شاعیر: موفتی
کتێب: دیوانی موفتی پێنجوێنی
سەرناو: کوردە لەمەو لا هۆشێ بێنە سەر

کوردە لەمەو لا هۆشێ بێنە سەر
لادە لە بەزمی بێهوودە و سەمەر


تا ئێستە ئاخر بە جەنگ و بە شەڕ
چی کەوتە دەستت بە غەیری زەرەر؟ 

***

ئەم ڕۆژە ڕۆژی ئەقڵ و زمانە
نەک ڕۆژی شەڕی تیر و کەوانە


ئەگەر تۆ هیوات بە بەگ و خانە
تۆ ماڵوێران و ئەو سەرگەردانە

***

ئەگەر ئەترسی لە تورک و عەجەم
لەجیاتی تفەنگ بە نووکی قەڵەم


هاوار کە بۆخۆت دانیشە بێ خەم
ئاواتی دڵتی بۆ بێنە بەرهەم

***

ئەوانیش وەک تۆ دەستندەخوارن
لەئاستی خەڵکی کز و هەژارن


بێ دەست و بێ پێ هەروەکوو مارن
یەک لە لەندەنی ئاغای هەزارن

***

ئاغای ئەم دنیایە سیانە یا دوو
ئاغایی لە دەس باقی تر دەرچوو


وەک یەکی لێ دێت هەموو زووبەزوو
بێهودە ئیتر خۆت نەدەی بە شوو

***

گەر لە هۆزەکەت پیاوی ژیرت بێ
ڕەنگە ئارەزووی دڵ دەسگیرت بێ


قەڵەم، تفەنگ و تۆپ و تیرت بێ
هەر قەڵەم ئاغا و شێخ و میرت بێ

***

بانەمان وێران، مەریوان بێ نان
هەورامان نیوەی شێت و سەرگەردان


خانی پوڵپەرست بۆ خۆشی ژیان
هێنایە بەرهەم دەردی بێ دەرمان

***

کوردە بە زاتی خوای تاک و تەنیا
ناگەیتە هەوار بە هەرا و هوریا


بزن بەخێو کەی لە دەشت و سەحرا
چاکترە لە شەڕ بۆ دین و دنیا

***

خان کە وا هەوڵی ناخۆشی ئەکا
بۆ مەعاشەکەی تێکۆشی ئەکا


بە ناوی قەومی سڕپۆشی ئەکا
پارەیە شێت و بێهۆشی ئەکا

***

ئەی بۆ لە پاشا کە خۆی ئەنوێنێ
دێ ئەسووتێنێ گا ئەفڕێنێ


تۆوی بەدبەختیت بۆ دائەچێنێ
ڕۆحت بەجارێ لە ڕەگ دەردێنێ

++++++++++++++++++++++