئەفراسیاب کۆی عەبباس بەگەن کول چەشمە و سەراب ھەر چوار ئێڵاخ یاگەی عێڵ بییەن ئیسە قاعیدەش بەرچیدە بییەن قەریە و دێھاتش تا چەم کەرۆ کار ھەرتا بیاوۆ سەرحەدی ھەوشار یەکسەر ئێڵاخەن چەشمە و میرغوزار سەوز و خوڕڕەمەن نە وەختی بەھار قەسەبچەی قەشەنگ چەنەش مەویەرە ھەم حسەین ئاوا ھەم دیواندەرە سەد پارچە ئەملاک نەو جا دیارەن یەکسەر ئەملاکی ئەعیانی شارەن گەڵباغی و مەنمی تایفەی بێ ئەندێش ئانە کول واتم گرتەبیەن پەی وێش جە کەناری شار ھەرتاکە بیجاڕ ئەم سەر تا ئەو سەر حدوودی ھەوشار چەند ساڵ نەو زەمان دنیای ھەرج و مەرج وێشان ڕەئیس بین وە کەس نەدێن خەرج جە شا تا وەزیر سەردار و ئەمیر خان وخەوانین جەمعییەت کەسیر تەپڵ و بەیداخ و سوارە و نۆکەر ماڵ و دیواخان دەبدەبە و لەشکەر ئەساسێ وەی تەور پەی وێشان سازان بە زۆری بازووی وێشان مەنازان تا ئاخر دەوڵەت ئەمر دا قشوون پەی سەرکووبیشان وە بێ چەند و چوون شەریفوددەوڵە حاکم بی ئەو ساڵ پەنج ھەزار نەفەر تەمام و کەماڵ سەردار ڕەشید بێ، ئەوڕۆ سوپاھدار نە فەرمانش بین تفەنگچی و سووار شمشێر حەمایل خەلعەتش کەردەن جەنگی گەڵباغی وە ئەو سوپەردەن ھەورامان چەنی جوانڕۆ تەمام باقی عەشایر جە خاس تا وە عام جەم کەردەن پەیشان جە شاری سنە حەرەکەت دریا ئەساسە و بنە یاوان بەو مەحاڵ ئەوان بین ماوا فەوری حەمڵە دان کەردشان داوا وەلحاسڵ ئەوڕۆ سوب تا خۆرئاوا زەد و خورد کەردەن ھەرتا کە تاوا ھەر چەند شجاعەت وە کار مەوەردەن چون نەگبەتشان بێ عیلاج نەکەردەن شکست وەردشان کەردشان فیرار غارەت و چەپاو تەمام بێشومار کەفت نە ڕووی سەحرا ھەر کەس پەرێ وێش ھەرکەسێ یاوا درێغ نەکەرد لێش نە ھەر دوو تەرەف تەڵەفات کریا خاتیمەی ئەو جەنگ وەی تەورە دریا جەو دما بەعزێ ڕەئیس و سەردار شەریفوددوڵە ئومێد دان قەرار پەنا ئاوەردەن قەوڵ دان پێشان گونا و بێگونا وە دارشان کێشان پێش ئامەدێ سەخت پەڕ خەوف و خەتەر پاشیان وە ھەم بێ وە چارەسەر دمای کوشتار و غارەت و زەرەر خارج و داخڵ دەشت گرتەن نە وەر چەند ساڵ نە مابەین ئیکارە وییەرد باز نە جای وێشان جەماوەری کەرد دووبارە فەریب تەمەڕڕود وەردەن دەوڵەت ئەمرش دا تەبعیدشان کەردەن بەعزێ گرفتار نە قەسری قەجەر باقیشان یەکسەر کریان دەروەدەر تەفرەقە و تەقسیم شار و دێھاتەن چەمەڕای جیرە و نان و بەراتەن گەدایی کەران بەوێنەی دەروێش نیمە گیانێ ھەن بێزار بییەن لێش شەماڵ سەرگوزەشت