شاعیر: جەھانئارا کتێب: شیعرەکانی جەھانئارا سەرناو: نامەی ژمارە ٣ بۆ هاوسەرەکەی، عەلی ئەکبەر خانی ئەردەڵان، ناسراو بە شرف الملک ئاغەم کارییەن... بیلا جە دووریت دەردم کارییەن هەر شەو تا بە ڕۆ بێقەرارییەن کول بەڵای بەڕاست شین و زارییەن ئەوەندە بێحەد تاسەی تۆم کەردەن دوودی هەناسەم جە فەرق ویەردەن دیدەم ئینتزار ئاموشۆی ڕاتەن خەیاڵ هەر نە فکر وێر سەوداتەن سەرسام سادار چوون لەیلێ ئاسام شادی و زەوق نە ڕووی دەروون هەراسام چونکە بەی ڕەنگە، دەرد کاریمەن دەرد بێ دەرمان، نادیاریمەن بۆ تایە کاکۆڵ، قەترانی شەو بۆ وازکەرە نە فەرق، عەتر ئەشەدبۆ بکیانە پەرێ زامدار زامت دڵ بە سێخ بڕیان، باڵای نەمامت لەحزەیەک نمەشۆ نام تۆم جە هۆش تا وە ڕۆی مەردەن، نییەن فەرامۆش قەسەمم واردەن، ڕۆح بارۆن وە بەر بنێرۆ نە ڕێت، عومر و گیان و سەر قەسەم بە ئایەی سی جزمەی کەلام پەی تۆ خاو و خورد لێم بییەن حەرام سەوگەند بەو باڵای، نازەنین ئەندام غەیر جە تۆ زەوقم جە گشت کەس حەرام ئەما تۆ پەی من، نییەنی وە تەنگ بێڕەحمی بێڕەحم، دڵ سەنگی دڵ سەنگ مەیلت چوون جاران جەی وەر نەمەندەن مەعلوومەن دەندان، کەنیزت کەندەن وەرنە یانێ چێش، بینایی دیدەم عومرم، عەزیزم، هەی بەرگوزیدەم یە خەیڵی وەختەن، مەیلت کەردەن کەم کۆت کەردەن جەلام خەرمان خەرمان خەم ڕۆ جە ڕۆ فێشتەر مەینەت مەدەی پێم وەڵا بێزارم، من جە گیان وێم جە تەنخوای نەوید خەم پەیم مەکیانی وە شەرت وەرتەر هیچ نمەزانی ++++++++++++++++++++++ سەرناو: پاییزنامە دڵە خۆ پائیز، ها ئاما جە سەر چوون توجار پێشەن، زەردی جە بەندەر چەمە! سا بدیە وە زەردی چەمدا شەماڵ، نەمامان، مەدۆ بە هەمدا تازە نەمامان زەردەن ڕەنگشان هەنی نەمەندەن شنۆی دەنگشان گۆشە گۆش بدەر وە دەردی خەزان جە بەخت خەزان مەبەر حاڵ نەزان نەمام ئارەزووی ڕەنگ سیوەیلەن چەنی من و تۆ سیوەیل بێمەیلەن خەزان وێڵ بییەن وە سەر بەرداندا شەماڵ وەڵگ من بەرد وە هەرداندا منیچ هەر ئەودەرد، ئەو زەردی و ئەو ڕەنگ ئەو چەم و ئەو خەم، ئەو جەستە و ئەو دەنگ هیچ مەبەر عاجز «نەمام» دوڵبەر هەر بە تۆش نەدان حەق جە باڵای سەر بە چەند کەسیش دان زەردی بە گۆناش خسووس ڕەنگ من، بڕیان وە باڵاش تۆ مەبەر عاجز، جە زەردیی ڕەنگت تۆ چەنی سەبزی، بییەن بە جەنگت من چەنی سوورخی، دایم داوامەن جە زەردیی ڕەنگم، هەر واوەیلامەن قەسەمتان مەدۆ «نەو تووڵ نەمام» شەرح دەردتان ئیزهار کەن، جە لام سەر تا وە دامان، هەر زەردی پێوەن زەردی ڕەنگتان، نە ئاه کێوەن هیچ کورێز مەدەن نەمام بێ دەردەن بێ دەرد مەحاڵەن مەگەر جە مەردەن هەر کەس دەردێوەش نەبۆ جە دڵدا چوون بوڵبوڵ نەشۆ وە سوجدەی گوڵدا ئانە