شاعیر: پیرەمێرد کتێب: پەندەکانی پیرەمێرد سەرناو: لەدووی سیاسەت خۆت مەخەرە بەند سەبارەت: نووسین و ئامادەکردن: کەماڵ ڕەحمانی - پەندەکانی پیرەمێرد، ڕۆژنامه‌ی ژیان، ژماره‌ ٣٢٣. - شیاوی باسه‌ ئه‌مه‌ یه‌که‌مین په‌ندی پیره‌مێرده‌ که‌ له‌ ڕۆژنامه‌ی (ژیان)دا وه‌ختی خۆی بڵاو کراوه‌ته‌وه. ئێمه‌ به‌رودوا په‌نده‌کان به‌ پێی ژماره‌کانی ڕۆژنامه‌ی ژیان و ژین به‌ زنجیره‌ یه‌ک له‌ دوای یه‌ک ده‌خه‌ینه‌ به‌رده‌ست خوێنه‌رانی هێژا. لەدووی سیاسەت خۆت مەخەرە بەند ڕێوی قەواڵەی پێ بوو، پێستیان کەند تخوون بە پیاوی سەرچەوت مە‌کەوە بە دەست قەرز بدە و بە پێ دووی کەوە دوو گوێ‌ و زبانێ دراوە بە تۆ دوو ببیە و یەکێ بڵێ لەسەرخۆ دوشمنی ناوخۆت ڕەگ دەردەکێشێ دار پوازی لە خۆی نەبێ ناقڵیشێ لەهەموو هەورێ باران نابارێ ڕاز کەوتە زارێ، ڕاست کەوتە شارێ ئەو کانیەی ئاوی لێ دەخۆیتەوە بەردی تێ مەخە تینوەبیتەوە بە سوێندی درۆ خۆت مەخەرە داو تاریکە‌شەوە گەڵاڵی لە ناو ئەوی ئەیەوێ سەری نەیێشێ بەقەد بەڕەی خۆی پێ ڕادەکێشێ گەورە کە یەک بن میللـەت سەر دەخەن دەڵێن دوو ڕێوی شێرێ کەوڵ ئەکەن ئیشت بە دەست بێ هیوات لێ دەکەن دار کە بەری گرت پەڵی پیا دەدەن ++++++++++++++++++++++ سەرناو: پارە خەرجی کەی، دەبڕێتەوە سەبارەت: نووسین و ئامادەکردن: کەماڵ ڕەحمانی - پەندەکانی پیرەمێرد، ڕۆژنامه‌ی ژیان، ژماره‌ ٣٢٤. پارە خەرجی کەی، دەبڕێتەوە به خەرج نەکردن، کۆدەبێتەوە مەعاشی بەلاش، بێ‌پیته و بێ‌خێر دەستی ماندووه له سەر زگی تێر ئاغای تەماعکار هەر دەڵێ بیدە کەر به جۆ بمرێ ئەوسا شەهیده! دێی فرەکوێخا ناحەسێتەوە بزن هەرجارێ دەڕووتێتەوە کەس و کار لەپیاو جوێ نابێتەوە تفی بەرەو با، ڕیش ئەگرێتەوە وەختێ کە ژن بوو بە گەورەی گەڕەک با ئیتر ئێمه دەست دەینە خەڕەک. بێ کاسبییە ئەم شەڕ و حاڵە دیارە تەبەقی پڕ ئاشتی ماڵە وا دامەنیشە بە دەستی بەتاڵ تا نەگری، مەمک نادرێ بە مناڵ راستە دوو میوان لێکیان خۆش نایە بەڵام خانەخوێ له هەردوو لایه قەت ڕێک ناکەون گەورەی ئەم شارە تاریکایی شەو ئێوارە دیارە ++++++++++++++++++++++ سەرناو: زۆردار و هەژار، وەک سەرما و هەتیو سەبارەت: نووسین و ئامادەکردن: کەماڵ ڕەحمانی - پەندەکانی پیرەمێرد، ڕۆژنامه‌ی ژیان، ژماره‌ ٣٢٥. زۆردار و هەژار، وەک سەرما و هەتیو بزن هەوڵی گیان، قەساب هەوڵی پیو دەوڵەمەندی ڕژد خۆی هەڵئەکێشێ پارە مێشێکە لە گووش دەنیشێ. لە قاپی نامەرد مەکە "دەقولباب" بێ گۆشت بە، نەوەک منەتی قەساب لە پردی نامەرد مەپەڕەرەوە جەردە ڕووتت کا، با لەم بەرەوە ئەمڕۆ پێویستە تۆ بە دۆست دەرچی کە باران نەما "کەپەنەک" بۆچی؟ "بەخیل" خۆی نایخوا و هەوڵیشی زۆره ماڵی خۆنەخۆر، بۆ چەکمەبۆرە چرای درۆزن ساتێ دەگڕێ بەڕەیش هەر له لای تەنکی ئەدڕێ درۆزن ئاگری لە ماڵ بەربووبوو وتیان درۆیە، کەسی بۆ نەچوو. سوحبەتی نادان، تاڵ ڕابواردنە لە دووی کەر ڕۆین، تەرس بۆن کردنە هێندە بەرز مەفڕە، بڵێن بێ باکە دیارە بێ باکی هەر بۆ خوا چاکە توورەکەی جۆ بۆ کەری دێز پێوی تۆپینی دەوێ و زەرەری خێوی ++++++++++++++++++++++ سەرناو: هەرچەند دۆست لە لات وەک برا و کەسە سەبارەت: نووسین و ئامادەکردن: کەماڵ ڕەحمانی - پەندەکانی پیرەمێرد، ڕۆژنامه‌ی ژیان، ژماره‌ ٣٢٦. هەرچەند دۆست لە لات وەک برا و کەسە هێند ئامشۆی مەکە، پێت بڵێن بەسە! کە زانیت شەوە و دزت لە دەورە دەست بە کڵاوی خۆتەوە بگره! کە شێوەییت دی، بڕۆ تێپەڕە سەگی سەرملە، بە دوو لا وەڕە گوێی ڕانەکێشی، زۆر کەس بێ گوێیە کوتەک دەزانێ قۆناغ لە کوێیە بۆ چەنەبازی کە نەزان دووە لە بەهەشتەوە کوتەک هاتووە ئەوی بۆ مەنسەب بەرچاو چوو، فێرن لەگەڵ لێکەوتی ڕوو وەردەگێڕن. ++++++++++++++++++++++ سەرناو: لە ڕووی جیهاندا، تۆ وەرە پاک بە سەبارەت: نووسین و ئامادەکردن: کەماڵ ڕەحمانی - پەندەکانی پیرەمێرد، ڕۆژنامه‌ی ژیان، ژماره‌ ٣٢٧. لە ڕووی جیهاندا، تۆ وەرە پاک بە ئەوسا لە واتەی خەڵکی بێ باک بە هیچ کەس لە واتەی خەڵک ڕزگار نابێ پیاوی قین لە زگ، قەت بە یار نابێ بەهیوای هاوسێ، بێ چێشت ئەمێنی چاوەڕێی دەست بی، هەر خەو ئەبینی. چاو مەبڕەرە دەست، خراپ فێر ئەبی بە پارووی خەڵکی، درەنگ تێر ئەبی! کە قەڵبی "ئیقباڵ" لابقائییە بە کەم هەڵکردن، پادشاییە تا خۆت دۆست نەبی، کەس نابێ بەکەس چەپڵە لێ‌نادرێ، بە تەنها یەک دەس. بۆ دۆستت چاکە، غەیر بێ‌ئەنجامە ماڵ ڕاوەستابێ، مزگەوت حەرامە بۆ دونیا دەبێ دەست بدەیتە دەست هیچ کەسێ، هیچ کەس ناباتە بەهەشت دەوران دەوڵەتت لە دەست دەسێنێ بەڵام ناوی چاک تا سەر دەمێنێ نییەتت چاک بێ، ئیش دەبەیتە سەر درەخت "زڕ" نەبێ، هەر بۆت دێتە بەر ++++++++++++++++++++++ سەرناو: کە دوژمنت کەوت تۆ پێی پیا مەنێ سەبارەت: نووسین و ئامادەکردن: کەماڵ ڕەحمانی - پەندەکانی پیرەمێرد، ڕۆژنامه‌ی ژیان، ژماره‌ ٣٢٨. کە دوژمنت کەوت تۆ پێی پیا مەنێ زەبوون کوژ مەبە، لای خوا لامەنێ سەرمایەت بۆ خۆت، زەکات بۆ خودا مێو کە بیبڕی، چاکتر بەر ئەدا زۆر بە سەر دۆستا مەیێ خەتەرە تانەی دۆست لە تیر دوژمن بەدترە ڕاستە دوو میوان لێکیان خۆش ناێێ بەڵام خانەخوێ لە هەر دوو لایێ ١ تۆ چاکە بکە و بیدە بە ئاوا خەڵکیش نەزانێ، لای خوا نووسراوە کردەوە و ئیمان هاتوونە نوشوست گەورە ئاوی ڕشت: بچووک پێی لێ‌خست کە باوەڕت بێ، هیوایشت دەبێ کە بێ باوەڕ بی، چیت دەس ئەکەوێ؟ هەم پیاوی دونیا، هەم پیاوی ڕێی خوا وەک "یارۆی" ناو جۆ لە دوو لا دەخوا. ١. ئه‌م به‌یته‌ له‌ ژماره‌ی ٣٢٤دا دووباره‌ بۆته‌وه‌. ++++++++++++++++++++++ سەرناو: ئەولادتان بە ناز پەروەردە مەکەن سەبارەت: نووسین و ئامادەکردن: کەماڵ ڕەحمانی - پەندەکانی پیرەمێرد، ڕۆژنامه‌ی ژیان، ژماره‌ ٣٢٩. ئەولادتان بە ناز پەروەردە مەکەن چاک نابن خۆتان ڕەنج ‌بردە مەکەن میرات میقرۆبی شەڕی ئەولادە بێ‌ڕەنج دەستکەوتوو، ئەدرێ بە بادا بە میراتی عیلم، کور ئەبێ بە پیاو ئەولاد بە ڕەنجی شانی دێتە ناو دەوڵەمەند هەرچەند خەڵکی لە دەورە بایەخی نییە، سێبەری هەوره هیچ کەس ماڵی خۆی بە کەس نەداوە کەچی ئامەشۆی دەوڵەمەند باوە دەعوایان هاتە سەر هەلات بازی قەت دوو کەس نابن لە قازی ڕازی یاخوا دەردەگا، نەکەوێتە دێ پاقلە تەواو بوو، وا باینجان دێ بێ هەمدەم ماوم، کز و ڕەنجەڕۆم منیش خەریکم، باینجان بخۆم ئەگەر خوا دەکا، ترێ پێدەگا بێ قڕەی گومرک، من سەرخۆش ئەکا ئیتر کەس ڕەخنە لە من ناگرێ با بە سەرخۆشی ناوم ببرێ بەڵام کە ترێ منی سەرخۆش کرد ڕەسمی ئەسێنێ قۆڵچی دەست و برد ++++++++++++++++++++++ سەرناو: بە چکە چکە، قەرز نابڕێتەوه سەبارەت: نووسین و ئامادەکردن: کەماڵ ڕەحمانی - پەندەکانی پیرەمێرد، ڕۆژنامه‌ی ژیان، ژماره‌ ٣٣٠. بە چکە چکە، قەرز نابڕێتەوه سەد بەرتیل قەرزێ نابژێرێتەوە ئەگەر چەسپاندن بێتە سەر تکا بڵێن تێکۆشان ئابڕووی تکا کە من ئاغا بم تۆیش وەک من ئاغا بەڕەشڕەمان کێ بێ بۆ ڕاخا ئەڵێن: ئاو دێنن، خۆشی خۆشییە! بۆ هاوین نەبێ ئاومان بۆ چییە؟ کێ معاش بۆ ناو ڕەت ئەکاتەوە موفتیش شەڕابی مفت ئەخواتەوە بە گفت سەر و ماڵ درێغی نییە هاتە کردەوە بایەخی نییە هەموو وڵاتمان شکور ئاوایە قەرەداخ ناوی زەردی ئاوایە ++++++++++++++++++++++ سەرناو: کاولەکەی وەتەن هێندە شیرینە سەبارەت: نووسین و ئامادەکردن: کەماڵ ڕەحمانی - پەندەکانی پیرەمێرد، ڕۆژنامه‌ی ژیان، ژماره‌ ٣٥٥. - له‌ ژماره‌ی ٣٣١ تا ٣٥٤ په‌ند بڵاو نه‌کراوه‌ته‌وه‌. کاولەکەی وەتەن هێندە شیرینە ژاری دوو‌پشکی عەربەت هەنگوینە ئاو مەند بێ و پیاو مۆن، لێیان بترسە ڵچ‌شۆڕ پەریش بێ، هەر ئێسکی قورسە شەیتان پەلەی کرد بۆیە زەلیلە ڕاوەستە و حەڵوا بێ لە بەرسیلە کاربەدەست، دەستیان لە دەست هەڵبڕی کاتێکت زانی خوا نانی بڕی کە خۆت خودبین و بۆ خەڵک بەدبین بی نابێ لە دوایی ڕۆژت ئەمین بی دۆستت ئەوەتە کە ئەتگرێنێ دوژمن ئەوەتە پێت پێ‌ئەکەنێ ++++++++++++++++++++++ سەرناو: بەبێ ڕێ مەڕۆ، هەرچەند قەدبڕ بێ سەبارەت: نووسین و ئامادەکردن: کەماڵ ڕەحمانی - پەندەکانی پیرەمێرد، ڕۆژنامه‌ی ژیان، ژماره‌ ٣٥٧. - له ژماره‌ی ٣٥٦ مامۆستا په‌ندی بڵاو نه‌کردۆته‌وه بۆیه له‌م ژماره‌یه، له‌چاو ژماره‌کانی تر، ‌ زۆری نووسیون. بەبێ ڕێ مەڕۆ، هەرچەند قەدبڕ بێ نانت گەنم بێ جۆیش هەرزانتر بی بێوەژن هەرچەند خاوەن دراو بێ تۆ کچ بێنە با، کراسی جاو بێ دڵدارت نەبێ بەهەشت زیندانە هەرچی دڵ ویستی هەر ئەوە جوانە کەر کورتان گوم کا و ئێمە بۆی بدرووین دەستی وەیسکەیە و سووژنی پۆڵایین بە خاڵو خاڵو هات بەلامەوە بوو بە توولەمار دای بە پامەوە نازداری بەهار چەن شۆخ و شەنگە ئاخ بێ بەینەتە هێجگار ڕەنگ ڕەنگە کە خوا پیاو سەرخا بە کەس نانەوێ ئەم ئاسمانە ئەستوونی دەوێ ئەو کەسەی کە خوا قەدری داوە پێی کەس لێی پرسیوە کە تۆ کوڕی کێی؟ مەسنەد نادرێ بە زۆری چەنە لەم زەویە ڕەقە توورێ هەڵکەنە ئەوی بە ئاغام بە پاشام فێرە بەراتی دێتە سەر دوو کولێرە ئاه خوێندەواری! نەزانی لایە بۆ کردەوەیشمان ڕەهبەری چایە کە سرکە توند بێ قاپ ئەقڵیشێنێ لەش کراسی تەسک دائەتڵیشێنێ قەل ویستی وەک کەو بە خچکە بڕوا ڕۆینەکەی شێوا و واشی بۆ نەلوا هەموو ڕاوچییەک ئیساغا نییە هەرچی ڕیش سوور بێ هەمزاغا نییە تەپاڵە ئاگری گڕ ناکاتەوە پاشەرۆک سەوی پڕ ناکاتەوە ++++++++++++++++++++++ سەرناو: کەسێ دڵسۆز بێ بۆ هەموو کەسێ سەبارەت: پەندەکانی پیرەمێرد، ڕۆژنامه‌ی ژیان، ژماره‌ ٣٥٨. - ئامادەکردن: کەماڵ ڕەحمانی کەسێ دڵسۆز بێ بۆ هەموو کەسێ دەرگایشی نەبێ لە دز نەترسێ بە قاسپەقاسپی کەو بایەخ مەکەن دیتە بۆ ڕاوی جینسی خۆی دەبەن پیاوێ دووربین بێ نابێ تەنیا بێ کە دۆستی نەبێ دەستیشی نابێ ئەوی بەتوندی لە جێی خۆی هەستا کاتێکت ڕوانی ماندوو بوو وەستا هەرچی ئەزانی بۆت ناچێتەسەر مەیکە بە خولیا و بەکەڵکەڵەی سەر نەزان، نەزانێ کە هیچ نەزانە بەختیش ڕووی تێ‌کا خانە وێرانە خودپەسەند دێوی نەفسی نەدیوە خۆی لە ئاوێنەی دێواندا دیوە مەلا بەدخوو بێ و بێ وەعز بدا بە زۆر غەیبەتی خۆی بە خەڵک ئەکا ئەو شێخەی مووچەی مرید وەرئەگرێ دەمی "برنگ"ە و خوری پێ ئەبڕێ بەو پارەیەی شێخ بەهەشت ئەفرۆشێ نەتەوەی پیاڵەی مەی پێ دەنۆشێ گەنجێ بە ڕەنج بێ ئەمێنێتەوە میرات بۆ "نەوە" شەڕ ئەنێتەوە ڕۆڵە ئەم پەندەم بە سەرمەشقت بێ لە سەوداگەری، سەودای عەشقت بێ بە عەشق ئازادەی هەر دوو جیهانی کە عەشقت نەبێ لەشی بێ‌گیانی ئەو سەرەی سەودای عەشقی تیا نییە کوولەکەی وشکی ئاوی کانییە خۆشیان ئەوێی هێشوە خۆشناوێ جنێوفرۆش بێ، باوکت خۆش ناوێ لە مەیدانا کەس دەنگی دەرنایە کە دوژمن شکا، زۆر کەس ئازایە ئەوی هەڵگری بە وشک و تەرە لە ماڵی خۆیا شای بەحر و بەڕە بەڕەشڕ دەشۆی بە ئاوی کانی قەدری ئاو مەگەر لە چۆڵ بزانی ئەوی ڕووبەڕوو تۆ هەڵدەکێشێ پاش ملە بە داخ ئاخ هەڵدەکێشێ ئێستاکە مووچەی جاسووس نەماوە لە دوور ئەم نانە بەو ڕۆنە باوە دیتە کە "بەز"یان بە "کتک" سپارد چۆن پارەی پەزیان ژمارد و بژارد ئەوی بە کتک بەزێ دەسپێرێ دیارە بز دارە پەزیش ئەبژێرێ ئەڵێن گوێرەکە بە پەموو فێر بێ دەست هەڵناگرێ زکیشی تێر بێ کەوتووینە دەورێ جوان پیری ناوێ ئەو دەورە گوزەشت چوار ژن بۆ پیاوێ مسکێن و ئاغا لێک ڕاست بوونەوە قوربانی و قوربان لەبیرچوونەوە موشیر و سوڵتان وەک گورز و قەڵغان هەڵگیران لەگەڵ سفرەی دیوەخان ++++++++++++++++++++++ سەرناو: وەجاغ‌کۆێر ماڵی ئەبەشنەوە سەبارەت: پەندەکانی پیرەمێرد، ڕۆژنامه‌ی ژیان، ژماره‌ ٣٥٩. - ئامادەکردن: کەماڵ ڕەحمانی وەجاغ‌کۆێر ماڵی ئەبەشنەوە کەر تۆپێ ناڵی ئەکێشنەوە لەم دنیایەدا کەس بێ‌غەم نییە ئەگەر بێ غەم بێ بنیادەم نییە کەوتووینە ڕۆژێ بوو بە وای نەفسی زۆرکەس هەوڵی دا خودا نەینووسی ئەڵێن تەور کلکی خۆی نابڕێتەوە وای ئەبڕێتەوە کە نەبێتەوە کورد بە عیبادەت دوعای مەقبوول کرد لەیلەتولقەدری لە ژنا خەرج کرد بەهار گیانداری پێ ئەژیێتەوە ئەترسم ماریش ببووژێتەوە بیستوومە وردە مەئموور دەرئەکرێ بەڕە هەر لە لای تەنکی ئەدڕێ ئەی ئەو کەسانەی کە کەم وەرئەگرن دەست بە کڵاوی خۆتانا بگرن ئیتر لەگەڵ کەس نابمە دەستەخوشک من و وێرانەی پیرێژن و مشک وەک جاران بێستان بەرەڵڵا نییە ئەم دووگە چەورە بێ بەڵا نییە ++++++++++++++++++++++ سەرناو: بێکار دەربارەی دەوڵەمەند ئەدوێ سەبارەت: پەندەکانی پیرەمێرد، ڕۆژنامه‌ی ژیان، ژماره‌ ٣٦٩. - ئامادەکردن: کەماڵ ڕەحمانی بێکار دەربارەی دەوڵەمەند ئەدوێ پیاوی ناهۆمێد مل لە تیغ ئەسوێ زۆر پیاو لەدەورەی پیاوێکی پیاوە گوڵەبەڕۆژە ڕوو لە هەتاوە زۆر نان‌بڕاوان بە هیوا دەژین بەڵام دار و گۆشت ئاشنای یەک نین ئەو کەسەی کە دڵ بریندار ئەکا خۆی بە واهیمە دەغەزار ئەکا کەر خۆڵەمێشی بۆیە خۆش ئەوێ تێیدا دەگەوزێ و تێر وەردەکەوێ بەدخوویی منداڵ لای باوک شەرمە ژیشک بە بێچووی خۆی دەڵێ نەرمە فەقێ بۆ ڕاتوو وا لە بەردەرگا دەچمە (وەکاشە) کە بام لێ دەرکا ئەو کەسەی دڵی لەگەڵ خەڵک پاکە خۆی پێی دڵخۆشە و لە بەد بێ‌باکە ڕۆژێ ڕووی ئەزەل ئەتدۆزێتەوە بێ کەڵەشێریش ڕۆژ ئەبێتەوە ئینجا دردەگا ڕووی کردە وڵات ترێ گەنانە و چاوئێشە داهات بەڵێ بەرسیلە ئەبێ بە حەڵوا بەڵام عومریشت بە تاڵی ئەڕوا تا نەبارێنێ باغ گەشکە ناکا تا نەگارێنێ، مر، هێلکە ناکا کەمی نەبینی دەوڵەتت بۆشە بەفراو لە چلەی هاوینا خۆشە ئەوی دەوڵەتی هەر بۆ خۆی ئەوێ خەوی بێ خەفەت نابینێ شەوێ باڵەشۆڕێمان تێکەوت بە جارێ بۆیە مێش زۆرە گەزۆ دەبارێ ++++++++++++++++++++++ سەرناو: بە هیوای خەڵکی لووتی بەرزە بوو سەبارەت: پەندەکانی پیرەمێرد، ڕۆژنامه‌ی ژیان، ژماره‌ ٣٧٠. - ئامادەکردن: کەماڵ ڕەحمانی بە هیوای خەڵکی لووتی بەرزە بوو لە باران ڕای کرد تووشی تەرزە بوو وتی: چەفتاڵی وا مەڵڵا ڕمیا وتی: مەیێژە، نمازت بڕیا سێیەمین وتی: هەر خۆم خاسم کرد نمازیان بڕیا دەنگم لێ نەکرد جوولەکە ساڵێ هامان ئەکوژن زۆردار هەر ڕۆژێ خوێنێ ئەمژن بە جوانی سووتا دەنکە هەنارێ بەخت ڕووی کردە دیگونە چارێ سیاسەت‌بازیی دەردێکی وایە بۆ دەوڵەمەندیش هەر بێ دەوایە بۆیە گێرۆدەن هێندێ بەو داوە کوێر هەتا ئەمرێ بە هیوای چاوە هیچ شارێ خۆشیی ئەم شارەی نییە بەڵام ڕەشەبا بوارەی نییە چەندم پێخۆشە لە سای دەوەنێ دانیشم و ژن، مەشکە بژەنێ با سەد تەیارە و بۆمبا بە جوێ بێ من تەنها شڵقەی مەشکەم لە گوێ بێ ++++++++++++++++++++++ سەرناو: دنیا سێبەرە دوای کەوی دەڕوا سەبارەت: پەندەکانی پیرەمێرد، ڕۆژنامه‌ی ژیان، ژماره‌ ٣٧١. - ئامادەکردن: کەماڵ ڕەحمانی دنیا سێبەرە دوای کەوی دەڕوا کە ڕووت وەرگێڕا ئەوت دێ لە دوا تا گەورەتر بی خەفەتت زۆرە کاتێکت خۆشە بکەویە نۆرە گەورەیی ئێستا دەردیسەرییە ئەچەوسێتەوە و لە خەو بەرییە نایشڵێن بۆ ئێمە جستوجۆیەتی ئەڵێن کردوکۆی هەر بۆ خۆیەتی ئەوسا پشتێنی لێ دەکەیتەوە کە خۆت لە بێکار جوێ بکەیتەوە ئەم دنیا حیزە بەری زۆر دوورە هەتا تۆ بڕۆی ئەو خواروژوورە زۆر جار چاوی ڕەش کاڵ ئەبێتەوە زۆر دان به‌ ترشی لاڵ ئه‌بێته‌وه‌ ١ تیکە قووت ئەدەن ناپرسن چییە؟ ئەم لوقمە چەورە بێ لەقمە نییە کە لەسەر خواردن نەڵێی ناوی خوا ئەڵێن: جنۆکە لە گەڵت ئەخوا ٢ دەست لە ئینسانی دڵ شکست مەدەن بڵێی بیسمیلا جوێنت پێ ئەدەن ئەگەر پشت بەستی بە دۆستی دوێنێ گەزی چی و جاوی چیت بۆ دەمێنێ؟ بەشی خواردنە مانگانەی چنۆک حەوز پڕ ئەبێ بە تنۆک تنۆک ١. له‌ چاپه‌که‌ی ڕه‌فیق ساڵحی ئاوایه: زۆر جار چاوی ڕەش کاڵ ئەبێتەوە ناڵێن چاو بە چاو ئەکەوێتەوە ٢. یانی گەدەی با دەکات. ٣. یەکێ لە ڕەوشتەکانی پێغەمبەر (د. خ) ئەوەیە پێش ئەوەی تەواو تێر بخۆی دەس لە نان خواردن بکێشییەوە. جا ئەگەر بیسمیللات کرد و بە وشیارییەوە نانت خوارد دەزانی چ بکەی. بەڵام ئەگەر چوویە سەر سفرە و ئاگات لەخۆ نەبوو زۆر لەوە پتر دەخۆی کە پێویستتە. جا بۆیە دەڵێن جنۆکە لە گەڵت دەخۆن. ++++++++++++++++++++++ سەرناو: گاڵتەی مناڵان هاتەوە کایە سەبارەت: پەندەکانی پیرەمێرد، ڕۆژنامه‌ی ژیان، ژماره‌ ٣٧٢. - ئامادەکردن: کەماڵ ڕەحمانی گاڵتەی مناڵان هاتەوە کایە بۆ مقۆ مقۆ، بوو بە سەرمایە وا بە یاری کۆن گاڵتە پێک ئەکەین لێمان زویر مەبن ناوی کەس نابەین بە گەنم گەنم گەوج تێدەکەوێ بەڵام "ڕێوی چوو" سیخورمەی دەوێ "ئاشە تەندوورە"ی زەمانە وایە هەرچی کە سوار بێ شەقی لە دوایە لەبەر چەپۆکان زۆر جل خوار بووە "بابی بابی"یە وا کەر سوار بووە نانی خۆت بجوو وەرکەوە لەوێ کڵاو بفڕێنی خەڵک دووت ئەکەوێ لە "سنگەوباز"دا ئەبێ دواکەوی کە بووی بە خەلفە هەر تێدەکەوی کەس ناڵێ حەمام بە فوو گەرم ئەبێ بە "پشت لێدانە" کۆڵنج نەرم ئەبێ ئەگەر "قاڕنەتۆپ" تەواو بزانی لە"قەل‌وشار"دا وەستای چوار نانی هیچ کەس بۆ سێ‌باز هێزی نەماوە ئێستا "کەوشەکی عاڕەبی" باوە بەخوێندەواری کار نایەتە گیر مدیریی بووە بە "میروگزیر" "پەنای بێ‌دەنگ "ە تووڕەیی نابێ ئەگەر سەد گۆێچکەی تیا ڕاکێشرابێ بو بێ ئابڕوو زۆر چشت موباحە ئەوی بێدەنگە "کۆلکی مزراحە" بە گوریسی خەڵک ئەچین بۆداران ئەڵێی، نە بامان دیوە، نە باران خوێن پەڕیە سەرت لووتت ئەپژێ کاسە کە پڕ بوو ئەوسا دەڕژێ ++++++++++++++++++++++ سەرناو: کە بووی بە حەڵقەی بەردەرگای خەڵقی سەبارەت: پەندەکانی پیرەمێرد، ڕۆژنامه‌ی ژیان، ژماره‌ ٣٧٣. - ئامادەکردن: کەماڵ ڕەحمانی کە بووی بە حەڵقەی بەردەرگای خەڵقی بەسەرتا ئەدەن لەبەر بێ کەڵکی دوای تەنگانەیی زۆر ئازادییە "ش"ی شین زۆر جار "ش"ی شادییە ١ کفرەحمەد تامرد قسەی لە خوا کرد بەو حەقە لای حەق ئیمانی دەربرد سۆفی ئارەقی لەلا حەرامە لای من قاچاغ بێ ئەوسا بەتامە نێرگەلەی تووتنی عەجەم ئەکێشم دووکێش و هووکێش خوێشی دەروێشم ئاسمان ئاهی بێکەس شینی کرد زەیل جێی ئەستێرەی کلداری گرت بێ‌دەست تێی گوشێ زۆردارێ بیخوا دەستی لێ مەدەن لەکردەوەی خوا گەلاوێژ هەڵات شەوقی ئەگڕێ بەرگی فەقیر و هەژار ئەدڕێ کە بە ڕۆژ چرای نەوت بسووتێنین لە تاریکیدا دۆش دادەمێنین کە بە ئاوی پاک باخچە ئاو ئەدەین لەتینوێتیدا دەم پێکا ئەدەین ئەڵێن: ئەم بەفرە لە پێشدا ئارد بوو قوونیان پێ سڕی بێ‌پێز و سارد بوو زیندوو بووەوە ڕاتبەی مەلایان یاخوا ئەم جارە تا سەر بێ بۆیان من خەستەی مار و مێرووم لەبەر بوو هەر لەم خاکەدا میری تورک میر بوو ١. ئاوا ده‌خوێندرێته‌وه؛ ‌"شینی"ی شین زۆر جار "شینی"ی شادییە ++++++++++++++++++++++ سەرناو: ئەگەر ئەتەوێ نەیێن بەگژتا سەبارەت: پەندەکانی پیرەمێرد، ڕۆژنامه‌ی ژیان، ژماره‌ ٣٩٠. - ئامادەکردن: کەماڵ ڕەحمانی ئەگەر ئەتەوێ نەیێن بەگژتا ئامادەی شەڕ بە لە هەموو وەختا لەشێنەییشدا پڕ چەک بنوێنە دڵی دوژمنی پێ بترسێنە ++++++++++++++++++++++ سەرناو: چوار کتێبی خوا چوار پەندی تیایە سەبارەت: پەندەکانی پیرەمێرد، ڕۆژنامه‌ی ژیان، ژماره‌ ٣٩٣. - ئامادەکردن: کەماڵ ڕەحمانی چوار کتێبی خوا چوار پەندی تیایە کە گوێی لێبگرن وەکو کیمیایه‌ تەوڕات وتوویە قانع بی تێری زەبوور وتوویە بێدەنگ بی شێری ئینجیلیش ئەڵێ: تۆ دەرکەنار بە لە دڵەخورپەی دنیا ڕزگار بە قورئان فەرموویە پشت بەخوا بەستە ئەتخاتە ڕێی ڕاست ئەوسایە بەستە دوژمن بە چاکە ئاشت ئەبێتەوە سەهۆڵ بە ئاوی گەرم ئەتوێتەوە کە لەگەڵ بەدا هەڵسی و دانیشی وەک شەکر لە جێی تەڕ هەو دەکێشی ئەمەندە وێڵی بەرگ و خۆراکین نازانین خۆمان خۆراکی خاکین کە وتیان مەکە شێتگیرتر دەبین حەرام بەتامە بۆ شەیتان ئەژین شەیتان هەنگوینی لە دەممان هەڵسوو بۆیە ئەم خەڵکە بەگژ یەکا چوو ئاردی ناو دڕک چۆنە وان ئیرە فەرموو دوو دەستەی دۆست هەڵبژێرە پێکەوە ناڕۆین لە ڕێی ڕاستەوە خوا ئەوه‌ بگرێ شاری گواستەوە بناغەی ئێرە ساڵی دووسەدە وا دەردەکەوێ خاکەکەی بەدە ئەگینە کە شار قەڵاچوالان بوو دوانزە سوارەیان مەردی مەیدان بوو ئێستا کە مەیدان بە سەر گوێلاکە هەر مڕەمڕە شەڕی سەر لاکە ++++++++++++++++++++++ سەرناو: کچ بە نابەدل بۆ پیر چوو بە بووک سەبارەت: پەندەکانی پیرەمێرد، ڕۆژنامه‌ی ژیان، ژماره‌ ٣٩٤. - ئامادەکردن: کەماڵ ڕەحمانی کچ بە نابەدل بۆ پیر چوو بە بووک مێرد بێزار ئەکا شەو بە نووکە نووک هانام بە تۆیە خوای دەستگیر نەمکەی بە بووک و بکەومە دەست پیر پیری پەک ئەخا و "بەستن" بیانووە ئەمە چیرۆکی دەوری کوانووە کۆڵە نانی بۆ بەستوو بانگ ئەکەن لای گولە نانێ بیسمیللا مەکەن گڕوگاڵ لێمان کەوتۆتە دوان گورگ پیر بوو دەبێ بە حەچەی سەگان بەفر و هەڵەکۆک بەحەسرەتەوە برجی پیرێژن نزیک کەوتەوە مەعاشەکەمان بەشی دۆڕانە بە دوو جەژنانە و سێ پاش تێلانە ئەعشار و ئەغنام وشکاییان هات وردە مەئمووران هەموو بوە بە لات گەرای کولـلەمان بۆ بژیێتەوە ئەمجا پێکوڕە ئەبووژێتەوە کە مەشکەدڕە نەتەوەی بڕا مەشکەی مەزبەتەی تەنزیلات دڕا لاپوورە بە داو داهاتۆتە ناو خورماڵی گێژ بوون وەک ماسی سەر ئاو بەمانە خەڵکم لێ تەوەللا بوو مەلا مەلا بوو بوار ئەولا بوو ++++++++++++++++++++++ سەرناو: ئەوا نەمردین کەوتینە بەهار سەبارەت: پەندەکانی پیرەمێرد، ڕۆژنامه‌ی ژیان، ژماره‌ ٣٩٧. - ئامادەکردن: کەماڵ ڕەحمانی ئەوا نەمردین کەوتینە بەهار بزانین دیاریمان چی بۆ دێ لە شار زۆر کەس ئەبینین دەچێتە بەغدا هەروەک پەتکە و نابێ بە هەودا ئەگەر هەر تیرێک لە نیشان بدرێت بەرگی مامۆستای تیرئەنداز ئەدڕێت ئەڵێن پشتیوان هەر لە بەغدایە هەر چی ڕیش سوور بێ بۆچ هەمزاغایە؟ قەساب تەمیزی بۆ دووکان ئەبێ کەچی بۆ ئێمە گۆشت گران ئەبێ عیسا میقرۆبی پاک ئەکردەوە لە عیسایان دا مووسا بووردەوە ئەڵێن گۆشتەکەی ئێستامان پاکە بە سەد فلسیش بێ هێشتا چ باکە نانەواخانە تەمیز و جوان بوو لەو تۆڵەیەدا نۆکمان گران بوو نانی گەرم ئەخۆی تامی تامییە کە سارد بووەوە گەنمەشامییە ڕەئیس شارەزای ئەم خووانەیە بەڵام ئاخ مشتەی ناو هەمانەیە ++++++++++++++++++++++ سەرناو: زۆر باران بارێ دەغڵ ژەنگ دێنێ سەبارەت: پەندەکانی پیرەمێرد، ڕۆژنامه‌ی ژیان، ژماره‌ ٤٠٠. - نووسین و ئامادەکردن: کەماڵ ڕەحمانی زۆر باران بارێ دەغڵ ژەنگ دێنێ ئاو زۆر مایەوە کرم هەڵدێنێ هەرچی کە کۆن بوو بێ تینە بۆشە تەنها شەرابە تا کۆن بێ خۆشە چاوی جوان ئه‌ڵێن: پیاڵه‌ی شه‌رابه‌ مه‌زه‌ی سه‌رمه‌ستی دڵه‌ی که‌بابه‌ ئەویش کە کۆن بوو کەس لێی ناپرسێ زەق ئەکاتەوە خەڵک لێی ئەترسێ نیسان سیوجگەری کرد بە چوار ئانە بێزووی پێدەکەین ئەڵبەت هەرزانە لە هەموو لاوە شایی کەوتە شار دەنگی زوڕنا دێ بەهارە بەهار ئەڵێن گیا لەسەر بنجی خۆی ئەڕوێ وەجاغ زادە بۆچ خەڵکی لێی ئەدوێ بۆچ مریشکی ڕەش هێلکەی سپییە بۆچ پەیین فەیز و هێزی زەوییە؟ کە خوا دای هیچ کەس ناڵێ کوڕی کێی دەسەڵاتداری هەر خۆت گەورەی دێی ئەوی خوێندوویە بە ئیقتیدارە خانیش نەوەشێ ئەو هەر سەر کارە ++++++++++++++++++++++ سەرناو: نازانم بۆچی ئەم پەندە باوە سەبارەت: پەندەکانی پیرەمێرد، ڕۆژنامه‌ی ژیان، ژماره‌ ٤٢٣. - نووسین و ئامادەکردن: کەماڵ ڕەحمانی نازانم بۆچی ئەم پەندە باوە ڕەمەزان بە جەنگ، سەفەر بەدناوە پێم مەڵێن ڕیست وەک خوری خاوە کوێر هەتا دەمرێ بە هیوای چاوە ژوور دووکەڵی بوو ڕاکە دەرەوە چاوی ڕەشی خۆت کاڵ مەکەرەوە پیاوان هێند ڕیشیان تاشی تاس‌ولووس وا لە تورکییە ژن بوون بە مەبعووس بەخۆت بنازی کارت لە دوایە بە مێردی نییە دەڵێن بە خوایە مەتەڵیان پرسی نەم زانی کامە سەری حەوت لەشکەر ژێری شانامە دەندووک درێژە و ماسیگر نییە هێلکەکەریشە کەچی مر نییە ڕەمەزان سێ تەون لێ گرتووینە دار حەوترنگێلی و قومار و خومار دز و خاوەن ماڵ کردەیان یەک خەن بە کونەبانا گاجووت سەردەخەن ++++++++++++++++++++++ سەرناو: ئەڵێن ڕەمەزان لاقێکی دەیە سەبارەت: پەندەکانی پیرەمێرد، ڕۆژنامه‌ی ژیان، ژماره‌ ٤٢٤. - نووسین و ئامادەکردن: کەماڵ ڕەحمانی ئەڵێن ڕەمەزان لاقێکی دەیە کێ دی بزانێ سێ لاقی هەیە لە مزگەوتاندا کەوتنە "الوداع" ڕۆژوویان تەراند بە "وەگاع وەگاع" هێند لێی تووڕە بوون بە شەڕ و هەرا لە قاپی سەرا هێجگاری تۆرا "لَیْلَةُالْقَدر"یش ئەبڕێتەوە وەک کابرای کوردە خەرج ئەبێتەوە بۆچ وتیان ڕۆژوو ئێسکی گرانە بە چایێک ڕۆیی ئەو بەستەزمانە ڕۆژوو و کریسمیس گەینە سەری ساڵ هەر دوو پێکەوە گەییشتینە ماڵ چه‌رخ و فه‌له‌کمان بۆ هه‌ڵخراوه‌ به‌ڵام که‌س هێزی گوژمه‌ی نه‌ماوه‌ ڕاست بێژ هەر بەشی پلار و پەڵە دەور دەوری دەورەی ماینە چەقەڵە "فەرز" گرانە حەز لە سوننەت ئەکەم کە ڕۆژوو نەگرم پارشێو بۆچ نەکەم ڕۆژی بیست و پێنج شایی لۆغانە بە تلی‌لی‌لی چوون بۆ تۆی‌یانە١ پاش جەژنێ بۆ من ئەڵڵاورمانە بەڵام بارانە و جێگا نەرمانە "ژیان" ئەڵێ: کێ گوێی لە دەنگمانە پارەی ئابوونە بکا بە جەژنانە٢ ١. تۆی‌یانە: بە تورکی مانای بووک هێنانە. ٢. مەبەستی ئەوەیە کە ئابوونەی ڕۆژنامەی ژیان بنێرن. ++++++++++++++++++++++ سەرناو: ئەوانەی کە شێو بە پشێو ئەکەن سەبارەت: پەندەکانی پیرەمێرد، ڕۆژنامه‌ی ژیان، ژماره‌ ٤٢٥. - نووسین و ئامادەکردن: کەماڵ ڕەحمانی ئەوانەی کە شێو بە پشێو ئەکەن فیکە بە برای نیوە لێو ئەکەن زستان خستنیە تاریک و لێوە سەد کوێر چاوساغێ نابا بەڕێوە کە هات سەرمەلا دەستنوێژی شکا ئیتر کێ نوێژی ئەکا لە تەکا مەلا سەرفیترەی کەمی وەردەگرت ئیمامەتیەکەی بێ‌دەستنوێژ ئەکرد ئەوانەی لەهجەی لامیان وەک ڕێیە ئەزانن پیری شەوکێڵ لە کوێیە ئەوانەی کە ڕێ بە غەین ئەخوێنن جیلوەی فیڵبازی دوو قەوم ئەنوێنن ئەوەی کە ناخوا و پارە زۆرکەرە گردکردنەوەکەی پارە زۆر کەرە سکەی ئەشڕەفی گوم بووبوو بە لاف وا پێمان ئەڵێن: بڕۆ هەی ئەشڕاف ++++++++++++++++++++++ سەرناو: جاران ئەچووینە سەر باوە گوڕگوڕ سەبارەت: پەندەکانی پیرەمێرد، ڕۆژنامه‌ی ژیان، ژماره‌ ٤٢٧. - نووسین و ئامادەکردن: کەماڵ ڕەحمانی جاران ئەچووینە سەر باوە گوڕگوڕ ئەمان گوت هاتوین بۆ زگپڕی و کوڕ باوەڕمان نەکرد شەخسە و پیاوی خودا تا هاتنە بەر پێی پادشا و گەدا کورێکی وای دا بە عاسمە خاتوون پۆیلانەی گەییە سەد هەزار ئاڵتوون ئەوی منداڵی نەبێ نه‌وت ئەخوا مناڵی ئەبێ بە مێرد یا بە خوا کارێکی گەورەی تر لە بەینایە هەم دیسانەوە ئەویش بە خودایە جێ مەبعووسێکی کەرکووک مونحەلە زۆر کەس بەهیوا و بە پەلەپەلە وەزیفەی ئێستا هەمووی بۆ نانە لێی ناگەڕێن ئەم دەوڵەمەندانە هاتووینەوە سەر نەریتی پێشوو بۆیە کچێکمان بۆ نادرێ بەشوو کە فرە میر بین بەر نابەینە سەر "بیرسی یا پەڕاو برسی یۆزەر"١ کاریان لەگەڵ یەک هەمووی بەقینە بۆ نان بڕین بێ تووتن شیرینە دووبەرەکییە و فیتنە لەناوە هۆمان کەوتۆتە گوێرەکەی لاوە ١. واته‌؛ یه‌کێک دروست ده‌کا و یه‌کێکی دی ده‌یرووخێنێ. ‌‌[په‌ندی تورکی] ++++++++++++++++++++++ سەرناو: وا ڕەشەمێ‌یە مڕمیاو مڕمیاوە سەبارەت: پەندەکانی پیرەمێرد، ڕۆژنامه‌ی ژین، ژماره‌ ٤٢٨. - نووسین: کەماڵ ڕەحمانی وا 'ڕەشەمێ'یە مڕمیاو مڕمیاوە بۆرە سوار بوونی 'داوود' دەم خاوە 'مریەم' بەرنادا هێندە بە جۆشە تا کەر لە بەغدا نەزەڕێ بۆشە ئەمە شەرتێکە بۆ منداڵانە ئێستا تا حەز کەی هێندە ئاسانە لە خەودا سواری کەر ئیعتیبارە بەڵام بە دیمەن هەر ئەو سوارە بورجی پیرێژن ئەمساڵ کەم سەختە ئەو لە پیاو زۆرتر بە ڕاو و بەخته ئەگەر بێ و بیکا بە زوقم و سەهۆڵ هەژارەکانمان چی دەگرنە کۆڵ ++++++++++++++++++++++ سەرناو: کە شاخی گۆیژە بەفری چووەوە سەبارەت: پەندەکانی پیرەمێرد، ڕۆژنامه‌ی ژین، ژماره‌ ٤٣١. - نووسین: کەماڵ ڕەحمانی کە شاخی گۆیژە بەفری چووەوە پەندی پێشینیان زیندوو بووەوە پێم بڵێی ڕۆڵە لەبەرت دەمرم خشتم تێبگری بەردت تێدەگرم کەواکەی خۆمە ئەیکەیتە بەرم ڕۆنەکەی خۆمە ئەیدەیتە سەرم کە ژن ملکەچ بوو بە نانی شوانێ بۆچی لێی ئەدەی بە کوڵە گۆچانێ کاسە کە پڕ بوو دیارە ئەڕژێ بەرداش لێک کەون تۆزیان ئەپرژێ لەگەڵ هاوماڵا مەکەوە ورتە لە جێی "سندان"ی تۆ "قوززەلقورتە" تا دەسندەت بێ قەدرت لە لامە کەوم بۆ نەگری پێت ناڵێم مامە کەمتیار ئەگەر پێی بڵێی چاکە قولەپێی ئەسمی هێشتا دەنگ ناکا هەنگەڵانەکەم هەمووی هەنگوینە خورمای کوردکوژەم لە لا شیرینە! تەرس هەڵدەڕێژێ خورما بە جەواڵ بۆیە دەکەونە شوێن کەری جەجاڵ کە لەناو خۆتا هاتو ڕێککەوتی ئیتر لە ترسی لاوە سرەوتی ++++++++++++++++++++++ سەرناو: دڵ ئەڕەنجێنێ پیاوی بێ کەماڵ سەبارەت: پەندەکانی پیرەمێرد، ڕۆژنامه‌ی ژین، ژماره‌ ٤٣٢. - نووسین و ئامادەکردن: کەماڵ ڕەحمانی دڵ ئەڕەنجێنێ پیاوی بێ‌کەماڵ بەهەڵەوەڕی دز دێتە سەر ماڵ قرژانگ کەستمی و وازی لێهێنام زوو تێگەیشتم کە چۆنی بەردام بۆ دەربەدەرێ مەکەوە سەما ئەگەر چاک بوایە لە جێی خۆی دەما گوڵ لەسەر لقی خۆیا ڕەنگینە بەردیش لە جێگای خۆیا سەنگینە بچۆرە شارێ کە کەس نەتناسێ تێر خۆت هەڵکێشە پڕ بە کراسێ با، مێخ سندانی توڕ ئەدایە دەر پێچە کڵۆیان دەهاویشتە بەر خوا منی لەژوور تۆوە داناوە هەر چییەک دەیکەی خەیاڵی خاوە قاچاقچی نەما ڕێژی لە ناوە١ بێ تووتنیە ئەم بەند و باوە دارکێشی ناری نەمروود بوو ئێستر گوێدرێژی گولە ڕەهبەری حوشتر دەروێشی بەنگ‌کێش سەر دەنێتە تاق بۆ بێگانەیە تریاقی عیراق ١. ڕێژی لە ناوە: پۆلیسی گومرک له ناوه. ++++++++++++++++++++++ سەرناو: خوا عەیبی بزنی دەرخستوەتە ڕوو سەبارەت: پەندەکانی پیرەمێرد، ڕۆژنامه‌ی ژین، ژماره‌ ٤٤١. - نووسین و ئامادەکردن: کەماڵ ڕەحمانی خوا عەیبی بزنی دەرخستوەتە ڕوو کەچی کڵاوی کردوە بۆ بەڕوو چێشتت بۆ ناکوڵێ بە بێ ئاگرێ خورمایش موتوربە نەکرێ ناگرێ دیجلە ئەم هەموو خەلیقەی دیوە لە لەنجە و لاری خۆی نەلەخشیوە هەر کەلوێ بەردێ لە تاقی کیسرا ئایەتێکە بۆ "لَیْلَةُالْاَسرا" بە زۆری پەنجەی عەشقێکی خایەن شیرینی ئەرمەن کەوتە مەدایەن بێستوون بە عەشق لە بن کەنراوە شۆرەتی شۆری بۆ فەرهاد ماوە ئەڵێن: فەرهادیش کوردە بەجێیە ڕەنجەڕۆی وەک ئەو کورد نەبێ کێیە؟ ! ئەفسانەی سەودا نەما بەسەرچوو ئێستا "جیازیی" کچ ئەدا بە شوو خزمەتی وەتەن گوزەشتەی پارە هەموو بۆ پارە ئەبین بە پارە هاوار لیرەی زەرد زرینگەی خۆشە کە هاتە بەرگوێ خودگیری بۆشە دەوران دەورانە وەک بابی بابی مەبعووسی بووە بە نوقڵی بابی جووجەڵە دەندووک لە هێلکە ئەدا دووپشک بە بێ قین پێتەوە ئەدا ++++++++++++++++++++++ سەرناو: هەڵۆ بەرز فڕی کەوتە سەر شارێ سەبارەت: پەندەکانی پیرەمێرد، ڕۆژنامه‌ی ژین، ژماره‌ ٤٤٣. - نووسین و ئامادەکردن: کەماڵ ڕەحمانی هەڵۆ بەرز فڕی کەوتە سەر شارێ تیری پەڕی خۆی هێنایە خوارێ ئەوی نەدیمی پیاوی گەورەیە ئەبێ"چاک بێژ" بێ دەوران دەورەیە دڵخۆشی نەخۆش، دەرمانی دەردە خەڵک بێزار ئەبێ لە بگرە و بەردە دوکتۆرێ هاتووە ئەڵێن کەححالە تێی ورووژاون ئەڵێی دەججالە بۆ موستەشفاکەی ژوور شار ڕامکێشە ڕازیانەم خوارد و بوو بە زگ‌ئێشە دوومەڵان بۆیه‌ پێی دەڵێن زۆڵە بە بێ تۆو دەڕوێ لەو دەشتە چۆڵە ئەڵێن گوڵەژەن لە هەموو ماڵێ ئەگەڕێ و دەرپێی لێ دادەماڵێ من بۆیە بستەم هێندە خۆش ئەوێ چی لە دڵ دایە ڕاست دەردەکەوێ وتیان پێغەمبەر بەکوێدا سەرکەوت وتی پەیژەکەی عیسای بەدەست کەوت کابرا وتوویە "میقروبی ـ هەی دەێ" میقرۆب ئەوەیە کە لە لاوە دێ ++++++++++++++++++++++ سەرناو: کەرەکەی عیسا ببەنە مەککە سەبارەت: پەندەکانی پیرەمێرد، ڕۆژنامه‌ی ژین، ژماره‌ ٤٤٤. - نووسین و ئامادەکردن: کەماڵ ڕەحمانی کەرەکەی عیسا ببەنە مەککە بڵێن: گوڕاوە تۆ باوەڕ مەکە زەمانەی عیسا و مووسا بەسەرچوو ڕووی درۆزنی تێدا ڕەش ئه‌بوو ئێستا دەورێکە درۆی وا دەکرێ ئاسمانیلییە و بە باڵ ئەفڕێ مووسایی هامان ئەکوژن بێ ئامان زۆری وا هەیە بیکەن بە هامان پاپا "ئافەڕۆز" ئەکا لەبەر قین ئێمە بۆچ فێری" ئافەڕۆز" نەبین بۆیقوتاژ حیسسی میللی زیاد ئەکا ئەو پیشە چاکە نان بە زیاد ئەکا چونکە موحتاجین بە نانی شەوێ بووینە عیسایی سێ خوامان ئەوێ ++++++++++++++++++++++ سەرناو: کوردی دۆ نەدیو پف لە دۆ ناکا سەبارەت: پەندەکانی پیرەمێرد، ڕۆژنامه‌ی ژیان، ژماره‌ ٤٤٦. - نووسین و ئامادەکردن: کەماڵ ڕەحمانی کوردی دۆ نەدیو پف لە دۆ ناکا کە تێریشی خوارد ڕوو لە تۆ ناکا ئەڵێی تۆفانی نووحە هەستاوە باوک ئەولادی ژێر پێی خۆی ناوە بە خاڵۆ خاڵۆ هات بە لامەوە بوو بە توولەمار دای وەپامەوە ئەگەر کەڵکی بێ ئەوسا خاڵەیە ئێستا دەور دەوری سوورەداڵەیە هەندێکمان هەیە ڕەگی خه‌و ئەگرن تا ئیشیان هەیە لەبەر پیاو ئەمرن ئەمڕۆ لە لایەن ساحێب مەقامی پێت هەڵخلیسکا شێت و نەفامی سەیر ئەو سەیرەیە ئەمەیش ئەزانین دێین خۆمان لادەین کەچی ناتوانین ئاخ خۆزگە هێندەی سەخی و جەسوورین چی دەبوو بەدڵ لە یەک ببوورین ئەو قەومە بەرز و ساحیب مەنزڵن کە لەگەڵ یەکدا ڕاست و یەکدڵن ئەوەی بە بەشی خۆی ناڕه‌زایە بە هەوڵی بێ‌جێ ڕووی لە قەزایە تیری دۆست لە پێی"ژیان" درابوو زۆراب بە تیغی ڕۆستەم کوژرابوو بە بەردەباران کورد نەمرد‌بوو بەگوڵی دۆستی گیانی دەرچووبوو ++++++++++++++++++++++ سەرناو: بە واتە واتە پیاو ئەبیێتەوە سەبارەت: پەندەکانی پیرەمێرد، ڕۆژنامه‌ی ژیان، ژماره‌ ٤٤٧. - نووسین و ئامادەکردن: کەماڵ ڕەحمانی بە واتە واتە پیاو ئەبیێتەوە خووی منداڵیمان لێ ئەژیێتەوە سەر و گوێی یەکمان شکاند بە کوتەک چەند لێک خەڕۆ بووین بە شەڕە گەڕەک من "گۆیژە"ییم و تۆ "کانیەسکانی" لە یەک بووبووینه دوژمنی گیانی هیتلەر و یەهوود هێندە دوژمن نین ئەوەندەی ئێمە لێک هاتووینە قین ئەو ئیشەی کەوا ڕاجیع بە خوا بێ بە زۆری بازووی هیچ لایێ نابێ پشتیوانەکەت ئەگەر بەکارە باراش لە ئاشی ژووروو بهاڕە ئەگینا کارمان لێرە لە پاشه‌ پیشەی پێشوومان دەوەن بە ئاشه‌ جاران ئیتالیا شەڕەگای ئەکرد وتیان خراپە پێیان لە ناو برد ئێمە بەران و کەو و کەڵەشێر تێک بەر ئەدەین و سەگ دەکەین بە شێر هەموو دەرسی شەڕ ئاخر شەڕییە بۆیە هەڵکردمان کوێرەوەرییە ++++++++++++++++++++++ سەرناو: گەرمای هاوینە گەرمەی میوەیە سەبارەت: پەندەکانی پیرەمێرد، ڕۆژنامه‌ی ژیان، ژماره‌ ٤٤٩. - نووسین و ئامادەکردن: کەماڵ ڕەحمانی گەرمای هاوینە گەرمەی میوەیە ئاخ میوە ئەمساڵ شەرای پێوەیە کاڵەک گران بوو تێرم لێ نەخوارد کەچی کوتوپڕ گەرمای تی بنارد خوا نەیداوینێ ساڵێ ئۆخەی کەین شادی بێ و تاڵی نەکەوێتە بەین ئێستا وەختێکە به‌ خۆشی و سەیران هەموو ئێواران بچینە سەر بێستان کەچی بە هیچە بۆ قینەبەری لە خۆش ڕابواردن خۆ دەکەین بەری عەیزاغا و میرزا زیندوو بوونەوە شێرزاد و شێرخان تێک هەڵچوونەوە ئەوە چاکی کرد بێ لایی نواند لای "معاویە" تیکەی خۆی ئەگلاند نوێژی لە پشتی "عەلی"یەوە دەکرد کە بوو بە هەڵدا ڕای کردە سەر گرد خۆ من نەوسنم بەڵام ئەو نانە کە بۆنی لێ بێ نایخۆم گرانە لە پشت کەسەوە جەماعەت ناکەم بۆ وڵاتەکەم بە هیوای چاکەم هەڵدایشم ناوێ بۆی بچمە سەر گرد ئاخ هەموو لایێ وەک منیان دەکرد ئێمە کە لەسەر هیچمان نەکردن دوو کەس دەمێنێ شایستەی مردن خۆزگە بۆ چاکی وا یەک دەکەوتین بە هیچ قووەتێ دانەدەکەوتین ++++++++++++++++++++++ سەرناو: ئەو دەمە بەختم لێبوو بەدوژمن سەبارەت: پەندەکانی پیرەمێرد، ڕۆژنامه‌ی ژیان، ژماره‌ ٤٥٠. - نووسین و ئامادەکردن: کەماڵ ڕەحمانی ئەو دەمە بەختم لێبوو بەدوژمن کە کەرە دێزه‌م بوو بە ڕمووزن ئەو دەمە هۆشم لێ شێوا و وەستام کە هەرچی هەڵسا وتی ئاش وەستام خزمەتی دەکەم هێشتا لێم ساردە تۆخوا مەلاگەل! ئەمیشە ئاردە؟ ! دەوڵەمەند پارەی بەکەس نەداوە پارەپەرەستی ئەڕوا لە دواوە ئەوی پێی ئەڵێن: وا بڕۆ دەڕوا بە هیچ قەولێکی ناکرێ بڕوا ئەوی جڵەوی خۆی دایە دەس خەڵک ناوی نراوە زەبوون و بێ کەڵک زەردەواڵەمان جارێ ئاڵۆزاند نانی شوانمان خوارد، گەوجیمان نواند لە هەر دوو لاوە تووشی جەزا بووین تەمێمان نەخوارد دیسان تێهەڵچووین تاریکایی شەو ئێوارە دیارە ئەڵێن خاکەکەی بەدە ئەم شارە ++++++++++++++++++++++ سەرناو: ئەمساڵ ئینتیخاب کەوتە باحورا سەبارەت: پەندەکانی پیرەمێرد، ڕۆژنامه‌ی ژیان، ژماره‌ ‌٤٥١. - نووسین و ئامادەکردن: کەماڵ ڕەحمانی ئەمساڵ ئینتیخاب کەوتە باحورا زۆر کەس دەروونی ئاگری تیا گڕا ئاویشمان کەمە بۆ ئاگر بڕی ئەویش هاتۆتە سەر نۆرە بڕی ئاخ بۆ میراوی خاوەند مرووەت ئاو و نووابی بکا بە نۆبەت مادام هاتۆتە سەر تێکەولێکە یەکێ تێگەیی زۆر ڕێک‌وپێکە چونکو بۆ هەندێ هینده تەلاشە لە خزمەت زیاتر هەوڵی مەعاشە بارێ دەوڵەمەند نەیقۆزێتەوە ساڵێ هەوارێ بگوێزێتەوە یا سوبع و ڕوبعی بۆ کارێکی خێر ببەخشێ و چاوی چواری لێ بێ تێر چاوێ تێر نەخوا بە بەشی خێوی گۆڕ وایە خاکی گۆڕی پێ پێوی ئەی ئەو کەسانەی بە خۆ دەنازن تا دەمرن حەسرەت بە نان و پیازن هونەر ئەوەیە بەختی لەگەڵ بێ چیمەنتۆ ئەبێ لمی تێکەڵ بێ جەوهەر بۆ دادی حەق بێ بەهایە بە مێردی نییە زۆر جار بە خوایە من سێ ڕۆژگانەی خۆم پێ بڕاوە نازانم چیمە لەم بەندوباوە؟ ++++++++++++++++++++++ سەرناو: وا گرد بوونەوە پایزە براکان سەبارەت: پەندەکانی پیرەمێرد، ڕۆژنامه‌ی ژیان، ژماره‌ ٤٥٢. - نووسین و ئامادەکردن: کەماڵ ڕەحمانی وا گرد بوونەوە پایزە براکان بەڵکو یەک کەون هیممەتی چاکان بەڵام وەک ئاردی ناو دڕک وایە براییش لەگەڵ نایێینە کایە خۆوڵاتیمان بۆچ لا چا نابێ؟ ! گوێلکی خۆماڵی بۆچ بە گا نابێ؟ ! مەڵێن: شیلاوگ مایەی پەنیرە فیتنە هەوێنی نۆ قازان شیرە مەدحی ڕووبەڕوو پیاو ئەدا بە شوو زۆر دۆستی سەر نان بە دوژمن دەرچوو خوا موسا بۆ سەر فیرعەون ئەنێرێ کەچی جار جار مەڕ بە گورگ ئەسپێرێ پیاو بۆ بۆرە پیاو ڕۆحی خۆی سەرف کرد کەچی پێی دەگوت بە دەردی خۆی مرد ئەو کانیەی ئاوی لێ دەخۆینەوە بە نابەکاری پڕی دەکەینەوە ئەوەی کە وەفای بۆ دوای خۆی نەبێ ئیتر تۆ دەبێ هیوای چیت پێی بێ سییاسەت پیشەی ئاغای بێ ڕیشە بۆیە گەلێ پیاو بێ ئیش و ڕیشە زۆر ڕیش و سمێڵ تاشراو وەک ئەوان خۆزگە ڕیش ئەبوو بە مۆدەی ژنان ئۆخەی ژنان بوون بە گەورەی گەڕەک ئەبێ دەستەی تر بچنە بەر خەڕەک ئینجا هێندێکیان چۆنی دەڕێسن لەگەڵ گوێچنە بەرزە بڵێسن بەنار نارۆکە سەر دەلەقێنن دەم بۆ یارۆی خەڵک دادەچەقێنن ئاخ خوێندەواری فریامان کەوە بۆ عالەم ڕۆژە، بۆ ئێمە شەوە ++++++++++++++++++++++ سەرناو: جالینووس ئەڵێ: تاقیم کردەوە سەبارەت: پەندەکانی پیرەمێرد، ڕۆژنامه‌ی ژیان، ژماره‌ ٤٥٣. - نووسین و ئامادەکردن: کەماڵ ڕەحمانی جالینووس ئەڵێ: تاقیم کردەوە هەر قەومێ ناسرا بە پێی کردەوە هیندی و حەکیمی، فورس و تەکەببور تورک ئیتاعەت، ئەرمەن سفرەدڕ عارەبی بەڕی و میوان پەروەری کورد و ئازایی، بە ماڵ و سەری حەبەش سەداقەت، شامی و شەئامەت١ مەلا و چرووکی، زەنگی و حەماقەت کورت و فیتنەیی، درێژی بێ هۆش لە دوو جەژنان بوو شێخی نوێژفرۆش ئاین و ئۆیینی مووزەردی چاوکاڵ شەهوەت پەرەستی ڕەشی ڕووبەخاڵ کوێر و حافیزە جوولەکە و حیساب بەنگ و کەساسی، دەوڵەت و شەراب جاف بۆ زییانی، هەمەوەند بۆ شەڕ شێخ و تەفرەقە، زەنگەنە بۆ گەڕ پشدەر جەنگاوەر ڕێکن و یەکن شوان و دزەیی لەناویان ئەکەن بانەیی دەڵێن: ئەسحابە کوژن سیوەیلی ئێستا قامک دەمژن ١. شه‌ئامه‌ت: ئەرک ‏و ئازار، ئەرکی‏گران، ئەزیه‌‏ت، ئەشکەنجە، ئەمەگ، ئێش، بار، بۆبلات، بۆ نەهاتن، بەختڕەشی، بەخت هەڵگەڕانەوە، بەدئیقباڵی، بەدبەختی، بەدشانسی، بەڵا، بەڵاوچۆرتم، بەڵاوموسیبه‌‏ت. ++++++++++++++++++++++ سەرناو: بە ڕیسی خەڵکی بۆچ ئەڵێی: پەتە سەبارەت: پەندەکانی پیرەمێرد، ڕۆژنامه‌ی ژیان، ژماره‌ ٤٥٤. - نووسین و ئامادەکردن: کەماڵ ڕەحمانی بە ڕیسی خەڵکی بۆچ ئەڵێی: پەتە زوبانت بێڵێ سەرت ڕەحەتە پیاوی زۆربڵێ بۆ دۆزەخ بەرە لەوێشدا ئەڵێ: دارەکەی تەڕە وەختێ ئەتوانی بەگژ مندا بێی بۆ بەرهەڵستی زۆری من بشێی پێ لە مار مەنێ هەر چەند سڕیش بێ مەچۆ ڕێی بەراز لە ڕەو بڕیش بێ تەنها گاجووتێ زیان دەنوێنێ کەچی گاگەلێ تێوە ئەگڵێنێ ئێستا من بۆیە ناوم پورێیە خەتا سوورێیە و لە خۆم دوورێیە دنیا شێواوە بە شڕم بڕم دەست بە کڵاوی خۆمەوە دەگرم هێشتاکو بێستان بەرەڵا نییە ئەم دووگە چەورە بێ بەڵا نییە ‌ ++++++++++++++++++++++ سەرناو: بە حوشتریان وت: خوا کوڕت باتێ سەبارەت: پەندەکانی پیرەمێرد، ڕۆژنامه‌ی ژین، ژماره‌ ٤٥٦. - نووسین و ئامادەکردن: کەماڵ ڕەحمانی بە حوشتریان وت: خوا کوڕت باتێ وتی: من بێ بار نامێنم ساتێ تا کار نەشێوێ ناگاتە سامان وەختە بۆ هەنگوین بچمە هەورامان ئاوی پاییزان لە بەفراو ئەکا ئەوی تێر نەخوا چی لە ئاو ئەکا شارێ بێ‌کاری ژوور بە کار کەوێ پیاوی پیاو هەرگیز تێیدا ناسرەوێ دێی فرەکوێخا ئاوەدان نابێ پیاوی زۆربڵێ نوکتەدان نابێ هەرچی خەڵک لە ژوور خۆیەوە بگرێ ئەوی دەیناسێ لەبەری دەمرێ ئەوی بە لۆقە ڕێی دۆست ئەبەستێ با بە لۆقیش بێ! زووتر دەوەستێ هەوا پەرەستی هێند لووتی بەرزە لووتی ئەبێتە کۆڵکی تەرزە یەک دڵ و یەکسان چەند خۆشە یاران بێ خەم، بێ پەڕوا لە تەرزە و باران پێنج و دوو ڕۆژێ دنیا ڕابوێرین دوشمن لە پردی نامەرد هەڵدێرین بەڵام وەک دەستمان خۆیشمان بڵاوین یەک ناگرین بۆیە وا بێ کڵاوین ++++++++++++++++++++++ سەرناو: سەرما هات بەرگی هەتیوی دڕی سەبارەت: پەندەکانی پیرەمێرد، ڕۆژنامه‌ی ژیان، ژماره‌ ٤٥٧. - نووسین و ئامادەکردن: کەماڵ ڕەحمانی سەرما هات بەرگی هەتیوی دڕی هەور لە خەرمانی چەڵتووکی خوڕی ئەمساڵ ناترسم کە لافاو بمبا هیچ گوێش نادەمه‌ فیشاڵی بۆمبا من دەورەی حەربی عوموومیم دیوە ئەوەی بترسێ دەستی بڕیوە بۆیە حەز ئەکەم باران ببارێ لەم بێ ئاوییە ڕسگار بێ شارێ هەموو لە تینوان ئاخ هەڵدەکێشن هێشتا بۆ ماڵان ئاو ڕادەکێشن ماکینەی گەورەی ئەلەکتریک هات خوا یار بێ نووری فەن کەوتە وڵات نان و گۆشت نرخی کەم کرایەوە پارەی 'کیلۆ وات' وەک خۆی مایەوە بۆ حەسحەسانە پیاو ئەخنکێنن کەچی لە ماسی ڕەسم ناسێنن بۆ مەستی توتن ئەپرسنەوە قاچاغی' ماسی' ئەبەشنەوە بەنی گرژ خەرجی هەوسار هۆنینە دەزووی خاو تەنها بۆ لەرز بڕینە ئەسپی بێ هەوسار زوو بێ جل ئەبێ پیاو سەربزێو بێ ئەستۆی شل دەبێ ++++++++++++++++++++++ سەرناو: لێرە لە چاکە و نەزاکەت گەڕێ سەبارەت: پەندەکانی پیرەمێرد، ڕۆژنامه‌ی ژیان، ژماره‌ ٤٥٨. - نووسین و ئامادەکردن: کەماڵ ڕەحمانی لێرە لە چاکە و نەزاکەت گەڕێ کوتەک لە بەهەشت هاتۆتە دەرێ زۆر جارم وتوە خەڕۆ بێ گۆێیە کوتەک دەزانێ قۆناغ لە کوێیە ئەگەر خوا باڵی بە فیل بدایە ئەبوو سەربانمان گشت بڕووخایە خۆت هەڵمەکێشە و مەڕۆ بە عینوان تفەنگ بۆ نیشان، ئەسپیش بۆ مەیدان ئێستا وا لێمان کەوتنە بەهانە بەدەست خەڵکەوە بێڵ زۆر ئاسانە شوهرەت ئافەتە لێت نابێتەوە جام بشکێ بەڵام نەزرینگێتەوە شەڕی ئیتالیا گرانی پێیە کەر لە کوێ کەوتوو کوندە لە کوێیە توخوا لێی گەڕێ با حاڵمان وا بێ تالعی ئێمە ئەبێ شۆربا بێ بە تەقویم سەرمای ئەمساڵ خەتەرە مەکتەبه‌کەیشمان لە شار بەدەرە لە مەعاریف دا هەر شار بەدەرین بۆیە وەک خاکین هەر خاک بە سەرین ++++++++++++++++++++++ سەرناو: شەوی پاییزان پیران نانوێنێ سەبارەت: پەندەکانی پیرەمێرد، ڕۆژنامه‌ی ژیان، ژماره‌ ٤٥٩. - نووسین و ئامادەکردن: کەماڵ ڕەحمانی شەوی پاییزان پیران نانوێنێ کەڵەشێرێکیش نییە بخوێنێ زۆربەی کەڵەشێر لە دێی "ماوەتە" کەڵەشێر کوشتن لایان لەعنەتە شەومان درێژە و ڕۆژمان بە هەورە نمەکمان سوێرە و پڵاومان چەورە هیچ کەس نابینم دڵسۆز بێ بۆمان زوو پیاو ئەگۆڕێ ئاوی "کانیه‌سکان"!! گونای کەس نییە خەتای خۆمانە جێگای هیوامان "گردی سەیوانە" هەندێ بە کێلی باوکیان ئەنازن هەندێ بۆ ئاشووب ئاواتەخوازن هەندێ کتکیان لەلا وەک شێرە هەندێ هێندەیە تا سکیان تێرە ئەڵێن مردووشۆر پارەی بەرێ زوو خوای دەکرد مردوو گۆڕ بە گۆڕ دەچوو پەردەی بینایی ئەسپ و شێر وایە سامی ئینسانی وەک دێو لە لایە ئەگینە ئێمە چۆن سواریان ئەبین دوو هێندەی ئێمەن لێیان ناترسین ژن تەڵاق ئەدەین شوو ئەکا زۆر باش ئەڵێین قەی ناکا بۆمان بوو "بەجاش" ++++++++++++++++++++++ سەرناو: بۆنی گول لە لای قالۆنچە دەردە سەبارەت: پەندەکانی پیرەمێرد، ڕۆژنامه‌ی ژیان، ژماره‌ ٤٦٠. - نووسین و ئامادەکردن: کەماڵ ڕەحمانی بۆنی گول لە لای قالۆنچە دەردە ژن بێ ڕووسووری ناچێتە پەردە "برا! ئەم پیاگە سەیری چەند خۆشە من بێژم: نێرە، بێژێ: بیدۆشە" ئۆخەیچ کە ئێستا زۆردار بێ هێزە لە بیرتە ئەیگوت گاڵت وەگوێزە نەک ئەمری وەزیر فەرموودەی شا بێ لەم زەویە ڕەقە چەوەندەر نابێ کە تۆ خۆت شل کرد لە ڕووی ناکەسێ ئەڵێ: بڕوانە چۆن لێم ئەترسێ؟ چاکە لەگەڵ بەد خراپ ناو ئەبرێ کە گورگ بەخێو کەی خوای مەڕ ئەتگرێ مێروولە کە خوا غەزەبی لێگرت کاتێکت زانی لە پڕ باڵی گرت خانوێکم هەیە زۆر ناتەواوە دار و پەردووی باش ئێستا نەماوە ساڵێ سێ جاری هەڵدەگێڕمەوە لە پڕ دەڕووخێ ناحەوێمەوە ئەمساڵ مەبعووسی هاتوه‌تە ڕەواج ڕەسمی ئیفتیتاح کەوتە بەر میعراج بەڵام عومر و ڕزق لە بەراتایە بزانین بە بەرات کێ دێتە کایە شایی شاییکەر لۆغەی دراوسێ لە تازیەی ژنان سەرم دەئاوسێ ++++++++++++++++++++++ سەرناو: وا ڕەمەزان دێ ئەبێ بە کوێخا سەبارەت: پەندەکانی پیرەمێرد، ڕۆژنامه‌ی ژیان، ژماره‌ ٤٦١. - نووسین و ئامادەکردن: کەماڵ ڕەحمانی وا ڕەمەزان دێ ئەبێ بە کوێخا پەکی کەشکەک و گیپەکەم ئەخا ئەگەر من بڵێم: ڕەمەزان نییە کێ لێم دەپرسێ جەزاکەم چییە؟ چونکو گوناهی لەوە گەورەتر ئەمەندە زۆرە بە باری حوشتر باقڵ دەچینە پەردەی ئیعتیکاف جنۆکە دەبەن بۆ پشت کێوی قاف نەوەڵڵا ڕەست و داو هێند گرانە بە قەد ڕکاتی تەراویحمانە تاریکە شەوە و ئەحزاب لە ناوە "ڕەمەزان" بە جەنگ"، "سەفەر" بەدناوە لە ئەفریقادا بووە بە گەردەش دونیا شێواوە وەک مووی قولەڕەش جاران جوولەکە خومی ئەشێوا ئەکەوتە درۆ و قوڕی دەپێوا ئێستا بێ‌ئەوەی کە خوم بشێوێ درۆی وا دەکەین بەقەدەر کێوێ ئەڵێن: بۆ مەئموور مەنشوور دراوە خاتر و خۆتر بۆ کەس نەماوە کەچی پێکوڕە داشی دامەیە نازانین تەقی و شەقی کامەیە١ ١. پیره‌مێرد له سه‌ر ئه‌م دێڕه‌په‌نده‌ نووسیویه‌تی: کولله که بێچوو هه‌ڵدێنێ و هیشتا ته‌واو باڵ ناگرێ، ئه‌و ورده کولله‌یه‌ پێکوڕه‌یه‌. ورده‌ مه‌ئمووریش پێکوڕه‌ن وه‌کوو داشی دامه‌ له‌م خان بۆ ئه‌و خان ئه‌یانگوێزنه‌وه‌. ++++++++++++++++++++++ سەرناو: یەکێ تەعریفی قانوونی پرسی سەبارەت: پەندەکانی پیرەمێرد، ڕۆژنامه‌ی ژیان، ژماره‌ ٤٦٢. - نووسین و ئامادەکردن: کەماڵ ڕەحمانی یەکێ تەعریفی قانوونی پرسی وتی: ئەیزانی ئەگەر نەترسی وتم من ئێستا لە دونیادا نیم بە خواردەمەنی و زەماوەند ئەژیم قانوون بۆ بەزم و بۆ زەماوەنده‌ گۆرانی له‌سه‌ر "قانوون" په‌سنده‌ جاران ئه‌یانگووت " قانوون" ڕێبازە بەو ئەندازەیە هەرگیز مەنازە بۆ سلێمانیش قانوون نەبووە قانوونی خوامان لا بەسەر چووە هەندێ بە ئەحزاب خۆیان هەڵدەنێن نوقتەی سەرەوەی لای ڕاست دائەنێن ئێمە کە فێری شەڕە گەڕەکین کە بووینە ئەحزاب کێ دەڵێ یەکین هەندێ بە عیلم و خووی چاک ئەنازن تا دەمرن حەسرەت بە نان و پیازن وەکو ئاغاکەی دێی "سیامەنسوور" مەدحێکی زۆریان کرد بە واتەی دوور کە هاتە ئێرە منیش هەر وام دی کەچی وەعدی دا زوو هێنایە