شاعیر: پیرەمێرد کتێب: بەشی چیرۆک و گاڵتە و گەپ و مەتەڵ سەرناو: پەندی باڵندە سەبارەت: نووسین: کەماڵ ڕەحمانی - دیوانی پیرەمێرد، ئومێد ئاشنا، بەرگی دووەم، لاپەڕە ٣٧ ـ ٣٩. باخەوانێک بوو، لەدێی کۆستەی چەم باخێکی جوانی، هێنابووە بەرهەم هەرچی میوەیەک ناوی بیستبوو ناشتبووی بەڕیز ڕێکی خستبوو گوڵی هێنابوو لە پۆپەی چنار لێی دابوو چنار گوڵ بوو بە بەهار بیست و چوار چەشنی ترێ لێدابو ڕەونەقێکی وای بەو باغە دابوو ئەیانوت: ئەمە باغی ئیرەمە بڵێی بەهەشتە هێشتا هەرکەمە دەوری باغەکەی هەموو هەنجیر بوو چەشنی هەنجیری شاری ئیزمیر بوو قەلەباچکەیەک وای پێ فێر بووبوو بەیانیان ئەیخوارد هێند لێی تێر بووبوو لەدوای تێر خواردن هەڵی ئەوەران میوەی ترێشی تێکڕا ئەژاکان ڕۆژێک باخەوان تەڵەی بۆ دانا پێوە بوو، قیڕەی کرد لە تاوانا باخەوان هێندەی داخ لە دڵا بوو چەقۆی دەرهێنا سەری ببڕێ زوو قەلەباچکەکە لێی هاتە زبان وتی مەمکوژە لالۆی باخەوان بەو شەرته جارێک کە تا دەمێنم ئیتر دیداری باغت نەبینم سێ ئامۆژگاری واشت بۆ ئەکەم یەکی گەنجێ بێت بەبێ زیاد و کەم یەکەم ئەو شتەی کەوا مەحاڵە شوێنی مەکەوە ڕەنجت بە تاڵە دووەم غەم مەخۆ کە ماڵ لە کیس چوو عومریشت ئەڕوا، غەم ئەبێ بە دوو سێیەم بە درۆی کەس تەفرە مەخۆ بە شوێن کردەوەی حەرامدا مەچۆ باخەوان ئەمەی وا چوو بە دڵا چوو بەرەڵڵای کرد لە دوای چڵا قەڵ فڕی و چووە سەر لقی دارێ کە کەس نەتوانێ بیخاتە خوارێ ڕووی کردە کابرای باخەوان وتی: داخەکەم بۆ تۆ کە بێ‌قسمەتی من گەوهەرێکم لە ناو زگا بوو بتفرۆشتایە، بە ملیۆن ئەچوو باغەوان وتی: وەرە ئاشنا بە لەم باغەی مندا سەر بەڕەڵا بە قەل بە پێکەنین وتی: من ئێستا پەندم دای کەچی لە لات نەوەستا من نەموت: بە شوێن مەحاڵا مەچۆ جارێکی تر من چۆن دێمە لای تۆ وتم: غەم مەخۆ کە ماڵ لە کیس چوو ئەبینم ڕەنگت هەڵبزڕکا زوو وتم: بە درۆ باوەڕت نەبێ لە زگی قەڵدا گەوهەر چۆن ئەبێ؟ ! پند مرغ آن یکی مرغی گرفت از مکر و دام مرغ او را گفت ای خواجهٔ هُمام تو بسی گاوان و میشان خورده‌ای تو بسی اشتر به قربان کرده‌ای تو نگشتی سیر ز آنها در زمن هم نگردی سیر از اجزای من هِل مرا، تا که سه پندت بر دهم تا بدانی زیرکم یا ابلهم اوّلِ آن پند هم در دست تو ثانی‌اش بر بام کَهگِل‌بَست تو وآن سِوُم پند دهم من بر درخت که ازین سه پند گردی نیکبخت آنچه بر دستست اینست آن سَخُن که محالی را ز کس باور مکن بر کفش چون گفت اول پند زَفت گشت آزاد و بر آن دیوار رفت گفت دیگر بر گذشته غم مَخَور چون ز تو بگذشت زان حسرت مبر بعد از آن گفتش که در جسمم کتیم ده درم ‌سنگ است یک دُرِّ یتیم دولت تو بخت فرزندان تو بود آن گوهر به حق جان تو فَوت کردی دُر، که روزی‌ات نبود که نباشد مثل آن دُر در وجود آنچنان که وقت زادن حامله ناله دارد، خواجه شد در غُلغُله مرغ گفتش: نی نصیحت کردمت که مبادا بر گذشتهٔ دی غمت چون گذشت و رفت، غم چون می‌خوری یا نکردی فهم پندم یا کَری وان دوم پندت بگفتم کز ضلال هیچ تو باور مکن قول مُحال من نیم خود سه درم سنگ ای اسد ده درم سنگ اندرونم چون بود خواجه باز آمد به خود گفتا که هین باز گو آن پند خوب سِیّومین گفت آری خوش عمل کردی بدان تا بگویم پند ثالث رایگان پند گفتن با جَهولِ خوابناک تخم افکندن بود در شوره خاک چاکِ حُمق و جهل نپذیرد رَفو تخمِ حِکمَت کم دِهَش ای پندگو! «مولوی، مثنوی معنوی، دفتر چهارم، بخش ٨٦، قصهٔ آن مرغ گرفته...» ++++++++++++++++++++++ سەرناو: خۆمان بە خۆمانی ئەکەین سەبارەت: نووسین: کەماڵ ڕەحمانی - پیرەمێرد، ئومێد ئاشنا، بەرگی دووەم، لاپەڕە ٢٩٨ ـ ٢٩٩. - تەرجەمەی حەقیقی: هەڵۆ لە سەر بەردێک هەڵۆیەک هەڵفڕی کەوتە هەوا بێ‌غەم هەوایێکی غرووری کەوتە سەر، تا کەوتە سەر عالەم بەبایێکی خەڕۆ و بایی بوو، خۆی ئێجگار بڵند زانی پەڕی گیڤ کرد و باڵی لێک ئەدا هەتاکو ئەیتوانی کە کەوتە عالەمی خولیاوە، سەیری کرد هەموو دنیا لە ژێر باڵی ئەوایە، هەر ئەوە لەو ئەوجەدا تەنیا وتی: ئەمڕۆ لەمن بەرزتر، لە ئەوجی عالەما کێیە کورەی ئەرزم لەژێر پێدایە، کەس ناگاتە ئەو جێیە ئەگەر مێشوولەیەک بێت و بجووڵێ، نابێ نەیبینم لەسەر شەپقە و سەری ئەگرن پەڕێکی باڵی ڕەنگینم خولاسە هێندە فەخری کرد و خۆی بینی لە نخوەتدا کەمانێکی قەدەر تیرێکی هاویشتێ لە غەفڵەتدا هێنایە خوارەوە خوار و زەلیل لەو بەرزییە لەرزی سەفیل و دڵ بریندار کەوت لەو خاک و خوێنەدا گەوزی کە سەیری کرد پەڕی خۆی بوو لە ناو ئەو نووکە پەیکانە وتی: خۆمان بە خۆمانی ئەکەین، بێ‌سووچە بێگانە بەڕاستی ڕاست ئەکا سەعدی کە من هەرگیز لە بێگانە گلە ناکەم، کە هەرچی پێم ئەکا خۆیە و له خۆمانە١ 'دەڵێین دڵمان لەیەک پاکە، برای دینین، لە یەک نەسلین کەچی چاومان بە خێری یەکتری هەڵنایە کەچ بینین' 'هەتا کەی چاوی عیبڕەتمان لە گڵدا بێ خوا چارێ حەکیم هەر تۆی، بەخێر چاومان هەڵێنە بێینە ناو جارێ' ١. ئەو شێعرە هی حافزە نەک سەعدی؛ بەڕاستی ڕاست ئەکا سەعدی کە من هەرگیز لە بێگانە گلە ناکەم، کە هەرچی پێم ئەکا خۆیە و له خۆمانە من از بیگانگان دیگر ننالم که با من هر چه کرد آن آشنا کرد از ماست که بر ماست روزی ز سر سنگ عقابی به هوا خاست بهر طلب طعمه پر و بال بياراست بر راستی بال نظر کرد و چنين گفت: امروز همه ملک