نە شەرتەن، نە وەفا و نە مەیل نە سۆزەن، نە عەشق، نە دڵ مەبۆ کەیل نەمامان یەکسەر گشت کەردەن ئیقرار ئازیز ئێمە گشت، مەر فەسڵ بەهار نۆبە کەفت ئەو دەس پەرسای نەمامان دەرد تۆ چێشەن شای جەمین جامان هیچ تەکلیف مەکەن دەردم بێ دەوان نمەگنۆم وە دەس حەکیمی حاڵزان دووبارە واتن مەر ئەو حەکیم بۆ دەوا بزانۆ، پەری دەرد تۆ زەخم دڵ وە تیر هیچ دەواش نییەن پڕەن جەو دەردە، هەنی جاش نییەن ئەو حەکیم بدۆ دەوا پەیاپەی خۆ من بێزارم جەو جام و جەو مەی مەگەر ئەو حەکیم، ئەو تیرە شەندەن زەخمش نە ڕووی دڵ تا مەحشەر مەندەن نەمام ئاه سەرد کێشا جە دەروون خەیلێ عاجز بین جە چەرخ گەردوون ئەوەڵ من واتم: دەوام ناچارەن دەوا، نە چارەی، من نە پێوارەن ئەر سەد کە حەدیس پێغەمبەر ڕاسەن مەسەلەی قەدیم وەرینەن، پاسەن هەرچی دراز بۆ هەر نییەن مەقبووڵ بەڵام واتەمان، تۆ بکەر قبووڵ ئەر سەد بەرزیمان جە حەد ئەو دەرەن سەبرو تەحەموول جە گشت خاستەرەن وەشڵەی بە ئێوە هەر وەخت پائیزەن ئەوسا مەزانن، دووری ئازیزەن ئەر وەهار بەیۆ مەوسۆل دۆسەن بێ خەبەر جە دەرد گشت بەڵا و کۆسەن خۆ هەم نە پاییز نە وەهار نە وەخت هیچ نییەن جە لام هەنی تەفاوت ئەگەر وەهار بۆ، ئەگەر پاییز بۆ ئەگەر ڕەفێق بۆ، ئەگەر ئازیز بۆ ئەگەر زمستان، ئەگەر هامن بۆ ڕۆحم پەروازەن، مەر خەم زامن بۆ نە شەب و نە ڕۆ، نە ماه و نە ساڵ سەبر و تەحەممول جە لام بێ مەحاڵ سا دڵە وەسین، وەس دەر دەدیسەر ساتێ ڕاحەت بەر بێ خۆف و خەتەر مەبۆ دوعای جەخت بکەرۆ پەرێت هەر موبتەلای دەرد پاسە بەیۆ پێت چوون دڵ سەنگەنی بەد بەیۆ نە ڕێت هەر موبتەلای دەرد پاسە بەیۆ پێت سا چوون ئازاردار هەر زەمین بۆ جێت هەر موبتەلای دەرد پاسە بەیۆ پێت نەپەرسای ئەحواڵ ئیخلاسمەند وێت هەر موبتەلای دەرد پاسە بەیۆ پێت ئەرێ بێ مروەت، هەی یاغی جە وێت هەر موبتەلای دەرد پاسە بەیۆ پێت چوون بازی نەهاڵ بەرشییەن جە جێت هەر موبتەلای دەرد پاسە بەیۆ پێت فایدەش نییەن هەی نەفام، هەی شێت هەر موبتەلای دەرد پاسە بەیۆ پێت خۆ تۆ مەزانی، مەردەن ها نە ڕێت هەر موبتەلای دەرد پاسە بەیۆ پێت بدەر وە سەردا، پەرێ بەخت وێت هەر موبتەلای دەرد پاسە بەیۆ پێت سا چەمەڕا بەر، پەی قاسد وێت هەر موبتەلای دەرد پاسە بەیۆ پێت خۆ نە جەلا دای وە ڕووخسار وێت هەر موبتەلای دەرد پاسە بەیۆ پێت نە جوانیت دی، نە خود نازیت کەرد نە مۆبەتت بی، نە عەشقبازیت کەرد نە جاهێڵیت کەرد، نە نێش و نە نۆش حاڵ نەزان حاڵ، ئەرێ شەڕ فرۆش نە سەر تا پای وێت، پۆشا وە کاڵا هەر دایم وە دەرد، پەی دەرمان ناڵا خۆ نە شادیت دی، نە مەجلیس نە بەزم نە شەو یولغار دای چوون سوار ڕەزم نە وە سەرکەشی دۆسی دوور مەنزڵ ئەری بادەقووش وێرانەکەی دڵ نە نیگا و دیای ماه و ساڵت دی نە تەمەننا و مەیل ڕۆی ویساڵت دی نە تاڵب وە مەیل، بەینەتکارانی نە ئاگا وە حاڵ، دەردەدارانی نە شەرتی کەسێ، نە وەفای یارێ هیچ نەبیت وە تەنگ جە ساڵان جارێ هەر گورێزت دا، پەرێ وەسڵ یار ئەرێ بی قیمەت جە لای ئەهلی شار ئەرێ گرفتار، دەرد کەس نەزان ئەرێ سەرگەردان چوون وەڵگ خەزان ئەرێ زەدەی خەم، زام کۆنە و نۆ ئەرێ جاگەی چەنگ نەچیرگای هەڵۆ فەرموودەی مەعدووم شیرین گیانیم فەرموودەی ئەوەن، ورد زوبانیم ' هەڵۆ زەدەگەی تەرسیاکەی وێم درۆ بۆ یا ڕاس، هەوە سیاکەێم ' نە ساتێ ڕاحەت، نە پەژارەی شەو نە دڵ ئازادەن، جە خەیاڵ ئەو پا نە دوو شاخەی کۆت سەد مەنم سلسلەی زەنجیر، ها نە گەردەنم بێ گونا و تەقسیر مەحبووسم جە بەند فەڕاش دەردم وە بێ چوون و چەند نە نیگا و دیای ماه و ساڵت دی نە تەمەننا و مەیل ڕۆزگارت دی دڵە! جە قینت، دیسان جە داخت مەعلوومەن بییەن، خەبتی دەماخت کەس چەرخ گەردوون نمەدۆ بازی چ لازم جەی شەرح، زوبان درازی تەڵ تامڵت، بڕیان جە وڵات پەنهانی ڕازت، نەمەندەن جە لات ئەر سەد کە شیرین جەی دنیای کەچڕەو وێش ڕسوا کەردش پەی وەسڵ خەسرەو شیرین پەی خەسرەو، جە شاهی ویەرد خەسرەو پەی شەکەر، بادەنۆشی کەرد تازەگی نییەن، دنیا وەی تەورەن جە وەفا مەپەرس مایل وە جەورەن دووری وەشتەرەن، تا وەسڵ یاران وەفا بێ قیمەت، جە سەر بازاڕان خۆ تۆ جەهانت پەی بی بە قەقنەس ئارا جە دەستت بەرشی وە عەبەس هیچ مەبەر وە تەنگ چەرخ چەواشە عالەم کول مەبۆ وە زەڕ بێ خاشە ++++++++++++++++++++++ سەرناو: نامەی ژمارە ١ بۆ هاوسەرەکەی، عەلی ئەکبەر خانی ئەردەڵان، ناسراو بە شرف الملک سەختەن ئازارم... ئاغەم جە دووریت، سەختەن ئازارم قیبلەگای عەزیز، ڕووی ڕۆزگارم عەزیزم ڕەفیق، دۆسی نازارم دۆعای فەراوان، کەمین دۆعاگو بیاونۆ وە لات، ئاغەم گیانو تۆ ئەگەر مەیلت بۆ، پەرسەی هەواڵم جە ئیقباڵ تۆ، شای کەمەر لاڵم ئەلحەمدولیلا، ئاغەی دڵ سیام دەغدەغەی تەشویش هیچ نییەن جە لام غەیر جە باڵای تۆ لێم نادیارەن ڕۆی ڕۆشەن جە لام تاریک و تارەن هەر ڕاویارێ عازم بۆ جە لات بنوویسە ئەحواڵ جە سەر تا وە پات دوو کەلیمە شەرح سڵامەتی وێت بنوویسە پەرێم، سەرم ها نەڕێت ئەر مەیل کەنیز، مەندەن وەلاوە بپێچەش وە بەرگ، ساف واڵاوە بکیانە پەرێم، تا خاتر جەم بۆ ئەندێشەی شەوان جە لای من کەم بۆ وەرنە بیناییم، هەی بەرگوزیدەم دایم مەوارۆ سەیڵات نە دیدەم ++++++++++++++++++++++ سەرناو: نامەی ژمارە ٧ بۆ هاوسەرەکەی، عەلی ئەکبەر خانی ئەردەڵان، ناسراو بە شرف الملک قیبلەم دەماخم... نەمەنەن، نییەن بەرزیی دەماخم دوور جە تۆ پەردەی دەروون داخ داخم