دی بەوە تێگەییم کە نابێ بە پیاو چونکە بە درۆ" رجال" دێتە ناو١ ١. یانی درۆی نه‌کرد. حال وایه ئینسان به درۆ ده‌بێته‌ پیاوی گه‌وره‌. مه‌به‌ستی له‌ "پیاو" لێره‌دا پیاوی گه‌وره‌ و خاوه‌ن پایه‌یه‌. ئه‌گینا شێخ قادر پیاوێکی پیاوانه‌ی هه‌ڵکه‌وتوو بوو. ++++++++++++++++++++++ سەرناو: جاران کاسەی دۆ کەوچکی تیا بوو سەبارەت: پەندەکانی پیرەمێرد، ڕۆژنامه‌ی ژیان، ژماره‌ ٤٦٣. - نووسین و ئامادەکردن: کەماڵ ڕەحمانی جاران کاسەی دۆ کەوچکی تیا بوو بە ڕیزە هەرکەس نۆرەی جیا بوو ئێستا هەر کەسێ پیاڵەی خۆی پڕ کا بەشی کەس نادا بشڵێی: وا خنکا "ئەسکەمل" جاران کە سیرمەدار بوو هەر چوار تەرەفی لێوە دیار بوو ئێستا گەورەکان "قۆڵتۆغ"نشینن ئەم‌لاو ئەولا و دوای خۆیان نابینن خۆزگە ئەو عەقڵەی پێش چوونە سەرکار لە سەردا ئەما و ئەتهێنایە کار خۆزگه‌ به‌ڵێن وه‌ک ماست سپی ده‌بوو به‌سه‌ر لێوه‌وه‌ شوێنێکی ده‌‌بوو ماست و ڕاست ئێستا بوونە مۆدەی کۆن شەرم و تەریقی نەهێشتوە "پاردۆن"١ بیستم ئاغاکەی دێی "سیامەنسوور" ئەحواڵی منی کردووە بە دەستوور وتوویە تاکو پیشەی درۆ بوو موتەسەڕڕیف بوو هەم سەربەخۆ بوو بووبوو بە عوزوی مەجلیسی عالی زۆری نەمابوو ببێ بە والی ئێستا کە تەرکی درۆی کردووە چاوەڕێی کەوش و پاڵتۆی مردووە ئەو ماڵ‌وێرانە بۆچ وا ڕاست ئەڕوا ئەم ڕاستگۆییە ئەوی خستە دوا ١. پاردۆن: ببووره‌ ++++++++++++++++++++++ سەرناو: ساف‌دەروون، داری دەستی بەدکارە سەبارەت: پەندەکانی پیرەمێرد، ڕۆژنامه‌ی ژیان، ژماره‌ ٤٦٤. - نووسین و ئامادەکردن: کەماڵ ڕەحمانی ساف‌دەروون، داری دەستی بەدکارە بۆیە شەڕەدار زۆرە لەم شارە ئەو قەومەی پیشەی دەوەن بە ئاشە سێبەری ڕوەو ڕۆژە لە پاشە ئەو پیاوە گەورەی کە خۆش باوەڕە بەدەست خەڵکەوە مێکوتی ساوەرە زینهار خوار دەستت بە کەم مەبینە بۆیە بە کینە، لێت نائەمینە هی وامان هەیە دێتە لات خۆشێ بە خۆت نازانی، تا دەتفرۆشێ بە بەندیخانە پیاو عاقڵ دەبێ هەندێ سەرچڵ و زۆرەمل دەبێ هەندێ بە فریو گەیوەتە پایە شەیتان لە بەرگی فریشتە دایە کەسێ بوێرێ بیسمیللا بکا وەرە سەیر کە چۆن ئابڕوویان تکا سەلاحییەتی ساڵحانم نییە بڵێم: ئەمە ڕەش، ئەمە سپییە کە کەلیمەی "ڕەش" وەرگەڕێتەوە دەبینی شەڕی لێ دەبێتەوە جەژنی میلاد و ئێمە یەک کەوتن ئێرە بۆیە یەک ناکەون، چەوتن جاران "حاجیلێ بە خێرێ" باو بوو لە بەختی ئێمە گوێزی بێ ناو بوو ++++++++++++++++++++++ سەرناو: پیاوی ناوەجاخ مەخەنە سەر کار سەبارەت: پەندەکانی پیرەمێرد، ڕۆژنامه‌ی ژیان، ژماره‌ ٤٦٥. - نووسین و ئامادەکردن: کەماڵ ڕەحمانی پیاوی ناوەجاخ مەخەنە سەر کار هاوڕێکانیشی دەکا بە بێ عار ئەوەی تێکۆشێ و ئیش بکا بێ دەنگ "دەماوەرێک" دێ و دەیکا بە پارسەنگ ئەگەر پێم بڵێیت ئامشۆی کێ دەکەی؟ ئەڵێم یا خراپ یا بەجێ دەکەی هەر چشتێ زۆر بێ هەرزان بیکڕە عیلم تا زۆر بێ بەهای زۆرترە ئه‌ده‌ب تاجێکه‌ له‌ نووری یه‌زدان بیکه‌ره‌ سه‌ر و بچۆره‌ ئاسمان بێ ئەدەب ئاوی ئەدەبخانەی دێ بەردی تێگرێ پڕیشکت بۆ دێ "بە خۆوە نەدیو" دەم قاڵی دەوێ لە سەرخۆش گەڕێ ئەو خۆی دەکەوێ بۆ خۆهەڵکێشان زەعیم بوزورگن هەندێکی تر هەن سپڵی لاورگن شەوچەرە لەبەر "سپڵە" دامەنێ کە خواردی و ڕۆیی پێت پێدەکەنێ بەڵام تۆ بیدە با پێ نەزانن لێیان ببوورە قوڕی زستانن ئاخۆ گەردشی کورسی چی لێهات؟ هیوا بۆ قابسز ترس بۆ دەسەڵات بێ "دۆ" بە هیوای شیری مەڕ ئەژی کاتێکی زانی بەرخ مەڕی مژی "بابی بابی"یە کایەی زەمانە ئەم چەرخە کۆنە دەوران دەورانە پەندی پێشینان هەر چەند پەسەندە پەندی ئەم پەندە جائیزەی بەندە ++++++++++++++++++++++ سەرناو: ئەگەر سەعاتت زۆر دەستی لێدەی سەبارەت: پەندەکانی پیرەمێرد، ڕۆژنامه‌ی ژیان، ژماره‌ ٤٦٦. - نووسین و ئامادەکردن: کەماڵ ڕەحمانی ئەگەر سەعاتت زۆر دەستی لێدەی ئاخری تێک ئەچێ ئەبێ فڕێی دەی بەسەر دۆستا بێی بەدیارییەوە لەوە چاکترە کین بشاریەوە کە ئیشێکت کرد زانیت خەتایە بگەڕێیتەوە بوزورگی تیایە ئەگەر لێبووردی بێ پەشیمانی ئەنجا لەزەتی عەفو دەزانی ئەگەر بێی بە قین تۆڵە بستێنی خەوی ڕەحەتی لای خۆت نابینی ئەوە جنێوت پێ دەگەیەنێ کەوا جنێوت پێ دەگەیەنێ کە دوو کەس ئاشت بن بە تۆ چاکترە هەر ڕۆژه‌ی سفرەی لایە حازرە کە سەری هەودای ویجدانت بەردا ئەم دیو ئەو دیوت زۆر دێ بە سەردا ئەڵێن: پیرێژن بە تەفرە و مەکرە کەچی جوانەکان کەوتوونە دەورە بورجی پیرێژن هێشتا ماویە جوانەژن پێشین بەندوباویە ئەیشزانن جێی کەس بەوان نادرێ دیسان هەوڵ ئەدەن خەڵک نانی ببڕێ ئەوی بە ناحەق نانی خەڵک ئه‌بڕێ نەنگەویستی و ترس بۆ خۆی ئەکڕێ بەڵام هەندێ کەس نائەهل و بەدخوون خۆیان چاوەڕێی دەرکردنی زوون ++++++++++++++++++++++ سەرناو: جێگای تەنگ بووبوو ئەمجارە ژیان سەبارەت: پەندەکانی پیرەمێرد، ڕۆژنامه‌ی ژیان، ژماره‌ ٤٦٧. - نووسین و ئامادەکردن: کەماڵ ڕەحمانی جێگای تەنگ بووبوو ئەمجارە ژیان گاڵتە کەوتە پاڵ پەندی پێشینان پیاوێک ژنی مرد قولێکی هانی وتیان چۆن لەگەڵ قولدا ئەتوانی؟ وتی: بۆ ماتەم پیشەی دێرینە سەراپا بەرگی تازێدار شینە من بەرگی ڕەشم کردەبەر جێیە کە ماتمگیریی عائید بەوێیە من سەگم دیوە لەسەرەنوێلک قەپاڵی دەگرت لە گۆشتی تووتک دەستم دەرمانی سەر زگی قەبزە خامەم ڕەوەانە شارەزای نەبزە سێبەڕو... ماینێکی بۆرەم بوو سواری دەبووم ڕۆژێ بە ئیشێک بۆ دێیەک دەچووم نزیک ئاوایی ژنێکی نازدار بانگی کردە من وتی: بۆرەسوار سێبەڕۆ دارم ئارامم نییە لە تۆ دەپرسم دەرمانی چییە وتم لەم دەردە ڕسگارت دەبێ ئەگەر بێ و دڵی من بێنیتە جێ وتی: ناچارم دڵت بێنمە جێ بەڵام یاخوا تۆیش ئەمەت بێتە ڕێ هار و مار ودمی 'باوە شابان'١ بوو هەر چی هار ئەیگرت بۆ ئەوێ دەچوو لەگەڵ پەنچکێ نانیان بۆ دەجوو نووتکی دەهاویشت ڕسگاری دەبوو ئەمەندە هاروماریان چاک ئەکرد کەچی 'شاپیاو'٢یان بە گورگی هار مرد حەکیم لە دەردی کەسی خۆی کۆڵە بۆیە خزمانی دەکەونە بۆڵە ١. پیاوێکی له خواترس بوو له عه‌شره‌تی کاکه‌یی. ٢. مه‌به‌ست له ئیبراهیم ئاغای خوبیله‌یه‌. ++++++++++++++++++++++ سەرناو: هەندێ کە لە پڕ بەرز ئەبنەوە سەبارەت: پەندەکانی پیرەمێرد، ڕۆژنامه‌ی ژیان، ژماره‌ ٤٦٨. - نووسین و ئامادەکردن: کەماڵ ڕەحمانی هەندێ کە لە پڕ بەرز ئەبنەوە کە کەوتنە خوارێ ئەبوورنەوە کە بە توونچێتی بووی بە حەمامچی خۆت لێ ناگۆڕێ، لە ڕێ دەرناچی بەڵام کە لە پڕ هاتی بووی بە کوڕ نان خۆرێ دەبی، سپڵەی سفرەدڕ ئەگەر پێ بە پێی هاوڕێکانت بێی پێت ناڵێن کابرا! نازانن تۆ کێی هەر موویە لە ڕیز ڕیزە تێپەڕێ مەقەستی وەستای دەلاک ئەیبڕێ نەخوازەڵا وا "زیل"١ کەوتۆتە ناو هەرچی بەرکەوێ، ئەڵێن کلک بڕاو بۆ کلکەقوڵێ دەچنە لای داپیر ئەماننێرێتە لای بزن بۆ شیر شیری داپیر خۆر، بێ کلک ئەمێنێ سەگ بەهێزی کلک ئێسقان ئەشکێنێ پیرەمێردێ هات، پێی وتم پیرێ هەر کەس لە باری خۆی گوێز ئەژمێرێ ١. مه‌به‌ست له‌ یاسای "ذیل"ه‌ که‌ فه‌رمانبه‌ری پێ له‌ کار ده‌رده‌کرا. "ذیل قانون العقوبات" ++++++++++++++++++++++ سەرناو: مانگی ڕەشەمێ دووکەڵ دەرناچێ سەبارەت: پەندەکانی پیرەمێرد، ڕۆژنامه‌ی ژیان، ژماره‌ ٤٦٩. - نووسین و ئامادەکردن: کەماڵ ڕەحمانی مانگی ڕەشەمێ دووکەڵ دەرناچێ خاتوو زەمهەریر پرچ هەڵئەپاچێ لەقلەق هاتەوە نیشتە سەر هێلکە مەیدان خاڵی بوو بۆ پەرەسێلکە کلکی دووفاقی نموونەی زەیلە شارەزوور ئەمساڵ لە ڕاوکەر کەیلە عەینەمەل دەرکەوت، ساڵی کوللەیە بەڵام بۆ ئەودیو ئەزمڕ پلەیە!! بای بەهار دەشنێ! کۆلارەی دەوێ بزانین بە پەتی کێ سەردەکەوێ کۆلارە ساڵێ نێرە و ساڵێ مێ ئەمسال برەوی ژنانە کەمێ بە هۆ و بە هیوای داری پەڵکەوە وەک فڕفڕۆکەین بەدەس خەڵکەوە بەڵام لە لەشی چالەکە١ دەچین هەتا لێمان دەن پێی قەڵەو دەبین هێندە کە بڵێی کەمتیار چاکە قولەپێی دەسمی هێشتا دەنگ ناکا بە کەر ناوێرن بە کورتان شێرین وەک سووره‌واڵەین بە خاڵمان فێرین ١. چالوو، کوڕه‌به‌ش. ++++++++++++++++++++++ سەرناو: ئای بۆ ئەو ڕۆژەی ترس دێ بەسەردا سەبارەت: پەندەکانی پیرەمێرد، ڕۆژنامه‌ی ژیان، ژماره‌ ٤٧٠. - نووسین و ئامادەکردن: کەماڵ ڕەحمانی ئای بۆ ئەو ڕۆژەی ترس دێ بەسەرا کونە مشک لامان ئەبێ بە سەرا کە کەوتینەوە کۆمەڵی یاران ئەڵێی نە بامان دیوە نە باران کوێخا جوامێری هەمەوەند دەیگوت های جوامێر ڕۆم و عەجەم وا لە دووت! سەرێ کە شاهان بە تەمای نەبن بۆ ئەوە دەشێ هەڵکەنرێ لە بن ئەوسا کە جوامێر دەنگی دڵێر بوو تیپی هەمەوەند ژنیشیان شێر بوو ئێستا من هەسم دوڵدڵم پێیە ئاخۆ ناپرسن لەشکرت کێیە لە هەمووی خۆشتر خەیاڵ بازییە حوکمی سەری بەنگ یەکەتازییە خەیاڵبازییە چارەی دڵتەنگی شەراب بە گەردش، بەنگ به بێدەنگی بەڵام بەنگ‌کێش بی مەچۆره گوێ ئاو جۆگەلەت لەلا ئەبێ بە شەتاو هەر خۆم ئەیزانم شەراب بکەم نۆش گوێ زەڵم و ماسی و سەوزی و هەوای خۆش ++++++++++++++++++++++ سەرناو: جووجەڵه دوو خووی بە ئێمە داوە سەبارەت: پەندەکانی پیرەمێرد، ڕۆژنامه‌ی ژیان، ژماره‌ ٤٧١. - نووسین و ئامادەکردن: کەماڵ ڕەحمانی جووجەڵه دوو خووی بە ئێمە داوە کە بێین پێش کەوین بۆ پێمان داوە یەکێ کە سەری له‌ هێلکە جووقا توێکڵی شڕ دەکا لە ژێر دەندوکا دووەم بێ دەعوای میراتی باوک یەکتر کوێر دەکەن بە شەڕە دەندووک ئێمەیش ئەو خاکەی جێ سروشتمانە ژێر لەقەی ئەدەین، خو و ڕەوشتمانە دەڕوانی هیچمان لە ناودا نییە ئەومان لەگەڵ ئەو بۆ شەڕ شەقییە کەویش خوویەکی خۆی پێ بەخشیوین دیارە بۆ ئەوە شایستەی دیوین١ کەو دەبەنە ڕاو بە فێڵ دەخوێنێ هاوجینسی خۆیان بۆ کوشتن دێنێ ئێمەیش تەسبیح و زیکر و ئیستیغفار کەچی کەشکۆڵمان پڕ لە ئیستیخبار دەبینن برسی و کەسیرە و کزین دانمان ئەدەنێ دەستیان دەگەزین بە زەیلی زەیلیش نایێینە ژێر بار 'زەیل'٢ درێژەی بەست وەک ڕۆژی بەهار تا نەبڕێینەوە ئەو نابڕێتەوە وا دیارە تا دێت ئەتەنێتەوە ١. یاسایه‌کی پاشکۆ بوو له‌ سه‌رده‌می شایه‌تییدا، بۆ ئه‌وه‌ دانرا هه‌ر فه‌رمانبه‌رێکیان نه‌ویستایه‌ به‌و یاسایه‌ ده‌ریان ده‌کرد و ده‌یانوت به‌ر 'زیل' که‌وت. ++++++++++++++++++++++ سەرناو: دنیاکەی فانی کاروانسەرا ڕەنگ سەبارەت: پەندەکانی پیرەمێرد، ڕۆژنامه‌ی ژیان، ژماره‌ ٤٧٢. - نووسین و ئامادەکردن: کەماڵ ڕەحمانی دنیاکەی فانی کاروانسەرا ڕەنگ نیوەی دڵ شادە و ئەو نیوەی دڵتەنگ ئاوێنەی دەوران دوو چشت دەنوێنێ خەتەمیزینێ و کڵاوفڕێنێ بە عەشایەری دەعوا حەل دەکەن شاگرد شەق ئەخوا و وەستا تێدەخەن لەخەت دەرمەچۆ و مەکەوە دەورە دەست بە کڵاوی خۆتەوە بگرە لە کەری تۆپیو مەگەڕێ بۆ ناڵ ڕۆژێکیش دەبێ تۆ دەخەنە چاڵ دەستەی خۆی دەوێ کە خاوەن دەستە دەستە کەوتە دەست، دەستەی تر پەستە ئەو کاربەدەستەی کە کارشوناسە کردەوە ناسە خاتر نەناسە ئەوی بە خاتر ئەمڕۆ دامەزرا کە ئەرخەی گۆڕا پەتی ئەو پچڕا ئەو پیاوەی پیاو بێ ئەو ئیشەی ناوێ وەک ماین‌چەقەڵ١ هەر کەسە تاوێ ئەوی بە هیوای ڕەجا و بەرتیل بێ ئەبێ گوێی دایم لە زیلەزیل بێ با وجوود ئێستا عەکسی ئەوەیە ئەبینین دەوران بۆ یەک شەوەیە دیاره ئەو باخە کە نایەتە بەر "بریسی یاپار اوبری بۆزەر"٢ ١. پیره‌مێرد ده‌ڵێ: مه‌به‌ستم له ماینه‌چه‌قه‌ڵ چه‌رخ‌وفه‌له‌کی منداڵانه‌ که‌ داییئه‌نێن و و یه‌کی تاوێک سواری ئه‌بن. ٢. مه‌شهووره تورک وتوویه: قجه‌ منداڵی بۆ نایەتە بەر"بریسی یاپار اوبری بۆزەر" ++++++++++++++++++++++ سەرناو: بە حوشتریان گوت حوشتر کوڕت بوو سەبارەت: پەندەکانی پیرەمێرد، ڕۆژنامه‌ی ژیان، ژماره‌ ٤٧٣. - نووسین و ئامادەکردن: کەماڵ ڕەحمانی بە حوشتریان گوت حوشتر کوڕت بوو وتی لە ئەستۆی من بار لا نەچوو بە زەیلداریان گوت چی بوو ئەم کەتنە وتی مەرگ لەگەڵ ئاوەڵان جەژنە زیلەی زەیل کەم بوو بۆ دڵەلەرزە لە باران ڕام کرد کەوتمە بەر تەرزە داخی تەشوێکه‌م ناخۆم کە دەیبەن بۆ ئەوە دەگریم دەمەسۆی دەکەن توخوا بزانن تەشوێکەی قەپتان دەست کێ دەکەوێ؟ ئەڵبەت دەست نەزان هەندێ مەعاشی تەقاویتییان زۆریشە، لێیان بوو بە ماخولان هەوڵی وەزیفە ئەدەن تێر ناخۆن تا دیسانەوە دەبنە کەواکۆن زەیستان لە سەر کاسە سوێند ئەخوا کە چلەیشی چوو عوزری تر ناشوا خاکی شارەزوور پەستە و بێ هەوا بازیان پڕە لە هەرا و داوا کاسبیش چونکو دەعیەی تیا نییە هیچ مەئموورێکی پێ ڕەزا نییە هەی داد هەی بێداد، دەوڵەمەنەکان! بۆ پارەی میریی کەوتوونە مەیدان ڕێی خۆ چەسپاندن ئەدۆزنەوە جێی فەقیرەکان ئەقۆزنەوە بە "مندیل" کلکی گوێرەکە ئەگرن ڕێی شیاکەکەی لە هەژار دەبڕن ++++++++++++++++++++++ سەرناو: بوارە ڕەش و سپی دەردەخا سەبارەت: پەندەکانی پیرەمێرد، ڕۆژنامه‌ی ژیان، ژماره‌ ٤٧٤. - نووسین و ئامادەکردن: کەماڵ ڕەحمانی بوارە ڕەش و سپی دەردەخا ڕێکەوتە نادان جارجار سەردەخا شانس سپیاوێکە بە عارەق دەڕوا عەیبی ئەخلاقی ناپۆشێ کەوا ئەگەر بە عیلم و عەمەڵ پەسەند بی لەوە چاکترە کە دەوڵەمەند بی پارە چڵکێکە لە بەری دەستا بە مست قوچاندن لە دەستا وەستا پارە بۆ خێوی زینەت و فەڕە ئاخ بۆ میرات‌خۆر میقرۆبی شەڕە عیلم بۆ قەومێ ڕێگا دەنوێنێ عالمیش ناوی چاکەی دەمێنێ دۆست چاکەی دۆستی لێک ئەداتەوە دوژمن لەگەڵ دۆست ئاشت ئەکاتەوە ئەوە دۆست نییە بە هیوای پۆست بێ نەیەوێ دۆستی لەگەڵ کەس دۆست بێ بڵێن: قەڵەم زەن کەوتوتە بەر زەیل قەڵەمچی بۆچی کەوتوونە واوەیل کردمان قەڵەمچی بە تووتن دەم تاڵ "وەی من وەی منی" چییەتی بەقاڵ دیارە لە ئێمەش بوو بە کردەوە لە عیسایان دا موسا بوردەوە کەس ناڵێ قەساب گۆشتت بە چەندە جامباز بانگ ئەکا وەرە "خەر" بەندە یاخوا هەر بژی دائیرەی ئەشغاڵ بە کرێ کاری دەمکوت بوون کەم حاڵ ++++++++++++++++++++++ سەرناو: ئەڵێن: باخەڵت پڕ بێ لە پارە سەبارەت: پەندەکانی پیرەمێرد، ڕۆژنامه‌ی ژیان، ژماره‌ ٤٧٥. - نووسین و ئامادەکردن: کەماڵ ڕەحمانی ئەڵێن: باخەڵت پڕ بێ لە پارە خزم و بێگانەت لە دەورە دیارە من ئەڵێم دۆستێ کە بۆ پارە بێ ئەبێ چاوبرسی و گەدا چارەبێ ئەگینە دیارە پیاوی دەوڵەمەند پارەی خۆی بە کەس نادا بێ گۆبەند دۆست ئەو دۆستەیە بۆ کردەوەی چاک خۆشەویستت بێ بە دڵێکی پاک دۆستی چاک چاکە و بەرچاوتێرییە بۆ ئەمری ویجدان گوێڕادێرییە بارانی نیسان دانەی گەوهەرە فەیزی بۆ بەدبەخت هەر کەوای تەڕە ئیتر وا ئیشغاڵ کەوتەوە سەر کار خرید و فرۆخت کەوتە ناو بازار یاخوا ماکینەی ڕێ‌وبان نەوەستێ ڕێی گوزەرانی هەژار نەبەستێ زۆر چەتوون دەڵێن نان وا لە خاکا بە کرێکاری"چەتە" چت ناکا ئەمجارە پەکمان کەوت لەبەر باران هەفتەی ئاییندە دەچینە سەیران ++++++++++++++++++++++ سەرناو: وا دەڵێن: ئادار ناڕوا بە بێ‌دۆ سەبارەت: پەندەکانی پیرەمێرد، ڕۆژنامه‌ی ژیان، ژماره‌ ٤٧٦. - نووسین: کەماڵ ڕەحمانی وا دەڵێن: ئادار ناڕوا بە بێ‌دۆ دوای ئەو نیسانیش ناڕوا به بێ‌جۆ بارانی نیسان جۆی خستە دواوە با ڕەحمەتیش بێ تامی نەماوە پاشکەوتنی جۆ بە کەم مەژمێرە خواردنی چوارپێ و دووپێیە لێرە دووپێ بە چوارپێ ئەڵێ ڕووبەڕوو نوخشە بێ لە تۆش نوخشەمان دەرچوو باران سێ‌پەڕەی گەیاندە خایە نانی چوارپێکان وا لە ڕۆنایە چوارپێ لە دووپێی بەدخوو چاکترە بە "جۆ" هەڵ دەکا و دڵی پاکترە ستەمگەر کە مرد خاک نایگرێتە خۆ بە دڵ خوا شوکر، بە دەم ئاغا ڕۆ وا شەمەندەفەر بوو بە هی خۆمان تا وەفد زۆر بێ قازانجە بۆمان توججار هەموو چوون شێخان لە تەکدا ئەڵێن: "هەم چونین بڕۆ تا بەغدا" ناوی وەفدمان هێندە لا خۆشە هەر بڵێن: وەفدە، زۆر کەس بە جۆشە ئەگینه هەمزە لە هەباسی چی چرچە قەڵایی لە مۆریاسی چی زۆر لە بارانی نیسان ڕادەکا بە دەنگی بۆمبا خەڵک سەما دەکا! ++++++++++++++++++++++ سەرناو: ئەو پیاوە گەورەی خۆی بە کەم ئەگرێ سەبارەت: پەندەکانی پیرەمێرد، ڕۆژنامه‌ی ژیان، ژماره‌ ٤٧٧. - نووسین: کەماڵ ڕەحمانی ئەو پیاوە گەورەی خۆی بە کەم ئەگرێ لە ئەندازەی خۆی زۆرتر سەرئەخرێ ئەوی خۆی لە ژوور خەڵکی دەنواڕێ با پایەیشی بێ دەیهێننە خوارێ لەش و عەقل و دڵ، ئەم سیانە ساغ بێ ساحێبیان دەبێ هەر بە دەماغ بێ لەگەڵ خۆهەڵکێش خۆش‌باوەڕ مەبە ئاڵتوون بە محەک، پیاو بە تەجرەبە گوێی ڕاستت سووک بێ بۆ چاکە بیستن گوێی چەپت کەڕ بێ لە فیت هەڵبەستن قسەی چاک زەحمەت ئەگاتە جێی خۆی واتەی بەد زۆر کەس پۆستەچییە بۆی ئاگری دزان شەوێ دەگڕێ چەقۆی بێ‌پۆڵا دوو ڕۆژ دەبڕێ دەوران دەورانە دەبدەبەی شایی ڕەواجی نەما بێچوو و سێ شایی کوا گرمەی تەپڵی بەگزادەی جافان؟ کوا بەزم و ڕەزمی مێوڵێ و تافان؟ ئێستا کە باوی قەشە و مالوومە سوێند هەر بە سەری "ئەورام شالوومە" ++++++++++++++++++++++ سەرناو: وا گەرما داهات پاقلە پەیدا بوو سەبارەت: پەندەکانی پیرەمێرد، ڕۆژنامه‌ی ژیان، ژماره‌ ٤٧٨. - نووسین: کەماڵ ڕەحمانی وا گەرما داهات پاقلە پەیدا بوو سەودایی مەشرەب شێت و شەیدا بوو جاران ڕێ ڕاوی زەڵم لە ناو بوو ئێستا میری سوور ڕێگەی ئاوا بوو پەندی پێشینان ئەکەوتە بەر دڵ ئێستا کە زۆر کەس بووە بە چقڵ هەرچی لە خۆیا چشتێ شک بەرێ هەوڵی ئەوەیە "ژیان" بدڕێ تێگەیشتنمان ئەمجار تەواوە کەر لە کوێ و کوندە لە کوێ دڕاوە سم سمی "کەرە" چنگ چنگی ئاسێ لەم کرد و هەوڵە سەرم ئەماسێ ئەگەر تۆ پیاوی لێکی دەرەوە کردەی بەد لە خۆت، خۆت دوور خەرەوە ئەگینە دەمی خەڵک کیسە نییە ئەیبینێ و ئەیڵێ گوناهی چییە ئەو شیعرە خۆشە لای من زگ تێر کا چشتی نایابی خواردنم فێر کا کە "بامیە"ی تازە و "تەماتە" دەرچوو با بڵێن: ڕۆستەم مێ بوو یا نێر بوو ++++++++++++++++++++++ سەرناو: ئەمساڵ ئەمەندە هەور ئەگرمێنێ سەبارەت: پەندەکانی پیرەمێرد، ڕۆژنامه‌ی ژیان، ژماره‌ ٤٧٩. - نووسین: کەماڵ ڕەحمانی ئەمساڵ ئەمەندە هەور ئەگرمێنێ تریشقەی، دڵمان ڕادەچەنێنێ قینی بێدادی لە هەورامانە هەورامان لووتی لە ئاسمانە بە تەرزە و لافاو لووتی نانەوێ قەزای ئەم دیوی لەو دیوی کەوێ هەورە تریشقە با کێو بسمێ گشتی ئاسانە هەر "سان" نەجمێ با دنیا لێمان نەبێزرێتەوە خۆڵمان به‌سه‌ردا نه‌بێژرێته‌وه‌ ماران‌گەز هەموو شوێنێ دەپرسێ لە خشەی مار و مێرو دەترسێ لە تەقە و ڕەقە دڵم زۆر تەنگە خودا نەکەرۆ بوواچان جەنگە خزمەتی وڵات هەر بە عیلم ئەکرێ بە چرای خوێندن پێ دەردەکرێ بار ئارد بەرەکی بۆیە لە پاشی هەر کەسێ بە لای خۆیا داتاشی ئەویان بە ماڵی ئەویتر خڕە قاپی مەحکەمە بۆیە وا پڕە تا حەول و قووەت لەسەر ڕەجا بێ ماڵی بێ‌ماڵان نابێ ئاوا بێ هەندێ ڕەجاکار سەیری زۆر خۆشە پێی ئەڵێی نێرە، ئەڵێ بیدۆشە هێندێکیش بە هیچ تەریق نابنەوە بە دووی ڕێوی‌دا ئەچنە کونەوە ++++++++++++++++++++++ سەرناو: ڕا مەکە لە دوای کاری پڕوپووچ سەبارەت: پەندەکانی پیرەمێرد، ڕۆژنامه‌ی ژیان، ژماره‌ ٤٨١. - نووسین: کەماڵ ڕەحمانی ڕا مەکە لە دوای کاری پڕوپووچ هەڵ نەخلیسکێی لە پڕ لینگە و قووچ ئەوی بە چاکەی خۆی خۆشیان ئەوێ دەست‌گیری زۆرە ئەگەر بشکەوێ کە بە وەزیفە دڵ بڕەنجێنێ دڵی ناسرەوێ ئەگەر بیشمێنێ هیچ پایەدارێ پایەدار نییە هیچ سەرمەستێکیش بێ‌خومار نییە بیانووت پێ بگرن خۆت لادە لەوێ لە سەرخۆش گەڕێ ئەو خۆی دەکەوێ کە نەنگەویستیت بوو لەگەڵ بەدکار دوعای بۆ بکە زوو بچێتە سەر کار دوعای پیرێژن ئاخر خێرییە خۆشگوزەرانی بە زک تێرییە هەندێکیش هەیە لەگەڵ تێری خوارد دەوری برسییه‌تی ناکەوێتە یاد گەورەت کە کە کردی بڵێ من یارم "لەکت" دی بڵێ من ورمزیارم ورچ سەر پردی گرت بانگی کە خاڵە ڕەنج لە گەڵ گورگا مەدە بەتاڵە لە شێر مەترسە ئەو ناتشکێنێ چەقەڵ خراپە لێت ڕادەمێنێ ++++++++++++++++++++++ سەرناو: ئەڵێن: هار چل شەو ئەژی درۆیە سەبارەت: پەندەکانی پیرەمێرد، ڕۆژنامه‌ی ژیان، ژماره‌ ٤٨٣. - نووسین: کەماڵ ڕەحمانی ئەڵێن: هار چل شەو ئەژی درۆیە کوا لە ماڵی هار شین و ڕۆڕۆیە کوشتەی عارەقمان، وا لە پێش چاوە ئێواران هیچمان لە بیر نەماوە ئینسان لە نیسیان دروست کراوە چاوی بە پەردەی غەفڵەت پۆشراوە تا ساتمە نەکا چاو هەڵ نابڕێ ئەکەوێتە چاڵ پەل‌وپۆی ئەبڕێ بەدکار لە لە چاکە خراپەی چی دی؟ ئاواتی بەدی خۆی دێنێتە دی! ئەزانی خودا بۆچ بەد ئەژیێنێ ئەگەر بەد نەبێ بەدکار نانوێنێ تا نەمان بەنە گردەکەی سەیوان چاکە و خراپە نایێتە مەیدان قورمەی وەزیفە کە بوو بە کفن دەست و پێ لە پیاو ئەبێ بە دوژمن کە مەڕنەمووکە چاو زەق کاتەوە ئاغایی لە بیر پیاو ئەباتەوە ئەمانە ویزەی بەرگوێی بێ‌عارە کەس ناڵێ مردن هەیە لەم شارە ++++++++++++++++++++++ سەرناو: موقتەزای خولقە کێچ پیاو ئەگەزێ سەبارەت: پەندەکانی پیرەمێرد، ڕۆژنامه‌ی ژیان، ژماره‌ ٤٨٤. - نووسین: کەماڵ ڕەحمانی موقتەزای خولقە کێچ پیاو ئەگەزێ ئەو دڵە دڵه‌ کەوا نەلەرزێ ئەگەر بمێنین کای تازە دەرچوو کاتێک ئەزانی کە کێچیش گوم بوو ئەگەر بە دادی ئیزەد بڕوا کەی وا چاکە کارت حەواڵەی خوا کەی خوا ڕەگی بەدکار لەبن دەردێنێ تۆڵەی کارژۆلەی بێ‌شاخ ئەسێنێ هەندێ بە گاڵتە ئەڵێن بڕوانە هەرچی مزگەوتە هەمووی وێرانە ڕاست ئەکەن ماڵی خوا بەڕەڵڵایە زۆر لێی ناپرسێ کە "حق اللە"یه بەڵام بە دادە بۆ "حق الناس"ێ قوڕگی بەد ئەگرێ هەتا ئەتاسێ کە تۆ لەگەڵ خەڵک بە بوغز و کین بی نابێ لە مەکری خودا ئەمین بی سەرم لە کاری خودا سوڕماوە بۆچ پیاوی چاکی خستتۆتە لاوە دەوران دەورانە و ئێمە بێ‌سەبرین نابینین پێچکەی زۆر تابووت ئەگرین پێستی حوشتری سالح ئەگوروین کورتانی کەری جەجاڵ ئەدوروین بایەزید فەرمووی وشکیان و تەڕیان "کلی، غرقش کن ما هم درمیان"١ ١. واته؛ هه‌موویان نوقوم که‌، چش با ئێمه‌ش له ناویانا بین. ++++++++++++++++++++++ سەرناو: هیچ کەس نازانێ کە ئەم دنیایە سەبارەت: پەندەکانی پیرەمێرد، ڕۆژنامه‌ی ژیان، ژماره‌ ٤٨٥. - نووسین: کەماڵ ڕەحمانی هیچ کەس نازانێ کە ئەم دنیایە چەند هەمە چیزەی ڕەنگ ڕەنگی تیایە یەکێ هەر لە شوێن پارە عەوداڵە لە مسکێن بووە بە زەردەواڵە وەک هەنگ لەم و لەو هەنگوین ئەگرێ کە پێیەوەدا کەچی خۆی ئەمرێ کەم پارەدارم دیوە تێر بخوا بۆی دێتە بەرهەم لە پڕ خۆی دەڕوا پارەی میراتیش میقرۆبی شەڕە برای میرات‌خۆر دەست بە خەنجەرە وەرە بنوارە دەعوای مەحکەمە زۆری میراتە، دەعوای تر کەمە هەندێکی تریش کەوا بێ‌پارەن هیچ قەدریان نییە لەگەڵ ئاوارەن هەر بەداخەوەن دەڵێن ئاخ پارە دنیا بۆ پارە لەگەڵتا یارە دەوڵەمەند پارەی بە کەس نەداوە ئەم گشت عالەمەی ئەڕوا لە دواوە هێندێ کەوتوونە دەریای سیاسەت بە قینەبەری بوونە سیاسەت قینیان لەوەیە ئەم داهییانە١ زادەیش نین سەریان لە ئاسمانە کردەوەت باش بێ چاکی و بەڕێ‌وجێی کە خوا دای هیچ کەس ناڵێ کوڕی کێی هەندێ خوا بۆ شەڕ هێناونیە دنیا وەزەندی خەڵکیان ئەوێ بە تەنیا کەڕە جەلاد بوو دەیوت دەقچێنم بە لینگەفرتێ نەشئەی خۆم دێنم ١. داهی: ئارێشەن، به‌‏بیر، بەچنگ، بەزەین، بیرتیژ، بیرەوەر، بەهۆش، تیژهۆش، زرک، زرنگ، زرینگ، ‏ زەینڕ‏وون، زیت، زیتەڵ، زیخ، زیرەک، لەزیز، مەزبووت، مەژودار، وریا، وشیار، ویرا، هۆشمەند، هۆشیار، وشیار، هیردار. [فه‌رهه‌نگی کاوه]‌ ++++++++++++++++++++++ سەرناو: دیسان خومخانەی یەهوودی شێوا سەبارەت: پەندەکانی پیرەمێرد، ڕۆژنامه‌ی ژیان، ژماره‌ ٤٨٦. - نووسین: کەماڵ ڕەحمانی دیسان خومخانەی یەهوودی شێوا درۆی باڵداری لێکەوتە هەوا دەوەن با ئاشە و دووبەرەکییە پیر، لێی تەریکە تیا دەرەکییە یەکێ بە گورزی لەندەهوور ئەخوڕێ نان و دۆی تیرەی شێرزادی دەبڕێ ئەویتر دەڵێ: لەندەهوور کێیە شێرزادی نامەی فەتحیان پێیە شەڕی عەنتەر و ڕۆستەمی دەستان لە ناو ئێمەدا بوو به‌ داستان