شاعیر: جەفایی کتێب: دیوانی جەفایی سەرناو: ئاخ سەفا و سەیران گرۆی مەڵاڵان ئاخ سەفا و سەیران گرۆی مەڵاڵان نە مەئوای ڕەنگین بەزمەکەی ساڵان زەمزەمەش نیەن چون هەردە جاران یەقین سەرکردەی جەرگەی ئەوگاران «شەهید» مەحبووب شای شیرین جەماڵ نیەن نە حەڵقەی بەزمدا ئیمساڵ بۆ وە ئیمدادم نەسیم چون جاران دەخیلەن دێرەن دەی وەلای یاران مدارات نەبۆ لادێ جە لایێ بناڵە چون من دڵ پڕ بەڵایێ چون یاوای وە خاک پاک مەئوای یار هامفەردەکەی دەرد دڵ مەبۆ بێدار مەپەرسۆ نەسیم ناڵینت وە زار واچە چێش بیەن نەمەندەن قەرار؟ جواو دەر وە ئاه سوب هەناسەوە واچە جەفایی دڵ وە تاسەوە ئیستە ها ئانا وە زمناکۆوە مەگێڵۆ وە کاو هیجران تۆوە کاو گیرۆدەی تاق دەرد بێ دەوان یەکبارە شادی و سەفاش گشت لوان تل وەرۆ چون تل وەدەم دەردەوە ناڵەی دڵ بڵند وەی چەند فەردەوە: ئاخ وە بێ هامفەرد جەفا وەردە وێم! بە بێ دیین دۆس دڵ پڕ دەردە وێم! نەکۆی ناکامی ئەسەف بەردە وێم! شەو ڕۆ خەریک ئاه سەردە وێم! دەروون ئالوودەی زەنگ و گەردە وێم! گیر ئاوەردەی زۆر دەس چەپگەردە وێم! نە عام عالەم تەمام مەشهوورەن دڵسۆزش تۆنی کەم مەیلیت دوورەن سا دەی وەفای تۆم هەنی من پەی کەی؟ دۆعاکەم وە سۆز دەروون پەیا پەی هیممەت تەڵەب کەر جە مەیل دڵبەر پەرێ نەجاتی جەفایی بێ دەر ++++++++++++++++++++++ سەرناو: ئارامگەی قەلب قوللاب زەدەی دەور ئارامگەی قەلب قوللاب زەدەی دەور! مەیلەکەت مەرهەم جەرح سەهم جەور! سکەی نەقد عەشق دڵەی پڕ تاسەم! تەسکین سینەی ساحیب وەسواسەم! تریاقەکەی دڵ مار گەستەی دووریم! خەیاڵ خاڵت مایەی سەبووریم! دەوای عەمای عەین حاسڵ جە هیجران! نەجاتدەری دڵ جە بَیتُ الأحزان! من نەکەردم فیکر تانەی بەد ڕەقیب کەردم عەزمی دیل ئاهووی دڵفەریب جە لەومەی لائیم نەکەردم ئەندێش ئامام پەی دیار یار مۆبەت کێش تۆ خودا سا یاد کەر پەیمانەی وەرین بنمانە پەنەم ئەو چیهرەی نوورین نەک ناکا بێ تۆ سەر وە فەنا شۆ دیدەم پەی دینت دیدار ئاخر بۆ ++++++++++++++++++++++ سەرناو: ئارەزووی ئازیز وەنەم زۆر ئاوەرد ئارەزووی ئازیز وەنەم زۆر ئاوەرد جە لای وێم پەی وەسڵ حیلەسازیم کەرد نە سەر ڕاگوزەر ئەوجا شەو و ڕۆم سازان بەڵ بدیۆ وە ناڵەی بێ شۆم گوزەر کەرۆ شۆخ شیرین جەماڵم جار جارێ بەیۆ بپەرسۆ حاڵم دەروونم بادەی مەسرووری وەرۆ دڵ جە دیای ڕووش لەززەتێ بەرۆ مەزانا بەختم موساعید نییەن بەدی ئیقباڵم جە حەد بەرشیین ستارەی تاڵەم بورجش گوم کەردەن فەڵەک ناکامیم وە سەر ئاوەردەن من ئەی خەیاڵەم وە دەروون بەردەن دڵبەرم مەشرەب بێ باکی وەردەن نەسیم خەیاڵ ئەو جەمین چون گوڵ پەی گوزەر کەردەی ڕای یاگەی بوڵبوڵ هاڵای وێش مزان ئەو دەم غونچەی دڵ ئەو دڵبەر مەرام من نەکەرد حاسڵ ئەی فەرهاد نیهاد ڕەنج وە بادە وێم قەیس ئاسا دایم دڵ ناشادە وێم ناکام ڕەنگ، ناکام، نامورادە وێم جەفایی بێکەس بێ ئیمدادە وێم ++++++++++++++++++++++ سەرناو: ئازیز تیفلی دڵ ئیمشەو بێ خاوەن ئازیز تیفلی دڵ ئیمشەو بێ خاوەن زاریشەن، ئەسرین دیدەش وە تاوەن هەر سات وە سەد تەرز جێم بەهانە جۆن مونتەزیر پەی شیر شیرین مەیل تۆن ئەر نە قوببەی ساف سینەی وەسڵ تۆ نۆشا شیر مەیل شیرین بێ شۆ سا مەر ئەو تیفلە ئەوسا ساکن بۆ شاد بۆ وە تەمام ڕاحەتی گیرۆ نە بێشکەی باوەش وەش نومای ڕەنگین نەسەر دۆشەکەی زانووی پڕ تەزیین موزەییەن ڕشتەی ڕەحمەت تای دەسراز وە لایە لایەی ئاواز چون ساز بلاوانە تیفل دڵەی من دڵبەر بدەر پەنەش شیر مەیل گیان پەروەر ++++++++++++++++++++++ سەرناو: ئازیز مەر ئیمشەو نەشنەفتی سەد تەرز ئازیز مەر ئیمشەو نەشنەفتی سەد تەرز؟ ناڵەی ناقووسیم جە دڵ مبی بەرز ها ئێستە ئامان وادەی مەماتم مەر بادەی مەیلت بدۆ نەجاتم هەڵای مەسڵەحەت نییەن وەفاتم نە ئارەزووی وەسڵ پڕ جە شیفاتم جەستە و گیان و دڵ فیدای وەفاتم تەشریف بارە پەی قەزای مافاتم وە تاقی تۆنی مایەی حەیاتم های ئامان، ئامان وەختی بەراتم «بدوازەن» نە خاو ڕەقیبان غافڵ سا مەرامی دڵ من بکەر حاسڵ فرسەتەن سوبحەن نەشئەی نەسیم بەخش دڵبەری کەرەم سەهبای سەفا بەخش جە ناکا ئاما شۆخی پڕ وەفا نمانا جەمین جامی پڕ سەفا دیدە دڵەی زار خەستەی پڕ جەفا موژەش هۆرداوە جە دەوای شیفا بادەی وەسڵی وێش دا پێم وە کەفاف لەززەتێ بەردم جە نۆشای مەی ساف خەلاس بیم نە گێج بەحری مەحروومی پەوکە ویردمەن فەرد «مەعدوومی»: «های وە فەرقی دین زامداران تاج دای شەریعەت مەیلی لەیلێ ڕەواج دای» ++++++++++++++++++++++ سەرناو: ئاماوە دیسان جە نەو کۆسی دڵ ئاماوە دیسان جە نەو کۆسی دڵ نەی دەمدا دەم دا دەستەی غونچە و گوڵ ماوەران ئەو یاد جەفایی خەمبار ئەم کوڵم و ئەو فەم دۆسی وەفادار ++++++++++++++++++++++ سەرناو: ئاهوو ئاه وەردەی دیدەی مەخموورت ئاهوو، ئاه وەردەی دیدەی مەخموورت قەمەر، خجڵ بەرق جەبهەی پڕ نوورت وەفات چەنی من مەنشووری عام بی مەیلی لەیل ئاسات چەنەم تەمام بی تا وادەی وەفات، وەفات تەمام بی مەیلەکەت جەلام ئەعلای مەرام بی وەشڵە وە حاڵم مواتن یاران: ڕەقیبان حەسەد مەوردن جاران جە ناکا کاڵای بێ مەیلیت پۆشا مەی بێ وەفاییت چەنیم هەم نۆشا بۆی توڕڕەی شیفای وەبای مەوت ئەسەر جە من پەنهان دای غەزاڵەی دڵبەر ئیسە دای وە بای خەم پەرێم سەردان حەسرەت حەرارەت نە جەستەم وەردان جەی وەر بادەی وەسڵ تۆ هەر چیم وەردەن ئەی دەردە گردش پەنەم قەی کەردەن دەخیلە سا دەی وادەی ئیحسانەن شیفای ئازارم جە لات ئاسانەن فێسەکەی نەفیس یاقووتیت کەچ کەر زاهیر بۆ تەمام زوڵف بۆ عەنبەر یەخەی سوخمەی خەز خاسەی فەرەنگ کار لابەر جە سینەی سافی جیلوەدار تا جارێ ترنج سینەت عەیان بۆ نەشئەی بۆش چەنی بۆی عەنبەر بۆی تۆ پەی پەی بەیۆ پەی تۆی دەماخ و دڵ دافیع بۆ پەرێ ئەی دەرد موشکڵ جە مەمڵات وە خاس مەملوو کەر قەدەح نۆشاش زوو مبۆ وە مایەی فەرەح ساکن مبۆ تاو حەرارەتی تەن نەجاتیم مبۆ جە گردین میحەن ++++++++++++++++++++++ سەرناو: ئاهووان پەی دین دیدەت حەسرەتمەند ئاهووان پەی دین دیدەت حەسرەتمەند دڵان وە کەمەند توڕڕەی تۆ نە بەند ڕەواج دەر وە عیلم دین دڵبەری عینوان دیوان جای جیلوە گەری بێ تەرز و نەزیر نە فیرقەی پەری سای گەردەن بڵند جە گرد گەرد بەری دیسان سەنگ سەخت سەردی مەیلەکەت شیشەی شادی دڵ مۆبەت کەیلەکەت ورد ورد کەرد نەسیم سا ئیستیغناییت گەردش بەرد ئەو هەرد بێ ئاشناییت جفت کەرد پەی چێش ئەی بێ وەفائیت غافڵ کەردەی عەهد چەنی جەفاییت؟ ! گۆش مەرحەمەت مەیل لەیل ئاسات لاونای دڵان عالەم شناسات کۆن ئەوسا پەرسات نە ڕەویەی وەفا ئەحواڵ دڵەی شێخ پڕ جەفا ڕوو مەدا پەرێم هەر سات سەد سەفا مەنۆشا دەروون من بادەی شیفا منمانای پەنەم نە هەر سوبح و شام گۆنای گوڵڕەنگ جەمینت چوون جام شنەفتم ڕازان شیرین تەرز تۆ بینیم مەس وە بۆی گێسووی موشک تۆ ئاد بی موقەووی قووەت جەسەد قووت ڕاحەتی ڕۆحم جە حەد ڕەد ئێد بی سەبەب پەی نمای باڵای دڵ موستەغنیم مەکەرد جە بۆی پڕەی گوڵ مشانای جە دڵ تیر تیز ناز مامام نە دەروون سۆز بێ ئەنداز ئیستە نە ئەو مەیل، نە ئەو لاونای دڵ نە پەرسای حاڵەت، نە منمانای گوڵ نە ئەو ڕاز، نە ناز، نە ئامای ئەو بۆ سەرداوە پەرێم دەردان گرد جە نۆ خولاسە هەوای سەردی مەیل لەیل نەو گوڵ موراد دڵ جە دەردان کەیل ڕێزان وە تۆی خاک ئای بەدبەختە وێم! بوڵبوڵ بێ گوڵ، ناڵە سەختە وێم! ئای دڵ جە کاڵای شادی لوختە وێم! پەی مەزرەعەی دەرد ئەرز سەختە وێم! ئای پەی بەڵای دۆس فەرد وەختە وێم جەستەی چوون سوفتەی خەس درەختە وێم دیدەم کێ چون من دڵ تەسلیمت کەرد؟ کێ چون من جەفای هەزار ڕەنگت وەرد؟ کێ چون من چەنی ئەی گرد ئێش و دەرد چەنی عەشق تۆ گیان وە گڵ سپەرد؟ کێ چون من پەرێت تەوەللای خوێشان؟ کێ چون من وە تیر تۆ جەرگش ئێشان؟ کێ چون من پەرێت بی وە ڕسوای ناس؟ کێ «موات ئاه ئاس هەر سات مەکەرد تاس»؟ ! تۆ پاسە بێ باک من وەی ڕەنگ هیلاک وادەمان دیوان فەرد تەنیای تاک ئەم پارچە شیعری «شەهید»ە لەسەر زمانی «شاهیدی» وەڵامی «جەفایی» ئەداتەوە پەروانەی شەیدای شەمع پێشانیم قامەت خەم وە خەم ئەبرۆی کەمانیم سەودایی سەواد نوختەی خاڵەکەم هەراسان لێو لەعل ئاڵەکەم دڵ نە بەند تای گێسووی موشک بۆم عاشق وە شێوەی قەمەر بێز ڕۆم نامەی دەروون سۆز جەفا و دەرد ئامێز یاوا وە خدمەت ئاهووی زوڵف دێز هامفەردەکەی وێت «شەهید» دەردان واناوە پەرێم سەراسەر فەردان حاڵی بیم یەک یەک فەرموودەی خاست شۆر عەشق دڵ پڕ سۆز ڕاست ئەوەڵ کە خالیق مەوجوود و مەعبوود ئاوەرد نە عەدەم شێوەم ئەو وجوود وجوود دەردان چەنی وجوودت هەم گەردەن تا وەخت فەوت و نەبوودت هەنێ خەتایێ مگیر جە شێوەم ئەر تۆ لێوەنی مەجنوونی لێوەم وبعد بەو زات ئەی شێوە کەردەن ئارامش جە دڵ پەشێوت بەردەن تا عەکسی شێوەم نە تۆی جامی دڵ بێ گەرد و زەڵاڵ تۆ دارۆ مەنزڵ وە بێ مەیلی من مگیرۆ گەردێ میاوۆش سزای بەدعەهدی دەردێ وەفا چەنی من وێنەی تۆ و جەفان جەفای تۆم جەفان، سەفای تۆم سەفان هەرکا ئەو لوا مەر ئەوسا ئێد شۆ دۆعای تۆ پەی من، وەفای من پەی تۆ ++++++++++++++++++++++ سەرناو: ئەنیسەکەی عەهد عالەمی ئەلەست سەبارەت: نامەی جەفایی بۆ شەهید ئەنیسەکەی عەهد عالەمی ئەلەست دڵ وە سەهبای ساف ئاشەنایی مەست خەیلێوەن خەدەنگ موژگانی خوون ڕێز شۆخی شیرین خوو، خاڵان سۆسەن بێز ها ئامان نامان، نەدان نە جەرگم هوون بدۆ ئەو دەر پەی ڕەنگی بەرگم پەرێ مەزەی تام تیرش هیلاکم ئەر نەدۆش نە جەرگ ئەسپەردەی خاکم حەیفەن وە بێ کام جە یاران تاق بام وە بێ زام مەردەی گۆڕی فیراق بام ++++++++++++++++++++++ سەرناو: بوڵبوڵی عاشق عیشوەی گوڵ ڕوخسار سەبارەت: نامە بۆ مەفتوون بوڵبوڵی عاشق! عیشوەی گوڵ ڕوخسار! تەزەروی شەیدای سەروی باڵای یار! زامی دڵ بێ حەد، ئەسر چەم جارێ ئاهی سەحەر کێش دەردی دڵدارێ شیرین سەییادان ساحیب قەوس و تیر چەند چون ئێمەشان کەردەن وە نەخچیر کەس جە دامشان خەلاسیش نییەن مورغی دڵ پەی دان گوناشان چییەن؟ عەهدی من و تۆ و عیشق و دڵداری تەقدیری ئەزەڵ کەردەنش جاری تەوبیخ و تانەی ئێمە بێ سوودەن گۆش مەدەر وە کەس! ڕەقیب حەسوودەن ++++++++++++++++++++++ سەرناو: تا سوڵتان حۆسن تۆ نە جەلال بۆ تا سوڵتان حۆسن تۆ نە جەلال بۆ مشێو چەند چون من بەندەی مەلال بۆ تا موژە و ئەبرۆی تۆ سەهم و قەوس بۆ مشیۆ هەزارێ یاگەش فیردەوس بۆ تا نیم نیگای عەین مەستت عەیانەن مەعلوولی هەزار عاشق بەیانەن تا گۆنات چون گوڵ پڕ نەزاکەت بۆ مشیۆ چەند چون من بوڵبوڵ حاڵەت بۆ تا دەسەی گیسووی تۆ عەنبەرین بۆ تیپ پەرچەمت سەرجەم موشکین بۆ هەر کەسێ بەیۆ نە بینیش ئەو بۆ مەحاڵەن وە بۆی وەبا دەردین بۆ تا ئەو لەعلی ئاڵ یاقووت ڕەنگی تۆ بوینۆ هەر کەس دڵش پڕ هوون بۆ تا بلوور ساف بێ گەرد گەردەن تۆ پڕ شەفاف بۆ پەی جیلوە کەردەن مشیۆ چەند چون من گەردنش کەچ بۆ پەی ئیتاعەی عیشق حوسنی سیمای تۆ تا قەتارەی خاڵ وەنەوشەی وەش تەرز تۆ نەشئە بەخشۆ نەو گەردن بەرز تۆی جگەر جەرگەی دەروون پڕ خاران پڕ داخەن پەرێت شای جیلوە داران تا سەفحەی سینەت ساحیب سەفا بۆ مشیۆ سینەمان پڕ نە جەفا بۆ تا حوققەی سەدرت تازە جەلا بۆ مشیۆ حوققەی قەڵب من پڕ بەڵا بۆ تا باڵای ئاڵات بێ خەم بنمانی چارەش هەر خەمەن سەرو بوستانی پەی قەد و قامەت شۆڕش ئەنگێزت پەی توڕڕەی شەوڕەنگ بۆی ناف ئامێزت پەی دیدەی دیدەی ئاهووان بێزت پەی بادەی خەمبەر بەزم دڵخێزت چەند هەزار چون من خەمیدەی خەمەن چەن کەس وێنەی من دەروون پڕ تەمەن ++++++++++++++++++++++ سەرناو: تۆی مەشامی دڵ تۆی مەشامی دڵ... کەیلەن وە بۆیێ تۆی مەشامی دڵ چ بۆ؟ بۆی عەتر گوڵان پێش خجڵ نەی دەمدا مەیۆ نەی مەئوا و مەنزڵ پاسە تەئسیرێ پەرێم کەرد حاسڵ نە عەتری عەبیر، نە نەرگس، نە گوڵ نە بۆی ڕیاحین نە بۆی وەرکەمەر وەی تەورە جە من نەکەردەن ئەسەر مواچی مەئوای ئاهووی خەتائین جای سەفان پەرێ غەزاڵەی موشکین یەقینەن مەئوای سەفای دڵبەرەن گوزەرگەی قەدیم پەری پەیکەرەن بۆ وە تۆی دەماخ دڵەی جەفایی مەستەن وە بۆی ناف پڕ جە شیفایی یە سارای خۆتەن وەناف ئاواشەن میرغوزار ناز چرا مەئواشەن جای ئیزهار مەیل لەیلێ تەرزشەن یاگەی نمانای باڵای بەرزشەن مەحەلل جیلوەی جەبهەی جامشەن شوعلەی شەفەق سای سوبح و شامشەن چێگە بی چەند جار بەو جەماڵەوە گوڵچیهرەش نەسای سیا ماڵەوە منمانا چەنی چون شەمس ئەنوەر نە تۆی سوبحەوە شۆخ جیلوەگەر جەو مەکانەدا بەو تیر بەو کەمان چەند گیان وە فیردەوس کەردەن شادمان جەو سەر عەینە وێش منمانا عەیان شەوق مەداوە چون زیای نەو بەیان نەو سەر نەهرە بی نە نەو وەهاردا نوورین مەکەرد وێش نە گرد نەهاردا نەی گوڵشەن گوڵاوپاشی وێش مەکەرد پەری پیاڵەی حەسرەتش موەرد لەتیفی ئەندام نەزیف بێ گەرد جە خوتتەی خەیاڵ خاسان گرد مویەرد چۆگە وە ڕازان نەبات ئامێزش چەنی بادەی مەیل بەزمی دڵخێزش مەزاقی زومڕەی عاشقان سەرجەم شیرین کەردەوە گشت مەست و بێ خەم نازوون بەو دڵبەر ئەوسافش ئێدەن زاتش جە ئافات دوور بۆ، ئومێدەن! نە هەر جا جارێ کەردەبۆ زوهوور عەکسش باقییەن تا وە نەفخی سوور دڵبەرێ وەی تەور جیلوە نما بۆ مشیۆ من بێ ئەو چێشم تەما بۆ؟ ئەرنە جیاییش لەززەتێ بەرم دەک وە جەوری دەور فانی بۆ سەرم ئەر ڕەزا وە تیر موژەی ئەو نەبام بپێکۆ جەرگم نە گرد سوبح و شام ئەجزای تەن وە تیر قەزای بێ بەها پارە پارە بۆ تا وە ئینتیها ++++++++++++++++++++++ سەرناو: تێخ دووری دۆس جگەر تۆ کەردە سەبارەت: نامە بۆ مەفتوون تێخ دووری دۆس جگەر تۆ کەردە هووناو زامان ڕیشەی دڵ بەردە تەن لەت لەت وە سەیف ئەبرۆی ئەو دڵبەر پێکیای پەیکان موژەی دڵ پەیکەر «مەفتوون»ی مەعلوول عەین نەرگس بێز مەحبووس زنجیر توڕڕەی موشک ڕێز سەد هەزار حەسرەت پەی دڵ ئەوگاریت ئاه سەرد و دەرد پەی زام کاریت ئوستاد تەعلیم سەرمەدرەسەی عەشق نە تەدبیر دەرد ئەوگاران پڕ مەشق مەر نەوات سەییاد تێخ و تیر وە دەس: دەخیل جە دەسش خەلاس مەبۆ کەس مەکەرە گوزەر وە مەئوای ئەودا چون دڵان جە لاش هان نە گرەودا مەر نەدیت پەرێ غەزاڵەی موشکین چەند ڕێزام وەتاو جە دیدە ئەسرین کەردم وە نیشان دڵ پەرێ تیرش سەر کەرد هوون چون سەیل نە جای تەئسیرش ئیسە چەم بێ نوور دڵ زەدەی پڕ زام سیوای ئێش و نێش نەیاوام وە کام نەجاتت جەی دەرد ئەر هەن تەمەننا بەڵ چون جەفایی نەشی وە فەنا هاڵای حوسن ڕووی دیدەی دڵڕێشان وە سەفحەی دڵدا سوورەت نەکێشان چون تەبع کیتاب عەشق دڵداران وێت لادەر نە بەزم پەری ڕوخساران وەرنە جەو دما جە دەس سیاسەت قەتعەن خەلاسیت تا ڕۆی قیامەت ++++++++++++++++++++++ سەرناو: تەن وە بەرگی وەسڵ دڵئارام مەلفووف تەن وە بەرگی وەسڵ دڵئارام مەلفووف دڵ وە سەهی سەرو قامەتش مەئلووف دەروون مەستی جام سەبووحی سوحبەت مەدهۆشی نۆشای «شاهیدی» شەربەت بۆ وە دیدەنم بدیە زەلیلیم ئاماتەن مایەی دەفع عەلیلیم ڕاسەن سەعبەن فەسڵ وەسڵی هامسەران بێ سامانەن دەرد دووری دڵبەران سەنگ وە سەختی سەبر فیراق نەدارۆ دڵ چەنی چەنی سزاش مویارۆ بەڵام دووبارەی وەسڵش مەئموولەن دڵ وە یادش شاد کەمتەر مەلوولەن ++++++++++++++++++++++ سەرناو: جەیرانەی یانەی دڵەی پڕ بەینەت جەیرانەی یانەی دڵەی پڕ بەینەت ئامشۆ کەردەن پێشدا یەند مەینەت تەخت زەمینش هۆر کنیان سەرجەم دیوارش ڕووکەش کەردەن گەرد غەم سەقفش ئالوودەی دووی ئاهەن پەرێت بۆ تەزێینش دەر وێنەی یانەی وێت ئاوش مەی مەیلت خاکش دوردی دەی بناوە یانەم بەو دوردی بەو مەی ئامێزش جە میسک گێسووی سیاڕەنگ بەڵ موعەتتەر بۆ یانەی دڵ قەشەنگ ++++++++++++++++++++++ سەرناو: خێڵخانەی شادیم دیسان سەرداوە خێڵخانەی شادیم دیسان سەرداوە نە وادی دەروون خێمەش هۆرداوە حەیاتی ڕەفتەم عەودەت کەردەوە دڵبەرم تەشریف خەیر ئاوردەوە قدوومت وەخەیر دۆس وەفادار وەسەر گەردت بۆ جەفایی ئەوگار چون لووای لووا، نووری دیدەکەم ئاماوە ئامای بەرگوزیدەکەم نەمابێ تێشدا شۆڕش شار دڵ نەمەندە بی زەوق قەدیمی بوڵبوڵ عەودەتت جە سەیر شۆخ جەمین جام! ئاوا کەردەوە شاری دڵ تەمام تازە خێزاوە بەزمەکەی بوڵبوڵ چون شاد بی وە عەتر تۆی پڕەی نەو گوڵ ساقی گرد ئەساس بەزم دڵ جەمەن بەڵام پیاڵەی پڕ مەی نۆش کەمەن وادەی مەی نۆشای ئەرباب خەمەن دەورێ دەر نە تۆی حەلقەی ئەنجومەن بادەکەی سافت پەی دڵ مەرهەمەن پەی پەی بماڵۆ جە دڵ چی تەمەن ++++++++++++++++++++++ سەرناو: خەیلێ بی خەیلێ دڵ جە خەم کەیل بێ خەیلێ بی خەیلێ، دڵ جە خەم کەیل بی نە تاسەی خەدەنگ موژگانی لەیل بی لوام ئەو حوزوور نیگای سەر دەلیل خەدەنگ ئەرزان کەرد، پەی دڵەی عەلیل فیدای نیگات بام غەزاڵەی موشکین تەئسیری تیرت دا وە دڵ تەسکین ++++++++++++++++++++++ سەرناو: خەیلێ بێ مایەی دەروون وێران بیم خەیلێ بێ مایەی دەروون وێران بیم خاڵی جە ئەسباب سەفا و حەیران بیم کەپر خەم ئەساس وجوودم بەتاڵ جە بادەی خەمبەر وەسڵ مەه جەماڵ دڵەی مەنزڵگەی بەزم شادی و شەوق چۆڵ بی نە سەرجەم ئەو بەزم و ئەو زەوق ناگا فەرەح کەرد دق الباب دڵ داخڵ بی شادان بەو قەدیم مەنزڵ چون تەشریف ئاورد ئاهووی سەر دەلیل وە عەزم دیدەن ئەی وە دەرد زەلیل ئاوا کەردەوە یانەی وێرانە تازە هۆناوە ڕشتەی پەیمانە ئەجزای وجوودم مەزەی وەسڵش چەشت دیدەم وە سورمەی گەرد پاڵاش ڕەشت نەزم بەزم زەوق دەروون دا تەزیین فیدای وەفات بام غەزاڵەی موشکین! ++++++++++++++++++++++ سەرناو: دڵ ئەی لەیلە کەیل هەوای لەیلش بی دڵ ئەی لەیلە کەیل هەوای لەیلش بی ئارەزووی بادەی وەسڵ و مەیلش بی تۆی دەروون وە تەم خەمان تەمام کەیل هوونی زامی تۆی جگەر وێنەی سەیل جە ناکا جە وەخت سوبحدا دڵبەر چون غوڕڕەی سەباح پێشانی ئەنوەر نمانا، عاڵەم پڕ جە زیا کەرد پەی تەسکینی دڵ من تەشریف ئاوەرد وە شنۆی ڕازان شەکەر ڕێزەکەش وە نەشئەی بۆی زوڵف موشک بێزەکەش دەفع تام تاڵ کام دڵم کەرد گەرد دەردێ تۆی بینی تەمام کەرد دەروونم بادەی وەسڵش نۆشاوە لیباس مەستیش دیسان پۆشاوە دڵ وەتەمامی خاڵی بی جە خەم زام تۆی جگەر یاوا وە مەرهەم ++++++++++++++++++++++ سەرناو: دڵ زەدەی قولاب موژەی نەوهاڵان سەبارەت: نامە بۆ مەفتوون دڵ زەدەی قولاب موژەی نەوهاڵان! مەفتوونی فەتتان فەیرۆزە خاڵان! مەدهۆش مۆبەت ئەبرۆ هیلالان موبتەلای باڵای وەش نەونیهالان دەروون پڕ سەودای ساحێب کەماڵان تۆی جگەر پەرداخ شیرین جەماڵان بێ خەبەر جە حاڵ دەروون مەلاڵان نەشنەفتەنی... شای نازک خەیاڵان نەی دەمدا فەڵەک چ کەیدێ کاڵان؟ دەوڵەت شادیم چون بەرد وە تاڵان؟ چون دیا کەیلەن دەماخ بوڵبوڵ نەتۆی باخچەی وەسڵ وە عەتر ئەو گوڵ ڕوودا وە هەمدا قین ئاوردەوە بوڵبوڵ جە بۆی گوڵ جیا کەردەوە وەعەترش مەشام بێگانان کەرد شاد ڕەنج تەمامی بوڵبوڵ دا وەباد یانێ سەر دەلیل موشکین غەزاڵان دۆسەکەی ڕەئیس شیرین خیساڵان جە من جیا کەرد وە دڵ دا ناڵان ئەی دووی جیاییش نەسینەم باڵان والحاصل ئەسباب سەفەر دا تەرتیب تەشریف بەرد وە خەیر ئاهووی دڵفریب ئەو بەزم و ئەو زەوق، ئەو سەیر، ئەو سەفا ئەو مەیل و ئەو وەسڵ، دۆس پڕ وەفا مەعلووم بی جە لات دیت وە چەم چەپگەرد هەر سەرنگوون بۆ گرد وە فەنا بەرد ئیسە جەفایی وە سەد دەردەوە وێڵ وێڵ مەگێڵۆ وەسەر هەردەوە دایم دڵ وە ئاه سەختی سەردەوە مناڵۆ نەی تەرز وەی چەند فەردەوە: ئای وە دەرد هیجر دڵ ئەوگارە وێم مەحرووم باڵای ئاڵای یارە وێم سفتەی بڵێسەی کورەی نارە وێم بێ سەبر و ئارام، بێ قەرارە وێم عەندەلیب دوور جە گوڵزارە وێم شەو و ڕۆ خەریک ناڵە و زارە وێم تۆی جگەر وە تێغ دووری پارە وێم دائیما دەروون پڕ پەژارە وێم بینی دڵ پڕ گەرد زوکام بارە وێم مەهجوور بۆی ناف وەش تەتارە وێم دیدە وە بێ دین دیدە تارە وێم جە گیان شیرین وێم بێزارە وێم گیرۆدەی گەردوون دوون کردارە وێم پڕ ئازار چەرخ کەچ ڕەفتارە وێم ئومێدم ئێدەن «مەفتوون» مەحزوون دۆعای دووبارەی وەسڵ ئەی زەبوون باوەری وەسۆز دەروون وە کامدا ویردت بۆ نەوەخت گرد سوبح و شامدا بەڵ ئەر ستارەی بەختم تلووع کەرد شوعلە دا نە ڕووی دەروون پڕ دەرد زوو عەودەت کەرۆ ئاهووی دیدە مەس زەیل جامەی وەسڵ ئەو بارۆم وە دەس خەلاس بام جە ئێش دەرد مەهجووری جە سەختی سزای پێچ ڕای دووری ++++++++++++++++++++++ سەرناو: دڵ سێراوی مەیل پەری پەیکەران سەبارەت: نامەی جەفایی بۆ شەهید دڵ سێراوی مەیل پەری پەیکەران ئەجزای تەن تێکەڵ عیشقی دڵبەران مەستی بادەی وەسڵ زومرەی ئازیزان سەر حەڵقەی فیرقەی ساحیب تەمیزان مەقدەمت وە خەیر دوور جە ڕەقیبان هەمیشە دەر وەسڵ باڵای حەبیبان چەنی جەیرانان چون لووای وە خەیر یانێ تەشریفت بەرد وە سەفا و سەیر من وەجا مەندم دەروون پڕ جە خەم مەحرووم بۆی ناف سەر دەلیل ڕەم وە هەر دانەدا وە بێ هاوسەردان! موانام ئەی فەرد وێڵ و سەرگەردان: «ئای وە بێ یاران سەرگەردانە وێم مەحروومی سەیران هامفەردانە وێم» تەشریف خەیرت چون ئاوردەوە وڵات دڵان ئاوا کەردەوە وبعد دیدەم! سوحبەت گوڵان پاسە ئاسان نین پەرێ بوڵبوڵان کێ وەدەس ئاورد گوڵ بێ نێش خار واسڵ وە مەقسوود کێ بی بێ ئازار پەوکە پێکیان پای دڵت وە پەیکان موژگان مەحبووب شۆخ وەش پەیمان کەفارەتت بۆ دۆسی وەش ڕەفتار بویەر جە نامای جەفایی خەمبار چون تا ئاسانەت جە سەد جا ڕەقیب جە مەیلی یاران ببۆ بێ نەسیب مگیرۆم دامان جە گرد سەگ بەدتەر نمازۆم وە لای «شەهید» دڵبەر ++++++++++++++++++++++ سەرناو: دڵ وە بەرگی دەرد سەراسەر مەلفووف سەبارەت: نامە بۆ شەهید دڵ وە بەرگی دەرد سەراسەر مەلفووف دەروون پڕ نە پێچ وە مەینەت مەئلووف ئیمشەو جەفایی خەستەی دڵ مەلهووف دایم وە ئەلەم وە جەفا مەوسووف شەرح حاڵ تۆش جە لا بی مەکشووف زیاد کەرد ئازار بێ دەوای مەخووف خورشیدی نەهار شادیم کەرد کوسووف بەدر شەو و شەوق دڵ شی وە خوسووف چون دیم بڵیسەی ناری جەستەی تۆ پێچ دووی سیای دەروونت بێ شۆ گۆیا ئەو مەحبووب وە ناز پەروەردە ئەو جەستەی نازک پاک چون وەردە خودا نەخواستە ئێش پەشێوش کەردەن ئازارش نارش جە ئەندام بەردەن دەک فەڵەک دایم هەر سەرنگوون بای نەیاوی وە کام هەر سەرنگوون بای پەی چێش نەی دەمدا ئەی کەیدە کەردی ژار دەرد وە دڵ عاشقان وەردی؟ اما سمعت صاحب الولاء: الصدقة تدفع البلاء؟ مشیا هۆر بدای وەش بانگ و سەڵا ئەولای عاشقان دەروون پڕ بەڵا جەستەی گیان و دڵ، وێت و ئەوگاران بکەردان وە فیدای شای جیلوەداران شەو و ڕۆ شیفای ئەو شیرین نەسەق مەتلووبەن جە لوتف خەللاق موتڵەق بەڵ «شەهید» عەشق ئەو پەری پەیکەر دڵش ڕەها بۆ نەی بەند خەتەر ++++++++++++++++++++++ سەرناو: دڵ کەتیف بەستەی فەڕەنگەکەی خەم دڵ کەتیف بەستەی فەڕەنگەکەی خەم! دەستی شادی چەسپ کەلەپچەی ستەم! وەردەی گیرۆدەی تەریدەی فیراق! تەن سفتەی سەمووم گەرمی ئیشتیاق! إِنَّ مَعَ الْعُسْر، یُسْرا نەدیەنی؟ ! سەیدی قەیدی غەم هەر تۆ نەبیەنی فریاد کەر ئەو سۆز سوڵتانی عوششاق نەجاتت بدۆ جە جەردەی فیراق تەرتیب دۆ سوپای هەناسەی سوب دەم دۆعا و ناڵەی ئاه سەف تەفرەقەی غەم بەڵ پەرێ لوای مەئوای موبارەک پەی وەسڵی دڵبەر جەم بۆ تەدارەک ++++++++++++++++++++++ سەرناو: دڵکێشی جەرگەی جگەر سەد پاران دڵکێشی جەرگەی جگەر سەد پاران! دڵسۆزی غەمخوار خاتر پڕ خاران! سەییادی پڕ زۆر ساحیب سەهم و سام! کوشندەی دڵان چون ئاهووی خەرام! بەڵەد نە گردین کۆساران عەشق! شارەزای ئازار خەمباران عەشق! شنەفتم جە ڕووی ئیلتیفاتەوە بەو لەفز شیرین وەش ئەداتەوە پەرسابێت ئەحواڵ دڵ وە خەم زەلیل کەو چون بۆ جە عەشق ئاهووی سەردەلیل خەستەکەی خەمان وە دەرد پەروەردە زووخاو زامان نە دڵ سەر کەردە نمەز چێش واچۆ حاڵش چەنی بۆ ئەر هەر تەورێ بۆ مەخفی نین جە تۆ تەفسیل ئەحواڵ دەخیلەن سەر خێڵ دا پەرسە سیروان لێوەی دەروون لێڵ بدیە وە لێڵیش وە ناڵەی زارش لادێ جە لایێ نیەن قەرارش ئانە عەکس من وەنەش دان یەقین چەنی پەرسانت جەفایی چەنین؟ ++++++++++++++++++++++ سەرناو: دڵە دەی نەخاو خەفەت بێدار بەر دڵە، دەی نەخاو خەفەت بێدار بەر جەفایی سا باڵ چەمانت هۆر دەر بدیە ها ئانا شۆخی جیلوە گەر ئاما ژەرەژ تەور پا منیۆ ئەو بەر ئیرادەش ئێدەن بکەرۆ گوزەر ڕەقیبان جە حاڵ ئێمە بێ خەبەر نەی وەخت فێنک وادەی سوب سەحەر فرسەتەن جە وەسڵ دڵبەر نەسیب بەر دوو دیدەت وە دین دیدەش ڕۆشن کەر مەشام پڕ جە بۆی زوڵف بۆ عەنبەر دەخیلەن دێرەن غەزاڵەی دڵبەر پیاڵەی پڕ مەی وەسڵت پەنەم دەر جە نۆشای شیرین شەراب خەم بەر بەڵ خێزۆ جە دڵ سۆزی پڕ ئەسەر تا بەو سۆزەوە ئازاد جە خەتەر ویردی سوبحم بۆ فەردێ وەش سەمەر: «های ستارەی بەخت من ئاوەرد سەر نە تۆی بورجی مەیل لەیلی شیفادەر» ++++++++++++++++++++++ سەرناو: دیدەی دڵ و سەر جەفایی دڵ ڕێش دیدەی دڵ و سەر جەفایی دڵ ڕێش ئیمشەو گل مدا چەنی ئێش و نێش دیسان حەسادەت چەرخ چەپ ئەندێش کەو چێشش وە دڵ ئاوەردەن پەرێش بەڵێ شنەفتم شۆخی وەفا کێش دەردش گشت وە گیان شێخی جەفاکێش! دیدەکەی مەستش دڵ خەستە بی پێش خودا نەکەردە پێش دا ئامان ئێش نە توور کۆی توور نوور جەماڵت سۆزان کۆی دڵەی دەروون مەڵاڵت تۆی دەروون ئاوان دەردم وەس ئاوان وە بازووی ئازار خاس دڵ بساوان ئاخر چون جیلوەی شیفا بەخش وێت وەنەش دان مەبۆ شیفا بۆ پەرێت دیدەم، دیدەکەت پەنەش سورمە کێش بەڵ دیدەی منیش خەلاس بۆ جە ئێش ++++++++++++++++++++++ سەرناو: دەخیلەن شەماڵ دەخیلەن شەماڵ... دەسم دامانت دەخیلەن شەماڵ مەزانی هیجران شای موشکین غەزاڵ مەزاق عەیشم چەنی کردەن تاڵ سەف سەف سوپای خەم یاوان وە کەماڵ شکاوان لەشکەر سەفا و وەشی حاڵ شەوقم تەفرەقەن، شادیم نە زەواڵ کەیفم بێ کەفاف، سەیرانم بەتاڵ بۆ وە لامەوە، تەفسیل ئەحواڵ جەفایی پڕ جەور جگەر پڕ مەڵاڵ بەرەش وە خدمەت شای شیرین جەماڵ هیچ مەکەر تامڵ وەش بشۆ بناڵ وەختێ وە مەئوای شۆخ سۆسەن خاڵ یاوای مەوینی دۆس وەش خیساڵ ئانا نە جەرگەی شیرین نیگاران منمانۆ چون بەدر چەنی ستاران بەو جەلای جەمین بێ میسالەوە بەو باڵای ئاڵای نەو نیهالەوە بەو ئەبرۆی پەیوەست چون هیلالەوە بەو گۆنای لەتیف وێنەی لالەوە بەو نەشئەی نیگای عەین مەستەوە بەو شنۆی شەوبۆی زوڵف دەستەوە بەو مینای گەردەن پڕ جە خاڵەوە بەو عیشوەی شیرین بەو کەماڵەوە بەو کاڵای قەشەنگ ساحیب بەهاوە بەو جیلوەی جەماڵ بێ ئینتیهاوە منمانۆ پەنەت پێشانی پڕ نوور پا بنیەر ئەو پێش عاقڵان دەستوور وە تەمکین تەنخوای جەفایی خەمین نە وەر ئاسانەش بۆسە دەر زەمین مەپەرسۆ: دیسان شەماڵ چێش بیەن؟ پەی چی وەی تەورە ئارامت نیەن؟ واچە ئەو تاڵاو خەمان نۆش کەردە نە سەر کۆی هیجران تۆ گیر ئاوەردە دیم دڵ وە جامەی ئاه سەردەوە دەروون وە نامەی پێچ دەردەوە نویسیان مەکتووب پڕ سۆز و ئەسەر مەختووم وە خاتەم داغ تۆی جگەر ئەر تەسدیع نیەن غەزاڵەی دڵبەر بوانوون پەرێت نامەی خەم سەمەر: وە مایەی حەیات جەستەی خەستەکەم دەوایی دڵەی دەردان گەستەکەم «بعد» وە باڵای سەرو بێ خەمت! وە نەشئەی شکەنج پێچ پەرچەمت! تەنخوای قەهقەهەی دڵوەشی و سەفام شینمەن ناشاد گیرۆدەی جەفام سەموومەن پەرێم شنۆی وەرکاوان چون حەمیمەن ئاو سەرد سەرئاوان بۆی چنور زیاد کەرۆ زوکامم سوودێ نەدارۆ پەرێ مەشامم وەلحاسڵ وەیشووم شوومیم گێج وەردەن گوڵشەنەن شادیم پەژموردە کەردەن بێ حەد بێ دەماخ دڵ بێ قەرارم جە زیندەگی وێم تەمام بێزارم مەر نەشئەی شنۆی هەوای وەسڵ تۆ نەی سەروەختەدا پەرێم زاهیر بۆ وەرنە زاهیرەن قەتعەن نەجاتم نەمەندەن نە دڵ تەمای حەیاتم ++++++++++++++++++++++ سەرناو: دەروون جە لەززەت وەسڵی دڵبەر دوور دەروون جە لەززەت وەسڵی دڵبەر دوور کامی دڵ جە تام حەلاوەت مەهجوور وەردەی مەوەددەت گەورەی شازادان گیر ئاوەردەی دام شیرین سەییادان ستەمدیدەی عەشق سەرداری خاسان زەدەی شەستی دەست شای دڵ شناسان مەنفی کەردەی کین چەرخی بێ ئینساف جە ئەملاک مەیل مەلەک زادەی جاف «مەحرووم» جە مەقام موشاهەدەی یار مەئیوس گوفتار حەلاوەت ئاسار دڵ گوزەرگەی گەشت زەوار حەسرەت تەن جیسر مەعبەر ئەحشام مەینەت مەسکوون کووچەی شار مەسائیب تیجار بازاڕ بەڵای عەجائیب ئیستە بەرق شەمس پێشانی شیرین نوور مەهچیهرەی شۆخ نازەنین مەستی بێ سامان عەین مەخموورش سفیدی گەردەن نوورین بلوورش ئاد جە ئاهووان سەرجەم باج سەندە ئێد جە سفیدی عاج خەراج سەندە نە وێنەی ئەوسان دیدەی تۆ دیەن جیلوەی دڵبەرش جە حەد بەرشیەن هەر سات وە تەرزێ جیلوە منمانۆ گیان و دڵ جە گرد عاشقان سانۆ چەند کەس گیرۆدەی ئیشارەتێوەن؟ چەند هەزار بەندەی عیبارەتێوەن؟ چەند وێنەی خەسرەو وەردەی مۆبەتەن؟ داخ وە گڵ بەردەی شیرین شەربەتەن چەند کەمەر بەستەی خدمەت چون «بەهرام» گرتەن ئاسانەی شۆخی «گوڵ ئەندام» شوعلەی جیلوەی ناز شەهزادە ئاساش شیرینی عیشوەی ناسان شناساش گاهێ تەن نە تۆی ئەلبیسەی غەزەب نە سەر قەهر قەتڵ عاشقان عەجەب گاهێ نە سەر تەخت ئیستیغنا نیشتە جەلاد موژگان هەزاران کوشتە گاهێ بێ مەیلیش کەرۆ ئیشارەت پەی سەفای دڵان جەریمە و غارەت گا خەڵاتی مەیل کەرۆ حەواڵە بەر مشۆ جە ویر جەفای سەد ساڵە گا نە حەلقەی بەزم جەرگەی ئەهلی دڵ مەیل ساقی قەسر وەش سەفا و مەنزڵ بەرخێزۆ وە ناز وە سەد مەیلەوە دەس وە پیاڵەی جە مەی کەیلەوە وە مەیخواراندا مەی دەورە دەرۆ تەئسیری بادەش گردین مەس کەرۆ سیوای تۆ مەحزوون وەم دەرد پەروەردە «ئەڵوەند» خەم بێخ سەفای دڵ بەردە پەرێ مەحروومیت جە بەزم یاران خەم خەفەت حەسرەت شای دڵ ئەوگاران کەو حاڵت نە هیجر شای شیرین جەماڵ چۆن بۆ نەی دەمدا وێڵ و دڵ مەڵاڵ؟ ++++++++++++++++++++++ سەرناو: دەروێش شەمع شەوق شادی هامفەردان دەروێش! شەمعی شەوق شادی هامفەردان کوشیانەوە شی سەفای هامدەردان موغەننی! غەم جەم، جەرگمان ماتەم نەیچی! چین چینەن گەرد دڵ وە خەم موتریب! بێ تەرەب بێ زەوقەن یاران خسووس جەفایی عەشقی نیگاران دەف و نەغمەی نەی، سازی شیرین نەزم یاوەر وەی مەیدان پەرێ عەزمی بەزم کزەی هەر تەرزێ تەئسیرێ کەرۆ هەر نەفەس سۆزێ وە دەروون دەرۆ کوورەی ڕەحم مەیل ساقی جۆش ئارۆ بادەی بەزم خێز وە مەجلیس بارۆ ساقی بەو سەهبای ساف وەش ئەسەر نە حەڵقەی مەجلیس یاران دەورە دەر پەیاپەی جەو مەی بڕێز وە دڵدا خسووس وە تۆی دڵ سەودا کامڵدا چون خەیلێن دەردین خەفەت نە جەرگەن گیرۆدەی نێشەن نزیک وە مەرگەن بەڵ دەروونش مەست بادەی ساقی بۆ دایم مەزەی مەی نە دڵ باقی بۆ بنیشۆ بەو دڵ جە مەی مەستەوە بەو دەروون ساف جە خەم ڕەستەوە جیلوەی دڵبەرش بە دڵ بمانۆ چەنی مەیخواران ئەی فەردە وانۆ: فیدات بام ساقی دڵ جە خەم ئازاد تەئسیری بادەت جەفایی کەرد شاد ++++++++++++++++++++++ سەرناو: زەدەی چووبی جەور دەوران گەردوون سەبارەت: نامەی جەفایی بۆ شەهید زەدەی چووبی جەور دەورانی گەردوون! مەسائب نەسیب، خەم جە حەد بیروون! جەفا کێشی ئێش، عەشقی شەم ڕۆخسار! ئەلەم وەردەی زەخم سەهمی سەهمدار! جە مەئوای دڵبەر وێڵ و دەربەدەر! شێری گەردن کەچ پەی قەزا و قەدەر! نە ڕای عەشقدا ڕسوای عام و خاس! سەودا بێ سامان «شەهید» وە ڕاس! دانائی تەنیای بێ هەمتای جەلیل کافیەن پەی سیدق عەرزەی ئەی عەلیل گیان تۆم جە گیان وێم موقەددەمەن هەر چێو بواچوون جە دۆسیت کەمەن جە ئازارت دەرد وێم جە ویر شیەن حەسرەتم پەرێت سامانش نیەن مەوتم جەی حەیات وەشتەرەن جە لا وەی تەورە هامفەرد بیەن موبتەلا جە ناڵەم نفوور ڕۆ وەحشی مەغموور جە زاریم بێزار شەو ئەهل مەعموور ڕەفێقان پەرێت گردین خاتر ڕێش دۆستان جە دووریت یەکسەر حەسرەتکێش خسووسەن مەحبووب شۆخ شێوە شەم نەک وێنەی ئاهووی سەر دەلیل ڕەم جەفایی چەنی فیرقەی دڵبەران هەر یەک وە تەرزێ غەم پەرێت وەران ئاد ماچۆ: ئای پەی مەجنوون ڕەختەکەم! سەد حەسرەت پەرێ فەرهاد بەختەکەم! ئێد ماچۆ: پەرێ جگەر گۆشەم داد! پەی فەرزەندەکەی فەرزانەم فەریاد ئاه سینەی من چەنی گرد نەفەس بەر مەیۆ پەرێت «شەهید»ی بێ کەس چەمەری هیجران چەتر فەرقمەن دەریای بێ پەی غەم مەئوای غەرقمەن دائیم ویردمەن دوو فەردەکەی تۆ دوو فەرد مەدلوول بێ گەردەکەی تۆ: «هانا هەی ئەجەل یە کار کەردەن» «هەرچی هەن گۆنای منت وە گەردەن» «ئەر نەی نەی سەروەخت خەمان ئەرزانی» «نیم ئەروای سەر سەخت جە من بسانی» ++++++++++++++++++++++ سەرناو: ساقی فەقری من چەنی غینای تۆ ساقی فەقری من چەنی غینای تۆ کەی ڕەوای حەقەن؟ گیانم فیدات بۆ! مەر نەبێ جە بەین عەهد و پەیمانێ؟ پەیمان شکاوای نەدات پەیمانێ پەرێ عاشقان فرێن پەیمانە جە لوتف تۆوە بەڵام پەیمانە سا با بێ نە بەین جە نەو پەیمانە چون فەنای حەیات پەی نە پەیمانە پەری پەیکەر پاک پەی و پەیمانە پەیمانە پێمان بدەر پەیمانە جیلوەی جەمینت پەنەم بنمانە ئارەزووی ئەغیار وەنەم بسانە ++++++++++++++++++++++ سەرناو: ساقی مینای جام دڵ وە سیا ژەنگ ساقی مینای جام دڵ وە سیا ژەنگ جەفا ئالوودەن بێ سۆزەن چون سەنگ دەخیلەن ڕەحمێ مەیێ یاقووت ڕەنگ نە تۆی پیاڵەی پڕ سەفا و قەشەنگ کەرەم کەر وەش وەش بنۆشوو بێ نەنگ مەخسەڵ دەر وە جام دڵەی وە خەم تەنگ سۆز بێ ئەنداز دەروون پەیدا بۆ تەئسیر ناڵەی دڵ هووەیدا بۆ بشوون وە سەرین «شەهید» بێکەس هەڵای مەندەنش کەمێ نیم نەفەس نە سینەی پڕ سۆز جەلای مەینەت گاز وەی چەند فەردەوە هۆردەروون ئاواز: هامفەرد، ڕیشەی ڕۆحم تان و پۆ بەند تای ڕشتەی ڕیشەی ڕۆح تۆ گۆش دەر وە یاسین شیفای مەیل ئاوەر ئەمجار زات پاک دڵبەر وە یاد کەر نەفیی ماسیوای ئەو وە لەفزی «لا» ئیسباتی مەحبووب وە حەرفی «الا» وە تەریقی سیدق وە سۆزی جگەر وە لەفزی شیرین وێتە دا باوەر جە دمای ئەدای شەهادەت وەی تەرز جیلوەی نوور زات جە دڵ مەبۆ بەرز ئیمان عەشقت ئەو دەم کامڵەن خەلاسیت جە دەس ڕەقیب حاسڵەن سەر وەخت ئاخر یەکجاری لووات جَنّة المَاوىٰ مەبۆ وە مەئوات ++++++++++++++++++++++ سەرناو: ساقی چون دەمێن دوور جە بادەتم ساقی! چون دەمێن دوور جە بادەتم زەدەی جەفای دەهر پڕ حەسادەتم جامی دڵ وە گەرد هیجرت مەستوورەن موحتاج وە سەیقەل بادەی پڕ نوورەن کەرەم کەر پەنەم پیاڵەی پڕ مەی بەڵ مەخسەڵ دەرۆ دڵەی پڕ جە مەی ++++++++++++++++++++++ سەرناو: سیروان سەرعی سەودای نیگاران سیروانی سەرعی، سەودای نیگاران! دێوانەی دەردین دیدە خەمباران! لێوەی دەروون لێڵ، وێڵی نازاران! شارەزای شاڕای عەشقی دڵداران! گوزەرگای گرۆی ئاهوو ڕەفتاران! شەیدای غەمگوسار کریشمەداران ئاهووی سەر دەلیل سپی تەتاران ها کەردەن هەوای سەیر کۆساران ڕاسەن شۆر عەشق یار جیلوەدار جە دەستت وەردان ڕشتەی ئیختیار بەڵام جە تەقدیر باریی کەرەمدار بیت وە گوزەرگای شۆخان نازار ڕجام هەن جە لات لادێ تامڵ کەر تا گوزەر کەرۆ غەزاڵەی دڵبەر نازک ئەندامیش چون جە حەد ڕەدەن مەعلوومەن جە لات تەسدیعش بەدەن ++++++++++++++++++++++ سەرناو: سەر حەڵقەی فیرقەی مەعشووقان یەکسەر سەر حەڵقەی فیرقەی مەعشووقان یەکسەر تەجدید کەردەی شەرع «شاهید»ی ئەنوەر ئەر سەد وە خیلاف شەرعی مەنسووبم وە ئەهل خەتا و تەقسیر مەحسووبم لایەق پەی دۆزەخ بێ مەیلی یارم تا سزا پەی وەسڵ دار القرارم بەڵام پەرێ من کێ جای ئومێدەن سیوای تۆ وسووڵ بزورگی ئێدەن؟ ئیحسان کەرەم چەنی بەد ڕەفتار کەرۆ نە هەر پەی پاکان کەرەمدار فامح ما تشا من خطیئاتی چون ساحیب لەرح مەحو و ئیسباتی سابتەن تێشدا عیلم دڵداری یەکسەر چی بیەن هەن مەبۆ جاری نیقاب نە جەماڵ مەرحەمەت لابەر پەی حوزوور وێت ئیمای ئامام کەر جامێ جە مەی وەسڵ بدەر وەی حەیران مەخسەڵ دەرۆ گەرد دەردان هیجران هەنی سەرتاپام ئەر بۆ بۆوە هوون وە تیر بەڵای گەردوونەکەی دوون شەرت بۆ شەرت و عەهد لای خەم نەسیبان پەرێ داخ دڵ زومڕەی ڕەقیبان عەشق شێوەی تۆ نەشۆ ئەو بیروون تا ئاخر نەفەس نە تۆ تۆی دەروون ++++++++++++++++++++++ سەرناو: شاهیدم شاهم شیرین تەدارەک شاهیدم، شاهم، شیرین تەدارەک! ڕۆحم، فتووحم، مەنزڵ موبارەک! نە سایەی فێنک کەپرگەی تازەت وەش شنۆی وەش تەرز وە بێ ئەندازەت شەبیهی سایەی ڕۆح ئەفزای بەهەشت حوور ئاسا تێشدا نەونەمامی دەشت بنیشە دڵشاد ڕاحەت و وەش کەیف پەی دەفعی سەمووم گەرمی هەوای سەیف من مەنزڵ حوجرەی گەرمی پڕ ئەسەف دیدەم پەی دینت شیەن وە تەلەف شنۆی بۆی مەیلت قەمیس سای یووسف با بەی پەرێ دەفع عەما و تەئەسسف ++++++++++++++++++++++ سەرناو: شای جیلوەداران شای جیلوەداران... هەوای لەیلاخ کەرد شای جیلوەداران تەرتیب دا تەرکیب کول تەڵمیت باران موهەییا هەودەج چون هەردە جاران جە شوومی فیرقەی فەرهاد ئەتواران کۆچش کەرد سەرخێڵ شیرین نیگاران لوا حەلاوەت عەیشی ئەوگاران بی وە تاڵی حاڵ ڕاحەتی یاران کوچ خەیر شای کریشمەداران شێونا شادی جە غەم کۆساران وە جا ئاست جەرگەی جگەر سەد باران سۆچنا سەمووم دووریش خەمباران حەرارەت سەیف هیجر دڵداران نمازا سەرجەم سەفای وەهاران بێ هۆش و حەیران جەفا ویاران هەر ئێد موانان لەیل و نەهاران ئای جە دووری شای شیرین پەرداخان وای جە مەئیووسی سەفای ئێڵاخان هەزاران خەفەت پەی خەم یاتاخان جە مەحروومی وەسڵ بڵند دەماخان ++++++++++++++++++++++ سەرناو: شۆخێ دڵبەرێ جە سایە سڵێ شۆخێ، دڵبەرێ، جە سایە سڵێ نەتۆی گوڵشەن حوسنش نەو گوڵێ جە بۆی خووی کۆڵمش عەترش حاسڵێ شیفای ئێش دڵ هەر دەرد موشکوڵێ کەرەم کەرد وە دەس مۆبەت کامڵێ تەوفیق پڕ سۆز، شۆڕش بوڵبوڵێ فەرما پیش: بیرش پەی خەستە دڵێ پەی دەوای دڵێ دەروون پڕ چڵێ ئاوەردش پەرێم نەکەرد تامڵێ واسڵ بۆ وە کام شیرین واسڵێ بێدار کەرد دەماخ وە خەم غافڵێ پەیدا بی پەی دڵ عەجەب غوڵغوڵێ جەفایی فیدای وەفای عاقڵێ شاهێ، شاهیدێ، خەم پێ باتڵێ ++++++++++++++++++++++ سەرناو: شۆر عاشقان دیسان دەم داوە شۆر عاشقان دیسان دەم داوە نەی دەمدا عوقدەی غونچە دەم داوە گوڵ هووەیدا بی عەترش پەیدا بی دڵ بوڵبوڵ ئاسا پەرێش شەیدا بی ++++++++++++++++++++++ سەرناو: شیشەی دڵ جە مەی عەشق شاهید کەیل سەبارەت: نامە بۆ شەهید شیشەی دڵ جە مەی عەشقی شاهید کەیل هامسایەی سەودای قەیسی لێوەی لەیل یارەکەی یاران پەی یاریت موشتاق دۆس با وسووڵ جە بەینی عوششاق جەوران دەوران گەردوونەکەی دوون تەفرەقەی فیرقەی یارانی مەحزوون حاسڵ کەرد، گرد بەزم بەرد ئەو سای عەدەم هەر یەک موبتەلا کەرد وە سەد ستەم من وەردا ئەو گێج دەریای مەهجووری تۆ ئەو پێچی سەخت ڕای سارای دووری درەختی دڵەی تۆ وە بەرقی فەسڵ پارە پارەی من مەحرووم کەرد جە وەسڵ نۆشا وە من زەهر فیراقی ئەبەد پۆشا وە باڵای تۆ بەڵای بێ حەد من وست ئەو تەلیسم سەر وە فەنا دەر مەنعەن خەلاسیم تا یوم المحشر تۆ وەردا ئەو تۆی ڕای هات و نەهات مەحاڵەن پەرێت ڕیجعەت و نەجات شەو و ڕۆ جە تاو ئێش ئەی دەردە ویرد زووانم بیەن وەی فەردە: ئای جە مەکر و کەید چەرخ سەرنگوون تەفرەقەی یاران چۆن بەرد ئەو دەروون؟ ++++++++++++++++++++++ سەرناو: عەکسی کاڵای ئاڵ ئاڵای دڵبەرەن عەکسی کاڵای ئاڵ ئاڵای دڵبەرەن ڕووی سەما و زەمین پاسە ئەحمەرەن خاڵی خاتران خامانی بێ شۆر نیسبەتش مدان وە لای عەکسی خۆر نە، بەڵ جیلوەی شەمس ستارەی قەمەر حاسڵەن جە عەکس جەماڵی دڵبەر ++++++++++++++++++++++ سەرناو: غونچەی مورادم غونچەی مورادم... خەندە کەردەوە غونچەی مورادم چون بوڵبوڵ بەو گوڵ خەیلێ دڵ شادم عەترش بەرد زوکام بێ حەد و دادم شیفا دا وە ئێش دەرد فەسادم زانووی دڵ نە بەند خەفەت ئازادم شێونا خەرمان خەمان بنیادم کۆتایی ئاوەرد داد و فریادم دەشت سرووری دەروون گوشادم عەودەت کەردەوە عومر بەربادم مەیل دڵبەرەن یەقین ئیمدادەن بۆ وە ماسیوای شیەن جە یادم وەخت ڕەختشەن بەخت نەوزادم پەوکە ئەی فەردە بیەن ئەورادم: دەخیلەن دڵبەر! باڵا شمشادم هەنی تا مەردەن مەکەر ناشادم ++++++++++++++++++++++ سەرناو: غەزالەی هەزار سەییاد پەشێوکەر غەزالەی هەزار سەییاد پەشێوکەر! سەر دەلیل دڵ عاقڵ فەریب دەر! خەتائی خاتر جە خەتا خاڵی! چرای چرۆی سەوز ناز و دەلالی! ئاهووی پەروەردەی هەردەی دڵبەری! غونچەی دڵ جە بۆی بێ مەیلی بەری! تەتار سارای خووی وەفا مەنزڵ! ناف پڕ شیفا دەوای بینی دڵ! جەیرانەی حەیران عەینەینت عاڵەم! چێشەن مەوینوون ستارەی تاڵەم؟ نەتۆی ئەوج مەیلەکەی تۆوە تولووعش سەردان دیسان جە نۆوە؟ نوورش مونتەشیر بی وە دەرووندا شیفا دا وە دڵ خەستەی زەبووندا خەم پەرگەندە بی زامەتان ساڕێش دەرد دڵ دەوای شافی یاوا پێش پەیک شیرین پەی بەین من و تۆ مەحرەم ئەمین خدمەت شەو و ڕۆ پەیامان پاک مەیل وەفا جۆ یاونا پەنەم دەک دڵ ئازاد بۆ! ئەوەڵ وە گۆشەی عەینت ئیشارەت کەردەبێت یانێ دا بێت بەشارەت من چەنی دەردان جە دەستت حاسڵ دڵ خەریک نەبام سەییاد قاتڵ ئەر وەسڵەن، ئەر فەسڵ، ئەر فەرەح، ئەر دەرد مەیل و بێ مەیلی شای گەردەن بێ گەرد! هەر کام بۆ جە تۆن، چێشەن مەجاڵەم؟ ئەر هەر سات سەد دەرد کەری حەواڵەم دووەم: ئیمایێ فەرمابێت وە مەیل ئەو لای تەلازوم بەین مەیل و لەیل بەڵێ ڕەویەی من پڕ جە قسوورەن ورنە بێ مەیلی جە لەیلێ دوورەن بەو لەفز شیرین شەکەر ڕێزەکەت بەو دوو دیدەی مەست نەرگس بێزەکەت فەرمابێت قەسەم کەردەبێت ئیزهار جەفایی خەستەی سفتەی دڵ ئەوگار عەهدەکەی قەدیم بەستە جە مابەین ئەبەدی ئەبەد نەبەرۆش جە زەین چەنی سۆز دڵ ئەو تەن خەمیدە هەر وەفام مبۆ پەی ئەو خەم دیدە ئازیز فیدات بام پەی وەفا و مەیلت پەی دڵەی بێ گەرد جە مۆبەت کەیلت بەو باڵای ئاڵای سەروان خەم کەردە بەوتوڕڕەی وەپای دڵدا پێچ وەردە ئەو شەرتە چەنی سۆز دڵ دەروون مشێۆ چەنی ڕۆح بشۆ ئەو بیروون ++++++++++++++++++++++ سەرناو: غەزاڵەی دەلال دڵان مەلال کەر غەزاڵەی دەلال دڵان مەلال کەر تار نەدام کام جەفایی بێ دەر حەیف نییەن من وەی سەختی حاڵەوە وەی کزەی دەروون پڕ مەلالەوە وەی زام ناسۆر ماران گەستەوە وەی دەرد کاری جێ نەڕەستەوە وەی جەرگ هوونین پڕ جە ئێشەوە وەی دڵەی لێوەی وە دەم نێشەوە وەی کەسرەت سێڵ لێڵ دەیدەوە وەی باڵای وەبار خەم خەمیدەوە وەی ئەندام وشک مەینەتانەوە هیچ نییەم وەتەنگ تیر و تانەوە دایم گەشتمەن وە هەردانەوە بەڵ وە هەرد سەخت گشت دەردانەوە دەردم ڕشتەی هۆش پێم وەردانەوە ناڵەی دڵ مەیۆ وەی فەردانەوە: ئای عەشق دڵبەر پەشێو کەردە وێم وای پیاڵەی ژار خەمان وەردە وێم! ئای ئارەزووی وەسڵ وە گڵ بەردە وێم وای غەریق گێج بەحر دردە وێم ئاخ داخ نوختەی خاڵ شێوە حوور حەسرەتەن پەرێم تا وە نەفخی سوور ئای دیای باڵای ئاڵای جیلوەگەر بی وە بەڵای دڵ تا وە ڕۆی مەحشەر ئێستە تۆ جاگیر قەڵای بێ باکی بێ عەلاقەی جەی مەئوای غەمناکی من ڕا گوم کەردەی سارای هیلاکی گیرۆدەی ئازار دەور ئەفلاکی خسووسەن زەننت ئێدەن: جەفایی قەلبش مائیلەن وە بێ وەفایی یانێ دڵ وە مەیل غەیرێ مەسروورەن دیدەش وە دیدەی غەیرێ پڕ نوورەن بەو باڵای ئاڵات، بەو عەین مەخموور بەو گۆنای گوڵ ڕەنگ بەو جەبهەی پڕ نوور بەو خاڵ شیرین بەو توڕڕەی موشکین بەو گەردەن ساف بلوورسای نوورین بەو تاق ئەبرۆی جفت و پەیوەستە بەو موژەی سیهام سەد دڵ پێ خەستە بەو ڕاز شیرین، ساز وەش ئاواز بەو ناز نازک نازەنین نیاز جەو ساوە بادەی عەشق تۆم وەردەن سیوای تۆ خەیاڵ کەسێم نەکەردەن شەرت بۆ نەک چوون شەرت، گوڵ چەنی بوڵبوڵ بەڵ شەرت بوڵبوڵ چەنی پڕەی گوڵ هەنی تا حەیات بشۆ وە فەنا نەیل سیوای تۆم نەبۆ تەمەننا ++++++++++++++++++++++ سەرناو: فەوحەی توففاحێ فەوحەی توففاحێ... مەیۆ نە بینیم فەوحەی توففاحێ فەوحەی فەرەح بەخش وەگشت ئەرواحێ حاسڵ جە نەفحەی توڕڕەی ڕەواحێ نموونەی زەنەخ جەبهە سەباحێ موئەسسیر میسل قەدیمی ڕاحێ یەقین وە خدمەت غەزاڵەی موشکین وەی تەورە پڕ بۆن توففاح شیرین وەرنە توففاحان من هەرچیم دییەن وەی تەرزە نەفحەش پڕ ئەسر نییەن سەد فەوحەش شیفا پەی خەم نەسیبەن بەڵام هەر لایەق دەستی حەبیبەن! ++++++++++++++++++++++ سەرناو: لووای نەو وەهار شادی هامفەردان لووای نەو وەهار شادی هامفەردان گەرمی هەردەی دڵ گرۆی هامدەردان بێ بەزمی فەزای سارا و سەرهەردان چێشەن نەی دەمدا پەرێمان سەردان؟ سا دەی واچدێ پێم هانا هەی مەردان دەخیلەن ئانا جە حەسرەت مەردان جە شوومی چارەی هەناسە سەردان نەک چون جەفایی وێڵ و سەرگەردان یەقینەن سەرخێڵ کەردەن بە گەردان ڕشتەکەی مەیلش جە دەس دڵ وەردان کۆچی خەیرش کەرد جە لامان لواش شێونا نەزمی بەزم قەدیمی مەئواش ئەڵبەت جە ناڵەی دڵان بێزارەن نەی سەر وەختەدا وەی تەورە تارەن یا وە قەسد سەید هەزاران تەر غەزاڵە کەردەن عەزم ئەی سەفەر وەرنە دووی دەروون گرۆی ئەوگاران گەرمی هەوای دڵ جەرگەی خەمباران سمووم نەفەس جگەر پڕ خاران پڕ کەرد یەکسەر سارا و کۆساران چ وادەی هەوای سەفا کەردەنەن؟ کەی وەخت تەشریف وە سەیر بەردەنەن؟ ++++++++++++++++++++++ سەرناو: مەئوا نە تۆی کاو کۆی بێ وەفایی مەئوا نە تۆی کاو کۆی بێ وەفایی! دڵبەری بەری جە ئاشنایی! قوللەی قەڵای قاف ئیستیغنا مەنزڵ! جە لات تەمەننای من نەبی حاسڵ جەردەی هەجرت بەرد جوانیم سەرجەم پیریم هەم پەرێت ئاما چەنی غەم بێ مەیلیت ئاوەرد سەروەختی فەوتم دیاردان ئاسار مەهلەکەی مەوتم حەیفەن چەنی ئەی حەسرەتی بێ حەد تاوی حەرارەت دەروون جە حەد ڕەد بێ نۆشای مەیلاو سەرمایەی حەیات داخڵ وام وە تۆی ئەلحەد بێ نەجات ++++++++++++++++++++++ سەرناو: مەر جیلوەی جەماڵ ئازیز نەدان لێت مەر جیلوەی جەماڵ ئازیز نەدان لێت؟ نەرگس چون ساڵان پاسە ئامان پێت؟ نەدیەنت دیدەی سای شیرین نیگار پەوکە شەفافەت شیەن وە پێوار هەور مەرحەمەت شای جیلوە داران سێڵاو پڕ سوود پەرێت نەواران جەو بۆنە پەشێو پەژموردەی زەوقی وشک و تەشنەگی و بێ قووە و شەوقی جەفایی تۆ چون گورۆی مەڵاڵان شادیتان تەمام شیەن وە تاڵان بێ مەیلی حەبیب شۆخی دڵفریب نەبۆ وە نەسیب کەس سیوای ڕەقیب! ++++++++++++++++++++++ سەرناو: مەسکوونی گۆشەی دڵەی سەد پارەم سەبارەت: نامە بۆ مەفتوون مەسکوونی گۆشەی دڵەی سەد پارەم مەئلووفی دروون وە دەرد ئەوگارەم نمەز خاکی پای شۆخی شیرینت ڕۆشن کەردەن چەم پڕ جە ئەسرینت یا سورمەی پاڵاش جە دیدەت دوورەن؟ جەو بۆنە هاڵای دیدەت بێ نوورەن دڵ مەستی بادەی وەسڵی لەیلەنی دەروون وە سێڵاو دڵبەر کەیلەنی یا هێمای تەشنەی جورعەی مەیلەنی؟ کەفتەی کۆساران کۆی دوجەیلەنی؟ کامت تام تاڵ ژار مەهجووری گرتەن، نەمەندەن پەرێت سبووری تەفسیلی حاڵت «مەفتوون»ی غەمگین بکیانە بەڵ دڵ بیاوۆ تەسکین ++++++++++++++++++++++ سەرناو: مەفتوون واریس شۆر مەجنوونی سەبارەت: نامە بۆ مەفتوون «مەفتوون» واریسی شۆری مەجنوونی مەسکوونی گۆشەی بەیتی مەحزوونی نمەز دەرد سەخت دڵ هۆشت بەردەن یا بۆی باخچەی وەسڵ سەرشارت کەردەن؟ بێ خەبەر جە حاڵ دڵ بێ شیفاییت بێ پەرسا جە دەرد دڵەی جەفاییت مەر وە مولاقات دیدەی من و تۆ شەرحی حاڵی من وەنەت مەعلووم بۆ بۆ وە دیدەنم خەیلێ دردینم بەڵ نەی دەم ئامات بدۆ تەسکینم ++++++++++++++++++++++ سەرناو: مەفتوونی مەحبووب ئیستیغنا یاتاخ سەبارەت: نامە بۆ مەفتوون «مەفتوون»ی مەحبووب ئیستیغنا یاتاخ! کوشتەی بێ باکیی شای بڵند دەماخ! غەرقی مەهلەکەی گەرداوی دەردان! مەحروومی حەڵقەی بەزمی هامفەردان! نە حەڵقەی مەجلیس جەرگەی ئەهل خەم نیشتەبیم مەلوول دەروون پڕ جە خەم هەر یەک وە دەردێ بێ هۆش و سەرسام دڵ وە جەفاوە مەرام ناتەمام بینی دڵ وە گەرد دەردان پڕ کەدەر مەحرووم جە نەشئەی نەفحەی شیفادەر جە ناکا شنۆی بۆی گوڵ هەدیەی تۆ چەنی وەش فەردان مەیل وەفا بۆ سەردا نە سەردا یانەکەت ئاوا نەو دەمدا وە دڵ سروورێ یاوا ئاد دەماخ دڵ پەرداخ کەردەوە ئێد سۆز یاران هەم ئاوەردەوە ئاد شاد وە مەشام غەزاڵەی موشکین بی وە مەنزەر پەی شۆخ جام جەمین ئێد تەزیین دا بەزم گرۆی ئەوگاران تازە کەردەوە شۆر زامداران سەوداش سەودات کەرد وە ئیشارەت مەدلوولش شیەن شادیت وە غارەت هەرچیم بی نە دڵ مایەی تیجارەت شادی شی پەرێت نەمەند بەشارەت تێشدا شکایەت چەپگەردی گەردوون چون هەوای لووات ئاوەرد ئەو دەروون نەزانات فەڵەک چەرخ چەپ ئەندێش مەکەرۆ هەرگیز خیلاف تەبع وێش کەردەبێت ئیزهار ڕەسم وەفایی چەنی دڵ مەلوول خەستەی جەفایی بەڵێ کەسێ وەرد مەی ئاشنایی کەی کەرۆ تاسەی داوای جیایی؟ پاسە جا گرتەن یادت نە دەروون مەر ئاخر نەفەس بدۆش ئەو بیروون ++++++++++++++++++++++ سەرناو: نە خانەی خەمدا خەفتە بی بەختم نە خانەی خەمدا خەفتە بی بەختم خاڵی جە خەیاڵ خەم نەبی وەختم عام عالەم بی عەلیلی سەختم دوور بی پەی وەسڵم جە سەبرم جەختم جە ناکاو جەخت هاتیف هەوادا پەی بێداری بەخت من هۆردا نەوا ها ئیسە سەر وەخت جفت لواتەن وادەی دیار داو دیای دواتەن بوینە جەبین مەلەک زادەی جاف بێ تەرز و نەزیر نە قاف تا وە قاف بدیە تەبەسسوم خەندەی گوڵ بێزش تەکەللوم وە لەب حەلاوەت ڕێزش بنۆشە جورعەی مەی مۆبەت ئامێز دەس درووسکەردەی ساقی بەزم خێز تەبەسسوم سەبەب زیندەگی ئەبەد تەکەللوم باعیس ڕاحەتی بێ حەد نۆشای مەی مایەی مەستی بێ سامان مەخسەل دەر گرد دەرد بێ ئامان ++++++++++++++++++++++ سەرناو: نە وەختێ ئەجزای ئەندامم تەمام نە وەختێ ئەجزای ئەندامم تەمام تێکەڵ بی چەنی ئالام ئەییام بێ کەس بێ تەبیب کەفتەبیم ڕەنجوور دەردم جە دەوای شافی بی مەهجوور جە ناو وە عەزم شیفای ئەی عەلیل پەی عەیادەتم ئاما سەر دەلیل وە سەد مەیلەوە غەزاڵەی نەوڕەس نیشت نە سەرینم بی وە فریاد ڕەس فەرما پێم هۆرێز جە دەرد بەر ئازاد دەماخت وە بۆی تای توغرام کەر شاد جەستەم تازە بەرگ عافییەت پۆشا دڵ سکەنجەبین شیفایی نۆشا چون جە بادەی وەسڵ دڵبەر سێرم وەرد ئەندامم تەمام ئازاد بی جە دەرد فیدای وەفات بام شۆخی شیرین مەیل تازەت کەردەوە دینی مەیلی لەیل ++++++++++++++++++++++ سەرناو: نە گۆشەی حوجرەی خەمدا دڵ مەلوول نە گۆشەی حوجرەی خەمدا دڵ مەلوول نیشتەبیم خەریک خەیاڵ مەئموول مواتم هەنی ئەی دڵەی مەعلوول داخۆ بۆ وە بۆی شادیش بۆ وسوول مرادم مەحاڵ مزانام حوسوول کەوکەبم تولووع کەردەبێ زوهوول درەخت بەختم بەو ئەسڵ وە توول ئەوسا بێ قەزا کەندەبێش ئوسوول جە ناکا نامەی شۆخ زوڵف لوول سەراسەر وەفا و مەیل ئەو مەدلوول سایەش سایەسای هوما نا نە فەوق فەرق دڵ ئەفسەر شاهی شار شەوق چون نەفحەی جامەی شای میسر مەنزڵ شنۆی بۆی مەعناش شیفا دا وە دڵ چون چیهرەی دڵبەر نە سای سیاماڵ نەتۆی سیا خەت نمانا جەماڵ بەڵ مەدلوولش چوون ئاو حەیوانی نە تۆی شیرین نەقش خەتت زوڵمانی خورۆشا دەروون سێرش وەردەوە دڵەی موردەی خەم زیندە کەردەوە بەڵام ئاخ جەفا چەنی حەیاتم مەخلووقەن جیا نیەن جە زاتم وەرنە نۆشای ئاو حەیات نامەت ڕەشحەی ڕۆح ئەفزای سەرنووک خامەت مبی وە مایەی عومر خزر توور عەیشم نیشاتم زینەگیم بەی جۆر ئازیز نە سەر کەل سەربەرز وەفات ستارەی تاڵەی خەستەی پڕ جەفات مەحز لوتف تۆن تولووع کەردەوە درەخت بەختم سێڵاو وەردەوە وەرنە من وە کام مەرتەبەم یاوان؟ چەنی منت بۆ وەفای فراوان؟ قەسەم وە یاد کەی تا حوسن شێوەت جیلوە نمابۆ نەی دڵەی لێوەت گەرد بێ مەیلی نەدەری نە دڵ نەیاوۆش سزای بەد عەهدی موشکوڵ فەرمات پەی زاتم لازمەن وەفا چون مولازەمەی زات تۆ وە جەفا زات و سیفاتم فیدای وەفای تۆ زاتت هەر ساتێ نەسەد سەفا بۆ کەردەبێت تەعلیق سەفا و جەفای وێت وە سەفا و جەفای جەفایی پەرێت جەفا پەرێ من، سەفا پەرێ تۆ زات پاک تۆ نە جەفا دوور بۆ! دۆعای خەیر جە من تەلەب کەردە بی زەنن ئەهلییەت وە من بەردەبی حەق و موافیق حۆسن زەنن وێت نەهەر ئافەتێ نەقسێش بۆ پەرێت! نە دنیا و عوقبا نیگات بدارۆ! لوتف و ڕەحمەتش پەرێت بوارۆ! وەرنە چون منێ تاوان فراوان کەی ڕجاش وە زات قودس حەق یاوان؟ ++++++++++++++++++++++ سەرناو: نەسیم بێ کەسم نەسیم بێ کەسم... بۆ وە ئیمدادم! نەسیم بێ کەسم سیوای تۆ نیەن کەس فریادڕەسم دڵسۆزێ چون تۆ نمەگنۆ دەسم بۆ بدیە جەستەی سوفتەی قەقنەسم گا سەردی گاهێ گەرمی نەفەسم قەسر دڵ وەشی وە خەم هەرەسم ناڵەی دڵەی زار وێنەی جەرەسم حەبس هیجران چون تەیر قەفەسم پەڕەی جگەر پڕ جە خار و خەسم بشۆ وە خدمەت ئاهووی چاو مەسم غەزاڵەی دڵان دۆس نەوڕەسم مسپارووت وە عەشق ئاهوو پەرەسم وە سەودای دڵەی جە وێ وەڕەسم نەسیم چون وە قەسد من ویەردەنی پەرێ کەساسیم حەسرەت وەردەنی تەئسیرش کەردەن ئازارم جە تۆ هەوای باڵەت بۆی دەردانم مدۆ جە دوور دیار دای دۆس دڵ شناس ماچۆ نەسیمەن مناڵۆ کەساس سا ئەر سەرحەڵقەی موشکین غەزاڵان مەندە بۆ جە لاش مەیلەکەی ساڵان نە پۆشابۆ بەرگ خووی بێ وەفائی مەپەرسۆ وەنەت حاڵ جەفایی ئەر وەجا ئاوەرد ڕەسم ویەردە پەرسا واچە هەی وە ناز پەروەردە کەسێ ئەوسا مەست وەسڵ دڵبەر بۆ سێراو سێڵاو گیان پەروەر بۆ دڵ کاڵای ئاڵای شادیش نە بەر بۆ دەروون مەسرووریش جە حەد ئەودەر بۆ مەنزەرش جەماڵ پەری پەیکەر بۆ زیای دوو دیدەش هەر بەو نەزەر بۆ مشێو جە دووریت چۆن بۆ، چێش کەرۆ؟ شەو و ڕۆ چەنی کێ وە سەر بەرۆ؟ ئیسە جەفایی دەروون جە خەم کەیل ویردش هەر ئێدەن چ نەهار، چ لەیل: ئای وە هەوای سەخت سەرد زمستان هیجران جەماڵ شای دیدە مەستان جەستە موبتەلای هەژار دەردە وێم دەوڵەت شادی تەڵەف بەردە وێم زانووی دڵ نە هەڕ بەڵا غەرقە وێم وە بەرق فیراق تا فەرق فەرقە وێم بەور فراوان جەورەکەی گەردوون گرتەن سەراسەر وڵات دەروون وشکەن پێش درەخت باغ دڵوەشی کشت سەفای دەشت دڵ وە فەنا شی تەم خەم پۆشان یەکسەر کۆی جگەر مەحاڵەن خەیاڵ ویساڵ دڵبەر ئەر نەشئەی هەوای نەووەهار مەیل لەیل هووەیدا بی پەی قەیس دوجەیل بەور دەروون بەرد ئەو فەزای عەدەم کۆی جگەر خاڵی بی جە تەم غەم باغ دڵوەشیم تەمام هۆرداوە سەوزەی سارای دڵ تازە سەرداوە زانووی دڵ نەهەڕ بەڵا ئازاد بی وە دینی دیدەی دڵبەر دڵشاد بی عومری دووبارەم ئەو دەم مەکتووبەن عەیش و زیندەگیم ئەوسا مەحسووبەن ++++++++++++++++++++++ سەرناو: نەسیم موونیس گێسووی نیگاران نەسیمی موونیس گێسووی نیگاران! مەحرەمی ئەمین ئاسانەی یاران! بۆ بدیە ئەحواڵ جەستە و دیدە و دڵ دەروون دووری دۆس چێش کەردەن حاسڵ؟ ! جەستە موبتەلای دەرد بێ دەوان نە دەست حیکمەت لوقمانی لوان سەیل چەم ناڵەی سەخت دڵەی وێڵ عەیانەن جە دین نەهر دەروون لێڵ دووی دەروون چون تەم یاوان وە کاوان شۆ وە خدمەت شای وەفا فراوان چون یاوای وە جای بەزم نەوهاڵان سەیرانگەی پڕ بۆی نافەی غەزاڵان بناڵە وە یاد ئەی بەدبەختەوە زەلیلەن وە دەس حاڵ سەختەوە چی هامفەردەکەی ساحیب عەقڵ و فام هامدەرد و دڵسۆز پڕ شەرت و وەفام دڵ «شەهید»ی عەشق محبووبی شیرین مەحرەمی حەریم غەزاڵەی موشکین زوو مەبۆ بێدار بشۆ وە تەمکین تەفسیل ئەحواڵ جەفایی غەمگین دائم الاوقات موژەی چەم نمین بەیان کەر جە لاش وە سەد سۆز و شین ئەر وەفاش چەنیم باقی ماندە بۆ مەیۆ وە حزوور دڵبەر چەنی تۆ وەش شنۆی غیرەت وەفاش مەخێزۆ ئەسرینان وە تاو نە چەم مەڕێزۆ چون چەنی هامفەرد یاوای وە حزوور ئاسانەی دڵبەر شای دیدە مەخموور چون جیلوەی خورشید تۆی تار سەحەر نە تۆی دەریچەی قەسر مونەووەر سەر مارۆ نە دەر منمانۆ جەمین مپەرسۆ ئەحواڵ خەستەی دڵ تەمین دەخیل بواچدێ حاڵش چ تەورەن وجوودش نەبیر دووری تۆ غەورەن ئیرادەی ئامای مەئوای تۆ دارۆ بەڵام پاش قووەی ڕەفتار نمارۆ سەعات میقات دڵ لەیل و نەهار دەقیقەی فیراق مەکەرۆ شومار پەی وەسڵ ئاهووی توڕڕەی موشک بار زوانش چەند فەرد کەردەن وە ئەزکار: ئای پەرێ مەرهەم مەیل شیفادەر پەی گەرد پاڵای دیدە ڕۆشەن کەر پەی بۆی موشک بیز زوڵف شیرین ڕەنگ دافیع پەی زوکام بینی پڕ جە ڕەنگ وای پەی پیاڵەی سەفا بەخش دڵ دەوایێ دەروون پڕ نە پێچ و چڵ نەسیم ئەو مەرهەم ئەو گەرد و ئەو بۆ باوەرە پەرێم گیانم فیدای تۆ بەڵ وە بێ ئەڵەم بە وەسڵش شاد بام دڵ نە بەند خەم دووری ئازاد بام ++++++++++++++++++++++ سەرناو: نەسەر سەتحی بەرز کەپری خەم عەموود نەسەر سەتحی بەرز کەپری خەم عەموود بیساتم حەسرەت پەی وەسڵی مەقسوود سەر نە سەر بالین عەجز و مەلالەت تەن نە تۆی لیباس ڕەنج و کەسالەت پەتیەی سیا ڕەنگ تان و پۆ خەفەت کێشام بەسەردا لۆنگ قەیس سیفەت دیدەم شی نەخاو چەنی دیدەی بەخت خاوێ نموونەی مەوتم بی نەو وەخت بەختم جە ناکا هۆردا باڵ چەم تمەز دیاردا سەر دەلیل ڕەم پەی بێداری دڵ من نەخاو خەم ئاما غەزاڵەی پڕ وەفاو کەرەم پەنجەی مۆبەت دا نە بەتیەی خەفەت لادا بێدار کەرد دڵەی خەم سیفەت گۆشی دڵ شنەفت سەدایی یا صُب! قم فاغتَنم جاء الیک الحُب قمت نظرتُ رٲیتُ حوراً افادت قلبی روحاً سروراً بەڵام ئاخ ڕەقیب نمازا تەمام! بنۆشم بادەی وەسڵی جەبین جام ++++++++++++++++++++++ سەرناو: نەشئەی شنۆی بۆی نەو گوڵ چیهرەی لەیل نەشئەی شنۆی بۆی نەوگوڵ چیهرەی لەیل ڕاسەن تۆی دەماخ دڵم کەردەن کەیل موستەغنی جە بۆی بێ بەقای گوڵم ب ەڵام من چون دڵ شەیدای بوڵبوڵم گوڵ مەنزەرەن پەی دۆس کامڵم پەوکە وە بۆی گوڵ مائیلەن دڵم ++++++++++++++++++++++ سەرناو: پیاڵەی خاڵدار پڕ سەفای ئەنوەر پیاڵەی خاڵدار پڕ سەفای ئەنوەر نموونەی گەردەن پڕ خاڵی دڵبەر پڕ بۆ جە سەهبای سافی وەش ئەسەر دەخیلەن ساقی پەنەم کەرەم کەر بەڵ نەی وەختەدا دڵەی پڕ خەتەر ئازاد بۆ لادێ جە یەکسەر کەدەر ++++++++++++++++++++++ سەرناو: پەروانەی شەیدای شەمع پێشانیم سەبارەت: ئەم پارچە شیعری «شەهید»ە لەسەر زمانی «شاهیدی» وەڵامی «جەفایی» ئەداتەوە پەروانەی شەیدای شەمع پێشانیم قامەت خەم وە خەم ئەبرۆی کەمانیم سەودایی سەواد نوختەی خاڵەکەم هەراسان لێو لەعل ئاڵەکەم دڵ نە بەند تای گێسووی موشک بۆم عاشق وە شێوەی قەمەر بێز ڕۆم نامەی دەروون سۆز جەفا و دەرد ئامێز یاوا وە خدمەت ئاهووی زوڵف دێز هامفەردەکەی وێت «شەهید» دەردان واناوە پەرێم سەراسەر فەردان حاڵی بیم یەک یەک فەرموودەی خاست شۆر عەشق دڵ پڕ سۆز ڕاست ئەوەڵ کە خالیق مەوجوود و مەعبوود ئاوەرد نە عەدەم شێوەم ئەو وجوود وجوود دەردان چەنی وجوودت هەم گەردەن تا وەخت فەوت و نەبوودت هەنێ خەتایێ مگیر جە شێوەم ئەر تۆ لێوەنی مەجنوونی لێوەم «وبعد» بەو زات ئەی شێوە کەردەن ئارامش جە دڵ پەشێوت بەردەن تا عەکس شێوەم نە تۆی جام دڵ بێ گەرد وزەڵاڵ تۆ دارۆ مەنزڵ وە بێ مەیلی من مگیرۆ گەردێ میاوۆش سزای بەدعەهدی دەردێ وەفا چەنی من وێنەی تۆ و جەفان جەفای تۆم جەفان سەفای تۆم سەفان هەرکا ئەو لوا مەر ئەوسا ئێد شۆ دۆعای تۆ پەی من وەفای من پەی تۆ ++++++++++++++++++++++ سەرناو: پەروانەی وە شەوق شێوەی شەم مائیل پەروانەی وە شەوق شێوەی شەم مائیل! دەستی دڵ وە زەیل وەسڵی لەیل نائیل! کام دڵ؟ جە نوقڵ نەقڵی ئەو شیرین! مەشام مەستی بۆی تای توڕڕەی موشکین! لەب شاد وە لەززەت بۆسەی لەعلی لەب! دوور جە ڕەقیبان واسڵ وە مەتڵەب! تۆ داخڵ وە تۆی سای خەیمەی ئەمەل مەشغووڵی مەزەی نۆشای وەش عەسەل نە سەر کەف بلوور پڕ جە مەی لەبڕێز دەس درووسکەردەی ساقیی بەزم خێز بەڵام ئێمە دوور جە بەزمی ساقی مەئیووس سەهبای باقی وە تاقی سەر گێج سەفرای هیجران دڵبەر بێ سکەنجەبین ساف وەش ئەسەر چون دایەی دەوران پەروەردەم کەردەن شەو و ڕۆ دایم ویردم ئەی فەردەن: پەی تۆ زەڕڕەی جام، پی من کزەی زام شادی و شەوق وە تۆ، شین وە من تەمام ++++++++++++++++++++++ سەرناو: چێشەن دڵ ئارۆ سروورێ دارۆ چێشەن دڵ ئارۆ سروورێ دارۆ پێشانیش شادی وەنەش مەوارۆ بێدارەن نەخاو خەفەت نەی سەروەخت بەڵێ شای بەختم ئامان نەسەر وەخت فەڵەک وەبێ کەید دەورێ دا پەرێم شاد بیم وە دیدار دڵدارەکەی وێم دڵ وەحەلاوەت نوقڵ نەقل یار تاڵی مەزاقش یەکسەر کەرد فیرار مەزەی مەی مەیلش دەروونم مەس کەرد بەو مەستیەوە موانام چەند فەرد: کێن تاج شاهیش ئارۆ بۆ نەسەر؟ کێن یاوان وەکام وەسڵ وەش سەمەر؟ زانووی دڵ ئازاد نە زنجیر دەرد نەی دەمدا کێ بۆ یاران هامفەرد؟ کێن جەفای زاتیش یەکسەر لووا بۆ؟ دڵبەر وە بارەی وەسڵ باڵای تۆ؟ سیوای من - ئاهووی دڵ جە مۆبەت کەیل! فیدات بام سەد جار ساحێب وەفاو مەیل؟ ++++++++++++++++++++++ سەرناو: ڕشتەی عەشقی دڵ سەودایی خەستە ڕشتەی عەشقی دڵ سەودایی خەستە وە گێسووی سیای دڵبەر پەیوەستە دەستی مەیلش دا نەو زوڵفی دەستە لەرزانەوە تای ئەو ڕشتەی بەستە یانێ یە ئیمای ئاماتەن دەی بەی بنۆشە بادەی وەسڵم پەیاپەی بەو موژدەی دڵ شاد لووام ئەر حوزوور دیم نیشتەن دڵبەر پیشانی پڕ نوور قیام دا وە قەد سەروان پەی خجڵ لادا تای نیقاب ئەو بەدر کامڵ ڕەحمێ کەرد پەنەم قەدەح نا نەدەست دەورێ دا نۆشام مەی، دڵ جە خەم ڕەست ++++++++++++++++++++++ سەرناو: ڕوو ئایینەی ساف بێ گەردی شیرین ڕوو ئایینەی ساف، بێ گەردی شیرین قامەت وێنەی نەی شۆخی وەش ئایین سەر خێڵی خاڵ خاس، نوختەی خاڵانت داخەن نەڕووی دڵ شای ملاڵانت دڵ وە مەودای سەیف ئەبرۆت زامدارەن جگەر وە خەدەنگ موژەت ئەوگارەن دەروون وە نیگای عەینت مەلوولەن پای دڵ حەبس بەند تای زوڵف لوولەن سفیدی لوءلوء دندان شیرین مڕەنرۆم جە عەین لوئلوء ئەسرین لێو یاقووت سات قووەتم بەردەن جیلوەی ئەو زەقەن بێ زەوقم کەردەن چای زەنەخدانت دڵ وست ئەو چای خەم دەروون جە گەردەن بێ گەردت گرت تەم دیای ئەو سینەی پڕ سەفا و جەلا سازان پەرێ من سەد هەزار بەڵا نازکی ئەندام لەتیفت چون گوڵ نازک خەیاڵی من بەردەن جە دڵ جەستەم وە سەردی مەیلت مەعلوولەن ئێشم بێ شۆو خەم نە گەردەلوولەن وە مەودای میقراز خووی بێ وەفاییت ڕشتەی پەیمانت چەنی جەفاییت تا تا، تان و پۆ پاچات تا ئەو پەڕ وێنەی قەیچی پاچ پەرچەم و پا پەڕ جە فیکرت شییەن چ عەهدێ کەردی یادت نەمەندەن جەو قەسەم وەردی تۆ و سوپای پڕ سام جەلالەکەی وێت تۆ و جیلوەی جەلای جەماڵەکەی وێت تۆ و ئەو نەی، ئەو خاڵ، ئەو سەیف، ئەو خەدەنگ ئەو عەین و ئەو لەعل، ئەو زوڵفی وەش ڕەنگ ئەو لوئلوء، ئەو چای زەنەخ، ئەو زەقەن ئەو سینەی سفید، ئەو گەردەن، ئەو تەن هەنێ ڕەحمت بۆ وەی فەقیرەوە وەسەن وەس! گیان دای وە دەم تیرەوە عەتا کەر بادەی پڕ مەزەی وەسڵت ڕەهام کەر تەمام جە سزای فەسڵت ++++++++++++++++++++++ سەرناو: کوشتەی کریشمەی ڕیشەی جگەر بڕ سەبارەت: نامە بۆ مەفتوون کوشتەی کریشمەی ڕیشەی جگەر بڕ «مەفتوون» غەمزەی پەردەی دەروون دڕ ئەر درۆن ئەر ڕاس ئاما نەگۆشم چێوێ غەم جەم کەرد پەشێو کەرد هۆشم ماچان خەیاڵت وەدڵ ئاوەردەن یانێ های هەوای ڕەفتەنت کەردەن! مەر تەحسیل عیلم عەشق ئەوگاران کەسب شەریعەت شۆر زامداران نەخدمەت ئوستاد دڵ عەللامەی عەشق نەتەدریس عیلم عەشقدا سەرمەشق نە بەر پەنجەرەی حوجرەی زەوق ئەساس موزەییەن وە نەقش عەشق و شۆر و ڕاس نمەگنۆ وە دەس پەشێو مەحزوون تۆ هەوای لووات بەردەن ئەو دەروون نە بورج شیرین حوجرەی مەدرەسە بنیشە پەی دەرس دڵ بێ وەسوەسە بە ویفق فەرمان شای موشکین غەزاڵ وەسەد سۆز دڵ وەش کەیف و وەش حاڵ هەر تەرز مەیل تۆن نوور چەمانم سەبووری دڵەی پڕ جە خەمانم تەعلیمت کەردەن عیلم پەر خەیاڵ تا وەخت ڕوتبەی ئیجازەی کەماڵ خەیاڵ باتڵ نە خاتر کەر فەک نەقشش وە پەنجەی ئیقامەت کەر حەک ++++++++++++++++++++++ سەرناو: کێن وە سەد هەزار تەمتەراقەوە کێن وە سەد هەزار تەمتەراقەوە چون حۆران وەسەر شا بوراقەوە بەو جە لای جەمین بەرق و باقەوە بەو ئەبرۆی پەیوەست جفت و تاقەوە بەو بازووی شیرین سیمین ساقەوە بەو کاڵای قەشەنگ قەبای تاقەوە سیوای سەر دەلیل وەی ئفاقەوە کێن شوهرەتش بۆ وە ئافاقەوە؟ جەفایی وە کۆی ئیشتیاقەوە چون دیا دڵبەر وەی سیاقەوە هیچ نیەن وە تەنگ دووی عوششاقەوە چون فەرهاد وە ڕووی تاق واقەوە وەی کام پڕ ژار بێ مەزاقەوە سەر نیا وە کۆی ئەلفیراقەوە ++++++++++++++++++++++ سەرناو: هامدەردان دەخیل هامدەردان دەخیل... هامدەردان هانام ئەو ئێوەن دەخیل دەرد بێ دەوای چەند کەس پەی عەلیل سەردان نە دەروون جەفایی زەلیل جە شوومی چارەی خەستەی دڵ کەلیل چمان ڕەنجووران ئاهووی سەر دەلیل ئەو دڵبەر گەردەن بلووری پڕ نوور لەتیف ئەندامیش خەجڵەت دەر وه حوور نەزهەت جەننەت جەوانیش مەهجوور جە سەنای فیرقەی فوسەحای مەشهوور ها ئیسە ئەووەڵ سەدای سوور دەرد گوڵشەن بەهەشت حۆسنش پەشێو کەرد جەور ڕەنجووری لەتیفش بەردەن نوورین بلوورش پڕ کەدەر کەردەن سا سرافیل سا دەخیلەن ساقی هەر تۆنی تەبیب دەردان وە تاقی با بێ بۆی نەفحەی سانیەی ڕەحمەت پەرێش نەمانۆ هیچ ڕەنج و زەحمەت ئەندامم تەمام وشک بای جەفا بچەشۆ پەی پەی مەزەی مەی شیفا بەڵ خەستەی خەمین جەفایی زەبوون خەلاس بۆ جە دەس دای سەراندەروون ++++++++++++++++++++++ سەرناو: هامدەمان ئامان هامدەمان ئامان... هامدەمان سەر وەخت مەردەنم ئامان گیان شیرینم بەر ئاماش تەمان دەرک و هۆش و گشت حەواسم ڕمان یەقین سەر دەلیل سفید ئەندامان پەروەردەی هەردەو وەفای بێ سامان یانێ دڵبەر شای شیرین کەلامان ئیرادەی سەفەر کەردەن جە لامان فەڵەک! دەی، دەمێن دڵ مەستی وەسڵم خەلاس جە ئازار زەمانەی فەسڵم خێڵخانەی خەمان کۆچشان کەردەن سەر ئێڵی شادی تەشریف ئاوەردەن هەوارگەی دەروون کەردەن وە مەنزڵ ئاوەدانەن پێش فەزای سارای دڵ حیلە سازی کەرد پەی سزای دووریم ساز دا ئەساسەی دەردی مەهجووریم وست ئەو تۆی دەروون دڵبەر هەوای سەیر تەرتیب دا ئەسباب ڕای سەفەر وە خەیر وە دانەی شانەی دڵەی ئەوگارم دانە دانە کەرد توڕڕەش دڵدارم پاچا وە قەیچی سرتیپ پەرچەم بی وەلانەی دڵ عاشقان سەرجەم وەگەرد سفتەی جەستەکەی بەد حاڵ مەسقەل دا سەفحەی ئایینەی جەماڵ وە هوون دەروون پڕ بەڵای خەمین چ وەش ڕەنگین کەرد دەس و پای شیرین عەکس ئەو نامووس حەنایی بەردەن وە دینش دڵان چەند پەشێو کەردەن سورمەی توور دڵ سوفتەی سای جەماڵ چون نە عەینەینش کێشا وە کەماڵ خجڵ کەرد دیدەی سپی تەتاران بێزیا نەرگس ئەووەڵ وەهاران تا نەفەوق سەر کڵاوچەی زەڕ بێز پێچا نەدەورش شەدەی سورمە ڕێز پۆشا وەباڵاش کاڵای فەرەنگ کار خەفەت دا وە دڵ نازاران هەزار وێش ڕازانەوە وە خشڵ شیرین حەسرەت دا وە جەرگ جەوانان چین شیرین سا سروور بێ حەد نەدەروون مایل بی وە لای ڕیکاب گوڵ گوون وەسەد نازەوە شیرین تەدارەک تەزیین دا وە زین ڕیکاو موارەک بەو نیازەوە شای جیلوەداران بێباک جە وەی ڕۆی گرۆی ئەوگاران ڕاهی بی وەلای مەئوای پڕ سەفا ئاستش وە جا ئاد خەستەی پڕ جەفا دڵە دەی ئەوشۆن شۆخ جیلوەگەر هیچ مەبەر جیا جە ئەوج سەفەر ئازیزم ئامان! ڕەحمەکەت جە کۆن؟ وێت مزانی دڵ زەدەی تیری تۆن ڕجام هەن جە لای ئاهووی وەش ڕەفتار نەی سەفەر چون ماڵ دڵ نەدۆ ئازار بەڵ سا ئەر فەڵەک ساکین بی جە قین بەرشی جە سینەش گرد حەسوودی و کین پەرێ دووبارەی وەسڵم نەردێ شەند ڕیشەکەی درەخت خەمم جە بێخ کەند سینە ساف ئینساف دادا وە فرسەت پەی تەسکینی دڵ من کەردت عەودەت نەڕای سەفەردا وە جا نەمانۆ بتاوۆ عەودەت کەرۆ چەنی تۆ ++++++++++++++++++++++ سەرناو: هامسەران دەردێ هامسەران دەردێ... هامسەران سەردان نە دڵدا دەردێ چ دەردێ؟ دەردێ عەجەب پڕ گەردێ نەگرتەن دڵ هیچ هەناسە سەردێ پەنجەی پای شادیم شکستەن بەردێ چ بەرد؟ بەرد عەشق سای گەردەن زەردێ موبتەلام وە تیر وە ناز پەروەردێ چ تیرێ؟ غەمزەی جەمین چون وەردێ جەیحوونی دەروون پەنەش مەوج وەردێ هەزارانێ پەیش ئەرواح سپەردێ چەند بەو نێشەوە هەرداوهەرد کەردێ یەک چون من زامان وە تۆی خاک بەردێ ++++++++++++++++++++++ سەرناو: های دڵە دیسان ڕووت دا وەهەمدا های دڵە دیسان ڕووت دا وەهەمدا چێشەن مەوینوون های نە ماتەمدا پەشێویت شاهید دەردی بێ دەوان شێوەت شێویان، شادیت گشت لوان مەر ستارەی بەخت تاڵەت بەعیدەن ---- دەم جە بەزم عیدن یاران گرد سەرشار بەزم هامسەران مەست بادەی وەسڵ گرۆی دڵبەران گیان ئامادە پەی فیدایی دڵبەر سیوای جەفایی زەدەی زام خەتەر یەکێ شیرین کام نوقڵ ڕاز لەیل یەکێ گۆش وەساز وەش ئاواز کەیل یەک، شەو بۆی شەوبۆی گێسوو مەس کەردەن یەک، دین دیدەی دەڵبەر هۆش بەردە یەک مەرام تام دڵ پڕ جە شادی یەک مەشغووڵ کەیف گەردەن ئازادی یەکێ هامجەلیس دایم چەنی دۆس یەکێ مەکەرۆ شەو و ڕۆ پابۆس بەڵام من مەحرووم بەزمی یارانم تەشنەکەی کۆگەرد سەر کۆسارانم دایم تەڵخ کام زار هیجرانم هایم و بێهۆش مات و حەیرانم بۆی توڕڕەی موشکین دوور جە مەشامم نەداروون خەبەر جە سوبح و شامم دەروون پڕ جە خەم دڵ جە مەرام دوور مەهجوور خدمەت شای دیدە مەخموور دیدە نابینا، پا وشکی مەینەت جەستەی خەستەی هیجر یار پڕ بەینەت سا هەنی چەنی یاوون وە مەحزەر وێم کەروون وە فیدای شای جەبین ئەنوەر ++++++++++++++++++++++ سەرناو: های شۆڵەی خورشید ڕووی شای شازادان های شۆڵەی خورشید ڕووی شای شازادان وست ئەو سارای سەهو دانا چون نادان چۆن پەشێو نەبان وە شێوەی شیرین، فەرهادانی عیشق بێستوون نشین؟ ++++++++++++++++++++++ سەرناو: های فەڵەک دیسان چەرخێ وەردەوە های فەڵەک دیسان چەرخێ وەردەوە تەن وە تۆی یانەی مەینەت بەردەوە بادی موخالیف بەخت ئاوەردەوە کەشتی دڵ نە بەحر غەم گوم کەردەوە پەی چێش چەندێ بی چەنی نیگار بیم دەروون شاد ئازاد دڵ بێ ئازار بیم سوبحم هام سوحبەت سبووحی دڵبەر شام مەشام وە بۆی موشکین موعەتتەر بێ خەبەر جە فەسڵ فەسڵ جەیران بیم جە تەسکین قین فەڵەک حەیران بیم نەزانام کارش گرد حیلە سازین حاڵاتش سەرجەم فیکر بەدوازین کەیف وەسڵم کەید فەڵەک بەرد جە زەین جە ناکا فیراق ئەبەد وست ئەو بەین سا فەڵەک هەنی چەنیت چێش واچوون؟ دۆعای من دایم کەرۆت سەرنگوون! ++++++++++++++++++++++ سەرناو: های هەدیەی ڕێحان چەنی گوڵ دەستە های هەدیەی ڕێحان چەنی گوڵ دەستە وە ڕشتەی مەحکەم مەحەببەت بەستە ها تێشدا شەبیه لێو و زوڵف و خاڵ کیاستم ئەو خدمەت شای موشکین غەزاڵ پەی سیدق ڕەغبەت داوای موشتەری نە بازاڕ حوسن جیلوەی دڵبەری کڵافە کافین پەرێ خڕیدار شەرت ئێدەن تەقسیر نەبۆ پەی دڵدار ++++++++++++++++++++++ سەرناو: هەر کەس مەزەی دەرد عەشقش چەشتە بۆ هەر کەس مەزەی دەرد عەشقش چەشتە بۆ دیدەی دڵ وە هوون جگەر ڕەشتە بۆ چەنی متاوۆ جەفای حەبیبان شکایەت کەرۆ جە لای ڕەقیبان یە بەستەی بوهتان وێشەن نە دڵدا دەک ڕەقیب دڵت دەن وە سەر چڵدا! واسڵ بی وە قەعر ناڵەکەی جەحیم! نەدیەنت کەلام حەزرەتی حەکیم؟ فەرماوان: هذا بهتانٌ عَظیم خاست کەرد ڕەقیب پاسەت کەرد چەنیم تەئسیر دۆعای گرۆی مەڵاڵان کزەی هەناسەی سوب جە حەق لاڵان مایەی زیندەگیت بەرۆ وە تاڵان! پەرێ نەجاتی جەرگەی بەد حاڵان ++++++++++++++++++++++ سەرناو: یا زات دانای هووەیدا و پەنهان یا زات دانای هووەیدا و پەنهان ڕەحمەت و غەزەب تۆ بێ ئینتیهان ئەمنییەت جە ئێد مایەی عەزابەن مەئیووسی جە ئێد مایەی عیقابەن دڵ نە تۆی زیندان تاریک عیسیان مەحبووسەن وە دەس نەفس پڕ توغیان گەردەن ڕەجا و خەوفش زەعیفەن شەو و ڕۆ نە فیکر ئەی دنیای جیفەن عومرم وە ئاخر یاوا و هیچ حاسڵ نەکەردم ئیسە مەندەنم ماتڵ بۆ وە حۆسن فەزڵ وە بێ موقابیل ڕەحمێ کەر وە حاڵ فەقیر سائیل بادەی حوبب وێت پەرێم کەر نازڵ بەڵ جە دەس نەفس سەر کێش غافڵ نەجاتم بدۆ دڵم بۆ مائیل وە زیکر یادت چێش نەبۆ زائیل ڕەجا و خەوف دڵ قووە بسانۆ لا تَأمَنوا و لا تَأیَسوا وانۆ فیکری دنیای دوون تێشدا نەمانۆ سیوای زیکر زات تۆ هیچ نەزانۆ بەڵ ئاخر نەفەس چون دێو لەعین پەی سەلب ئیمان ئاما نە کەمین دڵەی وە بادەی لوتف تۆ سەرمەس وە بازووی تەوحید پاک فریاد ڕەس بنچینەی حیلەش بدۆ وە هەم دا ڕای مەکر و کەیدش نەبۆ نەو دەمدا نە شەڕ فیتنەش خەلاس بام مەهجوور ئیمان سەلامەت یاوون وە حوزوور ++++++++++++++++++++++ سەرناو: یانەی دڵ وە عەشق حەبیبان ئاوا یانەی دڵ وە عەشق حەبیبان ئاوا دیوان سوڵتان مەوەددەت ماوا شنەفتم کەوکەب بەختت تولووع کەرد زوڵمەت تەریق فیراقت لابەرد نەی دەمدا وەش کەیف ڕای لوای ڕۆشەن واسڵ بیت وە تۆی موزەییەن گوڵشەن یانێ وە بۆی گوڵ مەحبووب دڵبەر تۆی مەشامت کەرد تەمام موعەتتەر داخۆ نە خدمەت ئاهووی خەتایی نەبەردەنت نام شێخی جەفایی؟ نام نامم وە تاڵ تاڵی پەروەردەن وە لەفزی شیرین ئەودا نەویردەن یا وادەی نۆشا و بەخشای پیاڵە هیچ کەردتان یاد من، تۆ و غەزاڵە؟ نە، نە ئاد جە بەخت بەدم بەعیدەن دوور نە کامی دڵ ئەو بەر گوزیدەن ++++++++++++++++++++++ سەرناو: یەند ها نە سەردا ئارەزووی خەدەنگ یەند ها نە سەردا ئارەزووی خەدەنگ نەزدیکەن لوای تۆی ئەلحەد تەنگ فیدات بام سا دەی غەزاڵەی دڵبەر هەوادەر پەرێم تیر پڕ ئەسەر چەنی تەئسیری سەر وە فەنا بەر بەڵ بەو زامەوە بشوون وە مەحشەر ++++++++++++++++++++++ سەرناو: دەشتێ کە دڵبەر پێشدا کەرۆ گەشت دەشتێ کە دڵبەر پێشدا کەرۆ گەشت چێشەن تەفاوەت ئەو دەشتە و بەهەشت؟ ++++++++++++++++++++++