شاعیر: حەمدی کتێب: پێنج خشتەکی سەرناو: دەریایی حوسن و نازی مەوج و حوبابی هێنا سەبارەت: پێنج خشتەکی لەسەر شیعری سالم دەریایی حوسن و نازی مەوج و حوبابی هێنا یەعنی لە زلف و پەرچەم عوود و ڕووبابی هێنا وەمزانی بۆ چراخان مەلەک شەهابی هێنا «ساقی لە پەردە دەرهات جامێ شەرابی هێنا دڵ خیرە ما لە حیرەت ماه ئافتابی هێنا» مەجمووعی سالکی عەشق کاری بە قەبز و بەستە حیکمەت بە تاڵە هەیئەت ئەوهامی بەرز و پەستە لەم ئەمرەدا ئەرەستۆ بڕوانە چی بە دەستە «تیماری چاکی سینەم ڕاجیع بە چاوی مەستە بەختیش موافقی عەشق بۆ من خراپی هێنا» چ موشتەعیل چ موزلیم ئەجرامی ئەرز و کەیوان جوملە میسالی شەونم مەحوون بە ڕۆژی ڕەخشان ڕوو گەر نەدەی بەجێ بێ نەک هەر بەمن بە هەموان «یەک زەڕڕە عەکسی پرتەو دەرکەوت و تووری سووتان ئاوێنە سەخت ڕوو بوو لەو عەکسە تابی هێنا» ئەم شۆر و سوورە نەکرا ئەزەل لەگەڵ ئەلەستا قەت ناکرێ قیامەت ڕۆژی حەشر کە هەستا ڕۆحم لە شادییا چوو دڵم لە غەم نەوەستا «یارم لە دەر دەروون هات دەستی ڕەقیب لە دەستا غەمناک و شادمانم ڕەحمەت عەزابی هێنا» ویستم کە تاجی سەرنێم تاجم لەسەر فڕێ دا سەر بەرزیم ئارەزوو بوو سەرم لە پشتی پێ دا ئەم جوزئی ئیختیارە جیلوەی بە بەختی کێ دا «بۆ تۆبە سویی مەسجید هاتم بچم لە ڕێدا بۆ کۆیی مەی فرۆشان قیسمەت شیتابی هێنا» مردم ئەمەندە کردم نوێژی ڕیا و تەهلیل سووتام ئەمەندە خوێندم ئەسمائی حوببی تەعجیل ڕامم بەوە پەری ئەو فکری نەکردوە تەعدیل «ڕوو هەر لە من ئەپۆشێ وا حاڵییە کە جبریل هەر خاسە بۆ من و ئەو ئایەی حیجابی هێنا» نەیدی بە چاوی نێرگس نەیبیست بە گوێچکەیی گوڵ ئەم بەزم و نەزمە عومری نووحیشی بۆ بێ بولبول یاقووت و دوڕڕی حەمدی هەڵڕشت بەبێ تەئەممول «وەی وەی چ مەجلیسێ بوو دوێنێ لە دیدە و دڵ دڵبەر شەرابی گێڕا سالم کەبابی هێنا» ساقی لە پەردە دەرهات، جامی شەرابی هێنا دڵ خیرە ما لە حیرەت، مەه ئافتابی هێنا یەک زەڕە عەکسی پەڕتەو دەرکەوت و تووری سووتاند ئایینە سەختڕوو بوو لەو عەکسە تابی هێنا تیماری چاکی سینەم ڕاجیع بە چاوی مەستە بەختیش موافقی عیشق بۆ من خەرابی هێنا یارم لە دەر دەروون هات دەستی ڕەقیب لە دەستا غەمناک و شادمانم ڕەحمەت عەزابی هێنا بۆ تۆبە سوویی مەسجید هاتم بچم لەڕێدا بۆ کۆیی مەیفرۆشان عەزمم شتابی هێنا ڕوو هەر لە من دەپۆشێ وا حاڵییە کە جیبریل هەر خاسسە بۆ من و ئەو ئایەی حیجابی هێنا وەهـ وەهـ چ مەجلیسێ بوو دوێشەو لە دیدە و دڵ دڵبەر شەڕابی گێڕا سالم کەبابی هێنا «سالم» ++++++++++++++++++++++ سەرناو: ئەی خاکی وەتەن بێ فەرەح و زەوق و سەفا خۆت ئەی خاکی وەتەن بێ فەرەح و زەوق و سەفا خۆت پڕ حادیسە مەحکوومی هەموو حوکمی قەزا خۆت بازیچەیی سەرپەنجەیی ئەربابی ڕیا خۆت بێ ئۆردوو بەبێ زەمزەمەیی شاه و سەرا خۆت سەد ئاه کە بوویتە هەدەفی دەرد و بەڵا خۆت ئەم کوردە ئەبێ دائیمی هەر قوڕ بەسەرا کەن هەر جارە لە گونیە ئەبێ بەرگی بەبەرا کەن وەک تەعزییە ئەلواحی ڕەش و شین بەدەرا کەن پێویستی چییە دوژمنی خۆیان بە برا کەن عالەم کە بڵێن ساحبی ئەولاد و برا خۆت گەر وا بێ تەمەددون من و وەزعییەتی وەحشەت سەد خۆزگە بە زوڵمەت ئەمە بێ حاڵی عەداڵەت دەوڵەت ئەمە بێ ڕەحمەتی سەدبارە لە نەگبەت دەرمانی نییە عاجزە لەم عیللەتە حیکمەت چ بکەم، چ بڵێم ئێستەکە مەحکوومی فەنا خۆت بێ دەرپێ ئەبینم بوونە ساحێبی دەرپێ بێ جێ هەموو دیارن بوونە ساحێبی ڕێ و جێ ئاساری نەما شوێنی کورد بوونەتە ژێر پێ فەوتاوە نەزم ون بووە من کێم و ئەتۆ کێ بێ عالیم و بێ سانیع و بێ ئەهلی وەفا خۆت وەسفت کە نەگونجاوەتە ئەفکاری چ شاعیر نەوعی نییە، ئەرزت نییە شوبهەت بە مەنازیر وەک گەوهەرە بەرد و گڵەکەت عەینی جەواهیر بێ میسلە موحەققەق چ لە باتین چ لە زاهیر بەم خەزنەیەوە مونتەزیری لوتفی گەدا خۆت کوا تاقمەکە و وەلوەلەیی دەوری کەریم خان کوا دوازدە سوارەیی بەبە مەشهوری مەریوان کوا فیرقەیی بتلیسی هەواخواهی بەدرخان کوا میللەتەکەی موتتەفیقی دەورەی تورکان بێ پیاو و بەبێ کۆمەڵ و جێما و جیا خۆت هاوسێ هەموو وەک داڵن و ئەم کوردە وەکوو لاک چنگیان لە جگەرگاهی هەموو داوە بەبێ باک بێ خوێنە گوڵی زەرد و زەعیفە وەکوو خاشاک حەمدی دە بپێوە قوڕ و سنگت بکە چاک چاک بێ قەوم و وەتەن پڕ ئەسەف و دەرد و جەفا خۆت ++++++++++++++++++++++ سەرناو: لە ئەووەڵ دەرسەوە من گوێ لە حەرفی ئەلف و بێ دەگرم سەبارەت: پێنج خشتەکی لەسەر شیعری مەحوی لە ئەووەڵ دەرسەوە من گوێ لە حەرفی ئەلف و بێ دەگرم ئەبم فەرموویە دەستی دڵ بە چاکی بێ وتێ دەگرم بتی چاکە دەلیلم بێ زەلیلم دەستی پێ دەگرم «لە شاگردانی کۆڕی عەشقم و جێ هەر لەوێ دەگرم کە من مشتێ چڵوچێوم بەچی بم کەڵکی کێ دەگرم» بە غەیری زەڕڕە گۆشە جیلوەیی داوە بە بەختی کێ ئەویش سەرگەردی یێکە لەم هەموو ئەرزەی خودا بێ جێ غوباری دامەنە دەرمانی سەر یا سەندەڵی بەر پێ «نەگەییە دامەنی دەستی دوعا جا دەبمە خاکی ڕێی تەریقەی گۆشەگیری بەردەدەم