زەنجیر تەقدیر کەردەن یاساخم کەم کەم کەردەن کەم سۆمای چراخم پەژموردەن غونچەی گوڵاڵەی باخم پەرگەندەن کەڵاف، خەیاتەی دێزم نمینەن نەرگس شەهلای خوونڕێزم زەردەن گوڵ وەرەق گۆنای گوڵنارم کەساسەن توحفەی مایەی بازارم تاڵەن تام دەم، تاڵاو وەردەکەم کاڵەن ئاه سەرد، سیای سەردەکەم لێڵەن ئایەنەی جام جەمینم قەڵاخەن کاڵای باڵای خەمینم ناڕەواجەن لال، دورج یەمانیم بێقەرین گەوهەر، نوقل نەهانیم بێ سەیرەن سەفای قەوس قەشەنگم تۆز خێڵ خەم، وەشتەن نە ڕەنگم تەمام هەر جە تیر تانەی بەدکاران مەر حەق بزانۆ چۆنم ویاران ئازیزم! یە گشت مەینەت باری تۆن ئێش و نێش غەم وە زامداری تۆن جەفای بەدکاران گشت جە بۆنەی تۆن تانەی ئەغیاران گشت سەرکۆنەی تۆن خەسرەو شیرین، وێڵ جە سێونگ تۆن مەجنوون لەیلێ، ڕسوای لونگ تۆن سەنعان تا مەحشەر تەرسا یار تۆن یۆسف زوڵێخا، گرفتار تۆن ئاغەکەم! فەڵەک چمان دڵ ڕێشەن سا ئەو نمازۆ، گونای من چێشەن ئەرێ بێخەبەر، بێباک جە ئەحواڵ ئەرێ تیرئەنداز وە ڕووی دانەی لاڵ ئەرێ بێ ئینساف بێ ئەندێش جە کەس ئەرێ ساحب زۆر، جە خودا نەتەرس ئەرێ بێڕەحم، وڵات چەپاو کەر ئەرێ تەریدەی، سەرملەی خەتەر ئەرێ شەو بێدار شەوان جە زوڵمات ئەرێ ئەقلیم گیر پەی چەشمەی حەیات ئەرێ حاڵ نەزان دوور جە سەفا و مەیل ئەرێ شەڕفرۆش هوونی قەتڵ لەیل تا کەی بنۆشوو زووخ زام جەرگ تا کەی بواچوو ئەی خوا سا مەرگ تا کەی پێچ وەروو چوون مار زامار تا کەی بکێشوو سزای سەختی خار تا کەی ئەسرینم ئاوپاش خاک بۆ تا کەی هەناسەم پەخش ئەفلاک بۆ تا کەی دەروونم جە ئەندو پەڕ بۆ تا کەی باڵینم وە هووناو تەڕ بۆ تا کەی لەرەم بەی، چەنی پەژاران تا کەی خدمەت کەم من وە خونخاران تا کەی بواچان وەدەشت و دەردا: تافتەی ڕسواییش کێشان وە سەردا تۆ خوا زەلیلی و زگاری تا چەند تۆ خوا خەمینی و خەمباری تا چەند وێنەی مارانگاز، بن تەڵووک تا چەند بیم جە خشەی دەنگ پای مەزووک تا چەند وەسوەسەی دەروون نیمەشەو تا چەند جەنگ چەم تا سوبح چەنی خەو تا چەند گۆنای گوڵناری چون خەزان تا چەند دەرد جە دەست یار حاڵ نەزان تا چەند بار مەینتان، کێشاکێش تا چەند خەجاڵەتیی خێڵ، قەوم و خوێش تا چەند ئیرجاع ئازار، وە تەبیب تا چەند عوزر نامەسمووع، پەی ڕەقیب تا چەند پەنا وە بارگەی شێخ و پیر تا چەند فەڵەک چەنی دۆس جیائی تا چەند پەی شکڵ ڕەقیب، دیائی تا چەند خوداوەند ئامان، وەسەن دەردسەر یا نەجات، یا مەرگ یا وەسڵ دڵبەر نەمەندەن تاقەت، تەوانای تانە جەی فێشتەر عەزاب، پەنەم مەنمانە ئەرێ کەرەمدار! ئاگای کولل حاڵ تۆ وێت عەلیمی ها بێم وە زۆوخاڵ خۆ من جە سنگ نیم شای موشکڵ گوشاد جە ڕووی مەرحەمەت، بیاوەم وە داد جە خەزانەی