دنیا وەی تەورەن ڕاحەتیش نییەن پەڕ جەفا و جەورەن ئیسە ئەو یاگە تەمام وێرانە بییەن وە لانەی بادەقوشخانە با ھەر بناڵان تا ئاخر نەفەس وە شارانەدا غەریب و بێکەس فیدات بام شەماڵ مەنزڵت دوورەن سەیرانی سنە ئەو ھەم زەروورەن شارێ قەشەنگەن مەدارا مەکەر بگێڵە پێشدا ئەو کۆی ئاویدەر کۆسارێ وەشەن نەدارۆ جەفا تۆ خودا بنۆشە ئاو کانی شەفا ئانە سەیرانگای ئەعیانی شارەن بەرز و چەشم ئەنداز کول جا دیارەن بدیە خەسراوا ماچی بەھەشتەن نووری لەقای ھەق نەو یاگە وەشتەن پارچەی ئاویدەر چەشمە و سەیرانەن عەیشگای عامەن کززە و کەواوەن چەمەن موعتەمەد یاگەی ئەعیانەن تەفریحگای ئەشراف تجار و خانەن داخڵ بەر نە شار قەڵای حکوومەت بەرز و قەشەنگەن نەدارۆ زەحمەت بازاڕ خیابان مەغازە کەم کەم تا مشی وە بان ئاو کانی دووشەم شەماڵ بگێڵە یاخودا وەشت بۆ ئارەزووی منەن کول یاوان وە تۆ یانەی ئەعیانەن ھەر یەک نەجایێ ئەو سا مەنمانان بەوێنەی شایێ دەستگا و عومارەت تەلاری عالی ساحێبی ڕوتبە و موشیر و والی وەزیر و ئاسەف موعتەمەد وەکیل مەورووسیشانەن ھەر یەک چەند دەلیل نۆکەر ئیقتیدار ئەملاکاتی خاس مەشھوور و مەعرووف تەمام شا شناس موشکڵێ نەبی نەکەران ئاسان ساحێبی لەنگەر یەکسەر کوردستان حکوومەت دایم بە مەیلی وێشان مەعلووم مەکەردەن جە مەرکەز پەیشان ھەژدە بلووکی کوردستان تەمام وە ئەوان کارش مەدریا ئەنجام مەلجەء و پەنای فەقیر و دەروێش یاری دەھندەی بێنەوا و دڵڕێش وەلی نیعمەتی سەفحەی کوردستان بەرپا کونندەی گرۆی بێکەسان چەنێ جە ئەشخاس بێنەوا و نادان نە دەر ماڵشان بین وە خانەدان ھەرچی تەعریف کەم ئەوسافاتشان دەبدەبە و ڕەواج ئەحکاماتشان زیاتەر بییەن ھەر یەک پەی وێشان ئیسە ڕۆزگار سەرد بییەن لێشان ئەوان ھەم چەنی ئێمە جەلب کریان وە ھەر بەھانە پەی مەرکەز بریان شەش ساڵ جە مەرکەز نیشتەن پەی وێشان ئیجازەی مەحەل نەدریا پێشان جە دمای شەش ساڵ ھەناسانی سەرد ئاسەفی ئەعزەم نەوجا فەوتش کەرد نەعشش بەوێنەی یەک نەفەر گەدا بەردەن وە مەحەل بێ سەر و سەدا ئیسە نە ئەو قەدر، نەئەو قیمەتە نە ئەو ئیحتیرام سەفا و زینەتە حاڵ و ئەحواڵشان ئەگەر بپەرسی ئەوان ھەم وێنەی یەک نەفەر شەخسی زیندەگی کەران نە یانەی وێشان جەو ئیقتیدارە کول دەسشان کێشان ڕۆزگار دایم ئینە خودیەشەن یەکێ پادشا و یەکێ دەروێشەن دنیا ھەر وێشەن بەشەر فانییەن کۆشش پەی دنیا پەشیمانییەن شەماڵ فیدات بام کافییەن زەحمەت کێشات فراوان ڕەنج و مەشەققەت دنیا وە ھیچ کەس وەفاش نەکەردەن کەس جە بێوەفا بەھرەش نەبەردەن چەند پادشاھان جە بەشەر بێباک وە ھەزار حەسرەت سەر نیان وە خاک کەیۆمەرس سەرتەوق پادشاھان بێ سەر حەڵقەی زەنجیر ساحێو جاھان بێ وە کۆ شی جەمشید ساحێو جامی جەم وێش چەنی جامش لووان پەی عەدەم کۆرش کەبیر داخم ئەو کۆ شی سەر دوودمانی ھەخامەنشی ھەر یەک چەند حەسرەت گرتەبێن نە دڵ یەک نە شۆنی یەک داخڵ بین وە گڵ نەمروود و شەدداد، زوححاک و فیرعەون ئیددیعاشان بی چەنی خوداوەند داخم جە کۆبان کەیانانی کەی ئەو گورز و گۆپاڵ ئەو ساقی و ئەو مەی کۆ شی کەیخەسرەو ساحێو تەخت و تاج کۆ پەھڵەوانان نەپای کورسی عاج کۆسی کاوسی داخۆم جە کۆ بۆ کەللەی کەیقوباد جە کۆ کەوتە بۆ فەرەیدوونی فەڕ بڵند بی پایەش چەند ساڵ مەملەکەت وەش بین نە سایەش گوودەرز وە حەفتا و حەفت فرزەندەوە گیو وە ڕیازەت خەسرەو سەندەوە داخۆم جە کۆ بۆ شای ئەفراسیاو ئیسمش مەوەردەن سەنگ مەبی وە ئاو ڕۆستەم جە کۆ بۆ ئەسفەندیار جە کۆن کەللەی دێو سفید چەنی بڕیان شۆن ئی گشت پادشا و پەھڵەوانی قین چەنی جاشان بی نە سینەی زەمین داخۆم جە کۆبان خەبەرشان نییەن کەوکەبە و ئەساس کول نە بەین شییەن ھەر یەکێ ھەزار حەسرەتان نە دڵ وە چەند ئارەزوو سەر نیان وە گڵ چەند پادشاھان ئەشکانی بییەن یەک نە شۆنی یەک ئامان و شییەن کەوکەبەی دارا چەنی بی تەمام ئەسکەندەر نە شۆن ئەو یاوا وەکام ئەسکەندەر جە کۆن پادشای نامی شەرق و غەربش گرت ئەو وە تەمامی جە عومری کۆتاش ڕاحەتیش نەدیی ھەر چی ڕەنجش دا وە عەبەس بەر شیی ساسانی جە کۆن چەنی شین وە باد نەوشیروان بی، ساحێب عەدڵ و داد کەیخەسرەو تەختش جە مەدایێن بێ شیرین مەلیکەی ئێران زەمین بێ کەم کەسێ دییەن ئەو تەخت و ئەو تاج مەتای ڕەنگاڕەنگ ئەو حوکمی ڕەواج دەبدەبە و بیسات بەزمی خەسرەویی مەشھووری عامەن ھیچ کەسێ نەدیی ئاخر گرفتار چەرخی دنیای دوون یەک شەو شیرین دیش غەڵتانەن نە ھوون ئەو سەردارەش دیی وەی حاڵ و وەی دەرد شیرین ھەم جە گیان شیرینش ویەرد بە غەیر جە شیرین کەس نەدیەن وە چەم دمای سەردارش حازر پەی عەدەم شیرین بای شیرین پەی شیرین کاریت سەبت کریان تاریخ پەی یادگاریت گەنجی باد ئاوەر تەڵای دەست ئەفشار وە غارەت بەردەن دیار وە دیار تایفەی مەغۆڵ ئەو جەنگی خوونخوار جە کەللەی ئادەم سازناشان مەنار ئەوە پادشا ئامان و شییەن چەند ھەزار ھەزار