شاعیر: موفتی
کتێب: دیوانی موفتی پێنجوێنی
سەرناو: ساڵان لەم فەسڵە سەیرانی و چەم بوو

ساڵان لەم فەسڵە سەیرانی و چەم بوو
ئاهەنگ و شایی عالەم بێ خەم بوو


کومپیالەمان تا هەزار چەم بوو
دەهەزار دینار لە لامان کەم بوو

***

چونکە ئەباری وەک تەرزە و باران
لیرەی ڕووسیا و قڕانی ئێران


ڕیاڵ بە دەستە وەک گەڵای داران
دینار بۆ کاوڕ تا شەک تا بەران

***

خسووسەن خوری و تا کەتیرە و موو
سەعلەب و گەز و دووبەرە و مازوو


ڕۆژی دە لۆری لێرە دەرئەچوو
ئەبوو بە دینار هەمووی زووبەزوو

***

ئیتر لە خۆشی دینار بە لێشاو
گاڵتە و یاری وەک تەیری سەر ئاو


خەیاڵمان ئەکرد وەک خەیاڵ پڵاو
ماڵ ئاوڕشێن کەین بە عەتر و گوڵاو

***

خانوو تەبدیل کەین بە مۆدەی تازە
لە خارج بێنن دەرگا و دەروازە


لەناویا دانێن سندووق ئاوازە
لێدا ئەو کەسەی ئوستادەی تازە

***

هەوای سووریا کەوتووە سەرمان
لیباسی ئەوان بکەین لەبەرمان


بڕۆین بۆ سەیران بۆ جەبەل لوبنان
بێ غەم سەر بنێین چەند ڕۆژ چەند زەمان

***

هەموومان مەستی شەرابی نەو بووین
عاشق بە ڕۆژ و بێزار لە شەو بووین


دۆست هۆشیاری دەرمەن بە خەو بووین
قاقای پێکەنین وەک نێرەکەو بووین

***

ئێستە ئەوانەی پەروەردەی نازن
بێ بازار پۆل پۆل خەریکی ڕازن


شەماڵی ڕەحمەت بێ بە هاوارمان
بەڵکوو نەلەخشێ چیغ و دەوارمان

++++++++++++++++++++++