شاعیر: پیرەمێرد کتێب: بەشی وردەکاری سەرناو: های لەبەیاندا، های لە بەیاندا سەبارەت: نووسین: کەماڵ ڕەحمانی - دیوانی پیرەمێرد، کۆکەرەوەی: ئومێد ئاشنا، بەرگی دووەم، لاپەڕە ١٨٠و١٨١. های لەبەیاندا، های لە بەیاندا های ئەو بەیانەی دیم لە بەیاندا خاڵێ لە مابەین جووتە بەیاندا ئەستێرەی بەیان لە توێی بەیاندا دوو مار بە حەڵقە دەوری بەیان دا تا ڕێی بەی نەبێ دز لە بەیاندا کێ توانی ئەمە شەرح و بەیاندا ڕەشە ئێوارە لە دەم بەیاندا ماری لای بەیان بۆیە نیهان دا هەر کەس دەس بەرێ ماری لێ هان دا ئەمەوێ لە خوا مەرگم نیشان دا سەر لە بەیاندا، سەر لە بەیاندا جە بەیانەوە... حاڵێ پێم یاوان جە بەیانەوە خاڵێ دیم نەبەین دوو بەیانەوە چوون نەجم مەدرەوشۆ وە بەیانەوە حەیان لوول وەردەن وە بەیانەوە وەبان بەیدا مە شنیانەوە حەکاکانی دەور گشت بەیانەوە کێ دیەن مەغریب وە بەیانەوە؟ مستەفا هەتا سەر مەنیانەوە ھەر ها وە حەسرەت ئەو بەیانەوە «بێسارانی» ++++++++++++++++++++++ سەرناو: خۆزگە سەبارەت: دیوانی پیرەمێرد، کۆکەرەوەی: ئومێد ئاشنا، بەرگی یەکەم، لاپەڕە ٣٠٢. - نووسین: کەماڵ ڕەحمانی خۆزگە تەفرەی وام بیر ئەکردەوە چاو و دڵم پێ ڕوون ئەکردەوە دڵ ئەگری لەبەر دەردی تەنیایی چاو ئەگری لەبەر نووری بینایی خوایە ئەمانە تۆ وات لێ کردن نازانم بۆچی بەم دەردەت بردن؟ ! بۆچ ئەو ئافەتەت نیشاندا بە چاو چاو شریخەی کرد لە دڵ و هەناو وا دانامرکێن ئەم دوو مناڵە گیزە گیزیانە وەک زەردەواڵە ئەڵێم گڕۆز بوون با بیاندەم بەو ئاخ خووی دڵڕەقی وەرئەگریت لەو دارتاش کە جەردە تەشوێکەیان برد ئەیدا بەسەریا و بێدادی ئەکرد بۆ ئەوەی نەبوو تەشوێکەی ئەبەن ئەیوت ڕەنجەڕۆم دەمەسووی ئەکەن ++++++++++++++++++++++ سەرناو: ئێمه مایه‌ی چوارشتین سەبارەت: دیوانی پیره‌مێرد، پیداچوونه‌وه‌ی: ئومێد ئاشنا، به‌رگی یه‌که‌م، لا‌په‌ڕه‌ ٣٠٦. - دیوانی پیره‌مێرد، پیداچوونه‌وه‌ی: محه‌ممه‌د ڕه‌سوول (هاوار)، لا‌په‌ڕه‌ ٢٩٠. - نووسین: کەماڵ ڕەحمانی ئێمه‌ مایه‌ی چوارشتین، ئاو و ئاگر، خاک و با ئه‌م هه‌وێنه‌ کامی زیاتر بێ، به‌لای ئه‌ویا ئه‌با خاک و ئاو دایکن، له‌سه‌رخۆن هێمنی و ڕوونی ئه‌ده‌ن ئاگر و با زۆر خراپن، خیلقه‌تی پیاو تێک ئه‌ده‌ن با له‌گه‌ڵ که‌وته چیکڵدانه، له به‌رزیدا فڕی کاتێکت زانی که –ف-و-ت-یه ئیتر هێڵی بڕی فرت و فێڵت که‌وته ڕوو ئه‌ی چه‌رخ، له‌لام ئابڕووت تکا بۆیه به‌رزت