غەیب، تۆ چیش مبۆ کەم پەروانە شاد بۆ، شاد، وە شۆڵەی شەم بولبول نەکێشۆ، هەنی جەفای خار بێ خۆف بگێڵۆ پەی وێش نە گوڵزار بارێ ئازیزم، شای تیرئەندازان سەردار سوپای گەردەن فەرازان دیسان سەوگەندم، وە ڕوتبەی خاسان هەر جەو وەختەوە من وێم شناسان دەروونم جە عەشق باڵات قەقنەس بی ڕۆحم چەنی ڕۆح پاکت پەیوەس بی تا بە ڕۆی مەردەن، یەک لا و یەک دینم بزانە گیانم! گیانی شیرینم هۆشم هەراسان، بادەی ساف تۆن خەیاڵم دایم، تەلگراف تۆن حەواسم جە سەر تەفرەقەی ڕای تۆن زیندەگی و مەرگم ئاما و لوای تۆن ماوام گەرمەسێر، ئەگەر لێڵاخەن دەماخم وە بۆی هەوای تۆ چاخەن نە مایل وە زەوق، نە عەیش و شادی زەوقم هەر تۆنی جەی دونیای بادی غەیر جە شێوەی تۆ وەبانی گوڵدا ویەردەن تا پەڕ وە باغچەی دڵدا هەنی جەی مەخلووق تا بە ڕۆی مەردەن شەماڵ هەم جە خەو گوزەر نەکەردەن قەسەم هەر بەو شای فەرد فریادڕەس سەوای تۆ کەسم نەزانان وە کەس غەیر جە تۆ کەسم وە کەس نەوانان وە یادت قەسەم، شای نۆجەوانان تۆنی ئازیزم، تۆنی غەمخارم هەر تۆنی یاگەی گشت قەوم و کارم هەر با جە عاڵەم واچان بێ کەسەن مەیل تۆم تەنخوای گشت کەسم وەسەن دیدەم غەیر جە تۆ باڵادەس نییەن مەیلم ئامێتەی مەیل کەس نییەن سەرێوەن نە ڕات توفەیلم کەردەن سەوگەند هەر ئەوەن پەری تۆم وەردەن قەسەم هەر بەو شەرت ئیقرار جاران بەو وەفای قەدیم گشت بەینەتداران تا نەفەس مەنەن، نە یانەی قەفەس سیوای تۆ، دیدەم شاد نەبۆن وە کەس تا خاس وێم نەکەم ڕسوای زەمانە نەبۆن وە سەر ژان خوێش و بێگانە تا شکست نەدەم وە شای جەوانیم دنیا پڕ نەبۆ گشت جە بەدنامیم تا مینای خاتر نەڕێزۆ وە گڵ شەرت بۆ مەیل تۆ بەرنەشۆ جە دڵ سەوای تۆ کەسم نەزانان وەکەس ----- تا الف باڵام، وێنەی نوون نەبۆ تا مۆخ ئەعزام گشت وە هوون نەبۆ تا دیدم وە ئاو مروار تەڕ نەبۆ تا گۆشم جە سەمع تەمام کەڕ نەبۆ تا چراغ ڕۆح خاس نەبۆ خامۆش شەرتەن مەیلەکەت نەکەم فەرامۆش هەر وێم مەزانوو دڵ چە دەردێشەن بەڵام پەرێ تۆ فایدەش چێشەن من پەی تۆ وستەن وێم وە چەمەردا تانەم چوون سەرپۆش کێشان وە سەردا پێ تۆ وێم کەردەن وە پەند شاران مەحرووم جە دیدار بەرزە کۆساران پەی تۆ دەروونم پۆڕ نێش وخارەن سەد کۆ چوون شاهۆ غەم وەنەم بارەن پەی تۆ خەم گەڵای جوانیم بەردەن پەی تۆ وەهارم، خەزانش کەردەن پەی تۆ وێم کەردەن دەیری و دێوانە پەی تۆ پابەندم جە مەینەتخانە پەی تۆ کێشانم جەور ئەغیاران تیر تانەی تاڵ، نائەهلیی یاران من پەی تۆ مەشۆ وە ئەفڵاک ناڵەم تۆ ساز شادیت بەرزەن نە ئاڵەم من دایم پەی تۆ هەر هام نە زاری تۆ شەوان پەی وێت وە عەیش مەویاری من بادەی حەسرەت هیجرانت وەردم جەفات پێ من بێ، سەفا پێ مەردم تا کێ من جەلات ببوون ڕەنجەرۆ ئای جە کەم شەرتی و بێوەفایی تۆ تا واچی بەدحاڵ تەڵخەن ژیانم بیناییم بۆ دەس وەر دە جە گیانم هەراسم سەندەن جە گیر و گازت نمەبۆ حاسڵ، جە لام نیازت جەی وەر کێ بییەن یار دڵدارت دیسان هەر ئەوەن شەفای ئازارت خەدەنگ غەمزەی کام مەڕوو بەردت هەم بشۆ وە لاش پێ دەوای دەردت جە یانەی خاڵ ئێمەت چە کارەن دنیا پەی تۆ گشت مینا بازاڕەن ئەو هەرکۆ، بدیۆ سازت پڕ سۆزەن دایم نە دەوران، جەژنت پیرۆزەن من کە خۆ جەژنم، جەژنانم خارەن سەفای نەورۆزم، چوون ژار مارەن ئەرێ بێ مروەت، بێ ئەندێش جە تیر ئەرێ بێ باوەڕ، جە خودا و پیر تاکێ حەرفی تاڵ مەدەری نە ڕوۆم کێ زانووش نیان وە بان زانووم تاکێ مەکەریم وە چەشتەی ماران وە پووڵ سیای ناڕەوای شاران قیبلەم حەیفت کەرد جە من ویەردی خەیاڵێ وەی تەور نە دڵ ئاوەردی ڕۆیە سەد بەدیم وە دڵ مەشماری مەبۆ یەک نیکیم وە چەم بداری وێم ئەر ناخاسم دەروونم خاسەن دڵ جە بارەگەت ساحێب ئیخڵاسەن مەبۆ نەواچی وەفا و بەینش کۆن ڕۆشنیی دنیام، پێ وجوود تۆن بەڵام بۆ وە عەشق بینایی بان سەر جە ئەسپ مەتڵەب لادێ پیادە بەر ئەو ئەسپە چەند کەس هەوادان بەوار چەند سەر وە مەیدان کەردەن نگوونسار چەند ئوستاد عیلم کەردەن وە ناشی چەند وەزنش کەردەن وە پووش کاشی من جە عومر وێم جەی دونیای فانی پام نەنیان وە بان، ڕاگەی نادانی چەتر نامووسم، جە سەر ئەفراشتەن پەردەی عیسمەتم، هەر نگا داشتەن بەرز مەکەر جە لام، سەدای نام و نەنگ شیشەی مەعسوومیم مەدەر وە ڕوی سەنگ نە خودا بەردار، نە بەندە ڕازی نە فتوای شەرعەن نە حوکم قازی فدات بام پێ چیش پەشیمانیت بەرد چەن سەوگەنت وەرد چەن جارعەهدت کەرد ئەر ببۆ جە لات، ساتێ وە ساڵێ وە بێ ڕەزای من، نەکەی خەیاڵێ ئیسە یە چێشەن، ئەی ڕای بێوادە ئی خەسم خەیاڵی عەزم و ئیرادە ئەگەر بزانۆ، جێم مەبی دڵگیر، ئەگەر نارین، وە گەر زەمهەریر دۆزەخ پەڕێ تۆ، مەکەم ئەختیار تا عاجز نەبۆ، یاری وەفادار نەک واچی دەمباز قەوڵش بەتاڵەن قەسەم هەر بەو فەرد ئاگای کول حاڵەن نە ساحێب باخم، نە ساحێب میوە بەخشەش، بنۆشەش، بنێشش پێوە ئەر باخەن ئەر موڵک ئەر گەنجەن ئەر ماڵ دەخڵش هەر بە تۆن دارای کەمەر لاڵ خاترت جەم بۆ، دڵ مەدەر وە دڵ پەی تۆ ڕازیان ئی باغچەی پڕ گوڵ بێ تاقەت مەبە، شای خوسرەو مەقام بە وەسڵ شیرین، مەیاوی بە کام ئیسە نە جای دەس، نە وادەی کارەن نە یاگەی تەدبیر هانا و هاوارەن پام هانە پاوەند، دوو شاخ زاڵم مەشیا خۆ تۆ خاس، زانات بە حاڵم تەوق سەد مەنیم شییەن نە گەردەن سەرتا پای باڵام، ئاغشتەی دەردەن بەڵکوم سەبەب ساز موشکڵ گوشاد کەر پادشای شاهان، دەهەندەی داوەر یەد قودرەتش، جە هانامەوە