ئیسمشان نییەن ئینە کول واتم ئامان و بییەن عەجەب تەر جە کار ئێمە کەم بییەن ھیچ کەسێ نەدیەن بێگونا و تەقسیر بەدبەختش کەران دە ساڵ نەزەنجیر مەحروومی دیدار عایلە و فرزەن فەریادڕەس نییەن غەیر جە خوداوەن بەوێنەی حەیوان دوڕندەی قەفەس دە ساڵ نەکێشی ڕاحەت یەک نەفەس ڕەنجی چەند ساڵە وە ھەزار زەحمەت تەمام نە بەین شیی وە نیمە قیمەت ++++++++++++++++++++++ سەرناو: پاڕانەوە لە خودا بۆ لێبووردن لە گونا و ڕزگار بوون ڕۆزگار شیشەی عومرم شکستەن ڕاگەی ئومێدی حەیاتم بەستەن تەکلیفم ئێدەن پەرێ ڕای نەجات موناجات کەروون قاضی الحاجات یاڕەب بە حاجەت ڕەسوولی سەروەر قازیولحاجات ڕووی دەشتی مەحشەر یاڕەب بە حاجەت جەلال و ئەقدەس دەستگیری مەزڵووم غەریب و بێکەس یاڕەب بە حاجەت زوولجەلالی وێت بە عەرشی عەزیم لایەزالی وێت یاڕەب بە حاجەت پێغەمبەرانت بە عەرش و کورسی قەترەی بارانت یاڕەب بە حاجەت شای دوڵ دوڵ سوار مورتەزا عەلی کوشندەی کوففار بە ئەشکی دیدەی فاتیمەی زەهرا هەم بەو شەهیدان دەشتی کەربەلا بە ناڵەی دەروون عەبداڵانی بەر مەکێشان نەدڵ وادەی سوب سەحەر بەسەدای ئەزان ئەڵڵاهوو ئەکبەر بە شوعلەی جەماڵ پاکی پێغەمبەر یەک ڕای نەجاتێ بنێرە نە وەر بە شەرافەتی سەییدی سەروەر بە دەستێ بەستەی زیندانییانت ئەسیر و مەزڵووم گۆشەی شارانت جەمعی زیندانی ئەکرادی بەدبەخت فریاد ڕەسی کەر نەی فشاری سەخت دە ساڵەن زووخاو جارییەن لێمان بەشەرێ نییەن ڕەحم کەرۆ پێمان یاڕەب بەحاجەت ئیسمی ئەعزەمت بەو مەلایکان خاس مەحرەمت یەکەم جار بەو ڕەحم بێ پایانەکەت بەو عەتا و کەرەم بێ سامانەکەت پیر و ئاخر شەڕ عاسی و عوسیانبار قەبووڵ کەر وەنەم تەوبە و ئیستیغفار خالق و زاتت غەیر جە لوتفی وێت ڕای ئومێد قەتعەن مەخفی نییەن لێت ئاگا نە ئەحواڵ دەردەدارانی شەفا دەهەندەی کول بیمارانی ئەم دردە دووچار ئێمەشان کەردەن هەر ساتێ سەد نەوع بەتەر جە مەردەن کەریم کەرەم کەر کەرەم بێ شومار زیندەگی پێمان بییەن زەهرومار یاڕەب بۆ بە عیشق خاسانی دەرگات غەریب و بێکەس دوور کەفتەی وڵات مەزڵوومی ئێمە جە حەد وییەردەن ئیحیامان کەرە هەناسەم سەردەن بەخشەمان وە نوور پاکی پێغەمبەر نەی زیندانی تار وەسەن دەردی سەر ڕەحمێ کەر وە حاڵ عایلە و سەغیر یاڕەب نەجاتێ نەی دام و زەنجیر تاقەت و سەبر و حەوسەڵە بڕیان یەکسەر تەمام بی پەردەی دڵ دڕیان زەڕڕەیێ ئیمان جە موو باریکتەر ها وەختەن شەیتان