شاعیر: سەیفولقوزات
کتێب: دیوانی سەیفولقوزات
سەرناو: غەمگینە دڵی مات و بە چاوت نییە هۆشی

غەمگینە دڵی مات و بە چاوت نییە هۆشی
تا ڕوو بە تەمای جەور و جەفا لێمە دەپۆشی


تا دیدە بە دیداری مونیرت نییە ڕەوشەن
وەک کانییەکەی قوڵقوڵەیە قوڵقوڵ و جۆشی


هەر گوڵشەکەری لێوە شەفای دەردی نەخۆشان
سەر بێ بە فیدای کوڵمی گەش و چاوی نەخۆشی


ئەی دڵ بە خەتا کەوتیە چینی سەری زولفی
لەم مارە عەجایب بە تەمای لەززەت و نۆشی


هەروەک مەهی دوو هەفتە لەژێر هەوری سیادا
ئەو دڵبەرە بۆ زینەتی نێو چادری پۆشی


تا زولفی لەسەر ڕوو بە مەسەل هەوری بڵاوە
لەو تاوە دڵم ڕەعدە لەبەر بەرق و خرۆشی


زوححاکە بەبێباکی لە تەخریبی دڵاندا
خوێنخواری گەلێ کردووە ماری سەری دۆشی


هێندەت کوتووە وەعز و لە ئێمەی نییە تەئسیر
ماندووی و دەزانم بە خودا مەعتەلی چۆشی! 


لۆمەی حەسەنی نەفعی نییە، لابدە واعیز! 
عاشق هەموو ئەعزای دڵە، ئەسلەن نییە گۆشی

++++++++++++++++++++++