خەڵاس کەرۆ پام، جە پای دامەوە ئاسان ببۆ کار زەحمەت وەردەمان نەدریۆ وە باد، ڕەنج بەردەمان یا ڕەجای شەخسێ یا وە تدبیرێ بگێرین وە دەس، دامانی پیرێ غەرەز وە هەر نەوع کارێ بسازین من و تۆ جە بەین من و تۆ نازین ئەوسا وەشەن عەیش هەر شەو تا سەحەر خودا خوشنوود بۆ، بەندە بێ خەتەر وەرنە خۆ لەیلت، ئارامش نییەن سیوای تۆ پەی کێ ڕسوای عام بییەن ++++++++++++++++++++++ سەرناو: نامەی ژمارە ٢ بۆ هاوسەرەکەی، عەلی ئەکبەر خانی ئەردەڵان، ناسراو بە شرف الملک میرزام تۆم جە یاد... میرزام گیانو تۆ، تۆم نەشییەن جە یاد مەیلم هەر وە تۆن، هەر وەتۆوە شاد دڵ هەر جە لای تۆ، یاوان بە موراد خاتر پڕ گەردیت خەتای من چێشەن پەی چێش چەنیمان خاترت ڕێشەن پەی چێش خاترت لێمان ڕەنجیان تۆ واتەنت دەرد، من واتەنم گیان من جە ئەمر تۆ نییەنم تەقسیر میرزام تۆ ناهەق لێم مەبی دڵگیر ئەگەر من جاری تۆم کەردەن ڕەنجە دەستوورەن ئانە پێش ماچان لەنجە غەمزە و کریشمە و لەنجە و لارەی یار مەبۆ بکێشۆ، عاشق بە سەد بار من نازم کەردەن تۆ ماچی جەنگەن جەنگ نییەن میرزام، ئانە گشت ڕەنگەن ئەر مەیل کەنیز، مەندەن وە لاوە بپێچەش وە بەرگ، ساف واڵاوە بکیانە پەرێم، تا خاتر جەم بۆ ئەندێشەی شەوان جە لای من کەم بۆ وەرنە بیناییم، هەی بەرگوزیدەم دایم مەوارۆ سەیڵات نە دیدەم ئەر سەد کە بەدان بە جەنگش ماچان ئەو جەنگە جەنگی وەڕنگەر ماچان مەگێرە نە گۆش واتەی بەدکاران بەدان، بەد ماچان نەبەین یاران خەیاڵشان بەدەن، بەدان بەدگۆ جیایی مەوزان، بەینی من و تۆ شەرتم ئەو شەرتەن، من شەرتم کەردەن عەهدم شەریکەن تا وە ڕۆی مەردەن ++++++++++++++++++++++ سەرناو: نامەی ژمارە ٥ بۆ هاوسەرەکەی، عەلی ئەکبەر خانی ئەردەڵان، ناسراو بە شرف الملک میرزام جا کەردەن... هیجرانت بەو تەور نە دڵ جا کەردەن یەکسەر سەرمایەم سامان سا کەردەن خەزانەی عومرم بە فەنا بەردەن جەو ڕۆ دڵ نە وەسڵ باڵات مەحروومەن وێنەی بیماران شەو خاوم شوومەن تەن جە تاو دەرد، نەدین باڵات مەحبووسەن بە دەس خان خەیاڵات سپەهدار خەم هجووم ئاوەردەن قافڵەی شادیم، بە تاراج بەردەن شەو جە شەو فێشتەر شوومەن شەوگارم وە مەردەن موشتاق، جە گیان بێزارم ڕۆوان ڕەستاخێز ڕۆڕۆی بەرزمەن ناڵە نەی ئاسا، قەقنەس تەرزمەن وەحشیان قەرار، شەو ناڵینمەن خەڵقان هەراسان، دەنگ شینمەن نە هەر جا یەک دەم، تەن ساکن مەبۆ دووسەد جۆی زووخاو نە زامم مەشۆ باڵای سەروئاسام جە داخت خەمەن دیدەی جەیر ئاسام ڕۆشنیش کەمەن گۆنای گوڵفامم خەزانیش بییەن عەیش و شادی و زەوق نە دەستم شییەن چوون لەیل قەدیم کارێ ئامان پێم قەومان و خوێشان، بێزار بییەن لێم میرزام گیان و تۆ کاری پێم ئامان