یەکێکیش دەڵێ لای خودا و بەندە سوورەتی "یاسین" گەلێ پەسەندە خۆ ئەگەر "یاسین "طە"ی لە دوا بێ کە خوێندت ئەبێ کارت ڕەوا بێ کابرای خۆمان سەر مەلامانە بەو حەل ئەکرێ ئەم ڕازی نیهانە ئەڵێ: بە هیوا کەس لێت ناپرسێ دەنگی تۆپ نەبێ هیچ کەس ناترسێ حاجی "ئەمین"یش ماچۆ بواچە نوێژی جەعفەری و تشریبی پاچە منیش ئیمانم بەوە مەتینە عالمی بەکار دائیم ئەمینە وتیان: مەلا هات، وتی: بە تۆ چی وتیان: تێپەڕی! وتی: بە من چی پارەی دەوڵەمەند لە قاسە دەنوێ فەقیر لێی ئەدوێ تا چەنەی ئەسوێ وا دەزانن ئەو یا ئەم بێتە ناو ئیتر بۆ ئێمە تێر پڕە لە چاو ++++++++++++++++++++++ سەرناو: عادەتی دونیا بە سات ئەگۆڕێ سەبارەت: پەندەکانی پیرەمێرد، ڕۆژنامه‌ی ژیان، ژماره‌ ٤٨٨. - نووسین: کەماڵ ڕەحمانی عادەتی دونیا بەسات ئەگۆڕێ زۆر دەوڵەت هەیە لەپڕ ئەدۆڕێ هاونشینی بەد زوو تەئسیر ئەکا زۆر دۆستی گیانی لێ دڵگیر ئەکا چەن قەزای دیزە کەوتووە لە گۆزە ڕەش هەر ڕەشە لای ئەهلی ئەم کۆزە کە قەلەڕەشمان ڕێ‌پیشاندەر بێ ئەبێ گەورەمان هەر دەربەدەر بێ١ ئەمە دووجارە ئەکەوینە چاڵ زەرەر دەبینین بە ماڵ و بە حاڵ هێشتا پیاوی چاک لێک ناکەینەوە گرەو لە پیاوی بەد نابەینەوە تا ئیمڕۆ پیاوی خۆمان ناناسین بە گوریسی بەد ئەبێ بتاسین هەندێکمان هەیە دوڕ دەقەڵێشن کەچی بە تەفرەی بەد دڵ‌بەئێشن هەی لە ڕێی خوادا کە دێینە قسە ئەرەستۆ لامان هیچە و ناکەسە کەچی بە "بلۆف" ئەمان ترسێنن لەغاومان دەکەن، دەمانڕەتێنن نازانین چاک و خراپمان کێیە بۆ گردی سەیوان ئەچێ ئەم ڕێیە ١. ساڵح زه‌کی به‌گ موته‌سه‌ڕیفی سلێمانی بووه و گوێزراوه‌ته‌وه‌ بۆ پارێزگای دیالی. پیره‌مێرد ئه‌م په‌نده‌ی به‌و بۆنه‌وه‌ نووسیوه‌. ++++++++++++++++++++++ سەرناو: ئەووەڵ پەردە بوو لە سینەمای چەرخ سەبارەت: پەندەکانی پیرەمێرد، ڕۆژنامه‌ی ژیان، ژماره‌ ٤٨٩. - نووسین: کەماڵ ڕەحمانی ئەووەڵ پەردە بوو لە سینەمای چەرخ بزانین چۆنە! ئینجا بازی بەرخ کەس بە بازی چەرخ پشتی نەبەستێ هەرچی کەچڕەو بێ ئاخری دەوەستێ ڕێی ڕاست ئەمینە ئەگەر پیا بڕۆی لە لای هەموو کەس بێگانە نیت، خۆی دوو بەرد پێکادەن یەکێ شکابێ ئەوی تریشیان بێ‌زەدە نابێ ئەوی لە دوژمن تۆڵە دەستێنێ ئەو ئینتیقامەیش بۆ ئەو نامێنێ ئەوانەی دوێنێ کە لە ڕوو دۆست بوون وا ئەمڕۆ دەرکەوت بە تەمای پۆست بوون کە دۆستت ڕۆیی و تۆ بێ‌وەفا بووی دیارە لە ڕێزەی پیاوەتی دەرچووی هەندێ وەفایان بۆ دوایان نییە ئێوە هیواتان بە وانە چییە؟ ! چەند خۆشە پیاوێ ناوچاوان دەرخا بە پیاوەتی خۆی قسەی خۆی سەرخا چەن خۆشە دۆستت ناوچاوان پاک بێ لە بەرەوڕوویی درۆ بێ‌باک بێ ڕوو لە پاکییە بەخێر ئەم ناوە گامان گرووە کلکەکەی ماوە ++++++++++++++++++++++ سەرناو: دەمێکە قەترەی حەیا تکاوە سەبارەت: پەندەکانی پیرەمێرد، ڕۆژنامه‌ی ژیان، ژماره‌ ٤٩٠. - نووسین: کەماڵ ڕەحمانی دەمێکە قەترەی حەیا تکاوە بۆیە وا زوبان تەڕ و پاراوە وای ئەفەندم و کۆمەڵی یاران! ئەڵێی نە بایان دیوە نە باران زۆر پیاو وەک درەخت موتربە دەکرێ هەرمێیە و جارجار ترۆزی دەگرێ لەم هاوینەدا کۆلارە زۆرە بۆیە لەگەڵ ژن هەر ئاڵ‌وگۆڕە ڕاست ئەکەن ئێرە ڕەشەبای زۆرە لەگەڵ فیشاڵ‌دا کەوتۆتە نۆرە تازە وەستاحمەد شەو ڕوودۆز ئەکا بەر دوکانەکەی تەپ و تۆز ئەکا حوکمی ڕاپۆری ڕەشۆل نەماوە قەتار و قۆڕیان شان بە شان باوە جارێ با بزانین ساڵ بەری دوورە من لە مانه‌م چی شای من ئەنگوورە مەجلیسی دەوری حەوزەکەی خۆمان ترێ و کاڵەک و شووتێ و سێوی جوان ئەمانەن شاهـ و وەزیر و موشیر خۆش‌گوزەرانی پێویستە بۆ پیر ++++++++++++++++++++++ سەرناو: فیرعەون کەوتە نیل وتی لە ترسا سەبارەت: پەندەکانی پیرەمێرد، ڕۆژنامه‌ی ژیان، ژماره‌ ٤٩١. - نووسین: کەماڵ ڕەحمانی فیرعەون کەوتە نیل وتی لە ترسا ئیمانم هێنا بە ڕەببی موسا "ئەبووتالیب"یش بە تەعنەی ژنان بە پێغەمبەری نەهێنا ئیمان ئەویان بۆ ژیان، ئەم عیززەتی نەفس بێ‌عیززەتی نەفس کەس نابێ بە کەس وەک کابرای کوردە شیریان نایە سەر "نووحی" گوت بەڵام نەیگوت پێغەمبەر لای هەندێ ماددەی نامووس بەتاڵە لە موودارادا وەک په‌شتە‌ماڵە لە قۆمیدیادا ئافتوری ماهیر هیچ فاڵسۆیێکی١ لێ نابێ زاهیر هەندێکیش فوو بای زوو دەردەکەوێ مایەپووچییان هەر بەر دەکەوێ نیسکی مۆریاس و هەرزنی ڕەنگاڵ بێ‌بەر و پشتن بۆ کەس نابنە ماڵ ئەوانە ڕاستیان چۆن دێتە سەر لێو دەم بە پێکەنین، دڵیان پڕ جنێو لەگەڵ یەک زاهیر دۆستی دەنوێنن خەرێکن ملی یەکتر بشکێنن هاکا لە ڕووی کار پەردە هەڵگیرا تەناف‌باز قۆڵی لە قەڵبە گیرا وەزیفەی گەورە زۆر پیاو گێژ ئەکا پیری شاعیریش فرە‌بێژ دەکا ١. فاڵسۆ: به زێڕ یان گه‌وهه‌ری ساخته ده‌وترێ. ++++++++++++++++++++++ سەرناو: کە خوا سروشتی ئێمەی خستە ڕوو سەبارەت: پەندەکانی پیرەمێرد، ڕۆژنامه‌ی ژیان، ژماره‌ ٤٩٢. - نووسین: کەماڵ ڕەحمانی کە خوا سروشتی ئێمەی خستە ڕوو "وخلقناکم اطوارا "ی فەرموو هەندێکمان هەیە کە گۆشت نەخۆرە گۆشتی بۆ ئەبێ بە زگەشۆرە هەندێکیش بۆنی پیازی کرد هەڵدێ هەندێ بە کشمیش دڵی تێک هەڵدێ هەندێ لەلایان کە قەزوان ئەخۆن هێند تووڕە ئەبن ئەڵێی خوێن ئەخۆن هەندێ بە جیڕەی دان بێ‌هۆش ئەبن هەندێ بە بۆنی خۆش نەخۆش ئەبن هەندێ کە هەنگوین ئەخۆن قەبز ئەبن هەندێ بە قۆخێک تووشی لەرز ئەبن هەندێ لغاوی شەیتان کراوە هیچی لە ماڵی خۆی پێ‌نەبڕاوە هەندێکیش ئەیخوا و ئەیبەشێتەوە دوو چەندانیشی زوو بۆ دێتەوە چاو نابڕێتە مەسنەد و پارە بۆ ئیشی فەقیر وەک خزمە‌تکارە هەندێ وەک دووپشک چزوی پڕژاوە تەبعەن مێمڵی کەوتە و هەژارە ئەبینێ بەدکار کە چی بە سەر دێ عیبرەت ناگرێ و نایێتە سەر ڕێ جوولەکە شەمووی هاتبوو بەسەردا مسڵمان ئاگری لە ڕیشی بەردا گاور جگەرەی پێ دادەگیرساند شیعەش بە کیردە کولە دەیترساند ڕەسم و ئایینی زەمانە وایە لە ڕۆژی ڕەشدا کێ بەوەفایە؟ ئیکرامی فەقیر بە نان و دۆیە لە هەموو شوێنێ کەوا بخۆیە١ ١. که‌وا بخۆ: چیرۆکێکی فۆلکلۆری له‌سه‌ره‌. مه‌به‌ست له‌وه‌یه؛ خه‌ڵکی سه‌یری ڕواڵه‌ت ده‌که‌ن. ++++++++++++++++++++++ سەرناو: هاوینە هەورە و گرمەی ڕەشەبا سەبارەت: پەندەکانی پیرەمێرد، ڕۆژنامه‌ی ژیان، ژماره‌ ٤٩٣. - نووسین: کەماڵ ڕەحمانی هاوینە هەورە و گرمەی ڕەشەبا ئاخۆ مەرەزەی کێ شەرا ئەیبا تووی سەر و دانە سەوز و پاراوە بێ‌ئاوی کنگ ئاو بۆ بێکەس ماوە هەرچی بە ئەرخە تەعین کراوە لە ترسا دڵی وەک "بی" ناو ئاوە موژدەیان بەنێ هیچیان بۆ نابێ بژاریان دەبێ وەک پووش لە "کا" بێ کاربەدەست ئەگەر بێ‌کارە دەرکا ئەبێ لەگەڵ خەڵک خۆی تووشی شەڕ کا ئەگەر هەر وایش بێ و ئوممی کاتب بێ ئیشی دەوائیر ئەبێ ڕاسیب بێ ڕاست بۆ دەفتەردار ئەمەی ڕوو داوە وای لە قوونێیە و وای لە دۆشاوە لە ناو "سنە"دا ئەم پەندە باوە یێژن ملیچک وا بە هەواوە ئەفڕێ و ئەخنێ و یێژێ بە هوو هوو ئەوەی کە کریا وەک بەفری پار چوو ژنی فرە مێرد بەر ناباتە بەر بریسی یا پەر ئوبیری بۆزەر تا ئێش بۆ خزمان بدۆزینەوە ئەبێ لە هەوار بگوێزینەوە خۆ ئەگەر بۆ ئیش و پیاو بگەڕێن بۆ کار ڕەوایی ئینجا لە سەر ڕێن ++++++++++++++++++++++ سەرناو: باران کە ناوی ڕەحمەتی خوایە سەبارەت: پەندەکانی پیرەمێرد، ڕۆژنامه‌ی ژیان، ژماره‌ ٤٩٤. - نووسین: کەماڵ ڕەحمانی باران کە ناوی ڕەحمەتی خوایە بۆ کشت‌وکاڵمان ئەوە سەرمایە زۆرجار هێلانەی بەدبەخت تێک ئەدا لە شۆرەکاردا دڕک لێک ئەدا خوا تەجەللی خۆی بەم کوردە نواند 'لیلە القدر'ی بە... یا دۆڕاند١ حەوتەوانەمان بۆ دێتە بەرماڵ ئێمە ئەیدەینە بەر گورزی بەرماڵ خەڵکی بۆ یارمەت پشت ئەدەنە یەک ئێمە بۆ تۆران پشت ئەکەینە یەک نیشان بەو نیشان ئەمجارەی دەربەند لای دۆست و دوژمن پشتمان لە یەک سەند کەس دەربەندەی کەس نییە بۆ مردن ئەو دەربەندەیە زاماری کردن بەخیل سێ نەوعە لەم دنیایەدا یەکێ نایەوێ خۆی٢ بە کەس بدا دووەم نایەوێ چاکەی کەس بۆ کەس سێیەم دەربارەی خۆیشی فریاد‌ڕەس ئێمە لە دەستەی سێیەم بەخیلین لەچاو شاران دا بۆیە زەلیلین ئەڵێن: بۆ ڕێ و بان ئەمەندە پارە ئیسرافە دڵمان پێی بریندارە هەرچی ئەیکوتم ئاسنی ساردە سا توخوا مەلا ئەمیشە ئاردە ١. ئه‌م بۆشاییه‌ له ده‌ستنووسه‌که‌ و له‌ ڕۆژنامه‌که‌دا، هه‌روا چه‌ند نوخته‌یه‌کی بۆ دانراوه‌. ٢. دەبێ 'خوێ' بێ، نەک 'خۆی'. ++++++++++++++++++++++ سەرناو: گەنەی پەیدا بوو ئەم بێر و کۆزە سەبارەت: پەندەکانی پیرەمێرد، ڕۆژنامه‌ی ژیان، ژماره‌ ٤٩٥. - نووسین: کەماڵ ڕەحمانی گەنەی پەیدا بوو ئەم بێر١ و کۆزە قەزای دیزەیە وا کەوت لە گۆزە گوێرەکەیەکی لەڕ کەوتە پەموو گاگەل بە زیان ناوبران هەموو لافاو دار و بەرد تێک ئەڕووخێنێ قەزا لە قەزا تۆڵە دەسێنێ من ماسیم نەهێشت لە ئاوی زەڵما کەچی لەشی تەڕ بۆ خەڵکی تر ما من شەکر و ڕۆنم ئەکرد بە حەڵوا کەچی بۆ خەڵکی ئەبوو بە لوا پێنج و دوو ڕۆژە خەوی ڕاگوزەر هەر کەسە دەورەی خۆی دەباتەسەر ئەی دنیای فانی، کاروان سەرا ڕەنگ نێمێ بە دڵ شاد نیمێ بە دڵ تەنگ لایێ چل فەردەی شەکراو بەش ئەکا لایێ تۆپەڵێ قوڕەڕەش ئەکا خوا هەر ئەو خوایە قەلەندەرخانە ئێستا چۆن بووە وەک "چروستانە" کاڵەکم هەموو لە ژووردا تەپی خۆم بۆ سەرچۆپی چوومە ناو قۆپی خوا یار بێ هەموو دێنەوە کایە سەبری پێ‌دەوێ ئەمە دنیایە ١. بێر: مه‌به‌ست له بێره‌کردنی مه‌ڕ و بزنه‌. ++++++++++++++++++++++ سەرناو: پەپووی سڵێمان مزگێنی هانی سەبارەت: پەندەکانی پیرەمێرد، ڕۆژنامه‌ی ژیان، ژماره‌ ٤٩٦. - نووسین: کەماڵ ڕەحمانی پەپووی سڵێمان مزگێنی هانی١ کە وا ئاسەف دێ بۆ سلێمانی لە هەموو لاوە خەڵک کۆ بوونەوە بۆ مەراسیمی بەپیرچوونەوە دار لە باز جارێ کامی دێتەدی خوا ڕەوای بینێ شابازیشمان دی ئەم جارە قەدری ئەم شارەم زانی هێندە میوانی عەزیزی هانی ئەم میوانانە دیارییان دیار بێ ئەشێ ئەم شارە تالعی یار بێ بەڵام کە خۆمان داری بێ‌بەر بین کەوا کۆلەکەی تاقی زەفەر بین ئەڵێن دەشتی ڕەی جێی حەوت لەشکر بوو تەختی سلێمان بە شەڕەفتر بوو ئەوێ جێی شەڕ بوو ئێرە جێی دەعوەت ئەوێ جێی زەحمەت، ئێرە جێی ڕەحمەت سا چی بکەم بەختی من شۆرەزارە بارانیشی بێ ‌هەر خەس و خارە وەزیری بەغدا یارەی پەسەند کرد هات کانی دڕکەی سکانی هەڵگرد ئێمەیش هەر کەسێ بەخت ڕێکەوێ بۆی ئەبێتە دزی گا و گوێرەکەی خۆی هیچ کەسێ نەفعی عوموومی ناوێ بۆیە دەخنکێین بۆ کاسە ئاوێ هەرچیش دەبینی دەڵێ: زەعیمم لەم ناوە ناوە هەر من هەتیمم ١. پیره‌مێرد ئه‌م په‌نده‌ی به‌بۆنه‌ی هاتنی "یاسین الهاشمی"، سه‌رۆک وه‌زیرانی عیراق، بۆ سلێمانی، بڵاو کردۆته‌وه‌. ++++++++++++++++++++++ سەرناو: ئەو سەرکردەیەی بە ڕاست ئینسانە سەبارەت: پەندەکانی پیرەمێرد، ڕۆژنامه‌ی ژیان، ژماره‌ ٤٩٧. - نووسین: کەماڵ ڕەحمانی ئەو سەرکردەیەی بە ڕاست ئینسانە بەند و زنجیر لای ڕوتبە و نیشانە بەڵام نەک قەومی توش کا و خۆی ڕاکا وابێ ئیتر کەس بڕاوی پێ ناکا!! ئاخ ئەمە ڕەنجی داوین بە بادا لەشکری نادان پشتمان بەرنادا تا عا‌قڵ کاری لێک ئەداتەوە جەسوور گرەوی خۆی ئەباتەوە تەماع وەک ئاوی شۆری دەریایە هەر ئەیخۆیتەوە و تەسەللات نایە ئەوەی قانیعە بە وشک و بە تەڕ ناوی نراوە شاهی بەحر و بەڕ هەرچی ڕاست ئەڕوا لە تەوەککول دا خەم و خەفەتی نابێ لە دڵدا خوا ڕێ لە بەندەی بەدکار بگۆڕێ نایێتە سەر ڕێ تا لێوی گۆڕێ هیوامان وایە دەستەی خوێندەوار بۆمان پێ‌بگەن بکەونە ڕووی کار باوجود ئەگەر مەکتەبمان وابێ خەرمانی هیوا ئەبێ هەر کا بێ ++++++++++++++++++++++ سەرناو: زستان شەوارە بوو بە چرای نەوت سەبارەت: پەندەکانی پیرەمێرد، ڕۆژنامه‌ی ژیان، ژماره‌ ٤٩٨. - نووسین: کەماڵ ڕەحمانی زستان شەوارە بوو بە چرای نەوت زۆر کەس بە هاوین بە شەوارە کەوت