باوەرۆش وە بەر قووەی وجوودیم، کول نە بەین شییەن عومرم جە پەنجا و چوار ڕەد بییەن عەینم بێ عەینەک تەم و بوخارەن زیندەگی پەرێم چون زەهری مارەن یاخودا وە ڕەحمت کارێ بسازی با کۆتا کەروون ڕوودە درازی ئیستیدعام ئێدەن جە لای خوداوەن شاد کەرۆم دیدار عایلە و فرزەن عومری تەبیعی سەر ئامان جۆشۆ قەبووڵ مەفەرما چی غوربەت بەرشۆ ئارەزووم ئێدەن یا حەیی داوەر نەی زیندانی سەخت باوەریم وە بەر قووەی وجوودی و سەروەتی دنیا کول تەمام بییەن ڕیشەمان کنیا بەدتەرین زووخاو دنیا کول وەردم یەک ڕۆ ئاسایش وە سەر نەوەردم نەحیف و زەعیف پیر و گرفتار غەریب و بێکەس، موحتاج، دەردەدار عنایەت فەردت کول موناجاتەن سەرتا وە پایین دۆعای حاجاتەن کافییەن وەسەن سەر دەرد ماوەرۆ ئومێد هەن خودا قەبووڵش کەرۆ ئیلتیجام ئێدەن جە لای هامسەران وە یەک فاتیحە ڕۆحم شاد کەران دۆعای مەغفیرەت نە دەرگای داوەر درێغ نەکەران بەشقی پێغەمبەر ++++++++++++++++++++++ سەرناو: سکاڵا لە پیریی و ژیانی نالەباری بەندیخانە دڵم نە جۆشەن... یاران هامسەران دڵم نە جۆشەن قوڵ مەدۆ وەهەم بەس نەخرۆشەن سفیدی تاڵەم چون سیاپۆشەن قەلب میحنەتبار دایم بێهۆشەن چەن فیکر و خەیاڵ زوخاو نە تۆشەن کوورەی ئەهەنگەر جەلاش خامۆشەن سەماوەر جەو بۆن هەر نە خرۆشەن کەللەم بێڕەمەق مدران وە پاوە ئینتیزار مەرگ بەیۆ جە لاوە گۆش بەرگی نمناک ماتەمی پۆشان دیدە پەی بینش هەر پا نە حاشان مووی سیا مەیلش وە من نەمەندەن سفید نە موڵکش خۆ بەزرش شەندەن قرمزی ڕوخسار خەزانش کەردەن باد بەرگی خەزان هەرد ئەو هەرد بەردەن پیری و جوانی ئەسڵەحە پۆشان کەمەندی پیری جوانی کێشان وەی تەور گرفتار دامی ئەو بییەن تا ئاخر نەفەس خەلاسیش نییەن دەندان خۆ ئەسڵەن توخمش نەمەندەن دەلاکی پیری نە ڕیشەش کەندەن ڕوخساری سافم چرچ و ئاوێزان نووری بەشەری نە ئەو گورێزان پیری وە سوپای شەڕ ئەنگێزەوە سوارەن یەک یەک وە شەودێزەوە زەفەر وە لەشکەر جوانی بەردەن نە قەڵعەی وجوود مەحسوورش کەردەن نمازۆ یۆشان بکەران هاوار هەر ڕۆ یەکێشان مەکێشۆ وەدار سێدارە نە پای قەڵعە نە کارەن تێخی جەلادیش نە زەهری مارەن دەسبەردار نییەن تا نەفەس دارۆ تا ئاخر لاشەش وە خاک مەسپارۆ دنیا هەر وەی تەور ئامان و شییەن چەن هەزار هەزار عەنایەت دییەن ++++++++++++++++++++++ سەرناو: نامە بۆ موحەممەد بەگی ڕۆستەمی کەمێ نە ئەحواڵ دەردانی کاری ئیزهار کەم وە لای نمرە