جهان زير پر ماست بـر اوج فلک چون بپرم از نظـر تــيز می‌بينم اگر ذره‌ای اندر ته درياست گر بر سر خـاشاک يکی پشه بجنبد جنبيدن آن پشه عيان در نظر ماست بسيار منی کـرد و ز تقدير نترسيد بنگر که ازين چرخ جفاپيشه چه برخاست ناگـه ز کـمينگاه يکی سـخت‌کمانی تيری ز قضاوقدر انداخت بر او راست بـر بـال عـقاب آمـد آن تير جـگردوز وز ابر مر او را بە سوی خاک فرو کاست بر خـاک بيفتاد و بغلـتيد چو ماهی وانگاه پر خويش گشاد از چپ و از راست گفتا: عجب‌است اين که ز چوب‌است و ز آهن اين تيزی و تندی و پريدنش کجا خاست چون نیک نگه‌کرد و پر خويش بر او ديد گفتا: ز که ناليم که از ماست که بر ماست خسرو تو منی را ز سر خویش بدر کن بنگر بە عقابی کە منی کرد چه‌ها خاست «ابومعین ناصر بن خسرو قبادیانی بلخی» ++++++++++++++++++++++ سەرناو: مەیموون و دارتاش سەبارەت: دیوانی پیرەمێرد، پێداچوونەوەی: ئومێد ئاشنا، بەرگی دووەم، لاپەڕە ٥٤و٥٥. - نووسین: کەماڵ ڕەحمانی پیاوێکی دارتاش مەیموونێکی بوو بۆ هەموو ئیشێک لە گەڵیا ئەچوو هۆگری بوو بوو لای هەڵوەستابوو مەیموون شاگرد بوو دارتاش وەستا بوو کە ئەیوت تەشوێ زوو بۆی ئەهێنا شەقەی مشاری بۆ دائەهێنا ڕۆژێک وەستاکەی داری ئەقڵاشت جار جارە بە پواز لەنگەری ئەداشت بە تەور دارەکەی ئەقڵیشاندەوە بە پواز لەیەکی ئەڕەواندەوە وەختی نیوەڕۆ کە چوو بوو بۆ سەر ئاو مەیموون هاتە جێی وەک وەستای تەواو خۆی قیت کردەوە و لە جێی ئەو دانیشت کلکی خۆی بە شوێن قڵیشدا داهێشت پوازی دەرهێنا و کلکی پێوە بوو کەوتە قیژ و هووڕ ئاگری تێ بەربوو قڵیشی جێی پواز یەکدگیر بوو بوو کلکی مەیموونی تونگ تێ چەسپی بوو مەیموون غەشیم بوو، بوو بە فاقەوە ئەیناڵان بە دەم واقەواقەوە لە واقەی مەیموون خەڵک گردبوونەوە چوونە پێشەوە لێی ورد بوونەوە کلکی گیرابوو لە قڵیشی دار ڕێگەی نەدەبوو کەوتبووە هاوار وەستا لە تاوا سەراوی نەکرد هاتەوە پوازی لێدا دەست‌وبرد مەیموون ڕزگار بوو بە کولەمەرگی بەڵام ژانەکەی گەیشتبووە جەرگی مەیموون چۆن ئەبێت بە وەستای دارتاش بولبول و قاژوو نابن بە یۆڵداش ناگاتە پایەی مەردی ناحساب نان بۆ نانەوا، گۆشتیش بۆ قەساب قەت ڕێک ناکەون حوشتر و قەزازی هەورامی و سواری، مەلا و ڕمبازی ++++++++++++++++++++++ سەرناو: بالۆرێ سەبارەت: ژین، ژمارە ٧٤١، کتێبی په‌نده‌کانی پیره‌مێرد، لاپەڕە ٣٥٤. چاپی ساڵحی لاپەڕە ٣٨٤. - دیوانی پیره‌مێرد، پیداچوونه‌وه‌ی: ئومێد ئاشنا، به‌رگی دووه‌م، لا‌په‌ڕه‌ ٢١. - نووسین: کەماڵ ڕەحمانی (مەلای مەزبوورە) چووبوە سەردارێ لقێکی ئەبڕی بیکا بە بارێ ئەیویست ئەو لقەی خۆی وا لەسەری لە بندا بیبڕێ، عەقڵی وای بڕی ڕێبوارێ پێی وت: مەلای سەر دارێ ئەو لقە ببڕی ئەکەویە خوارێ مەلا لێی نەبیست، سا ئەو بەڕێ بوو ئەم لەگەڵ لقدا سەرەنگرێ بوو کە کەوتە خوارێ وتی: ئەم پیاوە لە غەیب ئەزانێ و 'وەلی' تەواوە ڕای کرد، چوو پێی گوت: کەرامەت دارێ تۆ کە زانیت من ئەکەومە خوارێ ئەڵبەت ئەیشزانیت کە من کەی ئەمرم؟ توخوا پێم بڵێ لەبەرت مرم وتی: عومری تۆ پێت بڵێم چەندە؟ بە سێ بای سکی ئەو کەرە بەندە! منیش بەوانەی کە 'قوپون' ئەکڕن ئەڵێم: لقی ژێر خۆتان ئەبڕن میللەت دارێکە کە سێبەردارە چۆن لق‌وپۆپی ئەشکێ ئەو دارە؟ دەستی داد زۆریان ئەخاتە خوارێ کەچی عار نانێن بە کەوتن جارێ وا چاکە بە داخ نیشانەیان کەن کە عاریان نەنا، ڕەوانەیان کەن ++++++++++++++++++++++ سەرناو: گاڵته‌ی به‌ڕاست سەبارەت: دیوانی پیره‌مێرد، پیداچوونه‌وه‌ی: ئومێد ئاشنا، به‌رگی دووه‌م، لا‌په‌ڕه‌ ٢٣و٢٤. - دیوانی پیره‌مێرد، پیداچوونه‌وه‌ی: محه‌ممه‌د ڕه‌سوول (هاوار)، لا‌په‌ڕه‌ ٣٩٠-٣٩١. - نووسین: کەماڵ ڕەحمانی (خدر) بوو پیاوی (حەسەن ئەفەندی) کەس پێی نەئەگوت: کەرت بەچەندی کوێخا دەرگابوو، جێی خواجانشین فەرەنجی پۆش بوو زستان و هاوین ڕەنجبەری مالیک ڕۆژێ نەخۆش کەوت ناچار ئەو ڕۆژە بێگاری بەرکەوت پێنج کەری ئەبرد بۆ دێی (کەڵەکن) کەلەسەر خەرمان کای بۆ دابگرن لە ڕێ خۆی سواری کەرێکیان بووبوو کە ئەیژماردن هەر چواریان مابوو وتی: ئای خۆ من پێنج کەرم پێبوو وا چواریان دیاره‌، ئەوی تر کوێ چوو؟ ! دابەزی و ڕای کرد یەکسەر بۆ دواوە وایزانی کەرە، لە دواوە ماوە بۆ دواوە ڕوانی هیچ دیار نەبوو گەڕایەوە لای کەران زووبەزوو کە تەماشای کرد پێنج کەر تەواوە لەم فه‌ن و فێڵە سەری سووڕماوە زۆر ماندوو بووبوو دیسان سوار بوەوە لە بەره‌وژێرە، سەرەوخوار بوەوە دیسان کە ڕوانی کەر چواریان ماوە گریا، وتی من: چیم لێ قەوماوە؟ ! خۆی خستە خوارێ بە دوعا و نزا ئە پاڕایەوە لە بارەگای خوا دوعای گیرابوو، ڕوانی کەر پێنجە ڕزگاری بووبوو لەم دەرد و ڕەنجە ئیتر نەیتوانی بڕوات بە پێیان خۆی هەڵدایە سەر کەرێکی تریان دووبارە بەزمی لێ هاتەوە دی وتی ئەمجارە کەره‌ گورگ خواردی هەروا لێی خوڕی گەییە نیوەی ڕێ بەرەو پیری هات خلەی کوێخای دێ بانگی کرد: کوێخا! لە دەورت گەڕێم لە کوێوە خوا تۆی گەیاندە سەر ڕێم ئەمڕۆ جنۆکە گاڵتەم پێ ئەکەن جارێ کەرێکم ئەدزن و ئەیبەن وتی: خدر ئاغا چەند کەرت پێ بوو؟ چەندیان ماون؟ چەندت لەکیس چوو؟ وتی: پێنج کەرم هێنابوو لە شار کە ئەیژمێرم، هاتۆتە سەر چوار کوێخا تێگەیشت کە گونی و گێزەر لێک ناکاتەوە کابرای قوڕبەسەر ئەوکەرەی کەوا خۆی سواری بووە چونکه‌ نایبینێ لەبیری چووە وتی: دابەزە هەی بەندەی بێ غەش پێنجی بۆ ژمارد، خۆیشی کرد به شه‌ش ++++++++++++++++++++++ سەرناو: دەرسی مەلای هەیاسی سەبارەت: دیوانی پیره‌مێرد، پیداچوونه‌وه‌ی: ئومێد ئاشنا، به‌رگی دووه‌م، لا‌په‌ڕه‌ ٢٤و٢٥. - دیوانی پیره‌مێرد، پیداچوونه‌وه‌ی: محه‌ممه‌د ڕه‌سوول (هاوار)، لا‌په‌ڕه‌ ٣٩٤. - نووسین: کەماڵ ڕەحمانی قُل أَعُوذُ، تۆ بێژە شەو کورتە و ڕۆژ درێژە بۆیە پیاو گێژ و وێژە هەرچی ئەکرێت بیچێژە شیر کە ترشا بیڕێژە ژن کە پیر بوو بینێژە بێ دراو کوشتەی نوێژە پارەدار زەینی تێژە درەو درەوی لێژە گۆشت گۆشتی مەڕی گێژە تام لە لای ژنی درێژە باوی بێ ڕۆژوو و نوێژە ++++++++++++++++++++++ سەرناو: عه‌شقی پاک سەبارەت: پیره‌مێرد ١٩٤٤ - دیوانی پیره‌مێرد، پیداچوونه‌وه‌ی: ئومێد ئاشنا، به‌رگی دووه‌م، لا‌په‌ڕه‌ ٣٥-٣٧. - دیوانی پیره‌مێرد، پیداچوونه‌وه‌ی: محه‌ممه‌د ڕه‌سوول (هاوار)، لا‌په‌ڕه‌ ٤١٥-٤١٨. - نووسین: کەماڵ ڕەحمانی ده‌روێشێ مه‌یلی دنیای نه‌مابوو به‌ یادی خواوه‌ ڕوو له‌ سه‌حرا بوو ڕۆژێ بۆ جومعه‌ چووبووه‌ ناو شار کچێکی جوانی دی له‌ ڕاگوزار نیگاهێک هات وه‌ک تیر دای له‌ جه‌رگی گه‌یاندیه‌ کاتی ئاکامی مه‌رگی لاڵ و پا‌ڵ لێی که‌وت، بێ هۆش، بێ زبان به‌زه‌ییان پیا هات خه‌ڵکی بۆی گریان تومه‌ز ئه‌و کچه، ‌ کچی وه‌زیر بوو جوان و دلێر و ئاقڵ و ژیر بوو ئه‌م ئه‌فسانه‌یه‌ که‌وته‌ شاره‌وه‌ باوکی به‌ دایکی وت بیشاره‌وه‌ ژن وتی ئه‌مه‌ ئه‌فسانه‌ی عه‌شقه شۆره‌تی شێتی مه‌جنوون سه‌رمه‌شقه‌ یان ئه‌بێ ده‌روێش له‌ ناو ده‌ربرێ ئه‌و ساته‌ش خوێنی ناحه‌ق ئه‌تگرێ چار هه‌ر ئه‌مه‌یه‌ که‌ ده‌روێش بێنی به‌ هه‌ڕه‌ و گوڕه‌ وای بترسێنی که‌ ڕوو بکاته‌وه‌‌ سه‌حراکه‌ی جاران جارێکی تر خۆی نه‌خاته‌ مه‌یدان یان بارێکی وای لێنێ هه‌ڵنه‌ستێ که‌ باری قورس بێ ئیتر ئه‌وه‌ستێ وه‌زیر ده‌روێشی بانگ کرد به خه‌ڵوه‌ت پێی وت: ژن هێنان ناکرێ به‌ هیممه‌ت سه‌د گه‌وهه‌ری وای دانه‌ی شه‌وچراغ بدره‌وشێته‌وه‌ به‌ شه‌و له‌ناو باغ له‌گه‌ڵ سه‌د گورزی دانه‌ی مرواری هه‌ر دانه‌یه‌کی به‌های خه‌رواری ئه‌مانه‌ بێنه‌ کچت ئه‌ده‌مێ گیرۆده‌ت ناکه‌م ساتێک و ده‌مێ ده‌روێش که‌ ئه‌مه‌ی بیست له‌ خۆشیا که‌شکۆڵی هه‌ڵگرت، ڕووی کرده‌ ده‌ریا به‌ جۆش و خرۆش، ‌ (یاهوو یا مه‌ن هوو) مه‌لیکه‌ی ده‌ریای هێنایه‌ به‌ر ڕوو وتی: به‌و خوایه‌ عه‌ققی خسته‌ سه‌ر ئێسته‌ ده‌ریاتان لێ ده‌که‌م به‌ به‌ڕ ئه‌م که‌شکۆڵه‌تان لێ ئه‌خه‌مه‌ کار ده‌ریا وشک ئه‌که‌م نه‌مێنێ دیار بانگ که‌ به‌کۆمه‌ڵ گه‌وهه‌ر ده‌ربێنن له‌ گوێ ئه‌م به‌حره‌ هه‌ڵی ڕژێنن مه‌لیکه‌ی