شاعیر: پیرەمێرد
کتێب: بەشی شیعری ویژدانی
سەرناو: شۆڕەبی
سەبارەت: دیوانی پیره‌مێرد، پیداچوونه‌وه‌ی: ئومێد ئاشنا، به‌رگی یه‌که‌م، لا‌په‌ڕه‌ ٢٦٣و٢٦٤. - دیوانی پیره‌مێرد، پیداچوونه‌وه‌ی: محه‌ممه‌د ڕه‌سوول (هاوار)، لا‌په‌ڕه‌ ٢٢٣. - نووسین: کەماڵ ڕەحمانی

ئەرێ شۆڕەبی سەر حەوزەکەمان
تۆ سێبەرێ بووی هاوینان بۆمان

بەهار بە لەنجە و لاری خەرامان
شنەت ئەبوو بە باوەشێنی گیان

بە بەرگی سەوزی تاوسی کاڵات
حەوزەکە ببووە ئاوێنەی باڵات

ئێستە بۆ ڕووت و بێ بەرگ و باری
سەرشۆڕ و ڕەنگ زەرد کز و غەمباری

وتی: وێنەی تۆم بەبێ زیاد و کەم
لە ماڵی تۆ دام وا لە تۆ ئەکەم

جوانی بەهارم من کە شۆڕەبیم
لە ترسی پاییز وا کەوتوومە بیم

هیچ نەبێ بەهار من سەوز ئەبمەوە
ئێوە پیریتان تاریکەشەوە

++++++++++++++++++++++