چواری پیر و لەڕ و چەق هەر ساتێ دەردێ زەعیف نائومێد هەناسە سەردێ دەردی گشتمان میراس جێماگە پەنج شەش دەردێ تەر لە من ڕووی داگە مانگی ڕەمەزان وەک زاڵمی جەبوون سەری ناوێتۆ لە بوون و نەبوون هەر کەسێ بگرێت هەر وێڵی ناکات ئیدعای خوێنی کاکەی لێ ئەکات گیرۆدەی دەسی پەنج غەزا بووگم لە دەس هەر پەنجیان من لە دەس چووگم دووانی دەوڵەتی سیانی شەخسی هاوار داد لە دەس دۆ کەشک و قەیسی شەرتە لەداخی دۆکەشک و قەیسی کۆگەردی بکەم وەک دەروێش وەیسی لە گشت زیاتەر وە عیشوە و نازە سەحەریم دایم نان و پیازە پەنیری کرمین ئاشی قورباقە هاوار داد لە دەس ئی فەقر و فاقە وەک هەڵوا ئەیخوا هەرکەسێ ساقە داد بێ داد لەدەس ئاشی قورباقە مەحکووم و مەزڵووم ئەعماڵی شاقە گرفتاری دەس ئاشی قورباقە بەخوا عەزیزان تەکلیفێ شاقە خواردنی نییە ئاشی قورباقە وەک بزن بگرێت ئەو بەلە باقە کردگیە وەمن ئاشی قورباقە عوموم دەردمان دووریی و فیراقە سەرباری دەردان ئاشی قورباقە مەخسووسەن هەر کام ڕەئیس ئۆتاقە باوکی ئەفرۆشێ بۆ ئاش قورباقە شەهەنشاهییە تڕ و تفاقە پەنیری کرمین ئاشی قورباقە بۆ ئیراد جۆیی چاویان زاقە هەر کەسێ نەیخوا تەختە و شەلاقە لە ئاو گۆشتە ڕەش هەرچی بەیان کەی تام و لەززەتی وە قەوری کاکەی لە گشت بەترە ئەو غەزای خاسە هەر چڵک و چڵمە ئەیکەنە کاسە تەتە بۆ کەری وە کۆی زۆخاڵ وێ فیتوا دەرەکەی توخمی گەماڵ وێ مەگەر تەخت و بەخت بوێ چەواشە ئەوسا واز بێرن لەم ئاشی ماشە ئینساف خۆ نادەن نایەژن بەسە نام لە کوێ تێرن ئەم گشت عەدەسە پاکیچی ناکەن پڕ لە کا و تووکە بێشتر دانەکەی کوژی چەڵتووکە نەوع پەرەستی و میللەت پەروەریی ئەم عەداڵەتە قوڕ بگرە دەری کاغەزی دنیا تەمام سیا وێ دەردی دڵی من هەر تەواو ناوێ سەوزی خواردنی ئێوەیچ ئەزانم ئەر ئیزهار بکەن منەت وە گیانم وەزعی خۆتان و مانگی ڕەمەزان بنویسە لە من کاک محەممەد گیان حاڵم نەماگە ئیتر بۆ من بەس ناتەواوییەکەی حەواڵەی ئێوەس ++++++++++++++++++++++ سەرناو: نامەی ئاغا عینایەت بۆ شێخ عەزیزی کوڕی شێخ فەتتاح عەزیز بەتاڵەن... فیکر و خەیاڵت یەکسەر بەتاڵەن ئارەزووت دایم هەر پەرێ ماڵەن مەلاقات کەردەی ئێڵ و عەیاڵەن زیندەگیت حەرام ئەوقاتت تاڵەن مەر ڕەحم خالق وەرنە مەحاڵەن شەو و ڕۆ دایم هەر نە خەیاڵەن فیکرت شمارەی هەر ماه و ساڵەن هیمەت بابۆت پیر کەماڵەن دۆعای موستەجاب دایم نە حاڵەن ئەرچی کارمان نەیاوان کاڵەن