ده‌ریا جاڕی دا جارێ گه‌وهه‌ر ده‌رهێنن هه‌ر یه‌که‌ی بارێ ئیتر به‌ جارێک گه‌وهه‌ر ده‌باری بۆی بوو به‌ خه‌رمان دانه‌ی مرواری ده‌روێش هاته‌وه‌ چووه‌ لای وه‌زیر وتی: ئه‌ی مه‌ردی به‌ هۆش و ته‌دبیر ئه‌گه‌ر تۆ ئه‌وسا بتکوشتمایه ئه‌بوو تۆش به‌ زوڵم که‌ست نه‌مایه‌ ئێستا خوا ویستی له‌ په‌رده‌ی په‌نهان سڕی عه‌شقی پاک بخاته‌ مه‌یدان ئه‌مرم ڕه‌وا بوو به‌سه‌ر ده‌ریادا ئیتر له‌ عه‌شقی مه‌جازیم لادا کچ و گه‌وهه‌ر و مرواری بۆ تۆ ڕوو بکه‌مه‌وه‌ خوا نه‌بم ڕه‌نجه‌ڕۆ چونکه‌ ئه‌مانه‌ نامێنێ بۆ که‌س هه‌ر مه‌یلی خوایه‌ باقی و فریادڕه‌س قودره‌تی خودایه‌ هیممه‌تی مه‌ردان دای به‌ مێرووله‌ حو‌کمی سلێمان ئه‌مانه‌ په‌ندی پێشوونیانه که‌ به‌ زمانی مه‌ل وتوویانه‌ هه‌ر سێ په‌نده‌که‌ زۆر به‌هادارن له‌ جێی خۆیانا گه‌لێک به‌کارن خۆ ئه‌گه‌ر بێت و خۆشه‌ویستی خوا ده‌ستکه‌وێ عاشق تێری پێ ئه‌خوا مه‌ستی مه‌یلی خوا زه‌وقێکی تیایه‌ ناگاته‌ پایه‌ی ئه‌و ئه‌م دنیایه‌ ++++++++++++++++++++++ سەرناو: هارونه‌ ڕه‌شید سەبارەت: دیوانی پیره‌مێرد، پیداچوونه‌وه‌ی: ئومێد ئاشنا، به‌رگی دووه‌م، لا‌په‌ڕه‌ ٣٩-٤١. - دیوانی پیره‌مێرد، پیداچوونه‌وه‌ی: محه‌ممه‌د ڕه‌سوول (هاوار)، لا‌په‌ڕه‌ ٤٢٧-٤٢٩. - نووسین: کەماڵ ڕەحمانی هارونە ڕەشید ڕۆژێ دڵگیر بوو ئەو ڕۆژە ڕۆژی مەرگی له‌بیر بوو ئەیویست تێ بگا، ڕۆژی پێش مردن بۆ تێگه‌یشتوو چی چاکە کردن وتی: بۆم بانگ کەن جەعفەری وەزیر جەعفەری پیاوێ بوو به‌ڕاو و ته‌دبیر هات و کڕنۆشی بۆ خه‌لیفه برد خەلیفە فەرموو: جەعفەر ده‌ستوبرد بنێره سێ کەس، یەکێکیان توججار دووەم فه‌للاح بێ، سێیەم مۆسیقار ئەم سیانە بێنن، خۆشت ڕاوه‌سته بزانم کامیان ته‌دبیریان ڕاسته هەرسێکیان هێنان بە هەڵەداوان بە شپرزەیی گه‌ینه بەر دیوان خەلیفە تووند بوو بیانووی پێ گرتن هه‌موو به ئیعدام مه‌حکوومی کردن به‌ڵام ئه‌و ڕۆژه هه‌تا ئێواره مۆڵه‌تی دانێ، پاشتر سێداره ئەوان ڕۆینەوە، ئێوارە داهات خەلیفە ناردی دیسان جەعفەر هات جلیان لێ گۆڕی، ماڵ بە ماڵ گەڕان ڕووی کردە ماڵی توججار لە پێشان ڕوانیان توججار بێ هۆش، لەپەوڕوو لێی ڕاکشاوە وه‌ک نیوە مردوو وتیان: تۆ هه‌ڵسە، ئێمە دەروێشین جڵەوی قه‌زات بۆ ڕائەکێشین وتی: لێم لادەن، من وا ڕابردووم سەلەمم ماوه، بۆ ئه‌وه مردووم لەوێوە چوونە ماڵی گۆیندە ڕوانیان بەزمە و قاقایە و خەندە چوون لێیان پرسی: ئەم بەزمە چییە؟ بۆچ بنیاده‌م نیت وا غه‌مت نییه؟ وتی: لێم گەڕێن ساتێکم ماوە سه‌عاتێکی تر عومرم ته‌واوه دنیا خۆشییه و چاک به‌سه‌ربردن لنگ بزاوتنی پێ ناوێ مردن ئه‌مجا چوونە لای جوتیاری هه‌ژار ڕوانیان بیست جووت گای خستۆته کار وا بە په‌لەپەل تۆو دادەچێنێ وەک ئه‌م دنیایه تاسەر بمێنێ پرسیان: خۆ تۆ ئێواره ئەمری ئەم شێف و وەردە، تازە بۆچ ئەبڕی؟ وتی: پێشینان بۆ ئێمەیان کرد ئێمه بۆچ نه‌یکه‌ین بۆ مناڵی ورد؟ ئەگەر ئه‌مڕۆ بێ و من تۆو نەچێنم میللەتەکەمان بەچی بژێنم؟ من خۆم ئەتوانم بە دوو نان بژیم بەڵام خزمەتی وڵات نەکەم، چیم؟ ئەوەی کە خێری بۆ وەتەن نییە بەچی ئەیزانی کە دوژمن نییە؟ ++++++++++++++++++++++ سەرناو: قولەڕەش سەبارەت: دیوانی پیره‌مێرد، پیداچوونه‌وه‌ی: ئومێد ئاشنا، به‌رگی دووه‌م، لا‌په‌ڕه‌ ٤٥-٤١. - دیوانی پیره‌مێرد، پیداچوونه‌وه‌ی: محه‌ممه‌د ڕه‌سوول (هاوار)، لا‌په‌ڕه‌ ٤٢٧-٤٢٩. - نووسین: کەماڵ ڕەحمانی قولەڕەشێک بوو بە پاڵەوانێ کەس نەی ئەوێرا شانبات لە شانی لە ڕۆژی شەڕا بچوایە مەیدان تیپێک لەشکری ئەخست بەبێ گیان بەسەر ڕۆستەمی زاڵا زاڵ ئەبوو دوشمن بە نەعره‌ی ژینی تاڵ ئەبوو بەڵام خوویەکی زۆر بێ مەعنای بوو لێیان نەدایە بۆ شەڕ نەدەچوو ئەبوایە چل کەس لێی دایە ئەوسا لەپاش چل کەسە، قینی ھەڵئەسا ڕۆژێک قەومەکەی، دوشمن دەوری دا ھیچ کەسی ساغیان نەما لە دێدا ھاواریان بۆ برد، کەوتبوو بەدەما وتیان: ھەی نامەرد، وا کەسمان نەما وتی: بێ کەڵکە، نەکه‌وتوومە قین مەگەر چل دارم پیاکێشن بەتین پیرەمێردێکی لێ چووە پێشێ پێی وت: جێی چلەی پارت ئەیەشێ؟ ! کەوتەوە بیری پار چیان لێ کرد خۆی گیف کردەوە، ھەستا دەست و برد دەستی دایە شیر ڕووی کردە دوشمن ڕەگی زیندەگی دەرکێشان لەبن قول قینی ھەستێ دوشمن پەست ئەکا١ بەڵام کەی بۆ کەی گۆبەنگ خەست ئەکا ١. قول: ڕه‌نگه مه‌به‌ستی له کورد بووبێ ئه‌وسا نه‌یویستووه ده‌ریببڕێ. ++++++++++++++++++++++ سەرناو: چاوبرسی سەبارەت: دیوانی پیره‌مێرد، پیداچوونه‌وه‌ی: ئومێد ئاشنا، به‌رگی دووه‌م، لا‌په‌ڕه‌ ٤٦-٤٨. - دیوانی پیره‌مێرد، پیداچوونه‌وه‌ی: محه‌ممه‌د ڕه‌سوول (هاوار)، لا‌په‌ڕه‌ ٤١٢-٤٤١٥. - نووسین: کەماڵ ڕەحمانی ڕۆژێک عارەبێکی جبوور ئەهاتەوە لە ڕێگەی دوور گەیشتە لای قەسری شیرین لە مێرغوزارێکی شیرین دابەزی قاوەڵتی ئەکرد هەگبەی لەسەر حوشتر داگرت نان و هێلکە و گۆشتی تیابوو کە ڕوانی کوڕێک پەیدا بوو سڵاوی کرد لە لای دانیشت کابرا گرژ بوو لچی داهێشت سەری شۆر کرد نانی ئەخوارد کوڕەش هەر پارووی ئەژمارد عارەب پرسی تۆ کوێندەریت؟ وا لە شەرم و حەیا بەریت! وتی: بێگانە نیم، یارم ئەمساڵ لای ئێوە جوتیارم ئەمجا وتی: أشلون الحال چۆنن، چاکن ماڵ و مناڵ کوڕە وتی: بە کەیفی تۆن شوکور هەموو بە ڕەنگ و بۆن وتی: خومەییسی کوڕم دەشت و کێو بۆ ئەو ئەبڕم وتی: ئه‌لحه‌مدولیللا تەواوە پێگەیشتوە و بەشەرت پیاوە وتی: دایکی چۆنە، ساغە وتی: چاکە و بەدەماغە وتی: ماینێکی چاکم بوو وتی: جوانووماینێکی بوو وتی: تانجيه زەردم ماوە وتی: هەمیشە لە ڕاوە کابرا لە خۆشیانا وەک هار دەمی بۆ پاروو کرد بە چوار تیکەی زلی بەیەکا دا هیچ بەشی کوڕەی لێ نەدا ئەوی لەبه‌ری مایەوە نایە هەگبە و پێچایەوە کوڕە هێجگاری حەپەسا دڵی تێکەڵ هات لەبرسا لەوکاتەدا ئاسکێک ڕابوورد کابرای عارەب سەیری ئەکرد کوڕ وتی: تف لەم دنیایە ئێستا تانجیە زەرد بمایە نەی ئەهێشت ئەم ئاسکە بڕوا عارەب پرسی: چی لێ قەوما؟ کوڕە وتی: ڕوحی سپارد گۆشتی ماینەکەتی زۆر خوارد وتی: ئەی ماینەکەم چی بوو؟ وتی: فێی لێ هات و شێت بوو له‌قه‌ی له کوڕه‌که‌ت دابوو کوڕە گیانی تیا نەمابوو پۆلیس هاتن ماینیان کوشت خەبەری ڕاستیم نایە مشت زاتەن ژنەکەت نەمابوو خانووی بەسەردا ڕووخابوو عارەب بە گریان بۆی دەرچوو نان و هێلکه‌ی هه‌موو بیر چوو کوڕە میراتی پێ بڕا ئەوەندەی خوارد هەتا بچڕا ڕۆڵە ئامۆژگاریت وابێ وه‌ختی نان خه‌ڵکت له لا بێ بە ڕووخۆشی بڵێ فەرموون بەوە خەڵک لێت ئەبێ مەمنوون چاویش مەبڕەرە نانی کەس ئه‌وی خوا داویه بیخۆ و به‌س سەیری بەخیل چی لێ قەوما بۆ کوڕه‌ی چاوبرسیشی نه‌ما ++++++++++++++++++++++ سەرناو: لای لایە بۆ مناڵ سەبارەت: دیوانی پیره‌مێرد، پیداچوونه‌وه‌ی: ئومێد ئاشنا، به‌رگی دووه‌م، لا‌په‌ڕه‌ ١٤و١٥. - دیوانی پیره‌مێرد، پیداچوونه‌وه‌ی: محه‌ممه‌د ڕه‌سوول (هاوار)، لا‌په‌ڕه‌ ٤٣٢-٤٣٤. - نووسین: کەماڵ ڕەحمانی گورگانە شەوێ، گورگانە شەوێ بەرخە بچکۆلەکەم خەوی لێ بکەوێ لوورەی تۆی ناوێ لای لایەی ئەوێ ئەڵێ لە ماڵی ئێمە دوور کەوێ بچۆرە ماڵی (ئه‌بوو یابوو) حوشترەکەی بکە بە تێشوو یابوەکەی بخەرە ناو چاڵی گوو خۆی لێرە دەرکە زووبەزوو پیاو خۆرە زلە، پیاو خۆرە زلە کۆرپەکەم لەگەڵ دایکیا دەست لە ملە مڕەی تۆی ناوێ، هۆگری بولبولە هیچت بە لووتەوە نابێ لەم گەرد و خولە دوورەوەکەوە تا نەیانداویتە بەر گوللە ڕووبکەرە ماڵی (ئه‌بوجاسم)ەکان یەکێکیان بکە به کوچکی گوێ ئاگردان ئەوی تریان بخەرە شیوی کۆڵان بەڵکو دەست بەردەن لە یەخەمان کەمتیاری سم پان، کەمتیاری سم پان ڕۆڵە شیرینەکەم نوستووە لە هەیوان سپاردوومە بە پێغه‌مبه‌ر و یەزدان سپاردوومە بە ئایەتی قورئان با حەچەی تۆ ببڕێت لە گوێمان بچۆرە ماڵی کوللەخۆرەکان زمانی بەدیان ببڕە بە ددان چاوی ژنەکەی کوێر کە بە بێڵەکان بەشکو بە جارێ ببنەوە لە کۆڵمان بۆ خۆمان بێ گێچەڵ بین لە وڵاتی خۆمان١ ١. شیعره‌کانی ئه‌م لای لایه له باری کێش (وه‌زن)‌ه‌وه وه‌ک یه‌ک نییه. ++++++++++++++++++++++