ئەمجارە ڕێ دەگرم» نەوەک بولبول لە خەندەی غونچە هەڵساوم سبەینێ زوو نەوەک پەروانە ئاگر بەربووە جەرگم لە شەمعی ڕوو نە ساڕێژی ئەکا ڕێشی دڵم وەک شانە نە تاری موو «کە دادی یەئسی خۆمم بردە لا ئەم عارفە توند بوو وتی ئاخر سبەینێ جەژنە خوێنی تۆ لە پێ دەگرم» کە دەستم کردە مل مینا و نۆشیم خوێنی لێوی جام لە ئەوجی مەستییا کەوتم ئیتر نەمدیوە سوبح و شام میسالی شاخی مەرجانی کە بگرێ کارەبای ناکام «لە ڕووسووری عیبادەت لام و ڕووزەردی خەجاڵەت مام بە ناوی سێوی ناوم باغەوان و من بەهێ دەگرم» کە گوڵزاری جیهانی عەشق کرایە ئەم چراخانە یەکێ ڕێی بولبولی گرت و یەکێ ئایینی پەروانە ئوسولی کیشوەری عەشقە ئەما شەرتی نەوەستانە «لەسەرخۆچوونە شەیدابوونە قوڕپێوانە سووتانە هەتا مردن مەحەببەت ئیشی زۆرە ڕێزی لێ دەگرم» بەسەرما پێ دەنێ لەم ئەرزەدا بێ ڕێم دەڵێ یا شێخ کە دەستی کەوتە کار عادەتیەتی جێ پێم دەڵێ یا شێخ دەڵێی نوورە لە فانۆسی دڵا بێ جێم دەڵێ یا شێخ «چ شۆخە ئاگرم تێ بەردەدات و پێم دەڵێ یا شێخ بە خاشاکی دەوت شوعلە عەسامە دەستی پێ دەگرم» بەیەک غەمزە دەماری جەرگ و دڵمی ئەنجنی ورد ورد بەری بەست دیدەکانم جوێباری خوێنی پێدا برد تەعەججوب مام ڕەقیب لەم حاڵەتە بۆ چی لە داخا مرد «کە سینەی ڕێشمی بەو تیغی نازەی ئەنجن ئەنجن کرد وتی پەژموردەیە ئەم لالەزارە ئاوی تێ دەگرم» تەماشای ڕشتەکە عەقڵت هەیە مەنواڕە نەرمی شەرم هەزار سەر ڕەق ئەسیری پەنجەیێکی تاقە یەک سەر نەرم نەبوو غەرقی عەرەق دوژمن نیشانم دا کە بەحری شەرم «لە پاداشی قسەی سەردا هەمە ئاه و هەناسەی گەرم کەسێ شێتانە بەردم تێ گرێ من بەرقی تێ دەگرم» یەکێ مەستی مەیی کیبرە یەکێ مەخمووری ئافاتە یەکێ کەماڵی نوقسانە یەکێ نوقسان کەماڵاتە لە هەم بەزمی وەها حەمدی تەرەب نەوعی مەحالاتە «شوکر هوشیارە مەحوی تێ دەگا دنیا خەراباتە کە بەدمەستیی بکا ئەهلی خراپەی بۆ چی لێ دەگرم» دیارم دەیری عیشقە، جێ بە سووتن بێ لە وێ دەگرم کە من مشتێ چڵ و چێوم، بە چی بم، کەڵکی کێ دەگرم! نەگەییە دامەنی دەستی دوعا، جا دەبمە خاکی ڕێی تەریقەی گۆشەگیری بەردەدەم، ئەمجارە ڕێ دەگرم کە دادی یەئسی خۆمم بردە لا، ئەم عارفە توند بوو وتی ئاخر سبەینێ جەژنە، خوێنی تۆ لە پێ دەگرم لە ڕووسووری عیبادەت لام و ڕووزەردی خەجاڵەت مام بە ناوی سێوی ناوم باغەوان و من بەهێ دەگرم لەسەرخۆ چوونە، شەیدا بوونە، قوڕ پێوانە، سووتانە هەتا مردن، مەحەببەت ئێشی زۆرە، ڕیزی لێ دەگرم