شاعیر: زێوەر
کتێب: دیوانی زێوەر
سەرناو: حەکیمی دەردی من ئەو چاوەیە قەت دوختەرم ناوێ

حەکیمی دەردی من ئەو چاوەیە قەت دوختەرم ناوێ
لە ڕێگای عەشقی تۆدا گوم ببم یەک ڕەهبەرم ناوێ


تەماشای زولفی ئاڵۆزاو و سەرمینایی گەردن کەم
لە سەحنی گوڵشەنا هیچ سەیری عوود و عەنبەرم ناوێ


سەعاتێ هەمنشینی تۆ ببم ئەقسایی ئامالە
ئیتر حوور و قوسوور و لەحمی تەیر و کەوسەرم ناوێ


بە وەعزی واعیز ئەمڕۆ چونکە عالەم حاڵی گۆڕاوە
هەتا موشکیی عەلیخانی بوەستێ مێزەرم ناوێ


ئەگەر دوو سێوی زیوینی لە باخی سینەدا دەرخا
هەتاکوو ڕۆژی مردن شەرتە تەختی سەنجەرم ناوێ


ئەسیری حوسنی تۆم، ئازادی تەعنەی عالەمم بیللا
لەباتی خاکی بەردەرگانەکەت سیم و زەڕم ناوێ


تەقەی دەف، حەلقەیی دەروێش، ئەڵێی نانێکی بێ خوێیە
کە نووری مەعریفەت گوم کەم چراغی ئەختەرم ناوێ


لەڕێی تۆفانی زیللەتدا حەیاتی عارییەت مەرگە
لەگەڵ بێحورمەتیدا بارەگاهی قەیسەرم ناوێ

++++++++++++++++++++++