سەراونەن سەد جۆی زووخاو نە زامان فیراق ئاغەم، کارێ پێم کەردەن وە بێ ئەختیار ڕازیم وە مەردەن زەڕەی نیم نەفەس، جە قەفەس بەندەن ئەویچ نە شادی، مەیل تۆ مەندەن میرزام ئەر نەیۆ، ئەو نیمە نەفەس پەرواز مەکەرۆ جە کونج قەفەس تایێ جەو کاکۆڵ سەودایی پەلدێز مەدرەوشۆ جە ڕەنگ جقەی شای پەروێز بدەر وە ئەنفاس شەماڵ خۆش خۆ بماڵۆ نە ڕووی، زام کۆنەی نۆ بەڵکوم ساکن بۆ دڵ جە شەو ناڵین با وەس سەیل هوون بشۆم نە باڵین وەرنە بە مەرگت، یۆسفی سانی کەنیز فەوت مەبۆ جە دنیای فانی ++++++++++++++++++++++ سەرناو: نامەی ژمارە ٦ بۆ هاوسەرەکەی، عەلی ئەکبەر خانی ئەردەڵان، ناسراو بە شرف الملک میرزام پێوارەن... جەو ساوە باڵات، جە من پێوارەن بەو «شا» کە سانع لەیل و نەهارەن نەهارم بێ تۆ، چوون لەیلی تارەن سەوگەند بەو ڕەیحان سیای چەم وەردەت بەو شەرت و ئیقرار چەنی من کەردەت بەو «باڵای نەمام»، بێ عەیب ئاڵات سەد لەیلێ ببۆ، وە نەزر باڵات بە «ئاهی گیان سۆز» من جە سەودای تۆ بە «خەمباری من، عاجزی» ڕای تۆ بە « دیدەی پڕ ئەسر» کەنیزت قەسەم بەو « فەرق کاکۆڵ» عەزیزت قەسەم بەو « شەهد شیرین کەلام»ت قەسەم بەو «تەرک قامت ئەندام»ت قەسەم بەو « زاری و فیغان زگاری»م قەسەم بەو ڕەوێڵەی سەخت دیاری»م قەسەم بەو«شان وشەوکەت شیرین»ت قەسەم بەو«مەیل و دووکان»ڕەنگینت قەسەم بەو «سەیل ئەسرین، عەین وێم» قەسەم بەو «گۆل هووناو» شەو نە چەم قەسەم یە گشت قەسەم بۆ میرزای خاترخۆ شای بەهرام تەمکین، سڵێمان شکۆ جەوساوە جەی زەید تەشریفت بەردەن دڵ غەریق بەحر، زووخاو دەردەن ++++++++++++++++++++++ سەرناو: نامەی ژمارە ٤ بۆ هاوسەرەکەی، عەلی ئەکبەر خانی ئەردەڵان، ناسراو بە شرف الملک هیجران بار تۆم... یە چەندێ وەختەن هیجران بار تۆم دەروون پڕ حەسرەت، گرفتار تۆم تەن خەستەی زەلیل هەم زامدار تۆم ڕەنگ زەرد و زایف، پەی دیدار تۆم لەب وشک و ڕەنجوور، دەردەدار تۆم وێڵ و هەراسان بەژن و باڵای تۆم شێت و شەیدای عەشق، کاڵای ئاڵای تۆم لەیلێ هەی مەجنوون من مەجنوونی تۆم زڵێخای یۆسف، هەر مەمنوونی تۆم جە شیرین بەدتەر تەشنەی دین تۆم پەی تۆ گوڵئەندام، شەیدای مەدهۆشم پەی تۆ چوون بەهرام، نمەد نە دۆشم پەی تۆ سەر تا پام زەرد بییەن چوون بەی ئینتزارەنان، تەشریف باری نەی ئیرادەم کەردەن قیبلەم ئەر تۆ بەی کەرۆت پایەنداز نەی و مەی و بەی ئەروام نەمەنەن ڕۆحم بییەن پەی مەر تۆ بەو ئەنفاس عیسا، کەریم حەی سا باوەر تەشریف، دیدەم، گیانم وە سەرگەردت بۆ ڕۆحی ڕەوانم قەدەم ڕەنجە کەر، وەبان دیدەم جاڕووی جای پاتە، موژەی خەمیدەم باقی وەسەلام، هەی نوور دیدەم قەزات بە گیانم، هەی بەرگوزیدەم ++++++++++++++++++++++