شاعیر: حەمدی
کتێب: غەزەل
سەرناو: غەرامافۆنەکی دەستی زەمانم نیمە تاوانم

غەرامافۆنەکی دەستی زەمانم نیمە تاوانم
کە تەئریخی بەشەر موحتاجە گوێ بگرێ لە قاوانم


سەری موویێ لە تەسویری منا نابێ زیاد و کەم
دڵە عەینی فتۆغرافە وەکوو دووربینە چاوانم


لە ئیعجازی نبووەت فەرقی کرداری زەمان ناکەم
چی بینم بەحری ساوابێ چی بێتە بەحری ساوانم


ئەلەرزم من لە هاژەی زەڵم و لۆمە و تانجەڕۆی تەعنە
لە خیلقەتدا مەگەر من داری بێ بەینی دوو ئاوانم


بچووک هەر کاری گەورە و گەورە هەر کاری بچووکی کرد
خەریکی مەبحەسی گەورە و بچووکی وەخت و ئاوانم


جیهان بێ باک و ئەربابی جیهان بێ هۆش و بێ پەروا
مەگەر مامە خەمەم حەمدی کەوا غەمخۆری نادانم

++++++++++++++++++++++