کردمه‌وه، بمخه‌یت و ئازارم بگا ئێسته زانیم، بۆیه هێلانه‌م وێران بوو، تێک شکا ته‌رزه‌ و هه‌وره‌تریشقه و به‌فر و با سه‌ختم بکا من که‌وا به‌رز بوومه‌وه و گوتم گوناهی که‌س نییه بۆیه ناگریم تێده‌گه‌م، خۆکردوو ته‌دبیری چییه ++++++++++++++++++++++ سەرناو: چوارین (فرت و فێڵت که‌وته ڕوو) سەبارەت: دیوانی پیره‌مێرد، پیداچوونه‌وه‌ی: ئومێد ئاشنا، به‌رگی یه‌که‌م، لا‌په‌ڕه‌ ٢٠٠. - نووسین: کەماڵ ڕەحمانی فرت و فێڵت که‌وته ڕوو، ده‌وران، له‌لام ئابڕووت تکا بۆیه وا به‌رزت کردمه‌وه، بمخه‌یت و ئازارم بگا تێت گه‌یشتم، بۆیه هێلانه‌ت له جێی به‌رز دابوومێ هه‌تا ته‌رزه‌ و هه‌وره‌تریشقه و به‌فر و با، سه‌ختم بکا ++++++++++++++++++++++ سەرناو: بەوەم زانی سەبارەت: دیوانی پیره‌مێرد، پیداچوونه‌وه‌ی: ئومێد ئاشنا، به‌رگی دووه‌م، لا‌په‌ڕه‌ ٢٨٨. - دیوانی پیره‌مێرد، پیداچوونه‌وه‌ی: محه‌ممه‌د ڕه‌سوول (هاوار)، لا‌په‌ڕه‌ ٢٩٠و٢٩١. - نووسین: کەماڵ ڕەحمانی بەوەم زانی، ئەوەی جوانە, دڵی وەک سەنگی خارایە کە ئەڵماس دولبەرە و شووشە بڕینیشی لە بارایە بە حەرفێ گیان ئەبەخشی، قووتی ئەحیات لە زارایە فیدات بم، ئەی موسڵمان، موعجیزەی عیسات لە کارایە ئەوی بووک جوان ئەکات مەنعی تەماشایە، کە تارایە ١. شیعرێکی فارسی «شێخ ئه‌بوولوه‌فا»یه کردوویه به کوردی. ++++++++++++++++++++++ سەرناو: دە شتم ھێند لا گرانە سەبارەت: دیوانی پیره‌مێرد، پیداچوونه‌وه‌ی: ئومێد ئاشنا، به‌رگی دووه‌م، لا‌په‌ڕه‌ ١١. - دیوانی پیره‌مێرد، پیداچوونه‌وه‌ی: محه‌ممه‌د ڕه‌سوول (هاوار)، لا‌په‌ڕه‌ ٢٩٠و٢٩١. - نووسین: کەماڵ ڕەحمانی دە شتم ھێند لا گرانە، راستی پێی پەستم تەواو ناری عاشق، نوێژی فاسق، کبر و خۆبادانی پیاو دەردی بەرتیل، ڕووی بەخیل، گاڵتەی ڕەزیل، ئەرکی دەلیل دەنگی ناسازی موئه‌زین، برسێتی و ھەوراز، بەدیل دەردی سەر ئەم نۆیە، ده‌ردی سه‌ریه بۆ ئەم عالەمە١ لیرە نازی نازیکەر پێیان بڵێی (هیتله‌ر) کەمە ١. له نوسخه‌ی لای ئومێد ئاشنادا ئاوایه‌: ناز و نوزی تازه‌ پیاکه‌وتوو له‌گه‌ڵ ئەم عالەمە٢ لیرە نازی نازییه‌کان پێیان بڵێی (هیتله‌ر) کەمە ٢. نازی یه‌که‌م واتا؛ ناز کردن. نازی که‌ر: ئه‌وانه‌ی سه‌ر به نازییه‌کانن. ++++++++++++++++++++++ سەرناو: ناخۆشه‌ لای سەبارەت: دیوانی پیره‌مێرد، پیداچوونه‌وه‌ی: ئومێد ئاشنا، به‌رگی یه‌که‌م، لا‌په‌ڕه‌ ٣٠٣. - دیوانی پیره‌مێرد، پیداچوونه‌وه‌ی: محه‌ممه‌د ڕه‌سوول (هاوار)، لا‌په‌ڕه‌ ٢٩٣و٢٩٤. - نووسین: کەماڵ ڕەحمانی ناخۆشه‌ لای به‌ چاوی ته‌ڕم سه‌یری ڕووی ئه‌كه‌م من ته‌ڕ له‌به‌ر هه‌تاوی ڕوودا بۆ؟ خۆم هه‌ڵده‌خه‌م چاوم ڕوا، به‌رێكی له‌ لیمۆی به‌رۆک نه‌دی بێخی له‌ ئاوه‌، وشک نه‌بێ به‌ری دوایی دێته‌دی خوو و ڕووت ئه‌گه‌ر له یه‌ک ئه‌چوو من باغه‌وان ئه‌بووم چی بکه‌م له‌گه‌ڵ گوڵا، ئه‌زه‌لی هاتووه دڕکی شووم لێوت به‌ گفتوگۆ شه‌کره‌ و ڕوومه‌تت گوڵه‌ له‌و دووانه‌ گوڵ به‌ شه‌كرم ئه‌وێ قوه‌تی دڵه‌ عه‌شق و جه‌مال له‌ سه‌ر من و تۆدا كه‌ كه‌وته‌ ڕوو من به‌ختی تۆم، خه‌وم نییه، ‌ تۆیش به‌ختی من، بنوو ++++++++++++++++++++++ سەرناو: بیدی مەجنوونی سەبارەت: دیوانی پیره‌مێرد، پیداچوونه‌وه‌ی: ئومێد ئاشنا، به‌رگی دووه‌م، لا‌په‌ڕه‌ ٢٥١و٢٥٢. - دیوانی پیره‌مێرد، پیداچوونه‌وه‌ی: محه‌ممه‌د ڕه‌سوول (هاوار)، لا‌په‌ڕه‌ ٢٩٤و٢٩٥. - نووسین: کەماڵ ڕەحمانی بیدی مەجنوونی، بیدی مەجنوونی١ باڵا بەرز و نەرم، زار و زەبوونی بە لار و لەنجە، لەیلا نموونی بەڵام لە داخی دڵ سەرنگوونی ئاواره و له‌رزان به‌گوێ تافه‌وه‌ په‌خشان به شنۆی هه‌وای سافه‌وه‌ عه‌نبه‌ربار به‌بۆی مسکی نافه‌وه‌ ڕه‌خشان به په‌لکی زه‌ڕکڵافه‌وه به ده‌نگی تاڤگه‌ی ساز و سه‌متووری ئه‌ینۆشی باده‌ی ئاوی بلووری سایه‌بانی بان ته‌ختی گه‌نجووری به‌ڵام تامت تاڵ به ده‌ردی دووری وتم: شۆڕه‌بی ده‌ست‌نیشانی دۆست سێبه‌ر ده‌وای (تا)، سه‌لفات و زینک پۆست٢ دره‌ختان سه‌ربه‌رز به‌بێ قۆرت، بێ شۆست بۆچ سه‌رت شۆڕه وێنه‌ی که‌فته‌کۆست جوابی دایه‌وه‌ به زبانی حاڵ بۆچ تۆ نازانی پیری کۆنه‌ساڵ من سه‌ربه‌رزێک بووم شیرین په‌ڕ و باڵ سوجده‌م برده‌ به‌ر باڵای سۆسه‌ن خاڵ ١. شیعره‌که‌ی بێسارانی: تەرزی بید بە تار... تەرزی بید چوون زوڵف مەلەرزۆ بە تار بە ھەوای پرشنگ تافی بێ قەرار نەپای با لوول کۆ سەخت وەرنسار وەڵگ بید زایف، تەرز تووڵ زەبوون زەبوونتەر جە تەرز تای کڵافی توون مەلەرزۆ بە باد سەردی سەبایی نەڕووی گوڵی سەوز سافی مینایی پەرسام ئەر ھەی بید، دەست نیشانی دەست تورک تەڕ ئەندام، سای سەھەند پەیوەست چێشەن درەختان ڕووشان نە باڵان تۆ سەر سەراوێز، ڕووی زەمین ماڵان؟ بید ئاما جەواب بە زوبانی حاڵ چوون پەرسات حاڵم، بواچوون ھەواڵ منیچ نەونەمام نازک بەر ئاو بیم سەرتەرزی لەرزان تافی سەراو بیم ناگا پەی تەقدیر دیدە سیاوێ خاو ئالوود سوبح خێزا جە خاوێ ئامانە سایەم مەخسەڵ دا خاڵان کۆکۆی خەرمەنی خەمان دا تاڵان جەو ساوە جۆیای ئەو نەو تارەنان چۆ بی سەراوێز بێ قەرارەنان ٢. سه‌لفات و زینک: حه‌بێکی زه‌رده که ده‌درێ به تادار. ++++++++++++++++++++++ سەرناو: فه‌لسه‌فه‌ی کورد سەبارەت: دیوانی پیره‌مێرد، پیداچوونه‌وه‌ی: ئومێد ئاشنا، به‌رگی یه‌که‌م، لا‌په‌ڕه‌ ٣٠٤و٣٠٥. - دیوانی پیره‌مێرد، پیداچوونه‌وه‌ی: محه‌ممه‌د ڕه‌سوول (هاوار)، لا‌په‌ڕه‌ ٢٩٦-٢٩٨. - نووسین: کەماڵ ڕەحمانی هەر ئەموت: خۆزگە دنیام بدیایە گلەیی خەڵکم لیێ بپرسیایە بموتایه: بۆچ گلەیی ئەکەن بۆچ وا جنێوی سووکت پێ ئەدەن ڕۆژێ به‌ته‌نیا له ماڵه‌وه بووم وه‌نه‌وزم ئه‌دا خه‌ریک بووم بنووم له‌پڕ ته‌ڕپیرێ، به ئاڵ و واڵا ته‌نیا و سه‌ربه‌خۆ، کردی به ماڵا به لار و له‌نجه هات به‌لامه‌وه بێ په‌روا دانیشت به‌ئارامه‌وه وتی: ئاره‌زووی منت کردووه؟ خه‌ڵک ناوی منیان به سووک بردووه ئه‌وه‌یش ئه‌زانم تۆ منت ناوێ خۆت قه‌مته‌ر ئه‌که‌ی به نان و ئاوێ له‌به‌ر ئه‌وه‌یه که‌وا هاتمه لات ئه‌وا خۆم هێنا، بۆ تۆ به خه‌ڵات من ئه‌و سێبه‌ره‌م دوام که‌وی ئه‌ڕۆم ڕووم لێ وه‌رگێڕی، من له شوێنی تۆم له‌و ساوه که خوا منی داناوه مۆری کچێنیم هێشتا نه‌شکاوه ئه‌وی نێرپیاوه منی لا سووکه ئه‌وی ئه‌یه‌وێم ڕاست نێره‌مووکه خوا پیاوی به من تاقی کرده‌وه بۆ محه‌کی پیاو، بووم به کرده‌وه ئه‌وی که جارێ گرتمه باوه‌شم دین و ویژدانی کرد به پێشکه‌شم به‌بێ ئیختیار ته‌سلیمی من بوو که ئه‌ملام دایه ئه‌ولای له‌بیر چوو هه‌ر من بۆم تێکرد ئه‌و تێری نه‌خوارد دوایش به‌جێی هێشت به هه‌ناسه‌ی سارد ژنه‌که‌ی بردی، بۆ مێردی تازه وتی: با بۆره، بێته جێی بازه خه‌ڵک ئه‌م ئه‌حواڵه‌ی وا له‌پێش چاوه که‌چی هێشتاکو بۆ من سووتاوه هێندە شیرینم شانەی هەنگوینم پێی عاشق وه‌ک مێش پێکا ئه‌لکێنم ++++++++++++++++++++++ سەرناو: گه‌رما سەبارەت: دیوانی پیره‌مێرد، پیداچوونه‌وه‌ی: ئومێد ئاشنا، به‌رگی یه‌که‌م، لا‌په‌ڕه‌ ٢١٦. - دیوانی پیره‌مێرد، پیداچوونه‌وه‌ی: محه‌ممه‌د ڕه‌سوول (هاوار)، لا‌په‌ڕه‌ ٢٩٨-٢٩٩. - نووسین: کەماڵ ڕەحمانی «ئەم هەڵبەستەی پیرەمێرد، یەکێکە لەو هەڵبەستانەی کە خۆی زۆر پێوە ماندوو کردووە و بە دوای جیناسێکی زۆر و بە دوای وشەی بە توێكڵدا گەڕاوە، ئەگەر بە چاوێکی ورد سەیری ئەو دێرانە بکەین بۆمان دەر ئەکەوێ کە پەیوەندییەکی ئەوتۆ نییە لە نێوان مانای دێڕەکانی ئەو هەڵبەستەدا، بەڵکو هەر دێڕەی مەبەستێکی تایبەتی ئەگەیەنێ.» محه‌ممه‌د ڕه‌سوول (هاوار). گەرمەی تێکەڵی لە گەرما و گەرما بۆ سڕی سەرما بکێشن بە سەرما لە جێی کەمەرە دەست لە کەمەردا بەبۆی هەناسەم سنگ سێوی دەردا کە جوو لە ترسا، جۆی جوو لە ترسا پارسا پارسەنگ بوو بۆ پەچە ترسا پار پاڕامەوە بە نیگای تکا ئەبرۆی پێک هێنا، ئابڕووم تکا ++++++++++++++++++++++ سەرناو: بۆ شێخ محه‌ممه‌دی خاڵ سەبارەت: دیوانی پیره‌مێرد، پیداچوونه‌وه‌ی: ئومێد ئاشنا، به‌رگی یه‌که‌م، لا‌په‌ڕه‌ ٣٣٣-٣٣٥. - دیوانی پیره‌مێرد، پیداچوونه‌وه‌ی: محه‌ممه‌د ڕه‌سوول (هاوار)، لا‌په‌ڕه‌ ٣٠١-٣٠٣. - نووسین: کەماڵ ڕەحمانی شێخی ڕەوشەن خاڵ، چرای نەوەی خاڵ بە حوكمی قەزا، قازی چەمچەماڵ تەنها بۆ ئەوە، چووی بووی بە قازی پێت بڵێن: خودا و بەندەت لێ رازی ئه‌گینا پایه‌ت، بێ پایان به‌رز بوو خزمه‌تت له‌سه‌ر ئه‌ستۆمان فه‌رز بوو ئه‌وسا باره‌گای خودات به‌ده‌ست بوو هه‌ر تۆ ده‌ربه‌ست بووی، که‌چی ده‌ر به‌ست بوو١ ویستت خزمه‌تت بۆ عاله‌م عام بێ یاخوا (اتقوا) له تۆ ناکام بێ دیاره ئه‌یزانی ڕۆژێ بایه‌زید خه‌رقه‌که‌ی ته‌ڕ کرد بۆ (هَلْ مِن مَّزِيد)٢ چوو ئه‌و ئاگره بکوژێنێته‌وه‌ ئیسلامی له‌ده‌م بسێنێته‌وه وه‌له‌کێک تووڵێک ئه‌دا له ڕانی خه‌رقه‌ی فڕێدا، له کزه‌ی ژانی به ئازارێکی هه‌تیوه ڕووتێ وتێ: ته‌ڕ و وشک تێکڕا بسووتێ من قازێتی تۆم له‌ لا خۆش نه‌بوو دوایی به شتێ ئه‌و فکره‌م تێکچوو وتم: هیممه‌تی خاڵت له‌سه‌ره بۆ ئه‌م ئیشه ئه‌و، دیاره ڕه‌هبه‌ره بیستوومه ڕۆژێ پێش جه‌ژنی قوربان ڕووه‌و شاره‌که‌ت چوو بووی بۆ گه‌ڕان تووشی شه‌خسێک بووی له ئه‌هلی قه‌ڵه‌م به خدری زینده‌ت دابووه قه‌ڵه‌م تۆ خۆت عه‌ره‌فات، له عه‌ره‌فات بووی مه‌ستی ته‌جه‌للای زات و سفات بووی جه‌مال و جه‌لال، نیگای ئاواره عه‌کسی کردۆته، شووشه‌ی سیاره ته‌جه‌للای خۆت بوو به غه‌یره‌ت زانی ئه‌مه‌ سڕڕێکه، له عام نیهانی یاخود به‌ قه‌ولی گاڵته‌ی درۆزن که‌ره‌که‌ی خۆتت لێ بوه ڕموزن به‌ڵێ ئه‌و شه‌خسه که هات ڕووبه‌ڕوو له‌سه‌ر کانیه‌که‌ی خدری زینده‌ بوو له (که‌رتڕێنه) ده‌سنوێژی نه‌شکا٣ که‌رتڕێنێ بوو له شێوه‌ و شکا له خوام ئه‌وێ تۆ هه‌روا نیک بین بی مژده وه‌رگری (روحُ الْأَمِين) بی به فه‌یزی ڕۆحی باپیر ئه‌مین بی٤ گوڵده‌سته‌ی باغچه‌ی ژیان و ژین بی ١. ده‌ربه‌ستی یه‌که‌م واتا؛ به‌ته‌نگه‌وه‌ هاتن. دووه‌میان یانی؛ ڕێی لێ گیرا بوو. ٢. «يَوْمَ نَقُولُ لِجَهَنَّمَ هَلِ امْتَلَأْتِ وَتَقُولُ هَلْ مِن مَّزِيدٍ» (ق/ ٣٠): ڕۆژێک ده‌بێ به‌ دۆزه‌خ ده‌ڵێین ئایا پڕ بوویت؟ دۆزه‌خیش ده‌ڵێ ئایا که‌سی تر هه‌یه‌؟ واته‌؛ که‌سی تر هه‌یه‌ بیهێنن. (ته‌فسیری پوخته‌ی قورئان، مه‌لا محه‌ممه‌د مه‌لاساڵح) ٣. که‌رتڕێنه: هه‌ورازێک بوو له به‌ینی قه‌ره‌هه‌نجیر و که‌رکووکدا. ٤. ئه‌مین: مه‌به‌ست له «حاجی شێخ ئه‌مین»ه‌ که باپیری شێخی خاڵ بووه. - کورتەیەک لە ژیانی نووسەر و زانای گەورەی کورد، مامۆستا شێخ موحەممەدی خاڵ: ناوی تەواوی (شێخ محەمەدی كوڕی شێخ عەلی حاجی شێخ ئەمینی خاڵ)ه، لە بنەماڵەیەكی دینداريی شاری سلێمانیدا، له ساڵی ١٩٠٤، چاوی به دونيا هەڵهێناوە، سەرەتا لای باپیری خوێندوویەتی، زانستە شەرعیيەكانیشی لەلای هەرسێ زانای بەناوبانگی ئەو كاتە (شێخ عومەری قەرەداغی) و (شێخ جەلالی قەرداغی) و (مەلا حسێنی پیسكەندی) فێربووە. ساڵی ١٩٣١ بە فەرمانی ڕەسمی، كراوە بە پێشنوێژ و وتارخوێنی مزگەوتەكەی باپیری (شێخ ئەمینی خاڵ)، ساڵی ١٩٣٩ لە تاقیكردنەوەیەكی وەزارەتی داددا بۆ پۆستی قازێتی بە یەكەم دەرچووە و بە فەرمانی شاهانە بووە بە قازی هەڵەبجە و تا ساڵی ١٩٦٧ لە پیشەكەیدا ماوەتەوە، لەو ماوەیەدا لە هەڵەبجەو چەمچەماڵ و سلێمانی و كەركوك و موسڵ قازی بووە، لەساڵی ١٩٦٢ كراوە بە ئەندامی دادگای پێداچوونەوەی شەرعی لە بەغداد، لەساڵی ١٩٦٧ خانەنشین كراوە. ساڵی ١٩٧٢ كراوە بە جێگری سەرۆكی كۆڕی زانیاری كورد، شێخی خاڵ (٥٥) ساڵ بەردەوام بوو لە لەخزمەت كردنی ئەدەب و كەلەپوور و مێژوو و زمان و كاروباری ئایینی میللەتەكەی، جگە لەزمانی كوردی بە زمانی عەرەبیش چەندین نووسینی هەیە، بەتایبەتی لەسەر گەورە پیاوانی كورد. ساڵی ١٩٨٠ كۆڕی زانیاری عەرەبی ئەردەنی شێخی خاڵی بە ئەندامی یاریدەدەر بۆ كاروباری ناوبراو هەڵبژاردووە. ساڵی ١٩٨٧ خەڵاتی (یەكێتی مێژوونووسانی عەرەب)ی لەسەر ئەو لێكۆڵینەوەیەی لەگۆڤاری كۆڕی زانیاری عێراقدا بە ناونیشانی (میرنشینی ئەفراسیاب و ئەڵقەیەكی ون لە مێژووی بەسڕە) پێی بەخشراوە. ناوبراو لە ڕۆژێكی مێژوویی ساڵی ١٩٨٩ لە سلێمانی كۆچی دوایی كرد، چەندین بەرهەمی چاپكراوی بەنرخی لەدوای خۆی بەجێهێشت، لەوانە: (تەفسیری خاڵ) ٧جزم، فەرهەنگی خاڵ سێ بەرگ، پەندی پێشینان، ناڵەی دەروون دوو به‌رگ... ++++++++++++++++++++++