چ شۆخە ئاگرم تێ بەردەدات و پێم دەڵێ: یا شێخ! بە خاشاکی دەوت شوعلە، عەسامە دەستی پێ دەگرم کە سینەی ڕێشمی بەو تێغی نازە ئەنجن ئەنجن کرد وتی: پەژموردەیە ئەم لالەزارە، ئاوی تێ دەگرم لە پاداشتی قسەی سەردا هەمە ئاه و هەناسەی گەرم کەسێ شێتانە بەردم تێ گرێ، من بەرقی تێ دەگرم شوکر هوشیارە مەحوی، تێ دەگا دنیا خەراباتە کە بەدمەستی بکا ئەهلی، خراپەی بۆچی لێ دەگرم! «مەحوی» ++++++++++++++++++++++ سەرناو: وەرن یاران ئەجەل ڕەهبەرمە ئەمشەو سەبارەت: پێنج خشتەکی لەسەر شیعری کوردی وەرن یاران ئەجەل ڕەهبەرمە ئەمشەو فیراقە ئەووەڵی ئاخرمە ئەمشەو خەیاڵی بەزمەکەی قەیسەرمە ئەمشەو «سەدای سەمتووری کەللەم گەرمە ئەمشەو چریکە و بانگی دڵ بێ شەرمە ئەمشەو» تەبیعەت بەرزە زاهیر گەرچی پەستم نەوەی ئەو شێرەکەی ڕۆژی ئەلەستم لە باڵا بۆ بەڵا پشتێن ئەبەستم «بە نینۆک کاری فەرهاد دێ لە دەستم وەها شاهوولە سینەم نەرمە ئەمشەو» شەوی هیجرە دڵم زامار و مەحزوون دەروونم ئاگری بەردایە گەردوون نەماوە ڕاحەت و عەقڵ و سەبر چوون «لە تەنیایی بە یادی ڕۆحی مەجنوون خەیاڵی گەشتی دەشت و دەرمە ئەمشەو» لەسەر عەقڵ و لە دڵ ڕاحەت کە دەرچن ئیتر نامینێ فەرقی ژین و مردن حەقی وایە کە عاشق دەربەدەر بن «ئەگەرچی یار و یاوەر بوونە دوژمن غەمی بێ یاری بوو یاوەرمە ئەمشەو» ڕەقیب و ناحەزت مەسروور خەندان ڕەفیق و دۆستانت مات و حەیران منیش سووتاوە جەرگم بۆتە بریان «لەسەر ڕووم زامی ناخوون نەخشی تۆی بەست تەمای سنعاتەکەی ئازەرمە ئەمشەو» بە کوشتن عاشقانت کرد سەرەفراز منت هەر هێشتەوە بۆ عیشوە و ناز وەکوو کەو خۆی دەکا حەمدی فیدات باز «سەرم شۆری ویساڵی کەوتە سەر باز دیسان کوردی کە دەردی سەرمە ئەمشەو» سەدای سەمتوورە کەللەم گەرمە ئەمشەو چریکەی بانگی دڵ بێ شەرمە ئەمشەو بە ناخون کاری فەرهاد دێ لە دەستم وەها شاهۆ لە ناڵەم گەرمە ئەمشەو لە تەنیایی بە یادی ڕۆحی مەجنوون خەیاڵی گەشتی دەشت و دەرمە ئەمشەو غوباری خاکی وا حەق گەر بەهەشت بێ لە دەرگای تۆ خەبەر ئاوەرمە ئەمشەو دڵم وەک حاکمی مەغدوورە قوربان تەمای سەنعاتەکەی ئازەرمە ئەمشەو ئەگەرچی یار و یاوەر بوون بە دوژمن خەمی بێ یاوەری یاوەرمە ئەمشەو لە دەوریشم گەڕا پەروانە ناکام لە سەر ڕێی وەسڵی نووری هیجرە ئەمشەو کە چونکە بۆی ویساڵی تۆی تێدایە نەسیمی سوبح خەبەر ئاوەرمە ئەمشەو سەرم شۆری ویساڵی کەوتە سەر باز دیسان کوردی لە دەردی سەرمە ئەمشەو «کوردی» ++++++++++++++++++++++ سەرناو: بۆ کەوتە ئەم سەمایە نەڕووخێ خودا فەلەک سەبارەت: پێنج خشتەکی لەسەر شیعری مەحوی بۆ کەوتە ئەم سەمایە نەڕووخێ خودا فەلەک کەوتوونە ئەم خەلایە دەبوورێنەوە مەلەک ڕەنگە شکابێ پشتی زەمین گەردنی سەمەک «ئەو سەروی نازە تەوسەنی هێنایە تاز و تەک هەستا قیامەت و فەلەک ئەستوونییە گەرەک» ڕەببی چ زەمزەمەیی زەنگی بەزمی عیشق ئارامی ڕۆحە قووەتی دڵ دەنگی بەزمی عیشق بەم نەوعە ڕێژراوە ئەزەل ڕەنگی بەزمی عیشق «ئەی دڵ بناڵە سازی بدە چەنگی بەزمی عیشق مەی خوێنی جەرگە ناڵەیی مەحزوونییە گەرەک» ئەهلی هونەر ئەوەندە سەری خستە سەرسەری دنیا گەڕا لە دەوری سەری مەردی سەرسەری دوێنێ قەلەندەری هونەر ئەیکرد سکەندەری «ئەمڕۆ لە کن زەمانە هونەر بۆتە قەشمەریی شێری ژیانی بۆچییە مەیموونییە گەرەک» تێ دەفکرم دەمێکە لە مەخلووقی کۆن و نوێش نەک بەر لە دیجلە تاکوو دەگاتە خەتتی سوێش نەمدی بەدیدە هەرچی دەکەی گوێ تەقە بە جوێش «فیترەت بڵند و پایە بڵندم نەدی بە گوێش گەردوون ئەوەندە دوونە کە هەر دوونییە گەرەک» لەم بارەگاهە دەرکە لەسەر ئیشتیاقی بوون هەر هاتووچۆیە ڕەسمی ئەوانەی کە هاتووچوون عادەت نییە تەئەننی مەکە عەیبە چەند و چوون «تینوو بە خوێنی عاشقە ئەی دڵ ببە بە خوێن ئەو لێوە مژدە بێ دڵی پڕ خوونییە گەرەک» عەشقە چ دەخلی ئەو بە گەدا و بە شاهەوە یا بەم جەلالە کەوتە دڵی میهر و ماهەوە پێویستییە بە گریەی ناگاه و گاهەوە «قوم هەر دەبێ لە خوێنی جگەردا بە ئاهەوە ئەو مەستی غەفڵەتە لەبی مەیگونییە گەرەک» زاهید بەخیل و تێ نەگەیشتوو بوو دەست و برد هەر بیستی ڕۆحی ڕۆیی لە داخا کە کەوت و مرد سوودی نەبوو کە حەمدی ئەمەی ئەرزی ئەو ئەکرد «دلبەر عەجەب نییە دڵی «مەحوی» بە دڵ کە برد ئەسکەندەری زەمانە فلاتوونییە گەرەک» ئەو سەروی نازە تەوسەنی هێنایە تاز و تەک هەستا قیامەت و فەلەک ئەستوونییە گەرەک ئەی دڵ بناڵە، ساز بدە چەنگی بەزمی عیشق مەی خوێنی جەرگە، ناڵەیی مەحزوونییە گەرەک ئەمڕۆ لە کن زەمانە هونەر بۆتە قەشمەری شێری ژیانی بۆ چیە، مەیموونییە گەرەک! فیترەت بڵند و پایە بڵندم نەدی، بە گوێش گەردوون ئەوەندە دوونە کە هەر دوونییە گەرەک تینوو بە خوێنی عاشقە، ئەی دڵ! ببە بە خوێن ئەو لێوە، مژدە بێ، دڵی پڕخوونییە گەرەک قوم هەر دەبێ لە خوێنی بگەردا بە ئاهەوە ئەو مەستی غەفڵەتە لەبی مەیگوونییە گەرەک دلبەر عەجەب نییە دڵی مەحوی بە دڵ کە برد ئەسکەندەری زەمانە فلاتوونییە گەرەک «مەحوی» ++++++++++++++++++++++ سەرناو: خەزنەیە ئاو و گڵت ساحبی دار و دەوەنی سەبارەت: وەڵام بۆ عەبدولخالیقی ئەسیری خەزنەیە ئاو و گڵت ساحبی دار و دەوەنی بە سەفا چەشنی بەهەشتی کەچی بەیتولحەزەنی جێگە سەیرانی عیراقی بەڵێ زۆر شۆخ و شەنی چونکە بێ پیاوی بە ئاشووبی خەریکی فیتەنی چۆنی ڕوو بێ کە بڵێ میللەتەکەت تۆ وەتەنی وەرە تۆ مەردی خوا بە هەڵیخە پیاوی چاک ساحبی تەبع و عەقڵ عامیلی عەزم و بێ باک نە وەکوو من وەکوو ئەم خەڵقە کە کەوتووین وەک لاک لە لەکێکا کە نییە ئەهلی کیفایەت یەک تاک چۆنی ڕوو بێ کە بڵێ میللەتەکەت تۆ وەتەنی وەرە بنواڕنە ئەم وەزعە بە دیققەت سەیرە میللەتێ بەم زلییە هێندە قەدیم و قەیرە وەکوو گۆ کەوتووەتە بەر شەق و لیسی غەیرە ئەمە حاڵە، ئەمە ژینە، شەڕە یاخۆ خەیرە چۆنی ڕوو بێ کە بڵێ میللەتەکەت تۆ وەتەنی گەورە بێ دەرکە، دەرک خاسە نەسیبی دوردە لە شەرابا نییە نەشئە نە شەهێنی دەردە بۆیە بەدبەختە گوناهی ئەمەیە ئەم کوردە کە نەبێ پیاوێ بڵێ وادەی دەس و بردە چۆنی ڕوو بێ کە بڵێ میللەتەکەت تۆ وەتەنی سەبەبی ئاو و هەوا و گردی بڵاوی تۆیە تەفرەقەن میللەتەکەت دیارە فەقیرن بۆیە غەیرەیە دوژمنیان دوژمنیان بۆ خۆیە پێ لە پێوەندە کەوا تەوقیشی لەسەر ئەستۆیە چۆنی ڕوو بێ کە بڵێ میللەتەکەت تۆ وەتەنی لە دەمی هیچ کەسێکا نییە باس و ناوت هەر سەگێ هەڵسێ بەبێ ترس ئەکەوێتە ڕاوت مۆدەمان ڕۆیی بەسەرچوو بەسەری تۆ ناوت بۆ ژیان مونتەزیری لوتفە لە غەیرە چاوت چۆنی ڕوو بێ کە بڵێ میللەتەکەت تۆ وەتەنی سەبەبی حاڵەتی تۆیە لە ژیانا بێزار وەکوو کوڕمردوو خەریکی ئەسەفە و شیوەن و زار حەمدی شێتانە کە ئەتڵێتەوە میسلی بیمار نییە بێ چارە حەکیمێ نییە چاری ناچار چۆنی ڕوو بێ کە بڵێ میللەتەکەت تۆ وەتەنی ++++++++++++++++++++++ سەرناو: تیری برژانگی لەلام وایە سەهل دڵ هەڵدرێ سەبارەت: پێنج خشتەکی لەسەر شیعری کوردی تیری برژانگی لەلام وایە سەهل دڵ هەڵدرێ بەندی جەرگ و ڕشتەیی سەبر و تەحەمموول بپچڕێ باز بە چاوی جوانەوە ڕەنگە لە شەرما هەڵفڕێ «لاوی قەد لاولاوی من گەر بێ بەناز چاو هەڵبڕێ وا دەزانم شێخ لە من زووتر لە ئیمان وەرگەڕێ» لەم گرۆهی شێخە زاتەن کردبووم زووتر ویداع چونکە دەمزانی بە حیلە دەمخەنە سەر ڕێی تەماع تەکیە ئەنواعی دەسیسەی تیایە فابریقەی مەتاع «ڕۆژێ بێ جام کرد و ساتێ چوومە لای شێخ بۆ سەماع وەک کوزە کەمتیاری پێ بێ ساعەتەن لایدام لە ڕێ» عومری خەڵقیان هەر بە وەعدەی هیچ پووچ داوە بە باد حیرەتم