شاعیر: زێوەر
کتێب: دیوانی زێوەر
سەرناو: لە بەختی من ستەمکار و لەئیمە

لە بەختی من ستەمکار و لەئیمە
لەلای خەڵقی وەفادار و کەریمە


چ حاجەت من بڵێم، سەودازەدەی تۆم
بە حاڵی عاشقانی خۆی حەکیمە


نیشانگای تیری ئاهم وەقتی دووری
سەری کورسی و پێی عەرشی عەزیمە


لەگەڵ ئەو مەهجەبینەی من ڕەقیبم
دەڵێی تاووس و شەیتانی ڕەجیمە


چراغی شادمانی من هەمیشە
لە ئەترافی شیمالی غەم موقیمە


بەهەشت و کەوسەری من وەسڵی تۆیە
ئەما دووری لە تۆ ناری جەحیمە


چلۆن لادەم لە ڕێگای عەشقبازی؟ 
بە فەتوای من صراط المستقیم ە


لەگەڵ زێوەر وەفاداری لەتیفە
کە چونکە جانفیدایێکی قەدیمە

++++++++++++++++++++++