شاعیر: زێوەر
کتێب: دیوانی زێوەر
سەرناو: دڵی من دەرحەقی تۆ هێندە سافە

دڵی من دەرحەقی تۆ هێندە سافە
وەکوو زاهید خەریکی ئیعتیکافە


مەکە باوەڕ بە قەولی دوشمنانم
قسەی دوشمن هەموو لاف و گەزافە


دوو زولفت مووبەموو هاتوون بەیەکدا
لەبۆ ئەم گەردنە تەوق و تەنافە


لەگەڵ وەسڵم بە تۆ بوو ڕۆحم ئەڕوا
وەکوو نوونی مثنی لای ئیزافە


وەرە زێوەر نەسیحەت بگرە گوێ خۆت
لە ئەم ڕێگایە لادە ڕێی خیلافە

++++++++++++++++++++++