بەم تەفرەدانە بۆ ئەبن مەمنوون و شاد دوێنێ یا برسی بووە نەیماوە خەرجی ئاو و زاد «واعیز ئەمڕۆ هەم دیسان حەڵواخۆری کەوتۆتە یاد نەک لە ڕێگەت لا بدا گوێ مەگرە لێی با هەڵتڕێ» فیکر و زیکرم یارە مەعلوومە لە عالەم ڕۆز و شەب گەر کفر نەبوایە ئەموت ئەیپەرستم میسلی ڕەب چی بڵێم جوزئی تەبیعەتیە بەبێ بوونی سەبەب «باز ڕەقیب دەستی بە فیشاڵ کردەوە وەک بای غەزەب بۆیەکا ئەمشەو لە بەزمی یار چرای من ناگەڕێ» نییەتی تۆ خێرە با عالەم بزانێ عامیلی بمکوژی ئەمجا لەسەرچی توخوا تۆ ماتەلی واهیمە گرتووتی یاخۆ هەر بە فکری باتیلی «خوێنی من بۆ شوێن ونێ دەسڕی بە پەنجەی قاتیلی وەختە خۆی ئەنگوشت نوما کا لێی گەڕێن با بیسڕی» خەڵقی ژینیان مەتڵەبە بۆ کەیف و سەیرانی جیهان ئارەزووم نە ژیانە من تا بچمە ڕیزی عاشقان عاشقانی چونکە کوشتووە مامەوە من بۆ نیشان «تیغ بە ملما دێنێ بە درۆ پێم دەڵێ نابڕێ قوبان تیغی ئەو دەبڕێ بەڵا هاوارە بەختم نابڕێ» توخوا حەمدی بە غەیری مەیکەدە بۆ کوێ چویی عاشقی مەیخوارە نابێ کردبێتی بەدخویی کفر و ئیمان باس ئەکەی نەتماوە مەیلی کەم دویی «وای دەزانی ناسکە سەر چاوی کوردی پای نەنا وا بە پا خۆشە بووە بیشیکوتن دەرناپەڕێ» لاوی قەد لاو لاوی من گەر بێ بە ناز چاو هەڵبڕێ وا دەزانم شێخ لە من زووتر لە ئیمان وەرگەڕێ ڕۆژێ بێجام کرد و ساتێ چوومە لای شێخ بۆ سەماع وەک کوزە کەمتیاری پێ بێ دەسبەجێ لایدام لەڕێ واعیز ئەمڕۆکەش ئەوا هەڵواخوری کەوتۆتە یاد نەک لە ڕێگەت لابدا گوێ مەگرە لێی با هەڵتڕێ وا ڕەقیب دەستی بە فیشاڵ کردەوە وەک بای غەزەب بۆیە وا ئەمشەو لە بەزمی یار چرای من ناگڕێ خوێنی من بۆ شوێن ونی دەسڕێ بە پەنجەی قاتڵی وەختە خۆی ئەنگوشت نما کا لێی گەڕێ با بیبڕێ تیغ بە ملما دێنێ و بە درۆ دەڵێ نابڕێ قوبان تیغی تۆ بوڕڕەندەیە هاوارە بەختم نابڕێ پێم دەڵێ کوردی خۆ تۆ عاقڵ بووی بۆچ شێت بووگی؟ سیحری چاوی خۆت نەدیوە، حەقتە لۆمەم کەی لە ڕێ «کوردی» ++++++++++++++++++++++ سەرناو: نە هاودەردێ هەبوو فکری بە حاڵم کا نە غەمخوارێ سەبارەت: پێنج خشتەکی لەسەر شیعری کوردی هەزار حەقم وت و نەشبووم وەکوو مەنسوور بە سەردارێ نەما کەس دامەنی نەگرم پەنام بردە هەموو شارێ نە هاودەردێ هەبوو فکری بە حاڵم کا نە غەمخوارێ «ئەمان مردم عیلاجێ سا لە ڕێی پێغەمبەرا چارێ ویساڵ یا قەتل یا تەسکین لە هەر سێ بۆم بکەن کارێ» چ بۆ وەسڵ و چ بۆ کوشتن گەلێکم دیوە من وادەی لە بەزمی خاسە بۆ من پڕ لە زەهری