ڕەحمی مەشایخ هەمڕای خەیاڵەن خواوەن هەر وێش ساحێو جەلالەن عەفوو کەرەمش شامیلی حاڵەن ئەر مەیلش ببۆ کەرەم بکەرۆ ئارەزووی شاهان وەباد مەدەرۆ هەر کەسێ کارێ چەنیمان کەردەن هەر پەشیمانەن تا وە ڕۆی مەردەن ئومێد هەر تۆنی پادشای شاهان تەخت و بەخت مەدەی وە ساحێب جاهان قەترەیێ شەفا جە خەزانەی غەیب حەواڵە کەرۆ خالق لاڕەیب دڵ تەنگمان مەکەر وەسەن عینایەت ئومێد هەن کارمان یاوان وە غایەت ++++++++++++++++++++++ سەرناو: جواوی ئاغا عەنایەت بۆ موحەممەد بەگی ڕۆستەمی دۆستەکەی گیانی ڕۆستەمی نەژاد نامەی شیرینت خەمان دا وە باد ئەشعاری مەربووت مەعدەنی شعوور سەیقەل کریابێ بە وێنەی بلوور موناجاتی خاس دڵ پەسەندیدە وانام و ساوام وە هەر دوو دیدە ئاهەنگی ئەشعار فیردەوسیت وەندم جە دوڕ ئەفشانیت من حەیران مەندم ئەشعارت جە لام وێنەی شەکەرەن من جە واتەی وێم قەلبم پەکەرەن حەیفەن قاتی بۆ ئەو شیرین وەی تەڵخ ئەو ئاوی سافەن ئێد لەجەن هەم بەڵخ ئەو دانەی گوهەر ئێد سەنگی خاران ئەو پارچەی حەریر ئێد کۆنەی شاران ئەو خشتی میعمار باش هۆسای یەمەن ئێد کەلارە کۆن گڵ و خاک و شن٭ فیعلەن ئەساسەی تەحریرم نییەن پەی سەبتش ئایر نە قەلبم شییەن نیگاش مەداروون تا دەرجش کەروون هەر وەخت وەسیلەش وە دەس باوەروون قاتی پاتی بۆ خاس چەنی خراو تا بۆ وە شەربەت شەکەر چەنی ئاو یادگارییەن پەی کەسێ مانۆ شایەت دروودێ پەیمان بکیانۆ وەسیلەش فەوری حازر دیاری دەرج کەردم نە فەوق پەی یادگاری ئیزهاری مەئیوس کەم سەوادی وێت بێ عیلم و تەحسیل نامورادی وێت کەردەبێت وە لام منیچ هەر بەو دەرد جە کول کەس بەتەر کەم فام و ڕەنگ زەرد دمای پەنجا ساڵ ڕەنج و کەردەی وێم ئیسە سابتەن مەعلووم بییەن لێم هەرچێوم کەردەن کول پەشیمانم هەر یەک دەردێوەن نە ڕووی زامانم ئینە کول باعیس بێ ئیتلاعییەن بێ خەبەر نە چەرخ دنیای فانییەن بێ عیلم و سەواد جە نادانییەن عاقڵ کەی کارش پەشیمانییەن بازە با سووچیۆ وەی داخ و وەی دەرد جە هەردوو دنیا مەحرووم و دڵسەرد بەڵام عەزیزم تەقسیرمان نییەن مەحەل موحەققەر تەنگ و وردییەن مەدرەسەی علووم عەقڵ و فام و بەخت یا سایەی دیوار یا نە پای درەخت فەیلەسووفی عەقڵ کانی مەعریفەت ڕەواج دەهەندەی عیلم و شەریعەت ئەو ڕۆ نیشانەی دەر وە دەرمان بی مەلا عەلی مراد، تەعلیم دەرمان بی ئەو ئێمەش یاونا وەی پایەی بڵەند شیخ الازهر بی ئەو پیری پڕ فەند ++++++++++++++++++++++