بە چرای گەرچەک یەکتر نابینین بۆیە وەک چرای گەرچەک بێ‌تینین شەوقی کەهرەبا هاتە کایەوە جۆم بۆ لە کادا نەشارایەوە یەکێ لە "کفری" لە ڕێ "کفر"ی کرد خه‌ڵق به‌ خێره‌ومه‌ند ناویان ئه‌برد یه‌کێ خێر ئەکا بۆ ڕێی خانەقا کەچی بێ‌ئینساف کافری دەکا شێخی بایەزید ناحەقی نەبوو فەرمووی وشک و تەڕ با بسووتێ هەموو قەزا و ناحیە و مەکتەبەکەمان هەموو شاغیرن ناکرێتە خەرمان دونیام لە بامیە و بریانی پڕ کرد هێشتا "بسم اللە" بسمیللای نەکرد هەرچی باینجان خۆر بێ لە ژوورە "بسم اللە" وەرە تۆیش لێی ببوورە تاکەی ئەم چەرخە وا چەپ دەگەڕێ تاکەی کەرەدێز بە جۆ دەزەڕێ ++++++++++++++++++++++ سەرناو: ئەگەر دێکانی خاوەن بەخت نەبێ سەبارەت: پەندەکانی پیرەمێرد، ڕۆژنامه‌ی ژیان، ژماره‌ ٤٩٩. - نووسین: کەماڵ ڕەحمانی ئەگەر دێکانی خاوەن بەخت نەبێ شاخی ئەزمڕی وا بۆ تەخت ئەبێ کە عەداڵەت بوو "قەویان" زەعیفە زۆر کەم بوو باوی جینسی لەتیفە هێشتا تێ‌ناگەین لە چاکی ژنان! زەعیم خۆی خستە کراسی ئەوان بە هاوار وتم ئاخ، هەور! ئامان مەیکەرە تاڤگەی زەڵمی هەورامان تەختی هەورامان بەختی هەڵپێکا کۆی ئاتەشگایان بوو بە ئاتەشگا گەردەشی دەوران ئەم دیوه‌ و دیوە ئەم خاکە زۆر جار ئەم حاڵەی دیوە من ئەمکوت "زەڵم" ماسی لێ بڕا کەچی هێند زۆر بوو گونیەکەی دڕا ئۆتۆمۆ‌بێل چوو، بۆ قەڵادزە دەچمە سندۆڵان بۆ ڕاوە بزە مه‌نسووری هەللاج بە چەکە و کەوان ئۆتۆمۆ‌بێلی بردە سەر کێوان پێشینان دەڵێن خوا، هەر ئەو خوایە ئێستاکە بزن وا سواری گایە! بەرازکوژ دووسەد فلس وەرئەگرێ بۆ بەرازی شار بۆچ نرخ نابڕێ لۆقەنتەچیمان خڕە لامبۆزە١ بێ "بسم اللە"یە، چێشتی پڕ تۆزە ١. خڕه لامبۆز: کابرایه‌کی ئه‌رمه‌نی لۆقه‌نته‌چی (چێشتکه‌ر) بووه‌ له سلێمانی. ‌ ++++++++++++++++++++++ سەرناو: بە ئێستریان گوت باوکی تۆ کێیە سەبارەت: پەندەکانی پیرەمێرد، ڕۆژنامه‌ی ژیان، ژماره‌ ٥٠٠. بە ئێستریان گوت باوکی تۆ کێیە وتی ڕەسەنی دایکمم پێیە چوونکە دووڕەگە و تۆوی حەرامە هێشتا جاشکی خۆی نەدی، ناکامە تانجی لە ڕاودا هونەر دەنوێنێ نەتەوەی سەگە و گورگ ئەخنکێنێ عابید مشکی کرد بە کچی سەرپشک ئاخری نەوەستا بوەوە بە مشک ئەڵێن: گیا لە سەر بنجی خۆی ئەڕۆێ بەڵام بێستانیش بژاری ئەوێ بێستانەکەمان پڕ لە بژارە بۆیە ماڵیات مافەتەدارە بەرازی ناوشار شەرحێ نەبوو بۆی هەرچی دەبینێ ئەیباتە سەر خۆی کڕکڕەی ڕادیۆ بواری نایە بەش بەحاڵی خۆم بلوێر بۆ گایە ڕەحمەت لەو کەسەی ئەسپێ ئەکوژێ لەباخەڵتایە و خۆێنت ئەمژێ دەربارەی ناکەس پیاوەتی مەکە بیبەیتە کەعبە دیسان "لەک" لەکە هەندێکیش دەڵێن کە ئێمە نەبین ئەهلی مەملەکەت ئەکەونە شین نازانن خۆیان شەینییش و شینن تەنها قازانجی خۆیان ئەبینن ئەگەر خوا دەکا خوێندن دێتە کار ئەوسا تەجرەبە دەگاتە بوار ++++++++++++++++++++++ سەرناو: پاییز ڕوو زەردی خەزانی هێنا سەبارەت: پەندەکانی پیرەمێرد، ڕۆژنامه‌ی ژیان، ژماره‌ ٥٠١. - نووسین: کەماڵ ڕەحمانی پاییز ڕوو زەردی خەزانی هێنا ڕەعدیش١ قامچی خۆی لە هەور داهێنا دەمێکە بەرگی هەتیو دڕاوە ژوور لە بێ‌دەستان لای چەرخیش باوە ئاسمان ساڵی چوار جار ئەگۆڕێ بەختی کورد هەموو ڕۆژێ دەتۆرێ خوا کێو ئەبینێ بەفری تێدەکا بەنده‌یش ماستاوی ساردی لێ دەکا سورشتی ئەزەل وەک 'باز'و 'کەو'ە لە جێیەک ڕۆژە و لە جێیەک شەوە دوێنێ خه‌تیب مرد ئەمڕۆ شاییە بۆیە دەڵێن عەبد لە خۆی باییە ئەگەر قابینە٢ جارجار نەگۆڕێ سەودای وەزیری دەچێتە گۆڕێ سەری بێ‌سەودا تۆپی فتبۆڵە ماڵی بێ‌ئاهەنگ کەلاوه‌ی چۆڵە بزن بر رندان هەرچی بادا باد! بە بادە غەمی دڵ بدە بە باد٣ سیاسەتی ڕاست مەڕۆ مەڕۆیە ترسنۆک بەشی هەر باوکەڕۆیە شێر چۆن لە دەنگی دەهۆڵ ئەترسێ؟ کە ژنی خۆی بێ کەس لێی ئەپرسێ؟ کەری خۆمانیان کرد بە ڕمووزن بوو بە قاڵەی دەم گاڵەی درۆزن شەریف پەڵاس بۆ تەوقات٤ لێیان٥ وەختە دەست بکەین بە تۆقات لێدان ١. ڕه‌عد: گرمه‌ی هه‌ور. ٢. قابینه‌: ده‌سته‌ی وه‌زیران. ٣. شراب و عیش نهان چیست کار بی‌بنیاد زدیم بر صف رندان و هرچه بادا باد «حافظ شیرازی» ٤. تۆقات، ته‌وقات: شه‌په‌لاغه‌، زللـه‌ی پاشمڵێ. ٥. ده‌بێ ئاوا بێ؛ شەریف پەڵاس بۆته‌ وه‌قات لێیان وَقاء: پارێزه‌ر. ++++++++++++++++++++++ سەرناو: کەوتووینە دەورێ هەرچی بۆی بلوێ سەبارەت: پەندەکانی پیرەمێرد، ڕۆژنامه‌ی ژیان، ژماره‌ ٥٠٤. کەوتووینە دەورێ هەرچی بۆی بلوێ دەستی چەوری خۆی بە خەڵکا ئەسوێ وتی: فڵانی وابووم بە کەباب! خوشکتیان دیوە چۆتە جێی خراپ وتی: برادەر ئەمە بوختانە وتی: منداڵی ئێمە دیویانە مەلا وه‌عزی دا کە ڕوەو کابە میز کردن کفرە هێجگار خرابە کەچی خۆی ڕوەو قیبلە بە پێوە میزی کرد چاویان لێ‌بوو لە دێوە! وتیان وەعزی خۆت لە بیر نەماوە وتی: من سەریم بۆ وەرگێڕاوە عاشووراغا بوو لەگەڵ ئاسێ‌خان کە لەسەر تەختە هەڵیان ئەپەڕان ئێستا ئەوانە بوون بە ڕۆح لەبەر بەو هەڵپەڕکێیە کار ئەبەنە سەر ڕۆحێکی گران لە کەسدا نییە ڕۆح سووکیان ئەوێ ڕۆح قورس بۆ چییە؟ وا خەفەتیان دی ئیتر هێجگاریی زەمین نایمێنێ سوڵتەی بێداریی ئەگەر نەمردین هەتا بەهار دێ بۆ دەستەی ئێمە کورتان لە شار دێ بەو کورتانەوە ئەچنە بەغدا هەروا دێنەوە هەوسار بەرەڵدا ++++++++++++++++++++++ سەرناو: پەڵە، وەک پەڵ دای لە سەر و گوێلاک سەبارەت: پەندەکانی پیرەمێرد، ڕۆژنامه‌ی ژیان، ژماره‌ ٥٠٤. پەڵە١، وەک پەڵ دای لە سەر و گوێلاک دار و خەڵووزمان لێ‌بوو بە تریاک باران ڕەحمەتە و خەڵک لێی ڕادەکا خۆ ڕۆژەوانیش بەرد بە با دەکا مەزلووم جوێن ئەدا و گونای بارامە ڕەمەزان بەجەنگ، سەفەر بەدنامە! بە نەوتی قیرتاو سەوز ئەبێ شاوری٢ خەتای بارانە کە زۆر دەباری خەڵک لە ماڵی خۆی ڕۆژوو ناگرێ سۆفی گوناحی حکومەت ئەگرێ بێ‌نەواییە شەڕی گوێ کوانوو بادار نانی خۆی کردە بیانوو چەتە، کە کز بوو نوێژکەره‌ و چاکە گورگ کەڵبەی نەشکێ چاوەڕێی لاکە ڕەمزان سێ تەونی لێ گرتووینە دار حەوت ترنگیلی و خومار و قومار ئەڵێن فڵان بەگ خۆی بەڕۆژووە دوای خۆی بڕوانێ کە کێی لە دووە بە تەنها گوڵی بەهارمان نایە هەر مێزێ بگری کولێرەی تیایە ١. په‌ڵه‌: بارانی په‌ڵه‌. ٢. توتنی شاور. ++++++++++++++++++++++ سەرناو: تۆ تەنها نانت لە منان بوێ سەبارەت: پەندەکانی پیرەمێرد، ڕۆژنامه‌ی ژیان، ژماره‌ ٥٠٥. - نووسین: کەماڵ ڕەحمانی تۆ تەنها نانت لە"منان" بوێ١ لە "دوون"ان، دوو نان سننانی ئەوێ بەخشین عیززەتە و داوا، داوی عار دواییش داواکەی ببێ بە بیمار هەر عیلمە داوای بکەی عەیب نییە چاو بەرەوژێری لەززەتی چییە! کە چاو ببڕێتە دەستندەی خەڵکی ئەکەویە ژێربار دیارە بێ‌کەڵکی ئەوی دوژمنە و بە زمان دۆستە "الخناس"ێکە ئادەمی پۆستە نزیک نادانی مەغرور مەکەوە هەرکەسێ پیاو بێ ئەو قینی لەوە! تا بە چاوی خۆت چشتێ نەبینی ڕاستی مەزانە، "علم الیقینی" چونکە دەور دەوری درۆ و بوختانە ڕاستی گرانە، درۆ هەرزانە! ئەوی لە خەڵکا بە عەیبی ئەگری کە لە خۆتا دیت شاد مەبە، بگری لە قسەی خەڵکا زوو هەڵمەدەرێ ڕەوایە ئەگەر بتکەنە دەرێ هەڵکردت بێتە سەر نانێکی جۆ زینهار لە ماڵی ڕژد، نانی مەخۆ هەزار دۆستت بێ هێشتاکو کەمە تەنها دوژمنێ زۆر زۆر ستەمە هەرچەند کە سەفەر سەنگی محەکە ئەوی نایناسی هاوڕێیی مەکە کەمت لە زۆری خەڵکی چاکترە گۆشتی چۆلەکە لە داڵ پاکترە لە دڵی خۆیشتا، خۆت هەڵمەکێشە لە خودپەسندی دۆستت دڵ‌ڕێشە نادان سەدجاری هەلیگیڕیتەوە دیسان هەر لەفزی خۆی ئەگرێتەوە مێشەسەگانە کە سەگ مەگەسە وەریشی گێڕی هەروا ناکەسە بۆ "فرۆ"ش بزنی خەڵکی مەدۆشە شیری تۆ بەرن چەن لات ناخۆشە هەرچی چاکەی کرد، چاکەی دێتەڕێ درەخت بنێژی دیارە بەر دەگرێ ١. واته؛ تۆ نانت له یه‌زدان بوێ نه‌ک له‌ پیاوی "دوون" ده‌نا لێت ده‌بێ به سندان. ++++++++++++++++++++++ سەرناو: ئەگەر تۆ باوکی خۆتت خۆش ئەوێ سەبارەت: پەندەکانی پیرەمێرد، ڕۆژنامه‌ی ژیان، ژماره‌ ٥٠٦. - نووسین: کەماڵ ڕەحمانی ئەگەر تۆ باوکی خۆتت خۆش ئەوێ جوێن مەدە، نەوەک جوێنی بەرکەوێ کە ئێشی دەرزیت بێتەوە بەرچاو سووژن بە خەڵکا ناکەی ناحساو مردوو کە شەیتان یەخەی بەرداوە هەرچی جنێوی پێدا بەدناوە! نوێژ بە قەزا بوو دەگێڕرێتەوە سوحبەتی یاران، چوو، دەبڕێتەوە ئەوەی حەقناسە و بە حەق ڕازییە چ ئیحتیاجی بە شا و قازییە زرێی زانینت کە کردە بەرت تاجی ئەدەبیش بنێرە سەرت دڵ ئاوێنە بێ ‌ڕووناک ئەنوێنێ ئاگاداری بە، ژەنگ هەڵنەهێنێ لە ئاهـ و نزای مەزڵووم بترسە ئاهی چەند ماڵی ڕووخاند، بپرسە لەوە بترسە لە خوا ناترسێ!! دەم مەنێرە دەم ئەبلە و ناکەسێ بزانە گەوهەر چۆن بە بەرد ئەشکێ مەرەکەبی ڕەش پێتا ئەلکێ هەرچی بە ئاغا و بە پاشام فێرە ئەوەندە خۆشە هەتاکوو ئێرە ++++++++++++++++++++++ سەرناو: دە پەندە و یەکی دە دینار دێنێ سەبارەت: پەندەکانی پیرەمێرد، ڕۆژنامه‌ی ژیان، ژماره‌ ٥٠٦. - نووسین: کەماڵ ڕەحمانی دە پەندە و یەکی دە دینار دێنێ دیاری "ژیان"ە خەڵکی بیخوێنێ لەگەڵ خودادا سەرڕاست بی چاکە هیچ لەو گوم نابێ خراپە و چاکە لەگەڵ خەڵکی دا ئینساف بنوێنە هەتا دەتوانی نەفست بشکێنە بۆ هەژار دڵسۆز، بۆ گەورە حورمەت بۆ لە خۆت خوارتر لوتف و شەفەقەت بۆ دۆست ڕابەر بە، بۆ دوژمن بە حیلم بە تەوازوع بە لەگەڵ ئەهلی عیلم لەگەڵ جاهیل دا بێ‌دەنگ و خامۆش ئەم دە پەندەی من نەکەی فەرامۆش کلیلی گەنجی پەند دیانەتە دین نەبێ پەندت لەلا زەحمەتە ++++++++++++++++++++++ سەرناو: شوهرەت ئافەتە و شوهرەت فەڕەنگیی سەبارەت: پەندەکانی پیرەمێرد، ڕۆژنامه‌ی ژیان، ژماره‌ ٥٠٧. - نووسین: کەماڵ ڕەحمانی شوهرەت ئافەتە و شوهرەت فەڕەنگیی زۆربڵێ نەگبەت، عیززەت بێ‌دەنگیی تێهەڵچوو دائیم سەر لە بەڵایە گۆشەگیر هەرگیز کێشەی بەرنایە شەرخۆش بە، بەڵام دەنگت دەرنەیە دڵت گەرم بێ و کزەت لێ نەیە بەوە دڵخۆش بە، کە لێت بپچڕن نەک پارەت بەنێ و مەردیت بکڕن تا تاڵ و سوێری دنیا نەچێژی هەرچیت هاتە دەم ئەوە ئەیێژی بە قاڵ‌کراوی کە هاتیە کایە گوێزت لێ بارکەن خڕەت لێ نایە ئەگەر ڕەفیقت کەوت دەستی بگرە هەرچی بێ ئەویش ئەوەی لە فکرە بەڵام بۆرە پیاو بە هیچ نازانێ قەدری مەگرە، بە لەتە نانێ هەندێ کەوتوونە سەودای مەبعووسی زۆریان هەوڵ دا خودا نەینووسی ئەم جارە نۆرەی تازە قەڵدایە بگرە و بەردەیە، هەوڵ و هەڵدایە خەڵک وا دەزانن بە دەست ئێرەیە هەر ئەو خەرمانە و هەر ئەو گێرەیە گای بنە وەک گای ژێر زەمین بەندە بە ئێمە ناڵێن: کەرت بە چەندە باز هەڵدەن "مەبعووس" پێی بێتە کایە بەڵام باز چاوی لە گۆشتی گایە ++++++++++++++++++++++ سەرناو: قەدری خۆت زیاد کە بە قەدرزانی سەبارەت: پەندەکانی پیرەمێرد، ڕۆژنامه‌ی ژیان، ژماره‌ ٥٠٨. - نووسین: کەماڵ ڕەحمانی قەدری خۆت زیاد کە بەقەدرزانی خۆت نەبێ هیچ کەس بە سووک نەڕوانی وەک گلێنەی چاو عالەم دەبینێ تەنها وجودی خۆی لا نانوێنێ هەرچەن دەور دەوری خۆهەڵکێشانە خۆهەڵکێشان وەک سنگ هەڵکێشانە لای هەندێ جنێو ئەدەبیاتە هەندێ بە خەیار ئەڵێن 'زەڵاتە' هەندێ کە پیاو کەوت پێی ئەڵێن کەرە هاتەوە ڕووی کار ئەڵێن جەوهەرە قەتره‌ی حەیایان لە لا تکاوە ڕووبەڕوو شەرمیان لە لا نەماوە ئەگەر ئەمانە وا نەبوونایە بە چاکی بۆمان ئەهاتنە کایە تۆ لەو کەسانە هەمیشە دوور بە لە کونجی خۆتا، هەڵکە و ڕووسوور بە نەسیحەتێکیان کردووین زۆر چاکە ئەڵێن خاکی بە، ئه‌سڵت لە خاکە١ گەر بۆ کەڵکی خۆت گەورەییت بوێ بڵێ: خانوویێک، ئەکەم بۆ شەوێ گەورە ئەوەتە کە چاکەی عام بێ نەک دەور و پشتی خۆی لێ بە کام بێ ١. ای اصل تو ز خاک سیاه و تن از منی در سر منی مکن که به ترکیب چون منی «سنایی غزنویی» ای برادر چو خاک خواهی شد خاک شو پیش از آن که خاک شوی «گلستان سعدی» ++++++++++++++++++++++