کردووە بادەی لە ڕێی خوادا بڵێن گەر بیکوژی ئەو وەختە ئازادەی «وەها سووتاوم ئەسڵەن تابی فریادم نەما سادەی ڕەفیقان نیوە سووتن ئێوە نامەرد عەرزە هاوارێ» نەفەس سینە و کەمانێکە دەری خست شۆری مەفتوونی سەراپا بێ سەر و پا پێم ئەکا تەمسیلی مەجنوونی کەلامم تێکەڵ و پێکەڵ شیعر نەیماوە مەزموونی «لە کونجی سینە دەنگی ئای و ئۆی دڵ دێ بە مەحزوونی وێران بێ نەمدی ساتێ لێی نەیێ ناڵەی بریندارێ» چ سیحرێ بوو بە عیشوە عالەمێکت شێت و شەیدا کرد بە حوسنی یووسفی خیلقەت لەبەر چی تووشی سەودا کرد کەسێ ناڵێ سەنەم ئەم شۆری عەشقەت بۆ چی بەرپا کرد «ئەلای هەر کەس ئەچم مەنعم دەکا خۆت بۆ چی ڕیسوا کرد درێغ کوا حاڵزانێ ڕەببی تووشم بێنی بیمارێ» لە خوبانا نیگار وەک خۆر لە ئەنجومدا بەڵێ تاکە لەبەر ئەم حوسنەیە ئەو شۆخە بێ ئینساف و بێ باکە بە دائیم هەر جەفا و جەوری کە ئەیکا وا هەمووی چاکە «لە ژێر باری غەما وا شانی سەبرم ڕێشە ئێستاکە فیراقی یار لەبەر ئاخر شەڕی لێم بۆتە سەربارێ» ئەمە کاری خودایە دامەنی هێناوەتە بەر پێت وەکوو گەرد دامەنم گرتووی و ماچی ئەکەم بەر پێت مەڵێ چاکەت چییە تۆ یا بکەم ئەم چاکەیە بۆ کێت «سەبا یارانی مەجلیس گەر هەواڵی من بپرسن لێت بڵێ کێشایە مەیخانە دوو چاوی بێچووە عەییارێ» لە مەیدانی عەشقدا ئەم قسانە فەرموو کەی کوردی وەیا کێ بوو لە شاعیردا وەکوو حەمدی دەس و بردی بە تەخمیسی کە تەسدیقی بکا ئەم نەزمە بوو وێردی «دوڕ و یاقووت ئەبارێ لەم کەلامە شیرنەی کوردی خوا سا کوا لە دنیادا قەدرزان و خریدارێ» ئەمان! مردم عیلاجێ، سا لە ڕێی پێغەمبەرا چارێ ویسال یا قەتڵ یا تەسکین لە هەر سێ بۆم بکەن کارێ وەها سووتاوم ئەسڵەن تابی فەریادم نەما سادەی ڕەفیقان نیوە سووتن، ئێوە نامەرد، عەرزە هاوارێ لە کونجی سینە دەنگی ئای و ئۆی دڵ دێ بە مەحزوونی وێران بێ، نەمدی ساتێ لێی نەیە ناڵەی بریندارێ ئەلای هەرکەس دەچم مەنعم دەکا خۆت بۆچی ڕیسوا کرد؟ درێغ کوا حاڵ زانێ؟ ڕەببی تووشم بێنی بیمارێ لە ژێر باری خەما وا شانی سەبرم ڕێشە ئێستاکە فیراقی یار لەبەر ئاخر شەڕی لێم بوو بە سەربارێ لە نەزعا پێی دەڵێم قوربان جەفا بەس بێ دەڵێ کافر ئەمە چیت دیگە؟ تۆ سەگ مەرگی کارم ماگە پێت جارێ سەبا! یارانی مەجلیس گەر هەواڵی من دەپرسن لێت بڵێ کێشاویەتە مەیخانە چاوی بێچووە عەییارێ دوڕ و یاقوت دەبارێ لەم کەلامە شیرینەی کوردی خوا سا کوا لە دنیادا قەدر زانێ، خەریدارێ؟ «کوردی» ++++++++++++++++++++++